" የነዳጅ ዋጋ በነበረበት ይቀጥላል " - ሚኒስቴሩ

የሐምሌ ወር የነዳጅ ምርቶች የችርቻሮ መሸጫ ዋጋ በነበረበት እንደሚቀጥል የንግድና ቀጣናዊ ትስስር ሚኒስቴር ገለጸ።

የሐምሌ ወር የነዳጅ ምርቶች የችርቻሮ መሸጫ ዋጋ ከዛሬ ሰኔ 21 ቀን 2017 ዓ.ም ጀምሮ በሰኔ ወር ሲሸጥ በነበረበት የመሽጫ ዋጋ እንዲቀጥል በመንግሥት መወሰኑን አሳውቋል።

ሚኒስቴሩ የነዳጅ ማደያዎች እና ኩባንያዎች በነዳጅ ውጤቶች ግብይት አዋጁና በአሠራር መመሪያው መሠረት ውሳኔውን ተግባራዊ እንዲያደርጉ አሳስቧል።

@tikvahethiopia

" በእጀባ ተማሪዎችን የጫኑ 6 የሚጠጉ የህዝብ ማመላለሻ አውቶቡሶች ደርሰው በሰላም ተመልሰዋል " - ሹፌሮች

ከሰኔ 16/2017 ዓ/ም በኃላ ተዘግቶ የሰነበተው የጎንደር መተማ መንገድ ዛሬ የ12ኛ ክፍል ተማሪዎችን የጫኑ ተሽከርካሪዎች በመከላከያ ሰራዊት ፤ በከባድ ጥበቃ ታጅበው ደርሰው እንደተመለሱ ሹፌሮች ለቲክቫህ ኢትዮጵያ ገለፁ።

ጥቃቱ በደረሰበት ወቅት በቦታው የነበረው አሽከርካሪ ከጥቃቱ በኃላ መንገዱ ተዘግቶ የቆየ ቢሆንም ዛሬ ሰኔ 21/2017 ዓ/ም የ12ኛ ክፍል ተማሪዎችን ከጎንደር መተማ ከመተማ ወደ ጎንደር ማመላለስ እንደቻሉ ለቲክቫህ ኢትዮጵያ ተናግሯል።

ሌላው ለደህንነቱ በመስጋት ስሙን እንዳንጠቅስ የጠየቀን አሽከርካሪ " እጀባው የተካሄደው በሀገር መከላከያ ሰራዊት ሲሆን ብዛት ባላቸው እንደ ስናይፕርና መትረየስ የመሳሰሉ የቡድን መሳሪያዎችን በጫኑ ተሽከርካሪዎች ነው " ብለዋል።

ይህው አሽከርካሪ ለቲክቫህ ኢትዮጵያ እንደተናገረው  " እኔን ጨምሮ ሌሎች ሹፌሮች በዚህ መስመር አንሄድም ብለን ብናምጽም የጎንደር ከተማ መናህሪያ  ስምሪት ክፍል በግዳጅ እንድንሄድ ስለታዘዝን ለመሄድ ተገደናል " ብሏል።

በእጀባ ተማሪዎችን የጫኑ 6 የሚጠጉ የህዝብ ማመላለሻ አውቶቡሶች ደርሰው በሰላም መመለሳቸውን አሽከርካሪዎቹ አክለው ገልፀዋል።

በዚሁ መንገድ ሰኔ 16/2017 ዓ/ም እና 18 2017 ዓ/ም በታጣቂዎች በተፈፀመ ጥቃት 16 አሽከርካሪዎች ፣ የመንግስት የፀጥታ ሀይሎችና ንፁሃን መገደላቸውን የዞኑን አስተዳደርና የአይን እማኞችን ጠቅሰን መረጃ ማካፈላችን ይታወሳል።

ቲክቫህ ኢትዮጵያ
ባሕር ዳር
#TikvahEthiopiaFamilyBahirdar

@tikvahethiopia

🕊#Peace

" ለችግሮቻችን መፍትሄ ከጠመንጃ ይልቅ የጠረጴዛ ውይይት እናስቀድም "  - የሰላም ሚኒስቴር ሚንስትር 

➡️ " በአሁኑ ሰዓት ትልቅ የህልውና አደጋ ለተጋረጠበት የትግራይ ህዝብ ስለ ዴሞክራሲና ልማት ማውራት ቅንጦት ነው " - የጠቅላይ ሚንስትሩ የምስራቅ አፍሪካ ጉዳዮች አማካሪ ሚንስትር 

በአዲስ አበባ ከተማ " ሰላም ፣ ዲሞክራሲ እና ልማት በትግራይ እድሎችና ፈተናዎች " በሚል ርእስ የውይይት መድረክ ተካሂዶ ነበር።

የውይይት መድረኩ CENTRE FOR RESPONSIBLE AND PEACEFUL POLITICS (CRPP) የተባለ ተቋም ከአዲስ አበባ ዪኒሸርስቲ በመተባበር ነው ያዘጋጁት።

የውይይት መድረኩ ላይ ተገኝተው መልእክት ያስተላለፉት የሰላም ሚንስቴር ሚንስትር አቶ መሐመድ እድሪስ " ከመነጋገር እናተርፋለን " ብለዋል።

" ሃሳብ ነው ሃገርን የሚገነባው ስለሆነም ለሃሳብ ክብርና ልዕልና እንስጥ ፤ ጠመንጃንና ጦርነትን እንጠየፍ የትግራይ የፓለቲካ ምህዳር ለወጣቶች እድልና ቅድሚያ ይስጥ " ሲሉ ተናግረዋል።

" ' አንዋጋም ይበቃል ' ማለት ታላቅ ድፍረት ይጠይቃል ከተቻለ ግን ውጤቱ እጅግ አመርቂና ፍሬውም ጣፋጭ ነው። ስለሆነም እርስ በርስ መዋጋት ይብቃ ፤ ሳንገዳደል አሸናፊ የምንሆንበት ሰላማዊ መንገድ እናስቀድም የመገዳደል የመተላለቅ ታሪክ ልንዘጋው ይገባል " ሲሉ ተደምጠዋል።

የጠቅላይ ሚንስትሩ የምስራቅ አፍሪካ ጉዳዮች አማካሪ ሚንስትር አቶ ጌታቸው ረዳ፥ " የትግራይ ህዝብ አሁንም ከህልውና አደጋ አልወጣም " ብለዋል።

" ችግሮቻችን በውጭ ምክንያቶች እያሳሰበን ከመኖር ውስጣችን በደምብ በመፈተሽ የተወሳሰቡ ችግሮቻችን መፍታት እንችላለን " ሲሉ ገልጸዋል።

" ትግራይ ጥቂት አመራሮች ማረምና ማንሳት አቅተዋት በከባድ ፈተና ተዘፍቃ ትገኛለች ፤ ይህንን ከባድ ፈተና ለመወጣትና ለማለፍ ወጣቶችን ወደ መሪነት ማምጣት ይጠበቅበታል " ብለዋል።

" በአሁኑ ሰዓት ትልቅ የህልው አደጋ ለተጋረጠበት የትግራይ ህዝብ ስለ ዴሞክራሲና ልማት ማውራት ቅንጦት ነው " በማለት አክለዋል።

ለአንድ ቀን በተካሄደው የውይይት መድረክ " ሰላምና ደህንነት ፣ ዲሞክራሲ ግንባታ ፈተና እና እድል " የሚሉና ሌሎች የመወያያ ፅሁፎች ቀርበዋል።

በመድረኩ ከትግራይ የተለያዩ ዩኒቨርስቲዎች ፣ ተፎካካሪ ፓርቲዎች ፣ ስቪክ ማህበራት እንዲሁም በአዲስ አበባ የሚኖሩ ታዋቂ ሙሁራንን ፓለቲከኞች ተገኝተው ነበር።

ቲክቫህ ኢትዮጵያ
#TikvahEthiopiaFamilyMK

@tikvahethiopia            

" 2.45 ሚሊዮን ህዝብ አስቸኳይ የምግብ እርዳታ ይፈልጋል " - የክልሉ የአደጋ ስጋት አመራር ኮሚሽን

ከሁለት አመቱ ደም አፋሳሽ ጦርነት ባላገገመው የትግራይ ክልል ውስጥ፣ 2 ሚሊዮን 450 ሺህ ህዝብ አስቸኳይ የነፍስ አድን እርዳታ እንደሚፈልግ ተገለፀ፡፡

የእርዳታ ፈላጊው ብዛት የታወቀው በጥቅምትና ታህሳስ ወራት የ2016/2017 የምርት ዘመን ላይ በተደረገ ጥናት መሰረት መሆኑን፣ የክልሉ የአደጋ ስጋት አመራር ኮሚሽን ሐላፊ ዶ/ር ገብረህይወት ገ/እግዚአብሔር ለቲክቫህ ኢትዮጵያ ተናግረዋል፡፡

ጥናቱ የሚመለከታቸው የሀገር ውስጥና አለምአቀፍ የእርዳታ ተቋማት የተሳተፉበት፣ በሁሉም ባለድርሻ አካላት የተገመገመና ሁሉም ተቋማት የተስማሙበት እንደሆነም ተናግረዋል፡፡

ጥናቱ ፦
- በእርሻ፣
- በትምህርት፣
- በጤና፣
- በመጠጥ ውሀ፣
- በምግብ አቅርቦት፣
- በሴቶችና ወጣቶች ተጠቃሚነት ያሉትንም ክፍተቶች የዳሰሰ መሆኑንም አመልክተዋል፡፡

ከተጠቀሰው 2 ነጥብ 45 ሚሊዮን የእርዳታ ፈላጊ ውስጥ አንድ ሚሊዮኑ በመጠለያ ጣቢያዎች የሚኖር ተፈናቃይ ሲሆን፣ 1 ነጥብ 45 ሚሊዮኑ ደግሞ የዘላቂ ማቋቋሚያ ሳይደረግለት ወደ ፈረሰ ቤቱ የተመለሰ ህዝብ መሆኑን ሐላፊው አመልክተዋል፡፡

የአሜሪካው አለምአቀፍ የተራድኦ ድርጅት/ዩኤስኤይድ የእርዳታ አቅርቦት ከአራት ወራት በፊት በፕረዝደንት ትረምፕ ትእዛዝ በመቋረጡ፣ በትግራይ ያለው የሰብአዊ እርዳታ አቅርቦት አደጋ ላይ ወድቋል ያሉት ዶ/ር ገብረህይወት፣ “ የትግራይ ህዝብ በአሁኑ ወቅት የጥይት ድምፅ በሌለበት ጦርነት ውስጥ ነው የሚገኘው ” ሲሉም የሰብአዊ ቀውሱን አስከፊነት ገልፀዋል፡፡

ከአንድ ሚሊዮን በላይ ተፈናቃዮች ወደ ቀዬያቸው አልተመለሱም፣ በስቃይ ውስጥ መኖር ከጀመሩ አምስተኛ አመታቸውን ይዘዋል ያሉት ሐላፊው፣ ወደ ቀዬያቸው ቢመለሱ ኖሮ፣ በመሬታቸው ላይ ሰርተው ራሳቸውን ማስተዳደር በቻሉ ነበር በማለት ገልፀዋል፡፡

ተፈናቃዮቹን ወደ ቀዬያቸው በመመለስ ዘላቂ መፍትሔ እስኪሰጣቸው ድረስ ግን፣ አለምአቀፉ ማህበረሰብና የረድኤት ድርጅቶች የትግራይን የሰብአዊ እርዳታ ጉዳይ እንደገና ካላዩትና የፍላጎቱን መጠን ዳግም ካልከለሱ፣ እስካሁን በእርዳታ ያቆዩትን ማህበረሰብ ከዚህ በኋላ ለእልቂት መዳረግ ነው የሚሆነው ሲሉም ስጋታቸውን ተናግረዋል፡፡  

ዶ/ር ገብረህይወት ገብረእግዚአብሔር በዝርዝር ምን አሉ ?

" ቀደም ሲል በዩኤስኤይድ ሲሰጥ የነበረው እርዳታ በቂ ባይሆንም፣ የተሻለ የቀለብና የመድሐኒት አቅርቦት ነበር፡፡ በተወሰነ መልኩ የኑሮ ማሻሻያ ስራዎችም ሲከናወኑ ነበር፡፡ አሁን ግን ይህ አርዳታ ቀንሶዋል፡፡

ለምሳሌ የአለም ምግብ ፕሮግራም ከሚቀጥለው ወር ጀምሮ እርዳታ ማቅረብ ሊያቆም እንደሚችል ገልፆዋል፡፡ ለዚህ ያቀረበው ምክንያት ደግሞ በፕረዝደንት ትራምፕ የዩኤስኤይድ እርዳታ ማቋረጥን ተከትሎ የእርዳታ አቅርቦት በመቀነሱ እህል የለኝም የሚል ነው፡፡

የአለም ምግብ ፕሮግራም በ 30 የትግራይ ወረዳዎች በምግብና በጥሬ ገንዘብ እስከ 8 መቶ ሺህ ህዝብ ሲረዳ ነበር፡፡ የሰሜን ምዕራብ ትግራይ 15 ወረዳዎች፣ የመቐለ 7 ክፍለ ከተሞች፣ በደቡብ ትግራይ 6 ወረዳዎች በዚህ ተቋም ነበር የሚታገዙት፡፡ ይህ የረድኤት ድርጅት ከዚህ ስራ ወጣ ማለት፣ እስከ 8 መቶ ሺህ የሚሆን ህዝብ ለሞት፣ ለችግርና ለበሽታ ይጋለጣል ማለት ነው፡፡ ከሚቀጥለው ወር ጀምሮ እነዚህ 30 ወረዳዎች ምንም አይነት ድጋፍና እገዛ አያገኙም ማለት ነው፡፡

የአለም ምግብ ፕሮግራም 80 በመቶ እርዳታ ከዩኤስኤይድ ነበር የሚገኘው፡፡ ሌላኛው የረድኤት ድርጅትም ሲሰጠው የነበረው እርዳታ በሙሉ በሚባል መልኩ ከዚሁ ከዩኤስኤይድ ነበር የሚያመጣው፡፡ ይህ እርዳታ ያለምንም ማስጠንቀቂያ በመቋረጡ በትግራይ ትልቅ ችግር አስከትሏል፡፡ የዩኤስኤይድ እርዳታ መቋረጥ የፈጠረው ክፍተት በሌሎች ድርጅቶች የሚሸፈን አይደለም፡፡

ይህ ውሳኔ እንደገና ካልታየና ካልተሻሻለ፣ በትግራይ ክልል ያለውን ችግር በቀላሉ መቅረፍ የሚቻል አይደለም፡፡ አሁን እየታየ ያለው ሰብአዊ ቀውስ በአብዛኛው የዩኤስኤይድ እርዳታ በመቋረጡ የመጣ ነው፡፡ በአጠቃላይ ያ እርምጃ በትግራይ የሰብአዊ እርዳታ ስርዓቱን ነው ያናጋው፡፡ በህዝቡ እርዳታ አቅርቦት ላይ የፈጠረው ተፅዕኖ ግዙፍ ነው፡፡

አሁን ለአለምአቀፉ ማህበረሰብ ውትወታ የማናደርግና ጠንካራ ጥሪ የማናቀርብ ከሆነ፣ ችግር ላይ የሚወድቅ ህዝብ ነው ያለን፡፡ የትግራይ ህዝብ በረሀብ ሳይረግፍና፣ ለከፋ ማህበራዊ ቀውስ ከመጋለጡ በፊት ልንደርስለት ይገባል፡፡ አለምአቀፉ ማህበረሰብ ይህንን ሊገነዘብና ድጋፉን ሊቀጥልበት ይገባል፡፡ "

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia