#كل_الناس_تسوي_هيج؟!

شكد سامعين هاي الجملة بحياتنا اليومية؟ تشوف واحد يبرر غلطه ويكول "كل الناس هيج تسوي!". يسمع اغاني ويكلك "غيري هم يسمعون"، واحد يحجي كلام مو زين من تعاتبه يكلك "عمي الوكت خربان والكل يحجي هيج". نلكاها حجة جاهزة وسهلة نلف بيها على نفسنا وندافع بيها عن تصرفات غلط.

زين، بس لحظة ونفكر بعقلانية:
إذا "كل الناس" سوت شي غلط، هل هذا راح يحوله لصح؟ وإذا "الكثرة" مشت بطريق، هذا يعني إنو هو الطريق الصحيح؟

التاريخ، والقِصص اللي سامعينها، بيها أمثلة هواي على مجتمعات كاملة، مشوا بطريق غلط، بس هذا ما يغير من كون الطريق غلط. الحق يبقى حق حتى لو مشى بيه شخص واحد، والباطل يبقى باطل حتى لو اتبعه الكل.

ليش نلجأ لهيج حجة؟
يمكن لأن الإنسان بطبعه يحب يكون جزء من مجموعة، يخاف يكون مختلف أو وحيد، أو يمكن الشيطان يوسوسلنا ويخلينا نقتنع إنو ما دام الكل يسوي، فالموضوع عادي وما بيه مشكلة.

بس الحقيقة كلش واضحه: رب العالمين راح يحاسب كل واحد بينا وحده. ما راح نكدر نكول يوم القيامة: "يا ربي كل الناس هيج سوت!"، كل واحد مسؤول عن أفعاله وعن اختياراته، وكل إنسان وكتابه.

فـ شنو الطريق الصح؟
الطريق الصح هو نرجع لنهج القرآن الكريم ورسوله محمد وآل بيته الأطهار (صلوات الله عليهم). نشوف شنو اللي موصينا بيه وشنو اللي ما يردونه، هذا هو النور اللي يضوي طريقنا. لازم نتبع الحق اللي بينوه إلنا، حتى لو شفنا نفسنا وحدنا بهالطريق، وحتى لو خالفنا هواي ناس.

ما لازم نخلي "الكثرة" تكون هي دليلنا. خلي دليلك هو نور القرآن والعترة الطاهرة، هم اللي يثبتوك وقت الشدة، وهم اللي يوصلوك لرضا رب العالمين.

وتذكروا قول الله تعالى:
(وَإِذَا قِيلَ لَهُمُ اتَّبِعُوا مَا أَنْزَلَ اللَّهُ قَالُوا بَلْ نَتَّبِعُ مَا أَلْفَيْنَا عَلَيْهِ آبَاءَنَا ۗ أَوَلَوْ كَانَ آبَاؤُهُمْ لَا يَعْقِلُونَ شَيْئًا وَلَا يَهْتَدُونَ)

هاي الآية تذكرنا بقوة العادة والتقليد الأعمى. ما لازم نتبع أي شي لمجرد إنو "الكل يسويه" أو "آباؤنا" سووه بدون تفكير، لازم نتبع الحق اللي بينه إلنا الله ورسوله وأهل بيته الأطهار (عليهم السلام).

واخيرًا
رب العالمين من أمرنا بالصلاة والصيام، كال (أقيموا الصلاة) وما كال: "صَلوا بس لمن كل الناس تصلي وياكم!" ومن حرم علينا الغيبة، كال: (ولا يغتب بعضكم بعضًا) وما كال: "لا تغتابون بس إذا شفتوا العالم كلها تغتاب فـ اخذوا غيبة!"

فإذن الله تعالى يحاسب كل واحد بوحده، كل واحد وكتابه. الحق والباطل ما يتغيرون بقلّة أو كثرة الناس، خلي كتاب الله ورسوله وأهل بيته هم دليلك، وديربالك تخلي "كل الناس" مقياسك!!

🗓 حدث في مثل هذا اليوم: (1) ذي الحجة

🟢 زواج الإمام علي (عليه السلام) من فاطمة الزهراء(عليها السلام) سنة 2هـ

ليلة زواج النورين علـي و فاطمة 🦋

السلام عليكم ورحمة الله وبركاته

ان شاء الله باجر اروح لكربلاء يلي عنده حاجه يكتب اسمه اخليه بالضريح
قضى الله حوائجكم 🤍

@adosalh313

🟥 وفاة التاجر الإيراني علي أكبر أنصاري المتبرع بـ10 آلاف سجادة للعتبات المقدسة

توفي التاجر الإيراني الحاج علي أكبر أنصاري، المعروف بتبرعه بـ10 آلاف سجادة فاخرة من معامل كاشان لإكساء العتبات المقدسة. ويُعد من أبرز الداعمين للأماكن الدينية في إيران والعراق.

"السلام على حامي خدور الفواطم"