Xitoy Xalq Respublikasining Shenjen shahrida bo‘lib o‘tayotgan 3-Jahon avtomobil standartlari va innovatsion konferensiyasi (WASIC)da IATF 16949 avtomobil sanoati sifat menejmenti tizimi standartini joriy etish, inson resurslarini boshqarish va kadrlar salohiyati darajasini oshirish, avtomobilsozlik sanoatining barqaror rivojlanishiga yordam beruvchi standartlar, umumiy sanoat manfaatlarini o‘rganish, manfaatdor tomonlar o‘rtasida muvofiqlashtirish, hamkorlikni kuchaytirish hamda global avtomobil sektorining barqaror va yuqori sifatli rivojlanishini rag‘batlantirishga qaratilgan mavzular va Xitoy tajribasini ko‘rib chiqilmoqda.

Tadbir doirasida China Automotive Technology & Research Center (CATARC)  bilan soha yo‘nalishida aloqalarni rivojlantirish, texnik qo‘llab-quvvatlash va mutaxassislarni tayyorlash kabi masalalar ko‘rib chiqiladi.

Singapur shahrida o‘tkazilayotgan ITMA ASIA + CITME 2025 doirasida O‘zbekiston delegatsiyasi InkBank kompaniyasi vakillari bilan uchrashuv o‘tkazdi. Mazkur kompaniya to‘qimachilik sanoati uchun ekologik va xalqaro sertifikatlarga ega rang (bo‘yoq) mahsulotlari ishlab chiqaruvchi yetakchi kompaniyalardan biri hisoblanadi.

Maʼlumot uchun: InkBank kompaniyasi o‘z mahsulotlari orqali barqaror ishlab chiqarish va ekologik xavfsizlik tamoyillariga asoslanadi. U ishlab chiqarayotgan rang vositalari OEKO-TEX 100, ZDHC (Zero Discharge of Hazardous Chemicals) — xavfli kimyoviy moddalarning chiqindisiz boshqaruv tizimi; ISO 14001 — ekologik boshqaruv tizimi standarti va  boshqa bir qator Yevropa Ittifoqi ekologik muvofiqlik sertifikatlariga ega.

Mazkur sertifikatlar Yevropa mamlakatlariga eksport qilinadigan tayyor to‘qimachilik mahsulotlari uchun asosiy texnik talab hisoblanadi. Shu bois InkBank mahsulotlaridan foydalanish O‘zbekiston korxonalariga Yevropa bozorlariga kirishdagi sifat va xavfsizlik to‘siqlarini kamaytirish, mahsulotni "eko-brend" sifatida joylashtirish hamda eksport qiymatini oshirish imkonini beradi.