Чиқиндилар, жавобсиз саволлар ва депутатларнинг сукути

Хоразмда чиқиндилар муаммоси ортидан жамоатчиликда кўплаб саволлар туғилмоқда. Бу саволлар йиллар давомида ечим топмай келаётган ҳолатлар ҳақидагина эмас, балки масъуллар ва халқ вакилларининг сукути ҳақида ҳам.

Чиқиндилар олиб кетилмаяпти, аммо ким жавоб беради?

Ҳар куни турли маҳаллалардан “чиқиндилар йиғилиб қолган”, “аҳлат ёниб кетди”, “ҳиддан нафас олиб бўлмайди” каби мурожаатлар келиб тушмоқда. Мазкур ҳолатлар нафақат санитария, балки инсон саломатлиги учун ҳам хавф туғдирмоқда.

Аммо бу каби мурожаатларга ҳокимлик ҳам, туман ва шаҳар санитария хизматлари ҳам, экология ташкилотлари ҳам жавоб бермаяпти. Суратлар, видеолар, жонли эфирлар — буларнинг ҳеч бири ҳалигача жиддий эътиборни қозона олгани йўқ.

Савол туғилади: аслида чиқинди учун ким жавобгар? Нега мурожаатлар беқарор қолмоқда?

Депутатлар қаерда?

Жамоатчиликда яна бир ўта муҳим савол кўтарилмоқда — халқ вакиллари деб сайланган депутатларимиз қаерда?

Сайлов вақтида:
🗳 “Овоз беринг, биз муаммоларингизни ҳал қиламиз”,
🗳 “Биз сизлар учун хизмат қиламиз”,
деган депутатлар чиқиндилар, атроф муҳит, ҳид, ёниб кетган аҳлатлар ҳақида нималар дейишяпти?

Ачинарлиси, деярли ҳеч нарса. Орадан бир неча ой ўтди. На ижтимоий тармоқларда, на оммавий ахборот воситаларида, на жойларда депутатлар ташаббуси сезилмоқда.

Қарийб барча мажлисларда “ким рози, ким қарши” деб қўл кўтариб ўтириш учунгина депутатликка сайлангандай таассурот уйғонмоқда. Аммо халқ уларни фақат овоз бериш учун эмас, балки фаоллик, ташаббус, тинимсиз назорат учун сайлаган.

Эътибор керак, ҳисобот керак

Халқ кутяпти. Ҳақли равишда кутяпти. Чунки ҳар бир депутатга овоз берилган. Шунинг учун:
• Чиқинди муаммоси бўйича маҳаллий кенгашларда қандай масалалар кўрилди?
• Қайси депутатлар бу ҳақда сўз кўтарди?
• Қайси ташкилотлар ҳисобот берди?

Агар бу саволларга жавоблар йўқ бўлса, демак, жамоатчилик талаб қилишга ҳақли. Сабаби чиқиндилар фақат кўчаларда эмас, балки жавобгарликдан қочаётган тизимларимизда ҳам тўпланиб бормоқда.

Хулоса ўрнида

Хоразмдаги чиқинди муаммоси — бу шунчаки санитария масаласи эмас. Бу — масъулиятсизлик, эътиборсизлик ва депутатлик сукутининг ёрқин намунасидир.

Халқ сўз кутяпти. Эътибор кутяпти. Энди навбат депутатларда ва масъулларда.

Веб-сайт | Инстаграм | Телеграм