#taqriz
#book_rewiew

Bolalik va ko‘ngil orzulari orasidagi so‘nggi ko‘prik

Ba’zi asarlar yurakdan joy oladi. Ba’zilar esa — yurakni bo‘shatib, ichida uzoq qoladi. Ketrin Patersonning “Terabitiya ko‘prigi” ana shunday kitoblardan. Bu shunchaki bolalar uchun yozilgan ertak emas. Bu — bolalikning o‘zi haqida yozilgan bitik.

Asar qahramoni Jess bilan biz yengil qadamlar bilan hayot yo‘lini boshlab o‘tamiz. Keyin Lesli kirib keladi — g‘ayritabiiy, tasavvuriga sig‘mas darajada erkin. U Jessni ham, o‘quvchini ham, hatto butun borliqni ham bir zumda o‘zgartirib yuboradi. Va shu yerda muhim bir tushuncha tug‘iladi: Lesli shunchaki qizaloq emas — u bolalikning timsoli. Yorqin, erkin, hissiyotga boy, soddadil bolalik.

Uning o‘limi esa — muqarrar. Chunki biz baribir bolalik bilan xayrlashamiz. Uni ko‘rib turmaymiz, unga “xayr” deb aytolmaymiz — u bizdan asta chiqib ketadi. Jess ham Leslining o‘limini ko‘rmaydi. U birdan yo‘qoladi. Bu — biz ham qachon bolalikni yo‘qotganimizni sezmasligimizga, uni ortga qarab izlayotgan paytimizda allaqachon boshqa dunyoga o‘tib ketganimizga ishora.

"Terabitiya ko‘prigi" — bu ruhan o‘sish, o‘zligini topish, yo‘qotish va davom etish haqidagi asar. U yuragingizda og‘riq qoldiradi, ammo aynan shu og‘riq sizni (bizni) ulg‘aytiradi. Yig‘latadi, lekin o‘sha ko‘z yoshlar qalbni yumshatadi. Bolalarga kattalar qanday his qilishini o‘rgatsa, kattalarga bolalar qanday his qilishini eslatadi.

O‘zbek segmentida o‘smirlar adabiyoti hanuz uncha keng emas. Ammo ushbu tarjima — o‘sha bo‘shliqqa yurak bilan yozilgan ajoyib sahifa.

Ilhom Salimovning tarjimasi esa ushbu sayohatni yanada tabiiy, jonli, yurakka yaqin qilgan. U nafaqat matnni o‘girgan, balki asarning ruhini, ohangini ham yurakdan yurakka ko‘chira olgan. Uning so‘z tanlovi Leslining erkinligi va Jessning sukutini aniq ifoda etadi. Tarjima — sokin, ammo kuchli. Juda kamyob mahorat.

Bu ko‘prikdan o‘tgan har bir o‘quvchi aslida o‘z ichidagi bolalik bilan yana bir bor uchrashadi — va xayrlashadi. Ammo bu safar — haqiqatni anglab, barini boricha his qilib, va albatta bag‘rikenglik bilan.

©️ Saida Jalolova
@ijodiyot_kitobiston