لولادة الامام علي بن موسى
الرضا عليه السلام

بميلاد الرضا الدنيا زهيه
الصبح ضَوَّه نهاره على المسيه
★★★★★
وحگ الثامن الضامن وعينه
بحبه من الصغر احنه وعينه
يربي انطي الصبر گلبي وعينه
افراگ ازيارته شمسوي بيه
بميلاد الرضا الدنيا زهيه
★★★★★
شنهي قيمتي بدونك  هوانه
ذليل الگلب  مايرحل هوانه
يبن موسى الك مكثر هوانه
خذانه الشوك الك يبن الزچيه
بميلاد الرضا الدنيا زهيه
★★★★★
عاجز كل فكر من راد وصفه
ياماي الزلال الگلب وصفه
من الله زيارته للناس وصفه
يمه ماتظل عله خفيه
بميلاد الرضا الدنيا زهيه
★★★★★
فكر عالي مظامينه وسامي
ذَلَّاها ملوك اشگد وسامي
اسمك علصدر هوه وسامي
بيه افخر على اليفخر عليه
بميلاد الرضا الدنيا زهيه
★★★★★
من ذروة بني هاشم وصلها
مكانه الك ماواحد وصلها
الفرحة اليوم يامحله وصلها
أجينه بهلوكت نفرح سويه
بميلاد الرضا الدنيا زهيه

الشاعر حسن لعيبي الحربشاوي

لولادة الإمام علي بن موسى الرضا عليه السلام

هب النسيم الساكن. 
بمولد إمامي الثامن
حرك الغصن الغافي
وناغه الغدير الصافي. بمولد إمامي الثامن
★★★★★
گلبي الحزين اتهنه.
من شاف مايتمنه
مولد حضارة وجنه 
مدري شسولف عنه
من سطع نور الگمره 
انزاح الظلام وشره  بمولد إمامي الثامن
★★★★★
بيه فرحت المعموره.
وصارت باحسن صوره
انزاح الظلام بنوره.   
بيه الخلگ مسروره
ابشارة الباري وعطفه.  
علناس انزل لطفه.  بمولد إمامي الثامن
★★★★★
بشر الباري بأسمه. 
ابن العلم والعصمه
بالدنيا خير ونعمه. 
وباچر شفاعه ورحمه
نور ومحبته جناحي.
ماتنوصف افراحي.  بمولد إمامي الثامن
★★★★★
للدين انته البشرى.
وعيد السلام ونصره
وثوبه وهواه وعطره 
يبن الوصي والزهره
محله الوكت وانسامه.
مختلفه عندي ايامه.   بمولد إمامي الثامن
★★★★★
حتماً حفلنه يحله.   
هليوم ماكو مثله
محله جماله وشكله.
بمولد الخير وأصله
ابغبطه الحقل وازهاره. 
وضي البدر وانواره.    بمولد إمامي الثامن

ألشاعر حسن لعيبي الحريشاوي

لولادة الأمام علي بن موسى الرضا عليه السلام

بميلادك ولاتنوصف فرحتنا
ومحلاها بعد هليوم. لمتنا
يسلطان المهج حلت سعادتنا
لاوينه الهموم الياما لاوتنا
يبن خير البشر للموت سادتنا
شفيع وناصر بأيام شدتنا
نودع بالملاگه وياك. غربتنا
من بحر الذنوب أنته سفينتنا

((أعلينه اليوم أمفصل ثوب الفرحه اگدار))

الشاعر حسن لعيبي الحريشاوي

لوگضه عمرك حزن فات ومضه
ولوصبر عندك ولاظل وگضه
ولون گلبك راحه ماشاف وحظه
ولوزمانك غيض طبعه ومارضه
ولوطبيب اليشفي حالك مرّضه
ولون ظهرك حافر الهم رضرضه
ولوعليك الارض ضاكت والفضه
اقصد الباب الشفه والموعظه
يم علي تنحل تره ايحلها الرضا


الشاعر حسن لعيبي الحريشاوي

ليلة ولادة الأمام علي ابن موسى الرضا عليه السلام ١١/ذي القعده /١٤٤٥هج الاثنين 20 \5 \2024 بصوت خادمكم الرادود ابو هاشم الربيعي

الدنيا بمولده تتناقل الأخبار
صدر نور الامامه ثامن الاطهار
بميلاد الرضا الدنيا فرح وانوار
(اليوم الشمس احتارت بيش اتزامط نورك بيش)

الشاعر حسن لعيبي الحريشاوي
محافظة بغداد

مهما اتاني الدهر بالجور قضا
متقصدا  أياي   أو متعرضا
واليوم بعد اليوم بالحزن مضى
للنور اشكو بالبكا مستعرضا
ودمع عيني لوجرى جمر الغضا
لي قمر اطفي به نار اللظى
يوم الحساب المر لوضاق الفضا
ذاك بن موسى سيدي ذاك الرضا

الشاعر حسن لعيبي الحريشاوي

مايله الدنيا وي زينب
💔مجلس
الشاعر
حسن لعيبي الحريشاري
الرادود
كرار الطائي
نسألكم الدعاء

ميلاد الرضا

اليوم ميلاد الرضا
اليوم ميلاد الرضا
★★★★★
اليوم مولد نور من حامي الحمه
بفضل ماينقاس من رب السمه
كهف للمحتار يوم الموزمه
مولده الميمون يوم الغانمه
اليوم ميلاد الرضا
اليوم ميلاد الرضا
★★★★★
اليوم ميلاد المكارم والقيم
بفضل ربنا صاحب المن والنعم
اليوم  هو المهم عدنه والأهم
مولد الخير ومنابع للكرم
اليوم ميلاد الرضا
اليوم ميلاد الرضا
★★★★★
اليوم ميلاد المعارف والفكر
اليوم شع الگمر من نور البدر
النهار اتلاگه  بانسام الفجر
حبه خير ونعمه للروح وأجر
اليوم ميلاد الرضا
البوم ميلاد الرضا
★★★★★
هله ابجية الخير يامية هله
العيد ميلاده ابفرح نستقبله
مبتهج هلكون هذا بأكمله
الروح والانفاس فدوه اتروح إله
اليوم ميلاد الرضا
اليوم ميلاد الرضا
★★★★★
ياسليل الجود من أطهر نسب
تفتخر بيك الاعاجم والعرب
لؤلؤ وياقوت يادر يا ذهب
حبك بمحضر ضمايرنه انكتب
اليوم ميلاد الرضا
اليوم ميلاد الرضا

الشاعر حسن لعيبي الحريشاوي

لولادة الإمام علي بن موسى الرضا عليه السلام

أبگد الارض والفضا.  حبك أمامي الرضا
ابنومي وبصحوتي     ابدلالي وبمهجتي
حبك أمامي الرضا
★★★★★
ياصاحب الغانمه.  فرحانه أرض وسمه
وگلوبنه امتيمه.      بانوارك الباسمه
حبك ملك خاطري. لمن سكن ناظري
حبك أمامي الرضا
★★★★★
بمولدك ياسيدي.  بأجمل صلاه نبتدي
وثوب الفرح نرتدي. بهلمنبع الاحمدي
نورك يضوي الدرب  شامل جميع الگلب
حبك أمامي الرضا
★★★★★
بيوم المدينه زهت. بهلمولد اتباركت
وبحال ثاني صفت بانوارك اتنورت
بيالغه وصورة وشكل محتار بيه العقل
حبك أمامي الرضا
★★★★★
من شجرة طيبة  نسب  دون العجم والعرب
حكمه ودراية وادب.     وفقه وعلوم ورتب
من نوره جنة عدن. بوسط الظماير سكن
حبك أمامي الرضا
★★★★★
امودع الحزن والنعي.   وي لوعتي ومدمعي
بحبك بديت السعي.  ابفطرة سليمه اوعي
بحب الجمال احتفل مالي الگلب والعقل
حبك أمامي الرضا

الشاعر حسن لعيبي الحريشاوي

بمناسبة ولادة ثامن الحجج الامام علي بن موسى الرضا عليه السلام

ياامامي الرضا        ياشبيه الگمر
صبر عمرك گضه.    ماتهاب الخطر

★★★★★
اهواي ضدك موعجيبة من شفتها
كل    مفاهيم الضلاله    غيرتها
شگد براهين  بعلومك   قدمتها
قصورهم بالصبر ياما  زلزلتها
رافعه وخافضه   امواج علمك بحر
ياامامي الرضا      ياشبيه الگمر

★★★★★
مولدك ياما امور شگد حسمها
صالت انفاس العلم ضد الكتمها
اهتزت عروش الطغاة انذّل اسمها
هيبتك مذلول بالدنيا خصمها
ابدرب خاسر مضه    الناظرك ماگدر
ياامامي الرضا    ياشبيه الگمر

★★★★★
كل بني العباس ظل ثابت عهدهم
من ظهر سابع على العتره حقدهم
مولدك ارعبهم وهّدم    مجدهم
بلامجد بس الغدر بالدنيا عدهم
مااخذ موعظه     الظالم ولعتبر
ياامامي الرضا     ياشبيه الگمر

★★★★★
ابعاد للمامون   معروفه النوايا
للخلافه رادك  وصّر  على رايه
اعلان للسلطه يريدلها ودعايه
حتى كلشي لاجله يصفه بالنهايه
بالغدر من حضه. فرصه إلها انتظر
ياامامي الرضا     ياشبيه الگمر

★★★★★
ثامن الاطهار من هلت انواره
بمولده يعني المفاخر والحضاره
المجد واضح تشهد أنوار المناره
الخاصمه رد بفشل بعد الخساره
جدك المرتضى    ياسليل الفخر
ياامامي الرضا    ياشبيه الگمر

الشاعر حسن لعيبي الحريشاوي

هوسه لولادة الإمام الرضا عليه السلام

هليوم الباري اختاره
هلت علدنيا آثاره
من سر الكون اسراره
ابن الكاظم  تزهي أنواره
جتنه من الباري ابشاره
ايبشر ناسه وزواره
حجه وعمره وكَفَّارَه
كلمن گاصد لدياره
وكلمن رايد أخباره

(من مشهد هلت أنواره )

الشاعر حسن لعيبي الحريشاوي ✍️

لذكرى ولادة الامام علي الرضا عليه السلام

ميلاده ميلاده   مولانا الرضا
★★★★★
كل الهله ابأنواره
ومحلاها أجتنا أخباره
مولده  أحله أبشاره

أبن الامام الكاظم
هذا البدر من هاشم
هوه النعيم الدايم

تحله وتطيب الافراح
            فوگ الارض منتشره
علي ياعلي    علي ياولي
★★★★★
الجو نعمه الله ايديمه
يمطر فرح چن غيمه
بنور العلم والشيمه

بمولد إمامي الغالي
يوم  الفرح يحلالي
والدنيا جنة أگبالي

اخريسان شعت انوار
             سوت العالم جنه
علي ياعلي    علي ياولي
★★★★★
أهدعش يوم الرحمه
روحي فده الهلنعمه
ولكل حرف من أسمه

هلشهر تحله ايامه
بنور الرضا وانسامه
اجعلنا يرب خدامه

اجمل حدث بالتاريخ
                مولد أمامي الثامن
علي ياعلي    علي ياولي
★★★★★
يحله الحزن توديعه
ويوم الافراح انطيعه
اعظم فرح للشيعه

بمولد إمامي الثامن
للجنة هوه الضامن
بلگلب حبه ساكن

عاشر انوار اهل البيت
               شافعنه يوم المحشر
علي ياعلي   علي ياولي

الشاعر حسن لعيبي الحريشاوي

الدهر لوجار على گلبي وعارضه
وخذ كل الفرح لبعيد ومضه
وحزم الظالم عليه وحرضه
وجعل دمعي يصب چن نار الغضا
وحيلي باحزان الليالي رضرضه
عندي نور اليطفي نيران اللظى
هو حصني بأمر ربي امفوضه
يرفع الشدات عني والقضا
هو نور الهادي  مولانا الرضا

الشاعر حسن لعيبي الحريشاوي

تولتني حيل الشدد   بيها صرت مبتلي
الصاحب جفاني ورحل والنوب راحوا هلي
وبالدم مشت واصبحت حسباتي ماتنجلي
حاير شسوي صرت   ماعافني عاذلي
وضدي لگيته الگبل محسوب مني وإلي
كل مره أگلها الصبر  ياروحي وأتحملي
من نايبات الدهر دخيلك صحت ياعلي

الشاعر حسن لعيبي الحريشاوي

الى فراق للاحبة 

خلتني محتار  
ياوحشة الدار
وليل الصبح صار   ياوحشة الدار
★★★★★
كل يوم ماخذلي محب   
وياي بسك يادرب
يلماخذ احبابي  غصب  
وارماد سويت الگلب
اليادار اتعنه واطب       
اذكرهم ودمعي يصب
بنص الگلب نار   ياوحشة الدار
★★★★★
أشدلَّاك ياموت وصرت 
يم داري  واگف تلتفت
أحبابي بيهم غربت        
لوغيرهم محد شفت
اعزاز عندي ماگلت   
من جيتني وبيهم رحت
من كل الاكتار      ياوحشة الدار
★★★★★
كل يوم هادملي ركن   
ياموت مابيه حزن
يصير العمر كله اون 
بالغربه گلبي ممتحن
كاسرني كسرات الغصن 
يكتلني شوگي من أحن
مامنهم أخبار   ياوحشة الدار
★★★★★
ياوكت دلالي انكسر     
فارگ گمر بعد الگمر
شخلت ابدلالي الصور   
جرح بجرح ميت اثر
الشجره اشنفعها ابلاثمر  
وبلاضوه شنفع النظر
بس ذكره واثار    ياوحشة الدار

الشاعر حسن لعيبي الحريشاوي

اهداف الحسين عليه السلام. (موشح)

أهداف ابوالسجاد تحمل ثورته
خير وإصلاح ومعارف غايته

ثوره تحمل الف عنوان وصفه
أَتزوِّد  الانسان خير ومعرفه
بمعنى ثاني هيه خط المصطفى
وغاية الكرار نهجه ورادته

غايته نتبع العتره الطاهره
همه فوز الدنيا گبل الآخره
ينتصر علسيف دمه لوجره
ويوگف الباطل ذليله خطوته

غاية الاسلام واهدافه سوه
الشمس موشمعه يطفيها الهوه
مبدأ الاسلام بالحق ارتوه
بمنهل حسين وتعَلَّت رايته

حسين هذه غايته لمن طلع
باتجاه العكس لاصحاب البدع
جبل عمره ماتحرك وانصدع
مثل حيدر بالحروب وهيبته

لاقبول بوضع مؤسف لاهظم
ولاتراجع لاسكوت على الظلم
ولاضعف فديوم لو واجه خصم
ومايجامل على الحق ابچلمته

كربلا طول الدهر من تنذكر
بيها مجد الغانمه الماينكسر
برهن الدم علبواتر ينتصر
حسين يوم البيها قَدَّم رگبته

الشاعر حسن لعيبي الحريشاوي