قصيدة ياإله الكون :
وهي بمثابة توسل الى الله سبحانه وتعالى ليخلص أمتنا من هذا الشقاء الذي تعيشه.
..................................
ياإله الكون يارب الرجاءْ
نستجير برحمتك من هالبلاءْ
* * ***
ياإلهي بدم الحســين الشهيد
وصحبته وحرمة القرآن المجيد
يامقدم الوعد ومأخر الوعيد
فزعتك للناس من هذا العناء
...................................
فزعتك للناس ، لطفك ياكريم
مذنبين ومرضى يارب ياحليم
وأنته بالحالـة النُمُر بيها عليم
ضاگت ويم رحمتك ظل الشفاء
.....................................
ضاگت ويم رحمتك ظل الفرج
وكل حكيم وعالم بطِبنه إنحرج
والسبب عن طاعتك عبدك خرج
وأنت تسمع يامهيمن هالنداء
....................................
وأحنه ندري الينزل اعلينه عذاب
لأن كلنه بجنبك آمنَّه العقاب
ولَمَن كل واحد نزل بيه المصاب
إتجـهـنـالك ندوَّر عالدواء
....................................
إلتفاتـه إنريـد منك يالجليـل
ياللي نترجاك للحمل الثجيل
ياطبيب العلل يالتشفي العليل
منَّه تســتاجب يرحمن الدعاء
......................................
أحنه ياربي عبــادك يارؤوف
غرنه سترك وإشتفت بينه الظروف
وبضعف حالتنه يارب إشتشوف
وشابحين أنظارنه لحكم السماء
.....................................
ياعظـيـم المكرمـات الوافيـة
كلنه تقصير وذنوب ومعصية
وأنت أهل الرحمة وأهل العافية
إنظر إلنه بلطفك بطف كربلاء
......................................
من مهاوي الظيم خلّص هالجموع
التذرف اعلَ حسين وأنصاره الدموع
حتى نشعل للأمل يارب شموع
إنمَشّي ياربي عليك أهل الكساء
.....................................
خادم أهل البيت عليهم السلام
✍️ الشاعر أبو عقيل الناصري الحساني
https://www.tg-me.com/aa_ad9

موشح / في مصيبة الطفلين المظلومين أولاد مسلم بن عقيل ( ع )
.....................

بيا جريمه أولاد مسلم تنـطلب
حتى يذبَحُهم يزيـد بلا ذنب
....................................
بيا جريره أطفال أبو طاهر تهج
ونار الأحقاد بمخيمهم تـوج
وليش خيل الشر وراهم تنسـرج
اطفــال والعسكر عليهم منگلب

****

من بعد حرك الخيـام بكربلـه فرَّت أطفــال المخيَّم بالفَـله
ومن ضمن من فروا بهالمعضله
لمسلم أثنين ومدامعهم تصُـب

****

أطفال بأعمـار الزهـور ، ولاجرُم
عدهم وفَرّوا يويلي من الظلم
وياخصيم إلهم حِقِـد كامن يظم
حتى يتبع هاليتامـه بكل درب

***

ياهو يطلب مسـلم وأولاده ثـار
وطلع يتحرَّى ليتـاماه المسـار
ويارسول أعداه غل مشـتـعله نار
من خَطُب جابوه بهالدنيا لخَطب

****

يا مصاب أطفال مسـلم بالزمان
الفروا من الحرب يردون الأمان
مادروا بالحارث الباع الجنان
ناصب الهم وين ماراحوا نصب

****

ناصب إلهم وين ماراحوا كمين
وبايـع آخرته بدنيــاه اللعين
ظفَر بيهم ( آه ) ياللمسلمين
مو گلب ، لا من صخر عنده گلب

****

ليـش تـذبحنـه يهذا بلا نفـع
وباجر إبدمنه تجي بيوم الجـمـع
أرحمنه للغربه وعمرنه وهالدمـع
وعوفنه ولاتدخل علينـه الرُعب

***

عوفنـه لو چـان عنـدك معرفـه
بجـائزة جدنه الرسول المصطفى
وآحنه يالحـارث أهل بيت الوفــه
ليش مالك تعلن علينــه الحرب

****

گال جائزتي وغده بســـيفه يشير
گبل جدكم بيها واعدني الأميــر
مسألتكم مسـألة حظـوه ومصير
وزادهم هذا النذل صفع وضرب

*

گـالوا انچانك عِزَمْت على الأمر
بيـعنـه وبيـها ألك ربح و أجـر
گال مأضيـّـع تـعـب كل العــمر
وأقرب إلكم هالمراد من السُحب

****

بيــا ذنب طاهـر وأحـمـد ينذبـــح
ومن گبل مسلم رموه من السـطح
حتى لو عدهـم جُـرُم هم ينصفـح
أطفال وبسنهم يشعبون الگلب
..............................
نسألكم الدعاء
خادم أهل البيت عليهم السلام
الشاعر أبو عقيل الناصري
https://www.tg-me.com/aa_ad9

أنصار أنصار
................................................

كل أحنه أنصار أنصار ........ لبن الزجيه
ونصـيـح الثـار الثـار ........... بالغـاضريه

* * ***
كل أحنه أنصار أنصار لبن الـوديعــه
وتتــوهّـج بينـه النــار لجل الشـريعه
صوتـك يبـن المخـتـار محـد يبيـعــه
صوتـك يـانور العـين صوت القضيه

* * ***
صوتك يـانـور العـين صوت العـداله
ونبقى بعهدك يحسين دوم بوصــاله
ونصـــيح لأجل الدين وبكل بســـاله
من أجلك يالمظـلــوم تحلَه المنـيـه

* * ***
من أجلك يـالمظلوم نتحـده الأرهـاب
ومانهتم يالمحـروم من طعن الأذناب
بيهم صادر مرسوم من عملــة البـاب
عالمختـــار أمبيتين النـيـه الـرديـه

* * ***
عالمختــار مبيتيـن سـوء النـوايـه
من بلــغ بـالطيبيـن ذيج الوصـايـه
وي الحك مختـلفين حـتى النهـايـه
شلون بشكوى الجلاد ضـد الضحيـه

* * ***
شلون بشكوى الجلاد الجار بضحيته
وياهو البالحك نشــاد اليوم وقضـيته
وشبصرك بالحســـاد التطـلب أذيتـه
والحك مرهون بعـين راعـي الرعيـه

* * ***
الحك مرهون بعـين راعي النجــابه
الحالت علينه سنين مـدة غـيــــابـه
والواقــع ممتحـنين والله بعـــذابـه
يمته بوجهك يلتــام شـــمل البـريـه

* * ***
يمتـه بنـورك يـلتــام عـالَمـئـَه كـلـه
وتجمع شمل الأسلام يــاحـجة اللـه
دينك بالجــور انظـام وداسـوا محله
وبالطف صار الماصار يـابو الحميه

* * ***
بالطف بحسين الصار نكبـه وفَداحـه
وانتَ تعـيشه لهاليوم وبكل جراحــه
وحاطت بينه الاخطار وماشفنه راحه
وننتظـرك والأهـــات فـوك الـرزيـه

* * ***
ننـتـظـرك والأهــات يلهـب جمـرهـا
يالغـــايب والمأسـاة طـوّل عـمـرهـا
يمتـه بليـل الويـلات يطـلع كـمـرهـا
وأهـل الحك تترجاك يبن الزجيه

نسألكم الدعاء

شاعر أهل البيت (ع)
أبو عقيل الناصري
https://www.tg-me.com/aa_ad9

((( واحسينا واحسين )))

::::::::::::::::::::::::::::::::::

حســين يانبع الكرامة بهل الحيـاة
الكـتب للأجيال منهاج الثبـــــــات
حسين مات وما شرب ماي الفرات
حســين نور وعنه ماتستغني عين
.................................
حســـــين ياسر الحياة المستفـيـض
وياحزنّه بكل تفاصيــله العريــــــض
ويا شجن ذاب على مأساته القريض
ونشر جنحان الأسى على الخافقين
...................................
حسيـن يومك جَلبَب بحزنه النفوس
وعــنفـوانك قــدّم أنــــواع الدروس
حســـين بيك أتأثرت حتى المجوس
ياضــوة الكون اليـــشع بالفرقـديـن
....................................
أنتــــــــه همة ملحمة وأمه برجــل
مــات لولاك ودرس حتى العــــدل
أنتــــــه فكرك للبشـــر عين العـقـل
ياإمامي يامنــار المشــــــعـريـــن
.................................
أنتــــه أصل الدين ياســـبط النبي
جوهر أمصفى ومُـركّـب من أبـــي
ذهــــبٌ في ذهــــبٍ في ذهــــبِ
ولجـــينٌ في لجيـــنٍ في لُجــــين
...................................
إنتــــه يمتاز بعُـــلاك الأنتمــــــاء
يا رمز دنيـه الوِفَـه وشمس الأبــاء
فگــدك تفجّر على العـالــم عــزاء
وأنتــــه معلَم من منار المَعلَمين
.................................
إنته للعـالم عَلَم خير وســــلام
وهذا منوال الصناديد العظـــــام
بل نظام تقاطــع إويا للانظـــــام
والتقت بالغاضــريه الأمتــــــين
.................................
إلتقى الاســــلام بيها ويا لضـــلال
وأحتشد بيها النقص ضد الكمــــال
يوم هدّ الراسيــــات من الجبـــــال
چنه بيه أهل الكفر تطلبـــنه ديـــن
.................................
خذت منه البيـــه ضمدنه بكربلــه
وزلزلت عرش الجلــيل بمقتلــــه
لچن يبقى المنـفـــگد ثر منهلـــــه
شما بقن يتناوبنـــــّه المشرقـــين
...................................
يا أبي الضيم يـا عزّ الذليـــــــل
ياشبل حيدر علي وموت الجبـيل
مَحْـنه نعرف صطرتك تشفي الغليل
واليضدك وين صار ، وأنته ويــن
.................................
راح كل اللي يضدك وي يزيـــــد
وكلمن إتحداك طگ راسه بحديـــد
شمــا يعود اللي يبغضك مـن جديد
ينهزم وأنـــته بمكانك يا حسيــــن
..................................
إحنه بيك من الهظـم ياالحــر نلوذ
ومنهو غيرك إلنّـــه بيه للعز نــفـوذ
إحنـــه بيـــك نلوذ ونذود ونعــوذ
وشايلينـك منقبـه على المنكبـين
..................................
حسَـــين يمك خادمك عنده طلب
شاف من دنيا المكر كل العجـــب
وشاف كان وكان ما إلهن ســـبب
وأنته شاهد ياحبيبي المشهديـن
....................................

نسألكم الدعاء
خادم أهل البيت عليهم السلام
الشاعر أبو عقيل الناصري الحساني
https://www.tg-me.com/aa_ad9

لطمية نندب فيها مقتل الحسين :
(((واحسينا واحسين))) 2

ياسبط خير البريه ...... واحسينا واحسين
وياشبل حامي الحميه ..
وشمعة الدنيا الضويه ..
ونبعة الهادي الأمين ..

يلي أعظم يوم يومك ... واحسينا واحسين
الكَوم غير وجوه كَومك ..
من نشرتلهم اعلومك ..
بيّن الحقد الدفين ..

صاحوا بيوم المحربه .. واحسينا واحسين
الكَوم ياثارات عتبه ..
والوليد وثار شيبه ..
من أمير المؤمنين ..

شلون ريحانة الهادي ... واحسينا واحسين
أتحاشمت ضده الأعادي ..
شيعتك بأسمك تنادي ..
ياإمام الثقلين

ليش هذا الحقد والغل ... واحسينا واحسين
عالكريم اليرفض الذل ..
هيج ناس أضغان تحمل ..
وصوتك الحق المبين ..

ناس ماتهوى الكرامه .. واحسينا واحسين
هتكت الدين ونظامه ..
باعت العز والشهامه ..
بآل أميه المفسدين ..

باعت العز والرساله .... واحسينا واحسين
بناس ماعدعم عداله ..
وتبعت أذناب الضلاله ..
وما وفت للمهتدين ..

داروا أعله أحسين كلهم .. واحسينا واحسين
وأتضح مكنون غلهم ..
ماكو كل طغمه مثلهم ..
من العتاة المجرمين ..

الله وأكبر ياأمامي ..... واحسينا واحسين
طاح بالميدان ظامي ..
ليش هالمذبوح دامي ..
تصيح كل العالمين ..

وليش ظل أعلَ الشريعه .. واحسينا واحسين
صاحب العزة المنيعة ..
وياسبط بيده رضيعه ..
ماشرب ماي المعين ..

ويلي للحزوا ركَبته ...... واحسينا واحسين
ولأهل بيته أو صُحُبتَه ..
ويابطَل مثله أبغربته ..
أستوحدوه الظالمين ..

ويلي ويلي أعلَ أبو الغيره .. واحسينا واحسين
وعيلته الراحت يسيره ..
من يعز الحق نصيره ..
يطيح بين المعتدين ..

الله يلعن آل أميه ..... واحسينا واحسين
ماسكَوه شربة أميه ..
حاصروه بالغاضريه ..
وطاح مكطوع الوتين

واحسينا ......................................

خادم أهل البيت (ع)
الشاعر أبو عقيل الناصري الحساني
https://www.tg-me.com/aa_ad9

قصيدة في ذكرى إستشهاد الرسول (ص) بعنوان :

(أخذ من هالقصص عبرة)
................................

الزمان إويالطبيعة ايدور
وكل واحد حسب وضعه

أخذ من قصة العصفور
وفعل العگرب وشَرعه

* * ***

هاك إسمع يبو المعروف
القصة وإحرز المكسَب
أكو عصفور چان يطير
وحاول للنهر يگرب
وچان من التعب عطشان
وراد يفرفش ويشرب
ولن عگرب بنص الماي .. يأشّر له تگرب جاي .. راح أغرگ يبعد إچلاي
انكسر گلبه لمَن شافه ... يناديه إويهل دمعه
* * ***

نزل لّه وخاطَر بنفسه
وشاله وعالظهر خلاّه
وقدر مايستطيع اعليه
يم شاطي النهر وَدّاه
وبعد ماأنقذه المسكين
ومن ذاك الغرق نجّاه
تصور صاحبه يشكره .. وماظَن عالوفه يغدره .. ويچيده بلدغته بظهره
هذا اليفعل المعروف ... إويالبيه للغدر نزعه
* * ***

گعد يم النهر يندب
حظه وقلة إيمانه
وصاح اعليه يغادر ليش
صحيبك تنكر إحسانه
چا هذا اليسوي الزين
جزاته بحكم صحبانه
بعد ماعاتبه المغدور .. وتِخَلَّه بخاطره المكسور .. العگرب گال للعصفور
يصاحب لاتكثر اللوم ... كلمن يعمل بطبعه
* * ***

أخذ من هالقصص عبره
واسحبها اعلَ هالمجرى
وشوف شسوَّت الأيام
وأهل الغدر بالعتره
بعد مااستنقذوا هالناس
من الباطل ، بعد فتره
قتل جابوهم وتشريد .. وسبي بلا معرفه وتبديد .. بعد وي هالبشر شيفيد
وشنهي الينكر الأحسان ... بضميرك لليحب نفعه
* * ***

دخيلك يارسول الله
من كيد وغدر هالناس
ماظل وأصول الدين
عدها من الضغينه إحساس
بيت اللي بنيته بذاك
شموخك يالحبيب إنداس
بِدوها بآلك الطيبين ... وبالطف داروا اعلَ حسين .. وإسلامك ينور العين
صار إبولْيَة الأشرار ... بعد عينك يبو البضعة
* * ***

واليوم بأثر ذكراك
تعنينه بدمع ساجم
نواسي القائم الموعود
بمصابَك يبو القاسم
وياحال الرساله الصار
من ظالم لعد ظالم
والأمه بألمها تصيح .. عجل يامهب الريح .. تكاد أوتاد عزنه تطيح
إبغيابك مختطفنه الموت .. ودينك ينتظر فزعه
+++ +++ +++
خادم أهل البيت عليهم السلام
✍️ الشاعر أبو عقيل الناصري الحساني
https://www.tg-me.com/aa_ad9

في العباس (ع)... تاج الفضل ...

ذهل فكر القوافي وحارت بحدَّك(١)
وياهو العنده قدره ويگدر يحدك
يَمرَوع العدا بالگنطره بزلزال
يوم النهروان بصدَّك وردّك (٢)
وياتاج الفضل فضلك عليك يلوگ
ويالبدر المجد شع ضيَّه من عندك
يعباس بوجه كل خارج إعله الدين
ويباسم بالوغى لكلمَن برز ضدَّك
يالبسمك يشد عزمه اليحبك زود
ويالمگطّع إگماط المرجله بمهدك
يكافل زينب إختك يوم الإستنفار
ويابحر الوفه المتواصل بمدّك
إلك بيض الصوارم زغردت بالكون (3)
وعيون القصايد هامت بخدّك
إنطبعت صورتك يابو الفضل بالروح
يالمعذّب حياة أحبابك بفگدك
يالبالطف وهَبت لأجل أخوك حسين
رگبتك ياعضيده وعينك وزندك
عشگتك مو عشگ بطران عشگ إنسان
عرف معنى العشگ يتكامل بودّك
......................................................

1 - حدك ؛ تعريفك وتوصيفك
2 - يوم النهروان ؛ هي المعركة التي خاضها امير المؤمنين ع مع الخوارج وجعل فيها العباس ع على الجسر (الگنطرة) فلم يدع احداً يمر عليه إلا وقتله
3 - الكون ؛ الحرب
.................

خادم أهل البيت
الشاعر أبو عقيل الناصري الحساني

      ................................ 
خادم أهل البيت عليهم السلام
✍️ الشاعر أبو عقيل الناصري الحساني
https://www.tg-me.com/aa_ad9

قصيدة في وفاة الأمام القاسم بن الأمام موسى الكاظم عليهما السلام
لما دنت الوفاة من سيدنا القاسم عليه السلام سأله شيخ القبيلة - الذي زوجه إبنته بعد غربته التي قبله يعمل فيها عنده في سقاية الماء - سأله عن نسبه ؛
يگله إنتسب يبني يالمشكر ...
أنت منين ياطيب المخبر
گله آنه الجفت وياي دنياي ...
وعلى افراگ الأهل شفت المگدر
آنا ابن الأطايب والبهاليل ...
أنا القاسم إبن موسى بن جعفر
إهنا گام الرجل يلطم على الراس ...
ويصيح انهجم بيتي الله وأكبر
بقيت شلون عدنه كل هالاسنين ...
تسگي الماي ، لا والحظ الأگشر
إعذرنا أرجوك عن تقصيرنا اوياك ...
يبن اليعذر ويرحم ويغفر
..............................

هنا رفع القاسم ع رأسه من وسادة المرض وقال جزاك الله خيراً ياشيخ . لقد كفيت ووفيت... يگله ؛
جزاءك عد رسول الله ياشيخ ...
إلك معروف ماتنساه الأيام
يعمي بفاطمه بنيتي أوصيك ...
توديها لأهلها الصيد الأكرام
لمرابعنا أخذها بداعتي إوياك ...
يتيمتنه يعم مو مثل الأيتام
على بيوت الوحي رايح تدلّيك ...
حين اتشم عطر ديران الأسلام
...............
ولم قضى أنفاسه عليها السلام وقاموا بتجهيزه ودفه في هذا المكان الذي هو فيه الآن ، أخذ الشيخ إبنته وذهب فيها الى حيث أشار عليها القاسم ع في وصيته؛
وهناك اليتيمه إتعنت لدار ...
عليها للحزن والنايبه أعلام
وگفت على الدار وطرقت الباب ...
وطلعت مره اعليها آثار الألام
شمايل إبني صاحت بالبنت هاي ...
الفارگني أويلي من ١١ عام
حضنتها وعليها هامت الروح ...
كل البجي لهذا البيت الأنضام
..............................
نسألكم الدعاء
خادم أهل البيت الشاعر أبو عقيل الناصري الحساني
https://www.tg-me.com/aa_ad9

(قصيدة في زلزال الشام)

وكأني بغيرة العباس تنتفض عندما سمعت ان في الشام زلزالاً وان مقام زينب عليها السلام في خطر :
فقلت :
هاجت غيرة العباس واتعنه ابعجَل ليها
وضهضب من سمع بالشام زلزال بنواحيها
................................
هاجت غيرة العباس .. وأرتجت المعموره
لمَّن سمع صايح صاح.. زينب غاد مخطوره
تعنت غيرته وصاحت.. هاي اعليها مگدوره
خل بت الصميده تگول .. شنهي اليوم ماذيها
................................
تجنه وصاح يازلزال .. أوجب وألزم احدودك
لاتِدنَه لگبر زينب .. حدَّك لعد مجهودك
ترى راعي الكفاله اهناه .. من تتگرب ايحودك
حدك يم أخت عباس .. لاتدنه لمحاجيها
....................................
طمأَن گبر زينب غاد .. واتباشرت زواره
وبعد قلب العقيله ارتاح ... من همه وطفت ناره
أهل بيت اليأمن بيه .. كل زاير يطب داره
دنيا وآخره للظيم .. ماتترك مواليها
..............................
مصونه ابيرغ العباس .. من كل خطر يالحرّه
وإلج أخوه وزلم كلفين ... معروفين بالكرَّه
صبرج ترى اعلَ اهل الجور .. حال الدنيا مفتَرَّه
ويزينب مرقدج بالشام .. ماواحد يصل ليها
................................
خادم أهل البيت
الشاعر أبو عقيل الناصري الحساني
https://www.tg-me.com/aa_ad9

مع الحسين عليه السلام :

....... ((( إعقلها وتوكل ))) ........

يالتبجي اعلَ حظ تعرف تحصله شلون
عوف أهل السياسه المابهم كل حظ
وأخذلك نظره عالطف ، طف أبو الأحرار
وكظ بَـهل المكارم والمواقف كظ
البخت فرصة عُمُر ، واليضيعها يضيع
ويفوز اليستغلها بدنيته وينهض
وإذا فاتتك فرصة عمرك بدنياك
ترى روحك بشوغات الحزن تكتظ
إشينفعك؟ ياكلك هَم الندم والظيم
لو خلٌَصت إيدك مو ابهامك عض
إعقلها إوتِوَكَّل وي أبو الأحرار
السِگَه إيطَلع الزبد بالوكت من ينخض
ماتربح إذا ماتتبع أهل البيت
تطول ـ أتزود ـ تكبر ـ تگصر. أوتعرض
وهنياله (وعلي) الوَي الحسين يصير
ولايبقى اويهذا وذاك يتمركض

.................................
الشاعر أبو عقيل الناصري الحساني ـ
https://www.tg-me.com/aa_ad9

قصيدتي / ليلة القدر :

ليلة القدر رجائي ٠٠٠ وبها أمتـاحُ طُهرا

فلقد افنيتُ عمري .. كلَّهُ لهـواً وكفرا

ياإله الكونِ لطفـاً بي فما أملك وَفرا

قد أتتكَ اليومَ روحي من حصـادِ البرِّ قفرا

ولقد أعدَدتُ جهدي حسنَ ظني فيك ذخرا

ما أنا إلاّ أقلّ النـاسِ إيمــاناً وذكـرا

فكأني لم اكن أســـــــمعُ آيـــاتِكَ تُقرا

وكأني لم أكن أســــــمعُ تحذيراً وزجرا

وكأني لم أكن أسمعُ بعدَ الموتِ نَشـــرا

جئتُ محفوفاً بذنبي أحملُ الأثقالَ وزرا

خانني جهلي وصبري لم يكن بالحق صبرا

وتجاوزتُ حدوداً للهدى ســـراً وجهرا

أنتَ - ياربّ - تعاليـتَ عن الأذواقِ قدرا

لاتؤاخذني بجرمٍ يجعلُ الأوصافَ نُكرا

أنّك الرحمن - ربي - وأنا المأخوذ غدرا

خدعتني بســـمةُ الدُّنيا تفاهـاتٍ وسُــكرا

آملاً منكَ بفجرِ الليلة الوَجناء بشرى

...............................................
خادم أهل البيت الشاعر أبو عقيل الناصري الحساني
ََََََََََََََ
َََََhttps://www.tg-me.com/aa_ad9

موشح / في أنصار الحسين عليهم السلام

آل هاشم تفتخر بأنصارها
----------------------------------

( آل هاشم تفتخر بأنصارها
البيّضَت وجه الزمان أسرارها )

*

آل هاشـم عالبريه تفاخرت
وزاودت بأنصارها وما كابرت
والتُفاخر عد فخرها تصاغرت
من درَت ماترتقي لأقدارهـا

**

ياهو يترقى لقدرها ولا فخر
وعِزها تحت الخالق وفوگ البشر
ما تهاوت عالأرض لولا القدر
ثلـه مختاره من أبن كرارها

*

أختارهم للكون شبل المرتضى
وأرتضاهم والنعم ممَ أرتضى
سلماهـم للقدر حكـم القضا
وأفتدوه يوم الكريهه أبرارها

*

أصحاب ماكو اصحاب أجل منهم وَبَر
ركبوا بيوم الوفه خيول الخطر
خلفوا لهل المجد أعظم أثـر
والرجال أقدارها بـآثارهـا

****

أصحاب كلهم مرجله وگول وفعل
وكلهم إقدام وتنافس لـلعدل
سجلوا وگفاتهم بأعظم سجـل
وسكّتَوا من آل أميه أشرارها

*

سكتوا بالكون كل باغي وعنيد
وحيَّروا طغيان الأشعث والوليد
هذا منهم بالمواقف مو جديد
تورّثوا حين أخلصوا عمارها

****

تورثوا عمار وأخلاصه لعلي
ومن ولي أنتقلوا يضحون لولي
اليوم عن أم الحزن حگ تنجلي
همومها وما سلموها احرارها

****

أحرار ماسلموا زينب لليسر
حتى طاحوا بالحرب دون الخدر
هذا يا زينب تنادوا والعذر
راحوا ومحد وصل يم دارها

*

أنصار بالطف للبطوله وللمجد
رفعوا بعزهم لواء أهل الحمد
تنصف من تگول واحدهم أسد
عينك إلهم خل يصب مدرارها

****

ويلي ويلي على العقيله من الألم
من جفوها انصارها وراعي العلم
الف وسفه عليها جيش الشر هجم
وبالخيم والگلب شبوا نارها

***

آه ينصار الغريب الكم جرح
ما إله على المستقر بلسم يصح
يالي خلدتوا بمواقفكم صرح
يبقى بأذهان اليود تذكارها

****

آه ينصار المجد يهل الوله
ياللي بيضتوا الوجوه بكربله
الكم تفتحت جنات العلا
التجري من تحت الجنان أنهارها

***

أنصار هاشم رجنوا الواقع رجن
وما غمض إلهُم على الذله جفن
أمتحنت بجور الزمن بيه ممتحن
وأفتدت سبط النبي بأعمارها

***

نسألكم الدعاء
خادم أهل البيت عليهم السلام
الشاعر أبو عقيل الناصري

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://www.tg-me.com/aa_ad9

نصرة القرآن
٠٠٠٠٠٠٠٠٠٠٠٠٠٠
نُصرةً منّا لقرآننا ٠٠٠ ومواساةً لإسلامنا
من عراق الفداءْ ٠٠ وذُرى كربلاءْ
نَملأُ الكونَ بأصواتِنا ٠٠٠ نصرةً ٠٠٠٠٠٠
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
من عراقِ السبطِ أرضَ الرافدين
وربوعِ الطفِّ من جُرحِ الحُسين
إننا نســـتنكرُ الفعلَ المُهين
لكتابِ اللهِ رربّ ِ العالميـــــن
من ضواحينا وأحزاننا ٠٠٠ ومدى السُّخطِ بأرواحنا
من شعابِ العَناءْ ٠٠ ومآلِ البلاءْ
يَهتِفُ العَهدُ بأعماقنا ٠٠٠ نصرةً ٠٠٠٠٠٠٠
.....................................
نحنُ شعبٌ نَرفضُ الظلمَ أُباة
هكذا قد ولدَتنـــــا الأُمهات
ولَقد علَّمَنـــا الطفُّ الثبــات
إننـا الرُّعبُ بأرواحِ العُتــاة
إننا الموتُ لأعدائِنا ٠٠٠ لن يمَسَّ الرجسُ فرقاننا
بحسينُ الإباء ٠٠٠ ورُبى الأنبياء
شَهِدَ التأريخُ أفعالَنا ٠٠٠ نصرةً ٠٠٠٠٠٠
...............................
ياإمامَ العصرِ ياعينَ الرَّشـاد
أيها الموعـود لليــومِ المُـراد
ظَهَرَ البغيُ وقد عمَّ الفســاد
فأمتَشِقْ سيفَ عليٍّ للجهـاد
واستمعْ منا هتافاتِنا ٠٠٠ شمُتَ القومُ بإيماننا
ياحِسامَ القضاء ٠٠٠ أنتَ بابُ الرجاء
وطرقناكَ بآمالنا ٠٠٠ نصرةً ٠٠٠٠٠
.......................................
يافتى : الدينُ يناديكَ البـدار
أتُـرى قـرَّ بمَـأواك القـرار
وعن الظلمِ بكَ الدهرُ استدار
إن هذا الليـلَ يجتاحُ النهــار
يالَكَ الخيرُ لمأساتِنا ٠٠٠ قحَمَ البغيُ مقاماتِنا
ياإمامَ الوَلاء ٠٠٠ وحليفَ الوفاء
إنهُ صوتُ مواساتِنا ٠٠٠ نصرةً ٠٠٠٠
.....................................
أيُّ جُرحٍ كلَّ يومٍ يســـتفيق
في فؤادِ الدينِ والحقِّ الحقيق
فلَقد ضاقَ على الصبرِ المَضيق
وبأبنـاءِ الهدى شــطَّ الطريـق
لوَّثَ الغَربُ حضاراتِنا ٠٠٠ وثوى عندَ مَداراتِنـا
وأتى بالوباء ٠٠٠ وغثاءِ الشَّقاء
فقصدناكَ بآلامِنا ٠٠ نصرةً ٠٠٠٠٠
......................................
ياحِمى الدينِ ويايومَ الحساب
أدرِك الأســلامَ من شرِّ الدَّواب
خدَعَ المثليَّةُ اليومَ الشـــــباب
فأنبرى القُبحُ لإحراقِ الكتــاب
وتمادوا في معاداتِنا ٠٠٠ وأستخفوا بنواميسنا
قد طغى الأدعياء ٠٠٠ وعلا الأشقياء
فصرخنا في معاناتنا ٠٠٠ نصرة ٠٠٠٠
.......................................
الشاعر أبو عقيل الناصري الحساني
https://www.tg-me.com/aa_ad9

في رثاء أبي الفضل (ع)

..... (باسل الهواشم).....

من شَمَّر لميدانه ٠٠ بالطف عضيد حسين
شَمراته وي عدوانه ٠٠ شمرات أبو الحسنين

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يوم الوگف بالثاية ٠٠ وبجفه شال الرايه
ياعينه ماتتوايه ٠٠ مو سيفه بالميدان.. !

لحسينه بايع روحه ٠٠ نفس البطل مجروحه
جاب المنايا بسوحه ٠٠ وصيد البطل فرسان
..... وراعي الفضل بالحومه والهيبه ترس العين.....

**
صد للحرم بخيمها ٠٠ شايف الطفال اليمها
حر العطش لازمها ٠٠ وبصفها جود الماي

شاف الضمايا تنادي ٠٠ متحيّره بهالوادي
وجبد الرضيع الصادي ٠٠ للبيه نماير هاي
..... صال وتنخه ونادى وين اليواجه وين .....

**
صال وتنخه بزوده ٠٠ صوب الشريعه بجوده
وكلمن تدنه احدوده ٠٠ مَنجاته مو بالكيف
رَوّى العطاشا بجفَّه ٠٠ ووفه لعضيده وكفَّه
وهاج العجاج بطفَّه ٠٠ بگد الضرب بالسيف
..... وما هَمته الخياله طر الزلم صوبين ......

***
وضهضب كفيل الحره ٠٠ وميدانه بيهم فَره
من سيفه ضاكو مُره ٠٠ ذكَّرها بالكرار

حيدر صفاته وحيله ٠٠ متخيّل اعلَ كحيله
واليقترب ياويله ٠٠ من صارمَه البتار
...... بس اليفر جدامه ماينجسم نصين

*
اورَد وگلَب جيمانه ٠٠ وخيب امل عدوانه
وذَل بحِمَم بركانه ٠٠ كل غادر ودهدير

وفات اعلَ حدهُهم فوتَه ٠٠ وصح العجيد بصوته
يامحلى كون الموتَه ٠٠ دون العضيد تصير
...... إلمن يباسل هاشم جا رايد الجفين

*
ضحه وبذل مجهوده ٠٠ يشهدله فضله وجوده
وتگطعنله ازنوده ٠٠ بالملحمه الصنديد

رمز الوفه ال بعلومه ٠٠ بجه الزلم بالحومه ٠٠ مالايگتله النومه ٠٠ ذاك الأسد بالبيد
..... ويلي اعل گطع اجفوفه وويلي السهم بالعين
*
عباس احاه واويلاه ٠٠ عباس احاه واويلاه
نسألكم الدعاء
خادم أهل البيت عليهم السلام
الشاعر أبو عقيل الناصري الحساني
/2023
https://www.tg-me.com/aa_ad9

قصيدة :
محنة الطفل الرضيع
٠٠٠٠٠ ــــــــــــــ ٠٠٠٠٠
ليش الطفل عالماي ينصاب بسهم
ياكربله اشمجفاج وي بيت الكرَم
+++++++++++++++++

ياكربله إشــهذا الجفـــه
لبيت الحبيب المصطفى
وين العرب عن الوفـــه
كلشي ابمضاربها انطفه
وبيت التَحَيّيي الغانمه اعتابه انهجم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ياكربلا ليــــش انذبح
بيج اعلَ ماي الله الفرح
وبنـبـلـــه يادم الـطـفَــح
وياهو انگطع نحره وشبح
عينه بحراره لوجه إبيَّه من الألم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
وياظعَن للطف من وصـل
عالمشـــرعه حلمه انكتـل
وياطفــل ذل عِـزة هُبَـــل
ويـم النَـهـر عــاف الأمِــل
ولدينه اطه بكربلا من نحره دم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يادنيــــا دلالي انفـطر
شــفت السـبط يم النهر
متماســك بنـص الخطَر
مخضَّب رضيعه بدم حَمَر
ماشبعت أمه من انولد من عنده شم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ويلي لرضيع الطف نشَغ
وگماطه من دمه انصبغ
مبـلغ فـطامـــــه مابـلـغ
وگلب أمــه بفراگه فرَغ
معركه وبيها اويا الفرح كلشي انحسم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الشاعر أبو عقيل الناصري الحساني
2023
https://www.tg-me.com/aa_ad9

في رثاء الامام زين العابدين عليه السلام
٠٠٠ لهفي على السجاد ٠٠٠

لهفي على السجادِ ذي الثفناتِ
في كربلاءَ بمسرحِ الكُرباتِ
لهفي لهُ يرنو لجثةِ عمهِ
وأبيه مذبوحينِ في الفَلَواتِ
لهفي لهُ عيناهُ تشهَدُ قومَهُ
من آلِ هاشمَ مقصَدَ الهجماتِ
مِن كلِّ أصيَدَ دامياً في نينوى
في أبشَعِ الفتَكاتِ والنكباتِ
للهِ حالُ نجيبِ سبطِ المصطفى
لمْ تعرفْ الدنيا لهُ حُرُماتِ
تحدو بهِ أذنابُ آلِ أُميّةٍ
بمَدى سوافي هائلِ الطُرقاتِ
واويلتاهُ لنجل شبلِ المرتضى
الأوفى ، يُسارُ به لشرِّ عداةِ
ولزينَبَ الكبرى تقادُ أسيرةً
وبنات أحمدَ تسكبُ العبَراتِ
آهٍ لرحلِ محمدٍ ولِرَكبِهِ
أنقى وأطهرَ معرِقِ النسماتِ
يستامُهُ الأعداءُ كلَّ بليّةٍ
وتغالُهُ الأيامُ في اللَّهَوات

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نسألكم الدعاء
الشاعر أبو عقيل الناصري الحساني
2023 / 8 /10
https://www.tg-me.com/aa_ad9

ــــ يامحنة الشام ــــ

يامحنتي يامحنة الشام
وعندي عليل وعيله وأيتام
ناس إبظعنَّه ايشتمون ... وناس إبحزنَّه ايفرحون
......... ياخويه يحسين .........
ويلي لمن سار الظعن
بأهل المجد للشامات
تلگونه بطبول وفرح
واحنه بمصاب ومأساة
يابلوة ارباب الكرم
من تنهضم من شمات
وصعبات أيام المحن
اي والله كلش صعبات
وشتظن على الحره يهون ... بالغاضرية تظلون
.......... ياخويه يحسين ........
محنة حرايركم كلف
من راحت اوياها الروس
وشمات التسوگ الظعن
فوگ الجراحات اتدوس
ومخاطف اعيون العده
عليها وعزيز الناموس
بمگطوعه سارت والدرب
موحش وعر ما مأنوس
مگيده وجان المظعون ... ويه المخاطر مرهون
........ ياخويه يحسين ..........
ومحنة ابو الباقر علي
لاشفت هالموقف ريت
من گال لاتبقون ابد
كل باقية لهذا البيت
وعزَّم يذبحه الطاغية
وبروحي روحه اتفديت
وتعلّگت لاينذبح
بيه والمنايا أتحديت
ولافزع فازع تدرون .... يوم اظلم اعلينه الكون
........ ياخويه يحسين........
وشحجيلك بظيم اليسر
ياللي عفتني ابمحنته
وشوغة رقيه البالحلم
شافت ابوها ورادته
ولمن سمع ونها الرجس
وچنها اببچيها اتولته
ودَّالها الراس بطشت
وطاحت عليه وشبگته
وتصيح والكل من دون ... بس عالحرم يتفرجون
........ ياخويه يحسين .......
ومن محن يوم الطف بعد
بمجلس يزيد ومحفله
سكنه العزيزة بحضرتك
الچانت يخويه امدلله
راداها يستوهبها غِر
جاريه وداهمها البلَه
گتله الأمر مو للرجس
ولابيدك تنول العله
مو كلشي تتمنه يكون .... درب العواقب مسكون
....... ياخويه يحسين ........
ويلي عليك بكربله
عريان مگطوع النحر
مطروح نايم بالشمس
وموذر بسيف الشمر
أيسنه من شفنه الجثث
بالحومه بالحر تنصهر
وأحنه بنوايب يالبطل
وأهل الغدر عدهم نصر
ماظلن عليه اعيون .... ولاگلب ماظل محزون
....... ياخويه يحسين .......
ــــــــــــــــــــــــــــــــــــــــــــــ
خادم أهل البيت عليهم السلام
الشاعر أبو عقيل الناصري الحساني ـ 2023
https://www.tg-me.com/aa_ad9

..... ((( شرف الخدمة ))) .....

شرف للنـاس هالخدمه الحســينيه
ــــــــــــــــــــــــــــــــــــــــــــــــــ
يحســـين اليحط ابخدمتـك روحه
بس يشــتم عبيـرك يبرن اجروحـه
وخسـران ،  العنب طرواك ميلوحه
أنتَ البـالفـلَك يزهن محاچيَّـه
..........................................
يابدر الكـرامــه اليـزهَـن أنجـومك
وبدم الشــــهاده أمعطره أهدومك
بأيـام الدهـر ، ماكـو مثـل يـومـك
يالبالطف طَلِعتَك طلعه قدسـيه
.........................................
مـن أول لَحَـظ يالهاشـمي ونـظـره
ضگنه من المهَد حبك على الفطره
يبـن المصطـفى وريـحــانة الزهره
نذرنه أرواحنه بحبك فدائية
..........................................
إنمـوت ومانبـدّل وي مَحَبْتَـك راي
ياماي الحيــاة الماشــــــرَبت الماي
حتى الحزن يعزِف من يذكرَك ناي
وناي الحزن يُعرف منهو راعيه
..........................................
تـتـبـاهى العـوالـم وصـلَت المرّيـخ
وأحنه أبخدمتك نتباهى عالتاريخ
يلّي أبثورتـك آمنـت حتى السـيخ
أو عرفت نهضتـك نهضه إلهيــه
............................................
مدعـاة الشـــــرَف للناس هالخدمَــه
راعيــها إلـه بنشــــــر العلـم كِلْـمَــــه
وهَد عرش الظلم يوم أنتفض بِسْمَه
أو غيَّـر مجرى تاريـخ العبوديــه
........................................

روح بروح نتفادَه أو يبو الســــجاد
وبـْرَهن الأشـــاره أويـاه عالميـعــاد
لو نـفـرض زمانـك يجمَـع الأضـداد
نبقى أوياه أعلَ أعناد الظلاميه
......................................
نسألكم الدعاء
خادم أهل البيت عليهم السلام
الشاعر أبو عقيل الناصري
https://www.tg-me.com/aa_ad9

قصيدة في وفاة الأمام القاسم بن الأمام موسى الكاظم عليهما السلام
لما دنت الوفاة من سيدنا القاسم عليه السلام سأله شيخ القبيلة - الذي زوجه إبنته بعد غربته التي قبله يعمل فيها عنده في سقاية الماء - سأله عن نسبه ؛
يگله إنتسب يبني يالمشكر ...
أنت منين ياطيب المخبر
گله آنه الجفت وياي دنياي ...
وعلى افراگ الأهل شفت المگدر
آنا ابن الأطايب والبهاليل ...
أنا القاسم إبن موسى بن جعفر
إهنا گام الرجل يلطم على الراس ...
ويصيح انهجم بيتي الله وأكبر
بقيت شلون عدنه كل هالاسنين ...
تسگي الماي ، لا والحظ الأگشر
إعذرنا أرجوك عن تقصيرنا اوياك ...
يبن اليعذر ويرحم ويغفر
..............................

هنا رفع القاسم ع رأسه من وسادة المرض وقال جزاك الله خيراً ياشيخ . لقد كفيت ووفيت... يگله ؛
جزاءك عد رسول الله ياشيخ ...
إلك معروف ماتنساه الأيام
يعمي بفاطمه بنيتي أوصيك ...
توديها لأهلها الصيد الأكرام
لمرابعنا أخذها بداعتي إوياك ...
يتيمتنه يعم مو مثل الأيتام
على بيوت الوحي رايح تدلّيك ...
حين اتشم عطر ديران الأسلام
...............
ولم قضى أنفاسه عليها السلام وقاموا بتجهيزه ودفه في هذا المكان الذي هو فيه الآن ، أخذ الشيخ إبنته وذهب فيها الى حيث أشار عليها القاسم ع في وصيته؛
وهناك اليتيمه إتعنت لدار ...
عليها للحزن والنايبه أعلام
وگفت على الدار وطرقت الباب ...
وطلعت مره اعليها آثار الألام
شمايل إبني صاحت بالبنت هاي ...
الفارگني أويلي من ١١ عام
حضنتها وعليها هامت الروح ...
كل البجي لهذا البيت الأنضام
..............................
نسألكم الدعاء
https://www.tg-me.com/aa_ad9