علــيله وبهــــجركم من يبارني
غريبه ولمصايب باگن اسنيني
ــــــــــــــــــــــــــــــــــــــــــــــــ
ضعنكم من رحل ويّاه اخذ حيلي
عـليله ومن بعدكم من يتـــجّيلي
ولا مــــــنكم خبر ويبرد اغـليلي
مــن يوم المشيتو ما نمت ليــلي
اضل مساهره الليل
عليكم دمعتي تسيل
لا طابگ جفنها ولا غفت عيني
عليله وبهجـــــركم من يباريني
ــــــــــــــــــــــــــــــــــــــــــــــــــ
اناطر عالدرب والـروح مهمــومه
ولعافوها اهلها تعيش مهـــضومه
حزينه وتبقى بيها اجروح ملجومه
تضل طول العمر متعوبه مـالومه
وانه الضليت بـالدار
غريب وگلبي محتار
عليكم ما يبطل نوحي وونيني
عليله وبــــــهجركم من يباريني
ــــــــــــــــــــــــــــــــــــــــــــــــــ
محتاره بقيت وعيني ســـجابه
شحال السافرو كل اهله وحبابه
لا واحد يمرّه ولا يــــــدگ بابه
تضل حسره بدليله ونـاره لهابه
الحادي لوح وشال
المن اشتكي الحال
نار افراگم تسعر  وتجويني
عليله وبهجركم من يباريني
ــــــــــــــــــــــــــــــــــــــــــــــــــ
اناشد ليش ابوي الغالي ما جاني
ولا سألو عليّ لا مرو  اخــــواني
معقوله الگـــــمر عباس  ينساني
ما يدري المرض ولشوگ هــدّاني؟
ما معقوله ياناس
يتناساني عبــاس
مشتاگه شكثر والشوگ ماذيني
عليله وبــــهجركم من يباريني
ــــــــــــــــــــــــــــــــــــــــــــــــــ
انظر عالدرب ولعين مشبـــوحه
ودلالي بفگدكم تنتزف اجروحه
وتّذوب الصـخر يا ونّته ونـوحه
محتامه وعليكم روحي مذبوحه
عليكم گلبي ملهوف
بيكم ناظري يشوف
شوفتكم دواي وهيه تشفيني
عليله وبــهجركم من يباريني
ـــــــــــــــــــــــــــــــــــــــــــــــــ
لا ام لا اخت لا والي ضل يــــمي
ويّــــامن اسولف واشتـكي هــــمي
رحتو والمرض هدني ونحل جسمي
ولوعات الــمصايب غيّرن رســـــمي
ورده بعازة الماي
بُعدكم زيّد اضماي
عطش عودي وذبل وين اليروّيني
عليله وبهــــــــجركم من يباريني
ـــــــــــــــــــــــــــــــــــــــــــــــــ
علي كاظم المنصوري

(#فاضت_الغيره)


يوم ابو فاظل دخل ميدانها
فاضت الغيره وطفح بـركانها
ــــــــــــــــــــــــــــــــــــــــــــــــــ
من نزل عباس سبع الگنطره
خلّه زلم الكوفه كلها امحيره
اتخيلو نازل عــليهم حيدره

زلزل الـحومه وشعل نيرانها
يوم ابو فاظل دخل ميدانها
ــــــــــــــــــــــــــــــــــــــــــــــــــ
طب ابو فاظل وزلزل كربله
گامو ايلوذون شمر وحرمله
الخيل والفرسان فرت بــالفله

هربت اجيوش العده وشجعانها
يوم ابو فاظل دخل ميدانها
ــــــــــــــــــــــــــــــــــــــــــــــــــ
من برز عباس للحومه وثــــبت
من خزرته الگوم كلها اتراجفت
والله زلم الكوفه منه اتخورست

ولعساكر بيده هد اركانها
يوم ابو فاظل دخل ميدانها
ــــــــــــــــــــــــــــــــــــــــــــــــــ
ابهيبة الكرار طب الــــمشرعه
خله جيش ايزيد روس امگطّعه
عالارض ضلت جثـث متوزعه

گام عالحومه يطش فرسانها
يوم ابو فاظل دخل ميدانها
ــــــــــــــــــــــــــــــــــــــــــــــــــ
يشبه الكرار حيدر من يــــــهد
ما يهاب ابن الصميده وما يرد
بيده روس الگوم جاباهم حصد

بسيفه اخو زينب حصد طوفانها
يوم ابو فاظل دخل ميدانها
ــــــــــــــــــــــــــــــــــــــــــــــــــ
اخو زينب مــا يدنگ هـامته
ومن يزامط ما يثني حجايته
كلها تشرد من ترفف رايــته

ولزلم گامت تحضر اجفانها
يوم ابو فاظل دخل ميدانها
ــــــــــــــــــــــــــــــــــــــــــــــــــ
صاح اخليهم جثث فوگ الثره
وعالمنيه اليوم اوگّفّهم ســـــره
بيدي اطوي الميمنه اعله الميسره

بجفي اگصن روسها وذرعانها
يوم ابو فاظل دخل ميدانها
ــــــــــــــــــــــــــــــــــــــــــــــــــ
صاح انه العباس راعي المرجله
هذا يومي اوكت المزامط حــله
ذبله هوسه اوهوس اگبال المله

اجيوش اميه اليوم اگص السانها
يوم ابو فاظل دخل ميدانها

✍️ علي كاظم المنصوري
اهدي ثوابها الى والدتي

هذا الحن

#نسالكم_الدعاء

بس الك يحسين عمري كله منذور
واحله خدمه والله عندي ايام عاشور
.......................................
احضر جاردري من قبل كل عام
وانصبلك مواكب وارفع اعلام
وحق ذيج السبيه المشت للشام
بحزن كلبي انترسلك لجلك آلام
وحق نحرك ودمك ذاك اليفور
احله خدمه والله عندي ايام عاشور
................
شما يمر بيه العمر بسمك اصيح
وفزعه رايد يبو اليمه من اطيح
همومي كثره وردت يمك استريح
   سيدي وتخيلت لنك  ذبيح
ومقتلك يحسين باقي براسي ايدور
وأحله خدمه والله عندي ايام عاشور
...............
سيدي وتحسبني رايد من السبعين
    وكون روحي ميته كبلك ياحنين
الخدمه والله اعضم تجاره ويالحسين
     وانه مثلك ياحبيبي الكه وين
         كون تبقه خدمتك كل الشهور
واحله خدمه والله عندي ايام عاشور
.............
ماريدن كلشي بس سجلني خادم
سيدي وبيك شكثر لامتني وادم
ونه من زغري بمحبتك والله هايم
مااعوفك اقسم ابدر الهواشم
واحزني الك كل سنه بعكلي يدور
واحله خدمه والله عندي ايام عاشور
...............
كل لسنه لبن الزجيه اتعنه مشاي
وبيدي لازم رايه وامشي وابني وياي
ننطي الركاب وقليله والله بس هاي
وذكر امصابه وطفوفه من أشرب الماي
فدوه لجله ننطي كلشي وننطي النحور
واحله خدمه والله عندي ايام عاشور


الشاعر حسين عبد الحريشاوي

من المهد    حبه أنولد
والقُل هوه    أللهُ أحـــد
نحيى أعله حبه وأنموت ولآخر نفس خدامه
....................................................
عالفطرة حب حسين ما يشرونـه
مثل الزرع بذرة وهله اليحوونـه
شما يخلِص الخادم يكحل أعيونه
ومن الأزل     حبه أنتقل
وبكل وكت     ثابت يضل
لا ينشره ولا ينباع حبه أنولد بأرحامــــــــــــه
.........................................................
حسين اليخدمه يرتفع من شانـــــــه
ويتوضه كلبه أمن الرجس واللسانه
بالك تساوم بسمــــــــــــــه آنه وآنه
بدربه ألتزم     بهمه وعزم
وليغرك جاه     ولا أســــــم
ألمهم مرضاة الله وبالخدمة شيل الهامـــــــه
.........................................................
ثوب الخدم صاية بخت معروفه
كلمن يلبسه الناس شيخ أتشوفــه
يكعد صدر ديـــوان بين أضيوفه
راية صلح     مـــا تنفتح
شمــا تنعكد    هوه الربح    
من ينذكر أسم حسين كل شده حدر أجدامه
.........................................................
عن دربه رادوا نبتعد عذالــــــــــه
وكالوا يجــــــي يوم ونفرغ أسلاله
وكلنه المضيف وكشخته أمن أدلاله
وعشنه العمر    مثل الجمر
شما نحترك     يفوح العطر
ونترس هلا أجفوف الغير ونكشف سواد ألثامه
.........................................................
يحسين يا أغله وأعز كل ناسي
شكراً جزيلاً دوم رافـــع راسي
أحيـى وأموت بخدمتك وأنفاسي
بيك أبتدت    وحبـــــك ثبت
وبخدمتك     روحي أرتوت
ولآخر نفس آه يحسين عمري نذرت أيامه
.........................................................
خادم خدمة الحسين
الشاعر
محمد الموالي

من المهد حبه انولد
والقل هوه الله احد
نحيى اعله حبه وانموت ولآخر نفس خدامه🚩

يا بويه يذبح جـــــــــرح الفراك
كل ساعة أحن والحضنك أشتاك
لا خبر لا مرسال منك
ناسي حميده بويه جنك
يا بو يه يذبح جرح الفراك 🚩😭🚩
........................................
يا بويه تذبح فركتك نار الهجـــــــــر تاذيني
كل ما أحن الشوفتك دمـــــــع الجفن يجويني
من حملت عني ورحت مشبوحه ضلت عيني
بعدك فـــــلا يسوه العمر والمن أعيش أسنيني
كل ساعة أركض وافتح الباب
هلبت يمر طارش خبـــر جاب
محتاره أسأل ياهو عنك
ناســي حميده بويه جنك
يا بويه يذبح جرح الفراك
.....................................................
يرسم خيالي صورتك كلما أحــــــــــــن واتأمل
واركض على حسين أوأضل ياخذني ألك أتوسل
يا بويه مو بس الدمــــــــع نبض الكلب هم وشل
ميت عدل ودي خبر لــــــــو طيف هم بويه أقبل
بويه وغــــــلاتك ما نمت ليل
صبح ومسى دم مدمعي ايسيل
متعلًمه أغفى أعلى حضنك
ناســـــــي حميده بويه جنك
يا بويه يذبح جرح الفراك
.......................................
لحضات والصبح أنكسر وأشهك كمت بانفاسي
من شفت الحسين أعتنه وضل بيده يمسح راسي
يا عمي كتله أمروتك لا لا تجـــــــرًح أحساسي
ماني يتيمه او عاييشه مابين أهلــــــــــي وناسي
نزلت دمعته وكلـي ميعود
يبنيتي أبوج أو آنه موجود
ميت واتانــي عود لنك
ناسي حميده بويه جنك
يا بويه يذبح جرح الفراك
.....................................................
مكسوره ضليت وكمت من أمشـي بويه أتعثر
كل طفلة تركض عالأبو والحضنك أنه أتحسر
عايفنـــــــــي مكسورة جنح ونبع الحنان اتفطر
ترجعلي أدعي كل فجر أمن يجيـــب المضطر
لو تدري بيه شصار ما صار
طفلة وأجانـــي الموت خطار
من وني أسمع صدى ونك
ناســـــي حميده بويه جنك
يا بويه يذبح جرح الفراك
.....................................................
تانيني بويه أبنيتك تحسب بقت ليالــــــــي
موتي كرب وانه أنتضر بيك التقــي يغالي
من الحزن كلبي أنمرد بويه أشتكيلك حالي
هايه حميده ومن رحت هذا اللذي جرالـــي
هم وقهر وكليبي مجروح
ليليه أون بمسامر النـــوح
أمسح ادموعي بطرف ردنك
ناســـــــــي حميده بويه جنك
يابويه يذبح جرح الفراك 🚩 😭
...............................................
خادم خدمة الحسين
الشاعر
محمد الموالي

يا بويه يذبح جرح الفراگ
كل ساعة أحن والحضنك اشتاگ
لا خبر لا مرسال منك
ناسي حميده بويه چنك
يا بويه يذبح جرح الفراگ🚩 😭