كتب جاسم للزمن
       واشكتب ماينمحن
       آنه رباني الحسن 
           نشمي جسام
  »»»»»»»«««««««««««««««
احنه شرفنه الخليقه واحنه للدنيا فخر
ياسفينة نوح بينا سارت ابنص البحر
اتنخه ذنون ابضلمته ياعلي وكسره انجبر
حتى يعگوب ابمصابه بينه من ردله النظر
       احنه من رب السمه
        كرمانه  ابفاطمه 
    صاح ابن حامي الحمه
           نشمي جسام
»»»»»»»«««««««««««««««
ادم والله الغفرله صاح يا حيدر مدد
ولولا ما خالقنه ربك ما خلق ام اولد
لچن الله اختار جدنه وآله خصهم للشدد
اليو من عدهم جهنم تاكل اوتصرخ بعد

          احنه بيت اهل العلم
          هاشم ونعم الاسم
         راح اطبهه وانتقم
             نشمي جسام

»»»»»»»«««««««««««««««

علي لولا اچفوفه ابونه الدين ماذل الشرك
ولولا جفين ابو الغيره العدل شح وينترك
الله خص اهل الرساله بالطريق الينسلك
والله ميز ال هاشم ما ترد يوم العرك
        احنه قائدنه علي
        صار للدنيا ولي
        اليوم همي ينجلي
           نشمي جسام

»»»»»»»«««««««««««««««

احنه رب الكون فضله الكرمانه ابمنزله
بينه يختمهه الرساله واحنه دينه ابأوله
السيف غير اجفوف هاشم لايلوک ولا حله
ولذالك گبل آدم الله خالق كربله

       من گبل ماننولد
     الله خصنه بهالمجد
     الطبلي بالطف ينفگد
           نشمي جسام
»»»»»»»«««««««««««««««
راح اطبهه وسيف حيدر بيهم ايحل الذبح
اليوم حل ثار الزجيه وياهم وما نصتلح
اليوم للعاده الهواشم ينعد ابمية جرح
وراح اخلي الغاضريه درس ويطول الشرح
 
       سيفي ايسولف رگب
       صاحو العباس طب
        موتهم بيدي گرب
          نشمي جسام

خادم اهل البيت علي الزرگاني


https://www.tg-me.com/aabas78
قصائد لكل ايام محرم اشترك بالقناة

ما زفتك صحبانك ( قصيدة من تراث العمارة )

ثوب العرس اكفانك ما زفتك صحبانك
حنيتك بدمعاتي ... زفيتك بحسراتي
ما زفتك صحبانك
......................................
تسعه الحملتك بيها دمعاتي متكفيها بيها اشكثر تانيتك
اسهر واعد بايامي تكبر ييمه احلامي ياجاسم امسميتك
اسرح واشوف اخيالك متروسه يمه اسلالك من انتظر تاليتك
تكبر واگول اتهنه بيوم العرس والحنه من ترتدي خاچيتك
صرت انتظر ايامك ....... احلامي مثل احلامك
يالعايش بكل ذاتي ... زفيتك بحسراتي
ما زفتك صحبانك
......................................
ياييمه يتراوالي عريس اشوف الغالي يمه اشكبر هالبسمه
من تجتمع أعمامك تصير بسعد ايامك اويه اصحابك الملتمه
عمك يحني چفوفك خالك يجي زافوفك بيوم العرس يايمه
كلما اغمض عيني هذا الحلم يجيني سر الكلب شيضمه
تالي العمر يوليدي .... بدمك تحنت ايدي
بس اصفج براحاتي ... زفيتك بحسراتي
ما زفتك صحبانك
......................................
حل الجدايل حلها يالعشرتك ما ملها والزفه هاي الليله
عماتك ايتاننك بچفوفك ايحننك وحضرت رباب وليلى
اشبيه الزمان اويايه بالطف كسرلي امرايه دار بعكس كل حيله
عريس اخذ من عندي خلاني انحب وحدي مات الچنت اشكيله
انحب وأون خلاني ....... بسهم العرس صاباني
يوم العرس مأساتي ... زفيتك بحسراتي
ما زفتك صحبانك
......................................
طر للعرس مصباحك يمك اصد ذباحك ام وابن ذبحانه
هالدنيه ظلمه بعيني ما تگعد اتحاچيني يا وردتي الذبلانه
ضج الگلب من ونته كون انذبح مو انته ام الولد تعبانه
يالنايم اعله أترابك انسد الگبر موبابك يالتشبه الريحانه
افتح ييمه عيونك ..... ما صدك ايچفنونك
يا دمعتي بشيباتي ... زفيتك بحسراتي
ما زفتك صحبانك
......................................
يمه انطفت كل شمعه والحنه صارت دمعه دار الزمن مگلوبي
الياس احترگ بالخيمه من راحو اهل الشيمه ادنه الجمر يم ثوبي
صفناتي يمه ابالي محد بقه بخيالي بس انته يا محبوبي
يا صوره ما انساها اشما التفت الگاها مطبوعه ويه اهدوبي
التفگد ولد متعوبه ..... طول الدهر مشعوبه
دمعي الحفر وجناتي ... زفيتك بحسراتي
ما زفتك صحبانك
......................................
الخادم
علي صادق المجراوي
8/6/2025


ملاحظه : تقرأ على طور قصيدة الليله يتراوالي للمرحوم حسين بدريه

https://www.tg-me.com/aabas78
قصائد لكل ايام محرم اشترك بالقناة

ليلة 8 من محرم الحرام


عرس الضوءه تــمنيته           
وتالي بدمـــــع زفيــــته 

وردة ودرع أنطيته.          وردة ودرع أنطيته
ـــــــــــــــــــــــــــــــــــــــــــــــــــــ
بذاك الضهر وبطلعته بالخــيمه من ودعني
صحت لولد ضي العمر وتالي العمر فاركني
شبكت وداع تشابكت وبجفه  هام شابكني
ضليت أبوسه بجــبهته وبجفي هم قبلني

نمــــشي ونرد نشابك    
شوف العشك بحبابك  

بثغر النحر شميته  وردة ودرع أنطيته
__
شمت عمر  بكلبي جمر حرمت عليه الفرحه
طافي الشمع بفركتك والشمعه ماتت ذبحه
كلبي بغـيابك ينجرح ضليت أونن ونعه
برأيت حلم اشتاك الك حلمك يمه فرحه 


يمته بحـــلم نتلاكه        
الوجه البدر مشتاكه

بروحي الولد  خليته وردة ودرع أنطيته
_
بعطرك أشم يل مبتسم ياوردة بين ايامي 
ادري بغيابك لورحت ماتت  ييمه حلامي
بعرسك اشوفك مبتسم تالي اشوفك ضامي 
ماتت فرحتك ياضوءه ثوب الفرح ضل دامي 

بكل العرس هلهوله       
جاسم صبح ينعوله
 

بثوب العرس وديته وردة ودرع أنطيته
___
راح ومشه وعينه تصد ليه بدموع عيونه
كلبي بغيابك ياضوءه يايمه هم خيعونه 
باجر دموعي الوجرت جفني تذوب جفوته 
دمعي اليطيح بغيبتك يامهجتي يشوفونه 

سيل الدمع بعيوني.        
ذبل ييــــمه جفوني 

جفني بدمع  رويته         وردة ودرع أنطيته 
___
بسوح الحرب لمن يهد روه العدة بصولاته 
يطحن زلم طحن الرحه يطول نظر عماته 
جاسم صبح فارس مظر صولت علي بهداته 
يخلس زلم لا مو زلم  بثوب العرس كشخاته 

عرس الولد بالحـومه.       
أمه أصبحت مهضومه

دمعه  وفرح طشيته           وردة ودرع أنطيته

كلمات......خادمكم 
مرتضى مكطوف الموالي

https://www.tg-me.com/aabas78
قصائد لكل ايام محرم اشترك بالقناة

القاسم ع


ما بين العيون كل عمري ضميتك
اعذرني جسام للحومه زفيتك
خل تهمل العين ظل وحده الحسين
****
انتظرت سنين يكبر يالولد عودك
ضيم الدنيا صابرته على مودك
وصلنه الطف ييمه وبانت احدودك
عرس لو موت يبني الجنه مردودك

ظمهن يجسام واخفيهن آهاتك
إم آنه والروح تچويها نظراتك
يمه الربه دين ظل وحده الحسين
****
يريد الدنيا ادري كلمن ابعمرك
زغير وما تعرفه اشظاملك دهرك
اذا عفت الشموع وحزمت صبرك
يم حسين باچر ينصب گبرك

يوليدي لشموع ساعه ونطفيها
والحنه ايام هالغبره تخفيها
مينفعك البين ظل وحده الحسين
****
اشما عاين عليك اگليبي يتگطع
شباب وما يلوگ الشوفتك مصرع
صرت اتخير ابين الوفه ومدمع
فدوه الفاطمه بالحومه تتبضع

من گلبي هالصوت بس فاطمه اتفهمه
فدوه هل اولاد لتراب ابو اليمه
الدم يجري صوبين ظل وحده الحسين
****
لتفكر ييمه ابحالي والخيمه
ميهمني السبي والركضه بالهيمه
ما نسوى ترانه اگبال هالشيمه
گبل امك وجب الحسين تقديمه

انته حدر خيل روحك تخليها
وانه عله النوگ زينب اواسيها
طب للميادين ظل وحده الحسين
****
تعال اوياي يبني وعاين اللوعه
تره العمك هذن لسيوف مرفوعه
بهذاك الصوب عشره خيول مجموعه
بس ايطيح عمك تسحگ ضلوعه

ها يمه جسام شتفسر المنظر
ما تنصر حسين يبن الحسن تگدر؟
وين الدرب وين ظل وحده الحسين
****
يالله اوليدي حط سيفك عله متونك
ابد ماريد يبني اتدير بعيونك
واذا سبعين الف يمه يلاگونك
ابسبيل حسين خليهم يذبحونك

لتاني السيوف انته اعتني ليها
وابنحرك اتنام يوليدي خليها
تفزعله هالحين ظل وحده الحسين
****


الشاعر اياد الديراوي


https://www.tg-me.com/aabas78
قصائد لكل ايام محرم اشترك بالقناة

الليله ليلة جسام...انطوهه حگهه انطوهه

هذا محبوب الحسن..ضحَّه دم لسلامه
نبچي واعله امصيبته...خل ندگ عالهامه
حيلكم ياهل خَدَم...هِيَّه هاي ايامه
كون رمله تفتخر...ابمجلس اللطامه

عاللطم ماننلام...واصدركم وَسمُوهه
الليله ليلة جسام...انطوهه حگهه انطوهه
......................................
تنظر الليله العَزَه...الفاجده المفجوعه
مانلوم المنجرح...لو يهل ادموعه
ياشباب الينكسر...يعني حَس باللوعه
بالصّواني للعرس...تبچي حتى اشموعه

باللطم يالخدام...أم الولد واسوهه
الليله ليلة جسام...انطوهه حگهه انطوهه
...................................
خَلِّي نهدي التعزيه...للحسن ووليده
وبالحزن هذا الگلب...نار كون انزيده
واليدگ اعله الصدر...حيل يرفع إيده
رمله هالليله تون...واليون اتريده

بلله دگو اعله الهام...واعله الجره عينوهه
الليله ليلة جسام....انطوهه حگهه انطوهه
......................................
حَگَّه جاسم عالشباب...ياشباب الليله
نلطم الهل فاجعه...وننحب ونبچيله
عَمَّه الحسين انهظم...والفگد هد حيله
جابه للخيمه ويون...والدمع يجريله

ذبحو الأمَّه احلام...وابهالخبر فجعوهه
الليله ليلة جسام....انطوهه حگهه انطوهه
........................................
صيحو للقاسم نضل...كل وكت وياكم
عهد عدنه الفاطمه...والله ماننساكم
والله خدمتكم شرف...كل محب ناداكم
ونبقه يانجل الحسن...نلعن العاداكم

تشهد الهه الايام...شيعتكم وتدروهه
الليله ليلة جسام...انطوهه حگهه انطوهه

سيد علي الموسوي


https://www.tg-me.com/aabas78
قصائد لكل ايام محرم اشترك بالقناة

كان حلما لم يتحقق
( رملة تخاطب الامام القاسم عليهم السلام)
____

امنية روحي .. يمك ارفعها
عرس المبارك .. حلمي اسمعها

يل شمعك نار اخيام
يوليدي ياجسام

عرسك المبارك .. حلمي اسمعها
____

يبني كل أُم عايشه بهاي الحياة
يصير باصيار الولد عدها امنيات
واني امنيتي بقت اسمعها هاي
عرسك المبارك ينادلي الخوات

منها حرموني .. چلمة اليّمه
وبعدك اسنيني .. يالولد ظلمه

عالغبره ليش اتنام
يوليدي يا جسام

عرسك المبارك .. حلمي اسمعها
_

حضرت ثوب العرس وانته بصباك
ومن كبرت احلامي هم كبرت معاك
گلت ابني بزفته ياخذني كون
تالي ما تالي الگبر مني الخذاك

احچي يوليدي .. اني واخيالك
تعرف ابالي .. واعرف ابالك

گلب امك شوف اشضام
يوليدي ياجسام

عرسك المبارك .. حلمي اسمعها
__

يبني اذكرك لو شفت زفة  وشباب
تروح روحي ويرجع بگلبي المصاب
بالهنا تحقق حلمها الامهات
واني حلمي مندفن حدر التراب

اشلون اصبرها .. عگبك اعيوني
والخلگ شافت .. بعدك اشلوني

زفتك وسفه اسهام
بوليدي ياجسام

عرسك المبارك .. حلمي اسمعها
____

روحي مشتاگ اشكثر يولدي ليك
تدري ماموجود وادور عليك
سولفت يم الحبايب من اطيح
تصير ليه بالكبر عكازه اديك

تمشي تعبانه .. گالو اعليه
بلايه عكازه .. شافو ايديه

ورمحك يمشي لگدام
يوليدي يا جسام

عرسك المبارك .. حلمها اسمعها
___

على التراب اتبدت احلام السنين
والهلاهل كلها صارتلك ونين
مثلما امك تهم بيك وتنوح
بيها هم اتهم اعرفنك حنين

علرمحك عينك ... تنظر اعليها
ودگ اتقبّل .. تنزل اديها

تعبت من سبي الشام
يوليدي ياجسام

عرس المبارك .. حلمي اسمعها
___
ايوب يوسف الطوگي


https://www.tg-me.com/aabas78
قصائد لكل ايام محرم اشترك بالقناة

علي الاكبر عليه السلام 👇👇👇👇👇

                 
علي الاكبر  ع


                يـالعايفني ابلوعه وحسره
                جرح افـراگك يمه اشكبره
اتــريــد اتشم                انطر گلب امك      

==========================
     آنــه الـعلّمـت عـالــونــه حــتـــه الـنــاي
     الـنـوگ البالـسـبـي گامـت تـــون اويـاي
      گلبـي ينفطـر لــو جـابــوا الـنــه الـمــاي
      واشوفه اعله الرمح عطشان تگتل هاي
        
               يـا نـاي الــون مثــل اونيني
               مـا ظـلـت دمـعـــه اتسليني
امحنه ابـــدمك                 انطـر گلب امك
==========================
       گلبي امــــن الحزن ماتنعد اجروحه
       اليتامه اتسكت امـك من كثر نوحه
        گبل لاتنذبح ياريـــــــــــت مذبوحه
         اشكثر عالي الرمح والراس مالوحه

               جبت الماي ومـديــت ايدي
               ياوادم عطشــــــان اوليدي
هـزتــه اتلچمك                    انطر گلب امك
==========================
       بجه حته الــرمــح مـن كثر مـاونيت
      بللت الــدرب بـدمـوعــي مــن رديت
     اوياك الشوف راح وضحكتي والبيت
     خـــــذت وياك كلشي الأمك اشخليت

            راســــــــــك للشام ايودونه
           وجسمك بالحومه ايخلونه
يصعــــب لَامك            انطر گلب امــك
==========================
     ويـن الـفاگـده اتساعـدنـي عـالـونّـه
     امـضـيـعـتـلـي ولـد ومنيـن اجيبنّـه
      شّـلـي بيهن اعيـوني المـا يشـوفنّـه
       دمـعـهـن والـنظـر هـاليلـه اوشـلـنّـه

                 آنــــــــــه ام وفگديت اوليدي
                 ضايع تعب اسنيني امن يدي
اشيحمـل همك              انطر گلب امك
==========================
        تغمض اشلون عين الفاگده ارباها
         بـس اتصـب دمـع چتالــه عافـاها
          بـفـراگـه اتّمنــه الـمــوت خــلاهـا
         گــون الـداستـك داستنـي ويـاهـا
                  
         اتـمـنــه اويـــاه ايسحگــونـي
         وبـالحـافـر گـون ايطشـرونـي
فــدوه جسمك 
انطر گلب امك
==========================
        هاي الصعبه من امشي ويضل ابني
         آيـا گلبــي بـالــحســرات دولــبـنــي
        يضـل أويـاه مـا يـرضـه يطـاوعنـي
         يمــه مـو بـدَي حــداينـه  ايـجـرنـي
          
                    مـا يقبــل حــداي اضعـونـي
                    يمــك مـا يـرضــه ايخلـونـي
ماظــــــل يمك                                     انطر گلب امك
==========================
حيدر الشغانبي


https://www.tg-me.com/aabas78
قصائد لكل ايام محرم اشترك بالقناة

نزال لمولاي علي الاكبر ع

حي الله الگبر سيد الغيره
حي الله الگبر سيد الغيره

يلتسولف علشهامه
شاهد وميزكلامه
راس ابن غانم علامه
شاله بيده
يرهب الجيش بيعيونه
وجيش اميه يجن جنونه
كشخ بيرغ عله امتونه
بكل عقيده

حيرة اعدائه كلش اچبيره
حي الله الاكبرسيد الغيره
/////////////////////////
يطوي ارض الله بثواني
صاح انه سيد زماني
جدي حيدر علماني
من اذلهم

مااهم الكل عددهم
كمت اطشرهم ولمهم
ساحگ ابجدمي علمهم
علمتهم
وبسيف هاشم طاحوبحيره
حي الله الكبر سيد الغيره
////////////////////////////
ظهر الحسين انه اسمي
ابو فاظل هوه عمي
الحومه چانت هيه حلمي
انه الكبر

ياشمس نوري خيامي
وصلي الزينب سلامي
بلعطش طول كلامي
گلبي ينطر
والدنيه احسهه كلش زغيره
حي الله الكبر سيد الغيره
////////////////////////
موبشر كل ال اميه
زمره ماعدهم حميه
الغدر عدهم هويه
بلايه رحمه

مايلاگون الهواشم
الغظب بنواعه قادم
بسيفي دمهم لوحه راسم
يحله رسمه
بسيفه دهرنه صاحو ادهيره
حي الله الكبرسيد الغيره
///////////////////////////////

منهو ابونه ومنهو جدنه
شحده يدنه اعله حدنه
شمانعد مايگضي عدنه
احنه هيبه
جدي قتال النواصب
وانه قتال الكتايب
شافو ابسيفي العجايب
والمصيبه
والشمر حاير وجهه ميديره
حي الله الكبر سيد الغيره
/////////////////////////////
سلام البهادلي


https://www.tg-me.com/aabas78
قصائد لكل ايام محرم اشترك بالقناة

#مجالس_محرم_الحرام 1447 هـــ
ياعلي الاكبر

🔹🔸

انهض انرد للخيام
صعبه لمفارك ينام
بويه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
انهض امــــك كاعده ابــاب الالم
وتدري كلب الوالــده نــــز وعلم
شلون ينسد باب هجرك كله دم
الخاطر امــــك ياعلــي رد للخيم

وجهك يزيح الظلام
بعينها يصلي الكلام
بويه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
ياعلــي فراكك صعـــب ماينحمل
اكبالـــي ميت هاي ما تدخل عقل
شلـــون اردن بيك لامك مو سهل
امــك امن تشوف جسمك تنجتل

شلون تصبر يا امام
يا امل طير الحمام
بويه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
الموت وي طولك يالاكبر مايليق
الورد من لونك واشوفنك رحيق
بالشجاعه تنقري وللحـب صديق
الله من سواك يبني اشكد دقيق

فصل امتونـــك هيـام
وهسه صارت للسهام
بويـــه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
ياركـــن كلبي التحطـــم والوكـــع
الامل من بعدك يالاكبــر مارجـع
بـــدر مثـــلك وبجمـالك ماسطـع
صعبـــه يبني اتصبح كبالــي قطع

يابـــدر ليــل التمام
ردتك الظهري حزام
بويه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
اعز من روحي وردت يمي تدوم
انجـــان تكـــدر يبني ياريتك تكوم
الكلب متحــــزم يالاكبر بالهموم
والهـــوئ ابلياك بالريــــه سمــوم

ويه البعد دومك خصام
كافي من هذا المنام
بويـــه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري


https://www.tg-me.com/aabas78
قصائد لكل ايام محرم اشترك بالقناة

اليوم ليلئ ويلحــــــــــزن حيرانه
تكول الاكــــــــــــــبر رايح وخلانه
راح مايرجــــع بعد
ونذبح طير السعد

تكول بعده بعز شبابه ومافرح بدنيه هاي
شفافه ذبلت يمي كلي يمه اريد شويه ماي
هيج من ودعني الاكبر هسه ظل بلا فياي
ليش ماكلي برحيله والرمل يصبح غطاي

والحوافر داســــته
ومه كــالو خــــــلته
وجثه ظل مفــــــــــرهده وعريانه

كامت تردد يلاكبر مااعيش انه بجفاك
ريت كون الموت اجاني وميته گبلك مو وراك
ولا اشوفنها الحوافر مطلعه ظلعك من كفاك
ماي ماصح حتئ اشربك حگي احير انه بدواك

حكي يبني تــــيحرت
وريت ميته ولاعشت
خلافك الــــــــــــهم والكدر غطانه

رحت بس ظلت صوركم عايشه بلب الگلب
من بعد عينك احيرن يصعب عليه الدرب
كلي يمه شلون امش انه وي وادم غرب
وما ابطل وني بعدك ولدمع علخد يصب

هيج اخلص دنيتي
بدمع وبحــــسرتي
ولا يبطل گــــــــــــلبي من احزانه

يبني بس هل واحد انته شلون  اخليك واروح
تزيد ياروحي بحزنها وحگي كون ابجي وانوح
مو جرح واحد وشله بيك يبني شكد جروح
بعد عطرك وين اشمه وعنبر بعطرك تفوح

كلشي ماظل يمه الي
وراح مــــــنيدي علي
وذكره منــــــــــــك مابقت ويانه

يمه كلشي الباقي منك راح وي حرك الخيام
وعتنيتك رت اشوفك بليل هندس بس ظلام
هواي هيه الموته يمك موسهل يبني الكلام
وماغفت عيني انه بعدك صعبه كلي شلون انام

باجر يجرني الــحبل
ريت وياك انجــــــتل
ولا اعيــــــــــــش بدنيتي وهمانه


ابو سلام الجابري
#جديد_محرم_الحرام_١٤٤٧هـ✍️

https://www.tg-me.com/aabas78
قصائد لكل ايام محرم اشترك بالقناة

المستهل //

* ابن اشرف عمامة * سليل أهـــل الزعامة
* فـرع مـن شجـرة الكـرار حـيـدر* نزل سـوح الحرب خيــال الاكــبر
* سليـــل أهــل الزعــامـــه
1-        ـــــــــــــــــــ+ـــــــــــــــــــــــ+ـــــــــــــــــــــــ

كالتها العرب جلمة بخت تنكال              المـا بيـه مـن عـلي مـا ينحـسب خيال
او علي الأكبر شمـوخه ابساحة الأهـوال    أثبـت  هـالحـقيـقــه الماكــو بيهــا اشـكــال
* نــزل وبكل جدارة *  تـرهى اعـله المعـاره
* مثل جـده الصميـده اعليها سيطـر* نزل سوح الحرب خيال الاكـبر
* سـليـــل أهـــل الزعامـــه
2-         ـــــــــــــــــــ+ـــــــــــــــــــــــ+ـــــــــــــــــــــــ
علي او جــده علي واحســاب حـاسبهــا                                          أول جـــولــه بــالمــيـــدان يـكــسـبـــهــا
يطشــرهــا الحشـــود امنيــن ما طبـهــا                                                او نيـران الغـضب فـوك العـدى ايصبهـا
* ارتجـــز بيـرغ عمـامـــه * او واضـــح مــن كلامــه
* تحــدي الكـل مقـاتــل بالمعسكــر* نزل سـوح الحرب خيال الاكــبر
* سليـــل أهــــل الزعامـــه


3- 
عـلي الأكــبر شـبــاب ابمقـتبـل عـمــره                                         حلـم عنـده ابحـيـاتــه اسنيــن ينتـظــره
او جــان اجـمـل حلــم بـالدنيـا يعـتـبـره                                           يـشـارك بالطـفــوف او يـنـصـر الثــوره
* طمــوحــه او أمنيـاتــه * اهنـاه يخـتـم حـياتـه
* وبوادي الطفوف ايواجه أهل الشـر* نزل سوح الحرب خيال الاكبـر
* سليــــل أهــــل الزعـــامــه
4-          ـــــــــــــــــــ+ـــــــــــــــــــــــ+ـــــــــــــــــــــــ
حـسيــن اسبــاب عـنـده الاكـبــر اخـتــاره                                          يقدمه اعله الحرب مـن تخـلـص انصــاره
يشوف ابنـه او عـزيزه او موضع اسـراره                               يـحــمـــل عـالحـشــــود او بـيـــده بـتـــاره
* بطـــل خـاض المـنايـا * او تحــدى أهــل الـروايـــا
* تكـليفـه يدافـع عن حـمى الخـدر* نزل سوح الحرب خـيال الاكبـر
* ســليـــل اهـــل الزعـامـــه
5-         ـــــــــــــــــــ+ـــــــــــــــــــــــ+ـــــــــــــــــــــــ
شـبيــه المصطفى ارسـوم النـبي ارسـومـه                                    ابـ اصـراره او شمــوخـــه زلـزل الحـومــه
مـن يشـتــد وغـــاها جــن عـلي  ابـيـومــه                                    لخـــدور الفـــواطـــم وصلـــت اعـلــومــــه
•  كسـر جمـــع الأعـــادي * او يـسمعـــنـه ينـــادي
تـرى اليـكـرب خـيام الهـادي يتـوذر* نـزل سوح الحرب خيـال الاكبــر
* سـليــــل اهــل الزعــامـــــه

      خــادم أهــل البيت عليهم الســـلام
      الشاعر  أبو حيدر المجراوي

      محرم الحــــرام 1447 هـ / 2025 م

https://www.tg-me.com/aabas78
قصائد لكل ايام محرم اشترك بالقناة

نزله علي الاكبر عليه السلام

انا عليُّ ابنُ الحُسين ابنُ علي
٠٠٠٠٠٠٠٠٠
نزل والسيف بيمينـه ورتجل بالحومه
علي آنه وجدي حيدر لو نسيتو علومه
راح اراويـــكم قتــاله ذولفقاره ويومه
جيوشـكم يا آل اميه بالحرب مهزومه

في طاعةِ الرحمنِ اهوى مَقتَلي
انا عليُّ ابنُ الحُسين ابنُ علي
٠٠٠٠٠٠٠٠٠
خيبـر اكلبــها عليــكم وآنه قالــع بابها
شما تزيد اعداد عدكم إلّا اكص ارگابها
مرحب وبكـر ابن غانم والبطوله حسابها
راح اكص راسه ودوسه يندفـن بتـرابها

إلاّ بسَيفي شَـرّهُ لا ينجَلي
انا عليُّ ابنُ الحُسين ابنُ علي
٠٠٠٠٠٠٠٠٠
هذا ابوي حسين هذا وعلي الأكبر آني
كـربله أخسفـها بيـكم ما يظل سفياني
ويله يا ويله اليجيني وبالحرب لاگاني
إلا اطـر راسـه وذبحه كلمن اتحــدّاني

يا ارضُ ميدي بالعِدا وزَلزِلي
انا عليُّ ابنُ الحُسين ابنُ علي
٠٠٠٠٠٠٠٠٠
ما يهمني الموت راحه في سبيل الباري
يا بني سفيان منكم خذت حقي وثاري
نترست الكاع بجثثكم والقتـل اجبـاري
نهـر وسط الغاضـريه من دمـاكم جـاري

من بَحرِ طه مَنبَعي ومَنهَلي
انا عليُّ ابنُ الحُسين ابنُ علي
٠٠٠٠٠٠٠٠٠
ما طحت لوما غـدركم بالغـدر صبتوني
المهـم عنـد الله مرضي ما يهم كطعوني
علي الاكبر يبقى اسمي. والله ما تمحوني
درس للأجيـــــــال ابقه. كل زمن يقروني

وذكْرُنا لا ينطمس سَيعتَلي
انا عليُّ ابنُ الحُسين ابنُ علي
٠٠٠٠٠٠٠٠٠
لا يزيد يدوم حكمه ولا ابن مرجانه
بس ابوي حسين يبقى. خالد بعنوانه
احنه أهل البيت احنه خاسر العادانه
يم رسول الله عرشنه واليحبنه ويانه

بجَنبِ جدي في المعالي مَنزِلي
انا عليُّ ابنُ الحُسين ابنُ علي

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

https://www.tg-me.com/aabas78
قصائد لكل ايام محرم اشترك بالقناة

محرم 1447ه‍-2025م
قصيدة الليله الثامنه (على لحن قصيدة يمه اذكريني من تمر زفة شباب)

يمه حنيني من دمه نحري اليسيل
وتذكريني من يحل وكت الرحيل
دمعة عيونچ لا تصبيها
ودّعي وليدچ يمه من فوگ الهزيل

؛★★★★★★★★★★★★★★

رايح الحربي النصرة حسين الوحيد
اليوگف اگبالي ينذبح من الوريد
يمنتي ويسراي لا تحنيها
ودّعي وليدچ يمه من فوگ الهزيل

؛★★★★★★★★★★★★★★★

لو متت يمه لا تحزنين بگفاي
افتخري بوليدچ العمي ضحيت بدماي
هامتچ بيه يمه رفعيها
ودعي وليدچ يمه من فوگ الهزيل

؛★★★★★★★★★★★★★★★

إلا اگر عينچ من ابرز الذيچ الجموع
مسحي دموعچ لا تراويني الدموع
الرگبه لحسيني فدوه فاديها
ودعّي وليدچ يمه من فوگ الهزيل

؛★★★★★★★★★★★★★★★

خل يذبحوني خل يگطعون الوريد
المهم يا يمه ارحل الربي شهيد
هاي النهايه واستقبليها
ودعّي وليدچ يمه من فوگ الهزيل

؛★★★★★★★★★★★★★★★

يمه من بعدي كمّلي اصرار وثبات
دام جسّامچ عالعهد يا يمه مات
قوة ايمانچ بموتي زيديها
ودعّي وليدچ يمه من فوگ الهزيل

؛★★★★★★★★★★★★★★★

جعفر عطيه البزوني


https://www.tg-me.com/aabas78
قصائد لكل ايام محرم اشترك بالقناة

تجليبه للاكبر ع

يالاكبر روحي انته وهاي تدريها
اخذ گلبي درع والروح خليها
-----------
يروح الروح ياعقلي وبعد عمري
الهوه انته الاشمه وينتعش صدري
انا ابلياك اموتن يولدي تدري
كل اعضاي دونك چا شلي بيها
-----------
شلي بالعمر يالفرگتك صعبه
الحومه ياعلي بنارين ملتهبه
نار اضماك نار اسيوف متعصبه
وما ادري ييمه اشلون تاليها
-----------
تاليها شنو وشنهو الذي مضموم
عاشر من محرم يولدي هاليوم
رايح ياعلي وتتگابل اويه الگوم
وتخلي كربله صفين ناويها
-----------
ناويها اضلن واحسب اللحظات
واحسب لو رحت يوليدي بس
شوغات
كل ساعه وگولن ها عدل لو مات
مثل لوي الهرش للروح تلويها
-----------
تلويها المعاره وافرح بزودك
كل هاي الجثث يبني علي شهودك
وافرح وابتشر يوليدي بوجودك
وروس اعله الارض ناوي تخليها
----------
تخليها وتجيني چان كل ضني
وتردلي لهفتي ياعلي يبني
تاليها العدو بالطبره چايدني
وبجمرة فرگتك روحي يچويها
----------
السيد
كريم دانه الاعرجي

---
https://www.tg-me.com/aabas78
قصائد لكل ايام محرم اشترك بالقناة

نزل سوح الحرب… كلب طفهم كلب،
علي الاكبر نزل
كلب طفهم كلب
***
نزل والساتر الله صاحت الناس
الشرد منهم يلاكف ظل الانفاس
حارو منهو هذا احسين عباس
نفس الهيبة والهمة والاحساس

علي الاكبر علي … شبه ذاك الولي
مثل خير العمل
علي الاكبر نزل
… .
جيش ابكثره ماهماهة مــــوجود
كلبهة الميمنة اعلى الميسرة بزود
ظـل يحصد فقارة الروس و ازنود
عيشهم رعـــب وفاي الاوعــــود

دخيل الله اصرخو… هــدمهم ملخو
سبعهم ها جفل
علي الاكبر نزل
…… .
أعليهــم طــيّر اطــيـــور الابابيل
تحت امـــره ترامي الحجر سجيل
وراواهــم انجــوم الظهـــر والليل
شـردهم مـــثل ما تشـرد الخــيل

هجم طفهم هجم … رعب كل الزلم
فحل نعم الفحل
علي الاكبر نزل
……
كل بركان ثار ابوجه الاشرار
بيهم صال صولت علي الكرار
اكبالة اتراجفو ما جنهم اكبار
اخذ منهم ابدال الثار الف ثار

شهدله الكل شهد … شبل ذاك الاسد
سراياهم عزل
علي الاكبر نزل
***

علن ثورة غضب عالظالم الحيد
تولاهم ابسيفة ابن الاجــــوايد
نساهــــم أسماهم والمـــــواليد
وخلة الشمر يصفك ايـــد بالايد

ترس طفهم دمة… امير الغانمة
عليهم سيفة سل
علي الاكــبر نزل
****
طب غاير عليهم ليث الاسلام
يحود ابكيفه بيهم مثل الاغنام
ساتر سوه بيهم يحمي الخيام
ثلثت انعام منه فخــر الازلام

الهوه اعليهم كطع … امامه الكل ركع
خبر عاجل وصل
علي الاكــبر نزل

الحمد الله رب العالمين
اللهم صل على محمد وال محمد
الشاعر موسى الخادم

https://www.tg-me.com/aabas78
قصائد لكل ايام محرم اشترك بالقناة

نزله  علي الاكبر

الجيش يقرون الحمد
جنه حيدر من يهد
بل شكل يشبهه محمد هذه الاكبر ياشباب

الضـلام ايطـير راسـه من يـدك باب الضـوه
صوت من الجيش طالع مـوفرد كلـهم سـوه
حسين رجع علي فدوه ظيـك اعلـينه الهـوه
مات حتى الشردمنه راسـه بسيـف انجـوه
صوتهم ضل ينسمع
اخذ ثارات الضلـع
سيفـه لمن وصل يمنه كـام يا كـل بالركاب
بل شكل يشبهه محمد هذه الاكبر ياشباب

الشمس من نور وجه تاخذ الخده جمال
حسين ابوه عباس عمه جـده جتال الرجال
فرقه فرقه كام يطلب علـي الاكـبر لـنزال بالحرب ماكو استراحه هـدنه ما بيه مجال
غيمت سوح الحرب
محد ايشوف الـدرب
يمنه اخذهم يسره ردهم شافو اشكال العذاب
بل شكل يشبهه  محمد  هذه  الاكبر  ياشباب

الشمر خاف وينـادي يا جيـوش اتقـدمـي
مو ابو تراب اليقـاتل هـذه ازغـر هاشـمـي
شلون لو جفال زينب يمشي صوب العلـكـمي
حتى ساتر ماكو بالطف بيه العسـكر يحـتمـي
ياعمر جيشك جبان
ماكـدر ياخذ مكـان
هذه الاكـبرهيـج سـوه هذه ماجان ابحساب
بل شكل يشبهه محمد هذه الاكبر  ياشباب

حسين ابنك نزل وحده وضـلت الحومـه تمـيل
شلون  بينه  كون  ينزل  عمه  ويا  الـكـفـيل
جان كام الجيش يصرخ يا ابـو فاضل دخـيل
مايرحمه اليشطـره جف علي الاكبر ثكـيل
بويه الاكبر من نزل
بيهم الخوف اشعمل
الهزيمه حضرت يمهم نعم بس النصر  غاب
بل شكل يشبهه محمد هذه الاكبرياشباب
تمت
الشاعر محمودرحيل

https://www.tg-me.com/aabas78
قصائد لكل ايام محرم اشترك بالقناة

عبد الله الرضيع ع 👇👇👇👇👇

( محسن و الرضيع)


استمع ون الفجيع • • • بين محسن والرضيع
هاذا قطعو منحره • • • وذاك طاح اعلى الثرى
ـــــــــــــــــــــــــــــــــــــــــــــــــــــــــــــ
صاح عبدالله بحزن شوف بيه شالحصل
بحضن ابويه وبسهم راسي ياعم انفصل
قلب ابويه ينفجع شاف هالخطب الجلل

وشاف عيني غايره
ـــــــــــــــــــــــــــــــــــــــــــــــــــــــــــــــــــ
صاح محسن والدمع منه عالخد انحدر
وانا شفت الفاجعه وقلبي والله انفطر
كنت نايم وسمعت ضلع امي انكسر

ريتك اتشوف الجرى
ــــــــــــــــــــــــــــــــــــــــــــــــــــــــــــــــ
قال عبدالله وبكى فتت المهجه العطش
ومن قطع نحري العدو عقلي ياعم اندهش
ماارحموني بحالتي والظما بقلبي نهش

احس ناره موجره
ـــــــــــــــــــــــــــــــــــــــــــــــــــــــــــــــــــــ
أروي كسرت خاطري من شفت بويه انتحب
عينه تنظر للسما ومن دما نحري اختضب
قال ياناس الطفل شنهو ذنبه والسبب

والله يصعب منظره
ـــــــــــــــــــــــــــــــــــــــــــــــــــــــــــــــــ
انا عبدالله الذبيح منهو يعرف حالتي
ماقطع نحري السهم والي اجري عبرتي
حسين وحده بكربلا مصابه فتت مهجتي

قلب ابويه شيجبره
ــــــــــــــــــــــــــــــــــــــــــــــــــــــــــــ
شالني بجمرت حزن ورجع للخيمه بدمع
وضل ينادي ام الصبر وقلبه والله منصدع
وقال يازينب بعد انطفى نور الشمع

وعمتي متحيره
ـــــــــــــــــــــــــــــــــــــــــــــــــــــــــــــــــــــ
آه يا أم الخدر ذكرتني بفاطمه
واقفه متعجبه تشوفي في نحر الدما
صارت اتعزي الحسين ولنها أمي قادمه

تسأل ابني ارتوى
ــــــــــــــــــــــــــــــــــــــــــــــــــــــــــــــــ
أمي شافت منحري والقلب من عدها ذاب
حسين يوصي بالصبر يقول صبري يالرباب
وبمصيبة فاطمه ذكره هذا المصاب

صاح أه يصابره
ـــــــــــــــــــــــــــــــــــــــــــــــــــــــــــــ
عمي محسن لاتخاف ننتظر راعي الوعد
ياخذ بثار الدماء امن الأزل هذا العهد
اليوم يبكي المنتظر وقلبه يتفجر كمد

والبتوله حاضره
ــــــــــــــــــــــــــــــــــــــــــــــــــــــــــــــــــ
يابوصالح سيدي يالي زاير كربله
ننتظر ثار الكرام الكون كله تزلزله
برد إل قلب الرباب بسيف اذبح حرمله

هذي زمره فاجره
ــــــــــــــــ نسآلكم الدعاء ـــــــــــــــــــــ
الشاعر : بوحيدر الحمد

https://www.tg-me.com/aabas78
قصائد لكل ايام محرم اشترك بالقناة

المستهل //

* رد نـــــام .. واحلـــم عبـــدالله
* رد نـــــام .. مـا قـاسـمــها الله
* حـسبـالـك ذولــه اســلام * هـاك افـرش جـفـني او نــام
* رد نـــام .. واحلـــم عبـــدالله
1- ـــــــــــــــــــ+ـــــــــــــــــــــــ+ـــــــــــــــــــــــ
يظـل طيــر السمــه ابجـيـة الصبـح يحلـــم
او كـطـرات النــده ابـحضن الــورد تـلـتــــم
ارجـــع نــام يـبــني الــديـره مــا تـــرحــــم
فـلا بـيـهـا أمـــان الـتـفـطـــر اعلـــه الــــدم
*عــطشـــان .. يـوليــدي اســم الله
*عــطـشـــان .. ذولــه اعـــداء الله
* للضامي اتـودي اسهـام * هـاك افـرش جفـني او نام
* رد نـــام .. واحلـــم عبـــــدالله
2- ـــــــــــــــــــ+ـــــــــــــــــــــــ+ـــــــــــــــــــــــ
مـثــل خـيــط البريـــسـم نحــرك او أتــرف
شجــاه سهــم المنيـــه اعله النحــر يلتـــف
شفـت بعـض البشر مسعــوره برض الطـف
ابـمــاي الدنيــا لـو غسلــوهــا مـا تـنـظــف
* خـليـــــت .. عـينـي ابـعـيـن الله
* او خـليــت .. عـــالظـلـمـــوك الله
* بـالدنيـــا اشــكــد ظـــلام .. * هـاك افـــرش جـفـني او نـــام
* رد نـــــام .. واحلـــم عبــــــدالله


3- شـجـاهــا الناس ذرة رحمــه مــاعـدهــا
طغــت لاخــوف لا مـن مـسـتحـه أيــردهـا
كـأن ابـليـــس مـن فـطـــرتــهـا جــــردهــا
عـله اشـلاء البشـــر تنــصـب موائــدهــا
*هـالنــــاس .. يـمــتـــه اتخـــاف الله
*هــالنـــاس .. ذبـحـــت خــــلــك الله
* او ذبـحــت حــتى الأحـــــلام *هـــاك افـــرش جــفـني او نـــام
* رد نـــــام .. واحلــــم عبــــدالله
4- ------------------------------------------------------------------
اشبـــع نـــوم يـبـني ابــراحــتــك واغـفـــه
ترى احنــه ابمجـتمع بيـه ماتـت الـرأفــــه
او نـار الفـتـنــه شبــت مـا بـعـــد تـطـفــــه
على الانسان تخفـى– اعلـه الله مـا تخـفـه
* افعــــال .. مــا يـــرضاهـــا الله
* افعـــال .. حـرفـــت شـــرع الله
* او تبـــعـت شـــرع الأصنــام * هـاك افــرش جـفـني او نــــام
* رد نـــــام .. واحلــــم عبــــدالله
5- -------------------------------------------------------------------
دنيـــه ابهـيــــج واقـــع يـبـني ما تــنحـــب
يريـت انمــوت هــسه او كــافـي نــتـعــذب
قريــب المـــاي منــا او مـا رضـو نشــرب
نكـلهـم رحمــة الله اهـــواي ألـــذ واقـــرب
* هـيهـــات .. نشـكي الغيـــر الله
*هـيهــــات .. مــا يـنســانــه الله
*مهـمـا اتجـــــور الأيــــام *هـاك افــرش جــفـني او نـــــــام
* رد نـــــام .. واحلــــــم عبـــــدالله

خــادم أهل البيت عليهم السلام
الشاعر أبو حيدر المجراوي

محرم الحــــرام 1447 هـ / 2025 م

https://www.tg-me.com/aabas78
قصائد لكل ايام محرم اشترك بالقناة