#مجالس_محرم_الحرام 1447 هـــ
ياعلي الاكبر

🔹🔸

انهض انرد للخيام
صعبه لمفارك ينام
بويه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
انهض امــــك كاعده ابــاب الالم
وتدري كلب الوالــده نــــز وعلم
شلون ينسد باب هجرك كله دم
الخاطر امــــك ياعلــي رد للخيم

وجهك يزيح الظلام
بعينها يصلي الكلام
بويه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
ياعلــي فراكك صعـــب ماينحمل
اكبالـــي ميت هاي ما تدخل عقل
شلـــون اردن بيك لامك مو سهل
امــك امن تشوف جسمك تنجتل

شلون تصبر يا امام
يا امل طير الحمام
بويه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
الموت وي طولك يالاكبر مايليق
الورد من لونك واشوفنك رحيق
بالشجاعه تنقري وللحـب صديق
الله من سواك يبني اشكد دقيق

فصل امتونـــك هيـام
وهسه صارت للسهام
بويـــه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
ياركـــن كلبي التحطـــم والوكـــع
الامل من بعدك يالاكبــر مارجـع
بـــدر مثـــلك وبجمـالك ماسطـع
صعبـــه يبني اتصبح كبالــي قطع

يابـــدر ليــل التمام
ردتك الظهري حزام
بويه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ
اعز من روحي وردت يمي تدوم
انجـــان تكـــدر يبني ياريتك تكوم
الكلب متحــــزم يالاكبر بالهموم
والهـــوئ ابلياك بالريــــه سمــوم

ويه البعد دومك خصام
كافي من هذا المنام
بويـــه عالدنيا السلام علي بويه
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري


https://www.tg-me.com/aabas78
قصائد لكل ايام محرم اشترك بالقناة

اليوم ليلئ ويلحــــــــــزن حيرانه
تكول الاكــــــــــــــبر رايح وخلانه
راح مايرجــــع بعد
ونذبح طير السعد

تكول بعده بعز شبابه ومافرح بدنيه هاي
شفافه ذبلت يمي كلي يمه اريد شويه ماي
هيج من ودعني الاكبر هسه ظل بلا فياي
ليش ماكلي برحيله والرمل يصبح غطاي

والحوافر داســــته
ومه كــالو خــــــلته
وجثه ظل مفــــــــــرهده وعريانه

كامت تردد يلاكبر مااعيش انه بجفاك
ريت كون الموت اجاني وميته گبلك مو وراك
ولا اشوفنها الحوافر مطلعه ظلعك من كفاك
ماي ماصح حتئ اشربك حگي احير انه بدواك

حكي يبني تــــيحرت
وريت ميته ولاعشت
خلافك الــــــــــــهم والكدر غطانه

رحت بس ظلت صوركم عايشه بلب الگلب
من بعد عينك احيرن يصعب عليه الدرب
كلي يمه شلون امش انه وي وادم غرب
وما ابطل وني بعدك ولدمع علخد يصب

هيج اخلص دنيتي
بدمع وبحــــسرتي
ولا يبطل گــــــــــــلبي من احزانه

يبني بس هل واحد انته شلون  اخليك واروح
تزيد ياروحي بحزنها وحگي كون ابجي وانوح
مو جرح واحد وشله بيك يبني شكد جروح
بعد عطرك وين اشمه وعنبر بعطرك تفوح

كلشي ماظل يمه الي
وراح مــــــنيدي علي
وذكره منــــــــــــك مابقت ويانه

يمه كلشي الباقي منك راح وي حرك الخيام
وعتنيتك رت اشوفك بليل هندس بس ظلام
هواي هيه الموته يمك موسهل يبني الكلام
وماغفت عيني انه بعدك صعبه كلي شلون انام

باجر يجرني الــحبل
ريت وياك انجــــــتل
ولا اعيــــــــــــش بدنيتي وهمانه


ابو سلام الجابري
#جديد_محرم_الحرام_١٤٤٧هـ✍️

https://www.tg-me.com/aabas78
قصائد لكل ايام محرم اشترك بالقناة

المستهل //

* ابن اشرف عمامة * سليل أهـــل الزعامة
* فـرع مـن شجـرة الكـرار حـيـدر* نزل سـوح الحرب خيــال الاكــبر
* سليـــل أهــل الزعــامـــه
1-        ـــــــــــــــــــ+ـــــــــــــــــــــــ+ـــــــــــــــــــــــ

كالتها العرب جلمة بخت تنكال              المـا بيـه مـن عـلي مـا ينحـسب خيال
او علي الأكبر شمـوخه ابساحة الأهـوال    أثبـت  هـالحـقيـقــه الماكــو بيهــا اشـكــال
* نــزل وبكل جدارة *  تـرهى اعـله المعـاره
* مثل جـده الصميـده اعليها سيطـر* نزل سوح الحرب خيال الاكـبر
* سـليـــل أهـــل الزعامـــه
2-         ـــــــــــــــــــ+ـــــــــــــــــــــــ+ـــــــــــــــــــــــ
علي او جــده علي واحســاب حـاسبهــا                                          أول جـــولــه بــالمــيـــدان يـكــسـبـــهــا
يطشــرهــا الحشـــود امنيــن ما طبـهــا                                                او نيـران الغـضب فـوك العـدى ايصبهـا
* ارتجـــز بيـرغ عمـامـــه * او واضـــح مــن كلامــه
* تحــدي الكـل مقـاتــل بالمعسكــر* نزل سـوح الحرب خيال الاكــبر
* سليـــل أهــــل الزعامـــه


3- 
عـلي الأكــبر شـبــاب ابمقـتبـل عـمــره                                         حلـم عنـده ابحـيـاتــه اسنيــن ينتـظــره
او جــان اجـمـل حلــم بـالدنيـا يعـتـبـره                                           يـشـارك بالطـفــوف او يـنـصـر الثــوره
* طمــوحــه او أمنيـاتــه * اهنـاه يخـتـم حـياتـه
* وبوادي الطفوف ايواجه أهل الشـر* نزل سوح الحرب خيال الاكبـر
* سليــــل أهــــل الزعـــامــه
4-          ـــــــــــــــــــ+ـــــــــــــــــــــــ+ـــــــــــــــــــــــ
حـسيــن اسبــاب عـنـده الاكـبــر اخـتــاره                                          يقدمه اعله الحرب مـن تخـلـص انصــاره
يشوف ابنـه او عـزيزه او موضع اسـراره                               يـحــمـــل عـالحـشــــود او بـيـــده بـتـــاره
* بطـــل خـاض المـنايـا * او تحــدى أهــل الـروايـــا
* تكـليفـه يدافـع عن حـمى الخـدر* نزل سوح الحرب خـيال الاكبـر
* ســليـــل اهـــل الزعـامـــه
5-         ـــــــــــــــــــ+ـــــــــــــــــــــــ+ـــــــــــــــــــــــ
شـبيــه المصطفى ارسـوم النـبي ارسـومـه                                    ابـ اصـراره او شمــوخـــه زلـزل الحـومــه
مـن يشـتــد وغـــاها جــن عـلي  ابـيـومــه                                    لخـــدور الفـــواطـــم وصلـــت اعـلــومــــه
•  كسـر جمـــع الأعـــادي * او يـسمعـــنـه ينـــادي
تـرى اليـكـرب خـيام الهـادي يتـوذر* نـزل سوح الحرب خيـال الاكبــر
* سـليــــل اهــل الزعــامـــــه

      خــادم أهــل البيت عليهم الســـلام
      الشاعر  أبو حيدر المجراوي

      محرم الحــــرام 1447 هـ / 2025 م

https://www.tg-me.com/aabas78
قصائد لكل ايام محرم اشترك بالقناة

نزله علي الاكبر عليه السلام

انا عليُّ ابنُ الحُسين ابنُ علي
٠٠٠٠٠٠٠٠٠
نزل والسيف بيمينـه ورتجل بالحومه
علي آنه وجدي حيدر لو نسيتو علومه
راح اراويـــكم قتــاله ذولفقاره ويومه
جيوشـكم يا آل اميه بالحرب مهزومه

في طاعةِ الرحمنِ اهوى مَقتَلي
انا عليُّ ابنُ الحُسين ابنُ علي
٠٠٠٠٠٠٠٠٠
خيبـر اكلبــها عليــكم وآنه قالــع بابها
شما تزيد اعداد عدكم إلّا اكص ارگابها
مرحب وبكـر ابن غانم والبطوله حسابها
راح اكص راسه ودوسه يندفـن بتـرابها

إلاّ بسَيفي شَـرّهُ لا ينجَلي
انا عليُّ ابنُ الحُسين ابنُ علي
٠٠٠٠٠٠٠٠٠
هذا ابوي حسين هذا وعلي الأكبر آني
كـربله أخسفـها بيـكم ما يظل سفياني
ويله يا ويله اليجيني وبالحرب لاگاني
إلا اطـر راسـه وذبحه كلمن اتحــدّاني

يا ارضُ ميدي بالعِدا وزَلزِلي
انا عليُّ ابنُ الحُسين ابنُ علي
٠٠٠٠٠٠٠٠٠
ما يهمني الموت راحه في سبيل الباري
يا بني سفيان منكم خذت حقي وثاري
نترست الكاع بجثثكم والقتـل اجبـاري
نهـر وسط الغاضـريه من دمـاكم جـاري

من بَحرِ طه مَنبَعي ومَنهَلي
انا عليُّ ابنُ الحُسين ابنُ علي
٠٠٠٠٠٠٠٠٠
ما طحت لوما غـدركم بالغـدر صبتوني
المهـم عنـد الله مرضي ما يهم كطعوني
علي الاكبر يبقى اسمي. والله ما تمحوني
درس للأجيـــــــال ابقه. كل زمن يقروني

وذكْرُنا لا ينطمس سَيعتَلي
انا عليُّ ابنُ الحُسين ابنُ علي
٠٠٠٠٠٠٠٠٠
لا يزيد يدوم حكمه ولا ابن مرجانه
بس ابوي حسين يبقى. خالد بعنوانه
احنه أهل البيت احنه خاسر العادانه
يم رسول الله عرشنه واليحبنه ويانه

بجَنبِ جدي في المعالي مَنزِلي
انا عليُّ ابنُ الحُسين ابنُ علي

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

https://www.tg-me.com/aabas78
قصائد لكل ايام محرم اشترك بالقناة

محرم 1447ه‍-2025م
قصيدة الليله الثامنه (على لحن قصيدة يمه اذكريني من تمر زفة شباب)

يمه حنيني من دمه نحري اليسيل
وتذكريني من يحل وكت الرحيل
دمعة عيونچ لا تصبيها
ودّعي وليدچ يمه من فوگ الهزيل

؛★★★★★★★★★★★★★★

رايح الحربي النصرة حسين الوحيد
اليوگف اگبالي ينذبح من الوريد
يمنتي ويسراي لا تحنيها
ودّعي وليدچ يمه من فوگ الهزيل

؛★★★★★★★★★★★★★★★

لو متت يمه لا تحزنين بگفاي
افتخري بوليدچ العمي ضحيت بدماي
هامتچ بيه يمه رفعيها
ودعي وليدچ يمه من فوگ الهزيل

؛★★★★★★★★★★★★★★★

إلا اگر عينچ من ابرز الذيچ الجموع
مسحي دموعچ لا تراويني الدموع
الرگبه لحسيني فدوه فاديها
ودعّي وليدچ يمه من فوگ الهزيل

؛★★★★★★★★★★★★★★★

خل يذبحوني خل يگطعون الوريد
المهم يا يمه ارحل الربي شهيد
هاي النهايه واستقبليها
ودعّي وليدچ يمه من فوگ الهزيل

؛★★★★★★★★★★★★★★★

يمه من بعدي كمّلي اصرار وثبات
دام جسّامچ عالعهد يا يمه مات
قوة ايمانچ بموتي زيديها
ودعّي وليدچ يمه من فوگ الهزيل

؛★★★★★★★★★★★★★★★

جعفر عطيه البزوني


https://www.tg-me.com/aabas78
قصائد لكل ايام محرم اشترك بالقناة

تجليبه للاكبر ع

يالاكبر روحي انته وهاي تدريها
اخذ گلبي درع والروح خليها
-----------
يروح الروح ياعقلي وبعد عمري
الهوه انته الاشمه وينتعش صدري
انا ابلياك اموتن يولدي تدري
كل اعضاي دونك چا شلي بيها
-----------
شلي بالعمر يالفرگتك صعبه
الحومه ياعلي بنارين ملتهبه
نار اضماك نار اسيوف متعصبه
وما ادري ييمه اشلون تاليها
-----------
تاليها شنو وشنهو الذي مضموم
عاشر من محرم يولدي هاليوم
رايح ياعلي وتتگابل اويه الگوم
وتخلي كربله صفين ناويها
-----------
ناويها اضلن واحسب اللحظات
واحسب لو رحت يوليدي بس
شوغات
كل ساعه وگولن ها عدل لو مات
مثل لوي الهرش للروح تلويها
-----------
تلويها المعاره وافرح بزودك
كل هاي الجثث يبني علي شهودك
وافرح وابتشر يوليدي بوجودك
وروس اعله الارض ناوي تخليها
----------
تخليها وتجيني چان كل ضني
وتردلي لهفتي ياعلي يبني
تاليها العدو بالطبره چايدني
وبجمرة فرگتك روحي يچويها
----------
السيد
كريم دانه الاعرجي

---
https://www.tg-me.com/aabas78
قصائد لكل ايام محرم اشترك بالقناة

نزل سوح الحرب… كلب طفهم كلب،
علي الاكبر نزل
كلب طفهم كلب
***
نزل والساتر الله صاحت الناس
الشرد منهم يلاكف ظل الانفاس
حارو منهو هذا احسين عباس
نفس الهيبة والهمة والاحساس

علي الاكبر علي … شبه ذاك الولي
مثل خير العمل
علي الاكبر نزل
… .
جيش ابكثره ماهماهة مــــوجود
كلبهة الميمنة اعلى الميسرة بزود
ظـل يحصد فقارة الروس و ازنود
عيشهم رعـــب وفاي الاوعــــود

دخيل الله اصرخو… هــدمهم ملخو
سبعهم ها جفل
علي الاكبر نزل
…… .
أعليهــم طــيّر اطــيـــور الابابيل
تحت امـــره ترامي الحجر سجيل
وراواهــم انجــوم الظهـــر والليل
شـردهم مـــثل ما تشـرد الخــيل

هجم طفهم هجم … رعب كل الزلم
فحل نعم الفحل
علي الاكبر نزل
……
كل بركان ثار ابوجه الاشرار
بيهم صال صولت علي الكرار
اكبالة اتراجفو ما جنهم اكبار
اخذ منهم ابدال الثار الف ثار

شهدله الكل شهد … شبل ذاك الاسد
سراياهم عزل
علي الاكبر نزل
***

علن ثورة غضب عالظالم الحيد
تولاهم ابسيفة ابن الاجــــوايد
نساهــــم أسماهم والمـــــواليد
وخلة الشمر يصفك ايـــد بالايد

ترس طفهم دمة… امير الغانمة
عليهم سيفة سل
علي الاكــبر نزل
****
طب غاير عليهم ليث الاسلام
يحود ابكيفه بيهم مثل الاغنام
ساتر سوه بيهم يحمي الخيام
ثلثت انعام منه فخــر الازلام

الهوه اعليهم كطع … امامه الكل ركع
خبر عاجل وصل
علي الاكــبر نزل

الحمد الله رب العالمين
اللهم صل على محمد وال محمد
الشاعر موسى الخادم

https://www.tg-me.com/aabas78
قصائد لكل ايام محرم اشترك بالقناة

نزله  علي الاكبر

الجيش يقرون الحمد
جنه حيدر من يهد
بل شكل يشبهه محمد هذه الاكبر ياشباب

الضـلام ايطـير راسـه من يـدك باب الضـوه
صوت من الجيش طالع مـوفرد كلـهم سـوه
حسين رجع علي فدوه ظيـك اعلـينه الهـوه
مات حتى الشردمنه راسـه بسيـف انجـوه
صوتهم ضل ينسمع
اخذ ثارات الضلـع
سيفـه لمن وصل يمنه كـام يا كـل بالركاب
بل شكل يشبهه محمد هذه الاكبر ياشباب

الشمس من نور وجه تاخذ الخده جمال
حسين ابوه عباس عمه جـده جتال الرجال
فرقه فرقه كام يطلب علـي الاكـبر لـنزال بالحرب ماكو استراحه هـدنه ما بيه مجال
غيمت سوح الحرب
محد ايشوف الـدرب
يمنه اخذهم يسره ردهم شافو اشكال العذاب
بل شكل يشبهه  محمد  هذه  الاكبر  ياشباب

الشمر خاف وينـادي يا جيـوش اتقـدمـي
مو ابو تراب اليقـاتل هـذه ازغـر هاشـمـي
شلون لو جفال زينب يمشي صوب العلـكـمي
حتى ساتر ماكو بالطف بيه العسـكر يحـتمـي
ياعمر جيشك جبان
ماكـدر ياخذ مكـان
هذه الاكـبرهيـج سـوه هذه ماجان ابحساب
بل شكل يشبهه محمد هذه الاكبر  ياشباب

حسين ابنك نزل وحده وضـلت الحومـه تمـيل
شلون  بينه  كون  ينزل  عمه  ويا  الـكـفـيل
جان كام الجيش يصرخ يا ابـو فاضل دخـيل
مايرحمه اليشطـره جف علي الاكبر ثكـيل
بويه الاكبر من نزل
بيهم الخوف اشعمل
الهزيمه حضرت يمهم نعم بس النصر  غاب
بل شكل يشبهه محمد هذه الاكبرياشباب
تمت
الشاعر محمودرحيل

https://www.tg-me.com/aabas78
قصائد لكل ايام محرم اشترك بالقناة

عبد الله الرضيع ع 👇👇👇👇👇

( محسن و الرضيع)


استمع ون الفجيع • • • بين محسن والرضيع
هاذا قطعو منحره • • • وذاك طاح اعلى الثرى
ـــــــــــــــــــــــــــــــــــــــــــــــــــــــــــــ
صاح عبدالله بحزن شوف بيه شالحصل
بحضن ابويه وبسهم راسي ياعم انفصل
قلب ابويه ينفجع شاف هالخطب الجلل

وشاف عيني غايره
ـــــــــــــــــــــــــــــــــــــــــــــــــــــــــــــــــــ
صاح محسن والدمع منه عالخد انحدر
وانا شفت الفاجعه وقلبي والله انفطر
كنت نايم وسمعت ضلع امي انكسر

ريتك اتشوف الجرى
ــــــــــــــــــــــــــــــــــــــــــــــــــــــــــــــــ
قال عبدالله وبكى فتت المهجه العطش
ومن قطع نحري العدو عقلي ياعم اندهش
ماارحموني بحالتي والظما بقلبي نهش

احس ناره موجره
ـــــــــــــــــــــــــــــــــــــــــــــــــــــــــــــــــــــ
أروي كسرت خاطري من شفت بويه انتحب
عينه تنظر للسما ومن دما نحري اختضب
قال ياناس الطفل شنهو ذنبه والسبب

والله يصعب منظره
ـــــــــــــــــــــــــــــــــــــــــــــــــــــــــــــــــ
انا عبدالله الذبيح منهو يعرف حالتي
ماقطع نحري السهم والي اجري عبرتي
حسين وحده بكربلا مصابه فتت مهجتي

قلب ابويه شيجبره
ــــــــــــــــــــــــــــــــــــــــــــــــــــــــــــ
شالني بجمرت حزن ورجع للخيمه بدمع
وضل ينادي ام الصبر وقلبه والله منصدع
وقال يازينب بعد انطفى نور الشمع

وعمتي متحيره
ـــــــــــــــــــــــــــــــــــــــــــــــــــــــــــــــــــــ
آه يا أم الخدر ذكرتني بفاطمه
واقفه متعجبه تشوفي في نحر الدما
صارت اتعزي الحسين ولنها أمي قادمه

تسأل ابني ارتوى
ــــــــــــــــــــــــــــــــــــــــــــــــــــــــــــــــ
أمي شافت منحري والقلب من عدها ذاب
حسين يوصي بالصبر يقول صبري يالرباب
وبمصيبة فاطمه ذكره هذا المصاب

صاح أه يصابره
ـــــــــــــــــــــــــــــــــــــــــــــــــــــــــــــ
عمي محسن لاتخاف ننتظر راعي الوعد
ياخذ بثار الدماء امن الأزل هذا العهد
اليوم يبكي المنتظر وقلبه يتفجر كمد

والبتوله حاضره
ــــــــــــــــــــــــــــــــــــــــــــــــــــــــــــــــــ
يابوصالح سيدي يالي زاير كربله
ننتظر ثار الكرام الكون كله تزلزله
برد إل قلب الرباب بسيف اذبح حرمله

هذي زمره فاجره
ــــــــــــــــ نسآلكم الدعاء ـــــــــــــــــــــ
الشاعر : بوحيدر الحمد

https://www.tg-me.com/aabas78
قصائد لكل ايام محرم اشترك بالقناة

المستهل //

* رد نـــــام .. واحلـــم عبـــدالله
* رد نـــــام .. مـا قـاسـمــها الله
* حـسبـالـك ذولــه اســلام * هـاك افـرش جـفـني او نــام
* رد نـــام .. واحلـــم عبـــدالله
1- ـــــــــــــــــــ+ـــــــــــــــــــــــ+ـــــــــــــــــــــــ
يظـل طيــر السمــه ابجـيـة الصبـح يحلـــم
او كـطـرات النــده ابـحضن الــورد تـلـتــــم
ارجـــع نــام يـبــني الــديـره مــا تـــرحــــم
فـلا بـيـهـا أمـــان الـتـفـطـــر اعلـــه الــــدم
*عــطشـــان .. يـوليــدي اســم الله
*عــطـشـــان .. ذولــه اعـــداء الله
* للضامي اتـودي اسهـام * هـاك افـرش جفـني او نام
* رد نـــام .. واحلـــم عبـــــدالله
2- ـــــــــــــــــــ+ـــــــــــــــــــــــ+ـــــــــــــــــــــــ
مـثــل خـيــط البريـــسـم نحــرك او أتــرف
شجــاه سهــم المنيـــه اعله النحــر يلتـــف
شفـت بعـض البشر مسعــوره برض الطـف
ابـمــاي الدنيــا لـو غسلــوهــا مـا تـنـظــف
* خـليـــــت .. عـينـي ابـعـيـن الله
* او خـليــت .. عـــالظـلـمـــوك الله
* بـالدنيـــا اشــكــد ظـــلام .. * هـاك افـــرش جـفـني او نـــام
* رد نـــــام .. واحلـــم عبــــــدالله


3- شـجـاهــا الناس ذرة رحمــه مــاعـدهــا
طغــت لاخــوف لا مـن مـسـتحـه أيــردهـا
كـأن ابـليـــس مـن فـطـــرتــهـا جــــردهــا
عـله اشـلاء البشـــر تنــصـب موائــدهــا
*هـالنــــاس .. يـمــتـــه اتخـــاف الله
*هــالنـــاس .. ذبـحـــت خــــلــك الله
* او ذبـحــت حــتى الأحـــــلام *هـــاك افـــرش جــفـني او نـــام
* رد نـــــام .. واحلــــم عبــــدالله
4- ------------------------------------------------------------------
اشبـــع نـــوم يـبـني ابــراحــتــك واغـفـــه
ترى احنــه ابمجـتمع بيـه ماتـت الـرأفــــه
او نـار الفـتـنــه شبــت مـا بـعـــد تـطـفــــه
على الانسان تخفـى– اعلـه الله مـا تخـفـه
* افعــــال .. مــا يـــرضاهـــا الله
* افعـــال .. حـرفـــت شـــرع الله
* او تبـــعـت شـــرع الأصنــام * هـاك افــرش جـفـني او نــــام
* رد نـــــام .. واحلــــم عبــــدالله
5- -------------------------------------------------------------------
دنيـــه ابهـيــــج واقـــع يـبـني ما تــنحـــب
يريـت انمــوت هــسه او كــافـي نــتـعــذب
قريــب المـــاي منــا او مـا رضـو نشــرب
نكـلهـم رحمــة الله اهـــواي ألـــذ واقـــرب
* هـيهـــات .. نشـكي الغيـــر الله
*هـيهــــات .. مــا يـنســانــه الله
*مهـمـا اتجـــــور الأيــــام *هـاك افــرش جــفـني او نـــــــام
* رد نـــــام .. واحلــــــم عبـــــدالله

خــادم أهل البيت عليهم السلام
الشاعر أبو حيدر المجراوي

محرم الحــــرام 1447 هـ / 2025 م

https://www.tg-me.com/aabas78
قصائد لكل ايام محرم اشترك بالقناة

يشيعه يشيعه
كسرو گلب الحسين برضيعه
/////////////////////////
جان ظهريه الوكت والحاله صعبه
راد واحد ماي عبدالله يشربه
حرمله صاح بسهم أكدر اضربه
إله اخلي حسين أبو مشلوع كلبه

فجيعه فجيعه
ست أشهر تره هاي الفجيعه
/////////////////////////
عبد رابي بحظن ابوه وجو الاحلام
ماي وبروده وحظن رايدله وينام
طفل وينه ياخلگ أوين الإسهام
شلون الحسين برضيعه يطب للخيام

الوسيعه الوسيعه
حيره وظاگت بعينه الوسيعه
/////////////////////////
ياهو يكدر ينذبح ابنه أعله صدره
والسهم يگطع ركبته بس يجره
رجع محني مشيب وخانگته عبره
صاح يازينب رضيعي انطاچ عمره

الشريعه الشريعه
عزو عالطفل ماي الشريعه
/////////////////////////
جوه هدمه جابه والخطوه ثگيله
تربع اكبال الخيم وابنه بشليله
حال عبدالله صعب مارد دليله
شهگ شهگت موت من شاف العقيله

الوديعه الوديعه
خله وليده بحظين الوديعه
/////////////////////////
عبد نورس بالبياض وهمه غربان
عمره ست أشهر حرام يموت عطشان
حسين بيده شيعه وصاراله دفان
وحتى عبدالله الرضيع انطاه قربان

طبيعه طبيعه
اليكرم يكرم بكلشي طبيعه
/////////////////////////
بعد ياشيعه شسولف من سوالف
حسين من گد المصايب ريجه ناشف
موقف يبچي الحجر دون المواقف
رأس عبدالله انرفع مثل المصاحف

سريعه سريعه
گطعت رأس عبدالله سريعه
/////////////////////////
تمت ____ علاء الزيدي


https://www.tg-me.com/aabas78
قصائد لكل ايام محرم اشترك بالقناة

بالسهم  نــحرك مذبوح       وخالي المهد ظل خالي
***
وجــــهك ذبل من الظمه وتغير
بعدك رضيع او مـوسهل تتصبر
وعــمــك يعبـدالله عــــليك اتأخر
ورده وتـــدور علــماي       يالمنــبعك  دلالـي
***
لابيدك اولابـــــــيدي يابعد أمك
ناغيتك اصبر بلچــن ايرد عمك
عطشانه مثلك بــس اهم ابهمك
والعين تربي اعله الجود         وتــتروه كل امالي
***


مـــابين اتاني وبين اهم بحــالك
خفت العطش يگطع نبض دلالك
ويصير يبــــني بالغـــرب چتالك
ماحسبت سهم البين       چــتالك اوچـتالي
***
مــــــارد ابوفـــاضل بعـد لخـيامه
گطعو چـــفوفه وصـوبـــوه بهامه
بـدر العشـــــــيره خــلــصت أيامه
بعده انكسر ظهر حسين      وگلبه انكسر للتالي
***
يرويك راد امن الضـــمه بيده حسين
وبالخيمه اتاني وعالدرب تربي العين
ردك عــــلينه  وذابحك ســــهم البين
گلبي نعصر ومن بچيت      لجــلك ولجل الوالي
***
حــــــالك وحــــال حســــين أثر بيّه
مــــــذبوح بين ايده اشتظن اشويه
والجــــرح يــــبــني ايألـــم ابراعيّه
غالي ورضيع افگدناك.   ويفجع مصاب الغالي
***
خالــــي المهد مــــنك صـفه تاليهه
وكـــــــل ذكــــرياتك لامـك اتبچيهه
لـــو ناغــــتك ماتگـــــدر اتناغيهه
صار المهد لحد الموت       وحـــال الثكاله حالي
……
تمت بفضل الله وتوفيقه، الحمد لله رب العالمين،
اللهُمَّ صلِّ على محمّدٍ وآلِ محمّدٍ وعَجِّلْ فرجَهم
حيدر كريم جار الله الكربلائي
الفاتحة إلى أمواتي وبالخصوص والدتي


https://www.tg-me.com/aabas78
قصائد لكل ايام محرم اشترك بالقناة

61. عبدالله الرضيع

يفيّ الصيف يبرودة عذب چنّه
يعبدالله بعد بيش آنه اتهنه
_

يا سلوة حياتي او لذة اسنيني
ياعگلي . يگلبي . يانظر عيني
سويها لوجه الله او ناغيني
فك عينك . تململ . ون فرد ونه
_

بعد مابيك تتنفس يروح امك
أما تدري انه اتنفسك واشتمك
اعيشن چيف وانت امضرج ابدمك
يهل راح امن اديه او أيست منه
_

يهل راح امن اديه مغلج اعيونه
او خلاني ابشفير الموت مرهونه
لا ميته او گبر ليه يحفرونه
ولا عدله . أو أليه بالعمر ضِنّه
_

مالي بالعمر ضِنّه ولا رجوه
يعبدالله الحياه من دونك اشتسوه
من ايدي رحت عطشان تتلوه
او جابوك او رسوم الحلوه ما هنه
_

يعبدالله عليه ضاعن ارسومك
اشوفن دم رگبتك تارس اهدومك
والمثلث يويلي الگاص بلعومك
شده فكري او صرت ماعرف اوخرنه
_

شده فكري المثلث بيك شمخلي
هو الصوبك شيريد متگلي
هو الصوباك ايصوم وايصلي ؟
هم عنده گلب هم يعرف امحنه
_

گلبه اشگاله من صوب ابسهمه
يريت اعيونه هاي الساعه تعمه
اسلبك من عندي يمه سلبت النعمه
او ضليت ابحزن ما ينعرف عنه
_

ابو فاطمة الطائي

https://www.tg-me.com/aabas78
قصائد لكل ايام محرم اشترك بالقناة

(قصيده الى عبد الله الرظيع ع )

بسه تعال
المستهل 👇

اصغير وبعمر الورد يا يمه
عبدالله رايح ما ترد يا يمه

عبد الله يابني*عبد الله يابني عبدالله يابني

*

بعيوني كمت ارسم مهد --- بس المهد ما بيه ولد --- فارغ واهزه
راح ومشا بعمر الورد --- وانا ادري رايح ما يرد -- وعبد الله أعزه
كلب اليودك يا ترف --- كام الكلب يهوه النزف -- ومصابه شده
وي كلبي فكدك ما يفظ ---- معذور لو راح النبظ ---- شمخلي عنده

عطشان وسهام البعد روّنك
من حظني يايمه بعجل شالنك

جاليش حظني من الذبح ما ظمه
اصغير وبعمر الورد يا يمه
عبدالله رايح ما ترد يا يمه

عبد الله يابني عبد الله يابني

****

تعبان جفني من السهر وشبيدي يمه على القدر ودهري وزماني
بالبسمه عايش والفرح بس عل مصايب والجرح ما عوداني
ما شفته نايم بالمهد ولا عاود ولا ليه رد ولا طيف اجاني
يالدمعت لجله السما ودمعاتي يجرن من دمه وفكدك عماني

مفتوحه بيبانه الحزن وذاني
وحرماني من ابني واهلي وخلاني

ما حسبت تجفي الكلب وتهضمه
اصغير وبعمر الورد يا يمه
عبدالله رايح ما ترد يا يمه

عبدالله يابني عبد الله يابني

*

يايمه ايس لو تمر دلالي ما يحمل هجر
وعيوني تربيك
يحديني باجر الجنبي ولوحدي اروحن لسبي وعالغبره خليك
مذبوح بسهام الغدر وانا ادري رايح ما تمر بس انا اتانيك
سهرانه وهمل للصبح يا يمه ماذيك الجرح وشلون اداويك

جم مره صحت على الولد تانيني
تعبانه وانا ادري الدمع يعميني

من شوفتك كلب اليحن لتحرمه
اصغير وبعمر الورد يا يمه

عبدالله رايح ما ترد يا يمه
عبد الله يابني عبد الله يابني

****

لميت قمصان الولد وحطيتها ابطن المهد وتذكريته
لجمات الك حدر الظلع وذاني يايمه الدمع. من دم جريته
من راح جافاني الصبر ودلالي ما يحمل هجر من ودعيته
كل ساعه يلجمني الدهر من عدي اخذ حته الصور بس ما نسيته

عبدالله اعز واحد صدك سميته
وطولك على جروف الكلب رسميته

منتظر تجمعلي الشمل وتلمه
اصغير وبعمر الورد يا يمه
عبدالله رايح ما ترد يا يمه
عبد الله يابني عبدالله يابني

**

الاذاني عطشان الولد ولماي ما يحصل بعد وشلون ارويه
لا خيمه عندي ولا ذره وعيوني تنظر منحره جا بيش اغطيه
اخيولهم ما تلحك وعبدالله ما يحمل سحك وما أكدر احميه
مسحوك من بعد الكتل وصلبه الحوافر عالطفل وانا انظر عليه

شلون اخلصها بونين ايامي
يايوم اشوفنك ترد جدامي

ظيعها دلالي منياته وعزمه
اصغير وبعمر الورد يا يمه
عبدالله رايح ما ترد يا يمه
عبد الله يابني عبدالله يابني

***
الشاعر خادم الحسين ؏ ابو هاجر المجراوي


https://www.tg-me.com/aabas78
قصائد لكل ايام محرم اشترك بالقناة

(( #عبدالله_الجرح_الثاني ))

……………………………………………………………

ما طاب جرح المحسن وبسماره
والنوب جرح الثاني اعظم ناره
عبد الله جرح العتره •• نامت النبله ابنحره
عبدالله يا عبدالله

……………………………………………………………

شهود الجريمه المؤلمه
في ذبح محسن فاطمه • زينب والحسين
بيهم اخوهم ظل جرح
بس الظلام وكل صبح • ما مر على العين

ابعبد الله حيل اتعلقو • واطّول يمه الگعده
يناغونه والهم يبتسم . تنرسم ورده ابخده
حسين ويهفيله الهوه . وزينب تهز ابمهده

ما مات محسن عدل معتبرينه
يشوفون صورة فاطمه ابنص عينه
عبدالله روح الزهره •• نامت النبله ابنحره
عبدالله يا عبدالله

…………………………………………………………


ابغض النظر حجه او ولي
بس هم ابو و هم منملي  • حب ومشاعر
يشوف ابنه ميت بالبچي
من ايده رايد ينسگي    • وحسين حاير

يشوف ابنه يتلوه ابعطش . يا ناس كلش صعبه
مايدري شيسوي الـ عبد . ظل ما يوچّد دربه
مو بالحوافر يا خلگ . اهنا انداس ابگلبه

ويگله يا بعد العمر يوليدي
لو ينشره مايك لبيع اوريدي
واشفافك المتفطره •• نامت النبله ابنحره
عبدالله يا عبدالله

…………………………………………………………


عبدالله مقتل وحّده
يا ناس لا صار و سِده  • ابكل الطوايف
وأتخيّل الموقف عدل
ماخذ اوليدك للچتل  •  واعليه خايف

بحضينك و ضاوي الولد . امن البدر احله واحله
وبلحظة تنظر منذهل  . شچّت ابنحره النبله
وازغار اديّاته وصُبح . بيهن أگماطه ايحلّه

يحسين الله ايعينك الهل شوفه
مات ابنك وداير عليك اجفوفه
الحضنك بقت بيه حسره •• نامت النبله ابنحره
عبدالله يا عبدالله

……………………………………………………………


رد بيه ويخط بالجِدِم
امغطّيه بطراف الهِدِم   • ومحدب اعليه
ويخط وراه دم الطفل
وياه غده ايفور الرمل  • وتبچي الارض ليه

محتار لو شال السهم . تنفصل خاف الرگبه
امشعّب و داير بالنحر . مثل العصابه امعصبه
مو زين ما مات الولي .  الله يساعد گلبه

كل طفل ورد وياس يمه إتخلّه
بس ابن الحسين انفطم بالنبله
طبگة جفن يا عمره •• نامت النبله ابنحره
عبدالله يا عبدالله

…………………………………………………………


ما نست حايط والجذع
ومحسن اخيها المنصرع • مهضومه زينب
شافت اخوها المنجرح
ينطيها ابنه المنذبح       • وگابلها ينحب

للخيمه وأحتارت تطب  . لو بالعبايه اضمّه
ابهل الحال لو تنظر اله . مدري اشيصير ابـ امه
حسبالها ايرد بالعذب . مو يرد فايض دمه

يا يمه وين الضحكه وين ارسومك
وانصبغن اهديماتك امن ادمومك
وين العصابه الخضره •• نامت النبله ابنحره
عبدالله يا عبدالله

…………………………………………………………


اكثر جرح بيه انفطر
گلب الامام المنتظر   • ويبچيله من دم

ايعيش الرضيع ابمهجته
والسهم چنه ابچبدته  • منه إيتألم

يطلع و يرفع هالطفل . وينادي كل الوادِم
ما ذنبه وبنبلة حقد  . راس وجسم متجاسِم
موش ابوساده ابنص مهد . وسط الرمل ظل نايم

مانام ليلي واذكر ادميعاته
ولجود عمّه شابح اعويناته
رايد ولو بس گطره •• نامت النبله ابنحره
عبدالله يا عبدالله

…………………………………………………………
✍️ ( سيد خضر الزاملي )

https://www.tg-me.com/aabas78
قصائد لكل ايام محرم اشترك بالقناة

عبد الله الرضيع ع

اوليدي گدامي
ينذبح ضامي
مات عطشان الطفل بيد الحسين
"""""""""
اوليدي ضامي وماكو مي بالغاضريه
مفطرة اشفافه وتصد عينه عليه
ميت ابني امن العطش وانه شـبديه
العلگمي منعوه علينه آل اميه
يحرك ايدينه
ودمعته بعينه
ابني تارس كربله دمعة وونين
"""""""""
آنه ام عبد الله واحچي محنة صعبه
بكربله عطشان طفلي وضامي گلبه
منين اجيب الماي إله والناس غُربه
غُربة لابني ما نطوه لو حتى شربه
شـذنبه گولولي
يا بعد طولي
يُمه كون ارويك من دمعة العين
"""""""""
انطيت عبد الله لابوه وگلبي يمه
لن سهم شفته وشفت دم اعله هدمه
چن اسمعه ايصيحلي لحگيلي يُمه
والابو يحاول بقه يطلع بسهمه
سهمه شـيجره
شباقي من نحره
والله شيصبر گلب امه الحزين
"""""""""
ناس ما ترحم طفل عطشان شافوه
وبدال الماي راس اوليدي گطعوه
سابح بدم منحره عبد الله خلوه
من حضن امه وابوه للغالي حرموه
اخذوا الغالي
مهده ظل خالي
لمهده لو صديت يكتلني الحنين
"""""""""
حرمله للطف اجه وحسين قصده
لكن اويه بني شنو حرمله شـعنده
يذبح ايريد الابو هو اويه ولده
شلون يذبح طفل ست شهور بعده
صحت يا طفلي
يا علي ردلي
يا بعد گلب امك وكل السنين
"""""""""
حسين طفله شايله ورايح وراجع
شافه باخر نفس يتلوه وينازع
بنحره شاف السهم من الگفه طالع
مات عبد الله وابوه لوجهه يباوع
حسين شيصبره
خنگته العبره
گباله ابنه ينذبح الله المعين

انيس الخفاجي الكربلائي

https://www.tg-me.com/aabas78
قصائد لكل ايام محرم اشترك بالقناة

عبد الله ع


             احرگوا كلشي بس خلوه الـيه
             مهـد عبد لله اشــــيلنــه ابديه
             مال ازغار..مو للنار..خلوه اليه
==================================١
      لاتحرگـــــون المهد..اتموت فوگه ام الولد 
            خلولي المهد وخذوا التريدونه
       النايم ابحضنه الورد..اخضر وما ينحصد
            اموتن من اشوفنكم تحرگـونه

      بيـه ريحت طفـل عطشــان ماشاربلـه اميـه
      راعي المهد ما موجود السهم سكّت بواچيه

             گامــت ناركـــم تاكـل بالــگماط
             گبل دخانه اشمن بالگلب شاط
             ياكفــار ..مـو للـنار.. خلـوا اليه
==================================٢
       ارکض ويركض وراي..واحد ايطگ ابگفاي
              هوه وسوطه متني ما يعوفونه
       يصيح انه اسلبهه هاي..للغنائم نيتي جاي
             حصتي الــمهد هذا ولاتكربــونه

  من اسمَعته هيچ ايكول وجهي انخطفت الوانه
  گبل احسين ياهو  الــمات وسلبوا مهد رضعانه

           اجـم مـره ضربنـي وآنـه لـزميـت
           مهد ابني واجاني الموت حسيت
           بيه احتار .. مو للنار ..خلوه اليه
==================================٣
       عافني وبالگوه راح ..جيبوا راس الولد صاح
              عله راس الرمح لازم  ترفعونه
      گلبي گبل الساني ناح .. مو عله گده الــرماح
              گبالي وعمده كل ساعه يهزونه

         يهز بالـــرمح واترجـاه بالله لايطيــح ابنـي
         چنـه يگلـي يايمـه حيـل الـــرمح يلچمنـي

             اركـض والــمهد جـــواه اخليــــه
             عليه افتر اخاف الـــرمل يچويـه
             اطواف الزار..مو للنار..خلوه اليه
==================================٤
       بالمهد جواه اصير ..يمـــه انـــزل يازغــيـر
              اذا لـولــيت وتناغــي يسمعـــونه
       يمه من يطلع نهار ..يصير راس الرمح حار
              يمه حته الطفل ذوله ما يرحمونه

   انطر الـفجـر راح يصيــر حـار ويلجم اجروحك
   الرمح بالشمس مثل النار انزلك ردت ما الوحك

          عله راس الرمح يا چف الـيلوح
          فَي اشلون احط للنحره مذبوح
          باچر  حار.. مو النار ..خلوا اليه
==================================٥
      نوگ جابــو للسبــي..واحنه ابطرگ الـعبـي
           اضمّـه ويـن حتـه مايشــوفــــونه
      ربي احلفــك بالــنبي ..لايذكــره الــناصبي
           امن اطبن سوك اخافن لا يبيعونه

  ابسوگ الكوفه من طبيت بيه باعوا تراچينه
  ياحافظ عليــل الــطف خلهم مهـده ناسينــه

             اذا خلّصت من الـسوگ ارتاح
             اكولــن يــوم مر ومني ماراح
             يـاستار ..مـو للنار..خلوا اليه
==================================٦
       وصلت للشام الـضعن..يمي الــشمـات اجـن
                دللول الـولد الـمن تلولـينه
        يا هو اليسكت اللسن..عَلي ضحكم ما بچن
                ما عندچ ولد ناخذه خلينه

يعبد الله دلـولـك مـات يعيرونـي امـن الــولــيلك
دمعي التحت رمحك طاح صَعد يوليدي يشكيلك

            يالـمالچ ولـد صاحت الـنسـوان
            بتره وجفن عينچ ليش سهران
           بيه اشصار ..مو للنار..خلوا اليه
===================================
✍حيدر الشغانبي


https://www.tg-me.com/aabas78
قصائد لكل ايام محرم اشترك بالقناة

عبدالله الرضيع عليه السلام

شلون الراي. ماظل ماي. بيش اسگيك حاچيني
٠٠٠٠٠٠٠٠٠٠٠٠
آنه امّـك يعبــدالله. دهري بيك صوبني
رضيع بيا ذنب حرموك. من ماي النهر يبني
شعنـده حــرمـله ويّاك. بسهمه الجاني شيّبني
عسه انشلّت يمينه وريت امـوت ولا يعذبني

سهمك صاب. گلبي وذاب. من شفتك يضي عيني
٠٠٠٠٠٠٠٠٠٠٠
منو المثلك يعبدالله. رضيع وينذبح نحره
يويلي والأشد من هاي. ضامي وماشرب گطره
اجيت امخضب بدمك ييُمّه ورگبتك حمره
إبدال الماي من دمك. سكوك وچبدتك جمره

آه عليك. شصاير بيك. اناغي وما تناغيني
٠٠٠٠٠٠٠٠٠٠٠٠٠
نبلة حرملة بطولك ذبحوا رگبتك بيها
لا اگـــــــدر اطلّعها. ولا اگــــدر اخلّيها
اصيح بصوت عبدالله. امك ما تحاچيها
الطم عالوجه والعين لحدما عيني اعميها

اشبگنّك. وشمّنّك بعد منهو اليسلّيني
٠٠٠٠٠٠٠٠٠٠٠
يبني مفطّره اشفافك. من كثر العطش يُمّه
جسمك ذابل ونحلان. من گد ما نزف دمه
ضامي وحرمله الملعون. رماك وصوبك سهمه
جابك والدك مذبوح. وعن عيني السهم ضمّه

ما رحموك من ذبحوك ذبحو حلمي وسنيني
٠٠٠٠٠٠٠٠٠٠٠٠
يعبدالله الرمل يچويك. نام بحضني وتهنّه
مو مالت رمل وتراب. خدك خل اشمّنّه
اشوفك بالمهد هيهات. أئيّس وگطع الظنّه
عطشان ومتت عطشان. الماي منين اجيبنّه

بيني وبين. گلب حسين. نار النبلة تچويني
٠٠٠٠٠٠٠٠٠٠٠٠٠
ينبضي الماعشت لولاه. ينسمه التنعش الريّه
اهزّك بالمهد ورتاح. لحدما تغفه يوميّه
يعبدالله وغفل مني. خذاك المارحم بيّه
نمت مو بالمعهد بتراب. وعفتني بجرحي مسبيه

شلون انساك. روحي وياك. اواسيك وتواسيني

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
https://www.tg-me.com/aabas78
قصائد لكل ايام محرم اشترك بالقناة

للوداع لليلة العاشر 👇👇👇👇👇