بسرعه خلصن * شهر عاشور وصفر
خوفي ترحـل * ياحبيبي المنتظـر
باقي بس يوم الرســول
خايـف غيابــك يطــول
وين اشوفك * وين اشوفك
ــــــــــــــــــــ
مو لساني يخاطبك گلبي الشجي
خاف مــا عيشن بعد عـام اليجـي
لهالسبب جيت اعله بابك ارتجي
اعليك ضـلع الرضّه حافر اعوجي

العشره الاولى * ندري تگضيها لطم
ولذلــــك * كـل محـرم بــي طـعـم
خاف هالنعــمه تـزول
خايف غيابك يطــول
وين اشوفك * وين اشوفك
ـــــــــــــــــــــ
ويوم عاشر ادري بي تشبع الم
انته گايلها دموعك تجـــري دم
گوه بالركضه تشيل انته الجدم
بعده يخنگ بيك دخان الخيــم

وي ركضتك * خطوه خطوه تضل تعد
ومن ضريحه * يصيحلك عبد الله رد
تأخرت يمته الوصول
خايف غيابك يطــول
وين اشوفك * وين اشوفك
ـــــــــــــــــــــ
ثاني عشره اگضيتها تنوح وتــون
نحت من يوم اهدعش لــم الحزن
وندري يوم اثلطعش بي ممتـحن
احضرت وي زين العباد انته الدفن

وبدفنتـــــه * اضــن ايدك حـاضـره
بصلب جدك * وانته تبچي لخنصره
شگد عليه مرّن خيول
خايف غيابك يطــول
وين اشوفك * وين اشوفك
ــــــــــــــــــــــ
ادري ثالث عشــره وين توجهت
بوسط هاي العشره للغرقد رحت
يم گبر زين العبــاد انتـه گصــدت
بس صحن ماكو لعد وين گعــدت

أرد اسألك * لچــن كاتلـنــي القهـــر
گبره طفته * شلون طفت اعله الصخر؟
انته زرته احنه شــنگول
خايف غيــابك يطــــول
وين اشوفك * وين اشوفك
ــــــــــــــــــــــ
اول العشــره بصفـر لمن يهـــل
موعــدك للشــــام لازم تنـــتقل
يم رقيه تفك اديها من الحــبل
زغيره عمتك عالهجر ما تحتمل

و ابو محمد * يوم سابع ليه ترد
وبالمديــنه * للمآتـــم تســتـعد
وهم تمر اعله عالبتول؟
خايف غيابك يطـــول
يمته اشوفك * يمته اشوفك
ـــــــــــــــــــــــ
وترجع وتلگه المواكب تنّصـب
وتبقى عينك بس تباوع عالدرب
باربعــين حسين عمتك من تطب
تضمها بعيونك عن عيون الغــرب

وانته بيدك * تترس الشارع عبــي
حتـــى زيـنب * تنســى ايام السبي
لأن عمتك بت أصول
خايف غيابك يطــول
وين اشوفك * وين اشوفك
ــــــــــــــــــــــــ
بهذن كلهن جفني صاحي وماغــفه
وشمعي ضل يتاني تحضــر ما طفى
دخيل عندك بس وفاة المصطفى
رايـــدك بـــس هالعــــزاء تشــــرّفه

راح اخلي * عيون گلبي مركـّـزه
بلكي اشوفك * لان هذا آخر عزه
الورد ما يحمل ذبـول
خايف غيابك يطـول
وين اشوفك * وين اشوفك
ـــــــــــــــــــــــــــ


الشاعر مهدي التقي


https://www.tg-me.com/aabas78
قصائد لكل ايام محرم اشترك بالقناة

اليوم زينب عودت برچابها
جايه بحسره تزور احبابها
**
حيل مشتاگه واجت مستعجله
وباالدرب ماتستراح القافله
طگ گلبها تريد توصل كربله
الشوگ لخوتها الضياغم جابها
**
چان گبل الناگه يسبگها الگلب
باالبواچي خلصت كل الدرب
صعب حال ام الخدر كلش صعب
والحزن ناصبله خيمه أبابها
**
هيه درب الطف نواعي جابته
مساهره واليل أبد مانامته
هذا حاله الجاي لگبور اخوته
للي يسأل هچي چان اجوابها
**
جابها الشوگ واجت للمگبره
ومن على الناگه وهوت فوگ الثره
حگها زينب حيل معذوره تره
صار فتره مرافگه سلابها
**
حضنت اتراب الگبر وعليه هوت
وبچه التل الزينبي لمن بچت
حسين يبن امي عليه تلطم صفت
رغم كلشي ولا ماتسمعه اعتابها
**
تسولف وكل كلمه متروسه هظم
الفاگده باالمگبره تحب الطم
تره افراگ اهل الوفه يدگ باالعظم
حيل ذبلت والافراگ اسبابها
**

راحت الراعي الوفاء وگصدته
إنه ياعباس اجيتك ندبته
علم جابت فوگ گبره وخلته
والعيون ولانشف خنيابها

الشاعر سعد العبودي


https://www.tg-me.com/aabas78
قصائد لكل ايام محرم اشترك بالقناة

قصيدة اسشتهاد الرسول الاكرم ص

استأذن الموت وخذاك ــ ويتــم العـــــالم وراك
انته بس  ماكو سـواك ــ استأذنه الموت
©©©©©©©©

يمن نزلت آية الباري اعله صدرك
بالأرض لو بالســمه ينحفــر گبرك؟
الأنبياء يمك تجــي لو غاب بدرك؟
لو ملائكت العرش تنزل تحظــرك؟

يا سـراج المهتدين ــ ياضياء الصالحين
ياهو قبلك يا آمين ــ استأذنه الموت
©©©©©©©©

اتيتمو هاليوم حيـــــدر والزچيه
يبو الزهره امصيبتك اعظم رزيه
اتگابلو يم راســـك اونو ســـويه
اوداعـة الله يامحمد هالمســــيه

ادموع حيدر والبتول ــ تجري من دم يالرسول
كاذب الغيــــرك يگول ــ استأذنه الموت
©©©©©©©©

يطــرق البـاب بأدب مثل اليـزورك
استأذنك ميريد ابد يجرح شعورك
گالك رب العرش يطلب حظـــورك
وبان ياطــه على وجهك ســـرورك

وانته لبيت النداء ــ ورفع روحك للسماء
ياهو مــن الانبياء ــ استأذنه الموت
©©©©©©©©

الدعو اصحاب. الجرح عافو نزيفه
الك ما نصــبو عزاء نصـــبو سقيفه
انكـرو عهـدك والاحـاديث الشـريفه
وقبل دفنـــك نصبو منهم خليـــفه

وي علي ماشــــيعوك ــ ابسرعه ياطه نسوك
اوماكو غيرك يعرفوك ــ استأذنه الموت
©©©©©©©©

وي علي الليله تضـــل بس ذكريـاتك
ومنـــك بأيده بقـت سبـحت صـلاتك
نكسر ظهره وتدري عنده شگد غلاتك
اوياه الامــــلاك انزلت تبچي ابمماتك

ارد اسألك يالحنين ــ يانبي قبلك امين
قبل لاتغمضله عين ــ استأذنه الموت
©©©©©©©©

✍الخادم
كامل السعيدي


https://www.tg-me.com/aabas78
قصائد لكل ايام محرم اشترك بالقناة

من بعد يوم السبي..نقيم ماأتم للنبي
يم ابو حسين..يم ابو حسين
&&&
للنجف جينه بعد ذيج المسيه
نقيم ماتم والدج ايا الزجيه
اربعينج كربله ليهسه بيه
دمعي ينزل عالنبي بدمعة رقيه
جيتكم احبي حبي.. نقيم ماأتم للنبي
يم ابو حسين..يم ابو حسين
&&&
دمع باقي بعيني من طف كربله
دموع خازن للنبي وي العايله
رجعت ويانه بحزنها القافله
للنبي تنصب عزاها بهل المله
تشوفها سود العبي.. نقيم ماأتم للنبي
يم ابو حسين..يم ابو حسين
&&&
يارسول الله اجينه وبينه روح
من مصاب حسين وليومك ننوح
للنجف جينه وبينه من الجروح
هوايه يامولاي من عطرك تفوح
انته ديني ومذهبي.. نقيم ماأتم للنبي
يم ابو حسين..يم ابو حسين
&&&
شكثر احزان بينه وبينه داي
للنبي تمشي بخطها وكل مناي
روحي ملهوفه وتنادي وعدها راي
يم علي الكرار ادريها شفاي
رغم جور الناصبي.. نقيم ماأتم للنبي
يم ابو حسين..يم ابو حسين
&&&
التعب هين علينه وكلشي راح
يوم نوكف تحت كبتك نستراح
يمك اتطيب العلل كل الجراح
ياابو الزهراء يالبيك السماح
اعرف انه مطلبي.. نقيم ماأتم للنبي
يم ابو حسين..يم ابو حسين
&&&
بالنجف ننصب عزاك وي السبيه
يانبي الرحمه العلينه ورحمه ليه
يارسول الله نعزي بهل االمسيه
نعزي ابو الحسنين ونعزي البقيه
نعزي كلمن عربي.. نقيم ماأتم للنبي
يم ابو حسين..يم ابو حسين
&&&
خادم اهل البيت
الحاج ابو علي السعيدي


https://www.tg-me.com/aabas78
قصائد لكل ايام محرم اشترك بالقناة

يالعفتني...ورده واحلامي سراب
يالعفتني...بويــه موتـني الغيـــاب
ويــنك انته ياهواي....عازتك ذبحت صباي
يالعفتني     يالعفتني
....................................................
بويه ويـــنك يــــالخذت ويـــاك كُلشي
من رحت والعين زعلانه اعله رمشي
هــــــــا يروح العافيـــــه لاوين تمشي
ريت بويه ويـــاك كـــون انشال نعشي
يا شمعتي...روحي ما تحمل عذاب
يا شمعتي...فدوه رجــعلي جــــواب
وينك انتـــه ياهواي...عازتك ذبحت صباي
يالعفتني     يالعفتني
......................................................
وحشه بويه الدار من يوم الرحت
ويــن مـــا انــدار اشتمك كمـــت
يا محمــد يا علــي يــامـا صحت
أكفياني وبس علـي شفته وطحت
يا فرحتي...وين وداك الزمان
يا فرحتي...فاطمه بعازة حنان
ويـــنك انتـــه يا هواي...عازتك ذبحت صباي
يالعفتني     يالعفتني
..............................................................
يالعشت وياك احلــــى ايام عمري
دمعه دمعه خلصت شيبات صبري
ياحلم عمـــري الحلم لحضات تــدري
وانه من يوم الرحت مكسور ضهري
يا حسرتي...ثمنطعش عمري بجفاك
يا حسرتي...شصار لو تدري وراك
وينك انتــــه ياهــواي...عازتك ذبحت صباي
يالعفتني    يالعفتني
................................................................
يالعفتني ومن رحت نكروا وصيتك
ما رعوني الجانوا ايلبسون صيتك
عفت كلشي وللكبر اعتب اجيتك
بويه احسبني هوه وتشتمني ريتك
يا فركتك...كطعت احبال الوصال
يا فركتك...الياوكت اصرخ تعال
وينك انته ياهواي...عازتك ذبحت صباي
يالعفتني....يالعفتني
..............................
بويه وحشه الدنيا وافراكك مردني
لون ناوي تروح ماجيت وخذتني
يا حزن عمري بعد المن عفتني
صعبه اعيش وانته بويه فاركتني
يا حياتي...عمري مايسوه بلاك
يا حياتي...موتي مستعجل وراك
وينك انته ياهواي...عازتك ذبحت صباي
يالعفتني     يالعفتني
.....................
خادم خدمة الحسين
الشاعر محمد الموالي


https://www.tg-me.com/aabas78
قصائد لكل ايام محرم اشترك بالقناة

موشح للرسول الكريم (ص)




شلون حال الزهره هسه بيا وضع
عين عالوالد وأيد اعله الضلع
١

المصطفى بآخر نفس واتصد عليه
بالمدامع حايره ولزمت أديه
احجي يابويه تگله وترتجيه
حچه طه بصوت بس ماينسمع
٢

حچه طه وسكت واتعالت اصوات
ناده جبرائيل بين السماوات
الدنيه فالتحزن محمد رحل مات
ولازم الجثمان هسه ينرفع

٣
گبل ماينرفع جثمان الرسول
اتصور انته بيا وضع حال البتول
تبچی تنحب حايره الليله أشتگول
ساكته ومذهوله وتصب الدمع
٤

شمته بصدره وتحس ذابت الروح
حايره الزهره بدمعها والجروح
على الوالد تبچى بالمدمع تنوح
وروحها ذابت تحس مثل الشمع
٥

يمها حيدر عاش لحظات الحزن
اعز ناسه ايفارگ الليله ویون
يدري كلش صعبه ساعات الدفن
دفن روحه وحگه حيدر ينصدع
٦

حمل نعش المصطفى وبالگبر صار
نزله بأيده علي بحيره ومرار
من نظرله جنه مليانه خضار
وجه طه المصطفى نور ويشع




لاتنسون والدي ووالدتي وابني عباس من الرحمه والمغفره
خادمكم رياض الرسل الجابري


https://www.tg-me.com/aabas78
قصائد لكل ايام محرم اشترك بالقناة

(( نزله    حماسيه )) 

وداعاً يا محمد والدي 
وداعاً يا محمد والدي

___
راح اودعنك يبويه وتجري دمعة عيني
بويه لاترحل دخيلك فدوه هاك اسنيني 
والله مـن ترحـل يبويه مايهود أونيني
بويه من أنحب ونوحاً يبجي حته حسيني 

وداعاً يا محمد والدي
وداعاً يا محمد والدي
___
خذني وياك بمنيتك والله ماريـد العمر 
كون اموتاً  هسه أنه دمعي مايقبل عذر 
سوده صارت كل حياتي يامحمد ياذخر 
كلبي مابطل نياحه ومدمعي حد الفجر

وداعاً يا محمد والدي
وداعاً يا محمد والدي
___
بيتي يفرغ من حنانك يالحنين لغالي 
خالي من نور الهدايه بيتي بعدك خالي 
بويه لا تترك يتيمه وارحم انته بحالي 
فكدت بعمر الطفوله أمها وأنته التالي 

وداعاً يا محمد والدي
وداعاً يا محمد والدي
___
هذه حيدر وبغيابك  خيم عليه الحزن 
ظهره محني يامحمد والدمع ذبل جفن 
والله يشتاق الكيانك بويه وكلش يحن 
الفارك أحبابه يويلي يكره  اليل اليجن

وداعاً يا محمد والدي
وداعاً يا محمد والدي
___
وأرد اسولفك يبويه من يطول غيابك 
هجمو علينه بحقدهم وعتنو يم بابك 
بالشماته يا محمد سحكو على عتابك 
الحركو البيت بغيابك همه من أصحابك 

وداعاً يا محمد والدي
وداعاً يا محمد والدي
___

فاطم توأن من ضلعها ويلي اه من الكسر
مااسامح بـويه أنه  وأبقه اليوم الحشر 
أنصب بيوم القيامة محكمه الاهل الكفر
فلان وفلان بجهنم  والله مااقبل عذر 

وداعاً يا محمد والدي
وداعاً يا محمد والدي

___
كلمات
الشاعر الحسيني 
مرتضى مكطوف الموالي


https://www.tg-me.com/aabas78
قصائد لكل ايام محرم اشترك بالقناة

استشهاد الرسول ص

هي لـتفارگ ابوها شلونها
فاطمة الله يكون بـعونها
"""""""""
راح طه وراح مو بس الامان
راح وياه شكو بالدنيا حنان
چان ابوها وچان اخوها وكلشي چان
هاي اول مرة يمشي بدونها
"""""""""
كل ابو لابنيّته خيمة وسند
وابو الزهرة والله ميعوضه احد
فاطمة شلونچ منو يگلها بعد
راح غاليها وسندها وعونها
"""""""""
بچت اهوايه باذنها من همس
رايح لوجه الله لتحزنين بس
انتي بنتي وانتي روحي والنفس
محنة شيّبت راسها وجفونها
""""""""
حچايه گلها اتبسمت ودمعت العين
امن اهلي انتي يمي اولهم تجين
وويه ابوچ ابنيتي باچر تلتقين
حچاية بچّه فاطمة مضمونها
""""""""
يساعد الله فاطمة بهذا الجره
وجه ابوها وضحكته تحت الثره
روحها طلعت بچي بالمگبره
الفرگة صعبة حگها لـتلومونها
"""""""
عينها عالباب تنتظره يعود
راح اعز انسان إلها بهالوجود
ولايام الحلوة ما ترجع اردود
راح طه وغاب عن عيونها
""""""""
الـمات ابوها بجيته تبقه حالمه
شگد صعب احساسها لـميتمه
مات طه مدري ماتت فاطمه
الموت ريته ايخيبلها ظنونها
"""""""""
هاي محنة تبدي من عدها المحن
وينكسر بالباب ضلع ام الحسن
وذبح ابو اليمه وخواته ينسبن
وتستمر ما لا نهاية شجونها

انيس الخفاجي الكربلائي


https://www.tg-me.com/aabas78
قصائد لكل ايام محرم اشترك بالقناة

رايتنه مرفوعه
صيحتنه مسموعه
للعسكري .... للعسكري
.........
شيب وشباب امحزمين الليله
اويه المهدي راعي العزه دم نبجيله
امصابه ثجيل ابحاجة الي ايشيله
بالصبر والتعجيل خل ندعيله

ما نشفت ادموعه
صيحتنه مسموعه
للعسكري .... للعسكري
.......

صيحتنه يابو المنتظر صيحتنه
باجر نعليهه ابعلو رايتنه
والشاهد اعلينه تضل دمعتنه
غايتنه مو نحصد اجر غايتنه

واحدنه بي لوعه
صيحتنه مسموعه
للعسكري .... للعسكري
.......

للعسكري واحدنه ذايب شمعه
و ما بطل اعليه الجفن بالدمعه
الهاي المصيبه كلشي بينه ينعه
حتى الكَلب يبجي المصابه انسمعه

كل نبضه مفجوعه
صيحتنه مسموعه
للعسكري .... للعسكري
.......
مثل اربعين حسين اله نتعنه
وننصب مواكبنه بطريق الجنه
للعسكري بَّصمنه بالدم كلنه
يرخصله كلشي المنه واحنه منه

وانضل رهن طوعه
صيحتنه مسموعه
للعسكري .... للعسكري
........

اويه المهدي باجر  نعتني بالرايه
من كربله الصحن الحسن مشايه
وفايه نبقه اعله العهد وفايه
ومابينه ابد واحد يبدل رايه

والطحنو اظلوعه
صيحتنه مسموعه
للعسكري .... للعسكري
.........
✍️ كلمات . موسى الخادم


https://www.tg-me.com/aabas78
قصائد لكل ايام محرم اشترك بالقناة

نزله الامام العسكري (ع)




يالعسكري بدمع الحزن نادينه : يمسموم
سامره حزنانه بفگد والينه : يمسموم
نبچي ونون بدمع الحزن
يمسموم
يمسموم

١

هالليله بدموع الحزن ننادي : يمسموم
ابنك چبدته اتوذرت يالهادي : يمسموم
ويگول كل خادم انه اعتقادي : يمسموم
بالمجلس اخذ يالحسن مرادي : يمسموم
ابچي بدمع واكسر ضلع
يمسموم
يمسموم

٢

لجلك بچينه والدموع بحسره : يمسموم
عايش مصابك بالگلوب اشكبره : يمسموم
الليله نحلفك يالحسن بالزهره : يمسموم
للمجلس احنه انريد منك نظره : يمسموم
الهم ينجلي يابن علي
يمسموم
يمسموم

٣

هذا الخبر هالليله من نذيعه : يمسموم
تنحب تنوح اعليك كل الشيعه : يمسموم
ضاگت علينه سيدي الوسيعه : يمسموم
نقسم عليك بأمك الشفيعه : يمسموم
شوف الخدم تبچي بألم
يمسموم
يمسموم
٤

سمّو چبدتك سيدي النواصب : يمسموم
واحنه گلبنه الليله لجلك ذايب : يمسموم
ماتنگـطع تمشيلك المواكب : يمسموم
حضرت الليله بدمك وتطالب : يمسموم
بدم رگبتك و إمحبتك
يمسموم
يمسموم

٥

نكتب عهدنه وبالدمع نادينه : يمسموم
والينه يبقه العسكري والينه : يمسموم
خدام الك تقبلنه يا مهدينه : يمسموم
وسجلينه يالزهره بسجل سجلينه : يمسموم
يم المحن لجل الحسن
يمسموم
يمسموم





لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

https://www.tg-me.com/aabas78
قصائد لكل ايام محرم اشترك بالقناة

هالليله بأصوات النحيب
نصرخ وداعا يالغريب
واقاسما..واقاسما
...
مثل مانحيي الليالي الفاطميه
ننصب اعله القاسم الليله العزبه
انواسي ابوه المندفن بالكاظميه
وللرضا انقدم تعازي بهالمسيه

ياوسفه اشراف العباد
كل واحد ايموت ابلاد
واقاسما...واقاسما
....
فاطمه المعصومه كون الليله يمه
بآخر انفاسه تواسيه وتشمه
ابشوفة احبابه الغريب ايزول همه
وماتضل الدنيه بين اعيونه ضلمه

معصومه يمه الليله كون
اخت واخوهه يلتقون
واقاسما..واقاسما
...
عنده بس ابنيه ياناس وزغيره
لااهل يمه ولايمه عشيره
بآخر انفاسه بقه الناظر يديره
عله احسين اللمو اضلوعه ابحصيره

هذا الامام اشكد حنين
يبجي وينادي اهلي وين
واقاسما..واقاسما
...
ناس الامضيفينه من شافو يعاني
والعمر ماباقي ينعد بالثواني
ناشدو عن اسمه كال القاسم آني
ابن موسى الكاظم وسيد زماني

بس الوكت بايامي دار
خلاني احن ليل ونهار
واقاسما..واقاسما
....
كلهم اخذو ابنيتي لو رحتو الوطنه
هيه الاتدليكم اعله ابيوت اهلنه
وانتو ماقصرتو يالكلكم محنه
بالحشر ويانه مثواكم الجنه

ومن غمض اعيونه الامام
سووله بالحله مقام
واقاسما..واقاسما
....
كون هاي الليله نلتم بمزاره
نلطم بحركتنه وانون بحراره
بالكلب بانين اله كبه ومناره
يا الهي ارزقنه للقاسم زياره

اخو الرضه وللحاجه باب
هالليله غطوه بالتراب
واقاسما..واقاسما
....
محمد الجماسي
اللهم عجل لوليك الفرج


https://www.tg-me.com/aabas78
قصائد لكل ايام محرم اشترك بالقناة

لوفاة القاسم بن الامام الكاظم عليهما السلام

اتهدمت  اركان گلبي اتهدمت
اتألمت  لمصابه روحي  اتألمت

بصحره المواجع هايم 
لجل الغريب القاسم
ابن الامام الكاظم
★★★★★
اتهدمت اركان گلبي  ونكسر
من كثر نوحي الفرح ماله أثر
للغريب المارحم بيه الدهر
المشه بدروب يحويها  الخطر

وياي الحزن متوالم
لجل الغريب القاسم
ابن الامام الكاظم
★★★★★
طلع من داره گصد دار الغرب
تلهب الحسرات ضلت بالكلب
احتار وين يروح ويذبه الدرب
الدنيا وي اهل المجد شنت حرب

ملزوم دمعي ولازم 
لجل الغريب القاسم
ابن الامام الكاظم
★★★★★
وصل للغربه المواجع حالته
المنكسر مهدوم  ضل ابحيرته
الناس مذهوله الوقاره وهيبته
الديره عمها الخير كلها بجَيَّتَه
ناحت بحسره الوادم
لجل الغريب القاسم
ابن الامام الكاظم
★★★★★
الفاطمه بنته حچه عن فاطمه
عن كسرها  وطَبْر حماي الحمه
وچبدة المسموم صورة مؤلمه
وكربلا ونحر انگطع ينزف دمه

چن الزمن مونادم
لجل الغريب القاسم
ابن الامام الكاظم
★★★★★
شرح للوادم قضيته وقصته
وعن دواهي الوكت بيه وغربته
عرفوا اصله منين واهله وديرته
  بالبواچي شييعوها اجنازته

ردوا ابنوح الدايم
لجل الغريب القاسم
ابن الامام الكاظم

الشاعر حسن لعيبي الحريشاوي

https://www.tg-me.com/aabas78
قصائد لكل ايام محرم اشترك بالقناة

يا حال توصف حاله .. وضل خالي الليله الدار
حيدر رد لازم ظهره .. دافن بجفوفه الزهره
وضل خالي الليله الدار
****
رد قالع البيبان يمشي بهيده
زهرة حياته الليله دافن بيده
ام الحسن تسري اويَ دم اوريده
يا حال حاله بمحنته الصميده
هلت ياناس عيونه .. ودمعه اعلى الخد نهران
بالكوه يجر الحسره .. دافن بجفوفه الزهره
وضل خالي الليله الدار
****
رد منحني وياحال صاير حاله
حتى الصخر عالزهره ضل ينعاله
يتعثر ودمعه علي تجاله
حيله انهدم حتى الجدم ماشاله
عالزهره تهل دموعه .. ويعثر بدموع العين
مهموم و ياهو يصبره .. دافن بجفوفه الزهره
وضل خالي الليله الدار
****
كلما يصد عالباب ينزل دمعه
وكلما يصد مسمار يلزم ضلعه
شصاير يناس بحاله عكب البضعه
اهل المكابر بالبوابجي تسمعه
بس عالفركه الله يعينه .. مفارك ياناس عزاز
مجروح تخنگه العبره .. دافن بجفوفه الزهره
وضل خالي الليله الدار
****
كلبه يحن للزهره ولملكاها
شحاله ويرد للدار مايلكاها
روحه اعلى كبر ام الحسن خلالها
بذاك اللحد حيله اندفن وياها
يمشي ودمعاته بعينه .. يرجع لدياره شلون
محتار وهمه شكبره .. دافن بجفوفه الزهره
وضل خالي الليله الدار
****
شاب الجفن والحيل رايح منه
من ونه داحي الباب يغفه بونه
مكسور كلبه وللكبر يتعنه
وياها ميت باللحد يتمنه
وياها تمنه يدفنونه .. والفرگه تشيب الراس
من بابه وذيج العصره .. دافن بجفوفه الزهره
وضل خالي الليله الدار
****
مجروح حيدر بالألم واللوعه
ما تنشف وي الليل لحضه دموعه
محنيه لمصاب الزجيه ضلوعه
و ونات گلبه من العرج مشلوعه
كل ليله ينوح بحركه .. تفطر گلبه من النوح
الهاضمته جفوف السطره .. دافن بجفوفه الزهره
وضل خالي الليله الدار
****
تمت
احمد الخفاجي


https://www.tg-me.com/aabas78
قصائد لكل ايام محرم اشترك بالقناة

حان الوداع ... يا علي يا با الحسن
......
١؛؛؛؛؛؛؛؛
امسح يا علي ادموعك
كاسر كَـلبي موضوعك
دير العين إليه

بطل يا شهم ونك
مو بيدي ابتعد عنك
محسومه القضيه

مو سهل البُعد ادري
يابو اعيالي يا عمري
بس شنهو البديه

موتي كَـرب يابا الحسن ودعني
بيدك اريدن يا علي اتشيعني
والكسرو اظلوعي متحضر دفني

حان الوداع ... غطي وجهي بالجفن
حان الوداع ...  يا علي يابا الحسن
......
٢؛؛؛؛؛؛؛؛؛؛
اصبر يا علي الموتي
ساعت ينكَـطع صوتي
غطني بالعبايه

لتّبين أبد كسرك
زينب واكَـفه اتنظرك
يا حيدر ورايه

هَون امصيبتي اعليهه
صير ام وأبو ليهه
يالبيك الكفايه

زينب امانت فاطمه يحيدر
أوصيك بيهه وانت كَـدهه واكثر
طبعك حنين وبيك اظلن افخر

حان الوداع .... فاركَـنه هالزمن
حان الوداع .... يا علي يابا الحسن
......
٣؛؛؛؛؛؛؛؛؛؛؛؛؛
يا حيدر يضي عيني
حالك حيل ماذيني
يا نبع الأماني

ما متعوده يالغالي
هيج انظرلك اكَـبالي
يا حجة زماني

اصبر يا بعد حيلي
وراكم دفنتي ابليلي
ميته الليله اني

تكَـصر حياته المنه كسرو ضلعه
هذا الخبر يصعب عليك اتسمعه
ادري ولكن عمري ما بي رجعه

حان الوداع .... اشموع ايامي طفن
حان الوداع .... يا علي يابا الحسن
......
٤؛؛؛؛؛؛؛؛؛؛
تدريني اعشكَـ احروفك
لو صح بيدي ما عوفك
بس هذا قدرنه

انه أدخل الكَـبري
وانت يا بعد عمري
اتخلص العمر حنه

وحشه اسنينك ادريهه
من بعدي وتكَـضيهه
ونه ابأثر ونه

صعبه ادري مو هين وداع الزهره
شكرآ الك ما قصرت بل مره
خلصت حياتي اوياك بجمل عشره

حان الوداع .... هنه ساعات البقن
حان الوداع .... يا علي يابا الحسن

.......؛؛؛؛؛؛؛؛؛................

✍️🏻 كلمات موسى الخادم


https://www.tg-me.com/aabas78
قصائد لكل ايام محرم اشترك بالقناة

حامي الحميّه .. دافن شمس بالليل
بعد الزچيّــــه .. صايــر علي بلا حيل
روحــه غريــــبه
بعــد الحـــبيبه
صاحب مصيبه
____
علي جروح المصيبه خذت كل حيله
مشه محـــبوب گلــبه عنّه هالليــــله
( الله يصبــرك ) سلـمان يدعــــيــــله
نعش أم الحســن گــوّه علي ايشـيله

قالـــعها خيــبر ... لزهره گوّه ايشــيل
مو ذاكه حـيدر ... صايــر علي بلا حيل
روحه غريــــبه
بعد الحـــبيبه
صاحب مصيبه
___
القويِّ الـ بالمــعارك مِنفرِد عزمــــه
الـ ما يوگف اگبـــــاله لو ألـــف زلمه
بصعـوبه الهَوَه بعد الزهــره يشتمّه
أبو الاحزان صـار من الضــلع أسمه

فرگــــاها خَلّه ... بصوته الحـزن ترتيل
الشافه يــگله : ... صايــر علي بلا حيل
روحه غريــــبه
بعد الحـــبيبه
صاحب مصيبه
__
علي هذه الدهـــر منّـه سِلِـب عمره
عالمُـغتــسل بيـــــده مَـدد الزهـــره
يبــاوع خدها ازرگ و السبب سطره
من كَسر الضِـلع و الله انكسر ظهره

محروگه اديها ... شاهدها بالتــغسيل
يبچـــي عليها ... صايـــر علي بلا حيل
روحه غريــــبه
بعد الحـــبيبه
صاحب مصيبه
____
گـــعد بالزاويــه يبـــچي بألم مخفي
و يصيح بدمعته و الصيحه ما تكفي
گالتلــــــه شــجرالك گال : وا لهفي
اعله ضلع المنكسر أسماء مَر چفّي

شاف بدمعــته ... كــسر الضلــع بالويـل
آ يا كسرته ... صـــايــر علي بلا حيل
روحه غريــــبه
بعد الحـــبيبه
صاحب مصيبه
___
يعالـــــم و الله تكـتل فرگـــة الأحـباب
غابت ضحكته وجه ام حسن من غاب
أبو تـــراب و يـــهيل اعله الزچيّه تراب
علي ميّـــت عليـــها من عصرها الباب

وَدعـها ينــحب ... رَد و دموعه اتسيل
گالــته زيـنب : ... صايـر علي بلا حيل
روحه غريــــبه
بعد الحـــبيبه
صاحب مصيبه

الشاعر حاتم صبري الكاظمي


https://www.tg-me.com/aabas78
قصائد لكل ايام محرم اشترك بالقناة

عزبت.......بربع  زلم
ورضعتهم بس عزم

والمراجل للگمر عنوانها
●●●●●●●●●●●●●●●●●●●●●●
ابوفاضل رفع راسي بالمجد عزه اعتله
والنهر  ناده  دخيله   بيده  يگلب كربله
انه ابني بزوده يكشخ زينب اخته مدلله
بعزمي ربيت البواسل بت حزام  امعدله

عفيه زودي ابربعه
وقعوا  عالمشرعه

والمفاخر تشهد ابميدانها
●●●●●●●●●●●●●●●●●●●●●●
الله بيض وجهي بيهم وانه منطيته عهد
اربعه  لحسين فدوه  انتو يم ظهره سند
وانه وياكم  اخدمه  حسين يا يمه المدد
والحنين حسين يدري بكلبي ماغيره بعد

انه وصيت الگمر
بيده  يهديله نهر

والعراضه لو يطك بركانهه
●●●●●●●●●●●●●●●●●●●●●●
فخري بيهم راح اكتبه دونت اروع صور
والمسافه النهر يگصر بجوده ينحط النهر
خوة العباس خوه   تحچي  ذرعانه  دهر
دورت  بالدنيا كلها   ماشفت مثله   گمر

صارت الخوه سمه
تبوس چفه فاطمه

والفضائل كربله  بيبانها
●●●●●●●●●●●●●●●●●●●●●●
ذوله ولدي  بالمعاره حزام  للكلفه  رهن
وابوفاضل من خصاله هذا للخوه وطن
والفواطم بيده رايه هوه حماي الضعن
گدها معروف وگلتهه انت خيال الرسن

شمخ زوده معتلي
بهيبته يشبه علي

يا كتيبه تنهزم فرسانهه
●●●●●●●●●●●●●●●●●●●●●●
بالمحبه اشكد احثهم شفت زود ومرجله
بخزرة العباس  حادث  والنهر  مايه ابتله
زعل والعباس غاضب چنه يقره الزلزله
والعجاج اتشوف خيبر ثاني خيبر كربله

امربع الحك رجعه
يا   اصالة   منبعه

والعساكر  خورست بلسانها
***
تمت بعون الله تعالى الشاعر_يوسف_الفتلاوي


https://www.tg-me.com/aabas78
قصائد لكل ايام محرم اشترك بالقناة

ام البدور ألاربعه

شيـــعُُ نعش ام البدور ألاربعة
هاذي أم عباس سبع المـشرعة
***
ياله ياخدام شيعو ام الــــوفه
باالطم والنوح شيلو الهـــاتفه 
بالولد ضحيت وانه العـــارفه

والنحور ويه الجفوف مكطعة
هاذي ام عباس سبع المشرعة
****
هاذه نعش ام البنـين العــل ثره
حيرة ياعباس المــن تحظــره
من تجيــــها والجفوف مبـتره

حيرة والله شلون كلي تشيــعة
هاذي ام عباس سبع المشـرعة
***
بـالله يادفـــان هونك باالحـــد 
بلكي يحضرها ويجيها المبتعد
رادت اتشوف الحسين وبالمجد.

تمنت تشوفه وتموت بمصرعة 
هاذي ام عباس سبع المشرعة.
*
بالله يادفــان وســــع باالـــكبــر
شالت هـموم ومااســـي بالعــمر
تناطر حـسين عله حر من الجمر  

بلكي يلفيها  وتهــــيد الفاجـعة
هاذي ام عباس ســبع المـشرعة
***
ياله يا أم حسين كومي باالعــجل 
هاذي ام عباس جتــــج باالخـجل
مقصره انه تكول بجفــوف الكفل

والله لو ادري برباي مرضــعة
هاذي ام عباس سبع المـشرعة
**

كلمات
خادمكم مرتضى مكطوف الموالي

https://www.tg-me.com/aabas78
قصائد لكل ايام محرم اشترك بالقناة

✔️
خل يجي عبــــــــــــــــــاس لمّه ايشيلها
وهـــــــــوّ يتكفّــــــــــــل امــــر تغسيلها
**
هاي ام الوفــــــــــــــــه الضحّت اربعه
وبقت حـــــــــــــد الموت تبجي ودامعه
على حسين وأخـــــــــــــوته المصرّعه
مـــــــــن إجه الناعي وبــــــده يحجيلها
*
ماتت بهاليــــــــــــــــــــوم ويلي وحيده
وحسره عــــــــــــــــدها بالكلب وتريده
الكمر هاشــــــــــــم خل يجي وعضيده
ويحضـر وياهـــــــــــم اليحمي ادخيلها
*
خل يجي عبــــــــــــــــاس يتكفّل الامر
وتــــــــــدري مكطوعات الزنود السمر
عذرتـــــــــــــه وتريـــــــد منّه بس يمر
حتى لــــــــــــــــو بس يوكف ويبجيلها
****
خل يجـــــــــــــــي يشيعها ويقيم العزاء
امنيتها جانــــــــــــــــــــــــت بهذا اللقاء
ويحفر جـــــــــــــــوا ره لحدها بكربلاء
وجــــــار ابو اليمه ويــــــــرد كل حيلها
**
شيلها يابو الوفـــــــــــــــــه الطف كربله
هنــــــــــــــــــاك جهزها وجسدها غسّله
وبينك وبينه الأبن سيـــــــــــــــــــد المله
گبر يــــــــــــــــــــــــا عباس أنت بنيلها
**
شيّـــــــــــــــــــــد إلها گبر بين الحرمين
حتى مـــــــن نگصد نجي نزور الحسين
نزورهــــــــــــــــا ونبچي على ام البنين
البچت لجــــــــــــــــل حسين حتى بليلها
***
يرد حيــــــل امــــــــــــــك بهاي الأمنيه
وتضــــــــــــــــل دمعتهـــا عليكم جاريه
شما بقـــه هــــــــذا زمنّـــــــــــــــه باقيه
حتى تشفي مـــــــــــــــــن الدموع غليلها
*
مـــــــــــــا وفت تشعـــر بدمعات الحزن
تريد حتــــــــــــــى بالكبـــر تبجي وتون
على حسين وكــــــــل خواته اللي أنسبن
وعلى حــــــــــــــــــــال العايله وعليلها
*
بجاه ام عباس يـــــــــــــــا رب يا رحيم
ردّه مــــــــــــــــن غيابه مهدينه الحكيم
خلّي ينهي كـــــــــــــــــل فرد حاقد لئيم
والهموم العل مــــــــــــــــــوالي يشيلها



الشاعر
قاسم حتروش البلداوي
خادمكم
أسألكم الدعاء 🤲🤲🤲🤲🤲🤲🤲
غير مبري الذمه كل من يقرأها بطور الغناء


https://www.tg-me.com/aabas78
قصائد لكل ايام محرم اشترك بالقناة
✔️

من كربله للشام .... جابتهه ضيم اَلام
واليوم وافاهه الاجل زينب
........
يلي تنشد على الصار وحل عليهه
هاي بت حيدر علي اليتباهه بيهه
من بعد موتت اهله افتو سبيهه
مشت من يمهم غصب مجتوفه اديهه

يالتنشد اعله الصار ... زينب سبوهه أشرار
ويدرون بيهه بت حبيب الرب
واليوم وافاهه الاجل زينب
......
بلايه هودج على الهزله ركبوهه
الذبحو ابن امهه وذبحته شوفوهه
حركو اعليهه الخيام وطلعوهه
حارت اتلم اليتامه اتشيل اخوهه

اخت البطل عباس .... جارت عليهه الناس
مارعو حهقه والأخو تسلب
واليوم وافاهه الاجل زينب
.......
مشت للشام ونضرهه عالشريعه
تنتظر جيت ابو اجفوف الكطيعه
راحت ودمعتهه فوك الخد صريعه
وبيدهه ذكره دمه حسين ورضيعه

ورايه كمر عدنان ... ظلت على التربان
اوفوكه جفينه ودماه الصب
واليوم وافاهه الاجل زينب
......
اتريد اكمل ما سداهه من مصايب
امن السياط امتونهه اتورمت يصاحب
بالخرابه كعدوهه اعله الترايب
والحسين اعله الرمح راسه يراقب

ايعاين عليهه اشلون .... بيهه العده ايجرون
خاف احجي  الك اكثر وتتعجب
واليوم وافاهه الاجل زينب

......
من بحر همهه الك سولفت قطره
الشافته زينب يهد الكون بَسره
طاحت اعليهه المصايب عشره عشره
من زغرهه اجتفت بحزان كثره

ضيم السداهه اهواي ... كد العطش للماي
كل ساعه من الزمن تتعذب
واليوم وافاهه الاجل زينب
.......
حتى بالموت المصايب جاورتهه
ناس غربه موش اهلهه شيعتهه
اعيونهه مو جف اخوهه الغمضتهه
جانت اتحسب يجيهه ابخاتمتهه

زينب بقت هيهات .... بعازت اخوهه المات
بمنازع الموت وبقت تنحب
واليوم وافاهه الاجل زينب
.......
كلمات
موسى الخادم


https://www.tg-me.com/aabas78
قصائد لكل ايام محرم اشترك بالقناة

كربت فاجعت الشام _ والمهدي شدلهه حزام
بين الصحن والحظره
يهل بدمعته الحمره
///////////////////////////////
يحاجي عمته ودموعه تتجاره
اقرالج نعي لو اقره الزياره
طريق الشام يالماشيته محتاره
الما لحك يشتمج يشمر احجاره

المسبيه كل ما تندار _ اعليهه يشمرون احجار
شيحجي اليغص بالعبره
يهل بدمعته الحمره
///////////////////////////////
يشبك عالكبر وتلجمه غربتهه
الما ترتاح ساعه الدنيه خلتهه
العليهه من التعب ظل تبجي ناكتهه
المسبيه الغريبه الذبحو اخوتهه

عالكبر يهمس بحساس _ يسلم عليج العباس
يجيبلهه الرايه الخظره
يهل بدمعته الحمره
///////////////////////////////
يكلهه شلون اكلج عمتي اشلونج
ومثل لون السمه يازينب امتونج
يم ارماح اخوتج من يشوفونج
اهل الشام يازينب يطردونج

والاصعب امن الصعبات_ اليندفن يم الشمات
ينلجم حتى بكبره
يهل بدمعته الحمره
///////////////////////////////
الوكفت بالقصر بجتني وكفتهه
عمتي اول خدر شافو عبايتهه
بيش الشام من طبت تلكتهه
فرق بين الخرابه اوذيج خيمتهه

ثلث تيام ثلث ليلات _ وكفت اباب الساعات
تلجم يهاي الذكره
يهل بدمعته الحمره
///////////////////////////////
عايشهه المصيبه وصعبه ينساهه
اجه العمته الغريبه يكعد اوياهه
كابلهه وكعد يبجي اعله مبجاهه
وبيبان الصحن بدموعه حناهه

جابلهه صوغه باأهات _ من كبر اخوهه ترابات
ظلت تشمهه بحسره
يهل بدمعته الحمره
///////////////////////////////
المهدي المغربيه شكله يتغير
يذب اعمامته من يصعد المنبر
قره نص المصيبه وصاح مااكدر
المجتوفه شتكض بالناكه من تعثر

خافن تطيح امن الخوف _ وامكيدين الهه جفوف
المجويه اديهه بجمره
يهل بدمعته الحمره
///////////////////////////////
تمت ____ علاء الزيدي


https://www.tg-me.com/aabas78
قصائد لكل ايام محرم اشترك بالقناة