هلال شهرك من عسنه لايهل
بيه مصايب كثره ابد ماتنحمل
--------------------------------------

من عسنه اهلال حزنك لاطلع
بيه جفن المرتضى وفاطم دمع
ون محمد بالسموات انسمع

والمدامع من دمه ظلت تهل
--------------------------------------
بيه جسم حسين بالخيل انسحگ
و المخيم بيد ظلام احترگ
وعنه شمل العيله للشام افترگ

بالبراري العيله طش منه الشمل
--------------------------------------
هلال حزنك بينه خله اچم جرح
يگضي ليلي بدمع وبون الصبح
حسين نحره ما سلم من الذبح

وبالنبل مذبوح عبد الله الطفل
--------------------------------------
چم مصاب انترك بينه وچم إثر
عگب عباس الوگع صوب النهر
وبقيت زينب للمدامع والسهر

وزادت اعليهه المصايب والحمل
=================================
اهلال حزنك كون لا هل وصبح
بيه عبد الله بسهم ضامي انذبح
وگلب زينب وأمه چم جرح انجرح

ظل دمعهن عالوجن من دم يهل
=================================
مشت زينب والعيال مچتفين
وعالارماح الروس ويرأس الحسين
اشما يمرهم لليل يزداد الونين

چم لعين اتماده چم طاغي ونذل
=====================================
20,6,2025
الشاعر احسان الحميداوي


https://www.tg-me.com/aabas78
قصائد لكل ايام محرم اشترك بالقناة

ليلة ١ محرم الحرام
(عاشور احزان العترة )

هل بهلاله .....  عاشور احزان العترة
هل بهلاله.......  الماخذ حلم الزهره
هل بهلاله....... وكلب العاشك جن جمرة .... واويلاه
########################
بزغ شهر الحزن ضيه بسمه المجروح
شهر الهضمه والحسرة وشهر للنوح
مو فزعة الفقط عنده نقاء الروح
يواسي الزهرة والعترة على المذبوح

أصدق عبرة .... بالمجلس محلاه تعبك
أصدق عبرة .... مصداق اخلاصك حبك
أصدق عبرة ..... من تصرخ من كل كلبك ..... واويلاه
##########################
حزن كلبك شرط لونه بسواد الليل
ولسانك لا ابد ليفارك ال يا ويل
حبيب الله على الغبرة تدوسه الخيل
وتطشر بل سحك جسمه عذوبة هيل

عطرة الاعذب....... ماكو الاعذب من عنده
عطرة الاعذب...... لو ميت شمه يرده
عطرة الاعذب ....... ومطشر عطر الورده ..... واويلاه
#########################
كل عاشك صرخته يا ابو الرحمه
جا هجي  يجازونك وادم الغشمه
ساترنه وبس حيف انسلب هدمه
كل الخير من خيرك يبو اليمه

خيرك جازي ...... يامصحف الله الطايح
خيرك جازي ...... عايش جرحك حب فاضح
خيرك جازي ...... يا مذبوح ومتسامح ......واويلاه
$$$$$$$$$$$$$$$$$$$$$$$$$$$$
فرصة عمرك ولاتفرط الفرصة
لحبك بالصدك واخلاص خل حصة
باجر بالحشر كلمن يجي بقرصه
بدون حسين كلشي يطيح بأي نصه

بأي عاثوره ........ يطيح وماتنفع جاره
بأي عاثوره........... يضيع بهوست افكاره
بأي عاثوره ........ حسين اليوكف باكتاره.... واويلاه
#########################
شهر الزهرة بيه تبجي بأحر دمعات
شهر الطاعة والغفران والخيرات
لو مرك عسر بس هو ابو الكلفات
بسم حسين تنحل اصعب الازمات

وا مذبوحاه ...... بس حلفه بجف الساقي
وا مذبوحاه ...... واعليه بس عيف الباقي
وا مذبوحاه ...... يحب ونة اي اعراقي ..... واويلاه


حسين مجيد العميدي


https://www.tg-me.com/aabas78
قصائد لكل ايام محرم اشترك بالقناة

للخدمه 👇👇👇👇👇👇

الما عنده حسين ميت مرتين
يا لذه يشـــوف بعمره
الما اليعشگ ابن الزهره

****
المـا عنــده الحُســين بدنيتــه شعنـده
ضايــع والطــريق الســالكــه يبعــده
الما شاف الحقيقه اعيونه اظن رمده
مثـــــل البيــده كــض المــاي وتبــده
بدربــه الانــوار والضـد يحــتار
مـــا اظنه يشوف الگمره
الما اليعشگ ابن الزهره

****

الما عنده الزياره وضايگ الخدمـه
هــذا امضيــع الايمـــان والنعــمــه
الهوه الما بي حُسين شلون يشتمه
الما شاف المناير هذا احسه اعمى
دنـيــا بليـــاه شتنــفــع والله
يخســر لاشــك كــل قدره
الما اليعشگ ابن الزهره

****


الما ضــايك لهب عاشور وآهاتــه
ولا مــره تّچــوه بذيــچ جمــراتــه
عــايش ألمــن الخســران كل ذاتـه
طعم منطــي الحيــاة بكل جراحاته
اول مذبـــوح للدنيــا الــروح
ميّــت مـــا يـنفــع عمــره
الما اليعشگ ابن الزهره

****

الما كحــل عيِـونـه بشـوفت الگبـه
أولا مــــره گصــــد عنــاي للحــبه
هذا الي صــدگ عايش الف غـربه
حسين الدنيا كلها الواسعـه الرحبه
بلا حبه شلون لا طــعم ولــون
مــا يشتم عطــر العتـــره
الما اليعشگ ابن الزهره

****

تخيلها الحيــاة بلا حــزن عــاشور
ظلام تصـــير كلها ولا يمرها النور
الحياة احياها يوم القدم الها انحور
اذن واجب نذكره شما الكون يدور
يالبيّـه تلــوم مــا ابطــل دوم
ينـــسى القــرآن وذكـــره
الما اليعشگ ابن الزهره

****

المنطينه حيــاته ومهجتــه ونحره
وتحـــت الخيل لله هشمو صــدره
قليل انطيه لـو مر ذكره بس عبره
لحـــد الان يحينا بهــوى الحضـره
حسين العطشان يروينه احسان
ينكــر ديـــن الله وســـره
الما اليعشگ ابن الزهره

*

الشاعر
موسى البديري


https://www.tg-me.com/aabas78
قصائد لكل ايام محرم اشترك بالقناة

تجليبه للخدمه ومجالس الحسين ع


كلها تموت هاي الدنيه مگضيه
وهنياله الگضاها بنعي ولطميه
**
ماخسران لاون تلتزم بحسين
وكت الموت ترتاح وتغمض العين
حسين الدين باچر تنسأل عالدين
احضر للمجالس واخلص النيه
*
احضر للمجالس لاتدور اعذار
باچر نار حصّن روحك امن النار
خلّي حسين يمّك وين ماتندار
وخل بيتك المجلس والحسينيه
**
احضر للمجالس والتزم بيها
الحسينيه اعله كيفك من تطب ليها
بهيده اويه الزچيه لاتأذّيها
يم الباب تلگه الزهره محنيه
*
بالباب ام حسن تستقبل اليحضر
هله بخادم وليدي حسين ابو الاكبر
تعال وشوف يامحلاته هالمنظر
وهنياله التصبله الزهره الميّه
**
من تدخل المأتم سلّم عليها
وگلها يالزچيه الخدمه اقبليها
مروتچ يم حسن وحسين سجليها
تراها بلا رضاها الخدمه ملغيه
**
وحگ اهل الكساء البل عدد خمسه
اذا ننسه الزچيه هيه ماتنسه
الزهره اعله الخدمهم احن من نفسه
هاي الطاهره الراضيه المرضيه
***
يالحاضر المأتم اسمع البشره
الخادم من يموت اتحضره الزهره
وبيديها خطف عالمعبر اتعبره
وماتزلگ اجدامه ميه بالميه
****
بالمحشر الزهره اتدوّر اعلينه
وتنادي يرب ذوله مجانينه
خلي احسابهم ياربي بيدينه
يطلبوني وأوفّي واجب اعليه
****
خادم الزهراء ع
سيد غالب الرضوي الكربلائي


https://www.tg-me.com/aabas78
قصائد لكل ايام محرم اشترك بالقناة

2
محرم الحرام

   نزله حماسيه 

خادمك خليني.   
خادمك سميني 
----------------------------------
ناذرسـنيني وحـياتي وناذر أيام العـمر 
قبلي خادم يامامي وأطلب بدمعه الأجر 
سيدي لو قصريت بهايه ارجوك العـذر 
خدمتك فوز ونجاه ومنجه من يوم الحشر

بصايتك غطيني. 
خادمك سمــيني 
---------------------------------
حسين لو تهت بحياتي فدوه لا تنساني 
أنه اضـيع بلا خدمتك من اعوفك إني 
 أنه خادمكم انادي وخدمتك عنواني 
لليناشـد عن وجودي بكل عزه يلكاني

فدوه لا تنسيني 
خادمك سـميني   
-----------------------------------
الدنيا ماترحم يويلي المغريات هوايه 
خاف ازلن عن خدمتك وخسر انه بهايه 
سيدي جرني بيمينك فدوه هايه وهايه 
ماأعيش بلا خدمتك منطي أنه حجايه 

خدمتك تنجيني 
خادمك سـميني   
-----------------------------------
حسين سرك مايعرفه بس جلاله الـعالي
بالي مشغول بغرامك ماتفارك بـالي 
أنته غـالي ومانعـوفك ياحبـيبي الغـالي 
شنهو حالي بلا خدمتك مااوصـف حالي 

ياحياتي وديني 
خادمك سميني 
--------------
لما سلك دربك يويلي خسر عمره ودينـه 
لما خدم ويه التخدمك شنهو نفع اسنـينه 
لماجرت من عينه دمعه عميه كون ابعيـنه 
وقسم برب الُجلااله حسين عايش بينه 

أســمك يأذيـني 
خادمك سميـني 
-----------------------------------
لوكرب شهر المدامع أنصب الجرحك عزاء 
بكل زمن نحي المجالس عل وعد وع الوفاء
غاليه ادموع النواظر  بس الك يحـله البكاء 
واغـريـباً واســليـباً يـــرتـفــع صـوته النـداء 

 تجري دمعه عيني 
خادمـك سمــينـي 
-----------------------------------
كلمات 
مرتضى مكطوف الموالي


https://www.tg-me.com/aabas78
قصائد لكل ايام محرم اشترك بالقناة

قصيده للخدمه

                        لاحيـاة ابــلا حسين
                        ابدونه نبقـه لاجئين
            دولة الخدمه نجاة_ادخلـوهــا امنيــن
===============================
                 دولــه ابـلا مطـار ولا جـوازات
                 الـيطبهه لازم يحصل كـرامـات
                 نــشيد الـبيهه لا للذلـه هيهـات
                 غيـر حسين ما تسمـع هتافـات

    ياحسين..صيحه تطلع من گلبنه والدموع وياهه
    ياحسين..صرخة الحق عله الظالم يفتهم معناهه

                         سيـدي كله تصيح
                          ياغريب ويا ذبيح
            هالاسم سر الحياة_ادخلــوهـا امنيــن
===============================
                  علـه المـا عـاش بيهــه ياحـرامات
                  عدل بيهه الخدم ما ينحسب مات
                  سـوه كلنـه خـدم مـاكـوا مـقامـات
                  الـرفـعـوا شـانهـم صـفــوا النـيـات

       مخلصين..الـي مـادور الشهـره ولا فلـوس ولا مقـــام
       مخلصين..الخادم الي ابگلبه جمره طافره من الخيام

                         اليخدم ابحرگه وضمير
                         عــد أبــو الـيمــه اميــر
             الدمع بخدوده يبات _ادخلـــوهــا امنيــن
===============================
                 حبيب الواگف يسجل استمارات
                 تتعيــن صــدگ وابــلا شهــادات
                 مـاكـوا رشـوه بيهـه ولا علاقـات
                 بـس لازم ابـصــدرك اثـر لطمـات

  لاطمين..اچفوفك البيهه توقع گون لطمن عالصدر
  لاطمين..ابكثر  ما دكّنّه صدرك  ينحسب الهن اجر

                       تنقبـل بشگـد بچيـت
                       لو عله صدرك قسيت
           البالمآتم حاضرات _ادخلـــوهـا امنيــن
===============================
                  مــا بيـها مـظاهـر لا شـعـــارات
                  دولته احسين بانيهه ابمساوات
                  وزع كـربلـه اعـليـنـــه عـقـارات
                  خَــلط ويـاهــه دمـه للمصــلات

       ساجدين..عله تربه البيهه  دمه السايل ابيوم الطفوف
       ساجدين..بيهه ريحت نحر طفله وللمرض دم الچفوف

                          كــربلــه للـزائــريـــن
                          قبلة الحب والحنين
         جنت الله بكل صفات_ادخلــــوهــا امنيــــن
===============================
                 مـــابــيــهـــه مــناصــــب لا وزارات
                 الـمـرشـح يـصعـد ومـو بانـتـخابـات
                 اعتمـاده يصير موش ابكثر الصوات
                 يـصعـد بيهـه الـي يحصـل الدمعـات

       حاضرين..وين  مانصبوا  عزيه يحضر  ودمه يسيل
       حاضرين..البالزياره گلبه يسبگ جدمه يتعنه الکفيل

                         للكــلام استمـع زيـن
                         رشح ابـدمعة العيـن
          اتنفعك ابيوم الممات_ادخلـــوهـــا امنيـــن
===============================
                  وجه واحد الخدمه بلاسياسـات
                  بـس بـيـهـه عـقـوبـه للـخـيانـات
                  البيهه يخون خل يتلگه سطرات
                  من عبـاس وچفـوفــه الثگيـلات

    خاينين..حسين مايطردله واحد وحنه بيهه اشكد نعيـل
   خاينين..ايکضه من ايده  ويرجعه الشافه عن دربه يميل

                          گبـل كلمـت تائبيــن
                          تلكه الك فاتح ادين
         الخاطرك سلبوا خوات_ادخلــــوهــا امنيــــن
===============================
✍حيدر الشغانبي


https://www.tg-me.com/aabas78
قصائد لكل ايام محرم اشترك بالقناة

مرتاح ،، بهاي الخدمه وياك
مرتاح ،، لا تشغلني وإنساك
جرحي بكبر السنين
وكالو راحتك ويــن
كلت بخدمة حسين ،، مرتاح ،، مرتاح

١-
حسين ،، صاحب من صدك
حسين ،، صـلـطــان العشك
حسين ،، يـومــيــه احترك ،، بعتابك
روح ،، ودخــل يا كلب
روح ،، يم أعظم محب
روح ،، من ذاكه العذب ،، بمصابك

عشك صدك صدك عشكيته
بكلــب عـذب عذب ظميته
الــــعــمــر الـه الـه نذريته ،، نذريته

صحراء ،، كلبــــي وانته بستان
صحراء ،، العافك والله خسران
عايش هاي السنين
الخير العندك امنين
كلت بخدمة حسين ،، مرتاح ،، مرتاح

٢-
نشال ،، راسي بخدمتك
نشال ،، ذنبي برحمتك
نشال ،، كلبي بشوفتك ،، من ضلعه
خير ،، مكوم بالصحن
خير ،، من ام الحسن
خير ،، لكل صاحب جفن ،، صب دمعه

ضوه شفت شفت بجفوفك
صحت بعد بعد مـا اعوفك
شمع ذبـت ذبـت بحروفك ،، بحروفك

يا ماي ،، من اعطش تلفي للروح
يا ماي ،، يـمــــك تشفه الجروح
مالك روحي صوبين
واكتـب عالحياطين
انـه بخدمه حسين ،، مرتاح ،، مرتاح

٣-
حسين ،، للضلمه ضوه
حسين ،، للخنكه هوه
حسين ،، للمرضه دوه ،، نظراته
حسين ،، غالي ومنفرد
حسين ،، احله من الورد
حسين ،، تحظر باللحد ،، وناته

اركضت رحت رحت يم بابك
عطـــــــــر اشم اشم بعتبابك
شفــه الدوه الدوه بــــترابك ،، بترابك

صحبان ،، مصادف كلش هـــــواي
يحسين ،، شكد شفتك وفي وياي
يمـــك يكمل الدين
مــــاكو مثلك اثنين
كلت بخدمة حسين ،، مرتاح ،، مرتاح

٤-
هذا ،، حلو حب القلب
هذا ،، ميت ينحسب
هذا ،، ما يسوه العتب ،، ونعاتب
كون ،، انه أفدي العمر
كون ،، اللطم عالصدر
كون ،، كلبي المنكسر ،، ما طايب

بچه الدمع دمــــــــع بالحضـره
ومـنـــك ردت ردت بس نظره
كبتــك شمس شمس للــفـقـره ،، للفقره

يحسين ،، يمك انـــــه واشتاك
يحسين ،، يموت روحي الفراك
لوحدك تارس العين
ورافع هاي الايدين
كلت بخدمة حسين ،، مرتاح ،، مرتاح

٥-
وين ،، صرت بخدمتك
وين ،، جانت رحمتك
وين ،، روحي العشكتك ،، مرتاحه
ضاع ،، عمري من هله
ضاع ،، وغيرك ما اله
ضاع ،، كلبي بكربله ،، مفتاحه

ريت السحك سحك بضلوعي
كون الجمر جـــمــر بدموعي
صـــار اللطم لطم موضوعي ،، موضوعي

خسران ،، كلمن عاف الحسين
خسران ،، بس هايه الجلمتين
بــس نهرك شراعين
ماعيد انــــه مرتين
كلت بخدمة حسين ،، مرتاح ،، مرتاح
__
حسين عبد الجليل المالكي


https://www.tg-me.com/aabas78
قصائد لكل ايام محرم اشترك بالقناة

وصية بعد الموت

باجر لو متت أوصيكم احبابي
جمعولي القصايد كلها بترابي
ــــــــــــــــــ
لو حان الأجل أوصيكم بجانب
جمعولي القصايد بالقبر راغب
باجر انسئل لآل النبي شكاتب
وبـ أبياتي باجر يصبح اجوابي
ــــــــــــــــــ
من انزل حفرتي وتعتبر بيتي
خلولي قلم واوراقي بوصيتي
باجر من اموت والگة حريتي
بالبرزخ اكمل لوحة اكتابي
ــــــــــــــــــ
باجر من يجيني حسين ابو اليمة
اقرالة شعر عن حنصره ودمه
واقرالة اشتياقي لعالم الخدمة
لدموعي ولطمتي وحزني وثيابي
ــــــــــــــــــ
كتبوا اعله القبر خادم وابن خادم
كل عمري گضيتة اعله النحر هايم
مأتم ع القبر أوصيكم والازم
تنعون لمصابة مو على مصابي
ــــــــــــــــــ
لو رشيتو ماي بقبري والحفرة
ذكرو المات ضامي ودامي بالصحرة
جبدة تگطعت وشفافة متفطرة
واني استحي الماي يبلل اعتابي
ــــــــــــــــــ
خلو اعله قبر من جانبي الراية
لو رفت بصفي واعلم بهاية
يعني الاربعين وتمشي مشاية
ويحن قلبي بية واني بغيابي
ــــــــــــــــــ
الشاعر زين العابدين الشمري


https://www.tg-me.com/aabas78
قصائد لكل ايام محرم اشترك بالقناة

محرم 1447:
نعمه واجت بالخدام
(قصيدة للخدمه اول ايام محرم )
——————————————
نعمه واجت يالخدام..لازم نـصـون النـعـمه
مـره وتجيـنا بكل عام..هاي الأسمها الخدمه
كل ما علينا من تعود..نبديها بثياب السود
**
ناخذ عهد مـن هاليـوم…ونوفي بعهدنا انصونه
كل خادم ومخلص كون…ايلالي الدمـع بـعيـونه
يسـمع كـلامي ومـعـناه…يتـمـعن ابمضمونه
لازم يضحي المولاه…وخادمهم ايسمونه

دور عشگ غير حسـين..ما تلـگه مثله بدنيـاك
تبچيله دمعه من العين..يوم الحشر ما ينساك
كل شده يمك موجود..نبديها بثياب السود
*
كلمة شكر ما تكـفـيك…لا تكفي دمعة عـينك
تخـدم عـمر هم مـديون…شما تلطـم بچفيـنك
لجـلك تگـطـع عـطـشان…ورايح ذبـيح حسينك
صفيها نـيــتـك ويــاه…ولحگها باقي اسنينك

يمشي العمر ويخليك..وتالي بمشـيبك نـادم
حضـن التراب متانيـك..ومـحـد يگـلك خـادم
بعده الدرب ما مسدود..نبديها بثياب السود
**
لا تـنـغـر بـسـن دنـيـاك…كل مره لو يضحكلك
بـاب الـتـواضـع للـنـاس…يم السبـط يشفعلك
بالصـعبه كـل ما تنـخـاه…بالشده چف يفزعلك
جـربها وانـطي المقـسوم…باجر ضعف يرجعلك

اعـظم اجـر وزع مـاي..يالچـف يمينك خالي
هذا العمل أجره هواي..عند الحسيـن وغالي
وهو الگمر راعي الجود..نبديها بثياب السود
**
قوي العلاقه وي حسين…محـد ينفعك غـيره
شرق وغـرب دور الكون…ما تلـگه مثله ابديـره
ومضة ضوه بنص گبور…درب اليخدمه اينيره
مشعل وطـريق الاحـرار…معروفه هاي السيره

انصح صدگ وي مولاك..حـتى وي للـون اثيابك
واحـد محرم هالـيـوم..خله المصاب مصابك
وقـدم عـزا للمـوعود..نبديها بثياب السود
*
خير الله بالدنيا حسين…وغـصن انجـاة البيها
شمّا شحت انهـار الكـاع…من خـيره رد يسگيها
تموت الضماير بالـناس…وبـس يلتفت يحـيها
عـلـگـهـا بذياله الروح…الطول العـمر خليـها

والطمله صدرك موجوع..صدره نهشم بالحافر
وأجريها عالخد ادموع..باچـر تـنـقـذك بـاچر
عيش بدمعتك مسنود..نبديها بثياب السود
**
خادم اهل البيت(حــمــزه فـاضـل)


https://www.tg-me.com/aabas78
قصائد لكل ايام محرم اشترك بالقناة

نزلة
للخدمــــــــــة
💫💫💫💫
خليني بخدمتك .. يحسين ونعمتك
حسين حسين .. حسين ياحسين
🔹🔹🔹🔹
كلما هل الهلال .. بعيوني الدمع سال
ظلت صوره عالبال .. يحسين الطفوفك

من ننظرله كل عام .. يرسم حرك الخيام
وي زينب والايتام .. مذبوح وتطوفك

بالحومه شافتك .. ياخويه نادتك
حسين حسين .. حسين ياحسين
🔹🔹🔹🔹
بمصابك يمذبوح .. تكثر بينه الجروح
ماتشفه تره الروح .. ياروح الزجيه

بكَلوبنه تشب نار .. وبحركه ودمع حار
لمن نذكر الصار .. نتمنه المنيه

من حزو ركبتك .. والخيل السحگتك
حسين حسين .. حسين ياحسين
🔹🔹🔹🔹
كلما اشرب الماي .. جمره بصدري مولاي
عايش يبقى وياي .. يوم الغاضريه

من اذكر مجلس الشام .. باليقضه وبالاحلام
بكلبي يظلن سهام .. وشكد حسره بيه

واتذكر عيلتك .. بالغربه وندبتك
حسين حسين .. حسين ياحسين
🔹🔹🔹🔹
كَلبك عالكمر ناح .. لمن عالنهر طاح
هوني يانفس صاح .. نفسه شكد ابيه

تربات ام البنين .. وحزام ظهرك يحسين
انطاك عين وجفين .. وفاها الخويه

من الشايل رايتك .. منهجنه وفكرتك
حسين حسين .. حسين ياحسين
🔹🔹🔹🔹
اكبر نعمه عدنه .. شيعه احنه انوجدنه
والدنه وولدنه .. من نحضر مجالس

يالساكن بالگلوب .. ويه مصابك نذوب
حته تطيح الذنوب .. علمنه احنه عابس

يحسين وشيعتك .. محتاجه النظرتك
حسين حسين .. حسين ياحسين
🔹🔹🔹🔹
علي حسين المنصوري


https://www.tg-me.com/aabas78
قصائد لكل ايام محرم اشترك بالقناة

الخدمه المقدسه

كل الخدم تنهان عل بيبان تِلگاها
بس خدمتك نوماس رفعة راس شِفناها
احسين اليخدمك صار . مثل الرُسل ينزار
____

الرايد كرامه .. او رِفعة مَقامه .. لا لا يروح ابعيد
ابهاي الشعائر .. او هاي المنابر .. ايحصل الي ايريد
احسين ابخدمته .. تتعله انت .. حظ اومقام اتزيد
أخلص . تواضع .. اجري المدامع .. ابسط معاه الايد

نضف دليلك زين .. ويه احسين .. تتوفق
اتواضع مع الخدام .. طخ الهام .. تتوثق
اسمك يصير انوار ... مثل الرُسل ينزار
____

لحسين امامك .. سلم زمامك .. ميّت بدي غسال
عيش ابطفوفه .. چنك تشوفه .. واحچيله عن الحال
مدله انت ايدك .. گله آنه اريدك .. عمي او ابوي او خال
أحسين اشتريني .. وارحم ونيني ..ودمعي الي من دم سال

ماريد أنا أموال .. لا أحوال .. تتغير
رايد اضل وياك .. بس انعاك .. يموذر
گلب التوجر نار .. مثل الرُسل ينزار
____
الما عنده مثلك .. بالدنيه يهلك .. يحسين انا اترجاك
دنًيني يمك ... خليني اخدمك .. الزمني ابيمناك
دليني دربك ... تدريني احبك .. ضايع انا ابلياك
زيدني عَبره .. حسره اعله حسره .. من گلبي ارد انعاك

جمره ابدليلي اتفور .. يل منحور ... ما تطفي
لو ابچي الك نهرين .. لا يحسين .. ما تكفي
يامن مصابك حار .. مثل الرُسل ينزار
____

گله آنه جايك .. كلّي اعله مايك .. خذني ابرخيص السوم
بيّه تصرّف .. يلي انت اعرف .. بالامي والاشجان
خليني شاعر .. او عل منابر ... يرضيني كلشي الچان
وي ربعي الطم .. لو رايد انظّم .. شعر ابدمع واحزان

ليك الحكم والراي .. يا مولاي ..وابكيفك
آمر وانا الممنون .. والمفتون . ما عوفك
ابهاذي اوهيج الدار ... مثل الرُسل ينزار
____

للمولى گله .. كل خدمه ذله .. دونك يبو السجاد
خادمكم انجل .. حاشه ايتنزل. ... يتربع الامجاد
تاج او قداسه .. بالغيمه راسه .. سيد من الاسياد
واني رجيتك .. تحسبني ريتك .. منهم يبن الاجواد
الخاطر دمع الايتام .. بل خدام .. خط اسمي
ادخيلك يبو الاحرار .. گلبي احتار .. من همي
يلي تحامي الجار .. مثل الرُسل ينزار
____

امجربه او اعرفه .. مبسوطه چفه .. ميرد بشر حاشاه
كل التريده .. ايقدمه بيده ... ما خاب الأتعناه
الخدامه خيمه .. روحه رحيمه .. سبحانه من سواه
بل دنيا لمنه .. او بل اخرى النه .. للجنه نمشي اوياه

يشبه سفينة نوح .. بس مجروح .. يا ويلي
ميرد ابد طلاب .. من الباب ... يوميلي
وايكرّم الخطار ... مثل الرُسل ينزار
____

ابو فاطمة الطائي


https://www.tg-me.com/aabas78
قصائد لكل ايام محرم اشترك بالقناة

#قصائد_الخدمه_والخدام
#الليله_الثانيه


هلا يا شهر الخدامه يا ذخــــر يوم القيامه
كل سنه احنه امحزمين
حتى نخدم يا حـــسين
___"

للهلال احساب نحـــسب شـهر جوه يختلف
والشعائر فــرض عـــدنه وما يوصفها وصف
راسخه هاي العقيـده وعدنه هل خدمه شرف
شغف خدمة ابو الأكبر صــارت الخدمه شغف
والشهر لمــن يجيـــنه نبچي للــضحه ابنينه
وبينه يتعالى الونـــــين
حتى نخدم يا حـــسين
____

من يجي شهر الفجيعه انشـــوف كلها تستعد
فاطمـه منــــــچ العونه يم حــسن النه المدد
غير ابو اليمه وخدمته ماكــــــــو بالدنيا بعد
آخره ودنيــــــا نخـدمه وحبــه من سن المهد
خدمه بس بيها كرامـه يا شهر هل ابسلامه
باقيه ابطول الســـــنين
حتى نخدم يا حـــسين
____

رايـــه وي رايه نشدهه ونخدم حـسين الولي
ثوره يتكــــــرر صداهه صــرخه للحق تعتلي
ثورة الخدمه الشريفه خلـــي يـــسمع عاذلي
كل سنه نجدد عهدنه احزامـــنه حيدر علي
خدمه بس بيها معـاني كـــل سنه ليها نتاني
ليها ماخذنه الحــــــنين
حتى نخدم يا حـــسين
____

خدمة المگطوع نـحره باقيــــه طول الزمن
للشـهر شديـــنه رايـــه يالــــــــثارات الضـعن
يا حسين الصرخه تبقى ايـــام عاشور ابــتدن
دمعـــة العاشر مناره بالبچــــي اتغطي الجفــن
خادم حســــين يتــعله يعني خدمه موش سهله
عله الخدمه اموزعيـــن
حتى نخدم يا حـــسين
____

عدنه موعد وي محرم واللطم يومـــه گرب
تعب لحسين ورضيعه حيل يـسوه هل تعب
حسين ابو السجاد عدنه أغلى حتى من الذهب
وبصــفر ثوره ابدمانه بالمـــشي انونس الدرب
ثورة المـشايه باجـــــر زحــف نگصد للمناير
عهد نبقــــــــــى ثائرين
حتى نخدم يا حـــسين
__
الخادم المقصر ناجي ابو كيان الصالحي"
ونسالكم الدعاء لي ولوالدي

https://www.tg-me.com/aabas78
قصائد لكل ايام محرم اشترك بالقناة

للعليله عليها السلام 👇👇👇👇👇

الليلة الثالثة العليلة

الليله ثالث ليله من شهر الجروح
للعليله الليله خل نبچي أو ننوح
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الليله ثالث ليله يا شيعة علي
للعليله الـدمع من دم أيهلي
أتگول وحدي وعنّي راحو كل هلي
الدار وحشه وردت وياهم أروح
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الدار وحشه والدمع دم أيهمل
وما أظن بحسين يلتم الشمل
الفرگه ياشيعة وعلي ماتنحمل
هلي روحي أشلون أعيش أبلايه روح
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هلي روحي أشلون أنساهم وهيد
دار وحشه والدرب كلش بعيد
گمت أعد اليل وحسب من جديد
ومنّي آهات الحزن والهم تفوح
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
منّي آهات الحزن والهم خذن
روحي والـدلال مـا يتحمّلن
حيل أووجر بيه ياشيعه الزمن
الموت أحسّه أگبال عيني ضل يلوح
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الموت أحسّه أگبال عيني ضل يمر
الفرگه تكتل بعد ماعندي صبر
عگب أهلي والله مايسوى العمر
چن جبل مهدوم من عندي السفوح
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
چن جبل طايح أسفوحه أو منهدم
وسفه ظلمه ضلت أبيوت العلم
مو أبوضعي وعلّتي گمت آنه أهم
همّي بالراحو أو هدمولي الطموح
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
كلمات الشاعر والرادود عدي البصراوي


https://www.tg-me.com/aabas78
قصائد لكل ايام محرم اشترك بالقناة

نزلة ......... العليلة عليهاالسلام

.............................................


انه العليلة  أشكيلــــــــك  و اون   
بعدك يبو السجاد غاطيني الحزن
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
يابويه عفتوني وحيدة محيرة
ولشوفت اهلي هلبقيت محسرة
عافاني ابوي ورحل بيه ما درة
ليه المصايب اجن واتحزمن
ـــــــــــــــــــــــــــــــــــــــــــــــــــــــــــــــــــــــــــــــــــــــــ
وينك يبويه وتنظر حالتي
انه العليلة وبقيت بحسرتي
بويه المرض اذاني شاهد شدتي
وكثرت عليه ارداف يابويه المحن
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
لكعد يبويه انه اباب الدرب
وانشد عليكم الطالع واليطب
كلبي على فركاك نيرانه لهب
وشيطفي ناري عليكم واستكن
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
يابويه مو كتلي الأكبريعتنيج
ها كتلي لو يوم يومين ونجيج
يابويه وعدك وين هاي انه ارتجيك
لو حال بيني وبينكم جور الزمن
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
يابويه عبد الله انه اشتاكيت اله
مشتاكه اهز مهده وبنحره اقبله
انه الجنت بحماك دوم مدلله
وأخلاف عينك صرت ابجي واحن
ـــــــــــــــــــــــــــــــــــــــــــــــــــــــــــــــــــــــــــــــ
طالت علي الأيام وانته بغيبتك
وكل يوم أبقه اتنطر انه ألجيتك
يا بويه لا متهون أبدا فركتك
واتسله بالدمعات لو ليلي يجن
ــــــــــــــــــــــــــــــــــــــــــــــــــــــــــــــــــــــــــــــــــــ
خادم الحسين
الشاعر مذكور العلياوي


https://www.tg-me.com/aabas78
قصائد لكل ايام محرم اشترك بالقناة

موشح العليله



فاطمه اتسولف وتحچي احزانها
ياعليله اتشابه بنيرانها
١

طفله وازغيره تشاهد يا مصاب
بالمرض عافوها وبنار الغياب
گاعده ابيت الحزن تنظر الباب
بلكي واحد يحضر من اخوانها

٢

ماخذاها حسين وبنار الدمع
طفله ذابت بالحزن مثل الشمع
ايد تمسح دمعه ايد اعله الضلع
ضلت وتتخاطف بألوانها
٣

سولفت وي الهوه بدمعت ونين
انه اشوفك يالهوه مثلي حزين
شنهي ماسامع خبر عن الحسين
وكربله ماتعرف بعنوانها
٤

فاطمه واتسولف بدمع الهجر
وعايشه بنار المدامع والصبر
لشوكت يحسين ابقه انتظر
خبر وديلي يعزها وشانها
٥

خبر وديلي اذا شح الكلام
وخاف ماتگدر ألي ودي سلام
وي الهوه اليوصلني يابويه وانام
وباقيه ابنيتك بنفس امچانها
٦

گلبي لاچمني يبويه اعله البعد
خاف ما ترجع أليه وماترد
ابقه انوح وابچي بويه اعله الورد
وفاطمه الما تنتهي اشجانها

٧

خبر موتك وصل يا بويه ألي
بالعمر يحسين من بعدك شلي
انه اموت بموتتك يابو علي
ياصلاة الروح ياقرآنها



لاتنسون والدي وابني عباس من الرحمه والغفران
خادمكم رياض الرسل الجابري


https://www.tg-me.com/aabas78
قصائد لكل ايام محرم اشترك بالقناة

محرم 1447ه‍-2025م
قصيدة الليله الثالثه

مختصر الكلامي راحو هلي وعمامي
وانا المرض هد حيلي ضايع نهاري بليلي
راحو هلي وعمامي
؛★★★★★★★★★★★★★★★★

راحو وخلوني هناه وظليت اجر حسره وآه
من ودعوني
بين الوجع والفرگه تحرگ الروح الحرگه
عالفارگوني

بويه حسين صحت بعالي صوتي
كونك ما ترد معناها موتي
مخنوگه يبويه بظلمة الدار
چا وين الگمر چا وين اخوتي

سافرت ومخليني وانا صحت تانيني
من غيرك يتچيلي ضايع نهاري بليلي
راحو هلي وعمامي
؛★★★★★★★★★★★★★★★★

ظليت اباوع لبعيد بلكي يأشرولي بإيد
والحگهم اني
انبح صوتي من الصايح تانيني ها يالرايح
ما جاوباني

يالماشين لديار البعيده
إذا واحد سمعني يردلي اريده
لا تمشون وتعوفوني بالدار
اخذوني مثل ما خذتو حميده

تانوني اترجاكم خلّوني اروح وياكم
يا ويلي آ يا ويلي ضايع نهاري بليلي
راحو هلي وعمامي
؛★★★★★★★★★★★★★★★★

عالضعن صدت عيني وناديت ها يحسيني
شو حمليتو
بس انا محد گلي ومحد محضّر رَحلي
چنكم نسيتو

بويه لا تگول بدوني ماضي
بعد عندي وكت اجمع غراضي
جاوبني الصراحه بويه گلي
اخافن عني انتَ موش راضي

كونك تريد وداعي ما حسّبت بوضاعي
يا بويه لتصيحيلي ضايع نهاري بليلي
راحو هلي وعمامي
؛★★★★★★★★★★★★★★★★

كلمن غراضه ململم وشالو بليل المظلم
وانا اباوع
سالت الدمعه بخدي يخلوني ليش الوحدي
بالهم انازع

مشه عني الضعن وانا اناظر
واگول تهون بلكي يجون باچر
اصبّر روحي گوه وادري روحي
بيها فراگهم چم حفره حافر

وابعدو عن عيوني شگد صحت ما سمعوني
يا روحي همچ شيلي ضايع نهاري بليلي
راحو هلي وعمامي
؛★★★★★★★★★★★★★★★★

كم شهر ظليت انطر حد ما سمعت مخبّر
يهل المدينه
صاح وذبحني بوضعه ذبحو حسين وربعه
وتيسرينه
لطمت الراس واصرخ يا هضيمه
بعدني زغيره ليش ابقى يتيمه
ردت استقبلك بالورد يا بوي
تالي استقبلت بلوه عظيمه

ردو اطفال ونسوه بس الشكل مو هوه
واحد ردت يحچيلي ضايع نهاري بليلي
راحو هلي وعمامي
؛★★★★★★★★★★★★★★★★

استقبلتهم بالبيت كل واحد أسأل ظليت
عن الرزيه
وانشدت زينب عمتي يا عمه چا وين اختي
ماكو رقيه

وين اختي الحنينه ما شفتها
تشبگني وتصبّرني ردتها
ردتها تخفف اعليه همومي
شمحلاها يعمه سالفتها

هاي النهايه المره من عمري وشمنتظره
يا دمعه من دم سيلي ضايع نهاري بليلي
راحو هلي وعمامي
؛★★★★★★★★★★★★★★★★

جعفر عطيه البزوني

https://www.tg-me.com/aabas78
قصائد لكل ايام محرم اشترك بالقناة

بين الفركه والحسره       بين الدمــــعه والعبره
مهمومه العليله    مهمومه العليله
***

بين الحسره والفركَه  بين الونه والحــــركَه  مهظومه واوحيده
روح الطفله تتكطع   بنار الغربـــــه تتلوع   واللجــــمه شديده
جرح المااضن يبره   وكسر الماجبر كسره   والراح شــــيعيده
        وعين التبجي ماترضه  مايهدا الدمع لحظه  من نوحه ومسيله      
مهمومه العيله
***

تفتر ماغدت تكعــــد   بكل اللي يمر تنشــد  ماشفت الغوالي
ابنيه وراحت احبابي  فوك العله وامصابي عن اهلي سؤالي
تكتل محنــــة الغربه   والفاكَد تعــب كَلبه  والماعنـده  والي
     لاجت روح المفارك   والمتعلـــــم وعاشك  شـــــــيبرد غليله    
مهمومه العليله
***

شينوم جفــــــن طفله   بليل العبره والعله  للشــــــــــالت اهلها
هاطول الوكت لومر   بالعين الجرح يكبر  مايرجــــــــع املها
بيمن هيه تســــــــله   عله امجلبه بعــــله   والهـــــــــم الكتلها
     عالباب النظر شابح     تنشد بالاجه ورايح   والونــــــــه ثجيله   
مهمومه العليله
***
لله الشـــــــيله ترفعها    ودعوه الباري يسمعها   وكـــت المغربيه
اتصلي وتسجد الربها    واحد هيـــــه مطلبها    من رب البـــريه
ترجع سالمه الراحت   جانت فاطمه ارتاحت   تدعـي بكل مسيه
     بجاه الدامي محسنها   والكسرو ضلع منها    بالزهــــره الجليله    
مهمومه العليله
***
ميته والوجه شاحب    وجانون الكلب لاهب    من حزن النوايب
كبرت والعمر شيب    طفله والجبـد عطب   من كثر المصايب
امحدبه وذبلت الورده   راح الغالي شيرده    شيرجــع الحبايب
       ماتحمل ألـــــم لوعه    روح الطفله مفجوعه   ياهـــو التشتكيله     
مهمومه العليله
***


الشاعر ابو علي الركابي


https://www.tg-me.com/aabas78
قصائد لكل ايام محرم اشترك بالقناة

مقدمه

راحو هلي     وشضل الي     فارغ طلع
شو محملي

ليش من دون المحامل   محملي خالي
وليش ماخذني ويخوتي   والدي الغالي
انه طفله وشرد اسولف      هسه عن حالي
انه متيقنه سفرهم                مااله تالي
دمعي يهل    خالي النزل     هم الگلب   ماينجلي

هيچي معقوله عشرتي    عاالاهل هانت
من مشت عني رقيه       مدري اشگالت
من بده يحمل ضعنهم       بسمتي ماتت
والصور ذيچه بعيوني      لحضه مازالت
تركو اثر   ضلت صور    وسط الجفن   دوم وعلي

والدي شو يلتفتلي            ويوگف اهوايه
شما جزوعمي اشوفه          يعلي با الرايه
وينه الي وصلي الهم           هاي الحچايه
خاف مليانه الهوادج            امشي مشايه
حافي الجدم    لامايهم    لاموشرط  فوگ اعتلي

مامصدگتهن عيوني         حملو عني
والمشن وسط المحامل    والله بچني
عمتي وسكنه ورقيه       هل يودعني
يبچن ويهمل دمعهن        من يصدني
بيه صفن     يتوادعن   وبعد المشن   مدري شلي

ضلت اعيوني وراهم     شدتي شده
ردت عبدالله عزيزي       واحد ايرده
ارد اهز مهده واشمه      مره لو وحده
كون اصيرن حنه بيده   ولحظه مااهده
فگد الطفل    لامو سهل     گلبي القهر   مالي ملي

من مشو لليوم صارت    حصتي الدمعه
والدي امشي لمكانه          واگعد وانعه 
بيتي اضلم ماينور           لو الف شمعه
طلعت الروح ابسفرهم      ساعة الطلعه
ذاك الظرف  ماينوصف   لجلي بچه  هم عاذلي

الشاعر سعدالعبودي

https://www.tg-me.com/aabas78
قصائد لكل ايام محرم اشترك بالقناة