قصيده نزله للرضيع
مجلس ليلة ١٠ محرم

بسهم المثلث يعبدالله الرضيع
صوبو كَلب الرباب
صوبو كَلب الرباب
.....................................
ابد مو بس نحرك الصابه السهم
من اديهم واصل اطراف الخيم
صوبو كَلب امك وحيله انهدم
والجبد نصين يالغالي انجسم
مثل ما نحرك صبح ضامي وكَطيع
صوبو كَلب الرباب
.....................................
اي يعبدالله الحقد نفس الحقد
نحرك انصاب ومرد لُمك جبد
سهم واحد والهدف لا مِن نِعِد
ينتهي عمر امك وعمر الورد
ابسهمك ايريدون عمر امك صريع
صوبو كَلب الرباب
.....................................
غصنك ازغير وحمل ثكَل النبل
وبخضارك طاحت اسهام النذل
رفرفت واوراقك ايهزهه القتل
ياطفل وامصابك ايشيب الطفل
مارعوك ولارعو عمر الربيع
صوبو كَلب الرباب
.....................................
ضامي وشفافك وضوء الانبياء
مو وكت نبله وتسيل اطهر دماء
كون ماي ويكشف حسين الرداء
وهذا حقك سيدي لا مو عطاء
من رجعت ودمك الطاهر نجيع
صوبو كَلب الرباب
.....................................
ماهوه الدم بس قبل روحك عرج
للسمه خاطر يتممهه الحجج
تارك ابكَلب اليودونك وهج
وجمر فكَدك بالعطش راح اندمج
ياشهيد بهالامر ربنه سميع
صوبو كَلب الرباب

الشاعر ياسر العارضي


https://www.tg-me.com/aabas78
قصائد لكل ايام محرم اشترك بالقناة

عگيلي الليلة العاشره

زينب هاي الليله ابحسره
وابخيمتها ادموع او عبره
_

الهن دويه الليله الخدّر
خافن . والدلال اتفسر
باچر موت او گطعة منحر

والكل باچر ينحز نحره
زينب هاي الليله ابحسره
___

زينب تتلوه ابحسرتها
واحسين اتعنه الخيمتها
او عباس ايعدل شيلتها

او يمسح بل دمعات الحمره
زينب هاي الليله ابحسره
___

گاللها احسين اعلي هونچ
لا تسفح دمعات اعيونچ
ما دامي حي ما يصلونچ
لا واقسملچ بامي الزهره
زينب هاي الليله ابحسره
___

او كافلها ايحاچيها ابهِمه
زينب انتي اربات العصمه
برگبتي يا زينب ذمه

اليوصل حدچ اكسر ظهره
زينب هاي الليله ابحسره
___

گلبچ لا يرجف يا زينب
مادامي حي فنه اليگرب
وانه المنّي مامش مهرب

من ازعل تغدي الطف حمره
زينب هاي الليله ابحسره
___

كفي ادموعچ يابت حيدر
مصباح العاشر من ايطر
شوفي افعالي او گلبچ ينسر

من اركب لكحيله الشگره
زينب هاي الليله ابحسره
___

نعمين اتگله ابكفالي
يل ماغيرك شاغل بالي
خويه اعذرني او اعذر حالي

كل خوفي لا ننگاد أسره
زينب هاي الليله ابحسره
___

ابو فاطمة الطائي


https://www.tg-me.com/aabas78
قصائد لكل ايام محرم اشترك بالقناة

قصائد محرم ١٤٤٧ هجري
(ليلة العاشر)
( عن لسان حال زينب عليها السلام)

آه يا ليلة العاشر
ريت ما يلفيلي باچر
.............

ريت باچر لا يجي لا شوفه
كون لا يغبش علي بسيوفه
لا اريده و لا اريد طفوفه
بيه عباس تطيح چفوفه
حسين صدره يدوسه حافر(٢)
............

للمدينه ياهو ليرد بينه
الگبر جدنه منو ليودينه
گبل متهد الجيوش اعلينه
يطيح جاسم واستمع لونينه
گبالي الاكبر وذر صاير(٢)
........

عالطفل حرملة يرمي سهامه
حسين ابنه ينذبح گدامه
گبال عينه تنتهي احلامه
الرضيع السهم يطفي ايامه
والدمه من نحر فاير(٢)
............

شلون بيه لو گضو خواني
بالطفوف اتذبحوا ولياني
من بعدهم ياهو يتلگاني
خلافهم تهجم علي عدواني
وليه توليني العساكر (٢)
..........

ينذبح لحسين بالطف ضامي
اتصير سوده خلاف اخوي ايامي
شلون لو حرگوا عليه خيامي
گبال عيني تنضرب ايتامي
حرمه وحدي بلايه ناصر (٢)

...........

لا حسين اليبقى حِسه ويايه
لا كفيل العندي لا من رايه
وحدي والعدوان حولي هوايه
هنا احس جارت علي دنيايه
شلون يحدي ضعوني فاجر(٢)


تم بفضل الله
رائد محمود العامري
٢-٦-٢٠٢٥

https://www.tg-me.com/aabas78
قصائد لكل ايام محرم اشترك بالقناة

محرم 1447ه‍-2025م
ليلة 11 محرم

ليل مظلم والعده حرّاسنه
بعد ما ذبحو اهلنه وناسنه
؛★★★★★★★★★★★★★

ليل مرعب ليل موحش بالظلام
شلون نگظي الليل ما عدنه خيام
والحرس غربه ولا منهم سلام
الليل وگفه نخلصه ما نگدر ننام

يا زلم تحرس بعد عبّاسنه
بعد ما ذبحو اهلنه وناسنه
؛★★★★★★★★★★★★★

لا زلم ظلت وتفزع لو نخيت
الظهر فوگ الغبره كلهم ودعيت
شصار بيه وبين عدواني مشيت
تعذبيت هواي والله تعذبيت

حتى ما نگدر نجر انفاسنه
بعد ما ذبحو اهلنه وناسنه
؛★★★★★★★★★★★★★

تكفليت اليوم باطفال وحرم
بعد ما عالشاطي ظل راعي العلم
والحسين من الطحن جسمه انهشم
بس علي السجاد ظل مبلي بسقم

ما بقى والي وتهدم ساسنه
بعد ما ذبحو اهلنه وناسنه
؛★★★★★★★★★★★★★

اطلع بهالليل ادور عالولي
وانا اصيح احضر البنتك يا علي
بويه شوف بنيتك بهم تبتلي
ياهو بعد الگمر كافل محملي

شلون بين اجناب نرفع راسنه
بعد ما ذبحو اهلنه وناسنه
؛★★★★★★★★★★★★★

امشي واعثر والجرح يتبع جرح
بس اريد اوصل حسين المنذبح
ماكو من اهل الرحم واحد يصح
بس ينزل راس اخوي من الرمح

حسين دلّانه عليه احساسنه
بعد ما ذبحو اهلنه وناسنه
؛★★★★★★★★★★★★★

ذن بنات حسين يتنن جيته
ما مصدگات الى الآن بموتته
هاي بنته رقيه رادت شوفته
تگلي ابوي هواي طالت غيبته

الظهر آخر مره اذكر باسنه
بعد ما ذبحو اهلنه وناسنه
؛★★★★★★★★★★★★★

جعفر عطيه البزوني

https://www.tg-me.com/aabas78
قصائد لكل ايام محرم اشترك بالقناة

اجمل صلاه بالعمر * چانت صلاة الظهر
چي بيها الحسين
ــــــــــــــــــــــــــ
وره حسين اجمل صلاه لمن وگفنه
حسين كل تكبيره منه نحسها جنه
يوم عاشر للجنان حســين صفــنه
بعــد مو حگـنه نضـحيله بعمــرنه
متروسه سجدة شكر * چانت صلاة الظهر
چي بيها الحسين
ــــــــــــــــــــــــــ
حلوه چانت هالصـــلاة و بيها فزعه
ابخمس اصابع چفه ابو الاكبر يرفعـه
حسين چان شگد حلو المحبس بصبعه
هاي اخر دعــوه والظـــالم يگطــعه
اخر صلا وينبتر * چانت صلاة الظهر
چي بيها الحسين
ــــــــــــــــــــــــــ
مو صلاة الخـوف صليناها خـلفه
منو ايحس بخوف والكافل ابصفه
شگد حلو العبـاس لمن شال چفـه
ابچفه چن شايل نهر واخته التحلفه
وآخر صلاه للخدر * چانت صلاة الظهر
چي بيها الحسين
ــــــــــــــــــــــــــ
هالصــلاه منها العدو گام ايتردد
نوبه يدنه ونوب من عدنه ايتبعد
الصف الاول شاف بي واكف محمد
چنّه طه ايگوم مثله ومثله يگعَد
الخلّت عدونه ابذعر * چانت صلاة الظهر
چي بيها الحسين
ــــــــــــــــــــــــــ
بهالفـرض واگـف بدر . تـم بكماله
يندعي وشمس الله غارت من جماله
علگت اشموعه السمه من چفه شاله
چي بلا حــنه المَلـَك شـافه وبچـاله
آخر فرض للبـدر * چانت صلاة الظهر
چي بيها الحسين
ــــــــــــــــــــــــــ
تچوي بينه الگاع من نسجد عليها
صح رمل بس الجنان انشمها بيها
نصلـّـي والارواح چنّه محضريها
افتحنه إلها گلبونه وفتحت اديها
إنصلـّي ورمح ينشمر * چانت صلاة الظهر
چي بيها الحسين
ــــــــــــــــــــــــــ
حلوه چانت واحله صارت بالنهايه
من نسلــّـم يبتدي فـرض المنــايه
حسين گال آخر صلا نصليها هايه
جدي گلي المغرب تصلّو . ورايه
تنطينه عزْم وصبر * چانت صلاة الظهر
چي بيها الحسين
ــــــــــــــــــــــــــ

الشاعر مهدي التقي


https://www.tg-me.com/aabas78
قصائد لكل ايام محرم اشترك بالقناة

#ليلة_الوحشة

ليلة الحادي عشر. ليلة احزان وخطر
متنه من كثر القهر. ذبحو حسين
٠٠٠٠٠٠٠٠٠٠٠٠٠٠٠٠٠٠
من يوصّل للنبي وحامي الحميه
خبر مفجع والحدث بالغاضريه
ذبحوا حسين بحقدهم ال اميه
وداسوا بصدرة حوافر اعوجيه
حركو علينه الخيم. فرّت اطفال وحرم
من بعد راعي العَلَم. نتّجه وين
٠٠٠٠٠٠٠٠٠٠٠٠٠٠٠٠٠٠٠٠
چلچل الليل بضلامه واحنه غربه
شلون احميها اليتامه والله صعبه
الليل موحش والگمر مكطوع دربه
الچان يحرسنه وكع ونصاب گلبه
خيمه ماكو ولا خدر. وسفه يحرسنه الشمر
باجر بنوگ الأسر كلنه ماشين
٠٠٠٠٠٠٠٠٠٠٠٠٠٠٠٠٠٠٠
ذاك اخوي حسين جسمه مگطعينه
وبحوافر خيل صدره مرضرضينه
والكفيل عله النهر مطفيه عينه
الليله من يحرسنه يا ناس انسبينه
عيله مجتوفه بحبل. منّي ولآخر طفل
لا اخو عندي عدل. ويلي ميتين
٠٠٠٠٠٠٠٠٠٠٠٠٠٠٠٠٠٠
ترجف گلوب اليتامه وموحش الليل
بيها رهبه وخوف سوّت غارت الخيل
والله من كثر التعب ما ظل بعد حيل
مثل دم جروح اخوتي دموعنه تسيل
ويلي لو صار الصبح. ننسبي دمعه وجرح
راسك براس الرمح ياضوه العين
٠٠٠٠٠٠٠٠٠٠٠٠٠٠٠٠٠٠٠٠
هذه آخر ليله باجر للسبي انروح
والمصيبه انعوف اخوي حسين مذبوح
بالسيوف امگطعينه جروح بجروح
آه ميدفنون جسمه ويبقى مطروح
يا وكت بنت النبي. تمشي بدروب السبي
يحدي بيها الأجنبي للدواوين

سيد زيد الفحام
محرم ١٤٤٧هـ
____

https://www.tg-me.com/aabas78
قصائد لكل ايام محرم اشترك بالقناة

ليلة الوحشه

كربله كربله.. الليله اسمعي اعتابي
كربله كربله.. ليش اخذتي احبابي
ــــــــــــــــــــــــــــــــــــــ
كلشي مات بعيني لمن طاح اخونه
وجيت اليطلبله دم الناس اجونه
حركو الخيمه علينه وفرهدونه
أمن الركض والسوط كلش تعبونه

كربله كربله.. النار اجت لثيابي
كربله كربله.. ليش اخذتي احبابي
ــــــــــــــــــــــــــــــــــــــ
كربله وطيحة كمر هاشم جبيره
راح اخونه وراحت اوياه العشيره
طكو بعامود راسه ونزف غيره
وانمسح اسم الاميره وصرت اسيره

كربله كربله..والشمر سلابي
كربله كربله..ليش اخذتي احبابي
ــــــــــــــــــــــــــــــــــــــ
كربله وحتى الطفل ذبحو ضحكته
وبقت من الضربه  تتلولح ركبته
رغم ماميت يناغيلي سمعته
زينب ومن القهر وجهي لطمته

كربله كربله..  والهظم دك بابي
كربله كربله..ليش اخذتي احبابي
ــــــــــــــــــــــــــــــــــــــ
فكد الاكبر كّبر بروحي النواعي
والشمع من عكب جاسم ماله داعي
كربله ايريد الزمن يلوي ذراعي
ياهو الايخلصني من حزني وضياعي

كربله كربله.. الطف صبح محرابي
كربله كربله. ليش اخذتي احبابي
ــــــــــــــــــــــــــــــــــــــ
ابليلة الوحشه اليفكدون الغوالي
يعلكون اشموعهم واتضل تلالي
وانه ماواحد بجه اوياي وقرالي
يادلالي الضاع وينك يادلالي

كربله كربله.. مني ضاع احسابي
كربله كربله..ليش اخذتي احبابي
ــــــــــــــــــــــــــــــــــــــ
وجهت وجهي وصحت يابوالمحنه
ياعلي وينك يبوالحمله افزعلنه
احسين ابنك احظر الليله وادفنه
الحوافر من سحكهن كطعنه

كربله كربله.. منج استغرابي
كربله كربله..ليش اخذتي احبابي


الشاعر محمد الجماسي

#اللهم_عجل_لوليك_الفرج

https://www.tg-me.com/aabas78
قصائد لكل ايام محرم اشترك بالقناة

عزيز امه انسحك بالخيل
واجته اخته تلمه بليل
ماخذهه التعب كل حيل ما بيهه
1
من سابع سمه وينظرهه رب الكون
كعدت يم اخوهه ابلايه شوف ام عون
حارت جسم اخوهه اتلمه مدري اشلون
مسحوك اعله طوله وما بقتله امتون

حارت … تجمع ،،،
جسمه ابيا حيل
صاحت … يارب …
طشروو بالخيل

طشروو خيرك اعله الكاع ... وكل حافر اخذله امتاع
من اضلوع اخوي الداست اعليهه
............2............
أجت بس ما اجه وياهه يويلي الحيل
وخطوات الدرب كظتهه عثره بليل
متّربه العبايه وساحكتهه الخيل
كوه اجر نفسها والطريق اطويل

لطمت ،، ونت ..
لحسين اهواي
أوصلّت … وحشه ..
الموته ابلا ماي

توضت زينب بدمعات
اوقرتله الفاتحه لوعات
وصلاة الوحشه صلّتهه بنواعيهه


_3_
من بعد الدواره الدورتهه اهواي
وصلت يم اخوهه الفاكده اجم راي
اجته وجايبه وياهه طاست ماي
تكله اكعد اروي اضماك عوف اضماي

جيتك .. خويه ..
اتكله بعنوان
اكعد … واروي…
الجبد العطشان

جبت الماي إلك يحسين
بس راسك أجيبه امنين
اشربك ماي من النحر تاليهه


==4==
بدت تجمع بخوهه الما بقاله امعين
واول شي تجمعه رادت الضلعين
ما كدرت تلمهن مارديهن زين
ظلت بالأرض تحفر تدور حسين

بلكت … تلكه …
أشويه من المات
حفرت .. شافت ..
ضلعه ولجمات

يصب نحره اعله طوله دموم
وجرح شابك جرح ملجوم
يفز حسين كل ما مدت ايديهه
...............

5
فرشت شيلت امهه ابمصرع المذبوح
وكل ساعه تشد منة جرح مفتوح
واتوخر التراب البل نحر وتنوح
ومن كد ما بجتله منهه طلعت روح

صورت .. زينب ..
تبجيله عيون
خلت ،،، كلشي ..
ينوح اويه ام عون

حزنهه اخته اعله ذبحه اهواي
بكثر ما عطشوه للماي
لذلك بجت الكون ابواجيهه
...............

6
ابسرعه الليله عدة عالعقيله ابساع
ما لحكت تودع حسين خوش اوداع
ولا كدرت تعوفه امطشر اعله الكاع
الوكت من عدهه ضاع بخنصره الي ضاع

خلَصت .. ليلة
حادي المقتول
أدور … خنصر
ضايع بالجول

عليهه ابسرعه طر الانهار
أتعبت بس ما لكتله آثار
ضاع الخنصر وظلت مآسيهه
::::::::::::::::::::::::::::::::::
كلمات الشاعر موسى الخادم

https://www.tg-me.com/aabas78
قصائد لكل ايام محرم اشترك بالقناة

(( #يم_المصرع )) 
………………………………………………………

يم المصرع .. راحت گوه الجدم اتشيله
يم المصرع .. يشكي الحال وهم تشكيله
يامتعوبه و مامش حيل
اشجابج يختي ابهذا الليل
يم المصرع .. يم المصرع

……………………………………………………………


امن النحر حاچاها صوته . ادري بگليبچ دليلج
كعدي عد نحري يزينب.وخل اسولف واشتكيلچ

اشكثر صحت وطلبت الماي.وادم چن ولا تسمع
سگوني ابسهم المثلّث . و دمي امن الظهر ينبع
الشمر يتلذذ ابذبحي.اعل كيفه ابراسي من يگطع

لا مو ذبحه .. عالكاع التلسع گلباني
لا مو ذبحه .. امن المگفه بسيفه ونحراني
راسي ونحري ايسيلن سيل
اشجابج يختي ابهذا الليل
يم المصرع .. يم المصرع

……………………………………………………………


اتگله هم مذبوحه آنه . وبس جسد هذا وحياتك
صرت اطفي النار بيدي . حتى ما تحرگ بناتك

ما هم الـ لهيب النار . ارقيه وسكنه كل همي
اطفي اذيالهن وانسه . اخمد النار الـ ابهدمي
بحيث الجمر مالي الگاع.واحس بي يحفر ابجدمي

وچان الاصعب .. ركضيت وتخنگني العبره
وچان الاصعب ..  بذيال وچم عثره ابعثره
و منا نار و منا خيل
شجابج يختي ابهذا الليل
يم المصرع .. يم المصرع

……………………………………………………………


سلّبوا ثوبي يزينب . والخذاه عاري تركني
الرمل چن چانون حدري . يلسع ابجسمي وحرگني

يخيتي وشوفي چفيني . اصابعهن بگن تسعه
المحبس ماكفه السلاب . رد عالخنصر ايگطعه
شفتها اتگلب التربان . علِيِه ادوّر البضعه

نفس الگعده .. من عصر الباب امحنبه امج
نفس الكعده .. وانت محنبه وهادل متنج
ليش وشو كل ساعه اميل
شجابج يختي ابهذا الليل
يم المصرع .. يم المصرع

……………………………………………………………


حسين تنشدني اعل متني . وخاف تاذيك الحجايه
الدنيه ظلمه وما يبين . سوط طابع بالعبايه

انا احمل ضرب يحسين  . بس لو شفت چتّالك
شمر فوگ الفرس ويگوم . يجلد جلد بعيالك
يلتف عالرگب هالسوط . منه اختنگت اطفالك

صاحوا عمّه .. چن نار السوط و يچوينه
صاحوا عمّه .. صيحي الكافل خل يحمينه
احنا زغار و سوط اطويل
شجابج يختي ابهذا الليل
يم المصرع .. يم المصرع

……………………………………………………………


ايگلها شوفي الجسد يختي .اتساوه وي الگاع حجمه
اربعين امن الحوافر . اعليه هجمت فرد هجمه

حديد اتلبّسن وآنه . امسلّب منكشف صدري
سحگهن چن طعن برماح.يزينب وصلن  الظهري
شو چنهن اموصّايات . حيل ايدوسن ابنحري

اوياهن طالع .. كلبي و مردنّه ابرجليهن
اوياهن طالع .. اعل ابنياتي وينبض ليهن
بيه الخيل اتحط و تشيل
شجابج يختي ابهذا الليل
يم المصرع .. يم المصرع

……………………………………………………………


الليله بيتتنه يخويه . بالظلام وكاع هيمه
والتراب افراش النه . وهالعبايه اصبحت خيمه

يخويه وجابو النه الماي.وهذا اصعب جرح بينه
چفيناه من ذكرنه اشفاك . ابد لا گطره شربينه
عطشانات جوعانات . عفت ارقيه واسكينه

اشلون اباچر .. ريت اوياكم ماظل عدله
اشلون اباچر .. امحضرين إلنه احبال وهزله
امن الغبشه وللشام ارحيل
شجابج يختي ابهذا الليل
يم المصرع .. يم المصرع

………………………………………………………
✍️ ( سيد خضر الزاملي )

https://www.tg-me.com/aabas78
قصائد لكل ايام محرم اشترك بالقناة

نزله


انه اخت حسين واخت الاربعه
حـايره بين  الـخيم  والـمشرعه
======================================= =========

انـه مــتكفله  بـــيتامه   وبــحرم
انه شفت بعيني محترگه الخيم
والكفيل چـفوفه طاحن والسهم

نــابت بـعـينه وچــثته مــگطعه
انه اخت حسين واخت الاربعه
---------------------------------------------------------------------------------------

حرت بين اضعوني خويه والسبي
والـــيتامه  والــــفواطم   والــعـبي
اطلب  ومــحد  يــجاوب  مـطلبي

تــريد كـافلنه اليتامه تــودعه
انه اخت حسين واخت الاربعه
---------------------------------------------------------------------------------------

بعيني شفت الخيل داست علصدر
وراس ابو السجاد من حزه  الشمر
والعــذر يحسين صحت انه العذر

مــن تعنيت بــدمع يــم مــصرعه
انه اخت حسين واخت  الاربعه
---------------------------------------------------------------------------------------

عــيني ظلـت شباحه بصـوب النهر
ظلـمه امست دنيتي  بـطيح  الگمر
وعيني ادماهه النحيب وي السهر

والــحزن بيبانه كـثره امشرعه
انه اخت حسين واخت الاربعه
---------------------------------------------------------------------------------------

حــايره بــين الـــيتامه  والــضعن
وبـالنوايب من زغر گلبي امتحن
والمحن مافارگني رسمن اهات المحن

وچفي كل مصباح حزني يصارعه
انه اخت  حسين   واخت  الاربعه
---------------------------------------------------------------------------------------

باليتامه وبالحرم ظليت ألم
وريحة الدخان من اخيامي اشم
صعبه من انطگ يخوتي ونشتم

ناظري ماگطع يهمل مدمعه
انه اخت حسين واخت الاربعه
================================================
الشاعر احسان الحميداوي

https://www.tg-me.com/aabas78
قصائد لكل ايام محرم اشترك بالقناة

الليله كلش مـوش مثـــل البارحه
الليله اهلـنه اعله الترايب طايحه
                  +++

الليله وحشه وين ننطي اوجوهنه
ماي ماكو وتجــــــــري ماي عيونه
خاف باجــــر على الهـــزل يسبونه

راح اسوي اعلئ الشـريعه الفاتحه
                 
+++
يله يالنســــــــوان شــــدن حيلچن
حســــــين طايح محــــد يتچيلچن
امشنه يم عــــــــباس خل انعيلچن

وضغبره انســــويهه يمه ونايـــحه
                
  +++

مثلــي ياهالناس ياحــــــرمه انولت
بالمعـــــــــــاره وبالعــــــيال اتكفلت
الريج ناشف والفـواطــــــــم شيبت

وانه للعــــــــباس اصيحـــــن رايحه
                
   +++

رايـــــحه اتعـــناه اشــــــوفه بحالتي
اعليه لوله الفشـــلــــه اذب اعصابتي
يضــحك ومـــــــرتاح اخبره بشامتي

خلاف وجهه والمـــــــــــدامع جارحه
                  
  +++
الليله  يالنســــــــوان كلــــــــش حيره
خاف باجر ننســــــــــــــبي من الديره
عالهزل وحســـــــــــــين وجهه ايديره

عالضعن ودمــــــــوع اشــوفن فايحه
                                  +++



ليلة الوحشه
خادم اهل البيت
هيثم شهد الابراهيمي

https://www.tg-me.com/aabas78
قصائد لكل ايام محرم اشترك بالقناة

قصيده للدفن





تبقه لحظات الدفن تچويني
عالصبر متحمله شمخليني

شلون اعوف الغاضريه
وكل اخوتي اعله وطيه
والدموع بعيني
١

شلون اگدر امشي عنهم
اتصير اسأل ياتره
واترك العباس وحده والحسين اعله الثره
ابلا دفن والحيره حيره
والاجسام اموذره
للصبح راح ابقه اناطر
الليله ابقه امساهره

بلكي لو صار الصبح ينسوني
ادفن اهلي واخوتي يخلوني

ادعي من رب البريه
وكل اخوتي اعله وطيه
والدموع بعيني

٢

بيا عذر لو عنهم امشي
بيه لوعات وحزن
انظر اعله الجثث وانحب
من گلب دامي و أون
وين اهلي وين اخوتي
الهم اشتاگ واحن
هواي صرعه وليل وحدي
ياحزن ليل الدفن

صرت مجبوره الدفنهم أني
بين جرحي ولوعتي واحزاني

انظر بعيني الرزيه
وكل اخوتي اعله وطيه
والدموع بعيني

٣

قررت ادفنهم اني
سولفت وي الصبح گلت لو طر فجر باچر
ادفن اشبيدي يصح گبل ليجيبون باچر
الروس اهلي جم رمح
صوت لن ينده عليه
وزيد اجروحي جرح

يادفن باچر تلمي العيله
ودعيهم هاي اخر ليله

غصب راح امشي سبيه
وكل اخوتي اعله وطيه
والدموع بعيني

٤

انظر وبعيوني دمعه
على الضامي ومنسحگ
طحنته اخيول الأعادي
وانه فوگ الراس ادگ
ذبلت اسنين الموده
وراحت ايام العشگ
مارضو يحسين ادفنك
وصار لازم نفترگ

ودعت جسمك يماي عيوني
وياك اتمنه آنه يدفنوني


امشي لكن مو بديه
وكل اخوتي اعله وطيه
والدموع بعيني
٥

بنظرة وداع ارد اودع
كافلي ومارد اله
صحت ياعباس خويه
يالجبتني امدلله
راح اعوفك عالوطيه
وامشي وي العايله
ابلا دفن واعتذر منك
خويه تبقه بكربله

امشي للشام ودمعتي بعيني
بعد چفك چف شمر يحديني

وسفه هذا الصار بيه
وكل اخوتي اعله وطيه
والدموع بعيني



لاتنسون والدي ووالدتي وأبني عباس من الرحمه والمغفره خادمكم رياض الرسل الجابري

https://www.tg-me.com/aabas78
قصائد لكل ايام محرم اشترك بالقناة

محرم 1447ه‍- 2025م
ليلة 13 محرم (ليلة الدفنه)

راجع بگلبي المدمي ادفن ابوي وعمي
آ يا محنتي ★★★★★★★★★★★★★★★★

يبويه حسين اجيتك ها يمذبوحي
فراگك شيباني يا بعد روحي
من درب السبي رديت بجروحي
ادفننك اجيت بحسرتي ونوحي

ذبيت يمك حسره يا بويه فگدك كسره
آ يا محنتي ★★★★★★★★★★★★★★★★

ثلث تيام باقي ومنگطع نحرك
آثار الحوافر طابعه بصدرك
لگيت چفوف اديك مگطعه بكترك
تمنيت انذبح عمري وسلم عمرك

مكسّر مطبر جسمك شلون التراب يضمك
آ يا محنتي ★★★★★★★★★★★★★★★★

اودعنك يبويه وروحي تتلوه
رايح لبو فاضل صاحب النخوه
ونعم من الكفيل الجابته اللبوه
مثل عباس ما تحصل ابد خوّه

گاصد الراعي الغيره ظلينه بعده بحيره
آ يا محنتي
؛★★★★★★★★★★★★★★★★

يعمي الغالي اجيتك مختنگ صدري
مدري شلون ادفنك يالگمر مدري
ادفنت قبلك ابوي ومنكسر ظهري
ذبحتوني وراكم يا بعد عمري

سهم الرديه بعينك ومگطعه چفينك
آ يا محنتي ★★★★★★★★★★★★★★★★

اجيت وبالخرابه عايف النسوه
اجيت وروحي بالحرسات تتچوه
يعمي الحگ الزينب طايحه ابّلوه
يالخلصت عمرك بالشدد تچوه

زينب لمن عفتوها فوگ الهزل صَعدوها
آ يا محنتي ★★★★★★★★★★★★★★★★؛

اودعكم ويذبح روحي فرگاكم
لو بيدي اظلن گاعد احذاكم
احلى ايام عمري چانت وياكم
راح العمر كله ابقى انعاكم

انحب اظل للتالي وتبقون دوم ابّالي
آ يا محنتي ★★★★★★★★★★★★★★★★

جعفر عطيه البزوني


https://www.tg-me.com/aabas78
قصائد لكل ايام محرم اشترك بالقناة

#دفن_الاجساد_الطاهره

من بعد ذيج المصايب. راجع لدفن الحبايب
عالثره ضلوا ضحايا من حزنهم گلبي ذايب
......

آنه ياناس العليل جروحي بيّه
ذبحوا اهلي گبال عيني آل اميّه
بلا دفن ظلّوا ضحايه عله الوطيه
اليوم اجيت ادفن جثث اهلي بديه

من خذوني الغالي عفته. والله لو بيدي دفنته
حسين ابوي شلون اعوفه. غصب اخذوني وتركته
...........

من وصلت الغاضرية بدمعة العين
اعثر بجدمي رحت يم والدي حسين
ويلي شفته مگطّع بسوح الميادين
منين اشيلن جسم ابويه حاير منين

جمّعت جسمه بحصيره شلته بدموعي الغزيره
للگبـر نـزّلتـــه بيــــدي ودفنت شيخ العشيره
.............

من گبل ما هيل بيدي تراب گبره
وسّدت عبدالله دامي فوگ صدره
وسهم المثلّث ذبحها اوداج نحره
بياذنب ضامي الرضيع يموت حسره

منظر يهدّ الرواسي. شيّب بهالنظره راسي
والدي وأبنه شفتهم. مذبّحين وبيش اواسي
..............

رحت للأكبر عضيدي وسلوة الروح
اليشبه المختار جدي شفته مذبوح
احفرت گبره بدمعتي وبنار لجروح
نحت يم جسمه وندبته شينفع النوح

يم علي الأكبر عضيدي. نكسر ظهري وطگ وريدي
شلون بية الروح ظلت وبن ابوي ادفنته بيدي
...............

وعاينت عالغبره عرّيس الهواشم
بدم وريده امحنّي چفّه الغالي جاسم
دفنته وي انصار ابوي ودمعي ساجم
ضحّوا لدين الله ثبتوا بالملاحم

بحفره وحده جمّعتهم. يم ابواليمه ادفنتهم
بس حبيب العم فرزته عنهم وما باعدتهم
...............

وعتنيت بدمعتي لصوب الشريعه
للگمر عباس شاهدت الفجيعه
مگطّع الأعضاء وچفوفه گطيعه
احفرت گبره وضاگت بعيني الوسيعه

للگبر بچفوفي شلته. عالنهر واريت جثّته
گتله ياعمي سبوها. زينب الكافلها انته



سيد زيد الفحام


https://www.tg-me.com/aabas78
قصائد لكل ايام محرم اشترك بالقناة

الدفن

شأقره بصلاة الدفن/والراس ما مدفون
مدفون قسم وقسم/للمثله شيصلون
محتاره ادعيلك
مييت واصليلك؟
والراس ما مدفون
++++++++
فاتن ثلاث ايام الك بالشمس باقي حسيني
ومرن ثلاث ايام الي وآنه بحبل چفيني
هسه آنه معروفه بسبي بس وضعك امأذيني
جسمك تركته بكربله والراس اشوفه بعيني

بتراب ثوبه رجع/وأنه اسأل السجاد
دافن منو وارجعت/اعرف اهلنه ابعاد
امن ابعيد اناديلك
مييت واصليلك
والراس مامدفون
++++++++
گتله ابدفنته اتأخرت گلي صعب جمعته
كلما ارفعه حاولت ماينرفع من شلته
باقي بعد منه ورحت دورت خنصر جبته
زغران ابـوي الوحدي للگبر مـن نزلته

وهنا بدت قصّتي/وجرحي اويه جسم حسين
لا خد اوسده بترب/لا مددت رجلين
كتله اشأسويلك
مييت واصليلك
والراس مامدفون
**
للقبله اوجّه ياطرف من الحصيره واجري
حكم الدفن للبالسحگ صدر وگفاه متذري
اندليته نحره من نطق وسد رضيعي الصدري
ضليت ادور عالصدر گال الصدر ضل حدري

ناشدني راسي شعجب/ماجبته يبني وياك
گتله اويه زينب بقى/يحرس بناته اهناك
وارقيه تشكيلك
ميبت واصليلك
والراس مامدفون
+++++++++
اختك يبعد اختك صبح كلشي غريب ابدونك
گالولي عنك مندفن وگبالي اشوف اعيونك
تدمع اذا ضربو طفل وبرمحك ايهزونك
هسه انت ميت منأسر يحسين شيسمونك

راسك اشوفه عدل/بس جسمك ابلا روح
بثنينهن ماكو امل/مدفون لو مجروح

چم فاتحه اهديلك
مييت واصليلك
والراس مامدفون
++++++++++
حته بدفنتك تختلف يالمختلف عن كلها
سكنه ورباب يسولفن ياعمل نهدي اتگلها
نقره الحمد دفعة بله عن راس ابوچ اتگلها
وننوي الصلاة الخنصره ونشا الله يقبلها

ياخويه جرح الحبل/يلچمني وتوضيت
الكل وصله منك فرض/لميتك وصليت
دمعاتي توميلك
مييت واصليلك
والراس مامدفون
+++++++++
ياوحشه لبدرب السبي والمندفن هنياله
ياريته طولي مندفن وما شاهدوله خياله
بالكوفه وبمجلس زلم وگفوني خويه گباله
رسك ابطشته ويلتفت من سوطه بيده الشاله

تحميني وانت بطشت/وآنه استعذ بالراس
من شر سياط المتن/ومن نظرة الحراس
تسمعني واحچيلك
مييت واصليلك
والراس مامدفون

الشاعر ثائر الربيعي

https://www.tg-me.com/aabas78
قصائد لكل ايام محرم اشترك بالقناة

نزله... لسان حال الامام السجاد ع لدفن جسد ابيه الحسين عليه السلام

مو بالگبر بالروح ادفن حبيبي
.........

جيت من درب السبي لازمني صبري
رايد ادفن والدي ودموعي تجري
والله بمصابه متت ونكسر ظهري
گبل گبره ينحفر ياريت گبري

ما يشفه جرحي يسيل. ميت طبيبي
مو بالگبر بالروح ادفن حبيبي
.........

والله كل خطوه اصيحن وا حُسيناه
بيدي لازم ظهري آه تصيح وي آه
ويلي ابوي حسين دامي شلون عفناه
مكسّره ظلوعه يويلي ما دفنّاه

كلما قربت عليـــه يكثر نحيبي
مو بالگبر بالروح ادفن حبيبي
.........

ويلي ويلي من وصلت الغاضريه
شفت ابويه حسين طايح عالوطيه
كسرت ضلوعه خيول الاعوجيه
منين ما شيلنّه يوگع منّ اديه

مو عجبه لو عالراس يغزيني شيبي
مو بالگبر بالروح ادفن حبيبي
.........

شلون الي روح وگلب گبره حفرته
بالحصيره لملمت جسمه وجمعته
انهدم حيلي احس لمّن حملته
جسم ابويه حسين بچفوفي شبگته

مو بس ابو ياناس خِلّ وصحيبي
مو بالگبر بالروح. ادفن حبيبي
.........

نحر ابوي حسين حاچاني سمعته
ادفن وياي الطفل مذبوح عفته
دوّريته بدمعتي ولحسين جبته
ويّه ابويه حسين خلّيته ودفنته

هلت التراب عليـــه عمري ونصيبي
مو بالگبر بالروح ادفن حبيبي
.........


اسمعت صبرا ياعلي من السموات
لن هتف صوت الوحي ابنبرة مواسات
روحي ياناس اطلعت لو باقي لحظات
ينحب اليدفن ابوه يرتاح هيهات

ياربي من دنياي قرّب مغيبي
مو بالگبر بالروح ادفن حبيبي


#سيد_زيد_الفحام


https://www.tg-me.com/aabas78
قصائد لكل ايام محرم اشترك بالقناة

شحجي على الشفته
أبدفن الأبو العفته
بل كَـوه انه اعرفته
من كثر الجروح
…...........
١=
وصلته ومن وصلته واكعدت يمه
شفت كلشي بحبيبي سابح بدمه
وعلى كلبه الرمح والحافر الداسه
وحرت حيره اشكبرهه بجمع ابو اليمه
 
اشكد دافن بعمري
ناس بكثر صبري
بس ما كسر ظهري
مثله ابد مذبوح
/////////////////
 
٢==
بديت  اجمع لحم جسمه المله الحومه
وكسر كلبي أبوي الذابله ارسومه
عليه ما خلو اهدومه انسلب كلشي
الجسد عاري لكيته وفايضه ادمومه
 
حرت بأمر جمعه
والراح شيرجعه
يمه كعدت انعه
ابصوتي المبحوح
////////////////////
 
 
 
٣===
لكيته اعله الوجه مكلوب ابو الأكبر
وعلى نحره ١٢ طبره شفت واكثر
ومنه امكسرين اظلوعه يا ويلي
شكثر حاولت أشيله امنيدي يطشر
 
سبحه وألم بيهه
اظلوعه المطشريهه
والروح احاجيهه
عالفارك الروح
////////////////////
 
 
 
 
٤====
 
احفرت حفره جبيره الطوله المكطع
وجبت ويلي حصيره بيهه ابوي اجمع
لان من عندي يوكع كل جزء شلته
أبوي امن السحكَـ بي ترسو المصرع
 
الحافر خسف صدره
واتساوه وي ظهره
ودم هامته ونحره
عالغبره مسفوح
/////////////////////////
 
 
 
٥=====
نزلته الكبر  بس راس ما عنده
دفنته بس نحر نازف وسط لحده
وعبدالله اعله صدره بهيده وسدته
بس جسمه بلا راسه ولا خده
 
هم مثل ابو الأكبر
كطعو اله المنحر
وراسه برمح اصغر
مشيول وينوح
/////////////////
 
 
 
 
٦======
اه اشما صحت ما تطفه نيراني
اشد موقف كسرني وحيل اذاني
من هِلت التراب وجني صرت اسمع
صوت امن النحر عطشان صاحاني
 
يا علي يوليدي
ماي ازكَـي اوريدي
وحط أيدك ابايدي
وظل يمي لتروح
////////////////////////////////////
✍️🏻كلمات موسى الخادم ٢٠٢٥


https://www.tg-me.com/aabas78
قصائد لكل ايام محرم اشترك بالقناة

لدفن الأجساد الطاهره


حيرني أبوي وحيره بالروح
من مكفاه يويلي إلكيته مذبوح
المصيبه خنصره ماهو بالايد
مذبوح واحسه لزينب يريد
==========
من أرض الغري متعني بهوم لرض الغاضريه
جيت وگلبي نار وحيل ملجوم من عظم الرزيه
وصلت الطف لكيت حسين ياحيف عاري اعل الوطيه
مذبوح وسليب وضامي ياناس خليته اعل اديه

خليته بديه ودمعي بالعين
حاجيني كلتله بويه يحسين
نار البل گلب يابويه مَتهيد
مذبوح واحسه لزينب يريد
==========
شكثر بيه السيوف الظاله هواي آثار البواتر
ولكيت بصدره حفره والله ياناس من سحك الحوافر
الحوافر كَسَرّنها اظلوع الحسين ظل يكسر الخاطر
ألمنه وذر متوذر شلون نار وگلبي فاير

متوذر والمه حاير بهاي
لواشرب ابوي الماشرب ماي
الذباحه الضمه ياماي اله يفيد
مذبوح واحسه لزينب يريد
==========
بكفاه جني طلت نظرات العيون واني بگلبي حسره
الشمر جني اشوفه طابر حسين يويلي اثنعش طبره
كاعد عالصدر والشيب مخضوب لحيته كلها حمره
من دمه يخضب شيبه الحسين گلبي شنهو صبره

والدم بلحيته شيبه مخضوب
مذبوح اعل وجه لكيته مگلوب
من انذبح عمي عنه ابعيد
مذبوح واحسه لزينب يريد
==========
خنصر والدي مگطوع ظليت ادور خنصر ايده
عليل ومن يساعد حالي ياناس والخنصر يعيده
جَمَّعته وذر بالكوه خليت جسمه وي وريده
بيدي رجعتها اظلوع الحسين وحق امه الشهيده

ياماي التبده لمته شلون
شجاوب من ارد لعمتي ام عون
اخوج بكربله مگطوع الاوريد
مذبوح واحسه لزينب يريد
==========
اعل صدري وسد ابني گلي ياناس من إحفرت گبره
بلحد واحد دفنته والدي وصار عبدالله اعل صدره
اوسده شلون ابويه وهو مذبوح شخلي جوه نحره
هالمنظر جرحني وزاد الاونين خنكت صدري عبره

رديت وهضمني دفنه ياناس
مثل مارد ابوي بفگد عباس
الحك ياعلي لإبنك أيا حيد
مذبوح واحسه لزينب يريد
==========
الشاعر علي النائلي


https://www.tg-me.com/aabas78
قصائد لكل ايام محرم اشترك بالقناة

#ليلة_دفن_الاجساد_الطاهرة

آه منج كربلا ... آه منج كربلا
****.
طاح قرآن وبكت تبجي السمه اعليه من دمه
ونزل جبريل بجروحــه يعزي بالهم فاطمـه
وصاح عزريل بحسرته ويلي يا حامي الحمه
والملايك بالدمــع حضرت تقيم الجزع
وصاح فطرس بالملا آه منج كربلا
****.
الــذكر فوك الثره والفاتحه فوك الرمـــــح
حسره من تقره بألم وبخاطرك ذاك الجرح
توسد بحرّ الشمس ياويلي قــــرآن الصبح
والذكر فوك الثره اوراقه مطّشره
وما كو واحد رتلّه آه منج كربلا
****.
لن خيول العشره كصدت صوبه شكت مصحفه
سحكت بذيج الظلامــه وزين كلش تعرفــه
من مكان النحر صارت بالحوافر تحرفـــــه
سالفه وما اظن صدك مصحف الله ينسحك
ويبقى عاري بالفلا آه منج كربلا
############
عمدوا اعليه بالسحك جي من صدك هو الذكر
تكطّــــع بذيج المسيه بخيلهم واصبح وذر
رادوا بهــاي الفجيعه دين طـــــــــه يندثر
حسين يدرونه الذكر كطّعوه بالطف وذر
الدين بحسين اعتله آه منج كربلا
****.
بلا دفن وبلا غسل ابن الفحل فــوك الثره
وجسمه متوذر يويلي اوصاله كلها مطشره
اوراقه تتمزق حــــواسر وبدمــــاه معفره
بلا دفن ظل بالعره محد بحالـــه دره
ياهو يمه وتسأله آه منج كربلا
****.
تغيّر بذيج الشمس روح القدس مــا ينعرف
كل حجر بيه هالدمه من السبط يوم النزف
طاح وتطشر امامي وكل جرح يسواله طف
آه يا ذيج المحن شلون ينلم بالدفن
بيا كلب من تعدله آه منج كربلا
****.
لخادم ال محمد(ع).........
. الشاعر حيدر كاظم الساري


https://www.tg-me.com/aabas78
قصائد لكل ايام محرم اشترك بالقناة

اجيت ابدمعتي يحسين
عن....جسمك ادور وين

شفت المنگطع نحره
خيل اداست ابصدره
***
گلي بيش اضمدك وحسب اجروحك
ما خله الحجر من صابك ابروحك
يمه شلون اعرفك والدمه اسفوحك
مچفي اعله الوجه ما ينسمع نوحك

حيره اشلون أعرفنك
يوليدي اردا اشمنك

بنحرك لو ارش گطره
خيل اداست ابصدره
***
يمك لو طحت من ظلعي محنيه
يذبحني الحزن من دهري يوميه
يمه اشصاير ابحالك يبو ارقيه
من جرح الجرح ما تشرب اميه

ليش امكسره اسنونك
چم طعنه يطعنونك

خياله ابحقد عشره
خيل اداست ابصدره
***
اجيتك والگلب يبني اشكثر حسره
ادور عالاصابع تسعه مو عشره
شفت حتى السهم يوصل حدر ظهره
اگعد يمه اجيتك فاطمه الزهره

يمه اشلون اشبگنك
ما سالم كتر منك

بروحي ظلت الجمره
خيل اداست ابصدره
***
يا حيره من المك والجسد اثار
يمه انه وعلي بگليبي شبت نار
جابولك حصيره وظل علي محتار
اشلون ابلايه راسك نزل الحفار

يايمه الدفن حيره
ضاعت كل تعابيره

يمه يا علي اتحضره
خيل اداست ابصدره
***
گعدت انه عله گبرك والعطش بلوه
جبتله اميه بلكي اوليدي يتروه
من حر الرمل كل ونه يتچوه
ياويلي الحجر من جبهته اشسوه

احني ابظلعي المكسور
ذبحوني ابظهر عاشور

غيمه بلا مطر صحره
خيل اداست ابصدره
***
حسراتي من اسولف تجرح الاحساس
تاليهه......... الوكت نزلتك بلا راس
يمه وي علي السجاد احشم الناس
جيت وياك انوح وانظر العباس

بالحسره اسمع اونينه
موعد منطي لسكينه

طايح جربته ابكتره
خيل اداست ابصدره
***
تمت بعون الله تعالى
الشاعر____يوسف الفتلاوي

https://www.tg-me.com/aabas78
قصائد لكل ايام محرم اشترك بالقناة