💐🕍 አብዲ ቲዩብ๑ 💐۞๑๑۩ 💐 🕌abdi Tube ๑ 💐 3104

━━━━━━✦✿✦━━━━━━
አንደሉስ ክፍል 6
━━━━━━✦✿✦━━━━━━

ይህ የጧሪቅ ከልክ በላይ የፈጠነ ዘመቻ ለሙሳ የሚዋጥ አልሆነለትም። ድንገት የጠላት ጦር ከቦ እንዳይፈጃቸው ስለሰጋ በፍጥነት ዘመቻውን አቁሞ እንዲጠብቀው የሚያዝ ጠንከር ያለ ትዕዛዝ ላከበት። በሌላ በኩል ሙሳ ኢብኑ ኑሰይር ጧሪቅን ለማገዝ ሙጃሒዶችን ያሰባስብ ጀመር። የአንደሉስን ዘመቻ የሰሙ ሙስሊሞች ከተለያዩ ሀገራት ተሰባስበው አስራ ስምንት ሺህ የሚሆን ሰራዊትን ከወኑ። ሙሳ እነዚህን ሙስሊሞች አስከትሎ ወደ አንደሉስ ነገደ። እግረመንገዱን ጧሪቅ ያልከፈታቸውን ግዛቶችን በመክፈት ወደ ኢስላማዊው ዓለም እየጨመረ ጉዞውን ቀጠለ። በዚህ መልኩ ኢሽቢሊያ፣ ማሪዳ፣ ሸዞና ቀርሞና የተሰኙ ከተሞች በሙሳ ኢብኑ ኑሰይር ወደ ኺላፋው ግዛት ተቀላቀሉ። ሙሳ በዚህ አልተብቃቃም ይልቁንስ እንደሱ በጂሃድ ያደገውን ልጁን ዐብዱልዐዚዝን ወደ ምዕራብ አቅጣጫ ያሉትን ከተሞች እንዲከፍት ላከው። አብዱልዐዚዝም በሚደንቅ ብቃት በፍጥነት የአንደሉስን ምዕራብ ግዛቶች አዳርሶ የአሁኗ ፖርቱጋል ድረስ ዘለቀ። ሊዝበን የተሰኘችዋን ከተማም ከፈተ።
ከሁለት ዓመታት መለያየት በኋላ በ94ዓ.ሒ ሁለቱ ድንቅ አሚሮች በጡለይጢላ(ቶሌዶ) ከተማ አቅራቢያ ተገናኙ። በአንድነት በመሆንም የማቅናቱን ዘመቻ አጠናክረው ወደሰሜናዊው ክፍል አመሩ። በዘመቻቸው ብዙ ከተሞችን ከፈቱ። ዛራጎዛ (ሠርቁስጣ) እና ከእግርኳስ ክለቧ ውጭ በአንድ ወቅት ኢስላማዊ ግዛት መሆኗን የማናውቃት ባርሴሎ በሙሳና በጧሪቅ ከተከፈቱ ከተሞች ዋና ዋናወቹ ናቸው።
እዚያው ሰሜን እያሉ ሙሳ ድንቅ ስራ ሰራ። ከፒሬኔ ሰንሰለታማ ተራራዎች በስተጀርባ ወደምትገኘው ደቡብ ፈረንሳዊቷ አርቦና (ናርቡኔ) ከተማ ቃኚዎችን ላከ። አርቦና በሜድትራኒያን ባህር ዳርቻ የምትገኝ የፈረንሳይ መንደር ናት። በዚህም ከዘመን ጋር ታዳጊ የሆነችን የኢስላማዊ ግዛት ፍሬ መዝራት ቻለ። (ወደ ፊት ኢንሻአላህ እናነሳታለን)
ሶስት አመት ተኩል በሚገመት ጊዜ ውስጥ ሙስሊሞች ሙሉ አንደሉስን የፖላይ ቋጥኝ ወይም ካቫዶንጋ ተብሎ ከሚጠራው ቋጥኛማ አካባቢ ሲቀር የተቀረውን ሁሉ መክፈት ቻሉ። ሙሳ ይህን ቋጥኛማ መንደር ለመክፈት ዝግጅቱን ባጠናቀቀበት ሰዓት ከኸሊፋው አብዱልመሊክ የተላከ መልዕክት ደረሰው። መልዕክቱ ሙሳን ጧሪቅንና አብረውት ያሉትን ሙጃሒዶች ያስደነገጠ ነበር።
ኸሊፋው ወሊድ ብኑ ዐብዱልመሊክ ዘመቻውን አቋርጠው በፍጥነት ወደ ደማስቆ እንዲመለሱ የሚያዝ ደብዳቤ ነበር የላከው። ይህ ትዕዛዝ እኛንም የሚስደነግጥና የሚያስገርም መሆኑ አይቀርም። ነገር ግን ኸሊፋው ወሊድ የሙስሊሙ ዓለም ኸሊፋና ተጠያቂ እንደመሆኑ እነዚህ ሙጃሒዶች ከኺላፋው መናገሻ ደማስቆ በጣም የራቁ በመሆናቸው የኸሊፋው እገዛ በቀላሉ ሊደርሳቸው አይችልም። ይህ ማለት የክርስቲያኑ ሰራዊት ዳግም ተሰባስቦ እነኚህን ሙጃሒዶች ከቦ ቢያጠቃ የመትረፍ እድላቸው አስጊ ነው። እናም ኸሊፋው ይህን የሚያክል ቁጥር ያለውን ሰራዊት አደጋ ውስጥ መክተት ለሙስሊሙ ኪሳራና ለኸሊፋውም የሚያስወቅስ ተግባር በመሆኑ ውሳኔው ትክክል ነበር።
በኸሊፋው ትዕዛዝ መሰረትም ጧሪቅና ሙሳ ወደ ደማስቆ ተመለሱ። የሚገርመው ሙሳ ኢብኑ ኑሰይር አንደሉስን ሲከፍት የሰባ አምስት(75) ዓመት የዕድሜ ባለፀጋ ነበር። አንድ እግሩም አንካሳ ነው። ይህ ከመሆኑ ጋር የኸሊፋው ትዕዛዝ ባይገታው ሙሉ አውሮፓን ብሎም ኮኒስታንቲኖፕልንም የመክፈት ዓላማ ነበረው። በዚህ የሽምግልና እድሜ ላይ በአላህ መንገድ ይፋለማል! ከተማዎችን ይከፍታል!ሰራዊቶችን ይመራል! በድንቅ አመራሩ ጠላትን ያርበደብዳል! ረሒመከሏህ ያ ሙሳ!
ወደ ደማስቆ ከተመለሰ ከዓመት በኋላ ሐጅ ለማድረግ ሄደ። እዚያም አላህን እንዲህ ሲል ለመነ፦ "አላህ ሆይ! እድሜ ከሰጠኸኝ ወደ ጂሃድ ሜዳ መልሰኝ። ሸሂድ አድርገኽም ግደለኝ። ይህንን ካልፈቀድክልኝ ግን በነቢዩ ሀገር ግደለኝ!" አላህም የዚህን ታላቅ ሙጃሂድ ልመና ተቀበለ። ሐጁን አጠናቆ መዲና ለዚያራ እንደሄደ እዚያው አረፈ። ከልቡ ወዶና አፍቅሮ አርአያ ካደረጋቸው ሶሀቦች መቃብርም ተቀበረ።
ሽምግልና ሳያግደው፣እርጅናው ሳይገድበው፣ የእግሩ ማንከስ ሳይበግረው የአላህን መልዕክት ለሰዎች እያደረሰ፣ የኢስላምን ባንዲራ ከፍ አድርጎ በጂሃድ ላይ ኑሮ መዲና ላይ በክብር ተቀበረ። አላህ ሆይ ላንተ ስንል ወደነዋልና ከርሱና ከመሰሎቹ ጋር ቀስቅሰን። መንገዳቸውንም የምንከተል አድርገን
የጅሀድ ጓደኛው ጧሪቅ ደማስቆ ከተመለሰ በኋላ ወሬው ጠፋ። አንደሉስ ይመለስ ደማስቆ ይኑር እርግጠኛ የሆነ መረጃ የለም። ግና በአጭር ዘመናት ውስጥ የሰራው ጀብድ ለዘላለም ሲወሳ እንዲኖር አድርጎታል። አስገራሚ የመሪነት ብቃቱና የጦር ሜዳ ላይ ጀግንነቱ በወርቅ ቀለም የሚሰፍር ታሪክ ለግሰውታል። አንደሉስ ሲወሳ ሁሌም ጧሪቅ ይዘከራል። አላህ ምንዳውን ፊርደውስ ያድርግለት።

ኢንሻ አላህ ይ
ቀ
ጥ
ላ
ል
═════════════════

#ኢኽላስ_ታማኝነት_ትጋት_ስኬት✨
_\\\____________
ሼር
@hebre_muslim
@hebre_muslim
╚═══════════════╝

117 viewsعبد الجلال مانو محمد, 09:35