‏جارێکی تر: حوسەین بەتەنیا جێـهێڵـدرا!

هەموو ساڵێک دەی موحەڕەم دێـت ئاوات و خەمی پێکەوە جەم کردووە، باسی ئەوە دەکەین خودا چۆن فیرعەون و سەربازەکانی لەناوبـرد، مووسا و شوێنکەوتوانی ڕزگار کرد، لەمەوە بۆمان دەردەکەوێت خودا دەتوانێت ستەمکار و تاغوتەکان لەناو ببات لەدەمێـکدا لەوپەڕی توانای خۆیانـدان.
باسی ئیمامی حوسەین دەکەین رضي الله عنه، نەوە شەهیدەکەی پێغەمبەری خودا، پاک و خواناس، شەهیدکردنەکەی یەکێکە لەقێزەونترین تاوانەکان لەمێژووی ئەم ئوممەتەدا...

بەڵام ئەم دەی موحەڕەمە تەواو جیاوازە، وەک ئەوەی ڕووداوەکانی دووبارە لەبەرچاومـاندا ڕوو دەداتەوە، من نامەوێت لەو برینە قوڵەی مێژوودا ڕۆبچـم، باسی هۆکارەکانی بکەم، ڕیوایەتەکان باس بکەم و ڕاستترینیان دیاری بکەم، هەموومان لەسەر ئەنجام کۆکین، حوسەیـن بە شەهیدی و مەزوڵومی کوژراوە...

غەززە زۆر لە ئیمامی حوسەین دەچێت (رضي الله عنه)!
غەززە یاخی نەبووە و شەڕخواز و پاوانخواز نییە، بەڵکوو
بۆیە هاتوەتە دەنگ دەیەوێت ستەم لەخۆی دوور بخـاتەوە...
ئەوەتا ئەمیش بەتەنیا جێهـێـڵدراوە و لەبەرچاوی ئێمەدا شەهید دەکرێن و وێران دەکرێن ئێمەش فزەمان لێوە نایەت و لەشوێنی خۆمان جوڵە ناکەین...

ئەمیش پاک و خاوێن و بێگەردە، کەسمان گومانمان لەدینداری و ڕاستی ئەوان نییە، بەڵام ئەمە تکای بۆ نەکرد و ڕێگریمان لە (شیمر)ی تەلئەبیب نەکرد سەری نەپەڕێنێت...

غەززە زۆر لە ئیمامی حوسەین دەچێت (رضي الله عنه)!
پشتیان بەردا و پشتیان تێکرد، هەرچەندە ئەمە زیان بەوانە ناگەیەنێت کە لەسەرحەقن، بەڵام تامەکە تاڵـە، ئەمە زیان لەوانە دەدات کە ئەو کارەیان کردووە، حوسەین (رضي الله عنه) لەبـەهەشـتە! غەززەیش کۆمەڵێکن لەسەر حەقن و دوژمنیان بەزاندووە، پێغەمبەری خودا بەڵێنی پێداون کە پشت بەردانی ئەوانی دی زیانیان لێ نادات، بەڵام ئەو کەسەی پشتی تێ کردون تاوان ئەو کارەیان لەگەردنـە...

دیسان لە ئیمامی حوسەین دەچێت لەوەی بەبرسێتی و تینوێتی شەهید دەکرێت، لەتاو برسێتیدا پەراسوی منداڵەکانی غەززە دیارە، گەروی پیرەکانیان لەتاوی تینوێتیدا وشکە، گەدەی ئافرەتەکانیان بەتاڵە...

دۆسیە و قەزییەکی ڕاست و عادلانەی هەیە، ئامانجێکی پیرۆزی هەیە، هەوڵدانێکی جوانی هەیە، جیهادێکی قبوڵکراویش...هەردووکیان هەرگیز خەیاڵیان بەلای ئەوەدا نەچووبوو بەتەنیا جێی بهێڵن چ جای بگات شەهیدکردنیان.

غەززە بۆی دەرکەوت قەزیەی پڕ دادپەروەری پارێزراو نابێت لەپشت بەردان و پشت تێ کردن، ئەوەی لەمێژوودا جارێک ڕوویدا چەندین جاری تریش ڕوودەدات...
ئەو دەمەی گومانەکەی بوو بە یەقین کە سوپاکەی ئێمە سەری ناخات، خۆی سوپای تایبەت بەخۆی هەیە، کە زانی کەسی ئازاد دەتوانێت بجەنگێت، بڕیاریـدا بەپێوە شەهید بکرێت، ببێتە چقڵی چاوی دوژمنان، لێیان بکوژێت و لەناویان ببات، حەق بەحەق ڕێک وەک خۆیان، ئیمڕۆ و سبەی و هەتا ڕۆژی سەڵا سڵاو لەو هێزە مەزنە بێت...

ئەی ئەو خودایەی دەی موحەڕەم فیرعەونت لەناو برد،
ئەوانە لەناو ببە کە خوشک و براکانمان شەهید دەکەن،
ئەوانەی لەگەڵ ئەواندا پیلان دەگێڕن...
ئەی ئەو زاتەی مووسات ڕزگار کرد،
ئەهلی غەززە لەدەست فیرعەونەکان ڕزگار بکە...

خودایە ئەهلی غەززە لەگەڵ ئیمامی حوسەیندا حەشر بکە،
هەر پارچەیەکی غەززە کەربەلایەکە بۆ خۆی...

ئەدهەم شەرقاوی
وەرگێڕانی: ئەیاد فەهمی