مأجور يا حيدر علي مأجورة يزهراء
...............................................
عجت أملاك السمه
والكواكب مضلمـه
علي يا حامي الحمه
قيم العزاء
نفخ بـــــوق القارعه
حان يــــــوم الواقعه
حسين لاكه مصرعه
وحان النداء
مأجور يا حيدر علي مأجورة يزهراء
.................................................
علـــــي حرز البسمله
ذبًحـــــــوا ناسه وهله
الوحده ما واحــــد أله
في كربلاء
عن يمينه وميــــــسره
علــــي وسبع الكنطره
روس ضلــــوا عالثره
بين العراء
مأجور يا حيدر علي مأجرة يزهراء
....................................................
وحده والعسكر حشد
أمنين ما فكـــــر يهد
أيسبـــح ويقره الحمد
كان الدعاء
من نضر طود الأجل
كـــــام للموت أرتجل
علـــــي يا خير العمل
شع  الضياء
مأجور يا حيدر علي مأجورة يزهراء
............................................
نزل والعسكر هجم
وصار نيشان السهم
كلشـــي منه ما سلم
والشمرُ جاء
بكيفه جانت مشيته
وبيده جر أعمامته
حز وريده وركبته
فاض الدماء
مأجور يا حيدر يا علي مأجورة يزهراء
................................................
علـي يا بويه أنولت
زينب وبسمك نخت
كل أخوتـي أتذبحت
والله شاء
بويه تحضر حسبـت
وفاطمه تحضر ردت
بيكم شكــــــد حشمت
عنده البكاء
مأجور يا حيدر علي مأجورة يزهراء
.................................................
زينبك أم الخـــــــدر
أهلال بالطف منكسر
راس وجـفوف وعذر
عين الوفاء
مشت كوه عله الهزل
أكبال راس ابا الفضل
أتطيح وايجرها الحبل
بنت الأباء
مأجور يا حيدر علي مأجورة يزهراء
......................................................
خادم خدمة الحسين
الشاعر
محمد الموالي

(يلرايد تون)
...............
يلرايـــد تــون ون اعلــــه حالي
آنا ألــــي صفيـــت ابلايـــا والي
..............................
أنـــا ألـــي جنـت حــره وأميـره
بين أهلــي الهواشــم والعشيره
خلونـــي بمكانــه شكـــد جبيره
حامينـي ألشهـــم والكلـــه غيره
عبـــاس الوفـــــي الكـــام بدلالي
,,,,,,,,,,,,,,,,,,,,,,,,,,,,,
وي حامي الظعـن جنت وكفيله
بفضلـه امدللــــه أختـــه العقيله
لو طحت بهظــم أمشي أشتكيله
شبــــل المرتضـــى مامر مثيله
غالـي كافلـــــي ومامثلــه غالي
,,,,,,,,,,,,,,,,,,,,,,,,,,,,,,


جنت ابزود اخوي أمشي بمهابه
في واكـف ألـــي مثــــل السحابه
هــد حيلـــي أبوالغيــــره بمصابه
اشلــون أحمــل يهالــوادم غيابه
صعبـــه من تمـــر بعـــده الليالي
,,,,,,,,,,,,,,,,,,,,,,,,,,,
جرحي شكد صعب يا هالبريه
سوت كربلـــه الماصـــــار بيه
ماأنســه أبــــد ذيـــــج الرزيه
ماظلــــت أهـــــل تفــــزع أليه
خالـي بلا زلم ظل بيتــي خالي
,,,,,,,,,,,,,,,,,,,,,,,,,,,,
عيلــه بلا زلــم بالطف صفينه
راح الكلـه غيــره الوينه وينه
راحـو والسبـــي حـــول علينه
وحبـال اليســر صــارت بدينه
وهذا ألي سده وهــذا الجرالي
...............................
خادم أهل البيت(ع)الشاعر: حيدر كامل العبودي

وصية لكل الخدام
محرم 1447هـ

ركز يخـــــــادم وفتــهم زين
بالك النفسك تخدم حسين
ـ-------------------ـ

بالك تزل ابخـــــــــــدمتك هاي
وتأذي گلب الما شـــــــرب ماي
اخدم حســـين ابنفسك اهواي
واحذر الخدمه الذات وجهين
ـ--------------------ـ

اليخلص بحب حسين ينهاب
ونفــرح لون طــاريه ينــــجاب
المتغـــذي مـن المـنبر آداب
فايز يضــل بالدنيـه والــدين
ـ-------------------ـ

شتحب النفسك حبه للناس
وختــــار بس التــرفع الراس
اتعلم وفه مـن اخوان عباس
وخلك لخــــــوتك لابد زين
ـ------------------ـ

للمجلس امـــن اتروح عناي
للزهـــره خلها روحتك هاي
جاي العزاء موللضحك جاي
خلك حزين وتدمع العــين
ـ------------------ـ

ابكل مجلس ام حسين تدرون
تحضـــــــــــــر تون وي اليونون
فاز التسـجله وفوزه مضـــمون
عـــــــدها انقبل وي المعزين
ـ------------------ـ

✍الخادم
كامل السعيدي

قصيدة للامام الحجه ع
محرم 1447 هـ

يبچن اعيونك دمه ـ لبن حماي الحمه
              هذا بضعة فاطمه
                  يابوصالح
            ــ⊱☆☆❀☆☆⊰ــ

يا بوصــــــالح هل محــرم وبتدت احزانك
تبجي لجل حســين من دم خلصت ايامك
يعيد مشهد سحگ صدره بكل وكت گدامك
ما تطيب اجــروح گلبــــك ماتهـــيد آلامك

للي بالطف منذبح ـ وراسه مرفوع ابرمح
            تندب الحد الصبح
                 يابوصالح
            ــ⊱☆☆❀☆☆⊰ــ

الچمن حسين بمحرم اصبحن لچماتك
اجروحه الف وتسع ميه وكلهن مأذياتك
اتشيغ روحك كل مسيه وتنفجر دمعاتك
بالگلب يبن الزجــــيه اتكاثرن صــدعاتك

صاير اهلال الظهر ـ اذه كلبك هالشهر
            نوح خلصت الدهر
                 يابوصالح
            ــ⊱☆☆❀☆☆⊰ــ

جمـــرت ايتامــــــك لهسه تلســع برجلينك 
عايش الطف لحظه لحظه وشايفه انته بعينك
يابوصالح كل محـــــــرم نندب الله يعيــــنك
ماخلص حزنك يمهدي اويه امتــداد اسنينك

الك يامحي السنن ـ نبجي بالسر ولعلن
            مارحم بيك الزمن
                 يابوصالح
            ــ⊱☆☆❀☆☆⊰ــ

ياجرح من عدهن اكثر هـدم بالطف حيلك
وعلى ياموقف مألمك ســــاهرت كل ليلك
اهواي يامهدي المصايب شذكر وشرويلك
بس ســـبي الحـــره وهزلها نايبه امسويلك

من اثر دخان الخيم ـ ابوجهك الطف انرسم
         ابصدرك آلام السهم
                يابوصالح
           ــ⊱☆☆❀☆☆⊰ــ

يمتى يبرد لهب گلبك يمــــتى تاخذ ثارك
وترتفع راية الثوره واحــنه كلنه انصـارك
يمتى تگطع راس كل شر سيدي ابفقارك
عالجمر يالمهدي والله ننتـظرها اخبارك

يامان الماله امان ـ وين ساكن يامكان
            الفرج ردنا من زمان
                 يابوصالح
           ــ⊱☆☆❀☆☆⊰ــ

✍ الخادم
كامل السعيدي

نزال بحق مولاي الجواد عليه السلام

دين الله محزون.  ودم تجري العيون.
لجل الجواد بكل ألم دم تجري العيون
$$$$$$$$$$$$$$$$$
الليله بمصاب أهل العلم. تبچي وحياره
مالومه دم يجري الدمع. بالهم تجاره
تاسع اليمه بالغدر.   مفجوعه داره
بالسم توذرت چبدته ملتهبه ناره

ودنيانه صبحت مظلمه
             حاله عجيبه ومؤلمه

مكسور ظهر ابنه ويون  وبگلبه مطعون
لجل الجواد بكل ألم دم تجري العيون
$$$$$$$$$$$$$
بعمر الورد شاف العجب. وأعظم مأسي
وذرو چبده بلاذنب.  اهل الكراسي
كل محب لجله منفجع  لن وكته قاسي
وينادي لجله ومنهظم. ياتاج راسي

هتكو الدين أهل الكفر
       نبچي ونون طول العمر

افجع الدين المعتصم  وخيبهه الظنون
لجل الجواد بكل ألم دم تجري العيون
$$$$$$$$$$$$$$$$
نواسي علي الهادي بحزن. ويهل دمعنه
ونشيع الغالي ونون.  والمر جرعنه
هليله بآلام وقهر.   يوم انجمعنه
باب المراد مصيبتك. بيهه انفجعنه

اهل الظلاله بلا رحم.
       فجعتنه والدين انهظم

ماطاب ينزف كل جرح.  جرحك فلا ايهون
لجل الجواد بكل ألم  دم تجري العيون
$$$$$$$$$$$$$$$$
اهل الظلاله بلا رحم وذرو چبده
والحلم بعده مختفي. ماي وتبده
مطروح ظل مثل السبط  يشبه الجده
مطروح ظل عله السطح  وشلون نهده

جبريل من هل مدمعه
         اينادي عظيمه الفاجعه

وأحبابه مفجوعه وتون.  عالراس ايلطمون
لجل الجواد بكل ألم دم تجري العيون
$$$$$$$$$$$$$$
الخادم عبدالمعين الشمري

محرم 1447 هـ

يامولاي حسين  ـ يامولاي

يحسين انته بالروح ـ ساكن مااعوفك
ماشفـتك بالعيون ـ بس بگلبي اشوفك
اشعر صدري يرتاح ـ بالحضره امن اطوفك
يا اعـــــز كل ناسي
يالملكت احساسي
اوياك ارفع راســي ـ وفخر هولاي

يامولاي حسين   يامولاي

ـ////////////ـ///////////ـ

اشتسوه الدنيه مولاي ـ لو ما انته بيها
وخدامك يالحســـــين ـ حبك محتويها
طعم الخــــدمه محلاه ـ ومتعود عليها
يالمــــــكبر شاني
ياســـــليل احزاني
شعندي غيرك آني ــ  واگف اوياي

يامولاي حسين    يامولاي

ـ//////////ـ//////////ـ

عاشورك يالحسـين ـ متحــــزم ونطره
ومحضر نعي هواي ـ يوم المقتل اقره
منك للعزه نريد ـ يابوســـــكينه نضره
المجلس ايضل دائم
حد ضــــــهور القائم
ما اهــــــــــــم بالائم  ـ لوفته بهاي
   يامولاي حسين    يامولاي

ـ//////////ـ//////////ـ

الدور غيرك ايضيع . متعافي اعله خيرك
ينذل كلش هــواي . مـــن يخـدم لغيرك
وين بشـدته ايروح . لو ما يستـــــــجيرك
يبــــو الفي الكافي
يبو الگلب الصافي
الباغضك متعـافي ـ وتايه الراي

يامولاي حسين    يامولاي

ـ//////////ـ//////////ـ

نشكر الله خـــــدام ـ خــلانه ابعزائك
الخادم يعني سلطان ـ متباهي ابولائك
نندب ليتـــــنا اوياك ـ كلنه ابكربلائك
ســــــيدي وعيونك
نموت بالطف دونك
فنهم ايمســــــونك ـ اعداك وعداي

يامولاي حسين    يامولاي

ـ//////////ـ//////////ـ

  ✍الخادم
كامل السعيدي

قصيدة الخدمه محرم1447 هـ

خادمـــك خليـــــني ــ ابمجلسك ربيني
انه من دونك اضيع ــ حبك ينجـــــيني
       ــ⊱☆☆❀☆☆⊰ــ

انه ماعيشن حياتي ابلايه خدمة منبرك
العايفك غلطان والله ابكلبه ابد مادورك

يالوجودك يمي نعمه
خلصتلك عمري خدمه
والله لو انطيك عمري
اشويه احسن من اقدمه

من صرتلك خادم  ـ والله ابد مانادم
انه من دونك اضيع ــ حبك اينجيني
       ــ⊱☆☆❀☆☆⊰ــ

انه موذاك المواسي وعندي تقصير شكثر
وانته الي بكل الشدايد حاضــر وماتعتذر
 
ريت كون النار بيــــه
ولاتشب خيمة رقيه
وكون دون مخدراتك
تحتـــــرك بالنار اديه

روحي اطشها اگبالك ـ يالچثيره افضالك
انه مـــن دونك اضيع ـ حبك ينجيــــــني
         ــ⊱☆☆❀☆☆⊰ــ

بگلبي جمرات المخيم تسعر وماتنطفي
بالطم والنوح لجلك روحي ابد ماتكتفي

يلي ضحـــيت بعيالك
منك شيوفي البچالك
والحوفر مــن سحگها
ترست الگاع ابوصالك

اشنفعي من تبريري ـ اعفي عن تقصيري
انه مـــن دونك اضيع ـ حبك ينجيــــــني
         ــ⊱☆☆❀☆☆⊰ــ

بلا مقابل دوم اخدمك وانته تعلم غايتي
انتـه اعـرف مـني بيـه وادره حـتى ابنيـتي

بيك اواسي الزهره رايد
حيلها ابعاشــــــــور بايد
والان تحضر كل عـــزيه
احضر اقرالك قصــــايد

اوياها احيي امصـابك ـ يالسليبه اثيابك
انه مـــن دونك اضيع ـ حبك ينجيــــــني
         ــ⊱☆☆❀☆☆⊰ــ

بصدري ريت اسهام صدرك كلها والرض والسحگ
ومثل عابس بيك افوزن وفتهم معنى العشگ

وثوبي الك يوميه اشگه
يالعشت بالريه شـــهگه
اقبلني يابوســكينه يمك
وطـــن مثلك وين الـگه

ابزغري لذت ابسورك ـ ومالي گلبي اينورك
انه مـــن دونك اضيع ـ حبك ينجيــــــــني
         ــ⊱☆☆❀☆☆⊰ــ

✍الخادم
كامل السعيدي

نزال الام البنين ع
محرم 1447 هـ

ام البنين الفــاگده اتنـــــوح
لجل الحسين المات مذبوح
ـ--------------------ـ

بشر ابن حذلم من اجه وصاح
يهل المدينه حسيـــــــنكم راح
دارت عليه اســــــــيوف ورماح 
سمعـــــــــته أونت ونت الدوح
ـ--------------------ـ

تركض لفـت والگلـــب بي نـار
صاحت يبن حذلم شـنو الصار
عن الحســــين اشعدك اخبار
كلها بقه اعله الگاع مطــــروح
ـ--------------------ـ

اشسوه ابولدها شعامل البين
ما ســألت وكل همه الحسين
عالزهــــره ضلت تهمل العين
تواســـــــــيها والدلال مجروح
ـ--------------------ـ

ما صـــــح مثـلها بالنساء دوم
اتضــحي ابولدها الاربعه ابيوم
وخـافن امقصره ابروحه اتلوم
للزهره همها اتقــــــدم الروح
ـ--------------------ـ

لوعشــره عندي اتگول شبان
لحســـــين كلها انطيها قربان
آيات همه وهــــوه قـــــــرأن
فـدوه البنين الخاطره اتروح
ـ--------------------ـ

  ✍ الخادم
كامل السعيدي

فاطمة العليله ع محرم 1447 هـ


هل محرم وبتدت احزاني
وبالضعينه فارگيت اخواني
يالغريبه ـ صار عنواني
ــ⊱☆☆❀☆☆⊰ــ

گبل الســفر واحد وره الثاني اشبكتهم
وامتـــونهم نگعت دمــع مـــــن ودعتهم
مااكدر اوصــــف حيرتي مــــــن فارگتهم
وجي ماخذوني اويه الضعن هم عاتبتهم

المثلي الله اعله الوداع ايعينها
اوحيده وي احزانها امخلينها
يالغريبه ـ صار عنواني
ــ⊱☆☆❀☆☆⊰ــ

نوگ الســفر مـــن نوخــن ضهري حننه
والشده گبرت من شفت مجفين اهلنه
أگليــــــــــــبي وياهــــــم حچه باليوجعنه
جا هـــــيه سهله وانحـــــرم من المحنه

داري ضلمه وماتعلت نارها
فارگوها ازغـارها وكـــبارها
يالغريبه ـ صار عنواني
ــ⊱☆☆❀☆☆⊰ــ

ودعت چــم ذكرى لمن ابعد ضعنهم
موبس منازلهم طفت موحش وطنهم
كل لحـظه گلبي ابلهفته يسألني عنهم
اتنطر اخبار ورسل توصـــــــلني منهم 

وحدي محد ضل يحس بحالي
افراگ اهلي هم صبح چتالي
يالغريبه ـ صار عنواني
ــ⊱☆☆❀☆☆⊰ــ

وشل دمع عيني وبعد مابيه دمعه
راح الضعن عني وابد مامنه رجعه
گلب المفارگ بس يحن معروف طبعه
بس اليون من الالم محد يسمعه

احلامي كلها راحت وي اعزازي
شـــــــــبه ميته وانتظــر جنازي
يالغريبه ــ صار عنواني
ــ⊱☆☆❀☆☆⊰ــ

اميبس اغصاني الي شوك الاحبهم
وطايرت مثل الورگ روحي بدربهم
لابيه اضل لابيه حــــيل اتبع اثرهم
مليت من كثر النشد ونطر خبرهم

اوياي جرحي ينتظر ويتاني
يشفه لمن ترد ليه اخواني
يالغريبه ــ صار عنواني
ــ⊱☆☆❀☆☆⊰ــ

بدرب الضـعن گد مانحت عالمايجيني
حتى الدرب ضل يفتهم نوحـــي اونيني
كل مغرب ايســـر علّي شوگي وحنيني
فراگ الاهل مثل العطش عاميلي عيني

ضوگوني دموع عيني المالحه
وبدربهم عيـــني ضلت شابحه
يالغريبه ــ صار عنواني
ــ⊱☆☆❀☆☆⊰ــ

✍الخادم
كامل السعيدي