نعي في شهادة الرسول الأكرم صلّى الله عليه وآله وسلّم ،،،، لسان حال الزهراء عليها السلام .
ـــــــــــــــــــــــــــــــــــــــــــــــــــــــــــــــ

يبويه الدار ما تنطب بَليّاك
إذا رايد تروح انروح ويّاك
حال الضيم حالي اليوم بَعداك
أهِلّ ادموع عالوجنات مِن دَم

رِحِت عَنّي وعِفِت بِنتَك يَتيمَة
يبو القاسم يبو النفس الرحيمة
چِنِت إلهَه ولَبو الحسنين خَيمة
عگب عيناك كِلّ الضيم يِلتَم

أروح اوياك يالوالد تِمَنّيت
وتشوف الصار يالمختار ياريت
وتشوف شلون مِن هِجموا على البيت
سِطَر عَيني وعَلَيّه الكون عَتّم

يبويه اخلاف عينك شَبوا النار
وبَعَدهه اتحوم روحك داخل الدار
تِمادَت أمّتَك بالشّر يَمُختار
ولا واحد حِشَمني وچان مِهتَم

تعال وشوف ضلعي شلون مكسور
وصِدَر منهم كِلّ الچان مَحذور
على الصبر الجميل اليوم مگدور
لَچن فرگاك خَلّه الكون أظلم .

ــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في شهادة الرسول المصطفى محمد صلى الله عليه وآله وسلّم …. مِن قصائد المُلَمّع
ـــــــــــــــــــــــــــــــــــــــــــــــــــــــــــــــ

تَنـــــعاكَ الـــنُورُ وطــهٰ
والشمسُ ينوحُ ضُحاها

لَيــــلُ رَحيــلِكَ يَغشاها
لَيــــلُ رَحيــلِكَ يَغشاها

ـــــــــــــــــــــــــــــــــــــــــــــــــــــــــــــــ

هالليلة أملاك السّمَه
تِذرِف دَمع محزونة

أوّلها جبريل الوَحي
تِهمل مرارة ٱعيونه

وبطيحِتَك شاع الخَبر
والكـون ٱتغيّر لونَه

طه النبي اليوم ٱرتَحَل
والعــايلة ٱيوَدعـونه

موسـىٰ يبكيكَ ونُوحُ
عِيسىٰ بالحُزنِ ينـوحُ

والأرضُ عليكَ شَجاهـا
لَيـــلُ رَحيــلِك يغشاها

ـــــــــــــــــــــــــــــــــــــــــــــــــــــــــــــــ

هالليلة مهضوم الوصي
وهِجمَت عليه أحزانَه

مِتصَبُّر بهالفاجعة
بتَسليمَه وبإيمانَه

رَاح الأخو الچان السّنَد
ومَحّد يِسِدّ ٱمچانَه

عالمصطفى ٱيهِل مَدمَعَه
وَي فاطمة الحيرانَة

نادى والدّمــعُ غَزيرُ
قلبي لِلــحُزنِ أسيرُ

والحَمدُ عليك تَلاها
لَيلُ رَحيلِك يَغشاها

ـــــــــــــــــــــــــــــــــــــــــــــــــــــــــــــــ

هالليلـة فاطم نادبة
وساتِر جِفِنها ٱتهَدّم

تصيح بهضُم يا والدي
كِل عمري راح أتألّم

روحي العَليك ٱمعَوّدة
ومِن عگبك آنه أتيَـتّم

مو بَس دَمِع عيني تِصُب
من فرگتك تهمِل دَم

تَبكيكَ مَعي الحُجُراتُ
وبأحشائي الزّفَــــراتُ

تنعىٰ الزهـراءُ أباها
لَيلُ رَحيلِك يَغشاها

ـــــــــــــــــــــــــــــــــــــــــــــــــــــــــــــــ

يالهادي يا مَن بالفَضِل
عِدوانَك التِشهَدلَك

يالصادق بقول وفِعِل
مَحّـد تِنَـكّر عَدلَك

يالمُصطفى وكِل غانمة
منسوبة لَك وترِدلَك

مالَك شَبيه برَحمتَك
يتشافى كِلمَن صَدلَك

بالحكمةِ بَحرُكَ زاخِر
واللُّـبُّ بِكُنهِكَ حـائِـر

قَدْراً قَد حُزْتَ وجاها
لَيلُ رَحـــيلِك يَغشاها

ـــــــــــــــــــــــــــــــــــــــــــــــــــــــــــــــ

يا أشرَف وأعظَم بَشَر
رَبّ العَرِش يخـتارَه

مِن قابَ قوسين ودَنا
وأصبَح كَهِف أسرارَه

وكِلّ العِباد ٱتعَلّمَت
مِن غِيرِتَه وإيثارَه

بيوم الوَطيس ولَو حِمَه
تلوذ الزّلِم بَكتارَه

يا خَيرَ الناسِ مَقالا
فَــذّاً وبَلَغتَ كمَــالا

والنّفسُ تُقىً أثراها
لَيلُ رَحيلِك يَغشاها

ـــــــــــــــــــــــــــــــــــــــــــــــــــــــــــــــ

لمصابك ٱعيون الفَلَك
تِجري المدامع طوفان

وحَتّى الجماد بطَيحِتَك
ظل ٱيرَدّد بالأحزان

واويلاه ٱعللمصطفى
وتِسمَع وَنينه الأكوان

مشلولة الإيد الغِدرِتَك
لِلهُدى أنهِدمَت أركان

وعليكَ الطّورُ تَصَدّع
ثغــرُكَ لِلسّــمّ تَجَـرّع

والكـعبةُ لاحَ بُـكاها
لَيلُ رَحيلِك يَغشاها

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في إستشهاد النبي صلى الله عليه وآله وسلم ،، لسان حال الوحي وهو ينعى المصطفى ،،،،

ــــــــــــــــــــــــــــــــــــــــــــــــــــ


بدمعة وحِزِن أبقى أنعاه
يا المصطفى واويلاه

ــــــــــــــــــــــــــــــــــــــــــ

مِن انزَلِت شِفتَك على
فراش المنية ٱمدّد

دمعي انسچب منظر كَلِف
فراگك صَعب محمد

أنعى بحزن وَانَه الوحي
أحضر رحليك وَشهَد

وليل الألم والفاجعة
عالدنيا أصبح سرمد


يا مَن چنت إنتَه اضواه
يا المصطفى واويلاه

ــــــــــــــــــــــــــــــــــــــــــــــــــــــــ

مَوقِف صَار ومِنّه اسألِت
هل هاذي أمة طه

گالوا عليك إنتَه تهَجُر
وأنت الذي نَجّاهه

ولو ما وجودك ياالنبي
الأمة ابتِلَت بلواهه

أمة استحقت قارعة
من ضَلّت بمَسراهه

طعنة ظَهَر يا وسفاه
يا المصطفى واويلاه

ـــــــــــــــــــــــــــــــــــــــــــــــــــــــــــــ

عنك مشوا متفرقين
تحت السقيفة الأصحاب

نِكرَوا وَصِيتك يا حَيف
بأهلِ الكساء الأطياب

رَادَوا وَصيّك مجتوف
للبيعة قسراً ينجاب

وموقفهم من أمّ الحَسَن
عصروهه صَحبك بالباب

وتنادي آ يا طفلاه
يا المصطفى واويلاه

ــــــــــــــــــــــــــــــــــــــــــــــــــــــــــ

بسَيفِ الحِقِد يا المصطفى
صابوا علي بالهامة

والدّم يِخَضّب لِحيِتَه
وضاگ الهَجُر وَالامَه

وزينب تنوح لروحِته
وظلّت تنوح ايتامه

والعَدِل والحق فگدوه
وانفجعت الإمامة


والعِلم ناح لفرگاه
يا المصطفى واويلاه

ــــــــــــــــــــــــــــــــــــــــــــــــ

بإبنه الحَسَن دار الوكت
چبده بسموم تگطع

وحسين اخوه يعاينه
وگلب العقيلة ملوّع

وتصيح زينب يا علي
لِبنَك اريدك تفزع

وَينك يا حمّاي الحِمَى
يا بويه رَيتك ترجع

والحَسَن يلفُظ چبداه
يا المصطفى واويلاه

ـــــــــــــــــــــــــــــــــــــــــــــــــــــــــــ

وبكربله صار امصاب
بسَيّد شباب الجنة

بحَرّ وعِطَش ذِبحَوا هَلَه
والماي انحَرَم مِنّه

ظامي انذبح صدره انهشم
بخيل العِده السحگنه

شال النحر بيده الشمر
بأعظم مصيبة ومِحنه

عالرّمل مَحّد واراه
يا المصطفى واويلاه

ـــــــــــــــــــــــــــــــــــــــــــــــــــــــ

بقلم الأستاذ/ ستار عذاب الحچامي

نزال

قصيدة بلسان حال الزهراء عليها السلام ، تنعى أباها المصطفى صلّى الله عليه وآله وسلّم ...
ـــــــــــــــــــــــــــــــــــــــــــــــــــــــــــ


أويلاه غاب نور المصطفى
أويلاه غاب نور المصطفى

ـــــــــــــــــــــــــــــــــــــــــــــــــــــ


آنه فاطم يابو فاطم
من عفتني بنوحي

للمآسي سلمتني
وللهضم وجروحي

چنت أبويه وچنت اخويه
وأنت توأم روحي

يالچنت لسراري كهفي
ونته مسمع بوحي

لچن آه شوفي منك ما اكتفى
أويلاه غاب نور المصطفى

ــــــــــــــــــــــــــــــــــــــــــــــــــــ

مِن جمالك من وصالك
مِن عَذِب بسماتك

مِن سكونك من هدوءك
مِن درر چلماتك

عيوني ما شبعن يطه
ولوقع خطواتك

بالأمان أشعر عليّة
من تگع نظراتك

عفتني وي جروحي النازفة
أويلاه غاب نور المصطفى

ـــــــــــــــــــــــــــــــــــــــــــــــــ

من چنت يا بويه تدخل
وبحنانك داري

أشعر بخير وسعادة
يا كهف أسراري

تمشي جدامك رحمتك
يا جلال الباري

كون اشوفن وجهك آنه
ليلي ويه انهاري

حياتي عگبك اعليها العفى
أويلاه غاب نور المصطفى

ــــــــــــــــــــــــــــــــــــــــــــــــــــــ


غادرتني بويه وَدري
عگبك يظلموني

أمّتَك نكروا وصيتك
بويه ما حشموني

جاروا عليّة بفعلهم
وبالضلع صابوني

شِعلَوا النار علبابي
ومِن فدك حرموني

يتيمة دمعي بالدم اذرفه
أويلاه غاب نور المصطفى

ـــــــــــــــــــــــــــــــــــــــــــــــــــــ


تدري بعدك آنه تالي
يالنبي محزونة

مِن شفت جور السقيفة
وحيدر يظلمونه

صُبّت ٱعليّة المصايب
وبابك يحرگونه

بيت مهبط للملائك
قسراً ايدخلونه

جنيني غدر أُمتَك يخطفه
أويلاه غاب نور المصطفى

ــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

للصحن جينه. نواسي مهدينه
العسكري بيده. ايسجل اسامينه
*******
الخدمه نوعيه بيها روحيه ابدار الامام
نرفع الرايه واحنه وفايه بهذا المقام

اليوم كردوس الخدم رافع شعاره
والتحيه تختلف جوه المناره
عالامام نسلم ونقره الزياره

نقترب منه وهوه يقبلنه
بالصحن نشتم ريحت الجنه
*******
كل ايادينه بيد مهدينه نبع الحنان
سيد النعمه وعطره نشتمه بهذا المكان

من نطب سامره ياخذنه العشك وين
وشحلات الهوه يم العسكريين
ما يرد خالي اليدك باب الامامين

اشمحله سامره الناضر تسره
وحلف المهدي خادم الحضره
******




كل سنه نعاهد حضرت القائد ونحي العزاء
بالصحن نصطف وخدم نتشرف الراعي العطاء

الرايه هاي المنتظر يشرف عليها
يعني عطر العسكري موجود بيها
بعلي الهادي ونرجس احنه مزوريها

تبقه رايتنه رمز خدمتنه
بدار ابو صالح تعله صيحتنه
******
كل سنه وكل عام تلتم الخدام بوسط الرواق
وللضريح نصد ولحضه من نبعد نموت اشتياق

ونرجع نطوف الكبر ويزيد حبنه
بالامام المهدي متعلك كلبنه
يمته يوم الثار يالغايب ندبنه

دوم ندعيله وكلشي نحجيله
صاحب المرقد ويانه كل ليله
******







الارض سامره تحضر الزهره والهم تنوح
تنصب الماتم والدمع من دم وتبدي الجروح

تعتني يم الامامين الحزينه
اتنادي يبني توني اجيت امن المدينه
تصيح ليش اوليدي جبده مسممينه

عالولد تنعه وتذرف الدمعه
وتدري بالمهدي منكسر ضلعه
*****
تمت
تحسين الخفاجي

على الحسن ويلي وويلاه
......
يالناعي انعى بعالي الصوت
شد الرحال السفرت الموت
اشلون العظيم ايضمه تابوت
يونس بجاله من بطن حوت

بكسرت الخاطر صار ينعاه
.....
مات بغدر سم اليكرهون
واعليه جرت دمعات العيون
اظلم صبح من بعد هالكون
والعرش ناح اويه الينوحون

عظمه المصيبه يلي تهواه
.....
هالساعه روح المهدي ياناس
متوجرة ابنيران الارجاس
ازغير بعدة وشيب الراس
بفراك ابو ما ظلت انفاس

جم لوعه عاش بسبب فركاه
......
وين اليواسي بدمعت العين
قائم محمد ناصر الدين
ذايب دليله من الونين
ما شاف راحه بهاي السنين

سهم اليتم من زغرة صاباه
......
يم النعش متمدد يصيح
ساعه يكوم وساعها يطيح
اشبه بسعفه وتاخذا الريح
فاكد الحيل ودمعته تسيح

من البواجي انعمت عيناه

.......
شيع المهدي والدة اليوم
مو بالمدامع لا بالدموم
عظمه المصيبه حكه مالوم
بيه انزرع كل حزن معصوم

الله يعينه العظم بلواه
.....

للمهدي نرفع تعزيتنه
بلطمت صدرنه الشرفتنه
تحت امره نوضع تضحيتنه
ما نخلف اويا قافلتنه

لخر نفس باقين وياه
......
الحمدالله رب العالمين
اللهم صل على محمد وال محمد
موسى الخادم

أبو ذيات في شهادة الإمام العسكري عليه السلام .
ـــــــــــــــــــــــــــــــــــــــــــــــــــــــــــــــ


تِحِضرَك فاطِمة الزهرة لَوَنهَه
تُوِن وِجــبَال تِتفَطّر لَوَنهَه
تِــشاهِد حَالَك ٱتغَيّر لَوَنهَه
يِگطّع چَبدِتَك سِمّ المِنيّة

ـــــــــــــــــــــــــــــــــــــــــــــــــــــــــــــــ

شتِريدِ الدنيا مِن عِندك وَشِلهَه
سِمهَه ٱحشَاك گطّعهَه وَشَلهَه
وخَلّص حَتّى مِن عَيني وَشِلهَه
وبُقَت بَس بالدّمه ٱعيوني جِرِيّة

ـــــــــــــــــــــــــــــــــــــــــــــــــــــــــــــــ

إلَك ما أبخَل بحَــسرَة وَجِرهَا
مُصابَك جَمرَةِ ضلوعي وَجَرهَا
عَليك الدمعة مَذروفة وَجِرهَا
ٱنكتَب باللّوح يَم رَبّ البَرِيّة

ـــــــــــــــــــــــــــــــــــــــــــــــــــــــــــــــ

**

هوسات في شهادة الإمام العسكري عليه السلام.
ـــــــــــــــــــــــــــــــــــــــــــــــــــــــــــــــ

وَسفة ٱبن النجابة والشرف ظلموه
ما رَاعَــوا گرابة جَدّه وحِـشموه
سَليل الدّين أهـــل الجور سَمّوه

مصدوع الدِين وأركانَه

ـــــــــــــــــــــــــــــــــــــــــــــــــــــــــــــــ

وعلى امصابه الملائك تِهمِل العَبرَة
وَبو صـــالِح دِلِيله يِلهَب بجَمرة
ضَـــــجّت بالألم والدمعة سَامَرّا

ولِبسَت ثوب اسود حَزنانة

ـــــــــــــــــــــــــــــــــــــــــــــــــــــــــــــــ

إبن حَيدر علي باب العِلِم مظلوم
ودَارَه مظلمة وبالوَنّة هذا اليوم
طايِح يا وسافة والچبِد مسموم

وظَل خالِي وموحِش دِيوانَه .

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في شهادة الإمام العسكري عليه السلام .

ـــــــــــــــــــــــــــــــــــــــــــــــــــــــــــــــ

طاح أبوالمهدي وإجتنا ٱعلومَه
چَبدِتَه بسِــــمّ الحِـقِد مَثــلومَة

ـــــــــــــــــــــــــــــــــــــــــــــــــــــــــــــــ

صَاح جبريل ونِزَل مِنّ السّمه
طاح واحد مِن بِنينِچ فاطمة
بالسمومِ الناصِــبيّة الظالِمة

گومِي نوحِي لعَيلِتَه المهضومة

ـــــــــــــــــــــــــــــــــــــــــــــــــــــــــــــــ

گومِـي يا زهراء يا بنت النّــبي
صُبّي دَمعچ عالقَـــتيل الطالبِي
نُوحي لِبنِ الهادي فاطِم وِندِبِي

وِنّي وَنّة ثاكِلَة ومَالومَة

ـــــــــــــــــــــــــــــــــــــــــــــــــــــــــــــــ

وِنّي وَنّاتِ الحَزينة الفاگِدَة
عاللّي جِثتَه ٱعلَلوطية ٱمدّدَة
هَاي الأكوان ٱعلَفگده ٱمرَدّدَة

شِنهو ذنبَك چَبدِتَك مَسمومة

ـــــــــــــــــــــــــــــــــــــــــــــــــــــــــــــــ

شنهو سَوّه العسكري وشنهو ٱقتَرَف
مِن بَحرِ جوده الكَرَم دومَه ٱغتَرَف
بالعِلم والتقوى والـشّيمة ٱنــعَرَف

الغِيرة تسطَع مِن جَمال ٱرسومَه

ـــــــــــــــــــــــــــــــــــــــــــــــــــــــــــــــ

تِسطَعِ الأنوار مِن وَجهَه الصّبوح
لَمسَة إيدَه مَرهَم لكِلّ الجروح
چانَت أنفاسَه عِطِر جَنّة ويِفوح

بشوفِتَه المَهموم يِنسَى ٱهمومه

ـــــــــــــــــــــــــــــــــــــــــــــــــــــــــــــــ

هذا شيخ الگوم مِن عُرب وعَجَم
هذا عنوان الشـــجاعة والشّيَم
لفَگدَه تِبچي الواقعة وهُود وقَلَم

والفَلَك ناح وبِچَى ٱويَ ٱنجومَه

ـــــــــــــــــــــــــــــــــــــــــــــــــــــــــــــــ

هذا أبو المهدي الحَسَن يا فاطمة
سَمّتَه ٱچــفوف الأعادي الآثمَة
عگب عَينَه الدنيا أضحَت مُظلمة

الليلة مُهجَة كِل مُحِب مَلچومَة

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

( يارسول الله )

ابنهجك فاز مَن آمَن وَسَلَّم
يَمَن حُبَّك صراط النه وَسِلَّم
صَلَّى اعليك بارينه وَسَلَّم
ابقرآنه وإلك ألقى التَّحِيَّه

گلبنه اوياك مايگطع وَصِل لَّه
مَكان الرِّفعه مَن مِثلك وِصلَّه
كون الله فُرَح لجلك وَصَلَّى
كل مؤمن عليك ابهالمسيه


الگلب بالخدمه ياهالناس وآله
وربح كلمن الأهل البيت وآله
صَلُّوا عالنِّبي المصطفى وآله
أجر بيهه ورضا الرَّبِّ البريه


( هوسات )

ابسرور اگلوبنه وفرحتهه هالجينه
ابعشگ ( للسيِّده آمِنَه ) نادينه
تهانينه ابولادة طه هادينه
( ميلاد العِز ياميلاده )

إسم الخير إسمك يانبع صافي
اشما عَدِّينه فضلك صِحنه مو كافي
مطلوبين الك شنسوي مَنوافي
( لليوم افضالك يالهادي )

(الولاده الجعفريه)

مو بالسِّر عَلَن نادينه عالمنبر
نتباهه انتمينه المدرسة جعفر
على كل نهج هذا النهج يتصدَّر
( والصادق نور ويهدينه )

ولادة جعفر الصادق ولادة نور
يهدي العالمين وللبشر دستور
فرحان الموالي ابمولده ومسرور
( وايهنِّي المَهدي ابميلاده )

سيد علي الموسوي

بُشرَه ميلاده...سيِّد السَّاده
صلوات صلوات على محمد وال احمد

ابمولد الهادي ابتشرنه..أحله ذكرى من تمرنه
حگنه نفرح هالمسيه...ابخدمته الليله افتخرنه
كل گلب بالفرحه ناده...والله غُمرتنه السعاده
اليوم أرض الله وسمائه...تفرح ابهاي الولاده
ها يهادينه...كلنه نادينه
صلوات صلوات على محمد وال احمد

نفرح ابشوگ اعتنينه...آمنه انهنيهه جينه
عيد عدنه وحگنه نفرح...ابمولد الهادي نبينه
كل موالي الليله عَيَّد...بسم ابو الزهراء رَدَّد
مستهل هالفرحه نقراه...يارسول الله محمد
حگنه نتباهه...بالنبي طه
صلوات صلوات على محمد وال احمد

يوم ابو الزهره وحفيده...يوم نوماس وعقيده
صلو عالهادي وعترته...مُختصر هاي القصيده
الوالد الزهره الزچيه...كلنه صحنه ابهالمسيه
نفرح ابمولد نبينه...وبالولاده الجعفريه
ناده كل عاشق...ابمولد الصادق
صلوات صلوات على محمد وال احمد

صحنه ياصاحب زمانه...ياأملنه ويارجانه
ندعي يامهدينه وانت...تستمع هذا دعانه
ردنه منك ياولينه...نظره من عينك علينه
للنبي هاي الرساله...الليله تاخذهه امن ادينه
گله أحبابك...هالتدگ بابك
صلوات صلوات على محمد وال احمد

سيد علي الموسوي