هالعزاء....مانتوفق انحظره
هالعزاء....لوما نظرة الزهره

من حظرنه للعزاء واتوفقينه
هاي دعوة فاطمه ونظرتهه لينه
اهواي ام الحسن متفظله علينه
حتى جيتنه بديهه ومو بدينه

هالعزاء...مانحظر إله ونقره
هالعزاء...لوما نظرة الزهره
.....................................
چان بيت احزان واحد فاطمه الهه
هسه صارت هالمجالس إلهه كلهه
هيه ام التعزيه وعونه الوصلهه
والله هذا الخير كله من فضلهه

هالعزاء...گلب الطاهره ايجبره
هالعزاء...لوما نظرة الزهره
.......................................
خل تلوم الناس بينه ماتهمنه
على حب هاي الخِدامه انشد حِزِمنه
نعتبر أم الأماجد هيه أمنه
نبتعد والزهره بالمجلس تلمنه

هالعزاء...يضمن للمُحِب أجره
هالعزاء....لوما نظرة الزهره
..........................................
بالعشگ يهل العشگ صرنه عوابس
وابمحبة فاطمه يحله التنافس
غير هاي الخدمه ابد ماعدنه واهس
واعله كل جو يختلف جو المجالس

هالعزاء....حَتماً يختلف عطره
هالعزاء....لوما نظرة الزهره
........................................
إي وحگ زينب واخوهه الغالي عباس
نبقه خدام الزچيه الآخر انفاس
عالم الخدمه يوادم عالم احساس
باچر ايبيض وجهنه ونرفع الراس

هالعزاء...نعمه ونكسب البُشره
هالعزاء....لوما نظرة الزهره

سيد علي الموسوي

ياعلي...إلك أدعي ابدمعتي وبجروحي
ياعلي...ألله ينطيك الصبر ياروحي
( إنَّا للهِ وإنِّا إليهِ راجِعُون )

إلك أدعي ودعوتي..ابجرح گلبي ودمعتي
الله ينطيك الصبر يابو المصيبه
اشلون تگظي دنيِتَك...وَيَّه وادم أذِّتك
الغربه يعني اتعيش وي وادم غريبه

الوادم الماتستحي امن الله ورسوله
اشلون راح اتعيش وياهم هذوله
الطبو الدار الوصي وضلمو بتوله
والله ماعدهم كرامه ولا رجوله

ياعلي...ندعي ربنا ومايرد دعوانه
ياعلي...الله لايرضه على الأذَّانه
( إنا لله وإنا إليه راجعون )
......................................
گلبي بالهم مبتلي...وبالي يمك ياعلي
ضلعي مايوجعني توجعني غربتك
صعبه اشوفك تنكسر...وانت المبچّي الكفر
وصافن اعله الباب واجروح ابصفنتك

ايعينك الباري يحماي الحميه
حين شفت الباب دفعوهه عليه
ياعلي وابدفعة الباب القويه
تالي آنه ومحسنك طحنه سويه

ياعلي...واكبر اجروح الصفت تاذيني
ياعلي...أبچي گدام الحسن وحسيني
( إنا لله وإنا إليه راجعون )
......................................
جرحك ابكبر السمه...وحالك ابلا فاطمه
عايش ابدنيا مُضلمه وگاع صَحره
آنه بالنسبه إلك...روح عشت ابداخِلَك
وادري بفراگي تصير العيشه مُرَّه

آنه يمك ياعلي ومشدوه بالك
بلله عنك لو غبت شيصير حالك
واليگول البگه ابراسك عالجرالك
ابهالمصيبه ياعلي هو اشبگالك

ياعلي... حيلك انهَد والعيون امغيِّمَه
ياعلي...اشلون باچر من تودع فاطمه
( إنا لله وإنا إليه راجعون )
......................................
يالمصابي امعذِّبَك...وهاضمك وامتعِّبَك
وادري راح ايشيب گلبك من مصابي
اشلون عنك لو رحت...وين يافاطم صحت
راح تلگه اجواب حسرات اعله بابي

أقره بعيونك أنه ابهاي المسيه
ادگول كلشي ولا تروحين امن اديه
انكسر گلبك عالجره والصار بيه
اشلون لو دارك تضل مِنِّي خِليه

ياعلي....تنحب وكسر الضلع موضوعك
ياعلي...ابغيبتي ياهو الينشف ادموعك
( إنا لله وإنا إليه راجعون )
.....................................
أنحب ودمعي ايهلي...(حسبُنا آلله ياعلي)
عالضلمنه وفرهد العِشره وهظمنه
باچر اولادي تحن...وزينب اوياهم تون
ويلي وينادون مشتاگين لُمنه

آه باچر لو متت تشبگني اديهم
تنحب املاك السمه وتبچي البچيهم
ولدي اعز امن الهوه وعينك عليهم
وآنه ماداعي بعد أوصيك بيهم

ياعلي....ولدي كون ابعينك اتخليهم
ياعلي...اهواي اريد ابزينب اتوصيهم
( إنا لله وإنا إليه راجعون )

سيد علي الموسوي

الهذا العزاء...ننوي الحظور
ونهدي الثواب...لهل الثغور

ابمكان البي ذكر للباري والعتره
أكيداً نكسب الألطاف والنَّظره
اليرابط من أجل دين الله واينصره
يستاهل دعاء ابمجلس الزهره

نسإل إلٓه العالمين..حَصِّن ثغور المُسلمين
ابجاه البتول

يحله الدعاء...ابلطم الصُدُور
ونهدي الثواب...لهل الثغور
........................................
بالهادي وعلي وبت سيد الكونين
يرب ابقوِّتك أيد حُماة الدين
ابجاه اهل الكساء وهل أتى وياسين
وفقهم النصرة فاطمه وحسين

ياناصرَ المُستَضعَفِين...حَصِّن ثغور المسلمين
ابجاه البتول

رزقه الثبات...الگلب الغيور
ونهدي الثواب...لهل الثغور
...........................................
ألَّلهمَّ يامَن حافظ القرآن
أحفظ ناصرين الدين يادَيَّان
سَدِّد رمية اهل الحق على العدوان
واهلك مَن أراد السوء بالإيمان

يامَن تِعِزِّ المؤمنين...حَصِّن ثغور المسلمين
ابجاه البتول

حتماً يفوز....البسمك يثور
ونهدي الثواب....لهل الثغور
..............................................
التدافع عالعقيده وعن أراضيهه
تعيش احرار مادام النفس بيهه
إيد ابإيد ندعي ابفد دُعاء ليهه
(أولي البأس الشَّديد) اتفوز تاليهه

والخَاتِمَه النَّصر المُبين...حَصِّن ثغور المسلمين
ابجاه البتول

رغم الجروح....لابُد سُرور
ونهدي الثواب....لهل الثغور
.......................................
يارب العرش يارافع السبعه
آمال الشعوب ابصاحب الطلعه
ابدعاء الفرج ندعي وانت التسمعه
ابجاه ام الحسين الطاهره البضعه

وابحيدر وأم البنين...حَصِّن ثغور المُسلمين
ابجاه البتول

يجلي الهُمُوم....يوم الضهور
ونهدي الثواب....لهل الثغور

سيد علي الموسوي

آه وا ويلاه يا ام البنين 
آه وا ويلاه لليوث العرين 
@@@
ياللي شلتي كربله بماي الدمع 
وتبچي لين النفس منچ ينگطع 
على راس احسين عالي منگطع 
وحوله اولادچ ضحايا مجزرين 
@@@
ابذاكرت ضلعچ ضحايه كربله 
ومصرع حسين وسبيها العايله 
وليهم ادموعچ ياحره سايله 
وضل دليلچ ينبض ابحرگه الونين
@@@
بشر جاب اخبار هدتلچ امل 
وما يهمچ طاح بالرايه الكفل 
گلتي بس حسين ليكون انقتل 
وعسى دونه اولادي صرعه مطشرين
@@@
يالحفرتي اگبور اربع بالبقيع 
ولاچن انياحچ للكبر والرضيع 
وعلى جسام التحنه بالنجيع 
وعلى من سحبوها بالحبل المتين
@@@
ساعد الله گلبچ الكله وفه 
نحتي لين الموت آل المصطفى 
وگلتي بعد حسين عالدنيه العفه 
ويلي عالمقتول وحده ابلا معين 
@@@
بالبقيع النوح لعنان السمه 
حين تبچين ابمدامع من دمه 
اتصيحي اولادي فده بن فاطمه 
وعلى گبر الزهره ثكله تنحنين 
@@@
علي أحمد الحمود 
٧-١٢-٢٠٢٤
وفاة ام البنين ع

مقدمة لأُم البنين ع…..

سلام الله على صبرچ
على صبرچ سلام الله


خلصـتي العمـر شــوغات وجـروح
وي صوت ابن حذلم طلعت الروح
لحـد ســـاعة مماتچ ماهــده النوح
الله يعيــنچ اشــــگد شفـــتي اذيه


بيــه عـــازه الابـن والنـاس يدرون
يشيل اجنازت امه اويه اليشيعون
غايب ليش عنـــچ حـادي الضعون
هضيمه اچفوفه طاحن عالوطــيه


منو المثــلچ تضــحي باربع اقمـار
واحــــدهم كلف وسيــــوفهم نـار
يـم عباس بيــــچ الفكــــر يحــتار
فديتـــــي اهروش گلبـــچ للزچيه


فخــر عنـــدج يفاطم عيب ينقاس
النسه اتحسدج الان خلفتي عباس
ابوفائــچ وبولائــچ تشــــهد الناس
ومثل صبـــرچ صبـــح لهل البــريه

شگـد حلوه الولد يمـچ يحظرون
والعبـــاس بيــده يغمـض العيون
وفوگ امتونهم نعشـــچ يشيلون
ويدفنــــوچ وينصــــبولچ عــزيه


          الخادم
✍كامل السعيدي

[[💔موشح الى مولاتي أم البنين .ع.💔]]

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

ألوداع الملتقى عند الحسين

في أمان الله يا أم البنين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

في أمان الله يا أم ألوفه
حيره يا مولاتي أذكر يا صفه
بكلشي واسيتيهم آل المصطفى
ولو يصح بيدچ تقدمين الوتين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

حيرة شذكر وانتي مجموعة صفات
قدوة أنتي لجميع المؤمنات
ضربتي أروع أمثلة غيره وثبات
مفخرة و زوجة أمير المؤمنين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

عن درايه و معرفه أختارج عقيل
بت حمولة ودين و المعدن أصيل
الهدف من عندچ يحصل كفيل
هيچ منه راد أمام المتقين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

گله راید وحده جابتها الفحول
كون طيبة نسب من اهل الاصول
و بحنان تراعي أيتام البتول
وبلكي منها يصير ناصر للحسين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

صار ما راده علي و جبتي العضيد
وزين يدري بوالده منه شيريد
حامه عالخِدّر الى قطع الوريد
مخضب و لا يسرة ضلت لا يمين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

و داعتچ یالطاهره ورب السماء
مثل أبو فاضل فلا صح بالوفاء
وحده لكن جيش أصبح للفداء
صار بالغيره مثل للعالمين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

✨️ثواب هذه القصيدة الى روح الفقيد سماحة القائد حسن نصر الله وعامة المؤمنين ✨️

جهاد البصيراوي

 هوسات لامير المؤمنين ع





علي ومحتار شكتب بيك .. حيل السالفه اتحير
يالــجـــبريل گــــدامــــك .. يطـلـع كلـش ازغير
الناس اتسير اعله الـناس .. وانتـه الربك اتسير
يالربـك فاتحــلك بـابه



------



الناس اصناف ياحيدر .. لكــن انتــه صنـــفك غير
يمسوي للفقره اجيوب .. وتارس حوصلة كل طير
خيـر الوادم اشـــويون .. وانته يفيـض چفك خير
يمشبع الوادم ماعونه


----



يقيسونه علي اويه افلان .. وانه ابنبــي ماقيسه
عيسى وچيه حيه الميت .. الوادم عاجه ابعيسى
علي ولومــات هذا الكون .. يحيـه لمـن ايجـيسه
ويــرد الكون بعافــيته
------
حيدر تركي الكربلائي

في ذكرى مولد ابو الحسن علي بن ابي طالب ع                    

علي يامحبوبنه...علي ياعلي
ياطبيب اگلوبنه...علي ياعلي
ياكرار...ياكرار

لغز ميعرفونك...فقط ألله وطه
بسمك وشخصيتك...حگنه من نتباهه
صورتك عدوانك...حارت ابمعناهه
امحبتك ياحيدر...عشنه متنه اوياهه
أول انت وتالي...علي ياعلي
ياعشگنه الغالي...علي ياعلي
ياكرار...ياكرار

كل وكت ويانه....علي ياوالينه
موغريب انشوفك...انت منه وبينه
انت دين الباري...والله ناصر دينه
أول ومو رابع....كل وكت نادينه
يسمع الما سامع...علي ياعلي
اول ومو رابع...علي ياعلي
ياكرار....ياكرار

صرنه بسمك نفخر....حگنه يامولانه
امحبتك يالغالي...تسري ويه ادمانه
سيدي ابميلادك...نورت دنيانه
ياعلي وهالليله...شيعتك فرحانه
ذكره مثل البيعه...علي ياعلي
مرت اعله الشيعه...علي ياعلي
ياكرار...ياكرار

ربعك وجمهورك....إي وحگ اعيونك
رحمة الله انشوفك...مانعيش ابدونك
ياشريك الهادي...ناسك اينادونك
بالرخاء ياحيدر...وبالشدد يردونك
دوم الك محتاجه....علي ياعلي
وانت باب الحاجه....علي ياعلي
ياكرار...ياكرار

سيد علي الموسوي

علي ياعلي...ياحيدر ياحيدر ياحيدر

ياعلي بهمومي واجروحي اعتنيتك
لملمت أحزاني وآهاتي وإجيتك
أرد اگلك غالي يالغالي وهويتك
گبل ما أحچيلك تفهمني لگيتك
وتسمع إلي...ياحيدر ياحيدر ياحيدر
علي ياعلي...ياحيدر ياحيدر ياحيدر

امحبِّتَك تِهدِيني وتِكفِيني يَغاتي
يافخر واتباهه ابحبك كل حياتي
خدمتك ترويني وتحييني ابمماتي
بيهه أرفع راسي لو حانت وفاتي
يامَنهَلي...ياحيدر ياحيدر ياحيدر
علي ياعلي...ياحيدر ياحيدر ياحيدر

إسمك اسم الباري واسرار ابحروفه
حبك ابنص روحي وبگلبي أشوفه
ها كثر لاموني ورادوني أعوفه
جاوبتهم حيدر حَي مَيِّت أطوفه
إنت الولي...ياحيدر ياحيدر ياحيدر
علي ياعلي...ياحيدر ياحيدر ياحيدر

ياشمس مصباحي ويا بدر الليالي
ياوليِّ الباري وغيرك ما أوالي
غالي يابوحسين غالي وأغله الغوالي
أفتخر حبيتك بس حبك حلالي
حُب أوَّلي...ياحيدر ياحيدر ياحيدر
علي ياعلي...ياحيدر ياحيدر ياحيدر

سيد علي الموسوي

نبض دلالي...علي يالغالي

هويته وأفتخر لمن هويته
وگلبي ابحبه تتصدق هويته
أصيح الما يحب نهجه هوه ايتيه
وفاز الحب علي حامي الحميه
ابفرحتي ونوحي
اشوفه ابروحي
طبيب اجروحي
(واليته وافخر واليته)
العشگ يحلالي...علي يالغالي

أحس ابمرقده ابگلبي مدينه
تضل روحي لبو الحمله مدينه
موش اچفوفنه الليله مدينه
نمد ارواحنه ابهاي المسيه
الحفل عنوانه
علي مولانه
زهت دنيانه
(والينه ميلاده الليله)
الفرح يبرالي...علي يالغالي

شموع الفرحه هالليله وجينه
جبنه الشوگ ويانه وجينه
حظره محفله اتحوَّل وجَنَّه
بسم المرتضى الليله زهيه
الگلب كالعاده
ابخبر ميلاده
ينول امراده
(هالليله فرحه الخدامه)
يشاغل بالي...علي يالغالي

كلمن روحه بالمولد سعيده
ربك لابد ايسجل سعي ايده
لخير انفاسي هالمقطع سعيده
اضل اهوه علي الحد المنيه
يطيب احساسي
يرفعة راسي
لخير انفاسي
(محبوبي وحبك يحييني)
يصوتي العالي...علي يالغالي

يمولاي والك نحظر وعدنه
غيرك ابد ما إلنه وعدنه
نريدك تحظر ابساعة وعدنه
وشفاعه انريد يم رب البريه
ينور اگلوبنه
امان ادروبنه
تضل محبوبنه
(من حگنه ابحبك نتباهه)
عقدت امالي...علي يالغالي..

سيد علي الموسوي