💐هوسات مولد الأمام الحسين ع



جـرآنـي الـشـعـر مـولاي بـالـگـوه
ومسموح الغَـزل بعيونـك الحلوه
اشتسوه الحيات بدونك اشتسوه

  (يـمـنـور كـون الـلـه بـنـوره)

*----------------------*-----------------*


شيلومه اليصير حسين محـبـوبـه
ولو موت العشگ ماعوفـن ادروبـه
مكتوبـه العباره بروحي مـكـتـوبـه

(حبـيـتـه ومـاحـبـن غَـيـره)


*-----------------------*--------------------*

مـاريـدن حـيـات حسين مـابـيـهـه
لـلـغـالـي بلاش الـروح مـنـطـيـهـه
شعليهـه الـخلـگ وتـلـوم شعليهـه

   (والـعـاشـگ ليش ايلـومنـه)

*------------------------*------------------*

حـبـيـتـه  وابـد مـاحـبـن الـغَـيـره
لـغـز ويحيّر الـعـشـاك تـفـسـيـره
مـاديـر الـوجـه لـلـغـيـر مـاديـره

     (وأتـغـزل دوم بمحبوبي)

*-----------------------*-------------------*

✍خادم الحسين ع
الشاعر رعد الجريخي

🌷هوسات🌷
للأمام السجاد ع


سـطــع نـور الأمـام الـزاهـد الـعـابـد
مـن يـوم الـولاده وعالأرض ساجـد
جـده المصطفى وحسين ألـه الوالـد

        والــكــون اتـنـوّر بـنـواره

*----------------------*------------------*

عذراً بيش اوصفك سيدي السجاد
نـور آلـلـه انـتـه وزِيـنـت الـعُـبّــاد
الحفل بسمك نقيمه والفـرح يزداد

      يانور الله الـحلـوه اوصـافـه

*-----------------------*-------------------*

يـطـيـور السعد يـم الـمـحـب غَنّن
الفرح مسموح هاي الليله مانحزن
حـقـنـه بـحب علي السجاد نجنّـن

        وشـلـون بـحـبـه ايلومونه

*-----------------------*-------------------*

✍خادم الأمام السجاد ع
الشاعر رعد الجريخي🌹

1- اللهم صل على محمد وال محمد اللهم لك صمت وعلى رزقك افطرت وعليك توكلت
2- يا واسع المغفرة اغفر لي

♡  أفراح    ولادة الامام الحسن المجتبى ع ♡
     

طيبته وأحسانه   والكرم عنوانه
من يطب ميدانه   تختنك عدوانه
        
        ☆☆☆☆☆☆☆
كلبه يوسع دنيا وكله  حنان .
واليجي يمه يحس بس بالآمان
عطره الفواح عطر  كل  مكان
ومن تمسك بيه فايز بالجنان
مولده هليله    والورد نهديله
والكلب يمشيله  بالعشك يحجيله
       
     ☆☆▪☆☆☆▪☆☆☆☆
مثل جده طاهه اقره سيرته
بالكرم معروف تكتل شارته
ومثل حيدر بالمعارك طلعته
ترعب الفرسان قبضة يمنته
اتهاب كلهه اقدومه  من يطب للحومه
الزلم مهزومه      واضحه ومعلومه
        
    ☆☆☆☆☆☆☆☆☆☆☆
كل موالي اينادي بالحب والولاء
بالكلب خطينه اله كلمة  وفاء
هو من نوره أخذ نوره الضياء
اشواكنه نبعثهه بجناح الهواء
الروح اله ملهوفه    هلعشك منعوفه
شيعته معروفه    عاشكه لحروفه
     
   ☆☆☆☆☆☆☆☆☆☆
هو   للأيتام  جان الهم  ابو
ألما أله خوان  يصبحله أخو
بالكرم معطاء حتى ويه العدو
يا بشرنه ابنهجه أمشوا وقتدو
اقتدوا بفعاله     وأحفظوا أقواله
واليحب هنياله    الشفاعه اتناله
          
        ☆☆☆☆☆☆☆☆☆
      اسمع انت زين وحفظ هالكلام
   الحسن عنوان  للحب   والسلام
   وسيفه غربل روس أرباب الظلام
   ابن حيدر عل ظلم  لا ما  ينام
لله   ناذر   نفسه       نقتبس من درسه
نستضيئ ابشمسه   وفضله لا ما ننسه
    



الشاعر ...هادي الساعدي 

هوسات  بحق الإمام الحسن ع🌹🌹
إذا عندك امر مستصعب اعليك
وإذا محد اجاك وينشد اشبيك
لوجه الله أخبرك راح ادليك
بس انخه الحسن شتريد ينطيك
،،، بس اومي بجفك وحجيله،،،،
🔸🔸🔸🔸🔸🔸🔸🔸
منو حاتم الطاىي يم ابو محمد
الكرم خجلان من الحسن يتودد
مواقف اله ما تنحسب لا تنعد
،،،، من حيدر ماخذ عنوانه
،،،،،🔸🔸🔸🔸🔸
الشاعر هادي الساعدي

ابوذيات بحق الإمام الحسن ع 🌹
كريم آل النبي معروف وصفاه
أنقى من الذهب معدنه وصفاه
للمعلول حبه دوه وصفاه
كرامات الحسن معروفه هيه
🔸🔸🔸🔸🔸🔸🔸🔸
عليه الدهر والأحزان مالن
عليل وردت للدكتور مالن
نخيت البلشدايد ابد مالان
الكريم ابن الكريم وحلهه ليه
🔸🔸🔸🔸🔸🔸🔸
دارميات
عاشك وحب وشتاگ خل تسمع الناس
بالمجتبى مجنون حد گطع الانفاس

انولد هذا اليوم  نور   الولايه
أعني الحسن معروف وبحسنه ايه

يا هو الذي باساه من فمه طاهه
منك اريد الجواب بيه انتباهه

للجنه سيد صار عنه النبي گال
هو وأخوه معروف جاوبني يالحال
الشاعر،،، هادي الساعدي

ولادة الامام الحسن (ع)




صلوات صلوات هالليله تفرح فاطمه
١

ارد انه اهني الليله كل ساداتي
بيوم الولاده وارد اطش ضحكاتي
بأول أمام وهالفرح من ذاتي
هالليله تفرح للحسن مولاتي

تحيات تحيات نرسلها لعنان السمه
صلوات صلوات هالليله تفرح فاطمه
٢

لمن نزل جبريل جاب البشره
اول خبر شع بسماء العتره
نور الحسن صاغه آله القدره
وانطاه هديه الحيدره والزهره

سماوات سماوات مبتهجه تزهي وحالمه
صلوات صلوات هالليله تفرح فاطمه
٣

شجرة علي اول غصن بغصانه
منها طلع نور الحسن بسمانه
والزهره صوت الي يحب نادانه
لجل الحسن يفرح الليله ويانه

علامات علامات وسط الگلوب الهايمه
صلوات صلوات هالليله تفرح فاطمه
٤
من نور جده النبي ونوره اختاره
رب العله وطش عالمله انواره
محد عرفها للحسن اسراره
اهل الكرم والجود بي محتاره
كرامات كرامات چفه تبوس اتسالمه
صلوات صلوات هالليله تفرح فاطمه
٥

أجمل هديه الحسن هل اعلينه
والليله كلنه نحتفل خلينه
نرفع ادينه وندعي يابارينه
بجاه الحسن عجل فرج مهدينه

والافراح والافراح ندعيها ربي دايمه
صلوات صلوات هالليله تفرح فاطمه



لاتنسون والدي ووالدتي وأبني عباس من الرحمه والمغفره خادمكم رياض الرسل الجابري

( سَيِّدُ الإحسان )

اللهُمَّ صَلِ وَسَلِّم على مُحَمَّد..وَآلِ مُحَمَّد

وُلِدَ الزَّكِي المُجتَبى ذا سيدُ الإحسان
كالشمسِ أشرقَ نُورُه في النُّصفِ مِن رمَضَان

والوالي ابرَمَضَانه...شَع نوره وضوَّانه
معناهه مِن مَهده...يتفايَض إحسانه

تهنئه الحيدر...وطه والكوثر
نفرح الليله...مِنولد شُبَّر
كلنه نتشارَك...ابيوم الامبارَك
والمُحب يهتف...كل گلب دارَك
اللهم صل وسلم على محمد...وال محمد

كالبَدرِ عِندَ تَمامِهِ كالمصطفى المُختار
ربُّ السما أهداهُ لِلزهراءِ والكرار

بُشره ورب القُدره...أهداهُم هالبُشره
والعلياء مسروره...وي حيدر والزهره

مَولد النِّعمه.. للبَشَر رحمه
والده حيدر...والبتول امَّه
كل گلب ناده..الليله ميلاده
ابحب ابو محمد...حقق امراده
اللهم صل وسلم على محمد...وال محمد


مِن جودِ عَذبِكَ أسقِنا ياوارِثَ الأكرَام
يَابَنَ النَّبِيِّ المُصطفى نبقى لَكُم خُدَّام

خِدمَتكُم تروينه...ونظرتكم تِكفِينه
نِتفاخَر نِهواكم...يالحُبكم يِحيينه

هَالعِشگ يكثر ...كل وكت يكبر
يالحسن بيكم...حگنه من نفخر
واحنه عاهَدنَه...تبقى سَيِّدنَه
ياوسيلتنه...وغيرك اشعدنه
اللهم صل وسلم على محمد...وال محمد

سيد علي الموسوي

يسئلوني لِمَن...واجاوب بالعَلَن
على حُب الحسن

أبدي بسم الخالق الباري الرحيم
واحچي عن مُعتَقَدِي وحُبِّي العظيم
حگهه روحي ابعالم الخدمه تهيم
وافتخر خادم لِمَولاي الكريم

نجاتي امحبِّته...فخور ابخِدمِتَه
صحت گلبي اطمئن...على حب الحسن

للإمام المجتبى گلبي انتمه
وابمحبته الروح تبقه هايمه
قَدِّمَت أهل الارض وآهل السمه
تهنئه الحيدر علي والفاطمه

فرحنه ابمولده...وشعار انردده
هله ابمُحيي السُّنَن...على حب الحسن

اشگد عظيم الجاه والعِز والفَخَر
حتى ميلاده صُبح بآعظم شهر
كل موالي الليله ناده وابتشر
(نورَ عَيني) ياسبط سيد البَشر

نداء اليعتلي...مُبَارَك ياعلي
والاصوات اعتلن...على حب الحسن

ابمولد الإحسان هالليله نذيع
خبر سار انولد نور الله البديع
بالحفل خل يرتفع صوت الجميع
بالصلاة اعله النبي الأرض البقيع

نسلِّم والإمام...يرد النه السلام
گلبنه ايزوره حَن...على حب الحسن

سيد علي الموسوي

مولاي مولاي..محله مولدك
مولاي مولاي..محله مولدك

مولدك مولد فخر..صادف ابأعظم شهر
كل محب بيك ابتشر..ناده ياوالينه
تضوي ليلة محفلك..والگلب يتوسلك
يالكريم احنه الك..جينه واتعنينه
للروح للروح..آيه انرددك
مولاي مولاي..محله مولدك

بالعشگ لاموني..والله ميهموني
انت نور اعيوني..گلبي بسمك ناده
يالحسن يالوالي..يانبض دلالي
اغله من كل غالي..ها يعم الساده
وياك وياك..دوم انعاهدك
مولاي مولاي..محله مولدك

يالولاكم معتقد..حبكم احله امن الشهد
صرنه عن ابا وجد..بيكم احنه انفاخر
بينه دوم انشوفك..بالضمير احروفك
هالمسيه اضيوفك..يالمضيفك عامر
ماخاب ماخاب..كلمن يگصدك
مولاي مولاي..محله مولدك

للنبي هادينه..وحيدره والينه
الفاطمه هنينه..ابمولدك مولانه
المحفلك نتعنه..يالمضيفك جنه
نرتجي ونتمنه..وللحشد دعوانه
ونصيح ونصيح..كلنه انساندك
مولاي مولاي..محله مولدك

سيد علي الموسوي