Telegram Web Link
#قصائد_محرم
#بصوت_ملا_احمد_الزوار


شور


لا اكدر اكلك ضل لا اكدر اكلك روح
شيطلعها ال الله وياك وبعيني الدمع مذبوح

الك فدوه لبابه تروح وفدوه تروح لعيونك
ما ادري الحياة اشلون راح تصير من دونك

اجيتك وستحيت اهواي وجم خطوه ارجعت عنك
خواتك كبلي يا عباس خليهن يودعنك

رايح وكلبي اويالعلم رايح
رايح وشي مني احس طايح
رايح وبيه جم حلم ذابح
لبابه انه لبابه انه
****
كل عمرك وفي وما يوم كاسر كلبي بحجايه
قارنت الكمر وياك شفتك احله بهوايه

بوداعك لبابه اليوم يا نوم اليمر بيها
محسوده حبيبي اعليك وعينك خايفه عليها

حبيتك صدك عباس وختاريتك الروحي
اشلونك لمن تكلي اطيب ويشفن جروحي
شنسه يالهديت كل حيلي
شنسه بعدك ما نمت ليلي
شنسه بهجرك جاره سويلي
لبابه انه لبابه انه
**
شلعان الكلب يبدي من الفاركو كلبي
هسه انته رحت عني اشبيه اتعثر بدربي

بعدك ما رحت فركاك شو بين عله جفوني
هسه انته اشحجيت وياي وركضن صبن عيوني

مرات السفر موزين كون اتأجله وتعوفه
والكلبه ارتبط بنسان حته بنومته يشوفه

وينك لبابة عمرك اتريدك
وينك ما لحكت اكض ايدك
وينك اسمي يشمي بوريدك
لبابه انه لبابه انه
*
كلي اشلون اعزن بيك وعن حسين امنعنك
اول مره اشوف حسين ما يشبع شبك منك

ادعي امن الله كون الموت ياخذني ويخليكم
عساها بحضه ذاك الماي شمسوي العطش بيكم

جبناها اعله طاري العين سبحانه الخلق عينك
ومن كثر الجمال البيك كلش تشبه حسينك
حيره روحي بفركتك ضاعت
حيره اضيع الخيمه لو طاحت
حيره سوالفنه بعد راحت
لبابه انه لبابه انه
***
شلي بعمري من بعدك يالحبك كبر بيه
مثلك ما لكيت انسان تارس روحي حنيه

حلوه عشرتك عباس بس شيرجع العشره
وكل غالي يروح بعيد تتمنه تشم عطره

لو ماخذ لبابه وياك بيها اشخلت الفركه
بوداعك بجيت اهواي ومدري شبيه مختنكه

ابدونك ابقه للشتم والطك
ابدونك حته جفوفي ما تلحك
بدونك ويصير المتن ازرك
لبابه انه لبابه انه
*
تمت
تحسين الخفاجي

https://www.tg-me.com/+QYhwKs0Xy1h303S6
مقدمه هلالية

هل شهر الحزن يا قائم العتره
لاشك من تشوفه تخنگك العبره
٠٠٠٠٠٠٠٠٠٠
الله يعين گلبك چم جرح مجروح
من كثر البواچي ما بقتلك روح
وهل شهر المصايب والدمع والنوح
وگلبك يابوصالح ملتهب جمره
٠٠٠٠٠٠٠٠٠
هل شهر المحرم هيّج آلامك
ولو بالدمعه والون عايش ايامك
جينه نواسي گلبك وحنه خدامك
من نظرات عينك ردنه بس نظره
٠٠٠٠٠٠٠٠٠٠
محرّم يا جرح يالمهدي هيّج بيك
ذبح حسين لو جرح السبي مأذّيك
يهنياله التحزّم سيدي يواسيك
لاشك بالصراط بايدك اتعبره
٠٠٠٠٠٠٠٠٠
محرم يعني يتجدد مصاب حسين
وكيد تشوف ذبحه ومصرعه بالعين
وين تروح عاشر من محرم وين
اكيد بكربله وي امك الزهره
٠٠٠٠٠٠٠٠
محرم يعني زينب تنسبي للشام
مجتوفه بحبل بين العده الظلّام
لاشك هاي عندك اكبر الآلام
من دم حگها عينك تنزف العبره
٠٠٠٠٠٠٠
عجب يالمهدي تصبر ما خذيت الثار
وتدري بعمّتك مسبيه بيد اشرار
شوكت تظهر يمهدي وبيدك الفقّار
يومك سيدي يالمهدي ننتظره

سيد زيد الفحام
١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رئيسية هلالية

هلالك بالسمه
صوب فاطمه. بسهام المصيبه
ياشهر الحزن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠
من هل بالسمه هلالك. يشهر الفاجعه الكبره
من سابع سمه حنّت لِبِنهه وناحت الزهره
نشرت للحزن والنوح. قميص حسين ابوالعتره
نصبت مأتم الاحزان. وگامت تسجب العبره
هيّجت الألم
بگلوب الخَدَم ما يخمد لهيبه
لمصاب الابن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠
بجت من شافت هلالك. يشهر الدمعه منهضمه
بدينه انواسي دمعتها. ورفعنه الرايه للخدمه
نواسي الزهره بالآهات. نحطهن لچمه يم لچمه
لاشك تحضر الزهراء. بعزاء حسين ابواليمه
محنية الضلع
وتهلّ الدمع. لمصاب الغربيه
للمجلس تحن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠٠٠
يشهر الفاجعه شسويت. فتحت جروح مصدوعه
هاي ام الگضه عطشان. حسين الكسروا ضلوعه
هاي ام الحسن يهلال. تكض لوعه وتهد لوعه
مصايب كربله انعادت. عليها وهيه مفجوعه
هلالك يا شهر
يرسم چم اثر. بجروح الحبيبه
تبرد لا تظن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠٠
روح ام الحسن حضرت لا شك يا شهر عاشور
حضرت يم ابنها حسين. تنحب والضلع مكسور
شافت عالرمح راسه. وجسمه مگطع ومنحور
وخيل الداست بصدره. ودمه بكل كتر منثور
ينزف شافته
وشبگت جثّته بالمصرع سليبه
عالمامندفن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠٠٠٠
وبعد من شافت هلالك. ذكرت زينب وهمها
تركض تجمع الأيتام. حين الحرگو خيمها
عكب عباس ابوالغيره. غريبه ولا اخو يمها
بين الخيل بين النار. بين الراد يهضمها
زينب تنسبي
بيد الناصبي. بس هاي العجيبه
ما غمضت جفِن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠
نصبت مأتم الأحزان. فاطم بالسمه السبعه
وحين الشافت هلالك. كامت تلطم وتنعه
تتذكّر مصاب حسين. ابنها وتهمل الدمعه
وتحضر بالمجالس هاي تبچي وحيل منفجعه
تشاركنه اللطم
بدموع وهضم. عالمنبر قريبه
ورده بلا غصن
مفجوعه وتون. بسهام المصيبه

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نزلة هلالية

اهلا يشهر الدمعه والآه
رحّبنه بيك بوا حُسيناه
٠٠٠٠٠٠٠
شهر المصيبه شهر الحسين
رحّبنه بيك بدمعة العين
منتظرتك هاي الموالين
وصوت الحزن بسمك رفعناه
٠٠٠٠٠٠٠٠
شهر الغريب المات عطشان
ننشر سواد بكل الاوطان
بقبّة ضريحه راية احزان
نبچي عله قتله ودزم ننعاه
٠٠٠٠٠٠٠٠٠
اهلا يشهر الونّه والنوح
شفنه بهلالك تنزف جروح
بين السبية وبين مذبوح
شفنه المصاب بيوم شفناه
٠٠٠٠٠٠
نستقبلك اهلا يعاشور
اول عزاء بكربله انزور
نقره المصيبه ونلطم صدور
عهد الخَدَم بالطف كتبناه
٠٠٠٠٠٠٠٠٠٠
لأمّ الحسن هاي المواساة
تبچي عله بنها حسين آهات
نشرت قميصه بالسماوات
امّ الذبيح تصيح ويلاه
٠٠٠٠٠٠٠٠
ساعه عله بنها تلطم الراس
ساعه عله زينب ساعه عباس
مفجوعه ام الحسن يا ناس
ياهو التذكره ومنهو تنساه

سيد زيد الفحام
محرم ١٤٤٧هـ
_________________________________________
قصيدة للخدمة

خدمتك حياتي
وندعي بصلاتي
خادم أظل طول العمر يا حُسين
٠٠٠٠٠٠٠٠٠٠٠٠٠٠٠٠
سيدي يحسين من زغري تبعتك
امن الولادة اهلي نذروني لخدمتك
بگلبي مو بالعين يا مولاي شفتك
المغريات هواي لكن ما تركتك
ثابت بولائي
دمي كربلائي
بحبك ربيت امن الزغر. يا حُسين
٠٠٠٠٠٠٠٠٠٠٠٠٠٠٠
آنه تربات المجالس والمواكب
ابقى اخدمك شيعي وبثارك اطالب
مذهبي يختلف عن كل المذاهب
اعتبر حبك فرض منّ الله واجب
كل وكت اشوفك
كعبتي واطوفك
اسمك اشارة عله النصر. يا حُسين
٠٠٠٠٠٠٠٠٠٠٠٠٠٠
اشكر الله هواي وسجد كل مسية
لأن وفقني وصرت عبد الزجية
وخادمك يحسين وفخر للمنية
شما اقدّم ما ارد فضلك علية
بحبك اعتصامي
سيدي وامامي
مقصر اجيتك وعتذر. يا حُسين
٠٠٠٠٠٠٠٠٠٠٠٠٠٠٠
الف هنياله اليخدمك طول عمره
هذا وي حمزه الزغيّر يبقى ذِكره
آنه هم ابچي عليك بگلبي جمره
سجل اسمي بجاه امك لا تعبره
ما عفت عزائك
جنّتي بولائك
منك تعلّمت الصبر يا حُسين
٠٠٠٠٠٠٠٠٠٠٠٠
اني مو بس ابمحرم خدمتي وياك
عمري كلّه بخدمتك ما اكدر انساك
لكن بعاشور اكثر ابچي ونعاك
سيدي يحسين دامي بگلبي الگاك
انظر المصيبه
زينب الغريبه
مچتوفه بحبال الأسر. يا حُسين

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نزلة للخدمة

خادم حسين. اجمل عباره
خادم حسين. عشكي الزياره
٠٠٠٠٠٠٠٠٠٠٠٠
ربوني ونذروني. اهلي لخدمته
بالمأتم. اتحزّم. وخدم شيعته
ماعوفه. كل ليله. أقره زيارته
للجنّه. اتعنّه. شايل رايته

گلبي ينعاه. ليله ونهاره
خادم حسين. عشكي الزياره
٠٠٠٠٠٠٠٠٠٠٠٠
ما عوفه. ومعروفه. زايد عالخَدَم
لهفتنه. وجمرتنه من نار الخيم
عالضامي والدامي. والصدره انهشم
حسراتي. ودمعاتي. ابچيهن ألم

گلبي للموت. ما تطفه ناره
خادم حسين. عشكي الزياره
٠٠٠٠٠٠٠٠٠٠٠٠
رخّصته. وسلمته. لحسين العمر
دم ابچي لمصابه. مو لجل الأجر
متوذّر. متكسّر. بخيول الكفر
اذّاني وبچّاني. والمدمع جمر

عهدي بدموم. كاتب شعاره
خادم حسين. عشكي الزياره
٠٠٠٠٠٠٠٠٠٠٠٠٠٠
بي اسلك. ما اترك. نهجه ومنبره
يحميني. وينجيني. دنيا وآخره
يهديني ويكفيني. اسمي بدفتره
توكفلي. وتشفعلي. امه الطاهره

دربه مضمون. مابي خساره
خادم حسين. عشكي الزياره
٠٠٠٠٠٠٠٠٠٠٠٠٠٠
جم صوره. بعاشوره. يرسمها الدمع
دم نحره. ورض صدره. ونحره المنگطع
اشكيله. وابچيله ولطم عالضلع
أتأمل بالمقتل. حدما انفجع

صاحب الثار. طال انتظاره
خادم حسين. عشكي الزياره

سيد زيد الفحام
محرم ١٤٤٧هـ
_____________________________________________
نعي للعليلة عليها السلام

راحو هلي وظليت بالدار
طفله وعليله وگلبي محتار
ابچي عله بوي حسين ونهار
مدري ببوي شصار ما صار
سهرانه ليلي والگلب نار

سهرانه ليلي وعيني عالباب
احسب ليالي وسلني الاحساب
بلكت علية تعود الاحباب
ذاب الگلب بجروحهم ذاب

طفله وعليله وزاد ونّي
وفراك ابوي حسين سلني
ظني انكطع يا ناس ظني
راح وبعد ما سأل عني


بشر ابن حذلم من سألته
جاوبني بدموعه وسمعته
مذبوح ابوج حسين عفته
هذا الخفت منه وعرفته

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رئيسية للعليلة عليها السلام

لا يگلبي لا تكابر تدري بالرايد يسافر
اغله من روحي علية. لا تظل بغيابه حاير
٠٠٠٠٠٠٠٠٠٠٠٠٠٠٠
لا يگلبي شلون تتقبّل رحيله
وآنه طفله حايره بهمي وعليله
والهجر مثل الجبل ما بية حيله
بلا ابوي حسين اصبر مستحيله
كل صبح متعوده اشوفه. شلون أظل وحدي وعوفه
كل كسر يحصل شفائه. بس يضل جرح المشاعر
٠٠٠٠٠٠٠٠٠٠٠٠٠٠٠٠٠٠٠
ليش من ودعني يا گلبي وشبگته
خنگتك دمعات عيني وما سألته
ليش ما ياخذني وياه اني بنته
گلي متگدرين عالسفره وتركته
ما شلت من عينه عيني. رايح وما ظن يجيني
من مسح چفه عله راسي. روحي حست بالمخاطر
٠٠٠٠٠٠٠٠٠٠٠٠٠٠٠٠٠٠٠٠٠٠
راح ابوي وأخذ وياه كل خواتي
عافني مجروحه آنه وذكرياتي
داري ظلمه وظلمه صارت كل حياتي
يا گلب اتمنّه كل لحظة وفاتي
عالدرب ظليت اتاني. وحسب لجيته ثواني
ليلي ما نمته بغيابه. للصبح كل يوم اساهر
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الطفله لو ما يمها ابوها من يلمهه
من يخفف جرح وحدتها وألمهه
لاشك الطفله اليتيمه يصير اسمهه
هذا حالي وروحي يتزايد هظمهه
لا خبر لا من رساله. لا اجه راعي الكفاله
لا علي الأكبر اجاني. لياوكت ابقه اناطر
٠٠٠٠٠٠٠٠٠٠٠٠٠٠٠٠٠٠٠٠٠٠٠
ليلي ونهاري كمت ابچي عليهم
اهلي وين بيا بلد ما ادري بيهم
من يوصلني صحت يا ناس ليهم
حيل ما بيه اسافر وعتنيهم
لياوكت ابقه انتظرهم. طوّل علية سفرهم
خوفي من غدر آل اميه. والزمن ويانه غادر
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يا گلب هذا الخفت منه وعرفته
ناعي ابوي حسين هذا اللي سمعته
ذبحوا حسين آل اميه وهل دمعته
عالرمح راسه وبقت مطروحه جثته
گتله يا ناعي المصيبه. ارحم بحالي غريبه
وين ابوي حسين وينه. گلي سحگوه بالحوافر

سيد زيد الفحام
محرم ١٤٤٧هـ
______________________________________&&&
نزله للعليلة عليها السلام

يابويه حاچيني
عدمن تخلّيني
يشتد عذابي يشتد عذابي

يا بويه ما احمل هجر طفله وعليله
فراگك جرح يدمي الگلب ما بية حيله
تدري بحياتي من بعدكم مستحيله
دمعي بغيابك لا تظن ينشف مسيله
هجرك يأذيني
عدمن تخلّيني
يشتد عذابي يشتد عذابي


يالعوّدتني بكل صبح تنشد علية
يشفه المرض لمن تحط. ايدك بدية
يا بويه يحسين الألم. شمسوي بية
يعصرني هجرك وختنك كل مغربية
بعدك يضي عيني
عدمن تخلّيني
يشتد عذابي يشتد عذابي


طفله وعليله لياوكت. اصبر وتاني
لا عيني تغفه ولا دمع. ينشف ثواني
يا بويه خوفي امن الزمن غادر زماني
طالت علية سفرتك وشتد حناني
يالماخذ سنيني
عدمن تخلّيني
يشتد عذابي يشتد عذابي


عيني عله دربك وانتظر ترجع يغالي
حال اليتيمه بلا أهل يابويه حالي
مرتاحه بعدك لا تظن سود الليالي
يا طفله مثلي لا اهل. لا عدها والي
چفك يداويني
عدمن تخلّيني
يشتد عذابي يشتد عذابي


يابويه طوّلت السفر يبن الزجيه
لن بشر ابن حذلم اجه ناعي الرزيه
يا أهل يثرب من صرخ صوت المنيه
ذبحَوا ابواليمه السبط گوم آل اميه
وينه اليواسيني
عدمن تخلّيني
يشتد عذابي يشتد عذابي


يا بويه هد حيلي وطحت لمن سمعته
حاچيني يا ناعي اشّفت بعيونك أنته
جاوبني شفته مگطع ومسلوبه جثته
هذا الخفت منه حصل هذا العرفته
منهو اليباريني
عدمن تخلّيني
يشتد عذابي يشتد عذابي

سيد زيد الفحام
محرم ١٤٤٧هـ
_________________________________&__
مقدمه ام البنين عليها السلام

شلتك بعيني ضوه. روحي وغله امن الهوى
انت لجروحي دوه. يا حُسين
٠٠٠٠٠٠٠٠٠٠٠٠٠٠٠٠٠٠٠
آنه ام البنين امك يضي عيني
حسين حسين يبني وشمعة سنيني
عني تريد تبعد ليش حاچيني
خاف البين يحجب بينك وبيني
يبني يا نبض الگلب. تدري بفراگك صعب
گلبي من هسه نچوه. يا حُسين
٠٠٠٠٠٠٠٠٠٠٠٠٠٠٠٠٠٠٠
ما اكدر اودعك يا اعز ولدي
غيرك يا حُسين بدنيتي شعندي
وين بهالهواشم والظعن تحدي
خوفي امن الزمن من ينگلب ضدي
آه من غدر الزمن. عيوني من هسه بچن
يعني ناوي لنينوه. يا حُسين
٠٠٠٠٠٠٠٠٠٠٠٠٠٠٠٠٠٠٠٠
يبني وياك أخذهم اربع اولادي
فدوه لشوفتك يبن النبي الهادي
بيهم ارد حقّق عهدي ومجادي
أهل البيت انتم قاده وسيادي
آنه الكم خــادمـه. ولدي فدوه لفاطمه
گلبي بس حبك حوه يا حُسين
٠٠٠٠٠٠٠٠٠٠٠٠٠٠٠٠٠٠٠٠٠٠
فديتك بالبنين الاربعه وضحّيت
سالم من عدوّك ترجع تمنّيت
ابچي اباب دارك ونتظر ظليت
لا بيّن خبر منك ولا ردّيت
ما بچيت عله الگمر. دمعي لغيابك نهر
يجري ماي ودم سوه. يا حُسين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
صحت يحسين يبني طالت السفره
لن بشر ابن حذلم يصرخ بعبره
حسين بكربله ضامي انگطع نحره
بخيول آل أمية كسّروا صدره
ينزف بصدره الجرح. وراسه مرفوع برمح
الطم وظهري انطوه. يا حُسين

سيد زيد الفحام
محرم ١٤٤٧هـ
_______________________________________&
2025/07/05 12:35:06
Back to Top
HTML Embed Code: