السلام على الطفل الرضيع

طيور الجنة نزلت
عزه ال عبدالله سوت
بالطفوف بالطفوف
/ / / / / / / / / / / / / / / /
طيور الجنة من شافت جراحه
عله جسم الطفل سوت مناحه
كل واحد يضلله بجناحه
عسى العاشر فلا بين صباحه

ملائك لبست ابيض
تقبل منحره الغض
بالطفوف بالطفوف
/////////
نزل من السمه موكب عزاءه
من تحت العرش يحمل دماءه
حضر يم الطفل واشتد بكاءه
رادوا تنذبح بيك البراءه

ينضر والوعد حل
لسانه بالدمه ابتل
بالطفوف بالطفوف
////////////
نزف ضي الشمس من سال دمه
حضرت فاطمة تلثمة وتشمه
جرح محسن يعبدالله تلجمه
هضمكم كسر ضلوعي ييمه

محنيه وتحمله
على نحره تقبله
بالطفوف بالطفوف
////////
طفل حسين محسن ماسك ايده
بالطف كلمن يواسي ابعضيده
يكله اعلينه هايه مو جديده
اختلط دم الصدر وي دم وريده

مصابك وي عذابي
من مسمار بابي
بالطفوف بالطفوف
////////
نسمات الهوى بنفاسه حارت
شهك شهكت منيته وروحه سارت
بنعش نور وعله الافلاك دارت
ل أمصابه بواكي الدنيا الصارت

الكون أعلن حداده
ابحياته وكل جماده
بالطفوف بالطفوف
///////


أحمد عيسى البديري

https://www.tg-me.com/joinchat-B3V-Fj93lrDDLkdaVci6DA

لقاسم عليه السلام

عريس بالطف جسام صوب الوغه ايزفونه
///////////
بدر الحسن من المخيم ازهر
من شافه عمه ناده يبني وكبر
بمثلك يجاسم حكه عمك يفخر
وافاني ابوك ابكربله وماقصر

تمنيته حاضر هليوم وايصد الك بعيونه
عريس بالطف جسام صوب الوغه ايزفونه
///////////
مودع يروحي والحرب ميدانك
ردتك تخط اعله القلب عنوانك
عزمك يجاسم لايك اعله ايمانك
بيديه اوسدك يبني وي خوانك

من دم وريدك حناك بحافر فرس معجونه
عريس بالطف جسام صوب الوغه ايزفونه
///////////
يازين وجهه و للقضه امودعينه
ضي الشمس يخجل يمر اجبينه
حملت شجاعه ورحمه نظرة عينه
شايل شمايل اكبر من اسنينه

افلاك من نور الله اتدور بين عيونه
عريس بالطف جسام صوب الوغه ايزفونه
///////////
ابن الكريم المايسد ديوانه
وبسيفه ضيف بالحرب عدوانه
جاسم اشكبره وكلها هابت شانه
وجيوش اميه من الرعب رجفانه

هذا الشبل شال اطباع من عمه ويعرفونه
عريس بالطف جسام صوب الوغه ايزفونه
///////////
سدر عليهم مثل حيدر جده
وابكل فخر شبل الحسن يتحده
هذا المخيم والسبع يتعده
والجاسره ابدمه اليفايض رده

شايل اوصاف الكرار جيش العده ايهابونه
عريس بالطف جسام صوب الوغه ايزفونه
///////////
مهيوب جاسم بالحرب يتعله
لامو جديده وهايه شيمة اهله
خله العساكر كلها شسع ابنعله
الصعبه عد ابن المكارم سهله

مايقبل ابن الاكرام حافي العده اينضرونه
عريس بالطف جسام صوب الوغه ايزفونه
============================
احمد عيسى البديري https://www.tg-me.com/ahmedessa

خطاب السيده رمله وولدها القاسم عليه السلام

شفت عرس المنيه
عله أرض الغاضريه
يجاسم
__
يريحة والدك يا ذكرياتي
ياكلشي حلو شفته بحياتي
بقت لي أمنيه من امنياتي
سوه موتك يبعد اهلي ومماتي

و واسدك بين اديه
عله أرض الغاضريه
يجاسم
//////////////////
تعرف بالزرع ينطر حصاده
وصيت والدك هليوم راده
يشوفك جندي وحسين القياده
وتوكع بالحرب واتسر فؤاده

نعم هاي الوصيه
عله أرض الغاضريه
يجاسم
/////////////////
تكبر وانتضر عرسك يجاسم
حلم واتحقق ابين الصوارم
رماح اتشابكت ويه القوائم
تزفك وانته عريس الملاحم

تطشك واهليه
عله أرض الغاضريه
يجاسم
//////////////////
ينجمة دربي من سود الليالي
يبسمة فرحتي وخيري ودلالي
يغالي ومابقه من بعده غالي
بعدك ل لحزن والنوح حالي

بقت جثتك رميه
عله أرض الغاضريه
يجاسم
/////////////////
يجسام اشكثر قاسي زماني
خذاك وما رحم عطفي وحناني
عله مجره النحر طيفك خذاني
وتمنيت ابمكانك لو مكاني

عسنها اتصير بيه
عله أرض الغاضريه
يجاسم

احمد عيسى البديري https://www.tg-me.com/ahmedessa

رساله الى كل والد يرى ولده يكبر أمامه عليه أن يتذكر مصاب الحسين بولد

ال يشوف وليده يكبر
خل يشوف ابعينه الاكبر
عل ثره لمن توذر
ابعين الحسين
/////////////////
طلع بدر من المخيم ياحلاته
صاغ ربك من محمد كل صفاته
طلع بس العطش جارحله لهاته
ودارت عليه عمته و امه وخواته
فرفحن من شافن الموت امنياته
هاي اخر لحظه ويودع حياته

اشبه الناس ابرسوله
غيره واقدام وبطوله
اتلهف الموت اعله طوله
ابعين الحسين
////////////////
كل ولد ابوجه ابوه يرسم رحابه
ويزهي كلب الوالد بزهوة شبابه
الله قدر هل عواطف ب احتسابه
جم جبل فوك الارض كله صلابه
مايهم لو داس سبع ابليل غابه
فتته اوليده وهدم حيله مصابه

جم ابو موقف تخاذل
وجم ابو حق وتنازل
علي تدري وين قاتل
ابعين الحسين
////////////////
اشد موقف لل ابو لو تقصر ايده
ومايحقق للولد شنهي اليريده
شحال ابو السجاد من اقبل وليده
ينادي يابويه العطش والكر يزيده
بلكي شربت ماي للحومه البعيده
اكوه بيها اعله الوغه والحر حديده

عبرته سبكت حروفه
مد لسانه وكله شوفه
شمصعب الطف وضروفه
ابعين الحسين
////////////////
راح اسولف قصه الكم بيها عبره
توضح احسين اعل ابنه اشكبره صبره
اجه نصراني وابو الاكبر يخبره
لو الك هذا الطفل شتسوي ب امره
حين شاف الاكبر تحير ابفكره
كله اموتن لوطرف شوكه يضره

هذا المبرقع تنظره
يطيح والعسكر يطبره
وخيل ورماح اعله صدره
ابعين الحسين
////////////////
اشحلات الشاب من ايبان كبره
عوده يشتد بعزم ويزيد قدره
والابو مستبشر وامه تنظره
الخمسه والعشرين عام اسنين عمره
شلون ابوه يودعه وبمصابه ادره
بالجواد ايدور والعسكر يطبره

ودعه صوب المعاره
ومدمعه عل خد تجاره
مشه وموته بأنتظاره
بعين الحسين
////////////////
سمع صوته من المعسكر بالسلامه
والدي اقرها الك اخر كلامه
زئر ليث المعركه وفز ل انتقامه
طر الصفوف ولكه الاكبر امامه
مخذمه اوصاله وعله العادي ابتسامه
والحوافر داسته وطحنت عظامه

الله وحده ابحاله اعلم
والعده ابوجهه تبسم
صار الاكبر لونه من دم
ابعين الحسين
////////////////
شيلة وليده الابو اشكد يشتهيها
حلوه عنده وذكريات تصير بيها
يشم عطره وروحه روحه تحتويها
بس الاكبر قصته يصعب حجيها
احتار ابو من ياكتر جثته يجيها
حيل ماعنده بقه يعينه عليها

ناده يافتيان اخوتي
شيلوا اخوكم قبل موتي
رب اقبل هذا صوتي
ابعين الحسين
////////////////

أحمد عيسى البديري

من يشع بتاره--- غضب تلهب ناره
الاكبر الاكبر
------------------
بزغ بدر من المخيم هاشميه اوصافه
لبه ياحيدر وحيدر صاح كلمن شافه
احرم بلامه قتاله والمعسكر طافه
طاف بين صفوفهه --- وكتب بيده حروفهه
----------
سيفه بيمينه تنصب ملك فوك الحومه
واليبارز علي الاكبر حان وكته ويومه
ذيج الصفوف من اجاهه اصبحت مجسومه
دار بيده الحومه --- هذا وكته ويومه
-----------
نزل شايل سيفه بيده ورايته علمتونه
عاين الجيش وتقدم علبطال عيونه
هيبته هزت زلمهم كبل ليلاكونه
هاشميه افعاله -- والحرب تحلاله
----------
مثل هب الريح الاكبر ماتلحك تنضره
دار من قلب المعسكر واتجه للميسره
فرت كباله السرايه تصيح اجاكم حيدره
حار.كلمن شافه -- حيدريه اوصافه
----------
فخر شبان المخيم مادخله الواقعه
وانجله تراب الحوافر اله تنضر مصرعه
رتل عليهم الاكبر زلزلت والقارعه
ابعلي زلزالها--- اخرجت اثقالهه

احمد عيسى البديري

قصيده الى علي الاكبر عليه السلام

ياعلي ياعلي
#################
شيل عزمك فوك جتفك
خلي كل المايعرفك
ينتضر ويشوف وصفك...ياعلي

جول يبني عله الجحافل
لاتخلي عليهه كافل
بس جسد والموت ماثل...ياعلي

الفخر منك اريده
من فخر جدك تزيده
كال وتبسم عضيده...ياعلي

طلعت العيله تودعه
بدر وازهر بين ربعه
صاح والحومه تسمعه...ياعلي

جرد الصارم وجنه
للعب كلبه تعنه
علمنايه بعلي غنه...ياعلي

خطط عله الجيش حده
ياسبع يحضر لعنده
صاح صيحه بعلي جده...ياعلي

جدحه بعينه المنيه
واكبل عله الغاضريه
هاي صوله هاشميه...ياعلي

رجفت الفرسان يمه
الجيش بين جفوفه صمه
من نطق بالكوم جلمه...ياعلي

احمد عيسى البديري

القصيده الثامنه والعشرون


نزله لسيدي علي الاكبر

صاح حيدر --- الاكبر --- صاح حيدر
--------------------------
صاح الاكبر بالمخيم
لبه يابويه وتبسم
شد رسنها بحيل مهتم
صاح حيدر --- الاكبر --- صاح حيدر
--------------------------
شايل الغيره عله ايده
ونبض هاشم دك وريده
علي صاح اليوم اعيده
صاح حيدر --- الاكبر --- صاح حيدر
--------------------------
توادع ويهله وتحضر
شبل ابو السجاد يزئر
والده شافه يتبختر
صاح حيدر --- الاكبر --- صاح حيدر
--------------------------
طر الصفوف وثناهه
عجج الحومه بسماهه
بروس الابطال يتباهه
صاح حيدر --- الاكبر --- صاح حيدر
--------------------------
الهاشم تلوك الرياسه
وهذا من حيدر اساسه
المايطره يحزله راسه
صاح حيدر --- الاكبر --- اح حيدر
--------------------------
علي صار بكل ثنيه
تموج بيده الغاضريه
صال صوله هاشميه
صاح حيدر --- الاكبر --- اح حيدر

احمد عيسى البديري

القصيده الرابعه عشر

علي الاكبر عليه السلام اشبه الناس برسول الله عليه افضل الصلاة والتسليم
وداع ام علي الاكبر لولدها


على وجهك رسم ربك محمد
كمالك ياعلي ابخلقه تمجد
الاهك من جماله قال كن انته
قربان ارد اشوفه وخيل ساحكته
/////////////////
عن الناس من زغرك اغطيك
واخافن حيل يمه وما اراويك
لهذا اليوم تدري جنت اباريك
اعز ماعندي انته ول الله انطيك

بثبات امشي عله دروب الشهاده
تنول انته وانول انه السعاده
الهوى ال بالدنيه كله يا علي وشمته
قربان ارد اشوفه وخيل ساحكته
/////////////////
اشوفن بيك عمري وكل الاحلام
حلات سنيني ذيج وتعب الايام
يل مفرح دليلي ردتك وسام
كبل كل الهواشم انته جدام

مكانك يا علي ابين العساكر
مثل طوك الرحى يوليدي داير
كل ليلي ييمه البيك ساهرته
قربان ارد اشوفه وخيل ساحكته
/////////////////
علي وجدك علي تاج البطوله
اريد العمتك تهديلي صوله
واريد اتفاخر اب ابن الحموله
دطيب خاطري واذبحلي ذوله

مثل حيدر يبعد امك اريدك
امر هاي العساكر كلها بيدك
زرع عمري البديه ذني كبرته
قربان ارد اشوفه وخيل ساحكته
/////////////////
ياول فرحتي ويا سلوة الروح
دليل الام يغالي دوم مفضوح
ولا يهمك ونيني ودمعي والنوح
اخذ سيفك ييمه وللوغه روح

بدمائك ياعلي تسري الشهامه
سماحة وجهك وسيفك صرامه
حمل التسعه وي ذاك الربه الشفته
قربان ارد اشوفه وخيل ساحكته
/////////////////
راح انظر الك من بين الخيام
ابوك حسين خله يرفع الهام
يل اكبر صير بيهم مثل ابو الثام
يضل سيفك ييمه يشطر اقسام

اقدمك للحرب يمه ابأديه
اواسي بطيحتك كلب الزجيه
وانادي فاطمه بيديه قدمته
قربان ارد اشوفه وخيل ساحكته

احمد عيسى البديري

الشاعر احمد عيسى البديري:
للامام علي الاكبر

ابني الهوى الاتنفسه
من يمشي روحي تحرسه
شفت الحوافر ترفسه
ضامي ضامي

///////
ريت الله لايفجع كلب _ ام ابمصاب كليبي
ما استضل بعده ابسكف _ولا استلذ بعذيبي
ماجف عله وليدي الدمع _ اغفه ويضل انحيبي
حزني عله الاكبر فرق _ فوك الجفن خط شيبي

الدنيا كلها ابنضرته
روحي اعله بسمة شفته
ماتت ابساعة موتته
ضامي ضامي
////////
جمرة ونيني اعله الولد _ شما مر نفس تتلضه
واجب عله اتفكد ولد _ من الدمع تتوضه
لو صلت أهل الهم فرض _ عشره تأدي فرضه
كلشي ايتعوض بالعمر _ بس الولد شيعوضه

فكد الولد مثل الجمر
كل لحظه روحي تستعر
حسره وتفت طود الصبر
ضامي ضامي
/////////
ودعته بيدي للحرب _ وانه ادري بي مايرجع
ماعندي ماي اعله الدرب _ رشيت فوكه المدمع
هسه اعرفت معنه الحزن _ كام الصدر يتصدع
الله يعينج فاطمة _ جم لوعه كلبج يجرع

واحد واعد يومه ابسنه
ماكو مثل فكد الضنه
راح وأخذ طاري الهنه
ضامي ضامي
//////////
من طاح الاكبر عل ارض_ شبت الروح ابناره
لا حول اليه ولاصبر _ بس الدمع يتجاره
خيل وزلم سيف ورمح _ فوك الصدر تتباره
توذر اوليدي وماتلم _ كامت الكاع اكتاره

من ينطبر اني انطبر
كل سهم بكليبي يمر
وينادي يايمه العذر
ضامي ضامي
///////////
فزت مثل طير الكطه _ روحي اعله جسم وليدي
واتمنت اعيوني الاجل _ بس الاجل مو بيدي
شلي ابحياتي من رحل _ اوهوه حزني وعيدي
وجر علي طير الحزن _ وصار البجي تقيلدي


يعكوب وايام البعد
مايوصل الحزني أعتقد
يايوسفي بيرك لحد
ضامي ضامي

احمد عيسى البديري

نعي المصاب الرضيع عليه السلام

ما رحمت سهام الكوم حتى البلمهد بعده
من شاله ابوه حسين بجفوفه مثل ورده
كاللهم يهاي الناس ذنب الطفل ماعنده
أذاه العطش اسكوه من هذا النهر ورده

سكتت كل هذيج الناس وسفه ومابكت رحمه
شعدها وي الطفل من ثار من العلكمي تحرمه
ولن من وسط ذيج الكوم صوب حرمله سهمه
إله افجع ابوه حسين بي واكسر قلب أمه

نسمه من الهوه كشفت ثوبه وبينت نحره
ولن السهم يتعده بين اوداجه وينحره
من حر السهم حسه و قلبه من العطش جمره
رفس من الألم وحسين صابر ياكبر صبره

ضنت أمه شارب ماي من ساكت رجع ليها
وناغت يلولد رديت لكن ما يحاجيها
من كربت لن حسين ببنيها يواسيها
صبري اعله الجره والصار عند الباري نلكيها

السلام على ذبيح نينوى


ياربي رايد حزن
الطم انوح و اون
حد ما اجرح الجفن
لعيون مولاي
رايد عطش مختلف
لبحر الوفه المايجف
عشكي فلا ينوصف
انذبح بالماي
===================
رايد حزن بي جرح
لل بالقفه منذبح
كون الكلب ينشرح
لو صحت ويلاه
لطمي اريده اباثر
وابصدري حافر حفر
حتى افهم الي خطر
والي جره وياه
موقف امامك صعب
ابصدره ماضل گلب
اختلطت اوصال وترب
الجيش خلاه

كون الولي المنتظر
مجلسنه لو بي حظر
يحضر مصيبة نحر
وجروحنه هواي
——————————
يا ربي كون احترك
لحسين من العشك
رايدلي دمعه صدك
عند امه تنهاب
رايد احس بالطفل
من كبال ابوه ينقتل
وبحبال من ينسحل
والجمر لهاب
رايد رماد الخيم
ابريتي يترك الم
والسوط مني انتقم
ومن الاذى انصاب

كون من اطب مجلسه
مثل الهوى اتنفسه
وابجيله صبح ومسه
والخدم وياي
——————————-
ارزقني ربي بعلم
اوعى القضيه ابفهم
وعطر الجنانه اشم
من اعتني ازور
عارف وگاصد اله
بوئني هلمنزله
وال لوعة  العايله
خل كلبي مكسور
كون من اصد للقبر
ابصدري يلهب جمر
والصعدت ا عل الصدر
ابصدري اتدور

يا ليت كنا اكن
ابصدري دونه الطعن
لو بالعذاب انسحن
ما اكتفي بهاي
——————————-
اختملي عمري ابعمل
ياربي ما بي خلل
ينفعني وكت الاجل
من انسأل وين
افنيت كل العمر
خادم ارد وافتخر
وعيوني مثل الجمر
تبجي اعله حسين
كون اصعد ابمركبه
ناعي عله النايبه
وخدودي امتربه
واثار الايدين

احسبني حر وتبت
وبمنحري اتقربت
هنيالي هلحظ صبت
فايز ابدنياي
——————————-
نوح النبي منزله
نال ببكاءه اله
وايوب من ابتله
ايصبره الحسين
ويعقوب وي يوسفه
من ضوه عيونه طفه
عبدالله شيوصفه
بيدين الحسين
كل المصايب اجت
وبكربله اتوطنت
لكنها صابر لكت
من مثل الحسين

حرك شعور الحجر
وعيون دم انفطر
والفضا ابلونه الحمر
تدرون بچاي
لعيون مولاي

احمد عيسى البديري

قصيدة احساس

عندما تحمل طفلك وهو عطشان ويبكي تخيل حالك مثل حال امامك الحسين عليه السلام وكيف ذبح رضيعه بين يديه وعيش احساسه

شيل طفلك
لو عطش والدنيه حر
وعيش جرحك
لو سهم حز النحر
///////////
تخيل الدنيه الضهر
وانته گلبك منكسر
وابنك العطشان تطلب ماي اله
وماتحس لن السهم
ينگط من اوداجه دم
ويفتخر بين العساكر حرمله

هذا حال حسين بين جفوفه طفله
ماشرب ماي وروت اوداجه نبله
تخيل ابيا حال للخيمه يحمله

فوك صدره
لو شفت دامي  الاثر
عيش جرحك
لو سهم حز النحر
///////////
عيش اهات الجرح
كون ابنك ينذبح
بين اديك ومنحره اصبح وصل
ضامي وبحضنك رفس
حار دمه ويچوي حس
وانته وحدك لا معين ولا اهل

شلون عبد الله الرضيع ايفيض دمه
وبالخيم تنتظره مروي ابماي امه
من وصلها وبالنحر منصوب سهمه

ابهل مصيبه
گلب الحسين انفطر
عيش جرحك
لو سهم حز النحر
///////////
اشتكل ل ام الطفل
لو ترد دمعك يهل
ساكت اتشوفه وتضن هوه ارتوه
والحسين ابهل وضع
وبالغوالي منفجع
ايكلها ي ام عبدالله بالدم انچوه

الجره ابسهم الغدر الله ال يعرفه
بيا كلام اكدر الج هل ساعه اوصفه
جيش گله ابطفلي يا أمه تشفه

تشوف دمه
يرسم اهات وصور
وعيش جرحك
لو سهم حز النحر
///////////
ياهو يكدر يحتمل
ينذبح بيده الطفل
شايله والدم عله صدره انسكب
ضهر الحسين انكسر
طفل وبسابع شهر
كبل لحظه بسمته اتزيح التعب

يا مصيبة كربله اعظم مصيبه
روس فوك ارماح والعيله سليبه
وصارت ابذاك المسه زينب غريبه

اشكد اليمه
الطفل گلبه  انعصر
وعيش جرحك
لو سهم حز النحر
///////////
بينه لو صح الوفه
انموت من العاطفه
اليحب لازم يحس ونة حبيبه
اجزم اعلينه فرض
للصدر لازم نرض
من يصيح الناعي زينب يا غريبه

بجاه كل دمعة طفل احساسه صافي
ننحسب وي شيعة احسين التوافي
دمعه لو عدنه ابكتاب الزهره كافي

والفجيعه
ابعينك تشوف النهر
عيش جرحك
لو سهم حز النحر

احمد عيسى البديري

العاشر من محرم
لسان حال كل حسيني

يحسين الك وسط الروح جمرة حزن ما تطفه
///////////////
لو تنكشف عن الناس هاي السمه المحجوبه
جا شافت اشكد عزيات ل ال النبي منصوبه
مثل البشر هل املاك بيها اليشگگ ثوبه

وبيها الينوح ومفجوع وب عينه يلطم جفه
يحسين الك وسط الروح جمرة حزن ما تطفه
///////////////
حتى الحجر دم عليك كامت تفور اعيونه
ثغر اليقبله المختار تكسر الخيل اسنونه
وبيا ذنب جسم احسين يا عالم ايسحكونه

مابغضتك يلمذبوح بس الگلوب الصلفه
يحسين الك وسط الروح جمرة حزن ما تطفه
///////////////
ربك فضح كل ايزيد واهل الخدر مستوره
اشكد حاربوا هل عزيات لكن بقت معموره
ماتنطفي ب أمر الله هل انفس المجموره

والينجرح گلبه ب اه من كربله مايشفه
يحسين الك وسط الروح جمرة حزن ما تطفه
///////////////
دمعتنه اوضح مقياس للمؤمن واعماله
الماينكسر كلبه اعليك واجب يعيد افعاله
انته الغريب العطشان گطعت الكوم اوصاله

دارت عليك العدوان منك اجت تتشفه
يحسين الك وسط الروح جمرة حزن ما تطفه
///////////////
يلتبجي دمعه اعله حسين باجر الك مذخوره
هذا الخبر يشفي الروح شعشع علينه ابنوره
مو فاطم اتلم دموع اهل العزه ابقاروره

والمابجه ابيوم اعليك من يعتذرلك كلفه
يحسين الك وسط الروح جمرة حزن ما تطفه
///////////////
جرح المحب بالچلمات يصعب تره تفسيره
لطم الصدر هذا وسام ل اهل الشرف والغيره
ضلن بنات المختار لا كافل ولا ديره

هذ الجره اعله الوليان وبيا كلام انوصفه
يحسين الك وسط الروح جمرة حزن ما تطفه
///////////////
يوم الوعد للموعود لمن ينادي ابثاره
وينصب محاكم عاشور ويكشف جميع اسراره
ساعتها رايات الثار ترفرف ب أدين انصاره

وكلمن ضلم اهل البيت باچر ذنوبه اتوكفه
يحسين الك وسط الروح جمرة حزن ما تطفه
///////////////
ياربي ندعي ابكل دار نرفع ذكر لمصابه
ووتجمع اب اسم حسين ل اجل العزاء احبابه
وتبقه تدك فوك الراس شبانه وي شيابه

وصوت اللطم من ابعيد ل أبن الرسول اتعرفه
يحسين الك وسط الروح جمرة حزن ما تطفه

احمد عيسى البديري

يبقى عهدنا الى الابد مع الحسين عليه السلام

انه حد الموت ابقه
كل شي بيه انته صدقه
هذا نبضي وهذا نطقه
ياحسين
==============
سافرت كل الاماكن واعرفت كل الدروب
وواجهت اجناس شتى  من المشارق  للغروب
لكيت كلشي بقدره الله ببوتقة حبك يذوب
بكل جهات الدنيا انظر ليك متلهفه الشعوب

تجسدت بيك المعاني
وما الك بالكون ثاني
منتهى كل الاماني
ياحسين
==================
شبهت للناس انت علثرى واكع جريح
شلون اقنع هذا انت من السمه دمك يطيح
ياغريب ابصحره يصبح محور الكون الفسيح
بكل عصر يحسين عايش كل لغه صوتك يصيح

شما تكول عداك عني
اني او اني و اني
عندي بس هل شيء يعني
ياحسين
==================
ادم انت وصلبك احيا كل عدل في هل الوجود
ولو تتبعنه الملاحم كلها يم نحرك تعود
تذبل الاغصان وانت تبقه عشبه للخلود
والقصور اقبور اهلها والضلم لا مايسود

نحرك  العالي مقامه
والقصر مرتع  قمامه
وياك بس انت السلامه
ياحسين
=================
مالك الاحساس انت شلون احويك بسطور
والوحوش ال بالبراري لايذه بقبرك تزور
الجماد ابلا مشاعر وانت انطيته شعور
ولهذا الحجر بالطف دم على مصابك يفور

حزناً لواقع جراحك
كلشي يالمذبوح ناحك
احمر الكون بوشاحك
ياحسين
==================
وي حليب امنه النشربه اختلط حب الحسين
والعشك عدنه فريضه عمل واحساس ويقين
خل يقتلونا اعله مودك لو يكطعون الايدين
احنه من نموت نحيى شوكه بعيون اللعين

وحك كل قطره بدمائك
مابقينه يضل عزائك
وما نوافيلك جزائك
ياحسين  =======  احمد عيسى البديري

بين الحوراء و رأس ابا الفضل عليهما السلام
 
اجرح احساسك اذا اكلك اسيره
وانته عباس اليعلم الدنيه غيره
وحدي اسري
وحادي ركباني اجنبي
وانته تدري
بالحرم من تنسبي
++++++++++++++++++++
خويه.من حدر ركبهم بالسبايه
الدرب اصبح جروح بلا نهايه
هاي اخت عباس كالوا عني هايه
صار اعز من دنيتي ملاكه المنايه
 
اعظم احلامي اشوف بعيني والي
لو اغمض بالحلم ويمرني غالي
عالي كدريي
خويه تسمع مطلبي
وانته تدري
بالحرم من تنسبي
++++++++++++++++++++
اتعودت عيني اعله عباس الكفاله
شلون اصبر لو شفت واحد بداله
واني اعاين علرمح هيبه وجلاله
يميل لو مالت الهزل وي عياله
 
عل رمح راسك واكولن شنهي عذري
خوفي لا تنضر عليه ودمعي يجري
اه يصبري
ينهدم لو ون صبي
وانته تدري
بالحرم من تنسبي
+++++++++++++++++++
خايفه ابكلبك ازود كم اذيه
خويه احلفك لاتصد عينك عليه
ابعباتي خل اضم جفوف اديه
لسه من كيد اليسر بالدم نديه
 
باختك اشسوت يكفالي النوايب
علهزل يحدونه وانبات بخرايب
شنهي عمري
من بعد سبط النبي
وانته تدري
بالحرم من تنسبي
++++++++++++++++++++
يانبض وبكل كتر مني لكيته
يمك يلوك العتب هل عاتبيته
ريت لا عاشر ولا اعاشر مسيته
الغالي كبل الغالي يتمنه منيته
 
تغفه بعيوني حلم واصحه اعله صوتك
ضيعت كلشي بعد ماصار موتك
حامي خدري
من بعدكم ناصبي
وانته تدري
بالحرم من تنسبي
++++++++++++++++++++
كل جرح بالطف ترك بيه علامه
واصعب جروح السبي جرح اليتامه
عودتهم ويه كل كلمه ابتسامه
وانه يوميه ابخرابه الليل انامه
 
احرس دموعي ادا تكبل يتيمه
خاف أزود نارها بلوعه وهضيمه
يصعب امري
لو شفت راس الابي
وانته تدري
بالحرم من تنسبي
 
احمد عيسى البديري

 
السيده زينب  عليها السلام عندما وصلت لجسد اخيها الحسين
وجدت امها الزهراء ووالدها عليهما السلام عند جسد الحسين
 
من اجت للجسد
علي يمها كعد
والزجيه تون
اه يفكد الولد
///////////
وصلت وفيض الدمع من عدها يجري
ياعلي كونك تصد وتشوف خدري
انه زينب تدري بويه ابحالي تدري!!!
ويه كل نضره اريدن يكضي عمري
 
أستمع للهوه
يعتب اعله الضوه
عوف هذا الخدر
بالعيون ارتوه
///////////////
فرت ايتامي ييمه وانه وحدي
لاكفيل ولا محامي باقي عندي
مدري فوك اموات لو احياء اعدي
النار تاخذ بيه يا يمه وتودي
 
يمه هذا العقل
بعد مايحتمل
نار لمن تشب
ب خيمه مدري ابطفل
/////////////
اه من العاشر اشسوه ابدلالي
ماتركلي ابكربله يا يمه غالي
من بعد عباس وحسين اشبقالي
صدي يا يمه المشيبي وشوفي حالي
 
شعري ابيض كلب
والله شفت العجب
فوك صدر الولي
جيش داير لعب
//////////////////
بويه يردوني ل ارض الشام امشي
حرمه ماتركتلي هاي الناس كلشي
كون وي روس الغوالي ايسير نعشي
وانسج طيوف الاحبه ابين رمشي
 
من اغمض الجفن
ما احس ا بحزن
اني اشوف الاهل
لمن الهم احن
/////////////
كوموا. ودوني لعد ذيج الشريعه
وحدي ما احمل حلم جفه الكطيعه
ياهلي عندي خبر وشلون اذيعه
سهم المسمم طفت عينه الوسيعه
 
ناده جفي انكطع
وانه كلبي انشلع
ما قبل ينحمل
علنهر من وكع
 
احمد عيسى البديري

دعاء السيده زينب بعد  ان رأت القيود بيد الايتام
 
يا ملين الحديد ا بأيد داوود
ربي بجفوف اليتامه لين الكيود
////////////////
هاي الورود العليها اثار جبريل
تربت اب احضان اية وحي وتنزيل
ماتعرف اسياط اتعرف بس تراتيل
والجيوش ابكل حقدها كاصده اتعيل
 
الحديد الحار ذبل هاي الورود
ربي بجفوف اليتامه لين الكيود
////////////////
من اجينه من المدينه تحجي العلوم
والكمر كافل ضعنه اعله الحمه يحوم
يسكت اليبجي ويزيح ابوجهه الهموم
واني متعوده الكفاله ووحدي هل اليوم
 
بجاه جود الماي ذاك وذيج الزنود
ربي بجفوف اليتامه لين الكيود
////////////////
صرنه يوميه ابمدينه والحجي يطول
واحد الواحد  ادينه بكيد موصول
سدروا بينه بقساوه وطروا الچول
بلا رحم والسوط فوك امتونه يجول
 
ناس ماخلت حميه وغيره وعهود
ربي بجفوف اليتامه لين الكيود
////////////////
حوطونه ابجيش واحنه. كبال الرماح
والخيول اتدوس كلمن عل ارض طاح
من اغمض عيني لحظه اصحه  بصياح
واحسب الايتام واعرف لو طفل راح
 
مكيده وتنجر يويلي ابين الجنود
ربي بجفوف اليتامه لين الكيود
////////////////
الذبح اهون عليه ورمي الاسهام
واقبل اتحول رماد ابنار الخيام
ولا اعاين دمعه وحده ابعين الايتام
السبي سفرة عذاب ايام و ايام
 
والادين انظر اليها من النزف سود
ربي بجفوف اليتامه لين الكيود
////////////////
ابكل مدينه الناس نصبت للركب عيد
واحنه سمونه الخوارج عن هوى ايزيد
والله لو شفتوا السبايا  امكيده ابكيد
ياعرب تدرون من تنذل اجاويد
 
يادمع ينفع لحالي الراح ميعود
ربي بجفوف اليتامه لين الكيود
////////////////
 
احمد عيسى البديري

الحوراء زينب تصف كفالة اخيها ابا الفضل عليهما السلام
 
سلام الله عله الكافل
رفع راسي ابو فاضل
بطوله - رجوله - ملك روحي ابصفاته
اميره - قديره -عشت والله ابحياته
/////////////;
عدل مهيوبه ابوجوده ميت ابذكره احتمي
لو لفظت اسمه عله ضامي يرتوي  گلبه الضمي
والدي راده اليه حيدريٌ فاطمي (حيدريون فاطمي )
واستجاب الباري دعوة حيدر ابهل هاشمي
 
يموت الهم عله عيونه
عدل حيدر يسمونه
شجاعه - براعه -- حنين وطيبه ذاته
اميره - قديره -عشت والله ابحياته
/////////////;
كلشي بالكافل احبه هوه روحي ال بالجسد
من اشوفه كبالي اقره قل هو الله احد
ما كو اخ بالدنيه مثله عليه اخاف من الحسد
اشما اوصف طبعه اتعب ب الوصف بس بي بعد
 
ازيح الهم عله رسومه
ردت يومي قبل يومه
مماتي - رضاتي - ردت يسبق مماته
اميره - قديره -عشت والله ابحياته
/////////////;
عمره ما شايلي عينه يمي محني ومبتسم
بوجه بس حاضر يزينب من كفيلي والنعم
حكي من اعمي النواضر مو سهل تفكد شهم
لو اوزن الخوه كلها ابموقف الطف تنهزم
 
رفض يشرب وهو الضامي
وبقت عينه عله خيامي
حبيبي - طبيبي - رضا روحي ابرضاته
اميره - قديره -عشت والله ابحياته
/////////////;
علرمح راسه ويصدلي خطوه خطوه وي الركب
انا كفالج يكلي وما يفرگنه الدرب
هذا مو حقي من انادي وياك الموادع صعب
ماطفت نيران هجره وبيه كل ساهه تشب
 
وحق جوده ولطم جفي
عليه نوحي فلا يكفي
فدائه - ولائه - سبق مركب نجاته
اميره - قديره -عشت والله ابحياته
/////////////;
لو بديه والله يسمح انطي من  عمري عمر
جا قسمت اسنيني كلها ويه كفالي شطر
الحياة ابدون كافل خدري بعيوني گبر
وكلشي ماشايل صفاته انه احسبنه شمر
 
يريت اوكع عله اوصاله
اشكثر احلم انه بداله
مصابه - غيابه - اخذ كلشي بوفاته
اميره - قديره -عشت والله ابحياته
 
احمد عيسى البديري

قصيدة كعده


كافي نعاتب والخجل مات
ذيل السياسي اتعدله هيهات
من تحجي الزنود _ نتكلم ابزود
ذيل السياسي اتعدله هيهات

&&&&&&&&&&&&&&
هاي صار اسنين نحجي وهيه صنته وماكو وشه
مدري صوت الشيعي أخرس مدري أذان فلان طرشه
والفقير البيهه طايح لاتغده ماتعشه

لازم نجهز مختبر
لفحص المؤثر والأثر
وانمرر الكرسي ابخطر
وانزيل للطاغوت عرشه

شوف المكابر كلها شبان
واحنه ندور الهه برهان
خل نكسر العود _ ونتكلم ابزود
ذيل السياسي اتعدله هيهات

&&&&&&&&&&&&&&
ياشعب والله القضيه بيدنه ونحكم رسنهه
مو قضية انتخاب ولاهي بالتصويت جنهه
هيه ثوره اعله البغايا الفسدت وخفت وزنها

وانتيه عليها الدرب
سجيل غيمتنه تصب
بالدك فلايبقه صعب
واسئل الفرعون عنهه

جم طاغي عدنه يريد سجان
كافي نحابي فلان وفلان
و منين اجه يعود _ نتكلم ابزود
ذيل السياسي اتعدله هيهات

&&&&&&&&&&&&&&
ياشرع يادين يقبل حالنه ويرضه بوضعنه
عدنه نهرين وعطشنه واحنه أهل الزاد جعنه
لو تراجع بالمراجع ماتشوف الهاي معنه

بالصارم أنحد القلم
ونسير وي هاي الأمم
والي عله الباطل حكم
نجبر ابكسره ضلعنه

فكر بنفسك لمن تبوك
باجر تنهشك هاي الحلوك
هم نرجع ردود - نتكلم ابزود
ذيل السياسي اتعدله هيهات
&&&&&&&&&&&&&&
ياسلاطين التهجم والتجاهل والخرافة
والله دمرتوا الحضاره والتمدن والثقافه
والشعب ساكت عليكم ياحريمه وياحسافه

ياشعب عجل صحوتك
من وسط كلبك ثورتك
هواي المواقف فاتتك
خلصت اناملكم حسافه

نعرفهم النه حضروا منين
أهل الجناسي تلاثه واثنين
ماضلت حدود _ نتكلم ابزود
&&&&&&&&&&&&&&
بيا وجه تنصر امامك وانته كل عمرك تخاذل
راجع احسابك يغافل كل امر تلكاله حاصل
كربله منهج اخذها وشوف لو ضل يوم باطل

من تتبع هذا النهج
بالضلمه يبزغ كم وهج
صدكني ميطول الفرج
والمهدي لنه علينه ماثل

مو صعبه تربح لمن تثور
ابعصه موسى شك البحور
ملينه الوعود _ نتكلم ابزود
&&&&&&&&&&&&&&


أحمد عيسى البديري

‏3
‏
‏قصيدة كعده
‏ل أم البنين
‏
‏اول خادمه
‏رسمت منهج ل اهل الخدامه
‏وافت فاطمه
‏وصارت من بعدها ام اليتامه
‏فدوه العين الحسين --انطت اربع ابنين
‏-------------------------------
‏يلتريد اتصير خادم اخلص ابمنهج امامك
‏خلي افعالك صحيحه وكون مصداق الكلامك
‏اتبع السيره الشريفه ترفع الزهره مقامك
‏
‏اكصد لمدرسة الوفه
‏تفهم معاني العاطفه
‏ام البنين العارفه
‏خليها يلخادم وسامك
‏
‏تيجان الخدم
‏بيها اتوجت اعظم اميره
‏ مابين الامم
‏ ماتلكه مثل هل سيره سيره
‏هاي ام الميامين --انطت اربع ابنين
‏------------------------------
‏سلم الخدمه الصحيحه بيها يتجسد مسيره
‏بالعمل ام الكوافل نالت الرتبه الجبيره
‏بيها اخلاص الخدامه وضحت دروبه المنيره
‏
‏ام البنين امكرمه
‏عاشت وماتت خادمه
‏والخادم ابعين السمه
‏بس وحي الله نضيره
‏
‏بحروف لوفه
‏ خطت للخدم اعظم عباره
‏هاي العاطفه
‏ويه فاطمه اربح تجاره
‏وابطف القرابين --انطت اربع ابنين
‏------------------------------
‏مثل اهل البيت ضحت سطرت اروع ملاحم
‏الطاهره الخلت اسمها شمعه مابين الفواطم
‏اصبحت الهم شريكه بالافراح وبالمأتم
‏
‏هاي النقيه الزاكيه
‏انطت دروس التضحيه
‏عاشت وماتت راضيه
‏افتهم منها يخادم
‏
‏مابخلت ابد
‏تدري التضحيه اعظم عباده
‏ ادت للعهد
‏اقمار اربعه ابدرب الشهاده
‏حرمه وخدمة الدين -- انطت اربع ابنين
‏------------------------------
‏الله كرمها ابكرامه خله مفتاح السؤاله
‏لو دعه السائل بأسمها ايحصل من الله مناله
‏ابتضحيتها ام البواسل حصلت هاي الجلاله
‏
‏من تهدي الهه الفاتحه
‏تلكه السماء امفتحه
‏هاي الدلاله الواضحه
‏الما بعد منها دلاله
‏
‏ مفتاح الدعا
‏كلمن رايد ايحصل مرامه
‏ل ام الاربعه
‏مخصوصه تره هاي الكرامه
‏نبراس المفدين --انطت اربع ابنين
‏------------------------------
‏من وحي اخلاص الكفيله شعشعت اعظم رساله
‏وجان مصداق الوحيها هوه عباس الكفاله
‏ابتضحياته الدنيا تشهد جاوز حدود المحاله
‏
‏من المدينه الكربله
‏صارت لزينب كافله
‏ب اربع جحافل باسله
‏فدوه السبط طه وعياله
‏
‏هاي الطاهره
‏ ما الهه ابد وحده مثيله
‏دنيه واخره
‏ عد المرتضى تبقه جليله
‏ وضحت طول السنين --انطت اربع ابنين
‏
‏احمد عيسى البديري