📘 Murod Chovush: Hech

Bu asarni dastlab oʻqiganimda kuchli maʼnoga ega asarligi sezgandim, ammo uni anglashga menga hali erta edi. Shuncha yildan soʼng uni qayta oʻqidim va yozuvchining falsafasini tushuna boshladim.

Asar oʻzbekning "Begona"sidek gap. Hayot absurdlikdan iborat boʻlsa... qanday yashamoq kerak? Hayotning maʼnosi nima? Maʼno bormi oʻzi? Begonalik hissi... Maʼno topa olmaganingda yashash naqadar ogʻir. Goʻyo hayoting tuzoqday. Nega endi sen qandaydir qoliplarga boʻysunib yashashing kerak? Asar bizni hayotga boshqa nigoh bilan qarashga undaydi. Qiyin... Maqsadsiz, nega yashayotganligini, kim uchun yashayotganligini bilmay kun oʻtkazish oson emas.

Tan oling har birimizda shunday davr boʻladi. Maʼnosizlik domiga tushib qolamiz. Hech nima qilgimiz kelmay qoladi. Meni oʻzimda ham baʼzida sodir boʻlib turadi. Bir xil hayot tarz, uy-ish. Kunda shu sugʻur kuni takrorlanadi. Kimdir yozib bergan ssenariy boʻyicha rolimizni bajarayotgandekmiz. Goʻyo labirintga tushib qolganmizu chiqish yoʻlini topa olmayotgandekmiz. Hammasiga qoʻl siltab tugata qolging keladi.

Ogʻriqni his qilyapmizmi demak tirikmiz, mavjudmiz. Hech nimani his etmaslik yomon. Hissizlik, boʻshliq insonni ichidan yemiradi. Maʼnosizlik insonni oʻldiradi. Ham ruhan, ham jismonan. Maʼno topish uchun esa sevish kerak, nimanidir... kimnidir.

©️ Fazliddin Rahmonaliyev