اتمنى ليت هرجي يقدم بالورود
يوم بعض الناس ما تنبغى قصايده
السنافي كل يوم ترى طيبه يزود
والوفا لله محي العظام البايده
ودي اقدم كلامي ولا ابيح السدود
عادة الزراع يجلب جناحه صايده
من تردى في ابن عمه ترى ما منه فود
كيف ضيع راس ماله ويبغي فايده
لا بغيت تمكن العود بـ عيون الحسود
خل زلات ابن عمك وذب النايده
لا تعود للسوالف مسامير الكبود
السنافي عزة النفس من عوايده
والمراجل كايده مثل طلعات السنود
كنها اللي في عروض الجبل متعايده
خلها ولها جمالٍ تراكى للشدود
ترتكي بعزومها للحمول الزايده
وان بغيت الراي لا تقتني راي معقود
وان صفى لك سيد القوم والا سايده
واطلب اللي مد جوده يغطي كل جود
ما يجي لك كود شيٍ وربي رايده
وان عطاك الله فـ المد من كف معبود
الفقير يموت ما تنفعه رفايده
والتمس للزين ما انت بعلى الشين محدود
ومن حرمك الله منه فلا انت بـ صايده
وانتبه للعلم ياللي تمدح بالجدود
النمر والذيب عشاه من صوايده
وانت يا رجال لا صار جدانك فهود
مس حبل البيت لا ترتخي عمايده
وان تراخى طاح ما عاد ينهضه العمود
مثل من سوى عياده ولا احدٍ عايده
وان بغيت ان المسير على بيتك يرود
لا تنطح نقشة الباب للي رايده
افتح البيبان والضيف ما عنه صدود
قولة ( ارحب ) للمسير من احلى مايده
وان نواك الجود فلا تماطل بالوعود
خل من بينك وبين الملام محايده
سامحوني وان حصل بالشعر نقصٍ وزود
الصحافي ينتقد في بعض جرايده
واتعذر منك يا شوق واقفة النهود
لو بشبها من الريم قلت القايده
رشحوها فـ الاسامي وسموها العنود
كل ما بكر الوسمي رعت قلايده
لاوحت بالصيد مقطع حثاث من نفود
صاعها الرماي واقفت على شرايده
عود القناص من عقب رثمات الحيود
كان يبغى صيدها ما درى انها كايده

ذيب بن دخيل الحبابي