قصيدة تجليبه اربعينيه
****
للطف احدي بينه وامشي ياجمال
نزور اكبور اهلنه المانساها البال
****
زينب من على الناكه ابحزن نادت
ليالي احزان ضيمي بهل مسه عادت
من وصلت الطف جروحها هاجت
وتِذَكرَت من خذوها مجتفه بحبال
****
اجت بالاربعين ونارها يانار
وكتها انذار بيها وماشت الفجار
بعد ذاك الخدر ومحافف الاخيار
ولوها اهل الرجس والحقد والانذال
****
مشتاكه شكثر الهم يحادي العيس
ليالي هوايه مرت وي جنود ابليس
حن كلبي لخوتي وعلي والعريس
فركاهم هدمني وغيرالي الحال
****
مابطل ونيني ولاجفيت النوح
انه المكسوره خاطر والكلب مجروح
رحت وجيت تدري وداعت المذبوح
مثل زخ المطر دمع الحزن همال

****
ارد الهم اسولف عالجره بيه
وراويهم اثر ضربات العليه
ارتاحو هما وانه مشيت مسبيه
وكل لحظه انرمي بميت سهم جتال
****
اشتاكت روحي الهم والله ياحداي
للنحره نذبح والطاح يم الماي
خلاني هجرهم لافكر لاراي
مدري شلون رحت وجيت بالاطفال
****
يحداي الضعن والزهره مشتاكه
كمت احجي ويه روحي واسال الناكه
اون بسكوت والنيران حراكه
على فراك الحسين وفركت الكفال
****
خدري انداس من عافوني والاحساس
وشيب بالهجر دلالي كبل الراس
ما ادري شعجب ماخمدت الانفاس
وما مت ابحسرتي هالبعد من طال
****
اريد اكصد وراوي حالتي الهم
وبيه شسوه من امشيت جاتلهم
اهل الغيره وادري الصار يا لمهم
شوفني بجفاهم هل الزمن اهوال
****
ويه الروس اتمنه ادفن عيوني
وماعاين بعد وانظر على متوني
ماتدري من اصدهن سبي يسبوني
وديني ارد اسولف ضيم ما ينشال
****
خادم اهل البيت عليهم السلام
الشاعر السيد{هاشم قاسم الدادوي البلداوي}

قصيده كعديه بمناسبة استشهاد{الرسول محمد}{صلى الله عليه والهِ وسلم}
****
من بعد عينك يموت الصبر
والدمع والدمع ينزل جمر
الفكدك وبلواه ** يارسول الله
والدمع والدمع ينزل جمر
****
عني لاتمشي يبويه الخاطر الله وخاطر امي
عاين الحالي دخيلك نشف من الخوف دمي
حسبت بحسابي تبقه بويه كل العمر يمي
انت الوطن وانت المدد ** وانت المحامي والسند
والوالد انت والولد ** والعشيره وبني عمي
انت كوني ودنيتي والاهل
من وكت من وكت جاك الاجل
ماجنت اتناه ** يارسول الله
والدمع والدمع ينزل جمر
****
يالجنت كلشي اليه بكد محبة الله احبك
جنت مو بس والد انت جنت انفاسي احسبك
تروح وتخليني وحدي شلون بويه انطاك كلبك
وياك اخذني للكبر ** ماريد اعيش بهالعمر
صعبه اتاني وماتمر ** وعيني ماتشبح الدربك
اصبر شلون على فراكك انه
والله والله فلا طَوِّل سنه
موتك شينساه ** يارسول الله
والدمع والدمع ينزل جمر
****
شكد كوابيس بحياتي جانت تمر اعله بالي
ماتهز لو شعره مني وجنت بيها ماابالي
بويه مادام انت يمي الهوه مايلمس دلالي
حيلي يبو الزهره انهدم ** وشيبت كلي من الالم
كلبي انرمه بثاني سهم ** وصرت انحف من خيالي
مايكفيني من تمشي الحزن
نوحي نوحي شيسَكته من احن
مصابك شينعاه ** يارسول الله
والدمع والدمع ينزل جمر
****
روح خلاف عينك. كلي يابدر العشيره
الكل نوايب دهري اصبح من تفاركني اسيره
وانه عشت وياك عمري. مدلله وحره واميره
مايرحم بحالي الدهر ** من مُر يوديني الامر
ترضاها ياراعي ألفخر** بعد هالنظره الاخيره
ياحبيب الله ويمرني العجب
بابي بابي يحركوها بحطب
وهذا مااتناه ** يارسول الله
والدمع والدمع ينزل جمر
****
منين اجيب منين بويه. للظلام الجاي كمره
خوف والام ومخاطر والمدامع تهل جمره
بليل من ينشال نعشك مستحيل نشوف فجره
بعدك فلا يمرني السعد ** يلنمت بحضان الوعد
من الجاي شتنطر بعد ** منه يازهرة الزهر
تدري فكدك ابد ماينحمل
والله والله عليه مو سهل
للكلب دماه ** يارسول الله
والدمع والدمع ينزل جمر
****
والله لو بيدي يبويه اله انه وياك امشي
وسوه من البيت يطلع نعشك الطاهر ونعشي
انهدم حيلي وضاع صبري وبانت الفركه اعله رمشي
نوحي اعله مصابك فرض ** ودموعي تترسها الارض
يااغله عندي من النبض ** بفركتك ماظلي كلشي
****
خادم اهل البيت عليهم السلام
الشاعر السيد{هاشم قاسم الداودي}

قصيده موشح بمناسبة استشهاد{الرسول محمد}{صلى الله عليه والهِ وسلم}
****
بهالمسه حيدر جليس بداره
يحچي للزهره بدمع يتجاره
****
رجع من الدفن مكسور الظهر
الكسر ظهر الموت هالليله انكسر
اخذ منه اعز محبوب القدر
وظل ابو الحسنين تلهب ناره
****
يگلها للزهراء هادينه رحل
وحيلي يم الحسن بفراگه انحل
چني يالزهراء مو ذاك الفحل
وانه من الله الولي وبتاره
****
ادفنته يالزهره واجيت بلايه راي
الشالني بعيونه خليته وراي
بچت كل السمه من ونّي وبچاي
بچفي يالزهره دفنت انواره
****
ادفنت ويه الغالي روحي وهبيتي
هو ابن عمي وحبيبي ومنيتي
حزام ظهري وعوني هو ودنيتي
غاب عن عيني وبقت اثاره
****
چان مالي البيت كله بالحنان
وسور زودي العالي هو والامان
فرق ابيناتنه حيف الزمان
المثله ياوسفه بگبر يتواره
****
شلون يم حسين نصبر عالغياب
وابو القاسم هالصبح تحت التراب
والربع انيابهم مثل الذئاب
مدري يالحظه تشن الغاره
****
بعد متدك بابنه چفوفه ابد
منين نطلب بعد بالشده مدد
مثل گلبچ گلبي يالزهره انمرد
والسقيفه بلا رحم غداره
****
خلي ننسه الماضي كله والدلال
مايرد لينه بعد لا لا محال
تنتظرنه احزان متمر عالخيال
الجاينه عندچ علم باسراره
****
خادم اهل البيت عليهم السلام
الشاعر السيد {هاشم قاسم الداودي}

قصيده بمناسبة استشهاد{الرسول محمد}{صلى الله عليه واله وسلم}
****
شلون اصبر شلون *شيصبر العيون * لو رحت عني
يالهادي ما اتحمل ***خاف الوضع يتبدل
لو رحت عني**لو رحت عني
****
يبو الزهره تلوحلي انه احسك
واحس تنعه الي يالمصطفى نفسك
لو موتك خذك مني وكسف شمسك
وما شوفك بعد لا ينسمع حسك
شلون اصبر بهاي *ومو انت وياي *لو فارگتني
لو غمضتها عيونك*** ما اگدر انه بدونك
لو رحت عني**لو رحت عني
****
انه حيدر علي الكرار ووصيك
اخويه انت وحبيبي وانه هم خيك
چنت بالموزمه فيي وانه فيك
صعبه عليه صعبه لو شفت ضيك
ما بين التراب *يا اغلى الاحباب *وانت اغلى مني
يالعشت بين اچفوفك*** عيني بعد متشوفك
لو رحت عني**لو رحت عني
****
مااصبر وحگ صبرك على فرگاك
وشيسوه العمر ياسلوتي بلياك
يريت الموت ياخذني وروح وياك
ولا بعدك اظل ابلوعتي انعاك
ولا اگضي السنين *بعدك بالونين *وميكفي وني
بس الحزن يبقالي***والعمر ما يحلالي
لو رحت عني**لو رحت عني
****
مو من الهوه انفاسي من عطرك
وتربيت بجوارك سيدي وحجرك
وانسه احزاني من اغفه على صدرك
ابن عمك اخوك ونفسك وصهرك
يالفرگتك ويل *لو چلچل الليل *يبچيلي حزني
دمعي ودموع الزهره ***ينزل ونين وحسره
لو رحت عني**لو رحت عني
****
لو هانت عليك ايامي وايامك
تتركني وتروح بلوعة آلامك
هاي الزهره بنتك هيه گدامك
ذبلت من بجيها زهرة احلامك
عاين عالخدود *هاي انت موجود *وحضنك يضمني
فاطمه هاي بنيتك *** گللها عن اوصيتك
لو رحت عني**لو رحت عني
****
عذراً يارسول الله انه اتعذر
اگللها بوصيتك صعبه ما اگدر
شگللها ضلعها گبالي يتكسر
وانه انظر عليها بدمعي واتحسر
هذا انه محتار* بهذي يمختار* والظهر محني
والزهره ما تدريني ***انت الذي موصيني
لو رحت عني**لو رحت عني
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بمناسبة استشهاد{الرسول محمد}{صلى الله عليه واله وسلم}
****
فرگتك فرگتك والله سبتني
فرگتك فرگتك لمن عفتني
صعبه عليه وانه الزچيه
****
يابويه عني من رحت والله نسبيت اسبايه
ماشفت لو مره الفرح عشت بهظم دنيايه
لادهري يرحمني صفه ولا صحبتك وفايه
حرت انه انوح لفرگتك لو انحب عله دمايه
بضعتك بضعتك ولله سبوها
بضعتك بضعتك بعدك ولوها
صبح ومسيه وانه الزچيه
****
شفت المصايب والحزن من امتك يالهادي
عيشوني باهات ودمع ونار التشب بفادي
بوادي الحزن بويه سرت وتسير هيه بوادي
لو صحت بسمك انضرب يابويه وشما نادي
صحبتك صحبتك بويه جفوني
صحبتك صحبتك لاما رعوني
شفت الاذيه وانه الزچيه
****
ايامي بعدك تنحسب تسعين ابد مو اكثر
تسعين الف چنها گظن اكثر بعد اتصور
عصروني بالباب وطحت والضلع مني اتكسر
غير المنيه ماردت والها گمت اتنطر
محنتي محنتي تكتل محنتي
محنتي محنتي بجت دمعتي
همنه سويه وانه الزچيه
****
بعيوني كلشي تصورت وحدي اظل مذهوله
وحدي انوح عله الگبر جايز اظل معقوله
بس انشتم لو انضرب ومكدره ومنحوله
ماچانت إبالي ابد شفت العجب من ذوله
سَبِتَك سَبِتَك انه سمعتها
سَبِتَك سَبِتَك بعيني شفتها
ويلي شرزيه وانه الزچيه
****
بالباب من هجمو لذت ودموعي تنزل حسره
والنذل من عاين علي زيد عليه العصره
يگولوله ماتت فاطمه وطاحت تره اعله الغبره
وسمعته من گلهم وإن اليوم الا ابچي الزهره
وردتك وردتك لو تنظرلها
وردتك وردتك شامت كتلها
طاحت رميه وانه الزچيه
****
احمرة عيوني بسطرته ومتوني صارت زرگه
واغصاني صارت يالولي بنار الدمع محترگه
والموت احس مني اقترب والدنيه صارت خنكه
ماأدري من كثر الحزن لو من ونين الفرگه
موتتك موتتك ماحسبتها
موتتك موتتك لا ماردتها
تمنيت اليه وانه الزچيه
****
خادم اهل البيت عليهم السلام
الشاعر السيد {هاشم قاسم سعود الداودي}

موشح للامام {الحسن العسكري} {عليه السلام}
****
على مصاب العسكري واهاته
الكون كله ينحب بوناته
****
ماكو شي ظل مابچه الهذا المصاب
عيش الاكوان كلها بالعذاب
ياذنب عنده ويسمونه الذئاب
الچان متاذيهم حچاياته
****
بيه ماراعو وجاهه ولانسب
عذبوه بلا ذنب وبلا سبب
تبت ايديهم الف نوبه وتب
لوعوه وكفرو باياته
****
عليهم اللعنه تهل صبح ومسه
وعسى لايبقه نسل الهم عسه
لوعو گلب النبي وخير النسه
وبچو عيون الولي وشيباته
****
هالمصيبه الهدت السبعه الشداد
ولبست الدنيا على همها السواد
وعلن عالاكون عرش الله الحداد
والزمان توقفت ساعاته
****
ابو صالح ينعه لوداعه ويون
وعلى مصابه دم بچت عين الحزن
شيبتله النايبه رموش الجفن
طاحت بطيح الابو حسباته
****
مات ابوه الچان اله عون وسند
عيونه متشوفه بعد هيهات ابد
بدون عين الوالد شيسوه الولد
تنولي من  الالم ضحكاته
****
غسل بچفينه هاليوم الوطن
وعگد كل اماله وي عگد الچفن
شيع الحنيه كلها ويه الحسن
ودفن وياه كل حلو بدنياته
****
عالفجيعه المهدي الله يعينه
على همومه ومحنته وونينه
الفگد والد والله فاگد عينه
ومستحيله تنوصف لوعاته
****
شيعته ومنعوفه وحده بمحنته
ابد ماننسه الشهيد وونته
تظل دمعتنه تواسي دمعته
بينه سچين وتكص حسراته
****
يابو صالح مانعوفك مستحيل
ياخليل گلوبنه واعظم خليل
شما نقدملك يبو صالح قليل
ياامل دين النبي وغاياته
****
مانعوفك وحگ امك فاطمه
نهر نصبحلك اذا جاسك ضمه
احنه گاع وعينّه تشوفك سمه
ياحبيب الله وبخت شاراته
****
على حالك مايجف يوم الدمع
نقسم بخد الزچيه والضلع
بكل ظلام شعلنه يالمهدي شمع
وياك عدنه الموت يامحلاته
****
بيوتنه مفتوحه كلها للعزاء
وعينه ننطيها للگصدو وفاء
صحنه يامية هله بااهل الولاء
المانسو روح النبي وماساته
****
سيد محمد يعزب باليجون
وعالدرب طشينه للزاير عيون
بلد متخيبلك بيوم الظنون
وتدري بالبلداوي گد چلماته
****
خادم البلداوي يبقه يعاهدك
مايعوفك يبو صالح وحدك
يقدسك ويعظمك ويمجدك
وباسمك يدوس البغي وقاداته
****
خادم اهل البيت عليهم السلام
الشاعر السيد {هاشم قاسم الداودي}

قصيده كعديه بمناسبة استشهاد الامام {الحسن العسكري} {عليه السلام}
****
يابين بس عوف الوالد *يابين من عنده شرايد
لحظات خليني وياه** ماعيش تدري بالياه
****
شعندك ويه ابن الزچيه. وليش اشوفك انت يمه
شعندك حچيلي الحقيقه. وليش تفتر اعله جسمه
حاير بنوحه ونينه  وجبده متگطع بسمه
اتواسيني بمصابه ردت **شاهدني بيه اتحيرت
بهموم گلبه اتكدرت ** عليك دمعي لا تلچمه
خليه ياموت وعوفه* خليه مالوم اتشوفه
والسم يابين اسباه **ما عيش تدري بلياه
****
اصبر شويه اعله كيفك.  گبل لا تاخذله روحه
خلي تشبع عيني منه.  باچر تعيش عله نوحه
لو مشه تموت بحسرته. وتعمه من لوعة جروحه
هالحسن عني لو رحل **من بعده ابقى بلا امل
عالذكره بفراگه اظل **ادري هاي الروحه روحه
لو راح شيخلص ليلي* لو راح يتهدم حيلي
طول الدهر انعاه** ماعيش تدري بلياه
****
تدري بالدنيه وحملها. تكسر ظهور اليتامه
يايتيم المات ابيه.  وعاش بالدنيه بسلامه
يضيع بدروب النياحه.  وتاكل بروحه الندامه
وكل رحم ماعنده البشر **والدنيه مليانه خطر
وگبالك ايمامك قهر  **ميت بطيحت ايمامه
بهاليوم گاصد تفجعنه *بهاليوم ناوي تلوعنه
وعليك اقسم بالله **ماعيش تدري بلياه
****
خلك بدالي انت خلك.  موقف شگد بي صعوبه
نهارك يموت بونينك.  وموتك بأول غروبه
هذا ابويه وهذا حاله. والزمن اعلن حروبه
لو خذته من يبقه الي **بين المصايب انولي
حنيته دنيه وكل هلي **بعيني والكون وشعوبه
هيهات تسكت وناتي *هيهات تهدأ اهاتي
والسم ياكل بحشاه** ماعيش تدري بلياه
****
بالنبي يابين احلفك.  ارحم بحالي وغربتي
عوف ابويه الغالي عوفه.  لا تهد گلبي وعبرتي
لو مشه من يبقه عندي.  والهجر يذبح نظرتي
صعبه اظل بلا ابو **وگبالي شمات وعدو
ساعتها شيفيد العفو**وكلش اطويله سفرتي
وياه خذني وريحني* وياه وجهه يصبرني
يا بين وانعم بحماه **ماعيش تدري بلياه
****
تنكسر عيني برحيله. وعمري يخلص حسره حسره
يرعب الليل وظلامه.  وينجرح لو ماكو گمره
وانه ياويلي عله حالي.  راح اعيش بلايه عمره
وانه الامام المنتظر** من صغري دلالي انكسر
وين انطي وجهي والسفر **قاسي ما يرحمني ادري
يزرع بنص دربي صحره
****
خادم اهل البيت عليهم السلام
الشاعر السيد {هاشم قاسم الداودي}

قصيده بحق الامام{الحسن العسكري}{عليه السلام}
****
ياموت ارحم حالي*وترك ابويه الغالي
مااكدر اعلى غيابه.** مااكدر اعلى غيابه
****
ارحم بحالي يموت وحن عليه
شعندي وياك وأجيت بهال رزيه
بعد من احضانه ماشبعت أديه
اي واحك كل الجره بأمي الزجيه
محتاج انه الحنيته * ماريده يترك بيته
وابقه اون المصابه** مااكدر اعلى اغيابه
****
والحسن هالدنيه مليانه مخاطر
بيها ماريد ابقه وحدي بحزني حاير
المايصير بروحته اعتبره صاير
وحالي حال حسين اظل ابلا مناصر
توكف الدنيا بعيني * ياهو الذي يحميني
والناس جنها ذيابه ** ماكدر اعلى اغيابه
****
وَنّي ووان اليتم وهموم ضيمه
نايباته اجبيره  واحزانه أليمه
خاف من يموت ياخذني غنيمه
واكضي باقي سنين عمري بالهظيمه
نار الحزن حراكه * ماتنطفي بفراكه
الماحسبت حسابه**مااكدر اعلى اغيابه
****
بيش اضمد جروحي من يبتعد عني
وهوا روحي ودنيتي وعيوني ذني
عوفه ياموت واخذ شتريد مني
مااريد اصبح يتيم بصغر سني
تدريه اعز من روحي * موته يزيد جروحي                    تمنيت بيه صوابه ** مااكدر اعلى اغيابه
****
ليش تطعني يموت بظهري غفله
وانه دمع الحزن كله بعيني صله
هالله هالله بيه الطف هالله هالله
حجة الله وراح اودع حجة الله
ياموت غيره شعندي * بفراكه اعيش الوحدي
وانه اعز احبابه** مااكدر اعلى غيابه
****
ابو صالح انه ابنه وكل حياته
انه هوه الذي شايل كل صفاته
ليش اليه يعوف حزنه ونايباته
واكضي كل سنيني بالغربه بمماته
هيهات بعده اتهنه * تتناني بس الونه
والنوح يفتح بابه **مااكدر اعلى غيابه
****
خلاف عينه ابقه هايم بالبراري
وحلمي يتطشر على رمال الصحاري
انه ادري والمصيبه هوا داري
ياحزن من بعده كاعد بنتظاري
واضح واشوفه كبالي*غيره فلا يبرالي
ماينحمل عذابه**مااكدر اعلى غيابه
****
خادم اهل البيت عليهم السلام
الشاعر السيد{هاشم قاسم الداودي}

قصيده تجليبه ولائيه{سامراء}
****
على عناد النواصب والوهابيه
سامره تظل للموت شيعيه
****
نموت وعن دربها مايمنعونه
يخوفونه بمنيه وموت يلكونه
جرذان الصحاري مايخوفونه
احنه اولاد حيدر هيه من هيه
****
ننسه ارواحنه والها مننساها
بأعز ماعدنه واكثر بعد نفداها
نكص جفوف كلمن راد يدناها
هيهات الشمر ياخذها مسبيه
****
منارتها تظل تتحده كل حاقد
والناصبها واللي الها مارايد
هيبتها تظل بكل زمن شاهد
عفيفه وطاهره مخدره وعلويه
****
معزتها تزيد وابد ماتنقص
الفكر بيها سوء بيوم يتربص
والمدفون بيها منحره ينكص
من عدنه اغله هي ومن هوه الريه
****
مثل امنه وابونه واكثر واكثر
مايغله عليها كطعة المنحر
كلمن مايواصلها وكطع يخسر
يقدسها الاله وهاي مرويه
****
يودها الله شكثر جاليش ماودها
ومن عزاز كلبي شلون ماعدها
اتمنه اكضي باقي عمري بسدها
الجنه اضمنها انه مليون بالميه
****
خادم اهل البيت عليهم السلام
الشاعر السيد{هاشم قاسم الداودي}

قصيده موشح بمناسبة استشهاد{فاطمه الزهراء}{عليها السلام}
****
للزجيه يكون ابجي عيوني
على همها دموعي ميكفوني
****
مصابها ماخله حيل ولاصبر
شلون انه بدونها اكضي العمر
مني اخذها الموت وتراب الكبر
الجانت ام بيتي وشمعتي وعوني
****
والله لو بيدي اموت وياها
العمر مايسوه ترا بلياها
مستحيله ام الحسن انساها
لو نساء العالمين انطوني
****
نايم وصاحي افكر بيها
وكلبي يوكف من يمر طاريها
ليلي ونهاري انوح عليها
مصابها وفراكها اذوني
****
انه للفرسان ابد ماهابها
كاسر خشوم الطغات وبابها
بالهوه اتعثر صرت بغيابها
ابجي وعيون السمه يبجوني
****
شلون انسه شلون خدها المنسطر
وعصرة الباب وضلعها المنكسر
بعيني شفت شلون جانت تنعصر
من وكت وناتها شيبوني
****
ياهو اليسد ياهو خلوة فاطمه
من مشت دنيانه صارت مظلمه
للسمه صعدت باعظم مَضْلَمَه
غفل صعدت ياوسف من دوني
****
راحت وخلتني وحدي بهالزمن
كلبي يتكلب على نار المحن
جفوني ذبلت من دموعي والوسن
واثر هالنايبه بان بلوني
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده بحق السيده{فاطمه الزهراء}{عليها السلام}
****
اسمع اشصار يخويه اسمع اشصار
اعله ام الاطهار يخويه اعله ام الاطهار
****
راح اسولفلك يخويه وكلبي ملهوب
عن مصيبه وعن جرح ماجان محسوب
ٱمن الالم خله الزجيه تون وتلوب
مثل شمعه تبجي سكته بين الدروب
ليل ونهار يخويه ليل ونهار
****
راح ياعباس اسولف كلشي هاليوم
من بعد مامات جدنه شسوت الكوم
سوه ياعباس اجونه بحقد مسموم
بغير اذن طبو علينه زمرت الشوم
وماكو اعذار يخويه ماكو اعذار
****
امي خلف الباب لاذت خويه عباس
خافت تعاين عليها عيون الارجاس
لاجن اتعناها يركض ارذل الناس
وبيها ظل يعصر نظرته وشيب الراس
يطللب بثار يخويه يطلب بثار
****
امي آخ تصيح ضلعي انكسر نصين
وهوَّ ياعباس يدفع بيده الاثنين
الزهره تبجي هو يضحك شفته بالعين
والاشد منها سمعته يكلها للبين
وطكها بسمار يخويه وطكها بسمار
****
يابو فاضل من المها هوت عالكاع
وضاع صبري من شفتها والعمر ضاع
لارحم لا غيره عدهم اهل الاطماع
صارو اعله ام الترافه كلهم سباع
حركو الدار يخويه حركو الدار
****
تسهر ومدمعها اذكر جمر سجام
ٱمن ابن صهاك وزمرته ٱشّافت الام
من هضمهم من ظلمهم كبرت اعوام
من وجعها جانت امي ليله متنام
تشتعل نار يخويه تشتعل نار
****
ماتت وعالخد طبع سطرات وجفوف
دمع المصيبه الاليمه خويه مذروف
بعد ابوها عاشت امي برعب وبخوف
تخيل انته كوه كامت تمشي وتشوف
بليل الاخطار يخويه بليل الاخطار
****
انه من يوم المصيبه عيني عالباب
وليل ونهار ٱعله امي دمعي سجاب
ابد ما انسه الفجيعه وفعل الاصحاب
يابو فاضل ولو أمي ولية ذياب
كلهم ٱشرار يخويه كلهم ٱشرار
****
خادم اهل البيت عليهم السلام
الشاعر السيد{هاشم قاسم الداودي البداوي}

قصيده بحق الامام {السيد محمد ابن علي الهادي} {عليهما السلام}
****
ياخويه موتك من خذك   مافكر شلون
ابقه انه عايش والنفس   بالكبر مدفون
ياخويه ياخويه مافكر شلون
****
مافكر الموت الذي   سل منك الروح
كل كبريائي بطيحتك   تمليه الجروح
لو ميت انه ولاشفت   كدامي مطروح
روحي وحبيبي وهالمسه    للمكبره يروح
لو بيدي ولله اندفن   يالغالي وياك
يم راسك ابجي بحسرتي   وانعه اعله الفراك
ياخويه ياخويه مافكر شلون
****
ياسيد محمد لظل    بعدك يمظلوم
ياخويه والموت الخذك    مركز للهموم
كون اشك كلبي بموتتك   موبس الهدوم
وعيوني تبجي الفركتك    حسرات ودموم
وين الكه مثلك بالبشر    مو بس وفي حنين
جاوبني يبن المرتضى   واحجيلي منين
ياخويه ياخويه مافكر شلون
****
مو كتلي اظل طول العمر   يمك يصنديد
وما اغفه ليلي لو صرت   عن عيني ابعيد
شو رحت وحدك للكبر   وبكيت انه وحيد
ميرجعك دمع اليصب    وعتابي شيفيد
تخنكني حسرة فركتك   كل مغربيه
لا بل على فراكك اون   صبح ومسيه
ياخويه ياخويه مافكر شلون
****
ظهري انكسر يابو الوفه   واتهدم الحيل
ياخويه ومصابك صرت   اتنفس الويل
ياطعم بشفاف الحلو  ياريحة الهيل
بلا وجهك الجنه كمر   شيخلص الليل
بين الاخذ روحك ردت   ياخذني للبين
هو اليافاركله اخو    شيسوي بالعين
ياخويه ياخويه مافكر شلون
****
بس افتح عيونك الي   وعاين على الحال
وحك عمك اللي تشبهه  بيه الحمل مال
صوت اسمعت باذني همس   تدري شحجه وكال
يالعسكري انفتحت الك  كل بوب الاهوال
يالحسن انسه كال الي   كل ذيج الايام
محمد مشه وانت استعد   للهم والالام
ياخويه ياخويه مافكر شلون
****
مو هينه اشوفك عالثره   يا اغلى الاحباب
يالجنت تسكن بالكلب   ساكن بالتراب
يمحمد ارحم حالتي   ذاب الكلب ذاب
موصدك كلي اللي جره   جذاب المصاب
ماكول جلمة اخ بعد   صدكني للموت
والبيت اشوفه بموتتك مو بيت تابوت
ياخويه ياخويه مافكر شلون
****
ماادري يطلبنه الاجل   ياخويه يادين
عينه على اعزاز الكلب   ويدور الزين
محتار اروح الياكتر   يابو الوفه وين
عباسي انت ولو رحت  شيظل للحسين
يالجنت كلشي بدنيتي  واغلى من الانفاس
بعيوني وحشة بت علي الفاركها عباس
ياخويه ياخويه مافكر شلون
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده موشح لسان حال{فاطمة الزهراء}{عليها السلام}
****
يبو صالح يمته تاخذ ثاري
ويمته تمسح يبني دمعي الجاري
****
انتظر جيتك عله نار الصبر
من مغيبك ترجع ويمي تمر
وشّل عتابي ومصخ حجي العذر
واسود من الليل صار نهاري
****
حمره لي هسه ييمه عيوني
وازرك امن السمه لون متوني
ظهري محني وذابلات جفوني
بيها اكلك لو جنت ماداري
****
بعده ضلعي مابره وينزف دمه
الآه صارت لو صحتها تلجمه
سكته اونن والمدامع ساجمه
وماطفت لليوم تلهب ناري
****
هجمو عليه العده هجمت ذئاب
بنار وسياط اعتنولي والحراب
ياكل ويشرب اويايه هالمصاب
الما احبهم غفل طبو داري
****
ابالي مثل الموت تتعنه الصور
ٱشسوه بيه وشعمل ضيم القدر
بعد ذاك العز يحوطني الخطر
وتنكشف لعداي كل اسراري
****
بالصدر بسمار وجثير النزف
والالم يزداد بيه ومايخف
ومثل سعفه بريح صرت ٱرجف رجف
ودمه المحسن طاح يم اكتاري
****
انكسر ضلعي وبابي بالنار احترك
السمه احس طاحت عليه من انطبك
كل دلالي كبال عينايه انهتك
هاي هي قسمتي واقداري
****
يبو صالح كوم ليه وانتقم
واصلب اعله الشجره اشباه الزلم
نايباتي بشيل سيفك تنحسم
عله دربك طَشَّرت انظاري
****
شيل سيفك يبو صالح وانتفض
وعالركاب يصلي يايمه الفرض
طهر امن انسالهم هاي الارض
بعد ماريد اسمعلهم طاري
****
خادم اهل البيت عليهم السلام
الشاعر السيد{هاشم قاسم الداودي البلداوي}
1445 هجري

قصيده بمناسبة استشهاد{السيده فاطمة الزهراء}{عليها السلام}
****
التنضرب امه كبال عينه بسطره
من الونين يموت صبره بصدره
ليله ونهاره يعيش بين الدمعه
وتخلص حياته شمعه تحرك شمعه
وللموت جرح النايبه مايبره
****
هذا الحجي الي ينحجي يحتاج حيل شكبره
كل حرف منه نايبه ظهر الجبال تكسره
امنين ابدي بيه اتحيرت واعليه اهل ياعبره
صح كلشي ممكن ينعبر بس هالالم شيعبره
اشتعل نيران ** كل ما اريد  ابدي واسولف واحجي
اشتعل نيران ** اسكت واظل انحب واون وابجي
ماتنمحي ذيج الصور من عيني
شما طال عمري وبيّه تمشي سنيني
والكلبه مصيوب بسهم شيجرعه
وتخلص حياته شمعه تحرك شمعه
وللموت جرح النايبه مايبره
****
بالدار جنت اويه الاهل وعيوني شافت كلشي
عالباب طاحت فاطمه وبالباب يدفع وحشي
من عاينتها بالدمه شيب دليلي ورمشي
من كثر ما نزفت شفت مابيها صارت تمشي
ما تكدر اتكوم ** انهد حيلها وكلشي تغير بيها
ما تكدر اتكوم ** والناصبي يروح ويرد عليها
عالجرح يتعمد شفت يضربها
للزهره مدري بيا طلب يطلبها
عليها يفزّع جان ناسه وربعه
تخلص حياته شمعه تحرك شمعه
وللموت جرح النايبه مايبره
****
تزحف زحف من الالم بذاك المسه خلوها
بسمار نابت بالضلع واكبالهم شافوها
رادت تموت ام الحسن نجم الظهر راوها
كل هذا وارذال الخلك  للزهره ماعافوها
اركض تعنيت ** خفت اعله امي الموت لايدناها
اركض تعنيت **  للموت هاي اللحظه ماانساها
امنين ومنين الدمه يهل منها
وبالكوه صرت اسمع حجي يهونها
كلفه وحك الخلق سبعه وسبعه
تخلص حياته شمعه تحرك شمعه
وللموت جرح النايبه مايبره
****
تمنيت ميت من كبل لا امي هيج انظرها
صعبه اللي ماعنده شرف للحره يكشف سرها
بالسوط لوعها شكثر  وبجفه يامه اسطرها
لو جان مموصه علي ماينكسر خاطرها
واليلمس الباب ** ميجوز عنه اله يكطع ايده
واليلمس الباب ** بس الذي ميريد جان وريده
العبد والمو عبد ليها اتعنه
يضربها وامي اتجابله بالونه
للهادي ام وبنت روح وبضعه
تخلص حياته شمعه تحرك شمعه
وللموت جرح النايبه مايبره
****
ماتت يحيف مرضرضه ومتورمه وحزنانه
راحت لبوها مكدره ومن كل كتر وجعانه
بالدار صرت الوحدي وبحيرتي حيرانه
وبدموعي لو اكضي العمر هم ماترد ويانه
حتى الحِياطين ** يازينب اسمعها تكلي بحيره
حتى الحِياطين ** فركة الزهره يالحنينه جبيره
شيعوض الراحت بعد ماترجع
من السوالف لا امل لا اشبع
والكضت ايامه ويه امه بسرعه
تخلص حياته شمعه تحرك شمعه
وللموت جرح النايبه مايبره
****
خادم اهل البيت عليهم السلام
الشاعر السيد{هاشم قاسم الداودي البلداوي}
1445 هجري

قصيده ميمر بحق{السيده فاطمة الزهراء} {عليها السلام}
****
يمته ترد يالموعود تاخذ بثار الزهره
****
طول غيابك يا شبل حامي الجار
جروح التتاني طلعتك تلهب نار
ثار الزجيه يطالب برد الثار
واحد بواحد ميريد الواحد يريده بعشره
****
يالمنتظر وشل صبر المتانه
وبجه المصايب من دمه حرمانه
عينه اعله دربك للصبح سهرانه
ماينوصف ضيم البيه يحرك دليله الجمره
****
حط عالكبر واسمع نحيب الونات
وبيا رزيه امك الزهره تبات
جروح العليها وداعتك ملتهبات
اتعنه الها وشوف بيا حال وبيا الم منتظره
****
دامي ضلعها ومالكت ليضمده
ليل ونهار الدم يهل من عنده
لايستجن لايسكت ولايهده
يالمهدي يمها امن تروح ناشدها عن العصره
****
من طاحت امك فاطمه فوك الباب
متدميه ومتوجعه والصدر انعاب
ناشدها خل تسولف اعله الاصحاب
وياهو الذي و إن كال وسوّه الذي ما يجره
****
رد يبو صالح و اصلب الأذاها
وانتقم من البالأمس بجاها
ليل ونهار الطلعتك تتناها
كلب امك امخزن ظيم اكثر بعد شيصبره
****
الشاعر السيد{هاشم قاسم الداودي البلداوي}
1445 هجري

قصيده موشح بحق القاسم ابن الامام موسى ابن جعفر عليهما السلام
*
كوم ياحامي الحميه بهل مساء
كوم وانصب لابنك القاسم عزاء
****
كوم وتعناله بدموع التصب
مات ابنك ياعلي بديرة غرب
اتكطعت لمصيبته نياط الكلب
وعلى حاله الكاع ناحت والسماء
****
بعيد ابنك مات عن ناسه وهله
من بني هاشم ولا واحد اله
شلون ترضه بهاي يابو المرجله
عيشته وموتته احزان وعناء
****
شبل موسى الكاظم وعم الجواد
شردوه وغربوه اهل العناد
على مصابه ماعلن واحد حداد
ضاعت اخباره على اهل الولاء
****
الاشد من كل هاي حيدر والعجيب
عل شريف وعل عزيز وعل حبيب
مات وينادوله قد مات الغريب
يابلاء الاشد من هذا البلاء
****
على جتاف الغرب نعشه ينحمل
صعب هذا ياعلي لامو سهل
على مصابه دمع ماواحد يهل
وكل بني العباس نصبوله عداء
****
من عمامه وهله ماواحد حضر
اه من ظلم الليالي والقدر
ابن خير الورى ويموت بخطر
وعلى علت احزانه ظل ينعه الدواء
****
وحنه ياحيدر علي منعوفه
بلهفة المحتام جينه نطوفه
جرح اليلجمه اعتنينه نروفه
الوفه ناده وحنه لبينه النداء
****
صغار وكبار اعتنينه بهال مصاب
النسوه والأطفال والشيب وشباب
الابنك القاسم يادحاي الابواب
نروح يابو حسين كل احنه فداء
*
خادم اهل البيت عليهم السلام
السيد هاشم قاسم سعود الداودي
١٤٤٥هجري

قصيده ولائيه
****
ولدك مولاي زلم وهيبه
يابو الحسنين اصغار وشيَّبه
شيعه واحرار يابو الحمله
من حلك الموت حكهه تجيبه
****
مثلك شيعتك يابه الحسن حيدر
من تغضب نظام الكون يتغير
تسوي اللي تريده وأكثر وأكثر
مثل عمار والمقداد والاشتر
ماتعرف خوف يا واليها
لو هذا الكون صار عليها
يشوف اللي راد ذلها الذله
هاي الشبان هاي الشيبه
****
عليهم ياعلي اليتعده مو عاقل
لو عنهم يبو الحسنين مو سائل
الكتبت عالصدر عباس ياكافل
متهاب المنيه وفشكة الجاهل
اي والعباس كلهم كدها
من تريد تفوت ياهو يردها
جذاب الكال عنهم قله
جرح الميطيب هي اتطيبه
****
عدها العركه لهوه والحرب ونسه
يضحي من اجلها المعرس بعرسه
كالوها امس وتكولها هسه
اقل مايفتديك الشيعي ابنفسه
لجلك مولاي يرخص دمها
وسلطان الموت لاميهمها
هو انت الدين وانت القبله
يابو الكلفات يابو الطيبه
****
انت الجربتهم سيدي هوايه
تنطي الغالي فدوه الخاطر الغايه
المهدي من يرد وشايل الرايه
كدامه تطيح جنود وفايه
ولدك افعال موش حجايه
اي والي طاح جوده ومايه
كلشي اللي مال هي اتعدله
ماعرفت يوم شنهو الريبه
****
كلها تخرجت من مدرسة عابس
للمبدء تحارب كلها وتنافس
صبحها يدوس ليل الاظلم الدامس
تحارب منهج الشيخين والخامس
ماعملت بي ولاوالزهره
ولدك مولاي كرهت فكره
ياابو الحملات لامتعقله
مثل الشيطان باين عيبه
****
هذا الحشد شفته وشفت افعاله
هبو عالسواتر زلم خياله
شياب وشباب بدور تتلاله
خلت كل عروش الجور تتهاله
صانو الاعراض ولد الملحه
سور الشيطان هدو صرحه
حشد الابطال يمك سجله
العاداهم شاف ذله وخيبه
****
ابو محمد رضا للكلمه وحدها
وخطط كل الاعادي بخطبه بددها
والنهدمت امس هاليوم شيدها
وجندله جنود الموت ميردها
شافت عيناك شنهو شعملو
بسوح الميدان هناك شفعلو
مثل الانوار واضح فعله
على روس عداه صار مصيبه
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده شوط كربلائي مع قفلين ميمر بحق {فاطمة الزهراء}{عليها السلام}
****
يبو صالح ترد يايوم. يبني وتعتني ليه
حجي عندي يذوب الروح تجي واحجيلك شبيه
****
ليالي مرت هوايه. ييمه وانه انتظرك
بحسرتي ودمعة عيوني وصبري المنتظر امرك
ظلام العشته والشفته. مايضويه بس بدرك
بكلبي وحزني وجروحه ونوح المنهظم نوحه
عيني وعينه مشبوحه على دربك يضي العين
منك ننتظر جيه
****
انه امك الزهره انه الغيرك فلا عندي
على وعدك بجيت هواي وبجيت دموم انه الوعدي
تحن بعدك على ثاري تون وحدك وون وحدي
سل صارمك واتعنه. وسوي الانه اتمنى
وحربك عالكفر شنه. يحن كلبي على فركاك
ميحن كلبك عليه
****
تعال اعله البقيع وشوف. يبني حالته حاله
وحشته تكسر الخاطر. ماتنحمل جتاله
عليه عرش الاله ينوح. ودمعة عينه هماله
اليمته كبر يبقه حجار. وتحوطه المحن والاخطار
ماتنهض تصفي الثار. الظلمني انتقم منه
ورد الواحد بميه
****
مناره وكبه والحظره. بجفك كون تبنيها
لاتنسه يبعد امك. عين امك تره عليها
واريد عروش ابن سفيان. من الكاك تفنيها
حلمي وحلم احزاني. ترد وتطفي نيراني
ويشوف القاصي والداني ورايه حيد ماينقاس
اظل بزوده محميه.
****
خليني يبني بجيتك اتباها
انه المضيعه وطلعتك اتناها
بهجرك احير منين اتلكاها
بس انته اللي تاخذ ثاري
****
باب انتظارك لا ابد ماسده
هو اللي مثلي غيرك انت شعنده
ارجع واكطع روس اهل الرده
يبن الكرار وصفيها
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده نزله ولائيه
****
الله يلعنهم الله يلعنهم
اذو الزهره الزجيه الله يعلنهم
****
راح اظل طول العمر العنهم انه
زمرة الشر والغدر اهل الخيانه
للرسول الهادي ماراعو امانه
غدرو بحامي الحمه واخذو مكانه
الله يلعنهم الله يلعنهم الغدرو بحامي الحميه
الله يلعنهم
****
والله مااترضه عنهم الله يشهد
مااحبهم هي كوه اللهُ والاحد
على دين الله اذا اهواهم ارتد
همه همه الكفرو بعترة محمد
الله يلعنهم الله يلعنهم همه اساس الكل بليه
الله يلعنهم
***
انه ماريد برضاهم يكضي عمري
منهم اتبره ولو كطعولي نحري
لعني الهم مااعوفه بدمي يسري
لو متت بي انه اردد ونه بكبري
الله يلعنهم الله يلعنهم كل صباح وكل مسيه
الله يلعنهم
****
للنبي والنبي ما احسبهم اصحاب
اقل ماعنهم اكول وحوش وذياب
على داره هجموّ وحركوها للباب
عتبي ماينفع واحاجيهم بالعتاب
الله يلعنهم الله يلعنهم چي بدو باول رزيه
الله يلعنهم
****
سامري الامه عمر مايكفي العنه
كل مصايب فاطمه والعتره منه
وعجله وياه مشه ماخيبله ضنه
ابو بكر الباغيه للظلم سَنه
الله يلعنهم الله يلعنهم مجرمين وناصبيه
الله يلعنهم
****
لساني لو بطل لعنهم الا اكطعه
وكلبي لو فد يوم حبهم الا اقلعه
اي كلام بلا لعنهم مااسمعه
مايهمني الكال والماكال بدعه
الله يلعنهم الله يلعنهم مااحبهم للمنيه
الله يلعنهم
****
ابو صالح من يرد ينتقم منهم
مستحيله يعوفهم ويجوز عنهم
من العراق يروح يتعنه لوطنهم
يصلب الجثتين ويهدم سسنهم
الله يلعنهم الله يلعنهم ضللو هاي البريه
الله يلعنهم
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده بحق{السيده ام البنين}{عليها السلام}
****
كرامات * فاطمه عدها شكثر
كرامات * سرها عنوان اليسُر
بالشدايد بيها مضروب المثل
جانت ام عباس هي وماتزل
كرامات *كرامات
****
بكل مكان وكل زمان * ام ابو فاضل امان
للبريه
ماتعوف اللي يحير * عون اله تصير ونصير
بكل قضيه
بيها يتغنه الوفاء * والارض واهل السماء
والحميه
حيرت كل العقول * عنها ماتدري شتكول
هالوفيه
والايام * تبقه عليها شاهده
والايام * كل باغي هيَّ اتعانده
مايحدها الوصف والعَزَّ وجل
جانت ام عباس هي وماتزل
كرامات * كرامات
***
اربع حروف الحنين * علمتها ام البنين
عالمحنه
بلسم الكل الجروح * عطر عالوادم يفوح
عطر جنه
فاطمه ام الحنون * تنطي للرايد عيون
بلايه منه
جفها اشبه بالخيال * ابد مايعرف محال
ندري عنه
للافراح * مصدر ام راعي الوفه
للافراح * رحمه واحساس ودفه
تكر عين الضايع وماله امل
جانت ام عباس هي وماتزل
كرامات * كرامات
****
ينتهي يمها الكلام * غطه وفراش وسلام
ام الابرار
شمس تتحدى الغيوم * زاهيه مثل النجوم
رحمه وايثار
الكل ظلام تحسها نور * ماليه الوادم سرور
رغم الاخطار
مثل حيدر لليجوع * جفها يمسح كل دموع
ابلايه اعذار
للاحساس * هي كلشي ام الوفه
للاحساس * كلها رحمه وعاطفه
اي وحك العاري عالغبره انجتل
جانت ام عباس هي وماتزل
كرامات * كرامات
****
يخضع الها المستحيل * مثل حماي الدخيل
تكر العيون
البيها يتمسك يفوز * كلشي متخلي يعوز
وهذا مضمون
فاطمه ام كلب الجبير * شامه بخدود الضمير
محيره هالكون
تنطي للميت حياة * يمها كل النايبات
صغيره وتهون
والحسين * كل صعب هي تسهله
والحسين * يمها تُحَل كل مشكله
الينتخي بيها تجيله بالعجل
جانت ام عباس هي وماتزل
كرامات * كرامات
***
جاه عدها شكد عظيم * وبخت يشفي كل سقيم
ام البنين
بابها الدكه يصيب * ابد والله مايخيب
ودم الحسين
ياخذ ابإيده الدواء * كلمن يريد الشفاء
برمشة العين
الها مايوجد مثيل * هاي هاي ام الكفيل
زينة الزين
يألله * إشكد عظيمه هالمره
يألله * للدنيه كلها مفخره
بكلب كل شيعي غصن حبها انشتل
جانت ام عباس هي وماتزل
كرامات * كرامات
****
خادم اهل البيت عليهم السلام
الشاعر السيد{هاشم قاسم الداودي البلداوي}