قصيدة موشح بمناسبة وفاة مولاتنا{أم المؤمنين السيدة خديجة بنت خويلد}{عليها السلام}
****
اشكثر افضال الج ياام البتول
يفوق ادراك التصور والعقول
****
اشما تدور الدنيا وتطول السنين
انتِ تبقين انتِ يانبع الحنين
شيخة النسوان وام المؤمنين
مااوصفج عنج شما ردت اكول
****
شكد مواقف عندج بكد النجوم
شمس جنتي للنبي تزيل الغيوم
ابد ماهمج كلام اللي يلوم
ودستي بجدامج على راس العذول
****
جنتي ام واب اله وعون وسند
وجَنّه لتنسيه اهات الشدد
مااعوفك وحدك كلتيله ابد
وطن صرتيله يتربات الاصول
****
اله انطيتي اموالج وذاك الدلال
ياخديجه والله سويتي المحال
وكفتج حيرت يالحُره الخيال
اتحمليتي الم فاق اعله المهول
****
من اسولف بيج يمليني الفخر
وعلى عيوني تمر الاف الصور
نقطه جلمات المدح وانتِ البحر
غرك بيج الراد من عندج ينول
****
كمر نورج يظل يتحده الظلام
صرتي مضرب مثل بالحب للانام
ياخديجه عليج من عندي السلام
مايهمني شحجه وشكال الجهول
****
مالكه غيرج رسول الله بديل
يدري جان الامر جداً مستحيل
وزعيتي شعندج من اجله سبيل
يسجد التاريخ يم بابج خجول
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده بمناسبة استشهاد{امير المؤمنين علي ابن ابي طالب}{عليهما السلام}
****
كون الله ينطيني صبر واصبر عله الدمعه عمر
يوميه من عندي الگبر ياخذله غالي
دنيايه صارتلي سجن يكتلني ليلي من يجن
مني اخذ ضيم الحزن عزي ودلالي
****
انه الي مجروحه بجرح بالموت مايتضمد
شما يمشي بايامه العمر. وسط الكلب يتمدد
ليليه اسهر بل الم حزني فلا يتحدد
تعتك لياليه ويظل. ظيمه علي يتجدد
جرحي فلا يشبه جرح. سَوَّد بعيناي الصبح
العنده عزيز وينذبح. يبقاله تالي
ياناس والله تعبت. اتمنه من صغري متت
بالدمه طايح من شفت عزي ودلالي
****
عنوان صرت لكل حزن متحيره ومهظومه
شيبني ضيمي من وكت اخ شكثر ملجومه
ما نصف ويايه الدهر. ياحسرتي من يومه
انه العلهكصتي انكتب. زينب علي المظلومه
بالامس ماتت فاطمه. واليوم حماي الحمه
بجتني فركتهم دمه طول الليالي
عالباب وشلت الدمع من كسرو من امي الضلع
كل يوم بل هم ينفجع عزي ودلالي
****
كل كبريائي ويه الدمع عل كاع كله تبده
واهاتي ابد ماتنوصف وحده اشد من وحده
باب الحزن من ينفتح. يادمعه بعد اتسده
والكبر من ياخذ بشر هيهات لهله يرده
فراك الابو كلش صعب. تكسر مواضيعه الكَلب
شتعوض دموع التصب. فركة الوالي
فركاه ابد ماينحمل. تكسر ظهر تكتل كتل
شتفيد دمعات التهل. عزي ودلالي
****
الفاكد ابو بيه يحس ويدري شغمجها جروحي
والعاش وحشة فركته يبجي لونيني ونوحي
الموت لو عافه الي ومن عندي ماخذ روحي
جاهسه مرتاح الكلب لامني نازل موحي
لااكضي هاليل بسهر لادمعي ينزل جل المطر
لابيه يندك الخطر. ويهد امالي
ومايذبح الضحكه الرمح واحساسي ابد ماينجرح
ياحيف غفله ينذبح عزي ودلالي
****
لو اكلب الدنيه كلب مثله ابد ماالكه
هو علي يشبهه منو. خاطر تهون الفركه
مصيبة رحيله نايبه. نار بدليلي تحركه
اذاني حيل بموتته. ومَيَت بروحي الملكه
أمني واماني ودنيتي. راح وتركني بحيرتي
اعثر صرت من بلوتي. حته بخيالي
راح وبعد شيرجعه. بااحزاني صرت مكبعه
انعه وعلى مصابي نعه. عزي ودلالي
****
نور الله عالهامه انطبر. وتغطه بالدم شيبه
حامي الحمه وصهر النبي. المليان غيره وطيبه
راعي اليتامه والوطن. سيف الحقود ايصيبه
بالمكبره هناك سكن. راح وبعد شيجيبه
اتمنه لو يرجع الي. اغله واعز ناسي وهلي
وحشه الليالي بلا علي والدمع هالي
هيهات مايرجع بعد. غطه الترب طير السعد
مني اخذ ليل الوعد. عزي ودلالي
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده بمناسبة استشهاد الامام{امير المؤمنين علي ابن ابي طالب}{عليهما السلام}
****
حيدر علي كبل الموت وصه بوصيه العباس
****
ياكمر هاشم كله مني تدنه
ياروح ابوك الماتخيب ظنه
اوصيك انه بسيد شباب الجنه
وكت الشدد لتخليه صير اله عون ونبراس
****
لو شفته يابدر العشيره حاير
بين العده ماله معين وناصر
بطف كربله يوليدي يوم العاشر
يابا الفضل صير وياه ظهر بظهر عالارجاس
****
ياكمر هاشم باجر من تشوفه
بالحومه بين اهل العده لتعوفه
ضحي بجفوفك والنحر بطفوفه
عالنهر واعدني تطيح وبعمد ينصاب الراس
****
وزينب امانه بيمنتك ياوفاي
الها اعصر العينين لو رادت ماي
كفال صير الها وعضيد وحماي
بالغربه ماريد تعيش يابو الوفه والنوماس
****
رد ابو فاضل والدمع منه يسيل
امن يبويه الحمل بعدك ميميل
شحده بوجودي اليدنه وعليه يعيل
ياعلي وحك ليل رباي اقلع الدنيه من الساس
****
ياباالحسن امن يكرة عيني
ماعوف زينب ياعلي وحسيني
عيوني ودمايه ويسرتي ويميني
من بعد عينك والله عالباب توكف حراس
****
خادم اهل البيت عليهم السلام
الشاعر السيد {هاشم قاسم سعود الداودي}

قصيده موشح بمناسبة استشهاد {امير المومنين علي ابن ابي طالب}{عليهما السلام}
****
شصار بخت حسين من سمعت خبر
علي حماي الحمه راسه انطبر
****
هي مجروحه بجرح ينزف دمه
ماتمر ليله الحزن مايلجمه
وين خلت نايبة حامي الحمه
ويم المهه الالم قطرة بنص بحر

****
حين دكو بابها وجابو علي
مخضب بدمه حماها والولي
منهدم حيله وونينه معتلي
معَصَّب بعمته وعلى الهامه الاثر
****
شافته بمنظر ابد مارادته
لونه اصفر دمه صابغ لحيته
شكالت اخت حسين لمن شافته
والمصيبه شجابت الها من صور
***
لطمت اعله الراس ماادري بجت
حجت ساعة شوفته لو ماحجت
زين ظلت عين الها وماعمت
وبت علي الكرار ما ماتت قهر
****
علي ماجان الها بس والد تره
جان دنيتها الزهيه الزاهره
من اجه منحني ودامي منظره
على حاله وحالها ون الصخر
****
بقه ثلث تيام والدها يون
بعينها تشوفه وتسمعه ام الحزن
دموعها ودموعه نزلت بلحضن
عالمصيبه مو جمر تنزل احر
****
مات حامي الحمه والمنزل خله
وبقت زينب بت محمد معوله
الينتظرها من المصايب قافله
وابد ماترحمها اهات الدهر
****
شتنتظر زينب بعد عين العميد
غير غربه ونوح وسلاسل حديد
والزمن بيها يسوي الماتريد
من المخاطر بيها ياخذ للخطر
****
مرت الايام بيها والسنين
والوحدها بت امير المؤمنين
بقت لاناصر ولاحامي ومعين
وذبلت الجفنين من كد السهر
****
يسروها وصعدوها اعله الهزل
جتفوها ولوعوها من الجتل
تبجي وبدمعاتها يشمت نذل
تنادي يالهادي وينادي ياعمر
****
ابو اليمه موذرينه اعله التراب
عاري ابو السجاد ظل بلا ثياب
بالرماح وبالسيوف وبالحراب
والشمر من الكفه حز النحر
****
هو جان اكبالها تدوسه الخيول
على جسمه شافت تصول وتجول
تطشر اعله الرمل محبوب الرسول
ومابقه من ضلوعه واحد مَنكِسَر
****
هاي زينب بت علي حامي الدخيل
كضت كل سنينها بنوح وعويل
منين الها تجيب ياعالم كفيل
وابو فاضل كطعوه اعله النهر
****
وين ابو صالح يكوم بهمته
وياخذ بثارات اهله وعمته
وينتقم من الظلمها وظلمته
طول غيابه ونشف ريج السفر
****
ياالاهي بجاه طبرة حيدره
مانريد اكثر ولينه اتاخره
نعاهدك بالدم يربي اناصره
ونفدي كل ارواحنه للمنتظر
****
خادم اهل البيت عليهم السلام
الشاعر السيد{هاشم قاسم سعود البلداوي}

قصيده ثلاثيه بمناسبة استشهاد الامام {امير المؤمنين علي ابن ابي طالب}{عليهما السلام}
****
حس كلبي بمصاب * من دكة الباب
بحسباتي مر بس الخطر ** ومصيبه جايبلي القدر
من دكة الباب
****
بالدكه كل حيلي انهدم  وانعصر كلبي
واسود صبح لون الضوه  وتيهت دربي
وحسباتي بس عالماردت  ياويلي تربي
واركض واصيح من الوجل  ساعدني ربي
والدمع همال ** واتغير الحال
واجتمعت كبالي الصور * ومصيبه جايبلي القدر
من دكة الباب
****
للباب ياشيعه وصلت  بالموت الاحمر
شيبت وعيوني انعمت  والوجه اصفر
افتحها صرت من القلق  مابيه اكدر
من انفتحت وشفت الولي  حيدر مطبر
سابح بالدموم ** والدي المظلوم
بنيراني كل حلمي انصهر * ومصيبه جايبلي القدر
من دكة الباب
****
ارد احجي تيهت الحجي  بس اذرف دموع
من عاينت عقد الوله  من الطبره موجوع
وناتي تاكل بالكلب  وونينه مسموع
والنفس مو جنه نفس  يكسر بالضلوع
من اسمعه ينوح ** اختنك بالروح
تمنيت دلالي انطبر * ومصيبه جايبلي القدر
من دكة الباب
****
عزي ودلالي وهيبتي   واحلامي والجاه
سيف ابن ملجم ياوسف  طابرها وياه
العيشني اميره مدلله  مهيوبه بحماه
يم راسه كعدني القدر  ابجيله وانعاه
مصاب ابو الايتام * كبرني الف عام
والظهر لهمومه انكسر * ومصيبه جايبلي القدر
من دكة الباب
****
صرت اصفن بوجهه شكثر  واتامل الجاي
كل ماكرب منه الاجل  تتكرب عداي
وكل مايمر بيه الوكت  يتفرهد الراي
واتخيل الوحدي صرت  ولا واحد وياي
والحسن مسموم ** وحسين مدموم
وعالنهر مذبوح الكمر * ومصيبه جايبلي القدر
من دكة الباب
****
مايرحم بحالي الزمن  من بعده هيهات
بدمع الحزن اكضي العمر  واتذكر الفات
مو بلوه اعاشر لو مشه  تعاشرني بلوات
ماشوف من بعده الهنه  لاولله لو مات
والامل ينباك ** لو صار الفراك
ماترحم دروب السفر * ومصيبه جايبلي القدر
من دكة الباب
****
بفراكه اعيش بنايبه  متمر على انسان
وتشوف عيني من الحزن  اشكال والوان
والبيت يتحول كبر  وامالي اجفان
وابنيلي بيت من الحزن  يم بيت الاحزان
بالكوفه بالشام ** بكلوب الايتام
لو بالطفوف عله النهر *ومصيبه جايبلي القدر
من دكة الباب
****
خادم اهل البيت عليهم السلام
الشاعر السيد {هاشم قاسم سعود البلداوي}

قصيده عكيلي بحق{امير المؤمنين علي ابن ابي طالب}
{عليهما السلام}
****
ماانسه مصابك ياحيدر
****
يابو الحمله وداعت زينب
دلالي من همومك شيب
انحب وتمرمر وتعذب
والحزانك عيدي اتكدر
****
بعيوني إسودت ايامي
لجلك يامطبور ودامي
صورك من دمر كدامي
طايح بالمحراب مطبر
****
يامولاي دموم ابجيلك
وحيل البيه ينوح لحيلك
ياسيف الله وحامي دخيلك
اكثر بيه يمر وأكثر
****
رحت وماكملت صيامك
مت واعاشت بيه الامك
وتتجدد كل عام ايامك
وكلي بالنيران اتوجر
****
لو بس ذيج ايامك ترجع
واحضر انه بيوم المصرع
ماعوفك لو مو اتكطع
ودم راسك ياقالع خيبر
****
مولاي انت وكرة عيني
وكل ذاتي واحساسي وديني
ارخس ماانطيك سنيني
بروحي افديك ودم المنحر
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيدة موشح بذكرى ٱستشهاد الإمام{جعفر الصادق}{عليه السلام}
****
اليوم للصادق تعنت فاطمه
من ضلعها وعينها ٱتصب الدمه
****
حين سمعت فاطمه ٱبْسَم جبدته
نست كل همها وحزنها وكصدته
ٱمغمض العينين لمن شافته
آه صاحت يا شبل حامي الحمه
****
شنو ذنبك صاحت وانت الامام
وسمتك يبني غدر ولد الحرام
وليش جفنك ماغمض يبني ٱبسلام
وانت نبع الدين واصل الغانمه
****
يمه كعدت فاطمه ام الحزن
على ٱمصابه تبجي تنوح وتون
كِلها من الگال بالعصره وإن
هو أسس إلها هاي المظلمه
****
على حاله تنعه وتصب الدمع
بيد تمسح وجهه وايد اعله الضلع
وونها من الالم كوه ينسمع
بت محمد بجت املاك السمه
****
صبرت ٱشلون الزجيه الهالبله
وحيل مابيها بعد وتنوح اله
كظه ونها ونوحها ٱبطف كربله
وحيلها مصاب ابو اليمه هدمه
****
والمصيبه الاشد من سم الجبد
عدل ميت ينظلم من الحقد
واليزوره ينذبح لو ينجلد
بسبب احكام السقيفه الظالمه
****
بت رسول الله انمرد دلالها
وكسرة مصابه انقرت بخيالها
حال ابنها الصار يشبه حالها
بعد جف السعد لاميسالمه
****
لاصحن لاكبه عنده اعله الكبر
باامر من الناصبه واهل الكفر
المشتكى لله والراعي الامر
ابن حيدر علي راعي الموزمه
****
وين ابو صالح يجي من الغياب
ٱوْبيده ينهي الهالمصايب والمصاب
وتستراح ام الحسن من العذاب
وترتوي الضحكات من بعد الضمه
****
تستراح الزهره ويعم الامان
وياخذ الثارات من البيها خان
من يرد المهدي سلطان الزمان
بيده يمسح دمعة امه الساجمه
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده موشح بمناسبة استشهاد{محمد الجواد}{ع}
****
السمه ماوكعت عجب فوك العباد
من وكع مسموم مغدور الجواد
****
على الامه شلون ماحل العذاب
بغدر ابن المصطفى وزين الشباب
بجه عين العرش دم هذا المصاب
واليحملونه عليه علنت حداد
****
اشاف من عمره الجواد ابن الرضا
بالمواجع والالم حيف انكضه
ياذنب عنده امام الرافضه
وحرب تعلن ضده اصحاب العناد
****
بالعلم والموعضه كضه السنين
وعلى كل الناس جان شكد حنين
لان جان هوايه يبجي اعله الحسين
صدر امر المعتصم لازم يباد
****
بالعنب سموه ياحيف الطغاة
وفارك المظلوم مسموم الحياة
يمه مواحد حضر يوم الممات
وعلى نايبته الحزن نايبه زاد
****
مات ضامي وماشرب ماي الامام
وحترك كلبه مثل حرك الخيام
يعجز يوصّف هالمصيبه الكلام
من المها ناحت السبعه الشداد
****
ظل ثلث تيام طايح عالسطح
يصح وين ضماد بله الهالجرح
حاله حال حسين جده المنذبح
لبست الدنيا على مصابه سواد
****
المعتصم لو يرد يمه واعتناه
بعد ذاك الضيم بارينه شنطاه
باع لله العمر والله اشتراه
رفع شانه وباب سواه للمراد
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده ميمر بحق الامام{محمد الجواد}{عليه السلام}
****
انه الامام المسموم ياشيعه لاتنسوني
****
انه الامام التاسع من الاصلاب
امي الزجيه ووالدي داحي الباب
بسم وغدر ياشيعتي جبدي انصاب
لاذنب عندي ولاصوج اهل الحقد عادوني
****
اسمي الجواد محمد الكل تدري
بالحزن والهم خلصت كل عمري
لو جبل مايحمل الم البصدري
بني العباس الظلام نجوم الظهر راوني
****
لا ليلي ليل بكيت لانهاري نهار
لاحمه عندي وانه ابن حامي الجار
خير وعشت بين وادم اشرار
انحب وون ليل نهار ياشيعتي خلوني
****
مصيبتي مصيبه لا ابد مو سهله
عالجبل لو مرت هضمها يسله
عدواني يوميه علي تتبله
امشي بدربهم يردون وانسه علي يردوني
****
فوك السطح ظليت واعله التربان
مثل ابو اليمه المات بالطف عطشان
بالغربه وحدي بلا اهل لا صحبان
وانه ابن سيد الاكوان دم مو دمع بجونه
****
ياشيعتي عيني عليكم تربي
والله انه احبكم حب نبع من كلبي
يحفظكم ادعي من المخاطر ربي
وزوار اليه بكل عام ياهل الوفه اتكصدوني
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بمناسبة استشهاد الامام {محمد الجواد}{عليه السلام}
****
كل فكري يا ناس   ظل يم الاحساس   بالغاضريه
شاغلي بالي وروحي    رخص ونيني ونوحي
بالغاضريه
****
هذا انه الجواد التاسع اليمه
انه الكرس دموعه لغربة العمه
على الظلت وحيده بطيحت العِمه
ستر الله وعليها عيون ملتمه
حاطتها الاخطار   وسيوف الاشرار
مثل الزجيه
ما تنوصف بلوتها   من فاركوها اخوتها
بالغاضريه
****
عين الليل ما شافت خيال الها
يتوجع صبح ونها بسلاسلها
عكب عين الحسين وزود كافلها
ينظرها الشمر وعيون عاذلها
لو عمري عمرين    ودموعي نهرين
يجرن سويه
دلالي نار احزانه      ما تطفه للعطشانه
بالغاضريه
****
تنام من اغفه بين عيوني دمعتها
بحلامي واحس تخنكني حسبتها
وافز من نومي مرعوب اعله صرختها
شيب كلبي من لوعة مصيبتها
واتخيل شلون     بسياط المتون 
زينب سبيه
وخيامها المحروكه     بدخانها مخنوكه
بالغاضريه
****
كعبة حيدره زينب يعرفوها
العساكر والخيول شلون يلفوها
ازلام ال اميه وسفه حافوها
وجريمه الكفرو بعزها يشوفوها
وتغير الحال    من العز للاحبال
ذيج المسيه
رادت ابابيل الها    ترمي الي الراد يذلها 
بالغاضريه
****
بعبايتها سواد الليل يتحجب
وجان المستحه بعفتها يتنقب
اسمها لو يمر عالنجمه تتعجب
عجيبه من بعد عزتها تتسلب
ماهمني بلواي   كل همي من هاي
صعبه الرزيه
ما اكدر اتصورها   يدمي الكلب منظرها
بالغاضريه
****
كل زاير يجيني ويدخل الحضره
على مصابي اريد يكون مايقره
ينعالي اريد بحركه للحره
للشام المشت مجتوفه متيسره
يقرالي ياريت    من طبت البيت
اهل الحميه
من مالكت واليها    وجن الظلام عليها  
بالغاضريه
****
سموني الطغاة وبالي مو يمي
ولادمعي نزل لمصبيتي وسمي
على زينب واهلها حيرتي وهمي
هيه العذبتني ونحّلت جسمي
دلالي محتار      يبجي عله يا نار
يوم المنيه
يبجي عله ضيم البيّه لو  للمشت مسبيه     
بالغاضرية
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده هلاليه
****
بآلام الحبال ** ذكرني الهلال
بحالي ودموع عيوني ** بوني وزراك متوني
ذكرني الهلال
****
وناتي كلها ومحنتي نوحي وجميع الامي
اهاتي كلها ودمعتي ونايبة حرك خيامي
واطفالي حين اللي ٱشرِدَت وكفال ضعني الدامي
وحالة حسين ومنظره كلها اجت كدامي
رَدَت على البال ** كل ذيج الاهوال
وخيبت جميع ظنوني ** بوني وزراك متوني
ذكرني الهلال
****
من شفته لامع بالسمه ورَد من جديد بنوره
ردت احزاني وبلوتي ولعيوني جابت صوره
خواني واولادي وهلي الجانو الليلي ابدوره
خليتهم فوك الثره بدمهم جثث منحوره
ياويلي ياويل ** عافوني لليل
ماحسبت ينسوني ** بوني وزراك متوني
ذكرني الهلال
****
الهلال ردني الكربله  والالم ردلي بعَشره
الفاكد اعز من النظر  ماتطفي ناره العَبره
والله اللي شفته بكربله  ماينحمل بالمره
الوياهم ٱكضيت العمر  خليتهم عالغبره
شتفيد الدموع ** للفاكد شموع
بفراكهم اذوني ** بوني وزراك متوني
ذكرني الهلال
****
تمنيت اموت بكربله  وهناك اظل وياهم
ولاعيش عمري بهالوضع  ابجي واون وانعاهم
لا انه ميته ولا انه  اكدر الاهلي انساهم
عباس وحسين وعلي  ماينحمل فركاهم
جانولي نبراس ** تارسني احساس
بهالنايبه خلوني ** بوني وزراك متوني
ذكرني الهلال
****
ازلام اميه من مشو  لامَتّرِكوني بحالي
شوفوني ضيم يهد جبل  مامر خياله ابالي
الجانو يحلمون بحلم  يشوفون بس خيالي
صارو بعد موت اخوتي صبح ومسيه كبالي
بيه يامرون ** وبيه يشمتون
يضربوني ويشتموني **  بوني وزراك متوني
ذكرني الهلال
****
للشام ودوني غصب  ومجتفات ايديه
عالهزله مكسورة كلب والشمر يضرب بيه
من بعد عين اهل الرحم  والغيره والحنيه
دار الوكت بيه وصرت متكدره ومسبيه
والاسمه عباس ** لوعوني هالناس
نجوم الظهر راوني ** بوني وزراك متوني
ذكرني الهلال
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده دارمي هلاليه
****
عالخدم عين حسين مشبوحه هاليوم
ومن كل كتر ويلاه تتجاره الدموم
****
يحسب ليالي طوال مرت عالفراك
يتنطر البجروح احزانه عشاك
للونه والدمعات واللمه مشتاك
بس الله يدري شلون حالة المظلوم
***
من النحر صوته يصيح ها ها يخدام
عالفركه مرت عام بس جنها الف عام
بالغيبه عندي تزيد اوجاع السهام
بلمتكم انه ارتاح وتزيل الهموم
***
هلال الشهر من بان وانواره شعت
يتذكر اخته شلون للحومه طلعت
والخدر للمو خوش نظراته لمعت
وزلام ابن سفيان علعايله تحوم
****
جروح اللي بي تلتام من ينظرلهم
خدامه هذا اليوم ملتم شملهم
وللخدمه متحزمين طيب اصلهم
ويفَصِل المسلوب من ونهم هدوم
****
دم عابس اللي سال خضر مراجل
الجانو امس سبعين صارو قوافل
الكل عدهم استعداد لجله تقاتل
ماهمهم العدوان لاهمهم اللوم
****
المن اجل هذا الدين قدم رضيعه
ونفسه واعز الناس روح الوديعه
وتدوسه عشر خيول ويلي شفجيعه
ذبحو محمد بيه من ذبحته الكوم
****
كل الخدم تنهان شفناها بالعين
بس بالكرامه تعيش خدام الحسين
سمعناها واحنه صغار وعليها ماشين
بالدنيه كلشي يموت بس خدمته تدوم
****
خادم اهل البيت عليهم السلام
الشاعر السيد{هاشم قاسم سعود البلداوي}

قصيده هلاليه
****
لخويه عيوني مشتاكه    سنه مرت عله افراكه
راح وايست منه        كضت ايامي بالونه
سنه مرت على افراكه
****
سنه مرت على افراكه عشتهه اشلون
بين امصابه واحزاني والم المتون
لا نوحي ونحيبي قبلو يسكتون
ولا شوكي اقتنع غيابي ميرجعون
مكطّع شافته عيوني     اكول وما يصدكوني
مثلهم يرجع اتمنه     كضت ايامي بالونه
سنه مرت على افراكه
****
ياشهر الكسر ضهري واخذ كلشي
واتعثر تركني بدمعي من امشي
عرش بلقيس يحلم يوصل العرشي
برمح وحشي انذبح يشبه رمح وحشي
كبلي ياهو وي روحه  يعيش وروحه مذبوحه
ومات ومَندفن ظنه     كضت ايامي بالونه
سنه مرت على افراكه
****
هلالك ياشهر الجروحي بجاها
ذكرني ابحسرتي وضيم بلواها
وللطف ذكرياتي المُره وداها
عملات الشمر والبيه سواها
صورها ردت لعيني    وحده وحده تنطيني
والله محنتي محنه  كضت ايامي بالونه
سنه مرت على افراكه
****
شجابك ياشهر وشذكرك بيه
هيجت الالم والفاجعه اعليه
اجيت انتَ واخويه ما اله جيه
واهلالك اشوفه امعيد ابضيه
وآنه بضيمي محتاره      ودليلي تلتهب ناره
المثلي شلون يتهنه    كضت ايامي بالونه
سنه مرت على افراكه
****
ينادوني بوجوده ها يعلويه
وصاحولي برحيله ها يمسبيه
الف موته اموت بحزني يوميه
انهدم حيلي وصرت من امشي محنيه
عقيله وجيش حافوني  ويزيد وربعه شافوني
وحلمي خيبو ضنه     كضت  ايامي بالونه
سنه مرت على افراكه
****
لو عني مشه العباس يبقه حسين
على صورة جماله ونوره تغفه العين
واذا راح ومشه يمي يظل الحنين
وهسه اشلون بيه امفاركه الاثنين
جنت اتمنه لو ميته     ولا اتمرمر ابجيته
بين اليدنه ما يدنه    كضت ايامي بالونه
سنه مرت على افراكه
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده عكيلي هلاليه
****
يهلال شسويت بحالي
****
هيجت الامي واحزاني
وذَكَرت عيوني بخواني
وشسوت بيهم عدواني
صارت ذيج الصوره كبالي
****
ونتي ودمع عيوني الساجم
ولوعات الاكبر والقاسم
واهلي المارد منهم سالم
يوم الطف رديته البالي
****
عباس وراسه وجفينه
وسهم النابت ظل بعينه
ضامي اعله الماي موذرينه
وبالدم ظل سابح كفالي
****
وحسين اللي كطعو نحره
وداست عشر خيول بصدره
وتركوه عريان اعله الغبره
عَزيز كلبي حسين الوالي
****
حركو لمن طاح خيامي
واطفالي انضربت كدامي
ماتتوصف ذيج الامي
من ذبحو يهلال هلالي
****
عالنوك الهزل صعدوني
جتفوني خلافه وضربوني
واصعب من كلهن شتموني
من هاي تفطر دلالي
****
من الهم شيب احساسي
ماتو كل احبابي وناسي
وطيحت الحسين وعباسي
ماادري الموت شخلالي
****
خادم اهل البيت عليهم السلام
لشاعر السيد{هاشم قاسم سعود الداودي}

قصيدة بحق {الأنصار}{عليهم السلام}
****
لامانعوفك والله  حكك علينه
بكل مبده طفك جيناه وانتَ والينه
****
يحسين منعوفك أبد لا يحسين
درب الله انت بغيرك نروح الوين
ولو ماتشوفك كلنه شتشوف العين
الدنيا حلوه وياك والاحله البين
جينه يااباعبدالله للوفه جينه
****
يابو علي كصدنالك اليوم انصار
غيره ومراجل طيبه وجود وايثار
ماي اعتنينه الحضرتك نطفي النار
هد بينه يحسين وتجيك الاخبار
كبلك علي بايعناه ونته تدرينه
****
هذا العمر كله الحضرتك منذور
انتَ الصلاه والصوم يانور النور
يابو علي وعليك ماتغله انحور
مأجور والله المات يمك مأجور
الموت بجوارك محلاه ياابو سكينه
***
كلمن يموت بمنهجك عالي الشان
والحاربك ميفوز نعرف خسران
يصبح حطب يابو علي للنيران
حبك يميز الكفر عن الايمان
انت الذي حبيناه بغيره شعلينه
****
يابو علي خدامك زغير جبير
زلم البواتر مو مجرد تنظير
يبن الصميده اعله العدو من انغير
يبن النبي انسوي المحاله الميصير
وجيش العدو ندوس لواه ذني رجلينه
****
نسحكهم وانتعه باجر للشام
بالزلم ماتنقاس قط الازلام
موقف نسجله وماتنكره الايام
وجرحك الينزف ياولينه يلتام
بدنه العهد خطيناه وبي تحنينه
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بحق{الانصار}{عليهم السلام}
****
اجينالك يبو اليمه * اجينه وعاليه الهمه
جابتنه ضمايرنه * يالتدري بسرايرنه
****
اجينه الكربله ياحسين ننصرك يابو الاحرار
ابد منعوفك الوحدك غريب ابّين الاشرار
فرض يابو علي علينه يغالي صغار واكبار
دمانه يرخص الدمك يجنه وغيرك النار
تعيش انعيش يالغالي * تموت نموت يالوالي
نفديك بمناحرنه * يالتدري بسرايرنه
****
حسين وشنهو يمنعنه خاطر مانجي عليك
وشنهو الروح انتَ الروح عمرنه كله بيديك
يبن الزهره والزهره قليله كلشي ننطيك
لو الف عمر عدنه نقصر بيه نفديك
بس يمك يبو السجاد * الفخر والشرف والامجاد
مالك كل مشاعرنه * يالتدري بسرايرنه
****
انت الابو وانت العم حسين وانت الاحلام
نضحي ونبذل وننطي نموت بطعن الاسهام
امام واجب انطيعك ونِعَلي بصيتك الهام
عهد يحسين بالمنحر شمر مايدنه الخيام
يبو الاحرار هد بينه * نموت وياك خلينه
لاتكسر خواطرنه * يالتدري بسرايرنه
****
انت الدين والكعبه حلمنه بفخرك نطوف
وركن من عنده يامولاي من انعوفك نعوف
نموت ٱوياك خلينه وسوي ٱعلينه معروف
نسوي المحد مسويه وخلي عيونك تشوف
كل احلام ابن هنده * نطشرها وعلي بسده
اكبالك من تبارزنه * يالتدري بسرايرنه
****
بأسمك نكلب الحومه كدها وصحبك ابطال
نبيد الجيش وٱزلامه التعده عليك والعال
نخسفه بيوم الملاكَه ويصير المااجه ابال
ضربتنه اذا عالكاع تطيح تسوي زلزال
بينه تنطفي نارك* يغالي وناخذ بثارك
موت احمر بواترنه * يالتدري بسرايرنه
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بحق{الانصار}{عليه السلام}
****
شهدي يا كربلا شهدي * انه يا انصار  عندي
انصاري كلهم زلم ** مليانه زود وعزم
****
كتبي ياكربلا موقف.  مثله موقف مايصح
صحبه مملوحه وتغزر  يغار من عدها الملح
توفي لو تنطي نحرها. والف مره تنذبح
مرجله وغيره وحميه  الصدر بيها ينشرح
زلم من حق وحقيقه * تعرف الحق وطريقه
مزقوقه زق بالعلم ** مليانه زود وعزم
****
صحبتي صحبة عقيده  اجو ليه معتنين
كلهم يموتون لجلي وبين اديه عازمين
علمتهم درستهم   فاطمه ام البنين
اصغار واكبار اعتنولي   الكل تنادي ياحسين
ضوه شالوني بنظرهم * غالي واليرخص عمرهم
وللقادم اجمل حلم ** مليانه زود وعزم
****
بالزجيه ارد احلفج جاوبي يا كربلاء
كبل هم مرج مثلهم بالشدايد اوفياء
رخصو للدين كلشي وباعو الدنيه بدماء
صاحبو منهم محاله   الاولياء والأنبياء
للمثل همه مثاله * صحبتي كلهم بساله
بالموت لا ماتهم**مليانه زود وعزم
****
الشاب والشياب اجوني   الي يفدون النفس
زود عدهم  عالي بخته  يغطي يا حره الشمس
مثل وانشودت غياره   الباجر وهسه وامس
اصغار واكبار النشامه  للوفه تنطي درس
طيبه واحساس ومحنه * الهم اشتاكت الجنه
للفخر صارو اسم**مليانه زود وعزم
****
والله ياهنيالي بيهم    صحبتي كول وفعل
مستعده من اجلي انه   الف مره تنقتل
خيرتهم جربتهم خبرتهم عليحل
مانعوفك جاوبوني وبيك مجنون العقل 
صفوة عقول البريه * ما يهابو المنيه
بالحومه ماتنهزم**مليانه زود وعزم
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بحق{القاسم ابن الحسن}{عليهما السلام} 
****
مثل الصبح جماله  شمس الضحى خياله
يشبه علي بصفاته*هذا ابني جسام
****
احلى من يوسف جماله  بحسنه مضروب المثل
للصبح ينطي محنه  وينطي للنسمه امل
ابني مثل السمه احساسه ازغير ابصفه الجبل
ضّوه هالدنيا ضيائه   من وجه ابني اكتمل
نور اووفه وبلاغه  الباري اليه صاغه
ماتنوصف حلاته
هذا ابني جسام**هذا ابني جسام
****
كلشي بي يختلف ابني  ايشبهه واحد مااظن
الجنه من وجهه خلقها  وخلق من حسنه الحِسن
الله سبحانه وتعالى  رسم كلشي اعله الجفن
شكراً الجل جلاله من عليه بهيج ابن
مله كلبي وحياتي  حيلي وسند شيباتي
بكد النجم اياته
هذا ابني جسام**هذا ابني جسام
****
السيف بيمينه يتلاله  الحومه يمليها ملي
ايسهل الشدات زوده  وغيم الاسود ينجلي
عنده صيت ايهزله دنيه اليندبه يصبح ولي
من يطب ميدان كالو  طب اله حيدر علي
يثبت غصب وجوده ومحد يصل حدوده
ومسكت الشماته
هذا ابني جسام**هذا ابني جسام
****
اله طف حسين يشهد  سوه بيه المستحيل
اوياه ملك الموت يمشي  وين ماميل يميل
شفته بالطف ابني كثره وجيش ابن هند القليل
والنعم من جاسم ابني  شبل حماي الدخيل
طشر شمل زلمهم وذبح حلم املهم
وحققهن امنياته
هذا ابني جسام**هذا ابني جسام
****
سوه كل اللي اريده  ورفع راسي للسمه
من نحور ازلام اميه  روه سيفه امن الضمه
بذل للاسلام روحه  ورخص العمه الدمه
وباذله لحسين غالي  كتبت اسمي فاطمه
اصبح مثال وقدوه شيمه وجمال ونخوه
ماتنوصف غلاته
هذا ابني جسام**هذا ابني جسام
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بحق{مسلم ابن عقيل}{عليه السلام}
****
للكوفه من طب ووصل  مسلم سفير الثوره
كل امنيات ابن هند   طشره فوك الغبره
الكرار تفسيره**مسلم ابو الغيره
****
يطلب اهلها مسلم شكد ثارات
منساها ابد كل ليله بعيونه تبات
نهر انحفر من الدمع عالوجنات
قد حان هسه ضماد  جرح الونات
ناوي يرد كلشي اناخذ صعدت الغيره براسه
والغيظ من عينه يصب. والكيظ من انفاسه
الموت بتعابيره**مسلم ابو الغيره
****
يتبختر بزوده الابد ماينقاس
ظلمت حيل ونوراها النبراس
صار النزال وبده يطك راس براس
بالنص قسمها وخله نص العباس
بالكوفه ماظلت زلم كل الزلم طشرها
روس ال اميه اعله الثره.  مثل الرمل نثرها
خلاهم بحيره**مسلم ابو الغيره
****
كل العساكر من طلع حارت بيه
ينشطر نصين الذي يدنه عليه
الماراد روحه يعتني ويكرب ليه
والويل عازم من جثثهم يمليه
مايمل مايتعب ابد لاتقل همة حيله
كلمن برزله يرد خبر. قد مات خل نبجيله
للواقع يديره**مسلم ابو الغيره
****
كل خطه يرسمها عدوه المكار
يفشلها مسلم من يشيل البتار
جيش ال اميه بعدته اكباله انهار
مايوكف بوجه المطر حر النار
زوده يهد اكبر جبل   حيدر علي يشهدله
بتاره يرسم عالركب   شيخ ومضيف ودله
حفظو تفاسيره**مسلم ابو الغيره
****
هيهات ماتعله عله الحاجب عين
ولايقبل الواحد القسمه اعله اثنين
بالكوفه مَثَّل الله مبعوث حسين
مو عاقل الكال اوكف بوجه البين
الموت الاحمر يجرعه. كلمن وصل لجفوفه
يسمونه صكار الزلم.  عِدل المنيه حروفه
بدم سور الكوفه**مسلم ابو الغيره
****
خادم اهل البيت عليهم السلام
الشاعر السيد{هاشم قاسم سعود الداودي}