زنزانة أطفال! و أنين و مواويل
ودمعٍ طعن غيمه و سالت عجوله
دنيا ترضعهم عذاب و غرابيل
خصيمها يوم القيامه! الطفوله
عصفور ماله بالشقا و البهاذيل
صار القفص أضيّق من أضيّق حجوله
ضاع القمر في غدّرته ما لقى ليل
والشمس بمّراح الرحيل مْعقوله
بكره يمرهم سرّب طيرٍ أبابيل
بحجاره من سجيل.. وطاري بطوله
أنا أدري إن يعقوب أسمه إسرائيل
لكن متى إسرائيل صار أسم دوله!؟
من قلة الحيله و من قلة الحيل
باعوا شرف الأقصى بأقذر عموله!
يباركون و يكثّرون التهاليل!
جانا زمن ! لا بارك الله حوله!
ولا لقينا حل ولا حلاحيل؟
نسينا وعد الله.. ومنيّة رسوله !
وشلون نفخر بالسنين المقابيل؟
ما عندنا تاريخ بكره نقوله
والله ما يكسر عيون الرياجيل ؟
إلا جميلٍ .. ما يرد بسهوله
وإن قامت الدنيا بنا تحط و تشيل؟
نشيلها صبر و شموخ و رجوله.

البارحه بين أنتظر.. وأصبر شويّ
مرّت علي أيام ماهي شويّه
أيام فيها الناس صارت ولا شيّ
قلبي مشى معهم على حزن نيّه
ذكرت لي موقف حصل لي وأنا حيّ
حزّتها.. حتى إبليس سمّى عليّه!
والله مدري كيف شالتني رجليّ
خايف أقول الحق لكن! خطيّه
حتى القمر لا طلّ.. يضعف من الضيّ
و البدر.. عاد أنتوا تعرفون ضيّه
ما للهوى بسمه وما للشجر فيّ
سراب كل العمر صبّوه فيّه !
بعمري ما قلت لسحابه.. أبي ميّ
إن شحت سنيني.. يديني نديّه
أنا سمَّح قلبي من الجور و الغيّ
روحوا.. وخلوني بحالي هنيّه
الناي أنا.. ماخذ من الضيم كل شيّ
وأنا الصبا.. "من عاد بقعا صبيّه"
وأنا خوي الموت من يومي صبيّ
والخوي عيب إنه يخلي خويّه .

وهم.. ولا بيدي حقيقه ولا أسباب
أزعل على روحي وأدوّر رضاها
ناصب أماني العمر و العمر نصاب!
خذى من أفراحي وقفّى معاها
ما طاب لي خاطر.. ولا جرح لي طاب
يا علةٍ أزريت لألقى دواها
إن هب هوى نفسي يوكلني تراب
كم واحدٍ مسكين قبلي كلاها
يا رب ما غيرك رب يارب الأرباب
لا شحّت قلوبٍ علي بعطاها
فاقد أمل.. من قبل لا أفقد أحباب
‏ما أخاوي الغيمه علشان ماها
‏غريب أدوّر لي فرح بين الأغراب
‏يا ضحكةٍ مدري منو اللي خذاها!

‏أنا أكثر أنسان قضى العمر محتاج
‏يدوّر الحاجه وهي في يدينه
‏وأنا السجين اللي نطّر لحظة إفراج
‏ولمّا طلع .. لقى حياته سجينه!

‏قلت هانت كلها شدّه وتعدّي
‏لين طالت شدّتي.. و العشره هانت!
‏السوالف لا تجيب ولا تودّي
‏المواقف دنقّت و الروس بانت
‏كل مكاتيبك مع الأيام.. ضدّي
‏مرّها ريح الصبا مرّه.. و خانت
‏والله إن الوقت ماهو بمتردّي
‏كل علامات القيامه فيك بانت

وين بلقاك يا قلبٍ كلتّك الحسافه؟
خابرك كل ما غيّمت.. تمطر حسايف
رحت أدورك و الدنيا لهود و خرافه
ما لقيتك ورى قشر الضلوع النحايف
أتلى علمي بوقفاتك و كثر اللقافه؟
يوم "روّحت مع يدها" وذيك الشفايف
ملّ صدري من النجوى و ملّ المسافه
سولف النود عنّك و كان بالي مسايف
الجفا ممطر بأقصاه لأقصى جفافه
و حالته من فضل ربي، مثل ما أنت شايف
مير شكراً على قل الوفا و الكلافه
أعتبر كل صدمات الليالي.. خفايف

أرس يا قلبي و خل همّك يولّي
لا تسريني بقفرٍ ما أبيها
ولا ترحب لك بغيمه ما تهلّي
أنت حيّ و كل تهاتيه تحييها
منّك الغدرا وفّت.. ما ضل ظلّي
ليلةٍ تفركّ من الحرّه يديها
وأمش لا تترك بقاع العز ملّي
الأراضي راضيه دامك عليها
والسما لك كلها رحب و تجلّي
ليه ضايق وأنت صافي كنّك إيها؟
لا يقيّدك الظلام برمش خلّي
لي متى حريّتي منّه أحتريها ؟
أنت خابرني لا جيت أجيه كلّي
وأنت خابرني لا رحت أروح فيها
سلّ نفسك دامها دنيا تسلّي
ما تباع النفس إلا لمشتريها.

أنا بوجهك من الأيام من دونك
كل شي تغيّر وكل شي خان، حتى الما
مرت ليالي علي أسوّد من عيونك
ورتني الضيم و الحرمان و الظلمى
أستاهل السهد و الأوجاع و طعونك
تفتنّي بجرح وتداهمني الغلمه
خلهم يقولون إني صرت مجنونك
وإن مت على الأقل، ميّت لأجل حلمه
يا كثر ما أكرهك وأكثر من يحبونك
أصد كلّي آسف وتردني كلمه!

يا رب يا ذو الفضل و المنّه، جزل المّد
النفس كثر الخطا و اللوم مغرقّها
أحيان أخطي جهل وأحيان متعمّد
مستعبد الروح مدري كيف بعتقّها
شبيت صبري وأشوفه بالسهر رمّد
أحلامي أوهامي اللي كيف أحققّها
الكذب حبله قصير وشايفه منمّد
ناسٍ أمرها الولي تعقد مشانقّها
صدّيق.. والأنبياء أخرهم محمّد
ما أكذّب إلا على روحي.. و أصدّقها

‏تسلطنيني بالمشاريه و اللوم
‏أمّل حتى روحي.. وما أملّها
‏سوالفج مثل أغاني أم كلثوم
‏كلٍ يغنيها و ماكو مثلها:)

‏ما لقيت لقلبي الضايع طريقه
‏ماهو بكل ثار يوخذ بالبنادق

‏المحبه شك و الفرقا حقيقه
‏يوم يتركني لحالي.. كان صادق

‏هاذي بلاد فراق
‏فيها الأمّل منكوب
‏فيها العدل سرّاق
‏فيها الشروق غروب
‏حنا الفضا لا ضاق
‏ماله سوانا دروب
‏ما كان فينا عاق
‏ليه العمر مسلوب؟
‏لأرواحنا الإزهاق
‏مدري كم المطلوب؟
‏حنا بدون أوراق!
‏وأنتوا بدون قلوب.⁩

⁃ الحر لا شاف الجور عاف البسيطه
⁃ ضم السما وإن ملّها؟ راح لله
⁃ ما غرّه الشاطي و حرّه محيطه
⁃ الكون هذا اللي مشبرّه؟ ملّه
⁃ لا صد.. ما تلقاه حتى الخريطه
⁃ لكن إذا ضاقت عليها.. تدلّه
⁃ أنا جبل ماني بطوفه هبيطه
⁃ أموت ما أقبّل حياة المذلّه
⁃ ساكت لكن بالحق يميني سليطه
⁃ للحقّ سيفٍ لعنبو ما يسلّه
⁃ جرحي من خيوط السحابه أخيطه
⁃ وإن شفت لك برّاق؟ أبشر بهلّه
⁃ ماني عبيط وجيت دنيا عبيطه
⁃ معي من أجدادي وصاة و جبّله
⁃ ومن شفت بعيون المقادير زيطه؟
• قررت أزيّطها مع العمر كلّه:)

طفل لحق ليل ، يحسبه عباة أمّه

العصافير لا عافت شجرها تطير
ليه ترجع لها و أغصانها تغشّها؟
كيف تغفر وللأشجار ذنبٍ غفير؟
أمنّت حضنها و أنقتّلت بعشّها
كل شي يخون.. وكل ورقها حقير
بندّق تطشّها.. و أيامٍ تكشّها
عيييب أوّقف على جال الحنين أستجير
عبرّتي تجمّع الدعوات، و توشّها
والله إني على كل المواجع أمير
أطلّق الضيم عندي مستوّي بهشّها
نخلةٍ ما تحرّى نظرةٍ من غدير
تنتشّي للسحابه لو ما ترشّها
ليلة البارحه كان الدفا زمهرير
قمّت أشبّ الطواري وأرثّع بقشّها
واثق الخطوه يمشي هلك.. ماهو بخير
حالفه الذكريات أحلامه تحشّها
ليت لك صورةٍ حلوّه بعين الفقير
مو ببوكه ما بين ديونه يخشّها
أي حبيبي .. توقّع كل حاجه تصير
قايلٍ لك : حياتي موت لا تدشّها
يتّفقّد جروحك بين نسمة عصير
وإن لقاها تشطّر معها، ونشّها
كان يمشي مايدري وين حث المصير
راح يضحك بدمعاته ولا مشّها

قام يترجّل قارس البرد بالجوف
زرق الكلام اللي يعنّ الرسايل
مرت عليها ظروف خلتها بظروف
من قالها؟ مو عارف شلون قايل
ضباب كنّيته، وكحيته حروف
وتفلّت بيسار الضلوع النحايل
ما أرجف من البرد، أرجف من الخوف
أشبّ لا صبّت عليّ المخايل
ليلة فراق وسلّت دموعي سيوف
بدري حوالينه نجوم القوايل
كنت أحسب إنها لا أذن الفجر بتطوف
وماطاف غير أحبابنا و الجمايل.

‏طاير بها قلبي مع سرب الحمام
‏غيمه وراها سما زرقا فاتحه
‏من رعشة المنديل في عقد الغرام؟
‏قريت صورتها ونسيت الفاتحه

لا تتركين القلب بالدرب ملهوف
حبيبتي خلّك مدى العمر يمّي
قلبي وأعرفه زين مايعرف الخوف!
إلا إذا غبّتي، وإذا كحّت أمّي