لسان حال مولاتي رمله (س الله ع)مخاطبه ولدها القاسم(ي الله ع)


يا جاسم من فارگتك __ آه يوليدي
بحزاني رحت وعفتك__ آه يوليدي
يبني إشكثر تانيتك ..... سالم ترد ضنيتك
آه يوليدي
............

بيوم الرحت عني وغبت اجهر بالونين
يوليدي ظل دمعي يصب ما فارگ العين
تانيتك إبلهفة دمع كل هاي السنين
سنين الربه وذاك التعب يوليدي چا وين
يا دمك أصبح جنتك __ آه يوليدي
ولصدري آنه احضنتك __ آه يوليدي
يبني بصدرك شميتك ..... سالم ترد ضنيتك
آه يوليدي
.............
يا سلوتي حگه الگلب لمن رحت ذاب
وانته يجاسم من غبت ظل دمعي سچاب
أتنطر لجيتك صرت يم عتبة الباب
متأمله عليه ترد مني الأمل خاب
مطفيه شمعة زفتك __ آه يوليدي
تواسيني ظلت عمتك __ آه يوليدي
يبن الحسن ناديتك ..... سالم ترد ضنيتك
آه يوليدي
..........




چان الأمل سالم ترد يوليدي جسام
كل ساعه احس يبني الگلب يتصوب اسهام
وعيوني من يوم الرحت سهرانه متنام
متلهفات لجيتك يمه احسب ايام
ولكبري جاسم ردتك __ آه يوليدي
وبلوعاتي نادبتك __ آه يوليدي
يا وسفه ما حنيتك ..... سالم ترد ضنيتك
آه يوليدي
............

تدري يجاسم وشكثر حملك تعبني
ردتك سند يوم الكبر يمه تلمني
لو لحظه عن مهدك غبت صوتك ندهني
ليك الگلب قبل الجدم يتعنه يبني
تچوه ليه تأملتك __ آه يوليدي
وعيوني تربي لجيتك __ آه يوليدي
وبمهجتي هزيتك ..... سالم ترد ضنيتك
آه يوليدي
............









شمعاتك بنار الگلب يبني أشعلتهه
جثتك رميه اعله الترب لمن شفتهه
بسدهه ييمه أتمددت روحي أحظنتهه
وي دمعي حنتك يالولد ويلي اعجنتهه
للمصرع يبني اگصدتك __ آه يوليدي
عميه عيوني ولا شفتك __ آه يوليدي
بدمع عيوني ربيتك ..... سالم ترد ضنيتك
آه يوليدي
............
دمعي قبل صوتي اعتله بآه وحزن صاح
يا جاسم امك بالدمع ظلت والنياح
من يوم الطاحت جثتك وهم دمك الساح
عگبك يبنهه اتمرمرت ما شافت افراح
عالغبره ظلت جثتك __ آه يوليدي
بدمعات عيوني اندبتك __ آه يوليدي
تردلي وتنور بيتك ..... سالم ترد ضنيتك
آه يوليدي



محمد الجوراني

لسان حال مولاتي رقيه(س الله ع).تسولف لمولاتي زينب(س الله ع).اتگلهه



يا عمه أدري يروح ما يرجع اليه
گلي لبوي حسين رايتك رقيه
ما بيه اتاني ..... زغيره تراني
يا عمه زينب
..............
عمه زينب هذا عمري جبته ودموعي بچفوفي وعندي مطلب
عني ليروح گلي لحسين هاي بنتك والوداع عليهه يصعب
عمه ياريت طاري الورود يَمه ذِكري وخلي دمعچ مثلي ينصب
بلكت يعود صوب الخيام أدري لو مني يروح الحزن يگرب

خل يسمع بطاري الورد يذكر دلالي
ياعمه يدري بيه هو عندي غالي
ما عندي ثاني ...... زغيره تراني
يا عمه زينب
..............
أذنت نوح والألم نار بعده يحرگ هالألم روحي وحياتي
أنطيت دمعات_ من العيون_ وسلمت بچفوفه حلمي وأمنياتي
خافت الروح_ تسمع اوداع_ حسين يبقه عمه شخصه بذكرياتي
گاصد الموت_ جدم الحسين_ والبقه بس عندي احلفنه بغلاتي

راح اعتنيله بدمعتي وألزم چفوفه
واكتب عليهن چلمه ما اگدر اعوفه
يامن جفاني ..... زغيره تراني
يا عمه زينب




بسيل الدموع أسجد ونين بنار گلبي رايده اجمعهن سويه
وآنه بضماي_ والجرح صوت صوتي اطشره يم أذانه يرد عليه
ينگضي شلون وكت الغياب_ بحاله وحده يمي من تلفي المنيه
تدعي الجروح_ موتتي إتصير_ وين ميطيح الولي بالغاضريه

خوفي يجيني الموت عنه اني بعيده
بلكت يهدني عمه لو گتله اريده
واصرخ زماني ..... زغيره تراني
يا عمه زينب
................
راح عني_ ومات ضني_ شگد بچيت المنجرح سيفيد صوته
جمرة أفراگ_ تلفي الايام_ شلون أعاين والدي ولافيله موته
ونت الليل تهيج احزان والدي لو يونس الما هده حوته
ملح بجروح روحت حسين ليش واليفگد أبو يون بسكوته

خلاني بين اعداه من ابچي يجوني
يگلولي لا تبچين بالسوط اضربوني
سوط الولاني ...... زغيره تراني
يا عمه زينب
...............







لروحي أنشد_ ياهي الاصعب_ اوداع ابو اليمه يروحي لو سبينه
هزل نركب_ وآنه ضني_ هالهزل ياعمه چن تبچي علينه
ردت اسأل_ النهر مايه_ أرد اسأله وين حماي الضعينه
عمي گله ضعونه راحت وگله بجروح العطش راحت سكينه

يانهر هم گله ما ننسه مصابه
او بيه ذكر الكافل واسمع جوابه
بُعده العماني ....... زغيره تراني
يا عمه زينب
...............
هاي هيه_ حان الوداع_ كسر ظهري الموت چن ظهر ابو اليمه
عالنهر راح_ وآلدي شلون_ عله مصرع عمي لمن حنه جسمه
راحت وياه_ كل الامال_ وكتي طشر عمري وشلون انه ألمه
طيح الحيل_ وذابت احشاي_ بالطشت چن راس ابوي وهذا دمه

خليني اودعچ وانتي ودعيني بدموعچ
اوعني لا تحچين لحسين برجوعچ
بالغربه آني ...... زغيره تراني
يا عمه زينب



محمد الجوراني

محرم الحرام ١٤٣٩ هجريه لسان حال مولاتي زينب ( س الله ع) .
تخاطب قمرها ابي الفضل العباس (س الله ع).
اسم القصيده .... باگني چم نظر .


خيالي محني ظِهر .... امن الخيم للنهر
باگني چم نظر .... من طحت يا گمر
أركض اجيتك للماي
ازرگ جبتلك مگفاي
وشوك اسحگت حيل هواي ... من طحت يا گمر
............................................................

للنهر / جيت أركض ومرعوبه_ وعفت الخيم مسلوبه_ جيتك تره مضربه_ للنهر
والمتن / لون المتن متغير والشمر سوطه يحير ياخويه موش ازغير_ والمتن
سوطه ياكل بالمتون وما رحمني من طحت
جابني من الخيم لشاطي تره بسوطه شحت
تزيد ضرباته عليه لو يبو فاضل صحت
وخاف ما تعرفني خويه من الضرب إتغيرت
تغيرت بالعجل .... متني چم سوط حمل
من ضربهم هدل .... وعمري ركضه انقتل
وخلصت دربي عثرات
أركض واطيح بضربات
ورجليه شبعت چويات .... من طحت يا گمر



چم نظر/ باگ إمن اخيتك ضلهه_ الغربه تباوعلهه_ والطرق ما اندلهه_ چم نظر
دنگت/ خاطر أغطي عيوني_ بدموعي ميشوفوني بلكت وميعرفوني دنگت
كمت اتستر بالاحبال البديه إمربطه
هنه أذني يخويه لچن فادني غطه
وظاله بين الزلم بس افتر ومتورطه
وكافلي گلي اجيب الماي وارجع شو بطه
تره بعز الظهر .... طلعاني الشمر
يباوعولي شكثر .... حبالي صارت ستر
بس وغلاتك عباس
مو ذله دنگت الراس
تجرحني نظرات الناس ..... من طحت يا گمر
....................................................................
بركضتي/ أركض وأنه محنيه_ كل ضربه توگع بيه_ ومشددات اديه_ بركضتي
طيحتي/ ياحرمه مثلي احتارت_ عالشاطي عيني دارت_ عالوجه خويه صارت_ طيحتي
سوده تدريهه عباتي يابو فاضل حومرت
السوط فاس وهيه شجره طگهه حيل اتشگگت
امتوني صبحيه عفتهن للغروب اتحولت
زينب الما شايفيهه بالاحبال اتجرجرت
حيلي دمعه وگع ..... من شموخي اندفع
حلمي خلص وجع .... چفك أمن انگطع
دمعاتي ترسن العيون
هاي اسمعتهم يحچون
اخت الگمر ويضحكون.... من طحت يا گمر

جايتك/ عندي كلام هوايه_ وابدي من يا حچايه_راح احچي عالسلايه جايتك
استمع/ سلايه برجلي طبت حافيه زينب ركضت_ رجلي يخويه انشگت_ استمع
حسين لم الشوك كله وأخره عن الخيم
حته ما نسحگ عليه حفاي ونحس بالألم
خذونه عمده أله خويه وسحگيناه بالجدم
هاك عيني وشوف رجليه يحويه تجري دم
لشريعه ارگضت ..... جيت كلشي عفت
يا بو فاضل صحت ..... امن الشمس سومرت
أغمن حياتي الچفين
وشفت السهم ماخذ عين
حگه انكسر ظهر حسين ...... من طحت يا گمر
..............................................................
يا گمر/ اخيمنه كلهه احترگت_ ترچيه عدنه انسلبت_ سكنه التحبهه انضربت_ يا گمر
بالخيم / كاروك عفته وجيتك_ لا يحترگ ناديتك_ يا كافلي حتاجيتك_ بالخيم
جبت حچي عيون عبد الله ألك يابو الفضل
تره ما يتعافه لو ما مهده تدري كل طفل
وجبت من سكنه زراگ خدود طگاهه النذل
وذاك ترچيه امن اذن رقيه ناتلهه نتل
شگ اذنهه ونهب.... ذهب من الذهب
أيده تبن وتب ..... هذا معليه عتب
والجرح لو لاحه الريح
من الألم حيل اتصيح
أگومهه من ايدي اطيح .... من طحت يا گمر

سولفَت/ عن الموادع كله_ وبُعدك ولا اتحمله_ عينك البيهه نبله_ سولفَت
والسهم/ عنك حچالي شويه_ ما تنهض انته ليه_ باچر أنه مسبيه_ والسهم
يا هو من عينك يعباس اعله كيف يوخره
خايفه منهم يجي واحد وحيل يجرجره
همه ما عدهم رحم كلش يسبع الگنطره
حرمله چا رحم عبد الله وترافة منحره
ولا رحمو طفل ..... اشحال انته النفل
شبعتهم كتل ...... مطشرلهم شمل
بيهم ترست الگيعان
شگد رملتلهم نسوان
وهسه سبونه العدوان ..... من طحت يا گمر
............................................................


محمد الجوراني

ابُذيه..لسان حال مولاتي ستر الله ( س الله ع ).

يـبـو فـاضـل شـسـولـف حـال ..... يـرحـال

واصيـح الـغـالـي عـنـي لـيـش ..... يـرحـال

عــدوك بـالـحـبـل لـچـفـوفـي ..... يـرحـيـل

لـــحـــد مـــــا طــلــع الَــــدم امـن اديــه

ابُذيه..لسان حال مولاتي اخت الگمر ( س الله ع ).

دلالـــي الچــان بـوجـودك ..... مشه وياك

أجيـت إمـن الـوطن خـويه ..... مشي وياك

رديــت ولـچـن وحــــدي ..... موش وياك

يــخــويــه الــرجــعـَتـنـي احـبـال اديـه

ابُذيه.لسان حال مولاتي اخت الحسين(س الله ع )

أديـه بـحـبـل شـدهـن هـاي ..... ويـهـاي

مــن الخـيـمــه ذيــچ بـنــار ..... ويـهـاي

طــلعــت ودايــره لــنــهــر ..... ويـهـاي

خـــاطـــر مـــا تــصـــد الــزلــم لــيــه

چا ليش كل عشرة عمر ** يا يمه يا يمه
تنتهي تاليها إبگبر ** يا يمه يا يمه
المشكله إدور __ بضلع مكسور
يا يمه يا يمه
.............
حلوه كل عشره ومراره البيها الوداع
اثمنطعش شبسرعه خلص عمرچ بساع
عگبج اشبع هاكثر طيحات عالگاع
وخدري راح يضيع چنه عمرچ الضاع
من هسه متگبعه بحزن ** يا يمه يا يمه
شحال اذا وصلت للمتن ** يا يمه يا يمه
واليطگ مسرور __ بضلع مكسور
يا يمه يا يمه
..............




اليموت يموت سالم ندري كلنه
ليش متي وضلعچ إتلوجين منه
الگلبچ البسمار واصل يمه أضنه
عرفته من گلتي الهوه ما أشمنه
المكسورله بصدره ضلع ** يا يمه يا يمه
من يجر نفسه ينوجع ** يا يمه يا يمه
الهوه محصور __ بضلع مكسور
يا يمه يا يمه
...............
الهوه لمن ينحصر بضلوع واحد
امن الالم كل ليله يمه يخلصه گاعد
بهوه وبالبسمار ضلعچ تره هابد
بحيث محنيه مشيتچ الله شاهد
چانت مشيتچ كالنبي ** يا يمه يا يمه
البسمار سواها حبي ** يا يمه يا يمه
وانطفه النور __ بضلع مكسور
يا يمه يا يمه

إتربع اعله الضلع بسمار المنيه
شمر حسيته اعله صدر ابو رقيه
ويذبح الرگبه الأبوسنهه بوصيه
بهالاثناء يمه شفتهه الغاضريه
حافر شفت يگطر دمه ** يا يمه يا يمه
شايل ضلوع مهشمه ** يا يمه يا يمه
وصدر محفور __ بضلع مكسور
يا يمه يا يمه
..............
عيني غير الدمع باچر ما تلمه
امن انجبر واطلع ييمه گبال زلمه
جرحي بيچ أخضر يضل والطف يلچمه
عله التل وحسين اشوف أوصال جسمه
إمطشرينه اعله الثره ** يا يمه يا يمه
وكل شكله متغير تره ** يا يمه يا يمه
وصبعه مبتور __ بضلع مكسور
يا يمه يا يمه


محمد الجوراني

السيدة الزهراء تخاطب الامام المهدي.


أدري بالمجلس يمهدي يطيح حيلك
وآنه من ضلعي ولا اگدر أشيلك
______
حيره حيرتنه من نحضر يوليدي المأتم
آنه مسطوره بعيني وكلشي إگبالي مبهم
تنذكر عمتك تبچي اعليهه المجلس من دم
أطيح من ونك شلون أشيلك ضلعي مهشم

زينب إيذكروهه يتگطع دليلك
وآنه من ضلعي ولا اگدر أشيلك
_____
يبني يالمهدي أيامي صعبه اعله جروحك
أبچي يوليدي بس اعله كيفك بنوحك
البچي ميردني بس خافنه يطلع روحك
الالم لبضلعي ما اريده يالمهدي يلوحك

ارتاح من بچيك ييمه ونام ليلك
وآنه من ضلعي ولا اگدر أشيلك




اليفگد أحبابه ادري أنفاسه بصدره جمره
وانته يالمهدي فاگد امك آنه الزهره
مغيره شكلي حيل هواي بعيني السطره
ومحسن وليدي صارت عتبة بابي گبره

لاحه بسماري وصرخ حيدر دخيلك
وآنه من ضلعي ولا اگدر أشيلك
_______
أيدي ما توصل يمك يبني لمّن توگع
من احركهه حته بأنفاسي أتوجع
خطوه لو أمشي محنيه وما اگدر أرجع
الهوه يلچمني وداعت عينك روحي تطلع

لا يصير إبخاطرك لو ما أجيلك
وآنه من ضلعي ولا اگدر أشيلك

فاطمه هنانه گلهم وأن ترست سمعي
وعمتك زينب طاحت سمعت طگت ضلعي
الباب والحايط بيناتهن طفالي شمعي
والجذع فوگي ماخذني الدم هذا وضعي

چفوفي مچويات يمه الله وكيلك
وآنه من ضلعي ولا اگدر أشيلك
____
ضلعي ما همني ولا عيني ولا حرگت بابي
من خذو حيدر ردت انزع يايمه احجابي
والله يگلبها هاي الدنيه وأعله احسابي
بس علي گلي المهدي ياخذ ثار احبابي

فرحت الزهره الصدگ شد ألي حيلك
وآنه من ضلعي ولا اگدر أشيلك



محمد الجوراني

بسمه تعالى.

على بركة الله ومولاي صاحب الزمان والمكان.
مستمرين بكتابة منهاج محرم الحرام لسنة ١٤٤٠ للهجره.
نسالكم الدعاء بالتوفيق.
جعلنا وإياكم من الباكين على الحسين وآله.

كلشي راح بطيحتك ... وي الخيول الداستك
مو بس خيم راحت زينب وكلشي راح

______________________

كلشي راحالك وانته جوه حذوات الفرس
من ظلوعك فرغ صدرك بس بالتراب انترس

كلشي راح ... الاكبر وعبد الله أخيه
كلشي راح ... ودم إذن بنتك رقيه
كلشي راح ... خيامك وزينب سبيه ...... كلشي راح
فرغ حتى الطف تره ... من خذوها اميسره
مو بس خيم راحت زينب وكلشي راح

______________________

هجمت الخيل اعله صدرك والخيام اتفرهدت
هاي داست عله جمره وذيج راحت ما اجت

اليضيع ... ادوره زينب ما لگته
اليضيع ... گول جمره چاويته
اليضيع ... بهيمة الطف صعبه جيته ...... اليضيع
امن الضرب ومن الحزن ... راح لون اشچم متن
مو بس خيم راحت زينب وكلشي راح




راح لونك والترافه وراح جاسم والفرح
رمله ذبحوهه بأبنهه ليش اصبعك انذبح

خنصرك ... هو المحلي محبسك
خنصرك ... راد كل اخرس يهمسك
خنصرك ... يزيدلي ادموعي ابمجلسك ...... خنصرك
ما بقتلك باقيه ... راحتلكم ترچيه
مو بس خيم راحت زينب وكلشي راح

______________________

راحت ام عون اعله ناگه وذكرياتك والخدر
وراح جلد چفوفهه بالحبل من جرهه الشمر

ياحسين ... راحلك ثوب التلبسه
ياحسين ... ما بقالك كلشي هسه
ياحسين ... والشمر صدرك يرفسه ...... ياحسين
كلشي راحالك سوه ... عين وچفوف ولوه
مو بس خيم راحت زينب وكلشي راح



راح مسبي ويه زينب راسك وعايف جسد
الجسد ما بي صدر باقي اعله الترب ويحرسه اسد

عالترب ... جسمك امطشرينه كله
عالترب ... كل كتر بعضاك نبله
عالترب ... تنسأل زينب تگله ...... عالترب
انداس من صدرك گلب ... وراح دمك بالترب
مو بس خيم راحت زينب وكلشي راح

______________________

راح كلشي يا حبيبي وانته من عندك رحت
وكل رسائلها العليله راحت أثناء الطحت

السلام ... عليك لو رفعت اديها
السلام ... يا هو اليرده عليها
السلام ... عالعليله واعله ابيها ...... السلام
راح نص من چبدتك ... وراح إچبير اخوتك
مو بس خيم راحت زينب وكلشي راح




راحت امن عيونك امك الما يفارگهه الحلم
راحت الرادتك سالم ترد ذيچ ام الزلم

عله الباب ... واگفه وحدب ظهرهه
عله الباب ... كبرت وهيه اشكبرهه
عله الباب ... متانيتك كل عمرهه ...... عله الباب
بشر گلهه منچتل ... طاح من عدهه الفضل
مو بس خيم راحت زينب وكلشي راح

______________________

محمد الجوراني

ونسألكم الدعاء

محرم الحرام ١٤٤٠ للهجره .٢٠١٨ للميلاد .
عنوان القصيده... ( كلشي راح ).

حسين مولاي آنه شراي جرح منك أريد
الثمن عيناي وشربة الماي وانطي روحي وأزيد
************
الف وتسعمية جرح بيك جسمك غده ناحل
كله اعله مودي بخيل داسوك وآنه فلا استاهل
عيشني مر العشته والضيم محلفك ببو فاضل

حسسني من ترفسني الخيل وآلامك الي توجعك حيل
عيشني رَكضة طفله وبليل وعاگول اسحك والدمه تسيل

الدايسه الشوك البيها أذوك اتگوم الها وتطيح
هدوم سلبوك وما غطوك وانته الحسين __ وذبيح
************
چويني چويه أمن الصواوين __ خليني احس بيها
بس لا رقيه ادوس الخيام والجمر يچويها
گل لشمر يضربني بالسوط وبنتك يخليها

ما بيها تركض والركض وين والگاع جمره امن الصواوين
بس هي وحده من الاثنين تنضرب لو تنچوي الرجلين

بهب الرياح حيلها طاح للخرابه والطشت
وراسك الراح فوگ الرماح بابه نادت إتسلبت

خليني ألوج بهالجرح دوم يالما ترد طالب
الزلمه الصدگ بس البچه عليك مو بلزمة الشارب
سويني عين بغير الجفون لا رمش لا حاجب

حتى انه من كل جانب ابچيك يحسن احبك ميت عليك
بيع إليه اي جرح بيك وبكيفك السعر الي يرضيك

بو عبد الله بيع إليه آه بيش متصير اشتريت
واويلاه النمت فوگاه حار التراب __ وانچويت
************
جروحك الألف وكلش هواي __ بصدرك شَعددهن
جازيتني وعندك قليلات وبروحي ما اسدهن
ضلوع ونحر واصبعك الراح ابيش رايدهن

شرايهن لتهمك اسعار وانطيني من الجروح الاكبار
الهدنه حيلك كلش إمرار يا جرح بيك امهيج النار

بكل الاحوال جروح الثگال اشتريهن والدموع
حتى لو مال دمك السال من چبدتك والضلوع


انه اشتري اكبر جرح بيك الصاعده الهزله
ادري چبير اعليه يحسين لخاطرك اتحمله
طاريها يم المهدي ينجاب چن صايبه بنبله

ذوبني لجلك مثل الشموع وابچيلك الدم بدل الدموع
والدين أصله وموش الفروع الماتلك يحسين موجوع

أخذ عمري بأثر صدري وآنه ألطم بالعزه
انت ذخري وانت تدري عزه عليه __ ما جزه
************
متريدني أتأذه ادريك __ وبأزغر اجروحك
بس آنه أذيتي ابقه سالم ومضحي ألي بروحك
مذبوحي كُن أليه عوناً تجعلني مذبوحك

في هذه الساعه وكل عام احضر عزه وتجعلني لطام
وما كان الك ينمو يالإمام وموتني من اسمع اسم شام

ما أتعب دوم انحب عالأذنها تجري دم
الجرح الاصعب هي زينب طلعوها من الخيم


محمد الجوراني
نسألكم الدعاء.
محرم الحرام لعام ١٤٤٠ للهجره
٢٠١٨ للميلاد
عنوان القصيده..( بيعلي جرح ).

قصيده رئيسيه لليوم السابع من المحرم الحرام تتكلم عن شجاعة العباس ابن علي
وكلمات القصيده حسجه .
ملاحظه .. المقصود بالكهوه هنا ليس محل لشرب الكهوه.
وانما مضيف كمضيف الامام الحسن ع.
عنوان القصيده ( مضيف العباس). 1440 للهجره .


بكربله سوه مضيفه …. امن الزلم ذيج الخفيفه
اشباب المضيف اظهور خيل وكوم
وصارت كربله كهوه بهذاك اليوم
امن الزلم ذيج الخفيفه
"""""""""""""""
سوه بكربله العباس امن ظهور الزلم مضيف
تره شيده موش بساع ضل يتفنن اعله كيف
كال اهنا احط شباج ما حط باب بوجه الضيف
بالحزام الشيوخ اتشد خنجر والكمر شد سيف

الاعمده امن القاده حطها …. وبشواربهم ربطها
وعالسبعين اخو زينب ابمهره يحوم
وصارت كربله كهوه بهذاك اليوم
امن الزلم ذيج الخفيفه
"""""""""""""""
اول ما بنه مضيفه وتسرفن كمر عدنان
كال اهنا اشيدنه يم النهر خوش مجان
حط ناس اعله ناس هناك شدهم لسكف سيكان
وفارت دلة الكافل وصب الروس بالفنيان

ابو مريوش وتسرفن …. ماكو غير الروس انصبن
حته الكاع ابو فاضل كرمها ادموم
وصارت كربله كهوه بهذاك اليوم
امن الزلم ذيج الخفيفه
""""""""""""""
لوه اظهور الزلم وحده وسوه إلدلته جانون
وكال إشباب عالكوسر خيل وقاده يتعلكون
حطها كربله إبدلته وفارت كله لجل ام عون
سمع هاون الغيره حسين وكلهم هاشمم اتسيرون

من اجت هاشم سريه …. كهوه صب بيده إلرقيه
ما هزتله فنيانه رقيه دوم
وصارت كربله كهوه بهذاك اليوم
امن الزلم ذيج الخفيفه
"""""""""""""""
سير يمه ابو السجاد ويه الحرم يتكهوه
ثنه ركبته العباس كبال حسين للخوه
كله كعدت الكوسر اذا مو الك مو حلوه
مقصر انه كله وياك جيف انطيتهم عطوه

لا حشه مقصر يكله …. يلي مسوي هذا كله
جايك انه اشكرنك وأريد ادوم
وصارت كربله كهوه بهذاك اليوم
امن الزلم ذيج الخفيفه
"""""""""""""""
جدران المضيف خيول وشداها الزلم هطره
العاند ما يطكه بسيف بس يلتفت ويخزره
اموصه هو هماتين مو بس علي عالزهره
امه الوصته وكالت اليدنه للخيم سطره

جلمه من امه وسمعها …. ضربته محد جرعها
اليضربه كول مابيه بعد روح يكوم
وصارت كربله كهوه بهذاك اليوم
امن الزلم ذيج الخفيفه
"""""""""""""""

محمد الجوراني

قصيده رئيسيه شور .. محرم الحرام 1440 هـ .
عنوان القصيده ( انته كلشي بيه زين ).


انته كل نبضه بدليلي وانته كلشي بيه زين وآنه عايش اعله خيرك واعله مودك يا حسين

عايش أنه اعله احسابك -- دمعي انخلق لمصابك
تستاهل انت دموعي
لو طفك يرد هسه -- صدرك بصدري احرسه
وتسحگ الخيل ضلوعي

لو ما الك ما تنسحگ * هذا وليسموه عشگ _ وآنه اعشگك حيل
عليك آنه اتنافس دهر * چي صدرك يموت قهر _ داست عليه خيل

ياحسين/ روحي ملكك يابن علي / وامري آنه كله بين اديك
بالحياه ما غيرك ألي / خليني بس أبچي عليك

سويني بچاي •• عليك مولاي •• كون احترگ لمصيبتك وابچيلك هواي
،،،،،،،،،،،،،،،،،،،،،،،،،،،،،،،،،،
يلي مضحيلي بضلوعك والخيم المحرگات
الدنيه لو ما بيها ذكرك فاشله هاي الحياة

هو انته المحليها -- امن اولها ولتاليها
مغطيها انته بخيرك
طفك مغير لوني -- نوحي ودموع عيوني
ما يستحقها غيرك

يالعاري باقي اعله الثره * ليش آنه جسمي ساتره _ بكومة ملابس
اليعشگ صدگ عنده علم * اي حگه من شگ الهدم _ بالحومه عابس

ياحسين/ آنه كاتلني المستحه / چي ثوبي محد سلبه
بلبسي اشوف اتراب امسحه/ وبناتك كلها امتربه

صدگني خجلان •• من جسمك الچان •• فوگ الترب عاري بقه وراسك عله الزان
،،،،،،،،،،،،،،،،،،،،،،،،،،،،،،،،،،،،
الما يشم ريحة حبيبه مو نضيفه ريته
وآنه كلما اشم ضريحك ما اشبع من ريحته

الما يفتهم ياهو انته -- كل هذا سوء عاقبته
والله حبيبي يگلك
ما عاش كلمن عافك -- وميبس عليه شفافك
وين آنه ألگه مثلك

من شغله وحده تأكدت * الماي انته المعيشه چنت _ لمن متت مات
هي النفس ما تنخلق * لو ما أكو مصدر رزق _ هي العزيات

ياحسين/ من اجلك الماي انخلق / مو ألي لله هالحچي
بالكسه مگيول انوثق / يعني كلشي يموتلك بچي

كلشي انخلق ليك •• وحتى الكفر بيك •• هم يندم ويحظر عزه وعيونه تبچيك
،،،،،،،،،،،،،،،،،،،،،،،،،،،،،،،،،،،،،
الماله واهس يبچي لجلك هذا مو من البشر
وآنه اريدن أگضي عمري ابمجلسك واعمي النظر

عيوني ألك مرهونه -- خل ينعمن نمونه
هذا نشيد الهايم
ترد روحي بالطميه -- كون انته راضي عليه
مالي شغل بالوادم

والوادم اعليمن رضت * حتى آنه أهتم اشحچت _ ميهم حچيها
أنته المهم وأنته الأهم * اي وحگ حامي الخيم _ معليه بيها

ياحسين/ آنه امشي بالينفعني بس / الينفعني دمعي ابمجلسك
للعزه يشتاگ النفس / شوگ اصبعك إلمحبسك

يا ذيچ الخيام •• التچوي بالايتام •• من هذا أيد احترگت ومن ذيچ الاجدام
،،،،،،،،،،،،،،،،،،،،،،،،،،،،،،،،،،،

أسألكم خالص الدموع والجزع .

محمد الجوراني .

قصيده نزله للخدمه لعام 1440 للهجره
عنوان القصيده ( ياعمة الساده مدد ).


ياعمة الساده مدد * ألكم خدمتي للأبد
باللطم شدي حيلي
وبقامتي وزنجيلي
"""""""""""""""
صدري شنهي وآنه اعزه عليكم
واصلا ضلوعي منكم وهم ليكم
أنتم تحبون اللطم ادريكم
بالعزه اتحييون اليجي يواسيكم
المجلس أطبه وجني إمحاجيكم
كد ما أحبنكم وهايم بيكم

لحسين دمعي امجهزه * باول بدايات العزه
بالعزه نهاري وليلي
وبقامتي وزنجيلي
""""""""""""""
بس الكم ضلوعي تره مرهونه
إمن اكسرها الكم جا قحط نمونه
وحسين اخوج بحافر يدوسونه
وهو انه شابع خير من ماعونه
خادمكم انتو كلش اتعزونه
واعله التريدونه تره تمشونه

كل عمره ماشي بالعدل * خادم الصعدت عالهزل
انتو سبب تعديلي
وبقامتي وزنجيلي
""""""""""""""
الله خلقني للحسين وآله
حته ألطم وابجي بالمجلس ماله
حسين الي ضحه من اجلي كل اعياله
ما ابطل دموعي عليه هماله
والي يدك زنجيل اله يتعاله
والمات بالتطبير الف هنياله

والخدم بالموكب فلح * بدفتر الخدمه اسمه صبح
يا فاطمه وقعيلي
وبقامتي وزنجيلي
"""""""""""""""
من الاوادم والبشر سواني
عاري حبيبي وبالحرير اكساني
ضحه بخيامه اوطن حبه انطاني
حسين انطه دمه راد اعيشن اني
راضي بسبي اخته من اجل نسواني
المفروض اموت ابمجلسه شمتاني

المفروض ما اشم الهوه * الحسين عاري بنينوى
يا فشلتي ويا ويلي
وبقامتي وزنجيلي
"""""""""""""""
وألي تفركس رجله بالمشايه
بالشمس يمشي حافي عنده غايه
يواسي رقيه اجدامها مجوايه
يصيح هاي شويه موش هوايه
من امشي وبرجلي تطب سلايه
هنيالها اطب كربله مدمايه

بكربله كون اسحگ جمر * ورجليه اسويهن حمر
يالمهدي بس ادعيلي
وبقامتي وزنجيلي
"""""""""""""""
بعاشور الله لا يريح بالي
ارتاح والمهدي ونينه عالي
علي تصيح انشاف خويه خيالي
يرتاح هو الفگد بالطف غالي
وانه فاگد ابو الاكبر مالي
اشكر حسين الحيل تعب حالي

ما تعباني بخدمته *** التعبني بالطف جثته
اهدي اله تغسيلي
وبقامتي وزنجيلي
"""""""""""""""

محمد الجوراني

كأني بلسان حال السيد الأعظم الأعز الأكرم سماحة حجة الله الأمام محمد ابن الحسن المهدي (عجل الله له الفرج) . يتحدث عن عمة السيده رقيه (ع) يوم استشهادها ..

عنوان القصيده ( ماتت عالحُسين)... 1440 هـ.


ندري بالمات ابزغره --- كلشي ما شاف بعمره -- والسنين
عـمّتـي كلشي شافـت --- لـذا عـالـطـشت مـاتـت -- عالحُسين
________________________
المات من زغره تره ما شاف شي من دنيته
واحنه اهل البيت هالشي ويانه عاكس مشيته
عمر عمتي اربع ورود ويوم عاشر شافته
يا زغير الي يتحمل ركض عمتي الرگضته

ركضت درب حافي --- الجمر يلهب ما طافي -- بالقدمين
جدام عمّتي راحت --- لـذا عـالـطـشت مـاتـت -- عالحُسين
_________________________
عمّتي من دون كل المات مختلفه تره
كلشي شافت يهالوادم موت اهلها بالسره
شافت ضلوع لأبوها مطحنه ومطشره
الموتاني زغيره ما وصلت المرحلة المره

لو چبيره معقوله --- زغيره هيه ومذهوله -- واللعين
بسوطه يضربها وصاحت --- لـذا عـالـطـشت مـاتـت -- عالحُسين
_________________________
لا تلوموني ابچي دم عليها عمتي اتعذبت
انتو هم شايفين طفله من زغرها شيبت
هواي داست شوك حد ما رجل عمتي اتشگگت
والهضمني الرادت اتغسل رقيه ما رضت

لعمتي گالت عذريني --- چي مريـه وتعديني -- مو زين
من هالمرض خافت --- لـذا عـالـطـشت مـاتـت -- عالحُسين
________________________
عمتي خلتني ابچي صبح ومسه ويوميه انتحب
آنه لا أكلي أكل يا ناس لا شربي شرب
غمّضت مره وشفت مشهد تراچي وتنسلب
بعد ما اغمض واشوفنها للمجلس من تطب

نص باقي من حيلي --- وهو بس نص باقيلي -- شغمض العين
وطاح كله من طاحت --- لـذا عـالـطـشت مـاتـت -- عالحُسين ________________________
المات من زغره نگول هموم ما عنده ابد
شو رقيه ماتت ازغيره واثر سطره اعله خد
يا خلگ ياهو امن ابنكم شاف چف اعله ابوه انمد
عمتي شافته الشمر يضرب بأبوها عليه صعد

هموم عمتي متروسه --- حسين شافته يدوسه -- اربعين
حافر اوعليه جالت --- لـذا عـالـطـشت مـاتـت -- عالحُسين
________________________
كلنه ندري الموت ما يعرف يهالوادم عمر
بس اذا مات الطفل يبقه اعله وضعيته الزغر
لاچن الخلاني ابچي دمه وحيرلي الفكر
عمّتي ماتت زغيره أمبين أعليها الكبر

الشام طبته أمشيبه --- امن الضرب تمشي محدبه -- والأدين
من حبلهم دم سالت --- لـذا عـالـطـشت مـاتـت -- عالحُسين
________________________
نومها يلچم أذنها والجرح ما هو سهل
يا أديها العذبني چانن أزغر من حبل
جرجروها وصعدوها بس رفس فوگ الهزل
مصايب المرت عليها يا خلگ ما تنحمل

حيل ما خلتلي احچي --- بس دم خلتني ابچي -- بكل حين
حسين شافته ارتاحت --- لـذا عـالـطـشت مـاتـت -- عالحُسين



رزقهم آل محمد دخيلهم
محمد الجوراني

قصيده موشح لسيدة سور علي .
موضوع القصيده . بما أن علي ع هو القران الناطق حيث فاطمه ع هي احد سور هذا القران الناطق.

عنوان القصيده ( سورة علي ).


يا فاطمه -- يا فاطمه-- يم الحسن
------------------------------

بسم الزهره وأسمها إشگـد رحيـم
هــذا تـفـسيـر ايـة الضلـع الهشيـم
مـن هجـم عالسوره شيطانٍ رجيم
بحيله يعصرها وضلوع يطگطگن
-------------------------------
علي القران الحقيقـي إمـن السمـه
واكـو سـوره بعلي اسمهـا فاطمـه
مـاكــو كـل إعـقـول ألهـا فــاهمـه
وعـــن وعـــي آيـاتهــا يـتـرتـلـن
-------------------------------
فـاطـمـه سـوره بـعـلـي من العلي
مرتب إمن الـله مكانها بنص علي
ليش من دون السـور چـا تنـولـي
چـيـف قــران الـله اديه اتـچـتـفــن
--------------------------------
عــدد الآيــات بـيـهـا أثـمـنـطـعـش
عين هاي السوره مصفوعة رـمش
بسملتها الزهـره والتصديـق نعـش
عـيـون حـيـدر إبـدفنهـا يـصـدقــن
--------------------------------
اليقره سوره من كتـاب الـله المبين
روحـه تشعـر بالاطمئنـان وحنـيـن
اليقـره سـوره من علـي يشبع ونين
ضلوع اـيه اثمنطعشهــا أتـهـشـمـن
-------------------------------
گـــال الـله رتـلـوه تـرتـيـل عـــدل
ليــش چـــا قـرانـه رتـلتـوه بـحـبـل
وليـش ـمن سـورتـه طـيحتـو طفـل
وفـوگـه وگعتـوا جـذع گلبه انسحـن
--------------------------------
تـدري تـرتيلـه يشــافـي كـل صــدر
يـاعُمَــر چــا لـيـش بـيـدك تـنـكـسـر
آيـتــه والســوره عاصـرهـا عـصـر
سـوايـتـك ابليـس مـا سـواهـا أضـن
--------------------------------
✍ / محمد الجوراني
رزقهم آل محمد دخيلهم