في ذكرى استشهاد الإمام السجاد عليه السلام

كافي يبو حمزه القلب بجروحه ما طاب
من شفت أبويه امغسّل ابدمّه ولتراب
لليوم جرحي ما بره * من نظرت لمنحره
……******……
لا تناشدني يبو حمزه اعله حالي
قلبي مدمي من بعد ذبح الغوالي
لو چنت حاضر يبو حمزه الثمالي
ابكربله وشفت الجرى ابعزّي ودلالي
ابكربله احسين انذبح شفته اقبالي
راح أبويه وأصبحت ظلمه الليالي

احسين شفته اعله الثرى وموزع اوزاع
والخيل ما خلت عضو سالم ولا اضلاع
وبدِمَه دمعي جره * من نظرت لمنحره
……******……
يا بو حمزه ابكربله شفت البلايا
وخيّمت بالطف على قلبي الرزايا
شفت أهل بيتي على الغبره ضحايا
وعالوطبّه حجّة الله اعله البرايا
كِلْهم انذبحو يبو حمزه ظمايا
والحريم اعله الهزل راحن سبايا

أقمار شفت اعله الثرى مخنوقة أنفاس
جسّام والأكبر يبو حمزه وعباس
وطفل هدني منظره * من نظرت لمنحره
……******……
يا بو حمزه ابن النبي ابعيني نظرته
بالعطش مفطوره عالرمضه چبدته
وبالشمس خدّه انصهر وسمعها ونته
وباقي بس تطلع يبو حمزه مهجته
واعله صدره ابن الخنا ثاني ركبته
وبثنعش ضربه الرجس طبّر رقبته

بعيوني شفت ابن النبي امبضّع بلسيوف
وجاثي اعله صدره ابن الضبابي وعيني اتشوف
ووقعت فوق الثرى * من نظرت لمنحره
……******……
احنا من رب العلا نلنا السياده
وصرنا بين الناس من خيرة عباده
وصح كرامتنا من الباري الشهاده
وعدنه صار الموت أحلى امن القلاده
بس يبو حمزه الذبح مو اِلنه عاده
وكيف أنا أدفن هلي وابقى ابسعاده

ما خلّت اِلنه كربله شيخن ولا شاب
وعمّاتي صارن بالسبي مابين لاجناب
وانعى ابويه امن اذكره * من نظرت لمنحره
……******……
لو نظرت اعله الهزل بنت الأماجد
ما قِلِت لي يا علي ليش انته واجد
عمّتي الچانت تحف بيها الفراقد
ابكربله ما ظل لها امن اخوتها واحد
بين شامت ظلّت وما بين حاقد
ودِخْلت المجلس على الباغي الجاحد

بنت الرساله دِخْلت الكوفه على انذال
واعله يزيد امچتّفه ومقيوده بحبال
واذكر اوياها الجرى * من نظرت لمنحره
……******……
يابن الثمالي قرّبت منّي وفاتي
ولجرى اعله احسين ظل ابذكرياتي
آنه بعد احسين ضاعت امنياتي
وما يفارقني الجرى لآخر حياتي
ابكربله ميّت قبل موعد مماتي
ويّا أبويه ابحفرته دافنها ذاتي

لاخر نفس بيّه أصيحن وا حسيناه
ودّي أموت ابكربله ودفنوني ويّاه
روحي والله امحيّره * من نظرت لمنحره
……******……
أبو فاطمة الأحسائي
١٤٤٥/٠١/١٥هـ

استشهاد الإمام السجاد عليه السلام

يابو حمزه .. أصبح الموت لبني طه سعاده
وللسعاده .. ابمنهج الحق صرنه نتمنّى الشهاده
لاكن امصاب لجرى * خلّى چبدي امفطّره
.…..******……
يابو حمزه امصاب خلنه انفصلّه
بلكه اليسمع مصابي يبچي له
جارت أيّام الدهر في كربله
ومن فعاله اتشتّت هالعايله

يابو حمزه .. من وصلنه كربله شفنه المصايب
واللي شفته .. خلّى راسي في شبابي يصير شايب
كل مصاب الأذكره * خلّى چبدي امفطّره
.…..******……
يابو حمزه اشلون انسى اللي جره
وآنه شفت أجساد صرعى اعله الثرى
وبويه شفته شلون حزّوا منحره
وعالوطيّه شفته جثّه اموذّره

يابو حمزه .. الدفن جثّة أبوه شلون وضعه
وبالحصيره .. جمّع اوصال الأبو ويتجارى دمعه
من نظرته اعله الثرى * خلّى چبدي امفطّره
.…..******……
ما دهاني اللي جرى ابذبح وقتل
يابو حمزه اللي ذهل مني العقل
شنهو ذنبه ينذبح خويه الطفل
ما جنى ابعمره ويصيبونه ابنبل

يابو حمزه .. بويه أقبل شفته وشايل عضيدي
مو وريده .. چنّه الصابو يبو حمزه وريدي
طفل قطعوا منحره * خلّى چبدي امفطّره
.…..******……
يابو حمزه ما بقى لبويه جلد
وهذا ياذيني ونحل مني الجسد
من لفاني ايقول ماظل لي أحد
وچنّي خيمه وما بقى بيها عمد

يا بو حمزه .. ساعه وانظر والدي فوق الوطيّه
ولفجعني .. جسمه عالغبره تدوسه الأوعجيّه
شفته جثّه امطبّره * خلّى چبدي امفطّره
.…..******……
للمصاب اللي جرى تبچي السمه
والنبي والمرتضى وَيْ فاطمه
يابو حمزه امغسّل حسين ابدَمَه
وحقها عين الشافت حسين العمى

حقها تعمى .. العيون الشافت ابن الزهره صادي
وهوّه نادى .. اي وحق جدّي العطش فتّت فؤادي
ومهجته متفطرّه * خلّى چبدي امفطّره
.…..******……
يابو حمزه مقدر أوصف هالألم
ابليلة الحادي عشر قلبي اضطرم
من شفت نار الأعادي بالخيم
وحالة الأيتام تفجع والحرم

يابو حمزه .. لا تلوم اللي نظر عمْته وخواته
بالمجالس .. من بعد كل لجرى شبعن شماته
من تنوح امخدّره * خلّى چبدي امفطّره
.…..******……
يابو حمزه حقك تقول ابعتب
هالحزن ما ينتهي وتبدي العجب
حزني اعله المنذبح وبلا سبب
اوما تعبت امن البچي ودهري تعب

يابو حمزه .. اوداعة الله حانت الليله وفاتي
وربي يشهد .. ما نسيت حسين لحظه في حياتي
وبويه بس اتذكّره * خلّى چبدي امفطّره
.…..******……
أبو فاطمة الأحسائي
١٤٤٤/٠١/٢١هـ

في استشهاد الإمام السجاد عليه السلام

دمعي أجريته يبو حمزه دمه
من نظرت اضلوع أبويه امهشّمه
ومن نظرته اعلى الثرى • دامي قطعوا منحره
دمعي أجريته يبو حمزه دمه
......****......
يا بو حمزه اشلون تنسى هالـمصايب عيني
وآنه شفت اعلى الوطيّه امهشّمين احسيني
لا تلوم اقليبي لو تسمع حنين اونيني
بويه چفّنته ابحصيره وضمّته چفّيني

شفت أبويه احسين راسه اعلى الرمح
وبيه ألف طبره وتسعميّة جرح
وصرت أنوح لـمنظره • دامي قطعوا منحره
دمعي أجريته يبو حمزه دمه
......****......
يا بو حمزه كم شباب اللي نظرته امعفّر
جاسم العرّيس شفته ويّا أخويه الأكبر
والكفل زينب نظرته اعلى الوطيّه امطبّر
والرضيع ابقلبي جرحه من نظرت الـمنحر

بو الفضل شفته چفوفه امقطّعه
جنبه جوده وطايح اعلى الـمشرعه
وهامه منّه امطبٌره • دامي قطعوا منحره
دمعي أجريته يبو حمزه دمه
......****......
شبّت النار ابضميري والحبايب نومه
ومن لفتنه الخيل فرّت هالحرم للحومه
هجمت اعلينا الأعادي ابلا رحم موسومه
والخيم بالنار صارت والحقد مضرومه

ما بقى امن أهلي يبو حمزه أحد
ومن بعدهم ما بقى بيّه جَلد
عالثرى خير الورى • دامي قطعوا منحره
دمعي أجريته يبو حمزه دمه
......****......
ركّبونه اعلى الـمطيّه وللأسف مهزوله
وعالعواسل راس أبويه والأهل مذهوله
وآنه چفّيني وسافه اعلى الهزل مغلوله
وظلّت اعلى الخد يويلي دمعتي مهموله

بالـمجالس وقّفوا مهجة علي
والقلب لحسين جمره تصطلي
من تذكره اعلى الثرى • دامي قطعوا منحره
دمعي أجريته يبو حمزه دمه
......****......
لا تقول إن الشهاده للأماجد عاده
ذبحوا احسين الأعادي واخوته واولاده
حتّى عبدالله أخويه ماهتنى بمهاده
وبالـمجالس وقّفونه وهذي مو للساده

قلبي لحچيك يبو حمزه انفطر
وقلبي لحسين امن اذكره چالـمطر
وچبدي لجله امفطّره • دامي قطعوا منحره
دمعي أجريته يبو حمزه دمه
......****......
هالإمام اللي فراها مهجته باحزانه
أمسى بس احسين وِرْده ومنحره قرآنه
بالغدر والسَّم تقطّع يا خلق وجدانه
وادفنه الباقر يويلي وما بقى جثمانه

من قضى اتجهّز ولا ظل عالثرى
ومدمع الباقر لجل موته جرى
وجدّه چنّه اتذكّره • دامي قطعوا منحره
دمعي أجريته يبو حمزه دمه
......****......
أبو فاطمة الأحسائي
١٤٣٨/١/١٧هـ

في ذكرى استشهاد الإمام السجاد (ع)

يا باقر العلم القلب لا تلومه مجروح
عمري قضيته وما نسيت احسين مذبوح
اتنفّسه اهموم * من راح لليوم
…….
يوليدي يمحمد أنا عمري نذرته
لحسيني جدك يوم عالغبره نظرته
اشلون أنسى والدي من يوم شفته
اولا تنسه بيدي ابحفرته آنه لدفنته

احسين شفته والجسد يوليدي مهشوم
اختلطت اعظامه مع لحمه ولدموم
وقليبي مالوم * من راح لليوم
……
مرّت عليّه اسنين وآنه في عزائي
لا ليلي اقطع لا ولا انهاري بكائي
اصبح حديثي ابكل وقت نوحي ورثائي
وبكل قنوت احسين ضمّنته دعائي

ماتم نصبته اعله الولي ابمجلس ابن زياد
وبمجلس الطاغي نصبته ابمحضر اوغاد
ودمعاتي ادموم * من راح لليوم
……
يوليدي حزني اعله الابو ما توصفه چف
ودمعي على احسيني مدى الأيام ما جف
ما تدري بيّه شالجنت يالباقر الطف
خلّتني عالغبره اون واعضائي ترجف

ما أنسى بويه وذبحته في يوم عاشور
يوليدي جثّه شافته هالعيله منحور
ومسلّب اهدوم * من راح لليوم
……
يوليدي ما چنت اهتني ابزادي وشرابي
واتحسّر اعله اللي جره ابآل الكتابي
بنياحي راحت يالولد زهرة شبابي
من شفت أبو اليمّه وعلى صدره الضبابي

اللي يهز مهده الوحي ويخدمه ميكال
يصعد على صدره الشمر ويدوسه بنعال
ولهذا مغموم * من راح لليوم
……
يوليدي مثلي ابكربله چنت انته حاضر
وحسين جدك تنظره ادّوسه الحوافر
اتمنّيت بعد اللي جرى تعمه النواظر
اولا شافت اعيوني الحصل وآنه ابلا ناصر

احسيني شفته والقلب من شوفته ارتاع
ما خلّت الخيل ابجسد هالوالد اضلاع
وخلاني مهموم * من راح لليوم
……
كلّ المواقف من تمر اعليّه صعبه
اتذكّرني باللي منذبح ما ذاق شربه
واذكر مسيري اويا الأهل بدروب غربه
واللي نظر اهله ابدماها ايعينه ربّه

من انظر اشياه تنذبح اتذكّر احسين
وسهم النزع من مهجته يا ويلي ثلثين
اوما اهتني ابنوم * من راح لليوم
……
حانت وفاتي وآنه يوليدي ابعزيّه
ما زالت ابعيني تمر الغاضريّه
ولو بيدي يحصل من قبل القه المنيّه
خلّوني جثّه ابلا چفن فوق الوطيّه

لو يحصل ابشرع الله ويحصل على اهواي
ماريد أنا مثل السبط تسقوني الماي
أتذكّره دوم * من راح لليوم
……
أبو فاطمة الأحسائي
١٤٤٣/١/١٣هـ

في الشوق والحنين . لزيارة الأربعين

لو يساءلني المَلَك يوم الحشر * وماكو عندي يا أبو اليمّه عذر
اشمر عليك امن اربعين .. ليش ما زرت الحسين
……*****……
كل سنه أرجع وأقولن يا علي منك المدد
أمنيه عندي يحيدر والقلب جمره اتّقد
قلبي مشتاق الزياره لكربله ايجدّد عهد
أمشي بقليبي اويا روحي للإمام المعتمد

عندي منيه وبيها محتار القلب * وبربعين احسين كل عام انتحب
راحت أيّام وسنين .. ليش ما زرت الحسين
……*****……
يا علي ما عندي غايه غير أبو اليمّه وذخر
وختصارن في حياتي احسين بس هوّه العمر
وربعين احسين وسفه ابكل سنه اعليّه يمر
وما أروحن للزياره ويبقى قلبي يستعر

قلبي يتقطّع واظل ابحسرتي * وتجري فوق الوجنه حمره عبرتي
واصبح ابلوعه اوّنين .. ليش ما زرت الحسين
……*****……
الوسيله احسين عندي وهذا عندي معتقد
لو أعوفه ابلحظه وحده روحي اتعوف الجسد
لا حياة ابلا محبْته وليحبنّه سعد
وليعوف احسين خاسر آخره ودنيا بعد

الحسين الخير كلّه اعله الملا * وفايز الزاره ابضريحه ابكربلا
وآنه اجر حسره وحنين .. ليش ما زرت الحسين
……*****……
اتميّز المؤمن علائم خمسه قال العسكري
أربعين احسين منها وبيها كل مؤمن حري
وهالزياره اتظل غايه وليها كل عمري اشتري
حتى يكتبني إلاهي ابحب إمامي جعفري

قلبي ابنبضاته يصرخ يا علي * يمته عنّي هالعوائق تنجلي
صرت أناشد كل حين .. ليش ما زرت الحسين
……*****……
قلبي اعله احسين أصبح من يدق ينبض حزن
وعيني ما ينشف دمعها وقرّحت منّي الوجن
اسأل امن الباري مرّه اقصد احسين وأجن
ابكربلا اتجيني المنيّه وبجواره اندفن

يا إلاهي اكتبني مرّه في العمر * بربعين احسين مل منّي الصبر
اطلب الله يا معين .. ليش ما زرت الحسين
……*****……
أبو فاطمة الأحسائي
١٤٤٥/٠٢/١٨هـ

حسرة وتلهف لزيارة الأربعين

يا دمع روح وأخذ نبضات قلبي
تدري منّ اسنين للطف عيني تربي
قلّي بالله اشتنتظر * للحُسين اشتعتذر
.....*****.....
يا دمع تدري ابجراحي طولِ لسنين
لا تقلّي اصبر أجيبن صبري امنين
خوفي ما تضمد جراحي وأغمض العين
وانته تدريها ومناها ازيارة احسين

للجرح خلّك يدمعي ابلوعه ساجم
ما تضمّد هالجرح وصفه ومراهم
روحي صوّبها الجمر * للحُسين اشتعتذر
.....*****.....
يا دمع خلّك على الوجنات نثّار
لا تجف وارسم على الخدّين انصار
خل أفاخر بك يدمعي عندِ لاطهار
وعنّي في يوم القيامه احجب النار

اصبغ ابسيلك يدمعي اليوم وجني
وبالقيامه النار بس ادفعها عنّي
موعدك يوم الحشر * للحُسين اشتعتذر
.....*****.....
يا دمع ساعد فؤادي ابكثرة النوح
لا تلومه لن حبيبه احسين مذبوح
تدري من عاشر يمرّه ايودّع الروح
ومن يمر اسم الحُسين اتشوفه مجروح

يا دمع اجري ومسيلك خلّه من دم
تدري ماكو من مصاب احسين أعظم
ولو تصب طول العمر * للحُسين اشتعتذر
.....*****.....
كل سنه ابعيني أشاهد زحفِ لافواج
واطلب امن الله يعدني ابكربله حاج
وانتظر عام ويجيني ودمعي أمواج
وادري ما غير الزياره لقلبي اعلاج

قلبي مشتاق وتعب طال انتظاره
عجّل اللهمَ لقليبي ابزياره
يا قلب من تنتظر * للحُسين اشتعتذر
.....*****.....
الله ما سجّلني زاير هالسنه احسين
وما كتب اسمي ابسجلّه اويا الملايين
أجرى دمعي وفي فؤادي سوّه جرحين
وخوفي يلفيني قبل مازوره البين

ودّي أتعنّى لبو اسكينه وازوره
وادخل الحضره ابجرح روحي الصبوره
يا دمع ليش الهجر * للحُسين اشتعتذر
.....*****.....
أبو فاطمة الأحسائي
١٤٣٩/٢/١٠هـ

حسرة المحب لحرمانه من زيارة الأربعين

يا حبيب .. اسمي ويّا الناس ما سجلّته زاير
يا حبيب .. بالـمجالس سجّل اسمي الليله حاضر
طلبه اسمي اتسجّله • وجنبه (عاشق كربله)
.....******.....
يا حبيب آنه الـموالي ابدمعة الآه
أصرخ ابليلي ونهاري وا حسيناه
واسم أبو اليمّه يبعد الروح أهواه
وقلبي عاشق هالاسم چن عايش اوياه
يهتف ابذكره فؤادي ويجري بدْماه
وهالاسم بالدنيه والله صعبه أنساه

ما يغيب .. اسم أبو اليمّه ولا لحظه نسيته
يا حبيب .. من حليب أمّي أنه اسمه احتسيته
أكتب اسمه بسمَله • وجنبه (عاشق كربله)
.....******.....
انته بوّاب الإمام لذكره مذخور
ودفترك بيه الأماني ويحتوي نور
اليزور احسين عندك اسمه مذكور
ولتسجّله ابدفترك مكتوب اِله ايزور
يا حبيب وآنه قلبي شوفه مفطور
ليش اسمي ابدفترك ما خطّته اسطور

الدموع .. غسّلتني امن الحزن فقدت أملها
والجفون .. بس تجاوب بالدمع كل مَن سألها
وقلبي حاير من اِله • وجنبه (عاشق كربله)
.....******.....
يا حبيب انته لتسجّل اسم لأحباب
ولتسجّله امن البُعد يوصل للاعتاب
يوصل ويقصد قبر بن داحي لأبواب
وآنه عندي اوياك يابن ظاهر اعتاب
يمتى اسمي اتسجّله وَيْ هاي لاصحاب
أقسم اعليك ابإمامك يبن لاطياب

يا حبيب .. أقسم اعليك ابضلع زهره الزچيّه
للحُسين .. سجّل اسمي زايره قبل الـمنيّه
قلبي خلّه يوصله • وجنبه (عاشق كربله)
.....******.....
منهو مثل احسين ظامي بالعطش مات
كل سنه ينعاد ذكره واسمه مرّات
حيّر العالم مزاره والشعارات
والدنيّه سطّرت باسمه الحكايات
من بعد ذبحه اعتلت خفّاقه رايات
انكتب بيها لحسين وآله ثارات

بالطفوف .. جثّة الـمذبوح وانصاره طريحه
يا حبيب .. وكل محب يتمنّى يوصلّه ضريحه
وتحسده كلّ الـملا • وجنبه (عاشق كربله)
.....******.....
مُنيه عندي من وعيت ابدنيه لاكدار
أوصل لطف كربله من ضمن لاسفار
أقصد احسين وعضيده وكلّ لاطهار
وانحسب ويّا الأحبّه الشيعه زوّار
واجري لحسين ومصابه هامي لاعبار
وبالقيامه الدمعه عنّي اتطفّي النار

بالحساب .. دمعتي اعلى احسين أحملها ابچفوفي
ما أخيب .. تستحي النيران ما تقرب حروفي
اسمي بحسبن اعتله • وجنبه (عاشق كربله)
.....******.....
أبو فاطمة الأحسائي
١٤٣٨/٢/٧هـ

قصيدة للمشاية بالأربعين

جيتك يمولاي . وبقلبي تسعر جمره
للحضره مشّاي . قصدي أعزّي الزهره
.....****....
جيتك يباب الله * وسط القلب عِلّه .. ابهالسَّنه
بالحسره والعبره * يا مهجة الزهره .. وانته الـمُنى
اليقصد لقبرك * ويقسم لك ابنحرك .. ويمّك دَنا
ابحق ابنك الغايب * م ترجّعه خايب .. ويلقى الهنا

يا سيدي جاي .. وطلبه تحن ابنظره
للحضره مشّاي . قصدي أعزّي الزهره
.....****....
معشوقي يحسيني * أتنطّر اسنيني .. وراح العمر
وبهالسنه جيتك * متعنّي لبيتك .. وكلّي فخر
منّ البُعد قاصد * يا حجّة الواحد .. وقلبي جمر
ازيارتي سهله * ولله الشكر كلّه .. جيت القبر

عالجمره عنّاي . والرايه بيدي حمره
للحضره مشّاي . قصدي أعزّي الزهره
.....****....
متعنّي لك زاير * ومن ادخل الحاير .. أتنفّسك
عطرك يمولايه * أشتمّه بحشايه .. ما أقدسك
حبّك جرى ابدمّي * وزيارتك حلمي .. واعظم نُسك
يا الأغلى من روحي * ويا بلسم اجروحي .. ما أنفسَك

حبّك هو لواي . وشلته معي بالفطره
للحضره مشّاي . قصدي أعزّي الزهره
.....****....
لحضرتك قاصد * ما همّني الحاقد .. وبلا قلب
لن بو علي حبّي * أمشي على قلبي .. طور الدرب
عدوّي لو فجّر * ولويقطع الـمنحر .. أبقى محب
أبقى على عهدي * ومعاهد الـمهدي .. لو أنصلب

غصبًا على اعداي . متعنّي لك للحضره
للحضره مشّاي . قصدي أعزّي الزهره
.....****....
الله اعلم ابحالي * ومن حقّق آمالي .. شكره وجب
ابكل سنه ودّي * بيّه العشق يحدي .. وللطف أطب
آنه وهلي كِلْها * الحضره نوصَلْها .. واللي أحب
نبچي ابدمع جمره * لـمصيبة العتره .. وينعى القلب

من ننظر الـماي . نعتب عليه ابحسره
للحضره مشّاي . قصدي أعزّي الزهره
.....****....
أبو فاطمة الأحسائي
١٤٣٨/٢/٦هـ

السيدة الحوراء تخاطب أخاها الحسين عليهما السلام بعد رجعتها من السبي

يبن أمي جيت ابشوق للغاضريّه
جيت ابهضم وآلام يبن الزچيّه
.....*****.....
آنه العقيله ابنوح جيت وهضيمه
واعله الوجن يا حيف دمعه سجيمه
واحچي لك امن الضيم قصّه أليمه
سمّوني بعد العز بالخارجيّه
.....*****.....
يبن أمي جيت ابضيم وقليبي ذايب
ولو تنظر اعله الراس يا خويه شايب
لنّي بعد عيناك شفت العجايب
صرت ابحكم ظلاّم أمشي سبيّه
.....*****.....
بعدك ينور العين قوّه خذونه
ومن بعد أبو النوماس جاير عدونه
ضرب وسبي يحسين ويسلّبونه
بعدك يبو السجّاد شفنه الأذيّه
.....*****.....
يا بو علي اعله القاع خلّيته جسمك
ويجري منِ الأوداج يبن أمّي دمّك
وتدري غصب يحسين ماخذني خصمك
واعله الترب يحسين عفتك رميّه
.....*****.....
وهسّه ينور العين جيت ابمصابي
بعد السفر يحسين أشرح عذابي
ورغم الهضم والضيم زاد انتحابي
برض الغرب ياحيف ماتت رقيّه
.....*****.....
يخويه جيت اليوم في أربعينك
وبيدي يخويه الراس ينشدني وينك
والعيله كِلْها اوياي تنظرها عينك
طول الدرب عيناك اتصدها ليّه
.....*****.....
جيت ابقلب ملهوف آنه وحريمك
وتدري اشفعل يحسين بينه خصيمك
ومكسّره الأسنان خويه ابكريمك
كسّرها برض الشام نسل الدعيّه
.....*****.....
هذا العليل اوياي ذوّبني نوحه
شوفه ينور العين وانظر جروحه
خوفي يخويه احسين يفقدها روحه
وقبره يصير اوياك بالغاضريّه
.....*****.....
أبو فاطمة الأحسائي
١٤٣٩/٢/١٢هـ

قصائد استشهاد النبي الأكرم صلى الله عليه وسلم

استشهاد الزهراء البتول عليها السلام

يا علي اشقد شايل ابقلبك محن
يكفي من تسمع وصايا أم الحسن
توصِي ابحفظ العيال ** والجسم أصبح خيال
……*****……
ما نلومك يا أمير المؤمنين
من تهل الدمعه وتجرّ الونين
هالمسا اتوصّيك أمّ الطاهرين
ومن قبل وصّاك خير المرسلين
وبالوصيّه تنهضم أمّ الحسين
تنعصر هالزهره ويطيح الجنين

النبي وصّاك تصبر عالهضم
يا علي اضلوع الزچيّه تنهشم
من بعد ذاك الدلال ** والجسم أصبح خيال
……*****……
يا علي بعد النبي شفت الهموم
ماكو راحه اعله النبي وآله تدوم
اشعندي آنه بالدهر ويّا الخصوم
حتى ابداري ابحقد صار الهجوم
صارت العلّه على قلبي تحوم
وصرت أنا امن العلّه ما أقدر أقوم

يا علي صبّت علينه هالمحن
وكِلْنه صرنه انعاني من جور الزمن
آنه ونته اويا العيال ** والجسم أصبح خيال
……*****……
فاطمه اعله فراش علّتها وتنوح
والقلب بالحسره مليان ابجروح
يا علي اتودعك ترى روحي ابتروح
والدمع فوق الوجن منها سفوح
خلني ابجرحي يبو الحسنين أبوح
الهضمني وين عن ربي يروح

بالقيامه اللي على الزهره اجتره
ابسقر رب الخلايق يحشره
ابجرمه دمّي ابضلعي سال ** والجسم أصبح خيال
……*****……
فاطمه اتون ويهد ونها الجبال
والدمع فوق الوجن بالحسره سال
تنادي بو الحسنين يا خير الرجال
عيشتي بعد الجرى اعليّه مُحال
هالمسيّه تنمحي اهمومي الثقال
وصارت اتوصّي علي ابحفظ العيال

اوداعة الله يا حبيبي المرتضى
هالمسا يسود عليكم هالفضا
نعشي اتشيله الرجال ** والجسم أصبح خيال
……*****……
زايد اعله ام الحسن وسفه الونين
ويرشح امن الموت يا ويلي الجبين
وصارت اتوصّي أمير المؤمنين
بالحسن ويّا العقيله والحسين
وبأمامه اتزوّج اتحن عالبنين
وتفتخر تخدم بنيني الطاهرين

بعدي أولادي يا حيدر تبتلي
والعقيله بعد عزها تنولي
وتنسبي فوق الجمال ** والجسم أصبح خيال
……*****……
قربّت منّي المنيّه يا أمير
وتدري بيّه منجرح منّي الضمير
انهضم حقّي وبقيت ابلا نصير
وعيني ملطومه وضلع منّي كسير
من تشوفن جسمي ميته اعله السرير
ابسواد الليل دفني خل يصير

يا علي بالليل ادفن هالجسد
وما أريدن يحضر ابدفني أحد
واجده ابقى اعله الرجال ** والجسم أصبح خيال
……*****……
أبو فاطمة الأحسائي
١٤٤٥/٠٦/٠١هـ

في ذكرى مصاب أم البنين عليها السلام

كل شدّه كل هم كل عسر … يمّ البنين الحرّه
ينزاح لو نقسم قسم … اعليچ باسم الزهره
باب الحوايج صرتي * باب الحوايج صرتي
……******……
آنه الموالي والمحب يا أمِ لبنين
اسمچ عرفته من يمر طاري اسم لحسين
قالوا لي أهلي هالمره مقرونه بثنين
محبوبة الزهره وبعد محبوبة احسين
اسمچ يشيله كل قلب وتشيله كل عين
لنّچ زچيّه وطاهره وفخر المحبّين

أمّ لميامين أربعه … وبكل فخر موصوفه
من يلتجي لچ كل محب … ابخيرچ يرد اچفوفه
باب الحوايج صرتي * باب الحوايج صرتي
……******……
يمّ الميامين القلب يهواچ يهواچ
حاشى على قلب اليحب يا حرّه ينساچ
من تقبل اشهور الحزن كل عام ننخاچ
كل عشره بمحرم تمر ما ننسى طرواچ
يمّ البنين اويا الحزن سلوانه ويّاچ
شلون ننسى الأربعه وحسين وننساچ

كل لحظه يا أم الاربعه … ننعى السبط والينه
ونذكر بينچ بالدمع … واسمچ جرح ياذينه
باب الحوايج صرتي * باب الحوايج صرتي
……******……
يمّ البنين ابكل سنه نعقد لچ انذور
ونتعنى لطيبه ونجي يم قبرچ انزور
ونّادي ابحسره ودمع عالوجنه منثور
ماجوره بمصاب السبط يا أمّ لبدور
وماجوره بمصاب لجرى في يوم عاشور
وندري ابقلبچ علجرى بحسين مفطور

لمصاب بو اليمّه جرح … خلّه ابدليلچ جمره
وصرتي تنوحين الدهر … لمصاب نجل الزهره
باب الحوايج صرتي * باب الحوايج صرتي
……******……
انتي الوفيّه أمّ الوفه يا أمِ لاطياب
صرتي لمحمد ولعلي ولعترته باب
وللحاجه يا أمّ الوفه صرتي امن لاسباب
لنّچ وفيتي لفاطمه وصرتي امن لاحباب
انتي العزيزه وليشك وبقلبه مرتاب
ما وصّل لفضلچ ولا نحسب له احساب

باب انتي صرتي للوصي … ولفاطمه والعتره
وليقصد لآل النبي … بسمچ يسوّي سفره
باب الحوايج صرتي * باب الحوايج صرتي
……******……
الليله يا فاطم تون الشيعه بحزان
وترفع تعازيها لعلي ولآل عدنان
وكم سفره تعقدها وتهل الدمعه غدران
ولهالمصيبه ابهالمسا ترتجّ الاكوان
بمصابچ انعيد الحرن للمات عطشان
ومنّچ يفاطم نعتذر لو صار نقصان

لمصابچ اتنوح السمه … وتبچي الأرض محزونه
لنّچ وفيتي لفاطمه … وبسم السبط مقرونه
باب الحوايج صرتي * باب الحوايج صرتي
……******……
أبو فاطمة الأحسائي
١٤٤٥/٠٦/١٠هـ