كون الخميس الجاي يمك
وشبگ ضريحك حيل شمك
طال وتتهده بگلبي الفراگ
مشتاگ ازورك وحگ امك
… ..
ماعانني رجليه اجي والگبرك اتعنه
تهيم وتنتفظ روحي واردها امچتفه بونه
يبست ريتي مشتاگ استورح هوه الجنه
كلشي ابدنيتي مگدور بس ازياره اتمنه

اتمنه طير وشايل جناح
وادخل ضريحك ابچي وارتاح
ياحرز روحي وين اضمك
مشتاگ ازورك وحگ امك
…..
اطب المرقدك مشتاگ عاشگ يلگي محبوبه
ياذيني الغرام هواي لاكن ماگلت توبه
الماحبك صدگ بخلاص روحه ابعتبه مطلوبه
يحسين العمر لولاك ظلمه اسنينه محسوبه

انه وخميسك صرنه صحبان
ياخذني يمك وين ماكان
يالبلگلب مطبوع رسمك
مشتاگ ازورك وحگ امك
……
الماعايش خميس وياك شنهي الحلوه بيامه
يامحله اليروح يزور يمك يفتح احزامه
يتلگه الضريح اشباگ يدخل رافع الهامه
يااطيب گلب يحسين ماعايفها خدامه

مو عالجدم ادخلك زحوف
وابچي بضريحك خاطر اشوف
تطشر اگبالي والمك
مشتاگ ازورك وحگ امك
…… .
يمك روحي احسنها رغم مارايح ازياره
وغمض عيني واتخيل اطوف ودمعي يتجاره
الخساره بعد عنك محبتك موش الخساره
البشاره اذا زرتك شسوي بعد ببشاره

مشتاگلك يالساكن اچلاي
عطشان وانته بشوفتك ماي
مارطب الساني الا بسمك
مشتاگ ازورك وحگ امك
…… ..
اعدن واحسب ايامك يسبوع وشطت بيه
من ذاك الخميس الفات گلبي انترس حنيه
اجيلك جيت الممنون مو جيه اعله منيه
بس وفقني لزياره تراهي ايامي مگظيه

شيصبر البهواك مجنون
عميه عليك وتجري العيون
يالعامتني شلون اخدمك
مشتاگ ازورك وحگ امك
…… .
علي الحاج الصبيحاوي

السلام على ام الايمه الطاهرين
السلام على ام الحسن وام الحسين
السلام على ام البواچي والونين
السلام على الصديقه بين العالمين
السلام على بظعة محمد الامين
السلام على حوريه بين الخافقين
السلام على الزهراء ام المؤمنين
السلام على ام النشامه الوارثين
السلام على نور الرساله الصادقين
السلام على ام البراري الموقنين
السلام على نور الكرام الحافظين

السلام على من ظلعها سال الدماء
السلام على المفتاح چان الكربلاء
السلام على من تمشي يتناگط حياء
السلام على ام المصايب والبلاء
السلام على الوياها يحتار الوفاء
السلام على الزهراء بيبان الرجاء
السلام على للعله دكتوره وشفاء

السلام على الماعدها بالدنيا گبر
السلام على البظلوعها زاد الكسر
السلام على الحره الابيه وتنسطر
السلام على الماطول وياها العمر
السلام على الطايح ابنها من العصر
……
علي الحاج الصبييحاوي

نعش ام الحسن جبناه
ياحيدر تلگانه
… ..
جينه بلهفة المفجوع
شيعنه النعش بدموع
اه ياكسرت الموجوع
حال الظيم غطانه
…… ..
جبنالك نعش وايتام
وسنين البچي وعوام
اه ياطبة الظلام
كسروا ظلع بحشانه
… ..
جينه محزمين بهم
خزن والظلع ورم
جنازه ودمع من دم
مصاب الزهره بچانه
……
شيعنه الزچيه اليوم
مهموم وكفل مهموم
خلصت العمر مظلوم
مانصفتك دنيانه
… ..
شدينه اللطم والنوح
ليليه عزيز يروح
مذبوح وشبگ مذبوح
ريتك تلطم ويانه
……
جبنه بالنعش انفاس
الوادم دگت اعله راس
طلعت لزچيه الناس
كلها الليله دفانه
… ..
علي الحاج الصبييحاوي

اعتذر يايمه جاي.. انه محسنكم تعاي
حيل تعبتچ وراي... موبديه
……
تأذيتي هواي يالزهره..بجال الباب والعصره
اخ شتوجع السطره.. ياييمه
مردو حيل دلالچ..عيون الموت تبرالچ
طحتي لوطاح خيالچ.. ياييمه

حملتچ مصايب والاذيه.. يالزهره الزچيه
بين الباب والحايط منيه

ياونه الكلت گلبچ بواچيها
من ظلعچ تصوب
انه اول جنين الدنيا والبيها
بصياره ايتعذب
دفعوا بابچ وانتي دفعتيها
خفتي احوالي تتعب
ياامي الحنينه.. الصاير موبدينه
تحملتي المصايب والرزيه

اه ياونتي

منين اجيبلچ دموع.. وانه ممرود الظلوع
حالنه مثل الشموع.. موبديه
…… .
الميته امه وماترجع.. بكل النوح مايقنع
ياشرياني المگطع.. بالنهايه
شفت الاه بعيوني..تالي وياچ عصروني
مارحموچ ورحموني. بالبدايه

بظلوعچ وجع شمسوي بيه.. عيشني ابرزيه
لطام وادگ بثنين اديه

هد باب الغدر وضلوعي طبگها
كل طبگه بنويه
ابطن امه الجنين وامه يشبگها
خاف من الاذيه
ردت باب الشماته لايعذبها
كون الدفع بيه
بحشاچ واذيتي.. خطتها منيتي
انه وياچ علتنه سويه

اه ياحسرتي
منچ اتعذر اجيت.. خذت روحچ من مشيت
انته تبچين وبچيت.. موبديه
… ..
هموم هواي ماتنعد..ليل نهار تجدد
راح الحيل وتفرهد.. هذا حالي
ردت احميچ ماگدر ..گلبي اعليچ يتوذر
روحي تريد تتعذر. بالتوالي

ييمه اوداعتچ صعبه عليه.. اعيشن هالبليه
انه اول كسر للفاطميه

أيات السلام العينچ اقراها
والسطره الرهيبه
الماعنده بخت ماعرف معناها
حبيب ايكظ حبيبه
العجيبه ما وصل والي ايتعناها
چن زينب غريبه

ياكسر الوديعه.. موقف عالشريعه
يشبه بالحزن ذيچ المسيه
اه يابلوتي
انه ودموع المصاب.. الدم تناثر عالتراب
لاسوالف لاعتاب ..موبديه
…… .
الليل وياچ اذاني..صوت الباب وعاني
عمري النوح بحزاني.. يالحبيبه
كل ماايد تدفعني.. صوت الاخ يوجعني
محد چان يسمعني.. يالمصيبه

زين وماخذو روحچ سبيه.. وجروحچ طريه
يمچ ناصب الليله العزيه

المكسورت خلگ كل ونه تلگاها
مفجوعه وحزينه
المهمومه الليالي اتسولف اوياها
بظيم الله اونينه
وجروح الزمن كلها اتلگاها
خصوصا لو حنينه

والهم حزنها.. فگدت هسه ابنها
بيها شچم جرح يكتب قظيه
اه ياغربتي

اعتذر من كلشي صار.. بابچ الماكلته نار
دارنه الماچنها دار ..موبديه
… ..
شگد جروح بالتالي.. منهن ذاب دلالي
غالي وراح من غالي.. ياخساره
مامش حيل باقيلي.. دمعة حزن لوليلي
اخر نفس خليلي.. ونتباره

ودعتچ وانه عيوني جريه.. يم باب الثنيه
شبت وانطفت نار الحميه

وحگ دمعت عيونچ گلبي يتوذر
من هول المصيبه
ظلعين انتي وانه ظلوعي تتكسر
عمري حد نصيبه
بياحجه اجيت وبيمن اتعذر
گولي منين اجيبه

فاديچ ابحياتي.. يسلوت امنياتي
صرتيلي درع حامي عليه

اه يامحنتي
اتنفسچ واشتم عذاب.. ثنينه عشنه ابحجاب
رحتي بعمر الشباب..موبديه
……
علي الحاج الصبيحاوي

مرت عليه سنه بس ما نسيتك بيها
ومتاني جيت سنه وبخدمتك اگظيها
موحلوه مرت علي بس حبك امحليها
يحسين لاخر نفس عشرتك ماناسيها
…… .
كل عام خادم الك روحي الك منذوره
صورة خدمتي فخر وانته امير الصوره
موحايط الشايلك نص گلبي هالمحفوره
توالمنه ريه ونفس كلمن يعيش بدوره
سنتك ولاتنحسب تركض ركض معذوره
…… .
مرت عليه سنه وانه ابسجل خدامك
يحسين عشت السنه وياك اعيش الامك
موعام الي منحسب هذا نحسبه عامك
يحسين ايامي اصبحت كلها فده لايامك
……
السنه المابيها الك فشله اذا محسوبه
عاشگ هويتك من زغر ماگلت يوم التوبه
مطلوب روحي ومنيتي ونته الگلب مطلوبه
يحسين اطب الحضرتك عاشگ واجه المحبوبه
……
علي الحاج الصبييحاوي

ختمت عزائچ بدموع.. يالزهره انتي الموضوع
بتلث روايات.. بتلث روايات
……
شويه بس اتلاثه كون اتلاثين
والنعمه بيها ابمجلسچ وتحضرين
بياحاله بيهن يم حسن من تبچين
انتي المعزه مدري انتي اتعزين
صوت اللطم طگ ضلوع.. يالزهره انتي الموضوع
بتلث روايات
… ..
تستاهلين بكل كتر مجلس كون
وبكل شبر موكب عزاء اينصبون
انتي المصيبه البچت اعليها الكون
مودمع نبچي الخاطرچ كون عيون
ناعي المصايب مفجوع.. يالزهره انتي الموضوع
بتلث روايات
……
يم المصايب والمحن والالام
حگ الله هذا ويرضه بيه الاسلام
تبقه عزيتچ عام والحد العام
حتى الليالي الخاطرچ عيب تنام
جرح المأتم موجوع.. يالزهره انتي الموضوع
بتلث روايات
…… .
مو حقچ اتلاثه روايات النوح
طفچ چبير وبيها محسن مذبوح
حرگ المخيم اشوه من حرگ الروح
گلبچ لون ضلعچ يزهره المجروح
ون اليتامه مسموع.. يالزهره انتي الموضوع
بتلث روايات
…… .
ماضن چثيره اعليچ نتحمل هم
كون السواد اعله الخلگ يتعمم
اسكثروها اعليچ ننصب مأتم
ونتي الزچيه الكون نبچيها ابدم
گلب الموالي مشلوع.. يالزهره انتي الموضوع
بتلث روايات
……
علي الحاج الصبييحاوي

حتى الفاتحه الموالچ أقراها
احس بهل السمه محد تلگاها
يم الكرامات.. يم الكرامات
…….
فاتحتي اذا مو الچ انويها
احس ام الحسن ماراضيه اعليها
تزعل فاطمه وشلون اراضيها
بسم ام البنين الليله انخاها
……
بسمچ لو قريت الفاتحه كلها
اكبر مشكله هالفاتحه اتحلها
حته فاطمه من اقره تقبلها
منزلتچ چبيره الله خلاها
……
اقراها وتروح البابچ اعنايه
وتسلم عالوفيه الليله عزايه
ياام البنين وشايل الرايه
طلبه امعجله البابچ رفعناها
……
مابيها طعم هالفاتحه چنها
بارد محتواها الليله احسنها
اذا بسمچ احصل فايده منها
ويوصل للعزيز الباري فحواها
…… .
فاتحة الفواتح الچ سوينه
وعليچ ابهالمصاب احنه تعنينه
ياأم البنين ارجوچ احضرينه
ابختچ يالوفيه الليله قمناها
… ..
علي الحاج الصبيحاوي

ياسجان فك باب السجن گوم
عدك بالسجن محبوس مظلوم
……
ياسجان فك السلسله ابساع
ليش الكاظم اموسد على الگاع
هذا ابن السبع وشبوله السباع
نايم بالطميره الوحده مهموم
……
ياسجان بلله ابهيده وياه
الكاظم بالسجن متوسط اعداه
خل الشيعه كلها تصيح ويلاه
جرح السلسله البرجله ملچوم
……
ابهيده وي الامام وعينك اعليه
افتحهن سلاسلكم تأذيه
عليمن شبگتها ثنين رجليه
طايح عالترب مايگدر ايگوم
…….
عليش امچتفات الكاظم گيود
ماحضروا عمامه واهله الحيود
مريود الصبر بالمحنه مريود
ياصبر الامام امتاني السموم
…… ..
ياسجان ليش امچتفه اچتاف
وبسجنه الشمس مالحضه تنشاف
هذا ابن النشامه واهله الاشراف
من شوفة هله كل عمره محروم
…… .
ياسجان طول بالسجن حيل
مايعرف نهاره من يجي الليل
تعبان الامام وراكد الحيل
ياحيل الامام ابسجنه مهدوم
……
علي الحاج الصبييحاوي

نعي
….
تارس ترس وجهك خيالي
بغيرك فلامشغول بالي
يالمادريت شلونه حالي
سهران ما نام الليالي
شينومه المفارگله غالي
بفراگك امصوب وعالي
… ..
راسي الچان ما ينزل وعالي
انه خلافك تره امدد وعالي
خبر موتك الف لچمه وعالي
وچثيره جروح گام اتعيل بيه
……
علي الحاج الصبييحاوي

الليله انولد الهاشم ولد ضاوي المهد مهدينه يامهدي
…… .
هليله ايات الفرح فوگ المأذن تعتلي
وبأيده باچر كل ارض قسطاً وعدلاً تمتلي
مهدينه نور عالبشر يوم الولاده ابمحفلي
واضح مثل وجه الشمس والضلمه رايح تنجلي
هل الفرح. گلبي انشرح.نورك وضح. مهدينه يامهدي
…… .
ميلادك الخير الذي يترسنه حب وعاطفه
انته الوليد البشروا بقدومه ال المصطفى
انته الامام المنتضر الله بمراتب شرفه
يوم السعاده والفرح مانگدر احنه انوصفه
نورك ضهر. فوگ البشر. حبك فخر. مهدينه يامهدي
…… .
فوگ المناير ترتفع صورة محبتك واضحه
نرسل تهاني الجيتك رغم العيون الشابحه
عين التشوفك يابدر بنور الامامه مصابحه
ليلة مسره المقدمك والشيعه باچر رابحه
انته الامل.بسمك نزل. خير العمل. مهدينه يامهدي
…….
ياضاوي بعد المصطفى وبعد النشامه عترته
طلعت گمر وسط السمه ماتوصل ابگد طلعته
بدر التمام ابشوفته حير عيون الشافته
چنه شبه طه النبي خاله ومحاسن وجنته
يشبه ولي. نوره جلي. چنه علي. مهدينه يامهدي
…… .
ليلة سعاده والهنا يوم الولاده الزاهره
واتعنت املاك السمه كلها الابوك اتبشره
بعدك ولاطلگت نسه مثلك ولاجابت مره
يااخر اقطاب الارض ياجوهره من جوهره
وسط السمه نور ارتمه يم فاطمه مهدينه يامهدي
…… .
علي الحاج الصبيحاوي

چم اخ الصحت يحسين
بس الخيل ماتسمع
شمأذيك من عدهن
الحافر لو حرم تطلع
اخ وأخ حد الموت
بس الاخ ماتنفع
… ..
چم اخ الصحت والموت
غطه الدنيا والبيها
اختك عالتراب اتنام
هيچ الوكت تاليها
لاانته ولاعباس
چاياهو اليحاميها
…… .
يحسين الشمر بالسوط
من بعدك تولاني
اگابل راسك المگطوع
يمه ونكت احزاني
هم شفت الزمان شلون
عگبك وين وداني
… .
وحدي بلاخيم يحسين
لاخوان تحميني
اصيح ولاوصل فزاع
بيده ايشد صواويني
حسبالي من اجيت وياك
من ارجع توديني
…
علي الحاج الصبييحاوي

تگول زينب
……
والشايلينه والشايلينه ومنين هذا الشايلينه
يشبه ولينه يشبه ولينه لو ماصفار البيه يشبه ولينه
والطابرينه والطابرينه ماعانته الرجلين والطابرينه
بس لاعلينه بس لاعلينه هذا التشيله الناس بس لاعلينه

بويه مصيبتك بلوه
ياشمامتي الحلوه
كلنه نروحلك فدوه
بغيرك كلشي مانسوه
انته الگلب والچلوه

ابوي المنخطف لونه
بهيده يالتشيلونه
خافنكم تلچمونه
محد گالي اشلونه
گوه ايفتح اعيونه

علي يابويه حاچينه
نموت وياك تدرينه
لا تمشي وتخلينه
فرگتك حيل تاذينه
الحزن فارش دواوينه
ومصاب الكون غاطينه

يبويه الطبره چتاله
عليك اعيوني هماله

الابوذيه
……
بچيت ادموم لفراگك وهمليت
وطلع كل ليت ماتنفع وهم ليت
يبويه الموت اشوالي وهم ليت
اموت وياك ياحامي الحميه
…… .
علي الحاج الصبيحاوي

رباطات
……
وي فرض الصبح رادوا يفجعونه
حيدركم فطر ماتمم اصيامه
البيرغ والعراضه اليوم مريوده
شيبة حيدره ابدمه يخضبوها
شيال الشدد ردوا يشيلونه
يازينب يتيمه ابطبرت الهامه
الماگدروا عليه غدره يطبرونه
يعرفها منيته ابحلت احزامه
بالعركه المراجل موش غداره
گوه القلع خيبر ينگل اجدامه
لو سيفه ابيمينه ماتلاگونه
حزنانه اليتامه من يواسيها
زينب هالمسيه شلون حالتها
زينب عالمصيبه اتريد عوانه
رايح والوديعه المن تخليها
اليتمنه عساه اميتمه اعياله
شنگل لليتامه العيد لافينه
بعدك هاليتامه وين ملفاها
يانكسة عشيره وطاح بيرغها
هليله اليتامه شلون تگظيها
…… .
علي الحاج الصبيحاوي
.......

ابوذيات
……
يليل شضاملي شعدك علي مات (علامات)
ونه ليالي الحزن بيه علي مات (عليمات بحالي)
اليتامه شعدها ملتمه علي مات
بعد راح اليجيكم كل مسيه
… ..
علي الحاج الصبيحاوي

يا عيد لاتجبل علينه
المن جاينه وميت ولينه
ماعدنه فرح شسوي بينه
بعدها گلوبنه موجره وحزينه

ياعيد راح الابو الغالي
حال المصايب صار حالي
بجاله عشت عزي ودلالي
ميت دفنته الغالي تالي

المن تجينه وشنهي عدنه
على صوت النوايب من گعدنه
ويه الفرح بس هذا حدنه
واحد على الاخر بعدنه

كون الگبر بيه باب ليفوگ
ومعشوگ كون يشوف معشوگ
گلب العدل والمات ممزوگ
گطعت بويه ابگلبي العروگ

المن بعد تلفينه الاعياد
واهل المحنه كلش ابعاد
ليغاد عيد اشتمر ليغاد
راحوا اهلنه والحزن زاد

يا عيد رد وبالسلامه
لاتوصل الباب اليتامه
……
علي الحاج الصبييحاوي

نعي
…… .
ها يهل الگبور ها يهل الگبور اشتاگين الكم حيل ها يهل الگبور
والگلبه مكسور والگلبه مكسور لنجف يمشي هناك والگلب مكسور
يادمعي معذور يادمعي معذور لمن ترست الگاع يادمعي معذور
مااشعل ابخور مااشعل ابخور دخن دليلي اعليك مااشعل ابخور
بترابه وصخور بترابه وصخور ناموا احباب الروح بترابه وصخور
رفسات الطيور رفسات الطيور يرفس تره المشتاگ رفسات الطيور

بالمگبره اينام بالمگبره اينام الماخذ دليلي اوياه بالمگبره اينام
موحلوه الايام موحلوه الايام يوم الرحت لليوم مو حلوه الايام
كومني اكوام كومني اكوام فراگ الشرك بالروح كومني اكوام
بس جلده وعضام بس جلده وعضام هذا انه حالي اعليك بس جلده وعضام
والگلبه محتام والگلبه محتام شيسوي تالي الليل والگلبه محتام
چنها بالف عام چنها بالف عام ليله احسب ابفرگاك چنها بالف عام
… ..
علي الحاج الصبيحاوي
.......

الليله الصادق الشيعه يودعونه
بتراب الگبر راحوا يدفنونه
……
يحفار الگبر لصادق اتهده
ولو ماي وبعد علغبره وتبده
خل تحضر عليه وتودعه ولده
مسموم الامام وغمض اعيونه
……
ياشيال نعشه ابراضه وبراضه
المدارس عطلت والشيعه مغتاضه
رايح للگبر لو رايح افراضه
نورك هذا ماگدروا يطفونه
……
يالماخذ عزيز وگاصد الغبره
على الصادق تنوح وتنحب الزهره
احفر بالوطيه وسع ابگبره
خافن بالگبر اهله يزورونه
… .
بالسم وانگضت ايامه وسنينه
ميت ياحسافه وغمضت عينه
حال الموت بين الشيعه مابينه
الصادق مرتحل ماظن يشوفونه
… .
الليله اعله الچتاف اتودعه انصاره
بهموم المصيبه ودمعه تجاره
الصادق عذبوه وحرگوا دياره
مثل باب الزچيه من يحرگونه
……
مثل يوم الحسين وحرگت اخيامه
هجت بالبراري تركض ايتامه
نفس النار ردت كلها گدامه
بني العباس ماظنهم يرحمونه
……
علي الحاج الصبيحاوي

نعي للصادق
… ..
من حرگوا الدار من حرگوا الدار تذكرت طف حسين من حرگوا الدار
تتراكض ازغار تتراكض ازغار وسط الخيم والبيت تتراكض ازغار
ياعملة الصار ياعملة الصار مو بالذبح مسموم ياعملة الصار
يالصادق النار يالصادق النار وجت ابنص البيت يالصادق النار


يومك مثل يوم الزچيه
وجددت نار الغاظريه
عيالك غريب بهالمسيه
من داسوا الگوم الثنيه
ماچانت وياهن رقيه
يتراكظن چنهن سويه

ابوذيه غده راك
…… .
ذبل عودي على مصابك غده راك
وچذب مانشفوا بحره غده راك
الخليفه ابسمه يالصادق غده راك
وعليك اليوم تنعه الجعفريه
… ..
علي الحاج الصبيحاوي

ليش اعله الترب مطروح مولانه
الطلقه الطگتك طگتنه بحشانه
…… ..
ليش الصايه ذيچ الحلوه مزروفه
وجروح الرصاص الخيط ميروفه
چم صرخة يتيم الليله بالكوفه
طايح يا علي ريس الحنانه
………
ليش الشيب الابيض منصبغ لونه
وحسين الجديد امغمض عيونه
ياكسرت گلب كل اليحبونه
لوعدنه بخت چاباقي ويانه
…… .
ليش امتلفات اهدومك الحلوه
تره الدنيا ابغيابك كلشي ماتسوه
ما ترجع علينه انروحلك فدوه
ضلت شيعتك بجفاك حزنانه
…… .
رايح والعيون اخلافك امدمعه
طولت الغياب وطالت الرجعه
ليليه اعله مودك اعلگ ابشمعه
چايمته ترد موطال فرگانه
…… .
هم هايه قدر عالناس مكتوبه
محبوب ويشوف انذبح محبوبه
بعدك ياصدر دنيانه مگلوبه
عاشورك چبير وظيمه غطانه
……
شبسرعه السنين اوياك مذبوحه
والحبك يصبر گوه بجروحه
يااخر عثگ وچفوفي متلوحه
يمته ينكتب باللوح ملگانه
…..
علي الحاج الصبيحاوي

يا روحي حيري ابچادرچ
مات الصدر هليله
… ..
ويلاه دگوا الغيبته مات الصدر هليله
يشبه احسين ابطيحته مات الصدر هليله
ضلت يتيمه جمعته مات الصدر هليله
يا عيني دم ابچيله
… ..
بالكوفه صلبوا جامعه. مات الصدر هليله
والنجف ذبحوا مرجعه. مات الصدر هليله
بالناس صارت فاجعه مات الصدر هليله
وبالصدر طاحت چيله
…… .
وين اليواسي قائده. مات الصدر هليله
ويعزي ابنه ابوالده . مات الصدر هليله
الله يعينك مقتدى. . مات الصدر هليله
ياجرح راح اتشيله
……
الله يعينك عالجره مات الصدر هليله
ونيران فگده اموجره مات الصدر هليله
روحك يتيمه امرمره. مات الصدر هليله
و الحيل طايح حيله
…… ..
البگه براس العايله. مات الصدر هليله
بالنجف صارت كربله مات الصدر هليله
هليله ليله مؤلمه. مات الصدر هليله
ويزيد حشم خيله
..…
هليله مفجوعه السمه. مات الصدر هليله
وتنوح ضلت فاطمه. مات الصدر هليله
مريم اجته امحزمه. مات الصدر هليله
تنحبله وتشكيله
… . .
علي الحاج الصبيحاوي