قصيدة للإمام الحسن المجتبى عليه السلام

السيد علي الموسوي الكربلائي
..............................

ابعث سلامي للحسن امامي
......
صوت المحب من عن بعد ينادي
للحسن ارسل دمعتي اودادي
يا يوم أزوره وأخذه لمرادي

واوصل مرامي للحسن امامي
.....
جنه عدن جن أشعر بحضرتك
ينزال همي حين اشم تربتك
كحلت عيني سيدي بنضرتك

حبي وهيامي للحسن امامي
.....
يا جرح أعظم من جرح غيابك
اتمنه اوكف سيدي عله بابك
وانعي عله فكدك ولحزن مصابك

دلالي ضامي للحسن امامي
......
كل شيعتك تترقب الزياره
جم گلب مكسور وتلاهب ناره
يمته نشوف الگبه والمناره

والنضر دامي للحسن امامي
..........
الدنيا عشتهابضلم وبمماتك
وبسم اعادي تنختم حياتك
ومنعو دفتك سيدي جزاتك

وين المحامي للحسن امامي
..........
ننعاك يبن الطاهره الزجيه
وبكل گلب منصوب الك عزيه
چبدك تكطع وحملت اذيه

واضح كلامي للحسن امامي
..........
حلم العمر نتعنه بالمواكب
ننصب عزاك وننعه عالمصايب
يا ساعه تظهر سيدي يغاب

يبقه اعتصامي للحسن امامي
......

السيد علي الموسوي الكربلائي

السيد علي الموسوي الكربلائي



وصه الحسن وصيته لمن دنت منيته
و بساعه الرحيل دمع الحزن يسيل
.....
وداع الاحباب ما ينحمل طول الزمن
يفتح ابواب للهضم وانواع المحن
يهدم الحيل وهموم الآمه بدن
وبيت الأطهار ينحب على وداع الحسن

دار الوحي بوحشته علحسن هل دمعته
ضل جرحه بالدليل دمع الحزن يسيل
.....
المجتبى ينوح وحال الحسين يألمه
يكله خويه اعذريني يا بن فاطمه
ياهو يمك لمن يصب جسمك دمه
ومن يحضرك وضلوعك المتهشمه

بعيني انضرت محنتك وسهم المرد جبدتك
والحسره ما تزيل دمع الحزن يسيل
......
يجر حسره والدمع من عينه يكتب
شاف زينب يوصيها صبري لو رحت
بيش اوصيج بيا جبد والله اتحيرت
وطشتي هين ايراوج أشد من هلطشت

رأس الإخو ينضرج محتاره والله بامرج
وموادع الخليل دمع الحزن يسيل
......
فكد الاحباب مو سهل محد يحمله
وناده عباس ياخويه يابو المرجله
ادري وفاي ومتقصر ويه العايله
بس وصيتي زينب تضل مدلله

والرايه تحله بيدك سد خلتي لعضيدك
وخلي الأرض تميل دمع الحزن يسيل
......
آخر وداع وي جاسم ابنه أو وردته
رفعة الرأس يا شبه أبويه وغيره
من ذخرتك لحسين يبني ونصرته
افزع افزع لو شفته وحده بغربته

يا ضنوتي واريدك متعز دمه وريدك
والعمرك القليل دمع الحزن يسيل
......
بعد اوصيك يبني يقطعه من الجبد
نضر عيني ياروحي يا عطر الورد
طلبه عندي توكف يبويه ويه الحشد
وتفدي الأرواح شبان متلين وترد

بسمك اريد احلفك مد للنشامه جفك
وللذله مستحيل دمع الحزن يسيل
......


السيد علي الموسوي الكربلائي

السيد علي الموسوي الكربلائي



حسين اول كلمه يحجيها لساني
حسين بس هوه الاشوفه وماله ثاني
لتضن انساك للموت وياك
..........
حسين مو قصه وروايه حسين واقع ما تغير
ولا كدر تاريخ يمحي سيرته ودومه يتنور
وما حصل واحد مثاله نقذ دينه بدمه المنحر
سبحان بارينه الجعل انواره من يوم الأزل
ولولاه لا دين إكتمل رحمه للامه تصدر
گبره يزهي و گبته ونور المنارات
اطوف حوله أهل السمه وكل المجرات
ونزلت الأملاك للموت وياك
.....
لاتلوموني بمحبته ولو تجنن بيه فكري
سلمتله العمر كله وبيده صار زمام امري
ما يهمني الموت لجله ونذرت لترابه عمري
مسدوده بيبان الگلب بس هوه ما غیره أحب
ما ازل عنه وانسحب لو تجور أيام دهري
سر محبته واجبه عليه واخدمه
شرف عندي لو اصير تراب جدمه
تايه لولاك للموت وياك
.....
حسين مو بس للشيعه صار ومو دليل انطي ادله
بأربعين البوذي يحضر وجم مسيحي الي وصله
انخلق للاكوان كلها وما ربح كلمن يجهله
جم اعمه رد ليه البصر ومشلول ينهض علاثر
والسائل بدمعه حضر تنكضي لو يمه صله
حير عقول الخليقة بمعجزاته
ضامي ويروينه بحره ومكرماته
نقسم بدماك للموت وياك
.....
قسم نقسم بالزجيه ما نزل عن الحسين
ولو على فراش المنيه نحيي يوم الأربعين
ولو يذبحونه عله حبه نبقى نصبر ما نلين
جم عابس بحبه انوجد وخل الموت وبعد
يتكاثر بحبه العدد وما تغيرنه السنين
من قبل لليوم جم حاقد اجانه
وداعش العار بعزم نكطع لسانه
بالدم نفداك
.....
شنهو داعش ما يهمنه ونعتني لأرض المنيه
للحشد راحت شباب ورجع يوم الغاضريه
علي الاكبر ويه جاسم وي شباب الرافضيه
والشيعه كلها محزمه أبطال ما عزو دمه
يعراق اسمك بلسمه وينمحون الداعشيه
بأجر يعود الوطن وتعود ناسه
براية العباس يبقه عالي رأسه
نعاهد نرعاك
......


السيد علي الموسوي الكربلائي

بحر طويل كربلائي

السيد علي الموسوي الكربلائي

بلاد الرافدين الجان حاكم ضالم اعليها
راح وصحنه يا الله هلامه دصفيها
......
بوكت صدام عشنه بضيم طاغي بسلطته وجاها
بلاد الخير والأحرار خلف الشمس وداها
اعدام وإبادة ناس جم أم الي بجاها

بسجون وطواميره ما يمتلك كل غيره
بس الموت تطويره
ما قدم ولا آخر بس حروب گاضيها
.....
راح وكلنه عم الخير وكل هم بزمانه راح
وفرحان الشعب وأعياد حين الصنم لمن طاح
توقعنه التغير صار وتضمدت كل جراح
بعده دخلت الأحزاب كلنه انفتحت الأبواب
للخير واجت الاحباب
وعبرنه الصعاب وضيم والوحده نتانيها
......
رحل صدام الف صدام اجانه وخربت الأوضاع
بي الخيير وفاسد حق الشعب راح وضاع
ما نعرف منو الضدنه ومنو الويانه كلها سباع
صار البوك بالجمله من خيراتنه محمله
وهذا البينه يتسله
أمنه وصدك من كال حاميها حراميها
.....
بسم الدين والإسلام نهبونه ويجذبونه
اكلو كل عنبنه انذال وبس السله ينطونه
هذا الناوي عالتقسيم والله بحيره خلونه
غشونه بلحاياهم بس بلشاشه تلكهم
لو وعدو شمحلاهم
كافي والله ملينه ننطر احنه تاليها
......
عينك عينك يبوكون محد يكدر يردهم
بحصانتهم طغو طغيان بس الله اليحاسبهم
وشعب الضل يعاني الجوع وأمر الشعب ميهمهم
واحدهم قبل اجرب هسه بالدول يلعب
ورأس الوطن مو شيب
أملاك بدول عنده باسم أهله يسميها
.....
انوب البرلمان الصار مئات الما وفو بوعود
رواتبهم بلا انصاف ومصارفهم بلايه حدود
شنهو القدمو النه جذبهم ماله كل حدود
ما عرفو بخت هلكاع جم حك بحلكهم ضاع
بحمايتهم نفخ وسباع
والله بساعه الشده بغير بلاد تلكيها
.....


السيد علي الموسوي الكربلائي

السيد علي الموسوي الكربلائي


يا كافلي يا خويه يا خويه
أحضر الي يا خويه يا خويه
........
استقبلت موتي وشار الي بجفه واقترب مني
ومن اجاني الموت لحالتي يبجي وگتله خلصني
دنيتي شتسوه
التاخذ الخوه
الدنيا اذتني
ما ضل ولي يا خويه يا خويه
.....
شگد دمع صبيت شگد عشت بالهم والزمن ضدي
آشفت من عمري بس أودع أحباب ولا أهل عندي
بت علي عجبه
ابقه بالغربه
صابره وحدي
غيرة علي يا خويه يا خويه
.....
بأخر أيامي حلمي اتمنه اخوتي يمي
ريت اودعهم ويمي انضرهم وينجلي همي
يالكفلتوني
ما تشوفوني
بعيني ضل حلمي
اندب هلي يا خويه يا خويه
.....
حسين يبن امي اتعنه هليله خويه انتضرك
يمك احملني بنعشي وادفني كون يم كبرك
لا تخليني
دمعتي بعيني
مو سهل هجرك
رد محملي يا خويه يا خويه
.....
ها يبو الغيره يا بو فاضل كوم خويه شيعني
بين أبو اليمه وبينك وصيتي بجفك ادفني
خويه رد شوفك
ورجع جفوفك
ولا تفاركني
دمعي يهلي يا خويه يا خويه
.....

السيد علي الموسوي الكربلائي

السيد علي الموسوي الكربلائي


عظم الله اجر أُم الشباب
...........
ياشباب اليله ويه ليله عزانه
ونذكر شجم غالي ضل خالي مكانه

يصبرج بارينه
عالولد وسنينه
ومثلج اتأذينه
وللمشو حنينه
.....
يعينج الله لفگده جن ورده توذر
ما نسيني رسومه وبدموه تعفر

اوالده من جابه
لخيمتج بخضابه
صحتي من صوابه
يا علي ومصابه
.....
بهلوكت شوفينه تعذرينه الالمنه
جم علي شيعنه اودعنا بدمعنه

الحنه من دماهم
وللكبر شلناهم
بفرح زفيناهم
والله ما ننساهم
.....
أي وحق دم ابنج يالمنج صبرنه
بكل شبر دم يجري وما ندري بدهرنا

يا وسف ندفنهم
ما شبعنه منهم
بكل وكت نذكرهم
وكل أمل ما منهم
.....
الفاجده معذوره ومكسوره بحزنها
تنتضر بس صوته بتابتوته حظنها

لشوفته تتحسر
مثل ام الأكبر
تنفجع بالمنضر
تشوفه دامي مطبر
.....
بالصواني الحنه وتتعنا لضناها
تهلهل بحسرتها ودمعتها وبجاها

اطش ورد بيديها
وشمعتا تضويها
وقصتا ترويها
عليه اون تاليها
.....
ذوله ولد الأكبر من يكدر يردهم
ذوله أهل النخوه وبالفتوه عزمهم

والحشد نعرفهم
الغيره تجري بدمهم
والنعم من عدهم
شحده اليواجهم
.....

السيد علي الموسوي الكربلائي

قصيدة گعده
السيد علي الموسوي الكربلائي


بالله امهلني أقل من ساعه يا ليل
أرد اسيير بوحشتي صوب المجاتيل
بلكي منهم صوت اسمعه
واشكي حالي ويمهم انعه
............
شلون حاله البيها طلعت زينب ومحني ضهرها
بليلة الوحشه وغريبه وشلعب بيها دهرها
بلا ولي محتاره ضلت وعلنهر غايب گمرها
تتعثر بلايه فكر
وگلب العقيله منكسر
ماخله شي الها الشمر
وتندعي يخلص عمرها
ها يليلي مروتك لا تخلص بساع
أرد اسولف لخوتي شما بيه أوجاع
صحت لاجن ماكو فزعه
.....
خوفي لا اعثر بأخوتي امشي خطوه خطوه وانحب
بلا فكر امشي واعاين جم عزيز بدم تخظب
وين اروح بهذا حالي والمصاب الجان أصعب
بلا خيمة خليت الحرم
ومراد ضل من الخيم
وجم طفل نادني بألم
عمه ضامي وگلبي يلهب
التفگد اخوتها تضل تبحث عن معين
واني مابين الجثث اصرخ يالحسين
ادري بيه يسمعني طبعه
.....
هانت مصايب زماني من شفت شوفه دهتني
حسين اخويه وبعد شحجي ونضرة جروحه عمني
وشفت المثل بجده وشاهدت نحره وفجعني
وعلى الاخو حين الطحت
وعضامه مهشومه وصحت
ياخويه تسمعني ردت
حالتك خويه دهتني
جفوفه تسعه وخنصره ضليت ادوره
رأسه مگطوع واقبله بعظم نحره
حسين اخويه شلون اجمعه
.....
وعيني عالشبان راحت وانضرتهم عالوطيه
علي الأكبر ها يعمه عليك يا روحي شبديه
طايح مطبر يويلي دمومه عالغبره جريه
وانضرت جاسم عالثره
عريس جثته موذره
وأمه غريبه وحايره
وزفته صوب المنيه
والله ما أكدر بعد احمل مصايب
من شفت شبان تزهي عله الترايب
ويمهم أرد أشعل الشمعه
.....
وبعد عندي عله الشريعه جثته بدر العشيره
ادري بيه لو شاف حالي يگوم اخويه وكله غيره
لاجن بيا حال ينهض لاجفوف ولا بصيره
يا خوي بعدك منهو الي
تدريني بعدك انولي
انهض يخويه وكافلي
ترضى يسبوني واسيره
فدوه اروح لشوفتك يبن أم البنين
خويه تنتضرك سكينه بالصواوين
ايست ما بيك رجعه
.......
السيد علي الموسوي الكربلائي

: قصيده إلى مولاتي فاطمه العليله


علگ شديته بيدك
ترد سالم اريدك
دعائي بحق عضيدك
وبحنيني
نخيت الله ونخيتك
تجي و تضوي بيتك
و تشاهدني يريتك
بس تجيني
............
يا حنان الكون وجهك
دللتني بطول السنين
ارجع
علمتني بحظنك اغفه
وتركت بغيابك العين
تدمع
ختمت جم ختمه عله ختمه
والنواعي ابيتي كل حين
اسمع
عمري كله ما عفتني
كون اندل دربك منين
و اطلع

فلا اترك دعائي
الأرض تبجي وسمائي
بسلامه ترد رجائي
تضوي عيني 1
............
الطفله لو شافت أبوها
تأمن وضحكتها تغريد
تحله
وتركض تشبگه وتقبله
والمحبه تزيد وتزيد
لجله
وأنه احسد كل صغيره
ويه أبوها و ايد بالايد
والله
تدمع العين و أفكر
يمته يرجع والدي بعيد
رحله
الدمع غرگلي الحجاب
احاجي بونتي الباب
يبويه طال الغياب
ضل انيني 2
.............
عاشرت ليل الثكاله
والكمر ينعالي و نجوم
ليلي
والشمع بالعتبه أشعل
وكتبت عالباب مهدوم
حيلي
ويلي مشتاقه لنضرته
وكلمتي من اكعد و إذا اكوم
ويلي
المرض هين من رحيلك
عيني صبي المدمع دموم
سيلي
و إذا غمضت العيون
بحلم بلكت يمرون
الصبح يمكن يعودون
يخف ونيني 3
................

بويه ياما وياما كتلك
وياك خل امشي و الاخوان
حلمي
بعله تتركها طفلتك
وبيتك مخيم من أحزان
هضمي
بيه وردات الطفوله
ذبلت و مكسوره الأغصان
همي
لو شفتني تجري عينك
وبعدك نسيت من الزمان
اسمي
الي الله برحيلك
حلم اندل و اجيلك
يغالي و اشتكيلك
عن سنيني 4
.................
حيل ما بيه من أصلي
كاعده وجن عمري ألفين
عمري
بويه ما تعرفني والله
شعملت بايامي السنين
دهري
لو ردت شاهد الحالي
بمحنتي هاي أم البنين
تدري
العله سهله بس غيابك
من وراه محنيه كل حين
ضهري
سبحتي من عبرتي
أشد غربه غربتي
الدعا صار بدمعتي
بلا اديني 5
............
لحضه لحضه انتضركم
وعالدرب مشبوحه الانضار
هضمه
خدي يحرگ من دموعي
والسفر لو طال احتار
و اعمه
لعطر عبد الله احنن
ولسوالف عمتي تذكار
عمه
وين شمل أهلي و عمامي
خاليه و ما احجي بالدار
كلمه
نسيت الضحكه بالروح
تروح و ترجع الروح
اليسلي حالي بس نوح
معذبيني 6

الشاعر سيد علي الموسوي الكربلائي

قصيده إلى مولاتي أم البنين عليها
السلام

: مس عيني الشوگ لعينك واتصور گدامي
جم يوم احسب لرجوعك وتحقق أحلامي
و أنه بكل مسيه سبيه سبيه
يمته نحن عليه المنيه المنيه


يا أجمل اسم بالروح
يا عمري وعطر وردي
نطيتك أربع أولادي
اغلى و أعز ما عندي
حلم عيني الي ترجع
داري موحشه اوحدي
ترد روحي لون رديت
فدوه لو الف ولدي

يحسين غيابك يصعب صرت اترقب موتي
ا يبني صارت عندي تسبيح
بكل صوتي
ادعي بكل صلاتي بأديه بأديه 1

يقران الفجر وجهك
لساني يرتل بأسمك
تمنيت امشي وي ضعنك
و اخفف نسبه من همك
انه بلياك مفجوعه
ييمه ومدمعي يكلمك
والله لو تضل يمي
گلبي بكل وفه بضمك
سامحني خاف مقصره وبحقك ما أوفي
تفداك الروح و كلشي وكل عمري وي شوفي
وديار الهواشم خليه خليه 2

الجرح يتكاثر بهجرك
صعب و الأصعب الفرگه
يبو الأكبر صبح عيدي
وياك بساعة الملكه
الحزن من بعدك بدمي
الهضم شاركني بالشهگه
لون تشوف حالي شلون
غير الونه ما تلكه
شلون أصبر وأنه بروحي أتذكر أيامك
ما نامت عيني وغمضت بس ساعة أحلامك
مو هين غيابك عليه عليه 3

ييمه شگد ترجيتك
أخذني ويه الضعن وياك
اباريك بوسط روحي
وصيرا في الك بسماك
و إذا تضمه اقدملك
عذب من عيني طفي حشاك
وكون بأمرك و اطلب
كلشي تامر و ارجاك
يحسن بضعنك يبني وي زينب خليني
شگد جانت هاي أمنيتي والزهره اتجازيني
وبالمحشر اشوف الزجيه الزجيه 4

من ابعيد اشم عطرك
و احن و اتلهف لشخصك
شيطيب خاطري و أصبر
كل عمري فده لعمرك
ضلمه الدنيا من دونك
اختفه من السمه بدرك
الموت اعتبره فرحة عيد
ولا احمل قهر هجرك
يا ريت بوسط خيامك موجوده و احجيلك
يا كعبة صبري و حزني و بروحي اسعيلك
وياك بحياتي وفيه وفيه 5

اطش درب المشيت عليه
ريحان آورد لو جيت
و افرح يبني بوجودك
وترد الروحاني لو رديت
اتمنه انه بولدي
وياك بكربلا وفيت
كل شي لو اسويلك
أحسن كلشي ما سويت
يا نبضة گلبي و دمي يا أجمل احساسي
للموت وأبقى انتضرك ما شيلك من راسي
لدرب الغاظريه ربيه ربيه 6

الشاعر سيد علي الموسوي الكربلائي

جنت أتمنى أعيد سنيني
واصد بمسار الزجيه بعيني


ها يروحي شكد ردت منج ترجعين
بيه يوم الباب ترجع كون السنين
شكد صبر بيه عله قصة نار وحنين
واعتقد لو حاظر اگلبها الموازين
اني عندي المرجله سجلت عنواين
والله أجيب العلگمي وافتح ميادين

وداعة گماطي وزنودي وسيفي
اله اختار الرگب وبكيفي 1


نفترض عاد الزمن وندفعت الباب
يعني للحاقد الي ما يحسب حساب
اله اخلي رگابهم تنطخ بالرگاب
والله ما خلي ضفر للزهره ينصاب
الرايه اجعلها غطه للزهره وحجاب
واليجي ياويلي اشوفه يوم الحساب

انه ساقي الضامي يوم طفوفي
وبالدمه اسگي القربلج شوفي 2


ما عرفت الخوف أقسم بالزجيه
من علي مأخذ صفات الهاشميه
والله يم الباب احول الغاضريه
الباب خلها تحترك بس القضيه
شنهو يتوقعون مني بهالمسيه
والله اخليهم وصل فوك الوطيه


ياهو اليواجهني خل يدنالي
اله اتيها الأول من التالي 3


ها يدنيه شگد حلمت بهيج لحضات
احمل الرايه وأنزل بيدي رايات
بلايه شك حيدر اشوفه يعيد حملات
وياه اضل عالباب ما يدنوها هيهات
العنده غيره شلون عنه ينكنب مات
وغيرتي من أم الوفه وحاضر الشدات

راسي حار وما ادنك راسي
بزندي مكتوب الوفه وبحساسي 4


شلون اذا نادت عليه بذيج الضرف
جوابي يمه ابشري وعيونج اتشوف
أمني وما يدنه گلبج ذره من خوف
انه تربات الحرب ورماح وسيوف
بالمراجل انوصف وبزودي معروف
بدال محسن يمه فدوه تروح الجفوف

انذرتها الروح لجل عيونج
وبوجودي حلم ما يدنلوج 5


يالصبرتي عله الجره بيه شتضنين
راح اسكت لو اسمعج من تنادين
السبعه اطبكها عله سبعه بس تأشرين
وأنه عد عينج ييمه ولا تهمين
انجان بابج يندفع وانتي تحيرين
بدال سهم الماي اصد بسمار بالعين


عيني يا يمه فده لسنينج
ولا سمعت بيوم ضربو عينج 6



صور باب الزهره بيها انذهل فكري
جن خيم زينب تشب وتنادي خدري
طفل شفته طايح ومنهار صبري
مثل عبد الله انذبح وبصدري جمري
وشفت راسي مهشم ودم عيني تجري
هنا أبو اليمه ينادي انكسر ضهري

وصعبه اشوف الحره كبالي
عالهزل وبلا أخو ولا والي 7

الشاعر سيد علي الموسوي الكربلائي

ملعون من شب الحطب على باب بيت النبي : ملعون من شب الحطب على باب بيت النبي

لعنة الله على الكسر ضلع البتول
شيعتذر عن فعله باچر وشيكول
هذي بنت المصطفى
سرها محد يعرفه
مثواه نار الي اقترب 1


النبي وصه بعترته وحفظ الكتاب
ليش بعده تندفع علزهره باب
ليا سبب هذا الفعل
بالحقد رد الفضل
عادو حقد أبا لهب 2

فاطمه باب الفرج خير النساء
مستاجبه الدعوه عدها بالبلاء
عجب صبرج فاطمه
بالرزايه محزمه
وحي الله هليله كتب 3


الباب من دفعوها صاحت يا علي
ها يحلال الشدد افزع الي
نبت بسمار بضلع
ترضه خدي ينصفع
وجنيني بالعصره انسلب 4


صبر حيد ما اضن مثله صبر
عجب الكون وحزن گلبه شكثر
السيف بيده لو رفع
يعني موت الله انوضع
بس ينضر بعينه شعجب 5


شاف جم حاقد على الباب اعتنه
وفاطمه بنظرة دموع اتعاينه
اتكله أصبر يا فحل
الحمد لله عله الحصل
والنور هليله انحجب 6


يا علي خل ينكسر مني الضلع
يهون والله لراسه باجر ينرفع
اليله راوني الدهر
زينب تنادي الگمر
ومذكوره واتشوف السبب 7


باجر أولادي تروح بلا ذنب
مثل حالي بسيف لو سم لو سلب
والمصايب تنعرض
من هويت عله الأرض
وعرش الله لمصابي نحب 8

الشاعر سيد علي الموسوي الكربلائي

أمن يجيب المضطر
يا رب تنادي الكوثر
يا مضهر العجب
حگ فاطمه انسلب


ودعت طه بدمعتي
واحزاني تجري بمهجتي
من بعده أحس بغربتي
والشامت بحالي يفرح

اول مصيبه الجنوها
گاع الفدك من خذوها
و وصيته خالفوها
وسيف الغصب بيه يذبح

من غمضت عينه بالهم
اعرف حياتي متسلم
أمر وعليه تحتم
بس بالصبر گلبي يربح

كل الذي حاسبته
واقع صحيح وشفته
ما ينفع العتب 3


جرح الي بيه شيضمده
بدموعي والهم أشده
وجور النواصب تعده
وبابي شبو حطبهم

أهل السقيفه بحقدهم
يم بأبي باقي اثرهم
ملعون كلمن يحبهم
وكل غيره ماكو بنفسهم

لذت بأديه وشفتها
نار الضليمه حملتها
وقصة حجابي كتبتها
ياهو الي يرضا بفعلهم

كلمن تعنه لبابي
بيوم القيامه جوابي
بيا دافع وسبب 4


مضلومه و اشكي لألاهي
ومرت عليه الدواهي
ياربي ادعي بجاهي
أيامي لا ما ردتها

بأول حياتي وسنيني
اغفه عله نوح اونيني
والأثر لسه عله عيني
شاهد على حالي شفته

حيدر عذرته عله صبره
ما ردت سيفه يشهره
أيده عله رأسه وانضره
دمعة مصايب يكتها

يابا الحسن خليني
من ولدي تشبع عيني
اول حچي انكتب 1


عند الله اني عظيمه
بأسراره اني عليمه
وحتى عله خصمي رحيمه
والجنه بأسمي جعلها

يعرفوني لمن اجوني
بغظا بحيدر سبوني
وبلا رحم عذبوني
اواحد لناره شعلها

واحد تعمدد يضدني
واحد بسوطه ضربني
واحد بجفه صفعني
والامه عرفت جهلها

ما واحد البيه رحمه
وبداري صبو نقمه
يا كاشف الكرب 2


عن يامصاب احجي أكثر
عن ضلعي لو جفني الأحمر
ومن شفت حيدر تحير
بهل شوفه ضلعي تالم

عينه عله سيفه وعليه
دمعه ويه دمعي سويه
يتجارن بهالمسيه
وبالصبر گلبه توزم

اه عله طيحه جنيني
عالعتبه تنضرله عيني
هنا صحت فضه ادريكيني
والباب ضل جاري الدم

سلوة حياتي كبالي
مارد دليلي وحالي
يالمرتضى شعجب 5

ايام صارت حياتي
واقترب موعد مماتي
و أيدي على ضلعي بصلاتي
والدنيا تبجي عله حالي

مضلومه وادعي يربي
بالاجل ريحلي گلبي
ما ردت دنيا ويه تعبي
وغير الحزن ما صفالي

بكل خطوه اتوچه بالهم
وبعيني دمعاتي من دم
يا ربي وبحالي تعلم
شنهو الجنيته سؤالي


يارب تراني بشده
جرح الهضم شيشده
اتباع أبا لهب 6

ثمرة الخدمه :

هالخدامه مفخره بأتباعها
والسفينه حسين و احنه شراعها
-------------------------------
هيبة الخدام تبقه معدله
للكنس واليقره نفس المنزله
بلا فرق أن جان نازل أو عله
دنيا خلصانه و تلمنه بگاعها 1
--------------------------------
احله ما بالخدمه ما بيها خلل
بخيمه وحده والتعب مثل العسل
صخام جدر حسين نيشان انجعل
والمواكب نورها من سباعها 2
-----------------------------------
الينطي ماي يروي گلب الما روه
وتربه الخدام للعله دوه
بكل عزه موجود شيال اللوه
ولازم الخدام من ذراعها 3
----------------------------
اليطبخ ويكرم تحسده أهل الكرم
شي اكيد من الحسن مأخذ شييم
بچفه ينطي الزاد وتزيد النعم
والمضايف ما تغير اطباعها 4
______________
والمجالس ضل طعمها مختلف
على النيه أن جان عشره لو الف
شمحله صدري من اللطم لو ينخسف
ودنيتي بحسين انسه اوجاعها 5
________________
والنفق دينار محسوب بعشر
حته لو ينطيله ماي لبس نفر
كلها مقبوله و أخذ مني الخبر
ما يشوف الله الخدمته باعها 6
________________
نافس بنيه وفه مو بالكسر
خاف باجر تهوه و تضيع العذر
ما الك داعي ويه غيرك و احتذر
و اللشش تتعلگ من كراعها 7
________________
صفي گلبك والتزم عندك مجال
دنيه معرفه بوصف دار الزوال
هالخدامه مو نقش فوك الرمال
عالحجر منقوشه كلمن طاعها 8


الشاعر سيد علي الموسوي الكربلائي

يل بالمشاكل محتار موسى ابن جعفر حلها
__________
خل عينك بعين الذي لو تنخاه
ينطيك من فضله بيسرته ويمناه
بالشده لو تهوه يجيك وتلكاه

يحظرلك بأسرع حال والتصعب يسهلها
__________
صاحب مضيف ومنفتح ضل بابه
بچفوفه يكرم والشفه امن ترابه
نوره الزهه الكل شيعته واحبابه

باب الحوائج والله لكل عگده بيده يفلها
__________
معروف فضله والكرم بين الناس
وكل واحد اتعناه وبكل إحساس
ياخذ الحاجه بدمعته ورفعة رأس

ميخيب ضن الدگ باب وراعيها ما يقبلها
__________
كلنه ابخت باب الوفه ونحتاجه
نرفع ادينه لگبته الوهاجه
اي والذي من عنده سلبو تاجه

محد يرد وزعلان يم بابه لو قبلها
__________
كل هالخدم ترجاك يا وإليها
وهاي الوجوه بخدمتك خليها
هذا الغريب نضل نردد بيها

ما ننسى يومك مولاي وحگ زينب وكافلها
__________
خلينه تحت تراب جدمك خدام
نحيي المصيبه بكل مسيه وكل عام
جن حمزه وي كاظم ونور الإعلام

هالخدمه مولاي أرجوك من خادمك اقبلها
__________

سيد علي الموسوي الكربلائي

بهاي المسيه
شفت الزچيه
تعنت بدمع الهظم للكاظميه
__________
تنادي يا موسى ابن جعفر يا حبيبي
يبني سامحني لون طول مغيبي
يم بنيني امشي والمدمع نصيبي
امصايب بروحي وكثر بالگلب شيبي

بضلعي التكسر
هاليله أحضر
وابچي يمه عليك وانصبلك عزيه
__________
بچفها رايه وعتنت ويه اليزورون
وتهمل ادموع اعله درب البيه يمشون
اترحب بزوار ابنها من يدخلون
وعالضلع تلطم شفتها من يلطمون

وصطرة وجها
واضح أثرها
وعالوجه تلطم ودمعتها جريه
__________
بالصحن گامت تنادي يبني يبني
ما نسيتك لحضه ياليومك فجعني
بالسجن وياك أحضر رغم حزني
وعالجسر وي شيعتك جيت اعله وني

اويه اليشيعون
ايهل دمع العيون
اووسدت وسط الگبر جثتك بديه
__________
واحنه كل عام اليمر نحيي الفجيعه
وبالمواكب تحضر الزهره الوديعه
نخدم الزوار واجبنه وشريعة
ونلطم اعله البالسجن روحه صريعه

وننصب مواكب
وتحله المتاعب
والاجر يبقه عله الهادي اوصيه
__________
سيدي نتشرف الزاير نخدمه
المعتني رغم الخطر ويفديك دمه
اعلينه شاهد كل زمن جسر الأيمه
واليجي حته الذبح لا ما يهمه

بروح العقيده
مصابك نعيده
ويانه عاشت سيدي هاي الرزيه
__________
عدنه غايب لابد الهالعالم إيعود
ينشر العدل وظلم ما يرجع اردود
اظهر الخاطر رقيه وخاطر الجود
ننتظر هاي البشارة بچف ابو الزود

بجاهك يغايب
تجلي المصايب
والله تفجع ونة الأم الشجبه
__________

سيد علي الموسوي الكربلائي