مولد الامام الهادي ع

للهادي سلامي
يابلسم كلامي
ميلادك إمامي
ياهله وميت هله...كلبي بالبهجة اعتله
ميلادك امامي
———————————-
فتحت ابواب السمة لهاي الولادة
إنجوم ضوة بالفرح بالخير وسعادة
تسبيح نسمع للمَلك ترتيل و عباده
وجناح صاغهته اله ولمهده وساده
نبعث هل التهاني
بشموع وصواني
يامحله الاماني
عيدي هذا يوصله...كلبي بالبهجة اعتله
ميلادك امامي
————————————
الليلة بس ثوب الفرح لايكَ عليه
وكل دواوين الشعر تهئني الزجية
بزغت انوار التقي الهادي البهية
عاشر اصحاب العبه خير البرية
ياصومي وصلاتي
ياديني ونجاتي
يامُلهم حياتي
بمولده عمري حله...كلبي بالبهجة اعتله
ميلادك امامي
————————————
ننشد و هذا الخبر عم المدينة
لوحة من فيض العرش روعة جبينة
جلى ربنه الخالقة صايغ سنينة
علي الهادي الطاهر بحبه روينه
ذايب وبغرامة
عاشر للإمامه
وبدربه السلامه
سبحان ربنه الكمله...كلبي بالبهجة اعتله
ميلاد امامي
———————————
بمولد الهادي ابد نوصف فرحنه
صلو عالهادي التقي بعالي صدحنه
نهنئي الجواد بحضرته نقدم حفلنه
سيدي اعليك القسم تسجل اسمنه
وبحبك ننادي
يامالك فؤادي
مولانا يلهادي
المحب يدعي تسجله..كلبي بالبهجة اعتله
ميلادي امامي
————————————-
ابعث حنيني ولهفتي للهادي امامي
ويه الملايك سيدي ابعث سلامي
انت شفيعي ومنقذي والله لختامي
خدمة وجودك للابد ترفع مقامي
كل شوكي وحنيني
ياعصمة يقيني
ناذرها سنيني
مجنون حبه نبدله....كلبي بالبهجة اعتله
ميلاد امامي


علي موفق القزاز

الموعد الجمعة تجي تشيعونه
موسى ماشافت نهار عيونه
————————————-
هذا موسى من نسل اشرف طهر
ابسجون الظالمة يكضي العمر
ياصبر يحمل بعد هذا الصبر
و نورَ ماكدروا ابد يطفونه
—————————————
الليل جفه ماكدر يطفيله نور
نور موسى عالفضا اصبح يدور
هذا مشكاة السمه عبر الدهور
وحضرتة جنة عدن يوصفونه
—————————————
شاف من ظلم الزمن وجور الرشيد
وسط طامورة بقه بكيد الحديد
ومن ثكلها السلسله تنزف الإييد
موسى هدم كل مُلك هارونه
————————————-
مارضخ موسى ابد للمُغريات
ولاطمع بيها يظل هاي الحياة
خلص ايام السجن بفرض الصلاة
التقيِّ العابد تره يعرفونه
————————————-
قِصته ماشابهت بين القصص
عايش سنين الالم وذيج الغصص
للظلم رغم الجره منطه فرص
وجفه مابايع وثن يهابونه
————————————-
انختم عمره والجبد ياويلي ذاب
يعظم الله للرضا هذا المصاب
منهو راح يشيعه بهل اغتراب
وين اهله لجثته يدفنونه
————————————-
وين اهله ماتجي ناده الطبيب
لا ابن لا من عرف لهذا الغريب
الجمعة ياشيعة الوعد اصبح قريب
عالجسر موعدهم يحضرونه

علي موفق القزاز

احجي العندك....لا ميردك
لو تبقه بالدنيه وحدك
لو جار الزمان إعليك إلموسى تِعنه إلبابه
—————————————
لو عكست الدنيه و يخّونك دهرك
لبو الرضا سلم إله كُل امرك
بكل صعبه يوكفلك تره و يسرّك
هوه السند...يرجعك ابد
بالمنذبح ..تحلفه بعد
تقسم عليّ بالعطشان جده السليبة ثيابه
———————————-
باب الحوائج يالمحب ميردك
اكصد اله واشكيله الليّ عندك
موسى يّفرحك لوّن دهرك ضدك
رغم الحصل..باب الامل
والصعب...عنده سِهَل
موسى ويا سرّ الرحمٰن زوره وقّبل اعتابه
———————————
وينه العرش و ذاك المُلك والتيجان
جنّة السجين الزاهيه اعله الازمان
عند بابه تنحي الإنس ويّ الجان
يحجي الدهر... اروع صور
ويجسده... ابن جعفر
و بسيرته راح إتشوف ملك وسجانه يهابه
———————————-
حل البله والإمر بيك إتعسر
دير النظر لصوب التقي بن جعفر
باب السمة معرّف تره إلكل مضطر
باب السّمه..خير ونعمه
موسى ويا مفتاح الرحمه
هذا الكريم العطاي ابدًا يعوف احبابه
———————————-
رب العطا جود وكرامه ونعمه
ربنه الوضع سره بجلاله و حكمه
اقرب الك من الرضيع إلـ أُمه
راعي الوفه...والعاطفه
لليكصده... ترابه شفه
إمقدسه رب الكون هذا العظيمة انسابه
————————————
تنكط وفه اوصافه راعي الغيره
يفزع إلك بكل معضلة بكل حيره
لوذ بعطفه يمطر عليك بخيره
ميرجعك...اشكي يسمعك
من تحجيلة يمسح دمعك
دنياتك شّمتراويك ينّجيك إبن النجابه
———————————-

علي موفق القزاز

وبسجن قيودك
سجلت خُلودك
ياراهب اهل البيت
رَتَلك صمودك
————————————-
شلون طاموره تضم كلي الشمس!
موسى مشكاة العرش ما ينحبس
كرّس بصبره صور باعظم درس
يهابه سجانه مِنْ جُوّده النفس
هيبتك خشوعك
بفجرك وطلوعك
تناجي الإهك ظليت
ياراهب اهل البيت
رتلك صمودك
——————————-
احله لحظاتك شفت بكل الحياة
بالسَحَر وعنده الفجر يبن الأُباة
كُل شعورك صاغية عند الصلاة
موقفك والله هدم عرش الطغات
يا عُظم صفاتك
انذرتها ذاتك
الحمدُ لله ناديت
ياراهب اهل البيت
رتلك صمودك
———————————
وين هارون المُلك نسأل نريد
وين رايح هالقصر و ذيج العبيد
هذا موسى وجنته تضوي البعيد
وباب للحاجة صبح كهف الطريد
آيتك شموخك
انتظروا لرضوخك
ثابت يقينك ابقيت
ياراهب اهل البيت
رتلك صمودك
———————————-
موسى ميهمك ابد قيد الظلام
امبرهن بعزمك أُسس لكل الانام
رغم حكامك كثر ووحدك امام
صبرك الثوري فنى إعروش اللئام
واضح بطريقك
يا وثن يعيقك
لدين العداله ضحيت
ياراهب اهل البيت
رتلك صمودك
———————————
بكلبك جمره لاهبه لجيّت الاهل
عن ابن جعفر وسف محد سأل
توصي إلمن لو حضر وكت الاجل
لا ولد يمك حضر اعله المغتسل
خلّصت سنينك
للرضا حنينك
يحضّرك علي اتمنيت
ياراهب اهل البيت
رتلك صمودك
———————————
قبل لا جفن الالم يضمه التراب
ردت يمك فاطمة بعد الغياب
تضمك بهمهه تجي بدمع المصاب
واليتم صاير فرض هجر وعذاب
شمعظم المصيبه
تنطر الحبيبه
لمعصومه بنتك حنيت
ياراهب اهل البيت
رتلك صمودك

تمت
علي موفق القزاز

كلبه عايش كربله ولوعاته
مات جدي منذبح صرخاته
—————————————-
قصتة تفتح جرح لطف كربله
نحر شاهد ينذبح للبسملة
وزين العباد بجفوفه السلسله
يامصاب الفزز لعبراته
—————————————-
يشوف عماته تفر من كل كتر
ويلي لاخيمة بقت الهن ستر
طاح عالشاطي وسف راعي الخدر
ولخيامة داير بنظراته
—————————————
وهاي اسهام الدهر كلبه تصيب
جده نايم منذبح والخد تريب
لا عمامه ظلت وجسمه سليب
ليله يكضي بالحزن شهكاته
————————————-
لسبي عمته الباقر وكاعد ينوح
شلون بنت اهل السمه سبي تروح
هالمصيبة زيّدت كلبه جروح
و لجرح يوم السبي حسراته
————————————-
هذا حكم الاموي حكم الظلام
هذا ياليل الحجّب شمس الامام!
باقر علوم السمه خير الانام
جن كنز والله و درر جلماته
————————————-
شلون امه تقيّم اصحاب العلم
هذا سيدها نوت بي تنتقم
بالسموم الجازته جفوف الاثم
للجهل تريده درب عاداته
————————————-
جمر بينه يستعر جرح البقيع
هذا كبر الباقر بمنظر فجيع
متى نتبرك نجي تدعي الجميع
لباقرك تعلن اله ثاراته

علي موفق القزاز

هاي ام عباس بس انخاها
كلشي مايصعب طلب وياها
————————————————-
عدها مايصعب طلب انخه وتشوف
اعليها اقسم بالكــطعوله الجفوف
يلكريمة الفاضله ام كلب العطوف
والله مترد الطلب حاشاها
———————————————-
والله مايبقه حمل عندك ثكيل
روح دك باب الوفه ام الكفيل
ماتضل دمعه عله خدك تسيل
حاضره بكل الشدد تلكاها
———————————————
حيل صفي النيه واطلب حاجتك
يمها روح احجي بدموعك طلبتك
بالعزيز حسين مترّد دعوتك
حسين عدها هو لب إحشاها
———————————————
انتي باب من السمه كلمن اجاج
هل وفيه المكرمة ربنه نطاج
يرد مسرور الكصد والله النخاج
شكد نطيتي وبالضعف جازاها
———————————————
خاف يمه حسين بالطف قصريت
تكول بس اربع ولد شنهو نطيت
شلون يم الزهره ماجني وفيت
وجه الابيض تجي تتلكاها
——————————————
فاطمة تكلها كفو ماكو قصور
كفو من عباس واخوانه البدور
قدموا قربان من اربع نحور
بكربله تفخر تظل برباها
—————————————-
دوم يلازمها يظل هذا الفخر
عون جعفر والنعم من الكمر
ذاك عبدالله الرسم اروع صور
وكفتج يم الكمر منساها

علي موفق القزاز

شوف هاي ام البنين الهيبة
والله بس الزلمة هيه اجيبة
—————-/——————————
هي هايه تربية ام البنين
ملوحة الخوة تجيبه هل سنين
بس المعتب الإيضحي الوتين
وفقط كلبه الميت بحب الحسين
اسهام حبه خله هيه تصيبه
————————————————-
الرجف كلبه هيه مو امه تصير
الزلمه كلفه مارمش يوم المصير
بالمفاخر يسجل اسمه للاخير
كل ركبهم تفده لحسين الامير
وكون كلبه مايمر بي ريبه
———————————————-
هاي بدوية تخرج بس زلم
وين ذاك الاشوس الماينلزم
حار يوم الطك لو شد العزم
جبل باقي بموقفه ماينثلم
ثكيل طكهم ذوله ولد النيبه
———————————————
والله ماواحد عرف معنى العشك
العاش حبك هل فهم حب الصدك
بنار مولاه الكلب خل يحترك
للاصل يرجع تره طعم العثك
الاصله طيب فرعه يرجع طيبه
———————————————
ال هاشم لا جفن الهم غمض
كبال حكهم ماشفت باطل نهض
ماتنام العين إلدينه انتفض
يموت حدره كلمن اليمَّ عرَض
بيده حتفه وهذا حظ انصيبه

علي موفق القزاز

حرت اشلون ألمك ياضوه عيوني
—————————————-
حرت شلون ألمك يمه يحسين
ويلي شكثر ساحك حافر البين
لا ضلع انهشم واحد ولا اثنين
عله جسمك اطيحن يمه يلكوني
——————————————-
اكعد ريت يمه اشتم بعطرك
وبالشيله اضمد جرح ال بنحرك
ألمن راح بيدي ضلوع ال بصدرك
جم حافر اثر يجويها لضنوني
——————————————-
نايم عالرمل ياويلي من شفتك
من مجرى الدمع يوليدي غسلتك
من نحرك الدامي المنكطع بستك
بياذنب وشرع اعداك هضموني
——————————————
ياجمر الضمه إمفطر شفافك
ومن حر الشمس متغيره اوصافك
وذباحك رفس بكل حقده ماعافك
ياروحي وسلوتي بيك فجعوني
——————————————-
ردت اليوجعك يوجعني يوليدي
ويلي إشلون اشبك جسمك بإيدي
يمه ريت يكطع كبلك إوريدي
ام المنذبح الصاروا يسموني
——————————————
و اثار الحجر عالجبهه مصيوبه
بخاصرتك طعن وارماح منصوبه
ولثوبك سِلّب والجثه مخضوبه
واسهام الدهر جنّ بيّ يرموني
—————————————-
عاري مترّب وعالغبره تتكلب
صدرك منطحن ولخيلهم ملعب
لهفان الكلب وحگي عليك انحب
يسباح الكلب والله اني ذبحوني


علي موفق القزاز

قصيدة ثلاث دكات (وزن الدارمي)

ياليل الاوداع...لاترحل بساع
شلون بِضعون السّمه
تحديها أَهل الظالمه
يا ليل الاوداع
————————————-
يا ليل طوّل ارتجي بهاي المسيه
اجروح يضملي الصبح بالغاضرية
وريح للفركه اشم بأهل الحميه
صاير موادعنه صدك تحجي الرزيه
يا ليل الافراك....تخليني اشتاك
وتبدي الليالي المؤلمه
تحديها اهل الظالمه
يا ليل الاوداع
————————————
حسين دمعاته تصب ودمعة أخيّته
باجر لوّن طر الفجر يحضني شفته
يمسحها بيده دمعتي ومن نحره بسته
هذي وصية فاطمة تشمه بركبته
إيذبحون الحسين..باجر تشوفين
بجفوف هاي الناقمه
تحديها اهل الظالمه
يا ليل الاوداع
————————————
انته يخويه الإكفلت بيهه ضعوني
إشكد عظيمه خوتك كتلي بعيوني
ذاك الدلال وهيبته إيودعوني
بس ليل واحد ينتهي اويه الدليلوني
كتلي يعباس...خدرج مينجاس
غيره وحميه ومرحمه
تحديها اهل الظالمه
يا ليل الاوداع
————————————-
بحسره خيامك ودعت بكسر الخواطر
ريت ما يطلع صبح لايجي باجر
كل غالي باجر مايظل بدمها المناحر
باجر اشوفن بس حرك ذيج العساكر
يا ليل الامصاب...متبقي احباب
يصوري ليلك بي دمه
تحديها اهل الظالمه
يا ليل الاوداع
—————————————
يا بابا جم جلمة اسمعت تبجي بناتك
تكلك يبويه لو رحت نموت وغلاتك
باجر يتاني جم سهم ياخذ حياتك
وياك بس ليله تظل بس ذكرياتك
بأيتامك شلون... لمّن ترحون
باجر يرّوعها الضمه
تحديها اهل الظالمه
يا ليل الاوداع
————————————
للسبي يا ليل استعد تبدي المصايب
اه من يوم احدعش صرعه الحبايب
كلها الحيود مخضبه فوك الترايب
يادهري إجروح وهظم لدلالي جايب
هاي الفجيعه ...بالطف صريعه
يادهري كلبي لاجمه
تحديها اهل الظالمه
يا ليل الاوداع

علي موفق القزاز

مايله الدنيه اوي زينب مايله
ياكلبها اشاف من طف كربله
——————————————
هذا ياكلب التحّمل ياكلب
مثل زينب مرت بموقف صعب
تشوف كافلها بدمومه منخضب
واعليه دمعات العقيلة سايله
——————————————
جيت يا خويه ولا قصدي العتب
لجن خدري بدونكم خويه انسلب
شفت من اعداك السب والعجب
يبن ابوي اتكفلت بهل عايله
———————————————
يبن ابويه والنعم ماقصريت
بنومتك خويه كلت شو طوليت
شعطلك عني ولاكمت واجيت
وينها جفوف الكفاله سائله
——————————————-
ويه زينب مالت الدنيه شكثر
طيحت الكافل خذت نص العمر
الروح تطلع لو لمح الها الشمر
ومن عمرها كربله شكد نايله
——————————————
بخدها مابطل ابد سيل الدمع
اعله هذا الصار حگها تنفجع
ويلي جم منحر تشوفه منكطع
ياصبرها بهل مصايب واصله
—————————————-
هاي بعيوني يخويه عيلتك
شلون ببنيتك لوّنها رادتك
شلون لو بابا الك لو نادتك
وين ياعمه الابوه نكصد اله
————————————-
مدللاتك لا خيم الهن بقن
بالخرايب تالي كعدتهن صفن
كافله خويه تكفلت الضعن
اوياي لوعات اليتامه حامله

علي موفق القزاز

مقدمة | ليلة 11 (الوحشة) محرم 1447هـ
#الرادود | حسين السماح
#الشاعر | علي موفق القزاز

🔻رابط القناة للمجالس بدقة عالية 🔻:-
https://youtube.com/channel/UC8oTU96zJuaVstE7-ufxkYA?si=ojsBDmm0byE2hTQd

ليالي عاشوراء الحسين ع من محرم 1447هـ
| موكب الشطرة الكبير
| جامع الرسول الاعظم (ص)
#الشطرة - ذي قار

مايهموني لو يذبحوني
شلون اعوفك ياحسين .....شلون اعوفك
***************
شلون اعوفك ياحبيبي شلون اعوفن دمعتي
بيك عايشها حياتي انت عزي وهيبتي
والله مااسوة بدونك لحظة اعيش بدنيتي

غايتي وديني شمعة سنيني
شلون اعوفك ياحسين
***********
سنين ربتني المجالس حسين باقي عالعهد
والله مااخلف طريقة امي غذتني بمهد
بيك وصتني الحبيبة يمه ابو اليمة السند

امي وصتني بعشكة غذتني
شلون اعوفك ياحسين
***********
انت مالكها شعوري ومالك احساس الضمير
سيدي خليني يمك خادمك عبدك اصير
انت ياباب الشفاعة إلك سلمت المصير

خادمك ادعي بحركَتي ودمعي
شلون اعوفك ياحسين
**********
الله خالقها لوجودك دنية مو مالت عشك
خادمك ادم خدمتي بجمرتك خلني احترك
الصدك حبك نشوفة وغير حبك مو صدك

ياهوه انفاسي عايش احساسي
شلون اعوفك ياحسين
*******
ذبح ماهمني ومخاطر والله ماعوف الحسين
شنو دمي يغلة يمك وانت ابو كلب الحنين
هيج يحسين واموتن وانت تغمضليّ العين

بحضرت حسيني موتي يلفيني
شلون اعوفك ياحسين
************
افتخر عبدك اصيرن ومن صنف هاي الخدم
بخيرك مفضل عليه هواي ماتحصه النعم
بس هوى حبك اتبعه الجابني من العدم

ياملك روحي بلسم جروحي
شلون اعوفك ياحسين

خادم الحسين / علي موفق القزاز

هاي زينب ياعلي تحضرها
دارت لصوب الغري ناظرها
————————————————
يبو زينب هاي زينبكم تنوح
ياعلي بطف كربله تعيش الجروح
راح جلمات السبي يمها تفوح
طيحت اهل الموزمه تكسرها
———————————————-
شلون حيرها علي هذا الزمان
تشاهد حيود الفله ابكل مكان
مخضبه بدمها بعد ماظل امان
و بعد لاخيمه بقت تسترها
————————————————
يلي تحضر بالشدد تحضر يحيد
وانت يمك يلتجي والله الطريد
اليوم زينب تنتخي تحضر اكيد
وحيده زينب تجبر بخاطرها
————————————————
ياعلي وجه الفجر يمها انذبح
و إلبدر اربعطش دمه انسفح
وكلب زينب عالجره شكد انجرح
وحيل ما خله ابد عاشرها
————————————————-
جسم اخوها تنهشه بيض الصفاح
وذاك راسه تحضنه سُمر الرماح
الف وكسور وبعد ينزف جراح
راسه اخوها عالرمح اتعذرها
———————————————-
بالخرايب تالي كعدتهن تشوف
الليل جايب خوف واعليهن يطوف
عذبتهن ياعلي ارض الطفوف
والنوايب هالجرت تعصرها
——————————————
اعظم اعليهن يمر جرح السبي
بالبراري فرّن ابنات النبي
الموت وياهن مشه بيهن حَبي
بناكه هزله والعبد يامرها

علي موفق القزاز

راسه نزله يارمح
تعبان ابوي من الذبح
يارمح وارحم حالي
نزلي راس الغالي....يارمح
————————————
بالله اسألك يارمح وانته تعرف حالتي
الليل ساهر ماغفه وي غربتي ودمعتي
الجان تارس هالعمر هجره تارس صفنتي
راح إمن ايدي الابو و بعيني ظلمة دنيتي
ليش وجه كل دم
شوفته صارت عدم
مني خذت آمالي
نزلي راس الغالي....يارمح
———————————-
يتعب اشوفن منحره يرتاح خله بحضني
ياذيه ادري لو علم من السوط ينزف متني
من شيبه امسحها الدمه رغم الحبال تعتني
من دمعي اقطرله ردت واروي شفايف ذني
شفاف ابوي مفطره
كسر ظهري منظره
نزف دم دلالي
نزلي راس الغالي...يارمح
———————————-
يابويه انظر جبهتك باقي اثر ذاك الحجر
لمن احضنك بي شفت اثنعش طبره عالنحر
المن عفتني بيا جرح زماني شبعني قهر
بنيتك انه و ياراحتك متعب عيوني السهر
افياي اسويله ردت
ياويلي يتلوه شفت
راس الحنين اكبالي
نزلي راس الغالي...يارمح
———————————
هل فاجعة بيهن تمر كلمن اجت تشكيلة
هاي الفواطم حايره بعازة ابو هالعيلة
هضموها تدري بنيتك فاض الدمع مسيله
اني رقية الغالية ضيم اليسر ارويله
مني خذوا ترجيتي
وناكة هزيلة ناكتي
حادي الضعن جتالي
نزلي راس الغالي....يارمح
——————————-
عمتي العقيلة حايره تعاتب اشوف بعمي
اعتاب الاخو وبلا زعل وتگله ريتك يمي
مدللنه كل يومك جنت وجان الاميره اسمي
دار الوكت رحنه بسبي وعكبك تغيّر رسمي
اكعد تكله ياكمر
بالغربه ودانه القدر
انت المحامي الوالي
نزلي راس الغالي....يارمح
——————————
عطشان يارمح الابو تلهب جمر لهاته
يقشعر جلده ياوسف من ينظر إبنياته
مايحتمل انا انولي يغمض شفت نظراته
من اشكف اسياط الزجر عالي صده وناته
خليته عاري عالثره
فاجعني والله هالجره
ذبح الابو يبرالي
نزلي راس الغالي....يارمح

تمت

علي موفق القزاز

ليسـتة #مؤسسة منبريون الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 300 عضو
━━━━━━━━━━━━━━━━━━
للإشـــتِـراك 👇🏻.

وإرسل قناتك هُنا : @ahmed_alziwar0

--------------------------------------------------

قناة تعليم الرواديد الالحان
https://www.tg-me.com/ahmed_alziwar1