⚡️Bu yilgi 30-iyun Yoshlar kuni juda ko‘p yangi imkoniyatlar hamda samimiy muloqotga boy bo‘ldi. Prezidentimiz yoshlar uchun ko‘plab yangi imkoniyatlar e’lon qildilar, ularning mehnatini e’tirof etib, nufuzli davlat mukofotlari bilan taqdirladilar.

Kelajakda yana ko‘plab yoshlarimiz safimizda shunday e’tirof hamda yutuqlarga erishishlariga ishonamiz. Bayram yana bir bor muborak bo‘lsin!

@alisher_sadullaev

⚡️O‘zbekiston yoshlari qanday maqsadlar bilan yashayotganini, qanday salohiyatga ega ekanini va bu yurtdagi eng katta boylik aynan ular ekanini eslatib turadigan rolik!

@alisher_sadullaev

💡Yaqinda sizlardan Stenford professorlari taklif qilgan qadriyatlar ro‘yxatidan o‘zingiz uchun eng muhim deb bilgan to‘rttasini tanlab ko‘rishingizni so‘ragandim. Izohlarda ko‘pchilik menga “siz o‘zingiz qaysi qadriyatlarni tanladingiz?” deb yozishdi. Bugun shu savolga javob bermoqchiman.

Marhamat: @stanford_kundaligi

"Inson hayotida ikki ahamiyatli kun bor: birinchisi-dunyoga kelgan kuni, ikkinchisi-nima uchun bu dunyoga kelganini anglagan kuni.

Mark Tven.

Bugun 31 yoshga to‘ldim. Hayot nihoyatda tez va hayratlanarli o‘tmoqda. Stanfordda turib do‘stlar yo’llagan tabrik va tilaklarni o‘qiyapman-u bolalik orzularim yodga tushmoqda. Tabiiyki, eng unutilmas xotiralar onam bilan bog‘liq. Ehtimol, Siz tanigan bugungi Alisher shaxsining shakllanishiga o‘sha voqealar sabab bo‘lgandir.

…Taxminan 15 yil oldin. Ingliz tilini o‘rganishni endi boshlagandim. Uyimiz shaharga yaqin edi. Bir kuni shahardagi o‘quv markaziga bordim. Hayajondaman. Maqsad: O‘zbekistondagi nufuzli universitetlardan birida o‘qish, keyinchalik ota-onam duosi bilan yaxshi joyda ishlash va yurtga xizmat qilish.

Afsuski, markazda mening darajamga mos boshlang‘ich guruhlar yo‘q ekan. Shu sabab meni olti oydan beri ingliz tilini o‘rganayotgan, savol tuzib, javob bera oladigan darajaga yetgan guruhga qo’shishdi.

Birinchi darsda juda hayajonlandim. O‘qituvchimiz darsni “Nega ingliz tilini o‘rganyapsiz?” degan savol bilan boshladi. Inglizcha javob berilishi kerak bo‘lgan savolga tayyormasdim. Bosim, hayajon, chorasizlik…

Yonimdagi boladan o‘zbekcha jumlani ingliz tiliga tarjima qilib berishini iltimos qildim. Yaxshiyamki, partadoshim ingliz tilini ancha tushunib qolgan ekan, aytgan fikrimni ingliz tiliga o‘girib berdi.

Navbat menga keldi. O‘qituvchimiz savolni takrorladi. Men esa: “Because of my mom,” deb javob berdim. Sinfda kutilmaganda qattiq kulgi ko‘tarildi. Hamma kulardi. Bir zumda sinfdagi harorat o‘zgardi. Qizarib ketganim o‘zimga-da bilindi. “Shunchalar kulgili xato qildimmi? Hammasi ustimdan kulyaptimi?” degan fikr chaqmoqdek chaqib o‘tdi.

Yashirinishga joy, qochishga kuch yo‘q edi. Shu payt o‘qituvchi hammaga “to‘xtanglar” degan ishora qilib, savolni takrorladi. Men ham o‘sha javobni qayta aytdim. Bu safar o‘qituvchimiz sabab jiddiyligini sezganday, chuqurroq tahlil qilishga kirishdi. “Why because of your mom?” deb so‘radi. Men o‘zbek tilida javob berdim: “Onam ancha yildan beri bir dard bilan kurashmoqda. Davoni o‘zbek tilidagi adabiyotlardan hamda mahalliy tibbiyot xodimlaridan topolmadim. Shu sababli xorijiy ilmiy manbalardan izlashga qaror qildim.”

Biroz oldin gulduros kulgidan zirillagan xonaga allaqanday sukunat cho‘kdi. Hamma jim. Kulganlar qizarib, uyalganday bo‘lib qolishdi. Meni bu holat hayron qoldirmadi. Chunki bunday qarashlarga allaqachon ko‘nikkandim. Maktabda, mahallada, ko‘chada…

O‘quv markazidagi birinchi haftada o‘qituvchim ingliz tilini yaxshi tushunib muloqot qilishim uchun “Oxford 3000 Essential Words” ro‘yxatini yodlashimni tavsiya qildi. Eslasam, o‘sha davrlarda kuniga 17-18 soat dars qilgan ekanman. Hovlidagi barcha xo‘jalik ishlarini qo‘limda lug‘at, kitob bilan bajarardim. Surunkali tayyorgarlik sabab ilk haftada 1000 ta so‘z yodladim va sezilarli o‘sishni his qildim. Keyingi bosqich – grammatika edi. Taxminan 6 oy ichida bir necha bor yuqori guruhlarga o‘tib, IELTS darajasiga chiqib oldim.

Bu yangi daraja edi, lekin uni ham uddalasa bo‘lardi. Guruh kuchli, lekin menda onam uchun qilinayotgan harakat undan-da kuchli edi. Bu bosqichga kelib, xorijiy tadqiqotlarni o‘qib, tushuna boshlagandim…

Oradan yillar o‘tdi. Xudoga shukr, bugun onam ancha bardam. Dadam va opalarim menga bu yo‘lda juda katta yordam berishdi.

Tasodifni qarangki, bugun Stanfordda menga yana shunday mazmundagi savol berishdi: “Qanday qilib Stanfordga keldingiz? Sizni bu yerga nima yetaklab keldi?”

Men esa yana o‘sha qadrli, eng ahamiyatli javobni berdim: “Because of my mom.”

Onajon, Otajon! Meni bu dunyoga keltirganingiz uchun rahmat! Bu umrni Prezidentimiz rahbarligidagi jamoada yoshlarga katta imkoniyatlar, loyihalar, yaxshiliklar yaratish yo‘lida sarflash – mening eng katta, eng oliy maqsadim.

@alisher_sadullaev

Prezident va yoshlar uchrashuvida O‘simliklar karantini va himoyasi agentligi Markaziy ekspert shtabi vakili, Buyuk Britaniya, Daniya va Norvegiyaga biriktirilgan Maqsad ismli yosh mutaxassis qizimiz so‘zga chiqdi.

🇬🇧 U yaqinda Londonda o‘tkazilgan xalqaro yarmarkada ishtirok etib, O‘zbekiston vakili sifatida o‘z tajribalari va yurtimiz salohiyatini namoyish etishgani, yarmarka taassurotlari, xorijiy tajribalar va takliflari haqida ochiq fikr bildirdi.

@alisher_sadullaev

⚡️Stanford Professori Ilya Strebulaev bilan darslarimiz o‘z nihoyasiga yetdi.

Fikrimcha, Professorning O‘zbekistonga qiziqishi juda baland, ayniqsa “Venture Mindset” kitobining o‘zbek tilida tarjima qilinayotganidan xursand. Kitob taqdimotiga O‘zbekistonga ham kelmoqchi.

https://www.tg-me.com/stanford_kundaligi/308

🇺🇿Bugun Prezidentimiz Shavkat Mirziyoyev raisligida oliy ta’lim muassasalari bitiruvchilarining bandligini ta’minlash masalalari yuzasidan kengaytirilgan yig‘ilish bo’lib o’tdi.

➖mas’ul vazir va tarmoq rahbari oliygohlarga buyurtma joylashtirib, kadrlarni maqsadli tayyorlashni yo‘lga qo‘yadi.

➖oliygoh bitiruvchilarini ishga joylashtirish bo‘yicha xususiy sektor uchun ma’qul keladigan tizim yaratiladi va buning uchun tadbirkorga Tadbirkorlar reytingida alohida ko‘rsatkich (qo’shimcha ball) qo‘shiladi.

➖ “Yangi O‘zbekiston” universitetining baholash tizimi barcha oliygohlarda ham yo‘lga qo‘yiladi. Moliyalashtirish oliygohlar to‘plagan ballariga qarab amalga oshiriladi.

➖”Yangi O‘zbekiston” universitetida rektorlar maktabi orqali rektor va prorektorlikka nomzodlar maqsadli tayyorlanadi hamda eng yaxshi natija ko‘rsatgan rektorlikka nomzodlar malaka oshirish uchun Garvard universitetiga yuboriladi.

➖Endilikda abituriyentlar 5 ta oliygohdan birortasiga kirolmagan bo‘lsa, lekin to‘plagan balli boshqa oliygohdagi to‘lmagan yo‘nalishga to‘g‘ri kelsa, shu oliygoh rektori ularni kontrakt asosida qabul qilishi mumkin bo‘ladi.

➖yoshlar bandligini ta’minlash uchun banklarga 300 million dollar resurs ajratilgan. Endi ishga olingan bitiruvchilar soniga qarab, tadbirkorlarga 5 milliard so‘mgacha 18 foizli kredit beriladi.

@alisher_sadullaev

⚡️Yoshlar oromgohida ilk bor o‘tkazilgan HackUnicorn o‘quv oromgohi MVP bosqichidagi startap loyihalarni moliyalashtirish uchun zo‘r imkoniyat yaratdi.

Oromgohda 103 ta jamoa o‘zining startap loyihalari bilan ishtirok etdi. Ular orasida OvozAI, QadamAI, EduCompass, TopCoach, Maytab, Domloo, EduCheck, Tokcha, Akam, Teamwork va Robocontest kabi istiqbolli loyihalar ham bor edi.

Eng quvonarlisi, yoshlarimiz Stanford bitiruvchisi va Y+Ventures asoschisi Jing Quang, MyTaxi va NumeoAI asoschisi Akmal Paiziev, McKinsey vakili Filip Johnston, IT Park konsultanti Usmon Raximjanov hamda Startup Garage asoschisi Muhammad Xalil kabi tajribali mentorlardan eng zarur bilimlarni olishdi.

Oromgoh yakunida 10 ta loyiha moliyalashtirish uchun tanlab olindi. 3 tasi Sarmo VC, 7 tasi esa Yoshlar Ventures jamg‘armasi tomonidan qo‘llab-quvvatlanadi. Bu oromgohning eng katta natijasi.

@alisher_sadullaev

⚡️Bitiruvchi yoshlar bilan ochiq muloqotimiz boshlandi. Jonli efirda savollaringizga javob olishingiz mumkin.

https://www.youtube.com/live/MsPEleXIuhE?si=n15gO0PG8ReF-wAn

⚡️Navbahor yoshlari uchun yangi maskan!

Chekka hududlarda yoshlar bilan uchrashganimizda, ular ko‘pincha: “Zamonaviy markazlar faqat viloyat markazlaridami?” deb so‘rashardi. Endi esa Prezidentimiz qo‘llab-quvvatlovlari bilan tuman va shaharlarda ham yangi Yoshlar markazlari faoliyat boshlamoqda.

Kuni kecha shunday maskanlardan biri Navoiy viloyati, Navbahor tumanida ochildi. 350 nafar yoshni bir vaqtning o‘zida qabul qiladigan bu zamonaviy markazda “Ibrat farzandlari”, “UzChess”, “Ustoz AI” va “Mutolaa” kabi o‘nlab loyihalar faoliyat yuritadi.

Zamonaviy kutubxonadagi yangi kitoblar va “Book cafe” ijodiy muhitni yanada boyitadi.

@alisher_sadullaev

⚡️Bugun Prezidentimiz tadbirkorlar bilan ochiq muloqot o‘tkazadilar. Yosh tadbirkorlar uchun ham yangi imkoniyatlar eʼlon qilinishi kutilmoqda.

@alisher_sadullaev

⚡️“Yosh tadbirkorlar” chempionati o‘tkaziladi

Prezidentimiz tadbirkorlar bilan bo‘lib o‘tayotgan ochiq muloqotda juda ko‘plab yangiliklarni e’lon qildi.

Yoshlarning 1 mingta startap g‘oyasi tijoratlashtiriladi va shundan 200 tasi xalqaro bozorga olib chiqiladi.

Eng ilg‘or texnologiyalar olib kelinib, 100 ta mahalliy startap xalqaro miqyosda jozibador biznesga aylantiriladi. Bunga 100 million dollar beriladi.

Bu yildan boshlab, “Yosh tadbirkorlar” chempionati o‘tkaziladi. Eng yaxshi 100 ta g‘oya tanlab olinib, har bir startap uchun 1 milliard so‘mgacha investitsiya kiritiladi.

Bu loyihalarni brendga aylantirish uchun moliyaviy va marketing xizmatlari bo‘yicha ekspertlarning xarajatlari qoplab beriladi.

“G‘oliblarni 20-avgust – Tadbirkorlar kunida taqdirlasak, o‘ylaymanki, yosh tadbirkorlarga bu ham katta motivatsiya bo‘ladi”, — dedi davlatimiz rahbari.

@alisher_sadullaev

⚡️Prezidentimizning tadbirkorlar bilan o‘tkazgan ochiq muloqotida e’lon qilgan yangi tashabbuslari bugundan kuchga kiradi

1. “Yosh tadbirkorlar” chempionati o‘tkazilib, eng yaxshi 100 g‘oyaga 1 mlrd so‘mgacha investitsiya beriladi.

2. Mehmonxonalar uchun 7 yilgacha imtiyozli kreditlar beriladi, mavjud binolarni mehmonxonaga aylantirishga ham subsidiya tatbiq etiladi.

3. Har yili eng yaxshi mehmonxonalar 1 mln dollarlik mukofot bilan taqdirlanadi.

4. Chortoq, Chimyon, Omonxona va Nurbuloqda yirik kurort zonalari tashkil qilinadi.

5. 16 ta tuman uchun 1 trln so‘m ajratildi, kelgusida 30 ta tumanda 500 mln dollar hisobiga rivojlantirish ishlari amalga oshiriladi.

6. 80 tumanda bog‘cha qurishga yer 30 yilgacha bepul beriladi, xarajatlar subsidiya qilinadi, ijtimoiy soliq 1% bo‘ladi.

7. Tibbiyot klasterlari uchun 7 yil muddatga, 3 yil imtiyozli davr bilan 17% kreditlar beriladi.

8. Investitsiya platformasi ishga tushirilib, tadbirkorlar yiliga qo‘shimcha 1 mlrd dollar jalb qiladi.

9. Startaplarni qo‘llab-quvvatlash doirasida 1 000 g‘oya tijoratlashtiriladi, 200 tasi xalqaro bozorga chiqadi, 100 mln dollar ajratiladi.

10. Davlat aktivlari tadbirkorlarga 5 yilga ijaraga beriladi, “Ijara to‘g‘risida”gi qonun yangilanadi.

11. “Ochiq banking” joriy qilinadi, kichik va o‘rta biznes uchun 1 mlrd dollar kredit jalb qilinadi.

12. Foyda solig‘i avans to‘lovi 20 mlrd so‘m aylanmadan oshganda qo‘llanadi, bu orqali 14 ming tadbirkorda 1 trln so‘m mablag‘ qoladi.

13. QQSga o‘tgan korxonalar 1 yil foyda solig‘idan ozod qilinadi, jarimalar qo‘llanmaydi, buxgalter maoshi 6 oy davomida soliqdan chegirib tashlanadi.

14. 2026-yildan soliq hisobotlarini soliq organlari tuzadi, tadbirkorlar faqat tuzatish kiritadi.

15. 2026-yildan “Biznesni 15 daqiqada boshlash” tamoyili joriy etiladi: ro‘yxatdan o‘tish, E-imzo va bank hisobraqami bir vaqtning o‘zida amalga oshiriladi.

16. Sertifikatlanadigan mahsulotlar ro‘yxati qisqartiriladi, 32 toifada muvofiqlik sertifikati bekor qilinadi.

17. Texnik tartibga solish tizimi o‘zgartiriladi — endi nazorat tadbirkorga emas, mahsulotning o‘ziga qaratiladi.

@alisher_sadullaev

⚡️Yaqin kunlarda o‘quv markazlari bilan xorijiy tillar hamda zamonaviy kasblarni o‘rgatishni ommalashtirish yuzasidan muloqot o‘tkazamiz.

Qanday taklif hamda savollaringiz bor izohlarda yozib qoldiring?