لحن تجي اجيال وتروح اجيال يحسين

ثگيل للخدمة


ميت من زمان واحاني العزاء
شريان الحياة قصة كربلاء
_______
آنا من الزغر عاشگ لبو اليمة
تسكتني امي من ابچي چنت بسمه
نعمه الخدمة الله يدوم هالنعمه
بدمعنا وبلطمنا نواسي گلب امه
من دمع البتول شرعية البكاء
شريان الحياة قصة كربلاء
__
انا بعالم الذر وروحي عاشگته
ما بين الترايب والصلب شفته
گلب عندي اعله ابو السجاد كل ونته
حاء وسين ياء ونون سالفته
وادموع العيون لجروحي شفاء
شريان الحياة قصة كربلاء
__
حب حسين بينا انوجد بالفطره
اذا ضاگت علينه نگصد لگبره
لتناقشني بي سولفلي عن عطره
واحساسك شنو من تدخل الحضره
وتسلم عليك املاك السماء
شريان الحياة قصة كربلاء
___
لاموني بمحبته وخل يلوموني
ما يدرون يكمل عقلي بجنوني
سكن گلبي وخيالي وروحي وعيوني
وكل عاشر يجي بي ينخطف لوني
گلبي يرف يگوم لو رفرف لواء
شريان الحياة قصة كربلاء
____
وصيتي من اموتن يالتسمعوني
لبو السجاد اريدنكم تودوني
اريد اخر زيارة من تزوروني
بهيده أشبع من حسين خلوني
وي روح البتول هذا اخر لقاء
شريان الحياة قصة كربلاء
__
الشاعر عبد العظيم احمد الابراهيمي

لحسن شريان الحياة

ثگيل بحق العليلة


يمسافر لطف كربلة عدمن تخليني
يا والدي ومن علتي ياهو اليداويني
تعمه ياريت العين
من بعد وجه حسين
___________
هـلله هـلله بهالضعينه ويــن رايـد
لدرب ما بي رجعه گلبي يگلي گاصد
شلون عني تروح يا نسل الأماجد
بدنيتي ما عندي بس حسين واحد
من گتلي رايح يا هوى حسيت مختنگه
شلون العليلة تحتمل فوگ المرض فرگه
دمعتي اعله الخدين
من بعد وجه حسين
___
لخاطر اسمي النفس اسم امك يغالي
لا تخليني جرح بين الليالي
لو فگدتك ينفگد عزي ودلالي
بغربة ما تنعاف بويه المثل حالي
ينطيك گلبك نفترك وتخيب ضنوني
يعيوني بعدك لو رحت ما أريدها عيوني
انحسب علـ ميتين
من بعد وجه حسين
____
علي خايف بالسفر ليصير موتي
وانت تدري الموت عندي فراگ اخوتي
لو مشيتو تصير دعواي بقنوتي
ربي رجعهم الي ولترد نخوتي
تدري المريض بكل وكت يحتاج لحبابه
ما ادري گلبي يا محب يتحمل غيابه
اهلي كلهم غالين
من بعد وجه حسين
____
اعتذر يا والدي حگي من اعاتب
الدنيا ما تسوه تره بدون الحبايب
شلون تتركني عليلة وگلبي ذايب
اكبر من سنيني يا بوية المصايب
بس گلي اتانيكم بعد لو ما اتانيكم
خايف دليلي من الزغر لا ينفجع بيكم
خوفي يفجعني البين
من بعد وجه حسين
__
وداعة الله بهالضعن يابو الشهامة
احساسي ما يرجع ضعنكم بالسلامة
شلون يهنئ لجفني بغيابك منامه
وانا من هسه عشت حال اليتامى
يابو المحنة بنيتك بالفرگة تفجعها
بوداعك تهل الدمع ارحم مدامعها
يجري دمعي بكل حين
من بعد وجه حسين
___
الشاعر عبد العظيم احمد الابراهيمي

لحن يمسافر لطف كربلة

نزال بحق مسلم بن عقيل (ع)

يا ليث الحرايب
گر عين ابو طالب
حيهم يابو طاهر
_______________
طوعة تنادي حيهم يا شبل هاشم
هاي الگوم انهض جرد الصارم
مثل ما عمك لظهر النبي لازم
دون ابن النبي توگف درع لازم
طشرها الكتايب
گر عين ابو طالب
حيهم يابو طاهر
__
صوت من ابو طالب بسمك ينادي
اريدن يبني بيكم ترجع امجادي
يبني الما نصر ريحانة الهادي
لا مني ولا حسبه على اولادي
دون ابن الاطايب
گر عين ابو طالب
حيهم يابو طاهر
___
يا صنديدها وفارس حرايبها
عبيد ابابي خل سيفك يأدبها
على غدر السبط لازم تحاسبها
بزودك يا شهم جندل كتايبها
خل سيفك يحاسب
گر عين ابو طالب
حيهم يابو طاهر
____
يا مسلم هذوله اشباه موش ارجال
يا رخص الزلم من يشتريها المال
يالسيفك يشيم بالحرب لو صال
زالزال بيمينك يا شهم زلزال
يا نسل الغوالب
گر عين ابو طالب
حيهم يابو طاهر
_____
حبر عالورق جانت كل رسايلهم
من صارت صدك باعو مراجلهم
كدام الذهب ماتت ضمايرهم
بحيدر من تهد سيفك يذكرهم
عمك اسد غالب
گر عين ابو طالب
حيهم يابو طاهر
_____
الشاعر عبد العظيم احمد الابراهيمي

لحن يا ليث الحرايب

موشح نزال بحق ابي الفضل العباس


حيهم العباس صاحت كربلة
منين ما تلتفت زود ومرجلة
_______
منين يا عباس لو نبدي الفخر
من خوالك لو عمامك يالگمر
الام حزامية والاب فراس مضر
تستحق يا شهم هاي المنزلة
____
لوّح بسيفك يشيال اللوه
وكون عنهم ينگطع حتى الهوه
رگابهم مرضى ونزل سيفك دوه
اليوم برض الطف تصير الزلزلة
__
بعزم سيفك زلزل الطف يا كفيل
وصيح انا العباس ابن حامي الدخيل
بالحرب يا ابا الفضل مالك مثيل
ضربتك وحده مثل عقد الولة
____
يمن مثلك ما وفى احد للحسين
بيك حگها تفتخر ام البنين
بيا علي وبيا محمد استعين
وخلي صدرك درع دون البسملة
___
هد يطوفان المراجل والشيم
وخل يرفرف فوگ الخيام العلم
تطمئن لو شافت الراية الحرم
وزينب تظل حدر فيها مدللـه
___
صول يمشيم الحسين برايتك
وعلى خشوم اعداك اترس جربتك
تشبه الكرار حتى بمشيتك
وهم مثل حيدر تحل المعضلة
__
بسيفك أگلبها اليمين اعله اليسار
أنت يا عباس وارث ذو الفقار
يا أمير بجفك اليوم القرار
بحملة وحدة الكون كله تزلزلة
__
الشاعر عبد العظيم احمد الابراهيمي

لحن حيهم العباس

نزال عگيلي بحق علي الأكبر


حيهم يالاكبر يا عمي
____
صال الاكبر شمعة ليله
وصوت العباس يشد حيله
وامه من الخيمه وتدعيله
سالم ريت ترد يا حلمي
حيهم يالاكبر يا عمي
_____
حيهم يامن تشبه طه
اهلك بسمك خل تتباها
امك تنتظرك عيناها
گرهن ، يالعزمك من عزمي
حيهم يالاكبر يا عمي
____
هد واگلبها الحومة بزودك
هز السيف ونومس عودك
گص رجله اليتعده حدودك
وللخيمه يرد سيفك مدمي
حيهم يالاكبر يا عمي
___
بحيدر ذكرها وحملاته
وبعمك حمزة وسطراته
يالسيفك ترهب صولاته
يومك هذا اليوم ويومي
حيهم يالاكبر يا عمي
__
عنك خل يسولف سيفك
ومن الخانو ياخذ حيفك
اليوم امر الطف صار بكيفك
دمك حار يشابه دمي
حيهم يالاكبر يا عمي
___
يا اول فارس من هاشم
كالو حيدر هذا القادم
صارم وبجفك هم صارم
ريتك انت وجفك سالم
يالتجلي بصولاتك همي
__
الشاعر عبد العظيم احمد الابراهيمي

لحن حيهم يالاكبر يا عمي

زينب (ع) تندب العباس (ع)


يا وارث ذو الفقار
وصلت لخيامي النار
ما تنهض يا عباس
بيه شوصى الكرار
_________
يوارث حيدر الكرار ما تگعد تحامينا
الزلم والخيل يا عباس بعدك دارت اعلينا
اذا تنشدني عن حسين تره مذبوح والينا
وعلى صدره تدوس الخيل واحنه الشمر حادينا
واسمع بذني الاعداء
تشتم امي الزهراء
ضليت الطم عالراس
بيه شوصى الكرار
__
الليلة اختك يبو النوماس لا والي ولا خيمة
من بعد الخدر والعز بالبر تسكن الهيمة
لا بيه اوصل لجسمك واسولفلك يبو الشيمة
واسمعك گلبي شهنو يگول واحجيلك على ضيمه
هلن يدموع العين
للعباس ولحسين
بس مو كدام الناس
بيه شوصى الكرار
_
يبو فاضل اسولفلك عن حسين هاك اسمع
على صدره الشمر شفته يخويه لمن اتربع
گلب جسمه على وجهه وبنحره بده يگطع
وطلعت بليل ادورنه والمن جسمه الموزع
الخيل الداست فوكاه
داستني ريت وياه
لن بيتي خلافه انداس
بيه شوصى الكرار
__
يبو فاضل لون تسمع احجيلك مآسينا
ريتك حاضر وتنظر السوط شسوه بسكينه
تگول الماي ما اريده خل عمي يرد لينه
علينه تجاسروا عباس واحنه بذمتك جينه
المحد شافلها خيال
هسه بـ ولية انذال
وينك يابو النوماس
بيه شوصى الكرار
__
وين انطي الوجه عباس باصرني يضي عيني
وباجر خويه لأبن زياد راح اعداك تسبيني
صفت مضرب مثل للناس الخوه البينك وبيني
هاي الساعة ساعتها ما تكعد توافيني
الخوه تريد اليوم
وكفاتك يا جيدوم
يالچف ايدك ينباس
بيه شوصى الكرار
___
الشاعر عبد العظيم احمد الابراهيمي

لحن يا وارث ذو الفقار

شوط كربلائي زينب تندب بني هاشم


حيهم يا بني عدنان جسم حسين عالغبرة
من بعد الذبح يا حيف داست خيلهم صدرة
_________________
زينب وگفت اعلـه التل شگول شـلون وگفتها
عين لصوب ابو السجاد وعـين لباجي اخوتـها
شافت جثت المـظلوم الخيل شلون سحگتها
صاحت والگلب مدمي
حـيـهم يـا بـني عـمـي
الخيل اتدوس ببن امي
روحتها اعله صـدر حسين ورجعتها على ظهره
____
يهاشم تغمض الكم عين وابنكم عالترب دامي
البـچـفـه البـحر و الـبـر تالي ينـذبح ضـامـي
و حرمكم يـهل الـمـروة محـد عنهن يحـامي
ويـن سـيوفكم يـكرام
عالذل ما اضنها اتنام
يسبون الحـرم للشام
مـا تـقبل حـميتـكم بنات المصطفى أسرى
___
حميتكم يهاشم وين عـن حـسـين وعـيالـه
شيخ الطايفة مذبوح وعليه تسحگ الخياله
ونسوانه عـلى الهـزل مسـبيـة ويـه چـتـاله
وين الـ بالعجل يفزع
ولطف كربلة يـگطـع
ويـأخـذ ثارنـا مـربـع
بالطف سطرت الزهراء عادت وبألف سطرة
_
مـن حرگو خيمنا وطاح عـالـتربـان والـينـه
فرد ركضه ركضنا اعليه ويم جسمه التمينه
حاچينه لـچّـن حـسين مـا يـگدر يحـاچينه
الخيل شسوت بجسمه
يـنزف كـل كـتـر دمـه
ويـلاه اعلـه ابـو اليمه
ما يگـعـد يبـاصـرنـي بأمر العايله وأمره
___
اريد اليوم اوجه اعتاب لبوي المرتضى حيدر
عجب يا حاضر سليمان ما تحـضر لـبو الأكـبر
يبويه ابنك غده مذبوح وبناتك ساكـنات الـبر
علـي يا حاضر الشدات
بنـاتك بـالـبراري تبـات
وتحدي ضعونهم شمات
نريدك تحضر بهالحال وتحضر فاطمة الزهره
____
الشاعر عبد العظيم احمد الابراهيمي

لحن حيهم يا بني عدنان

الامام المهدي مع كربلاء



أيُّ حُزنٍ فيكَ يَسرِي قَطعُ كَفٍّ حَزُّ نَحرِ

أَو تَرَى زَينبَ فِي الظَعنِ تَسِيرُ

قَد قَسا الشِمرُ عَلِيها والمَصِيرُ

أَيُّ جُرحٍ قَد بَكِيتَهْ
_________
سَيّدي تَفدِيكَ نَفسي أيُّ حُزنٍ قَد ضَمَمتَهْ ؟

يَومَ عَاشُوراءَ قُل لي أيُّ فَرضٍ قَد أَقمتَهْ ؟

أيُّ صُبحٍ أيُّ لَيلٍ ونَسِيمٍ قَد شَمَمتَهْ ؟

أ بِرضوَى كُنتُ أم فِي كَربلا طفّاً حَضرتَهْ ؟

أَنتَ فِي الذَّرِ تُنادي كَربَلا جُرحُ الفُؤادِ

أَنتَ للحُزنِ وللبَلوى أسِيرُ

أَو تَرى زَينبَ فِي الظَعنِ تَسِيرُ

أَيُّ جُرحٍ قَد بَكِيتَهْ
________
عِندَ مَن مِنهمُ تَبكِي سيّدي دَمعاً وَجَمرَا

أ بَكِيتَ الكَفَّ جَهراً أم بَكِيتَ النّحرَ دَهرَا

أَو تُواسِي عِندَ تَلٍّ زَينبيٍّ قَلبَ زَهرَا

تَذرِفُ الدِّمعَ تُنادِي أيُّها المَذبوحُ صَبرَا

كَم بَكِيتَ العَينَ عَينا وَا حُسِيناً وا حُسِيناً

تَقرَأُ القُرآنَ والحُزنُ كَبِيرُ

أَو تَرى زَينبَ فِي الظَعنِ تَسِيرُ

أَيُّ جُرحٍ قَد بَكِيتَهْ
_________
هَل رَأيتَ الخَيلَ دَاستْ كُلَّ أضلاعِ الحُسِينِ

هَل رأيتَ البَدرَ عَبّاساً بَقى مِن دُونِ عَينِ

جِيدُ عُبدِ اللهِ يَهوي تَحتَ ضَرباتِ الرُّدينِ

فِي العَرا الأطفالُ يَبقونَ بلا أيِّ مُعِينِ

تَحتَ حَرِّ الشّمسِ صَارُوا حَيثُ يُتمٌ حيثُ نَارُ

مَنظرٌ في الذِّهنِ مولايَ مَرِيرُ

أَو تَرى زَينبَ فِي الظَعنِ تَسِيرُ

أَيُّ جُرحٍ قَد بَكِيتَه
_________
قَلبُكَ الطّاهِرُ جَمراً صَارَ مِن حَرقِ الخِيامِ

كُلّما شَاهدْتَ نَاراً مُتَّ مِن فَرطِ المَلامِ

رِحتَ تَدعُو لَيتَني يَا رَبِّ مَقتولٌ و ظَامِ

أَو يَرضُّ الخَيلُ صَدري وأَنا عَنهمْ أُحامِي

لَيتَ جِسمي بِالسِّهامِ نَثرُوهُ يَا إمامي

سيّدي يَجرحُني ذاكَ الضّمِيرُ

أَو تَرى زَينبَ فِي الظَعنِ تَسِيرُ

أَيُّ جُرحٍ قَد بَكِيتَهْ
_________

كُلُّ صُبحٍ تَقرَأُ القُرآنَ والآياتُ ثَكلَى

فَترى الطّفَّ جِراحاً وَسطَ هَذي الرُّوحِ حلّا

تَذكُرُ السّبيَ وصَوتَ الزَّجرِ والعَرشُ تَدلّى

وتُنادِي زَينباً وا رَملةً فَاطِمةً آهٍ وَليلَى

عَمّتي قِيْدتْ لِشَامِ آهِ مَا جَدوى الكَلامِ

ليتَني في السّبيِ والأمرُ عَسِيرُ

أَو تَرى زَينبَ فِي الظَعنِ تَسِيرُ

أَيُّ جُرحٍ قَد بَكِيتَهْ
_______
سيّدي يَا نُورَ عَيني شَيّبَ الطّفُّ شَبابَك

سيّدي أَنتُ المُعزَّى جَبّرَ اللهُ مُصابَك

مِن دَمٍ تَبكِي حُسِيناً فَاتِحٌ للحُزنِ بَابَك

فَمَتى تَطلُبُ ثَأراً سيُدي تُنهي غَيابَك

تَبتدِي صَرخةُ دَينِ ** يَا لِثَاراتِ الحُسِينِ

يَبتدِي عَهدٌ عَلَى الدُّنيا مُنِيرُ

أَو تَرى زَينبَ فِي الظَعنِ تَسِيرُ

أَيُّ جُرحٍ قَد بَكِيتَهْ
_______
علي حبيب الشابي

عاشور الاحزان اليوم يا شيعه هل هلاله
———————————————
هذا عاشور النوايب يبتدي الليله استمع
لبسوا ليل الله المصابه و باللطم كسرو الضلع
كون اذا ما تعمى عينك المن بعينك دمع
هذا شهر ام المصايب حگه گلبك ينفجع
دموعك تصب يا وفاي عالخد تظل هماله
————————————————-
شهر الاحزان بدمعنه اليوم خل نستقبله
نواسي زينب و الزجيه بالحسين و مقتله
فاطمه تحضر ويانه و البجي وياها حله
تهون كل مصيبه عدها يم مصيبه كربله
يا شيعي ماجور اليوم عاشور باستقباله
————————————————-
نبتدي مجلس عزائنا باللطم و اللوعه
شگد خطيه الما توالي من البجي ممنوعه
الشيعي من يبجي اليضده رهبته من دموعه
يا حسين اصرخ يشيعي صرختك مسموعه
صرخه تظل للتاريخ تسمعها كل اجياله
————————————————
حزام شدينه الخدمته و علگينه الرايه
شيعه و بدمنا و دمعنا للنحر وفايه
احلى ايام بعمرنا هالمجالس هايه
نركض بلهفه اعله مجلس لو سمعنه قرايه
نلطم نظل فوگ الراس للگطعوها اوصاله
————————————————
احنه خالقنه الله لاجله نحيى اذا نبجيله
احلى ليله من عمرنا بلا نقاش الليله
ماكو واحد عدنه يتعب مجلسه يشد حيله
هذا ابو اليمه و نخدمه بلا رياء و حيله
ملوك احنه لا مو خدام عشنه عمرنا بجاله
————————————————-
اليذم هاي الخدامه لا يخرب نيتك
سد اذانك عن حجيهم فاطمه متانيتك
كون اليشوفك يعرفك بالعزه تربيتك
اخره و دنيا يشيعي الله يرفع صيتك
بحركه اللطم هذا اليوم للسحگته الخياله
————————————————-
خدام الامام الحسين (عليه السلام)
الشاعر : عبد العظيم احمد الابراهيمي
الشاعر : محمد عبد الامير الابراهيمي

العليله تبقى في الدار وتترك باب الدار مفتوح الى ان يجن عليها الليل تقول
ايس يگلبي الباب سده
ضعن الاهل مالاش رده
مطول يجنه موش مده
شده فركت الخوان شده
يعونه الابو بالبيت عده
ايس يكلبي وزيد الاونين
احبابك تره صارو بعيدين
لدروبهم مشبوحه الي العين
وايس بعد مايرجع حسين
حسين الزركاني

ليسـتة #مؤسسة منبريون الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 300 عضو
━━━━━━━━━━━━━━━━━━
للإشـــتِـراك 👇🏻.

وإرسل قناتك هُنا : @ahmed_alziwar0

--------------------------------------------------

قناة تعليم الرواديد الالحان
https://www.tg-me.com/ahmed_alziwar1

اذا ادور قصائد سهلة الحفظ وجميلة المعنى ادخل هنا ما راح تندم


🔗 اضغط هنا للانضمام
📡 https://www.tg-me.com/alhagamy78sattar