#محرم_الحرام
#ليلة_السابع

الآلآم مولاي الحسين ص عندما رجع من مولاي أبا الفضل العباس وهو منكسر يخاطب مولاتي زينب ص

__________________________
طاح العباس..وراح الشوف أمن عيوني
دنگت الراس..ابـجي وخـاف يشوفوني
رديت المتيه البيه
دلتني الخيمة رقيه
__________________________
من المخيم حد وكعته بهالمسافة أرجعت شايب
حسين موش حسين راجع جلجلت فوگي المصايب
راح حيلي وجدمي يرجف صرت اهوى عالترايب
حگي لو طيحن يخويه گلبي مـن اهروشه ذايب

هناك ظلت روحي
وين اضم جروحي
واشيسكت نوحي__وعباس الراح

زينب حشمي..هلبت يسمع لو صحتي
البيرغ هـزي.. محتاجه وضيج وكتي
شوف العباس امّيّه
دلتني الخيمة رقيه
__________________________
خويه گوديني لمجانه خل اطب للخيمة اشمهه
شلون اجر بيدي عمدهه وخيمة العباس اسمهه
خويه بس صدي عليهه مـاي ينبع مـن رسمهه
شايلة الـعـبـاس كـلـه زينب شـمـكـبـر حجمهه

مشت ذيج ايامه
راح طول اجدامه
اخوج شد الثامه__والطم ضليت

الطم جا ليش.. حگي لو الطم راسي
جانالي الجيش..عباس اهلي وكل ناسي
عشرة وراحت هاهيه
دلتني الخيمة رقيه
__________________________
عمري ما مخنوك هسه گوه يوصل هوى لـريتي
لا تسئليني اعـلـه شيبي شابت بشوفه لـحيتي
انه لو مـا انتي زينب بصف اخونه جـت منيتي
بس اجيت اجدامي اجرها خاف ببحدج بقيتي


دمه تارس عينه
راح عـم سكينه
اتكطعت جفينه__ومامش سگاي

كلش مخنوك.. الله يصبرك يا گلبي
حگك محروك..مدوهن مااندل دربي
عجل ياموت الجيه
دلتني الخيمة رقيه
__________________________
لـلاخـو متروس عـازة و يعرف الفاگد عضيده
وين ينطي وجهه بـلا الماهو اخو واهوه يريده
خيمة انه وسگفي طايح اتحضرت فوگي الرعيده
انكشف ظهري ستوحدوني وأيده عن ايدي بعيده

فگده كاسر ظهري
لله سلمت امري
ما اريدن عمري__وشلي بلياه

بيه يشمتون..من تالي وخل يسمعها
طلعت العيون..الجان بسيفه امخرعها
رايح كلشي أمن أيديه
دلتني الخيمة رقيه
__________________________
خادم الحسين محمد منير المياحي

#محرم_الحرام
#ليلة_السابع

لسان حال مولاتي زينب ص عندما
وقع مولاي أبا الفضل العباس ص....
______________________________
كلشي سكت__من طاح الگمر
ولـلـخيمة مـاوصلنه__بـس سـمعنه__يخوي
معقولة وگع__سگاي الضعن
وحسيني بسرعه طالع__شفته جازع__يبوي


كل خطوة وگع__تيه دربه ويلي
واسمعته صرخ__وينك ياكفيلي
الدم بيه يبس__اخوي ومايجيلي

ظليت اصب بدموعي
وجفي شبج عالراس__بعيني گمت ماشوف
صاب الرجيف ضلوعي
لـمـن وگـع عـبـاس__الغربه ابتدت والخوف

اه ياويلي__ما يرد جنه لخيامه
اه ياويلي__عالخدر بعده السلامه
_____________________________
اوكفت انتظر__عالخد الطمت
ماعندي شخص اسئله__عني وصله__انگطع
ماني امكفله__لو راية انجفت
كـفـالي يمشي عـنـي__هـسـه ونـي__انسمع

ودعـت الصبر __وانطر بس يجيني
شو طَول عجب__يعصر جفني عيني
لو رد دون اخو__اشد حبلي بديني

من هسه أشد احبالي
فـوك الـرجـل والايـد__لـو مـااجـه السگاي
لـو بـس رحل كفالي
حسينه يظل اوحيد__وينطرني ركض هواي

اه ياويلي__بالگلب عايش كلامه
اه ياويلي__عالخدر بعده السلامه
_____________________________
بَـيّـن شخص__بس محني الظهر
مستثگل يمشي گوه__ومـالـه تجوه__انعمه
منو ذاك الاجه__يـاروحـي اظـن
حسين الرد روحه جمره__وكله حسره__ودمه

تـگـابـلـنـه بـدمـع__وشينفع دمعنه
تـيـهـنـه الـحجي__واتطشرت خيمنه
عـامـود الـخـيم__طايح وي گمرنه

راح وبـدت غـربـتـنـه
وضحكت علينه اشكال__ماطالع الهه السان
فـگـد الـگـمـر عـذبـنـه
سـاعـه ويجي الجتال__ماتبقى عندي اخوان


اه ياويلي__مابـعـد تنفع ندامه
اه ياويلي__عالخدر بعده السلامه
_____________________________
حسين انكسر __ كسرت غصن
وأنه بحسراتي انوحن__وين اروحن__صحت
حيرة و الـم__فَـيّـنـه انـطـفـى
والبس من جفه اشرب__عنّي غرّب__نحت

مـلجـومـة بأخو__مثله من اجيبن
وجـروحـي بدت__بفگده مايطيبن
ابو الأكبر بـجـه__ وگـلالـي قريبن

للهزلة حضري اجفوفج
اتحملي العليج يصير __شفته شكثر محتار
صعبة يخيتي اشوفج
وعـيـنـج عـلـيـه تـديـر__جدمج اصد بي نار

اه ياويلي__والنظر بادي بظلامه
اه ياويلي__عالخدر بعده السلامه
______________________________
خادم الحسين محمد منير المياحي

اللحن 👈 @mm779mm

#محرم_الحرام
#ليلة_السابع
#لشجاعة_مولاي_قمر_بني_هاشم_ص_
————————————————-

شافو مهرته وكلهه رجفت
جدم ابو فاضل حرب طبت
كلهه تدور ختله شردت
خسفت اجدامه الكاع خسفت

بعيونه يجدح لهب—عباس ابو فاضل
عزريل بسمه انكتب—قابضها هل نازل

منه ترجف زلم—طبها يهدم هدم

————————————————-

ادخيله عله الميدان لو طب
زلمه اللاگاله منه مهرب
عباس حيدر سيفه مصلب
لباب الشجاعه اسمه مضرب

سيفه عله الشارب—ما يثني لو جاها
روس وعگل جايب—وي رفت الواها

الله حي الگمر—سوا بيهم دهر

————————————————-

بباب النهر ويلگط الروس
ياهو اليريده يجيبه مخلوس
عباس سيفه امكسر ضروس
والما يعجبه يحطه ويدوس

بأجدامه كلهه سوا—صار الوجه اصفر
غيّر شكل نينوا—صار الشكل احمر

دم ترس كربله—ابن المعدله

————————————————-

لولا القضا ماخله فرسان
عباس جفه صار دفان
للكوفه واصل جيش فحطان
حي الله غيرة بني عدنان

دمه يفور الكلف—والدم طبع لأهله
خسف بيهم خسف—ماظن تظل سهله

علي ابنه نجر—بخيله شد ويجر

————————————————-
خادم الحسين محمد منير المياحي

اللحن👈 @mm779mm