مولاتي زينب (صلوات الله عليها) تروي ماسيجري عليها ومولاي امير المؤمنين (صلوات الله عليه)على فراش الموت



ليلة عجيبة_اختنگن مواعيد السموات
دمعة ومصيبة_كل اليتامه ببابك تبات
روحي غريبة_والغربة تبدي لو علي مات

ابجي الدمع ياعيني
انكسرت عقيلة هاشم__بفراك ابوها
والصوت يترس ذاني
الماعدهه جف يسترها__بسع طلعوها

ياخبزت المحروم راحت
دمعت هضيمه عيني سالت
علي ياعلي
_
طاحت دمعتي_اعله اذيالي واشتميت عطاب
كتله بحسرتي_من وين اجيبن للخيم باب
هينه ركضتي_بس صعبه اخوي بلايه الثياب

يابويه ابد ما ترهم
باجر ركض وامشاگف__سياط أعله ظهري
علويتك المستورة
وياك أودع كلشي__ يتبده گدري

حسرت غريبة تصير باجر
مصابك بده وافتحت عاشر
علي ياعلي
___
برجلينه بسته_واتوسله بس ياعلي گوم
ابجي وشبگته_مهضومه يبجي اعليهه مهضوم
تبين كسرته_وگلبي تعرفه الناس ملجوم

ظل الحجي المامحجي
والوكفه فوك التله__انكتبت عليه
من هسه أعلم روحي
اركض واطيحن واوكف__وحبلي بأديه

شيصير بيه و بدلالي
ياغالي أودعه وشنهي حالي
علي ياعلي
_
اسم الأميرة_من بالي شلته واعرف الجاي
ادري اسيرة_وانــه وخواتي كلنه حفاي
حيدر عشيرة _خلاني اون وجرحه جواي

حيدر جواني بگلبي
ماحاجه تجوي اجدامي__نار المخيم
فحطت اعيوني التهمل
گمت اغفى وأنه اتخيل__فوگ الظهر دم

النيران تلسع كلشي بيه
يضيع اسمي ويشلون اديه
علي ياعلي
___
المتعوبه زينب_مـن امــي للطبره للحبال
حگ ظهري حدب_مو صخره انه ولاني تمثال
مايرضى اتعب_ليش اقتنع بنته أويه جتال

بوشية حگت اثخينه
حته من اطب مجتوفه__ماشوفن الشام
ويدري بلايه الهودج
تلوح الشمس بجتافي__ومااغفى لا نام

طبول الفرح اسمع هضيمه
ايتيمه واسكت جم يتيمه
علي ياعلي
_
خادم الحسين محمد منير المياحي

#بناء_البقيع_مطلبنا

اللهم عجل لِوليكَ المُنتقم الفرج..

#وآولداه_وآحسيناه
رزقنا الله واياكم خدمة الحسين لهذهِ السنة
#للبكاء_والابكاء_مع_مولاتي_فاطمة_ص
#لمحرم_الحرام_1445_هـ

قريباً سوف أقوم بنشر مارزقوني به
سادتي آل محمد صلوات الله عليهم من #قصائد_محرم_الحرام_1445_هـ
ان شاء الله نسئلكم الدعاء والتوفيق

خادم الحسين محمد منير المياحي...
@mm779mm

#محرم_الحرام_1445هـ
((محرم الباكين))
مولاتي الزهراء(ص) تخاطب الخدام


هـذا مـحـرم جـانه__يخدام
وانعادت النه احزانه__يخدام
ابني احترك صيوانه__يخدام

طاح وخيمته__حركوها گدامه
مسحوك وبقت__عينه عله اخيامه
داسو بالفرس__واتسلب اعمامه

عينه بقت__صوب الخيم
يسمع اخت__عندك حرم
كوم انتهض__لمن سمع
گـام أو وگع__من السهم

شدو الهمه و لطمو لأبني البلفله
الدمعة التنزل منكم حسرة لكربله
دمع الصادق بالحب يروي العايله

وآحسيناه وآحسيناه

__

عينوني اون ما بيه__يخدام
اعله الجثته مجويه__يخدام
واخته مشت مسبيه __يخدام

مرمي بالشمس__والناس حاطّته
يسمع زينبه__يحسين حشمّته
ابجو للوگع__وبالغربه عاف اخته

مصابه ابـد__ما بي صبر
ياكل گلب__ايگصر العمر
محد مثل__حاله ابـد
عنده حرم__راحن يسر

إنعو بگلب الذايب لمصابه بحزن
عالميت بس راسه ما سد الجفن
بحرگه وحيل اليلطم يلطم عالمتن

وآحسيناه وآحسيناه

__

عالظال مـحـد شـالـه__يخدام
اتطشر أمن الخياله__يخدام
ماسلم شي بأوصاله__يخدام

لطمو عالولد__ظل مرمي بالصحره
نايم عالوجه__مدري شيضم حدره
ابني عالترب__والترب مو گدره

ويلي الولد__ظـل وحّـده
بنتي مشت__بيد العده
هضم بهضم__ويل بألم
فوك الرمح__راسه غده

لا هدم السالم ظل لا سالم صدر
عمري امصايب كله خلصت العمر
مـن بابي للخيمة لـجروح اليسر

وآحسيناه وآحسيناه

__

ابجو عليهه اهوايه__يخدام
ضعن المشه بلا رايه__يخدام
والناس كالت هايه__يخدام

كالو عالضعن__هذا ضعن زينب
كدام الخلك__كلما حجو تتعب
من كد البجي__حته الظهر حدب

زينب فرق__ويه الگمر
بعده العمر__بس للقهر
ماشت زلم__تالي الوكت
مـا ينحمل__هذا السفر

ياسفرة اللي ترهم من دون الاخو
مسبيه والوادم ما بيهم كفو
شما طبت لمجان يعيرها العدو

وآحسيناه وآحسيناه

__

خادم الحسين محمد منير المياحي

#محرم_الحرام_1445هـ
قصيدة ((يوم الجرح))

يبن شبيب إن كنت باكياً لشيء فأبكي الحسين فأنه ذبح كما يذبح الكبش

مولاي الرضا(ص) يُحدث ابن شبيب عن آلآم الحسين (ص)وقساوة وعذاب كربلاء
~~~~~~~~

يوم الجرح__يبن شبيب ابجي اله
يوم الجرح__يوم الحُسين بكربله
يوم الجرح__مثله فلا صح معضله
يوم الجرح

لا يوم وي يومه ابد
حسين البقى بلايه اهل
لا أخو ظله ولا ولد
من العطش جبده ذبل

ياقساوة كربله__الـمـا رحـمـت بحاله
بـگـاع مـاكـو عـرف__مهضوم بعياله
الـمـاي سـر الحيا__لاجـن كـسر گلبه
جـدي اول بـشـر __والـمـاي كـتـالـه

~~~~~~~~

صب الدمع__للحاطته آلآف العده
صب الدمع__نـاصـر يـدور وحّـده
صب الدمع__مكسور بخيامه غده
صب الدمع

محتار ويصد عيلته
يفرك بأديه حيل انكسر
عدمن يخلي البالخيم
وعالشاطي طايحله گمر

ياحسافة الـدمـع__شـيـفـيـد بالحيرة
جدي ولية انوله__اعليه شحت الغيرة
استوحدو وانهضم__واصوات لأيتامه
احتار ذاك الظهر__وجهه المن يديرة

~~~~~~~~

مُفرد صُبح__واربع جهات تحاوطه
مُفرد صُبح__كلهه اعله ذبحه امخططه
مُفرد صُبح__جرحه التراب يخالطه
مُفرد صُبح

يبن شبيب اكبر هضم
لـو لاحـت الزلمة العصي
واحجار وارماح وسهم
كلهن عليه مامش خطي

يومه كلش صعب__ماكو مثل يومة
طاح من العطش__مابي اعله الگومة
عيونه غارن هضيمه__تفطرت اشفافه
والضماير حسافة__اهـناك معدومة

~~~~~~~~

عيش الالم__جدي انذبح من الگفى
عيش الالم__عالگاع اشرف دم صفى
عيش الالم__راح المخيم وانطفى
عيش الالم

ما ميت وركضو عليه
سحگو وبعده بـي نفس
سـال الدمه مـن كـتـر
جم حافر بصدره انغرس

اتساوه وي الارض__ماضلت امتونة
جسمه ضيعو بالسحك__عن لايلمونة
بكل مسافة كتر__وامطشرة اوصاله
اتغسلت كل البشر__بس مايغسلونة

~~~~~~~~
خادم الحسين محمد منير المياحي

#محرم_الحرام_1445هـ

الى مولاي الغريب أبا عبد الله ص
________
نوحي حسراتي
حزني واهاتي
ليلي يخلص هضيمه بس اون
سيد جروحي
لخيمته نوحي
من جمرها انلسع أحسه جم متن
منذبح ضامي
حسرت ايامي
كل ثواني اله بجه الجفن

تبجيله عيون=گد كبر الكون
كل لحظه انعاه=ويه اليبجون

لخاطر ضعونه وخيامه
اسهرله ليلي وما انامه
اليعشگله واحد منذبح
يقرا على الدنيه السلامه
________
ماطفت ناري
سيدي عاري
وني عالظل رميه عالترب
محد بحاله
يسئل اشماله
طايح وعالوجه ظل منگلب
سمعو ياوادم
بس أبن هاشم
امفطره شفافه منحرم شرب

يكسرني الماي=وابجيله هواي
ياوسفه حسين=يغله اعليه ماي

اگضيهه اه و هضـيـمه
عالضامي حزني اديـمه
الدمعه قدر كلمن يـحب
و المابچه الزهره خصيمه
________
حسرتي بضلعي
انهضم وانعي
حسرت الفاجده دمع اهل
روحي مسبيه
روحي مجويه
روحي خيمه ببجيهه تشتعل
عاشرت حزنه
بيه بس ضعنه
يحدي گلبي الالم بس ماامل

ما مل النوح=كل عمري جروح
رايد حسرات=تجويلي الروح

حسرت زغيره و عمرها
و الخيمة تجوي ظهرها
يبجيهه گلبي و عيوني
وياروحي جمرة حدرها
________
من تشوفوني
بدمعة عيوني
يعني احجي گلب مو للشعر
هضمت العاشر
دوست الحافر
بيه تاكل مصايب الخدر
طيحت الخيمة
امراكض الهيمة
حرمه تعثر عليهه يصعد الجمر

يذبحني الصار=تهضمني النار
المهيوبه تضيع=ومحبوبي احتار

من حيرته بيه حيرة
صرت انعى خدر الاميرة
كل العواطف بيه هاجت
وامصيبتي كلش جبيرة
_________
خادم الحسين محمد منير المياحي

#محرم_الحرام_1445هـ
———————————————-
بكلبي يجوي دمعي
حسره تجوي ضلعي—غرام
عاري ظل حبيبي
بزغري حد مشيبي—خيام

الطايح سيد اجروحي وشتكفي حسراتي
مااظن يكفي نوحي و لا تكفي اهاتي
عاشت بيه الغربه و تجرحلي بصفاتي
ذكر الطف يذبحني و تتعاله وناتي

ينسمع—حس المصيبه
دمعته—طاحت لهيبه
فيه الي—واخته غريبه—حسين
تنجرح—بالطف ضعونه
سيدي—غارت عيونه
ماله احد—يطلبه عونه—حسين

———————————————-
صبحي ليلي هضمه
عشره ويه ضلمه—لمصاب
زلمه خلصو اهله
ركبو اعله هزله—عذاب

ليش تدور الدنيه و تكثر طيحاته
ليش الطف يذبحه و يوجر خيماته
طلّع ستره بهيمه و ركضلّه ابنياته
طول اخته الماطالع شافته الشماته

ينذكر—ستره وخواته
مو فشل—نحجي بناته
ينهضم—اعله امدلالته—حسين
بالشعر—سَووها عاده
ماتصير—للأهله ساده
نطيبه—ونشلع ضماده—حسين

———————————————-
خيمه بيه تحرگ
بنبضي حافر يدگ—جروح
دمعه ويه دمعه
بخنگه ابجي ضلعه—انوح

وشمعنه ابن الزهره كلهه تسحّك فوگه
ياهو الميت مثله و اعظامه مطبوگه
بذاك اليوم يناشغ و انفاسه مخنوگه
دار اطراف اعيونه لن اخيامه مبيوگه

بالنفس—تجرحني شهگه
امخيمه—غربه تحرگه
كلبي اله—واجب احرگه—حسين
تنجفي—بخدي دموعي
تحترك—روحي وضلوعي
بالمصاب—يكبر خشوعي—حسين

———————————————-
جرحي اله بفطرتي
من اذب عبرتي—لأمير
الدمعه غيره تصنع
زلمه منهه يطلع—جبير

عبدلشفته الذبلت هذا الشي يكفيني
غير الطف شعندي بس هوا يجويني
كسرت روحي الخيمه واليركض حانيني
هيه التركض زينب واجب اشلع عيني

يادمع—اليكفي ذبحه
ياهضم—اليسدله جرحه
سيدي—امشوغني رمحه—حسين
زينبه—بالهيمه ضاعت
عالهزل—جتفوها طاحت
وي غرب—مهضومه راحت—حسين

———————————————-
خادم الحسين محمد منير المياحي

#محرم_الحرام_1445هـ
((رهينة الحب))
_

روحي رهيـنه__روحي أسيرة بـيـهه شـايـل خيام
جروحي ضعينه__كلي حيرة تحدي بيه اعله شام

جنت احس روحي صنم
عايش بدنيه الوهم
مرت اعليه الخيم__وصحتّني الخيل
اتراكض بروحي الضعن
صرخة بالنار انجون
يـم زلـم يـتـراجـفـن__واهنا بعد ويل

الـ اعله جبينه يشوفه ونصيبه
وأنه نصيبي اعشك مصيبه
طالب سبيل اعبرت اعله حزنه
وجاست ضميري صرخة غريبه
_

گلت اعاشر __حزنه اشوفن شنهي يضم محتواه
شفت الخواطر__مكسوره تبجي وكلهه تصرخله اه

جولة اخذت بهالحزن
واطلعت كلي اون
اتصورت نار و متن__وحرگـتّه هواي
وببالي طفله امحرگه
تركض لصوب السگه
تگله شفته امشگگه__وبابا إبلا ماي

گـلـبـي لـعـذابه وقّـع مصيره
هـزنـي كياني وهالصرت اسيره
الشفته وجرحني اهواي بعذابه
الاكثر هضمني ابنيته الزغيره

_

حُـبـه خضّر __وي دمعتي وماعندي ويا شريك
كلشي اگدر __وكلشي اتيه بس گتله اندل اجيك

روحي معگوده اله
وحزني كله لكربله
انـه اسـير بسنسله__بس إبلا صوط
مرتبط ويه الدمع
الحسرة تاكل بالضلع
واليحب عنده طبع__مَتهمه اشروط

عين البصيرة الخلتني اجيله
عدلتني حيل دموعي الثگيله
مااسوه جنت وخلاني اسوه
طباني بـيـتـه انـعـى العقيله

_

انـوي دمـعـي__كـلـه قُـربـة وديـن اسده العلي
عندي ضـلـعي__وخل الحّگ حيل الطمه بـدي

خايف يروح الوكت
وانا مو هلگد نحت
ما نطيته بس ردت__من عنده حسين
طبعه لا ما يعتذر
لله ثـوبـلـه خـدر
وخيمته أثواب الجمر__شيسد هالدين

شخصه سحرني الرخصلي نفسه
تبحر جروحي و بيبانه مرسه
النطاني كلشي خاضع اجيته
يروض دمعتي وروحي الشرسه

_
خادم الحسين محمد منير المياحي

#محرم_الحرام
#ليلة_مولاتي_العليلة ص

لسان حال مولاتي العليلة ص
_________
يروحي تعذبج الفرگة_وعلى الملگة
طلع صوته ونينج
هلچ مـا الـهـم اي رده_ ومـنـو بعده
يمسح دمع عينج

عليلة وگـمـت أجـلـب بـالـيعبرون
اريد اعرف خبر عن ذيج الضعون
خلصت الدمع راح ابـجي الـعيون

عيني خلّص دمعها__روحي ذابل ضلعها
العليل تهجره أهله__حـالـه محد سمعها

اه يهلي غريبه اه يهلي غريبه
_________
حزينه وانتظر واحد_ بقى گاعد
على الاعتاب طولي
اريد حسين اشوفنه_ واحضننه
ويگلي شبيج گولي

غريبة ومـن غربتي تـنـحب الـدار
على حضنه الگلب محروك بـالنار
جفاني ومادرى شنهي العلّيْ صار

گمت انـام بعتبتي__ماكو منهه غربتي
ردت اشوفن أبويه__حته تطفى حسرتي

اه يهلي غريبه اه يهلي غريبه
_________
غريبة وروحي مهجورة_بقت صورة
لهلي تشدهلي بالي
السهر ما لايگ اعليه_انحجه البيه
وخذت حيلي الليالي

صرت سالوفة تحجي بيه عربـان
هاي الــ بالضعن ماحصلت امجان
اجاني الموت بس الملگه ما حان

ضعن راح و تركني__حسب بس ماحسبني
خطيه وحدي اظلن__الدمع يترسلي جفني

اه يهلي غريبه اه يهلي غريبه
________
عـلـيـه انكتبت الـدمـعة__اظل انـعـه
هـلـي يالـضـيـعـونـي
روحي شتنسه وشتذكر__ البُعد يكسر
بَـعـد مـاظـن يجوني

خيالي وبالي يمهم لـحـظه مـانـام
واليشتاگ دوم تـشـوفـه مـحـتـام
گـلـبـي امـن الفـراك تشلعه الايـام

على الضيعوني ويلي__هجرني حته حيلي
اموت وروحي تطلع__انجوت روحي ودليلي

اه يهلي غريبه اه يهلي غريبه
________
خادم الحسين محمد منير المياحي

#محرم_الحرام_1445_هـ
#لمولاتي_فاطمة_العليلة_صلوات_الله_عليها
((انكسار العليلة))
____

حملو__وانه عيوني عليهم
احتاريت__ماكلولي شبيهم؟!
يهلي__ليا ضيم تعوفوني
تانيت__ما اشرتلي اديهم

من ماكالو اهلي صعدي خنروح
اهنا بَـيّـن عله الروح انكساري
هـا يأجدامي عينني عـالـوداع
امن يبعدون عود اطفي يداري
انفت گلبي واگلهم گلبي رحمو
عليلة ويهلي جا شيطفي ناري

أي لـلـنـعاوي..دلالي صـبّـح...لـلـنـعـاوي
حسين ناوي..لاوين ابوي ..حسين ناوي
عافني العلاوي..ركبن..وعـافـني العلاوي
____

عالباب__مـانـزلـت جفيني
سَدرو__وضيعو مني سنيني
روحي__راحت ويه الراحو
حسرات__جن جف يحاجيني

انحنيت وانه اعاين تبعد النوگ
وجف من هودج ويومي عليه
جف يشبه جفوفي وكلش زغير
تمعنت وعـرفـتـه جـف رقيه
حسيت بوادع اختي أكو موت
وبـعـد ما نلتقي غـاد المنيه

گلبي ومصابه..ويلاه يا..گلبي ومصابه
اوجوه الخرابه..امبينه تره..اوجوه الخرابه
نفس اليـ بابا..اهنا والسبي..نفس اليـ بابا
____

الفارگ__الله يساعد ضلعه
يحسين__شبجيلك وشأنعه
عالگاع__اتراب النوگ اشتمه
متعوب__جفني تسده الدمعه

يگلبي المن تدگ بطل تدگ عاد
بعد ما تسوه روحي هذا حدهه
على ارموشي عگبهم سَدّر الشيب
وغواش امن البجي العيون سدهه
هلي ياگلبي كسروا خـاطـر الروح
شيردهم لَـيـه والـلـمـة اشيردهه

ماعطلتهم..عافوني جي..ماعطلتهم
ماچني بتهم..غص گلبي شو..ماچني بتهم
للموت زتـهـم..ايـالـدمـع..للموت زتـهـم
____

ترجع__ان شاء الله يعيوني
اللمة__وتگعد يمي ضعوني
ابقى__هذا اليوم انتظره
احضن__بيهم ويحضنوني

گبل مرتاحه واهلي كلهه ويـاي
وسهم الـفـراگ غبّش بيه ينبض
بقيت أحلم هلي عـالباب جايين
وطاسة ماي بيدي وليهم اركض
فص العين مولح ليش ما ليش
ما حسبوني هـاي اگبالي تعرض

ماني عليلة..اتحمل سفر..ماني عليلة
حته اشتكيلة..ياهو البقى..حته اشتكيلة
ليلة اعله ليلة..اذبل گمت..ليلة اعله ليلة
____
خادم الحسين محمد منير المياحي

#محرم_الحرام_1445هـ
لسان حال مولاتي فاطمة العليلة صلوات الله عليها...
~~~~~

رجـفـت الايـد و رفـت العين
عرضة الدمعة اوداع مو زين
ما دار لَـيـّـه ضـعـن الحسين
من يمي راحت كلهه بسكوت

~~~~~

وجهي المفارگ لـونـه مخطوف
تبعد الخطوة ويگصر الشوف
عالگاع روحي تزحف ازحوف
اتمنيت بمجاني ويجي الموت


~~~~~

سعفة الگلب واتمايل بـريـح
اتمنيت ماكو ضلوع و يطيح
صوتي وراهـم يا هلي يصيح
ويرجع عليه بس صدى الصوت

~~~~~

جفني بـدمعته تـارس الـخـد
لا يرمش و لا يرضى يـنـسـد
جمرة الـگـلـب مـا بـعـد يـبـرد
مــهـجور صـار وجـنـه تـابـوت

~~~~~

ياگلب عـيـش ومـوت مذبوح
مـامـش عيون اتسامر الـروح
انـزف عذابك وابـقـى مجروح
والينعى فـگـد حسين مبخوت

~~~~~

ذابـل بـواجي شـحـم الـعيون
مـو متن راسي امفارگ متون
يـصوابهم بـگـلـيـبـي مـدفـون
وأنـشـغ عليهم گـلـبـي مفتوت
~~~~~
خادم الحسين محمد منير المياحي

#محرم_الحرام_1445هـ
لحن التراث
مولاتي ام البنين (ص)توصي اودلاها (ص)
وتحثهم على الوفاء والبطولة........
~~
يماشين بضعينة ماي صيرو ادروع لخيمهه
يجعفر، يا عـبـد ، عثمان، هـا يا گمر هاشمهه
~~

الـحـرة اتحشم الـويـلاد و لمتهم حواليهه
هاي ام الوفه ام عباس حجاية بخت تحجيهه
امشو بضعن ابو اليمة و زينب بالكم ليهه
ها يأسباع خوفي هناك يحف الخطر رجليهه

اجه يوم الوفه يأسباع
واحدكم يطر الگاع
اريدن الخبر ينذاع

ونعم ارباتج يصيحون بيكم روحي اشيمهه

~~

يجعفر يا بعد عيناي بـالـك يلما تخلف اوعودك
تمطه ارجاب ظهر الخيل وبسمتك تترس خدودك
اريـدك تشنط الـفـرسـان لـمـن تـگـرب احـدودك
نخيتك وانت صل بالكون خل الدم ترس جودك

روش اعله العساكر روش
لا ترحمهه ابد الجيوش
ولعضيدك درب مفروش

تجدس الخيل فوك الخيل ورواياهم تحطمهه

~~

يعبدالله يلب الـروح اصـوات الگـوم سجنّهه
يمعروف برنين الطوس وانته الضربة توزنهه
هـك هـذا الـعـلـگ مـنـي ومن تذكرني تدفنهه
ومـن تـشـتـد نـزيـز الـدم خل يوصل مواطنهه

خيظل عالي صوت الماي
حته تأمن اهله اهواي
اعرفك بالضرب چواي

عجيد ومن تفور تغير وانته الحومة لازمهه

~~

يعثمان انته هزبر صيد حيل الگط جماجمهه
سابگ سيفك و رمحك الاول يـاهـو يـثـلـمهه
حيل اسحگ طواغيها وفـن الـحـرب عـلـمـهه
وسريات العساكر كـون وحده بـوحـده تردمهه

خَيضك الهوه عالگوم
سيفك لعبه عالزدوم
لا تتعب عليهم حـوم

مثل الحنطة طش الروس ونوب احصد ولمهه

~~

يأجبير اخوتك عـبـاس وانته الـخـدر مسوؤلة
مااريد اسـمـع يكولون بـخـيـم عطشانه مدلولة
يصگار الـگـناطـر مـوج يـمـك مـامـش افحولة
وعـرج الهاشمي امـن ينط ياهـو الرايده ينولة

سطر ارگابهم عالشط
وخليهه الشگر تفحط
ضربتك ابـد ما تغلط

يخطاف النفس والخيل خلهه تدوس بأزلمهه
~~
خادم الحسين محمد منير المياحي

#محرم_الحرام_1445هـ
#الليلة_الرابعة
((حلم كتّال))
مولاتي ام البنين (ص) ترى مولاي سيد الشهداء(ص)
في حلمها فبحزنها وانتظارها في عالم الرؤية تقول....
~~~~

جني بحلم وانته بـغـرب طايح
ومـحـد يعينه المنه أخـو رايح
بالطيف شـفـت اشـفـاك ذبلانه
وطرفك على ذيج الخيم شابح

الدم خذاك الدم خذاك__والاسهام بكل كتر
الدم خذاك الدم خذاك__ياهو اليوصلك للخدر

گـلـب الشهم يـنـجـاس بـمـدلـلاتـه
امن ايشوف بين الناس تركض خواته
ياهو اليوصلك غـاد ياهو اليعينك
يـ أول بشر بـخـيـام ذبحوله ذاتـه

يمه يحسين يمه يحسين
~~~~

ظل يمشي حلمي وصعبت الحاله
وشـفـت الـحرم حـاطتهه خياله
ظلن يحشمن خويه مـا خـويـه
وزيـنـب شـفـتـهـه بـتـلّـه كـتاله

يـلا گـوم يـلا گـوم__وحيل زينب منهدم
يـلا گـوم يـلا گـوم__وصلت اخيامك زلم

عالتله صوت ايصيح ماتنهض الهه
امن الخيمه طلعت روح والتل كتلهه
عيون الزلم يحسين ماترحم اختك
وهالشدة يمه حسين يا من يحلهه

يمه يحسين يمه يحسين
~~~~

شفت الشمس ذَبلتلك اعيونك
وارمال الصحاري جَـوّت امتونك
يا ندي نشفت روحك الحسرة
من شفت طلعت هايمه ضعونك

طـالـعـات طـالـعـات__وانت بأصفاحك تكض
طـالـعـات طـالـعـات__طافن الصحره ركض

تلگت بناتك حـيـف خـيـل المنية
ومـيـدان صدرك صـار للاعوجية
يحسين يمه الخيل مارحمت احد
طاح الدمع بالطيف وافـرك بديه

يمه يحسين يمه يحسين
~~~~
فـزيـت مـن الـحلـم مـثـكـولـه
وبروحي احاجي ماهي معقوله
شيخ العشيرة يطيح يم غربه
مـاكـو كفيل و لا أكـو مكفوله

گـلـبـي نار گـلـبـي نار__وخذت حيلي العايله
گـلـبـي نار گـلـبـي نار__يعينك الله بكربله

مرعوبه ريت اطغاث احلامي تطلع
وضعنك يكونه بماي مو ركضه يشبع
واعله الـبـنـات فياي انته و گمرهن
الطلعت بهيبة اويـاك مهيوبة ترجع

يمه يحسين يمه يحسين
~~~~
خادم الحسين محمد منير المياحي

#محرم_الحرام_1445هـ
خطاب بين مولاتي ام البنين و مولاتي زينب
گولات فزاعي...
____

اطلعت اتلگه ابني الراده اضعونه
شو ماهو الحسين وماهو ميمونه
ويـن ازلامـنـه وجا وين عمتجن
هـاي انـه وأبين جـنـي مدفونه

تيهتي بيه__وبيه ريحة عباس
____

من اطلعتي فوگج رفت الرايه
وضراج اسيوف هاشم كلهه حمايه
يمه الخوف يگلب وجه البنادم
وانـه اطلعت يمه وخيلهم جايه

السحگت متنه__متنه سحگته الخيل
____

احجيلي الصار بالتفصيل وبهيده
تره انه امكيفه جي عباس ذب ايده
ردت وياج محترگه وادور حسين
وحدر الشمس مثلج هايمه اببيده

شمس الشفتهه__للخدر موش اولام
____

هذا الشيب كله اشمسرع اتجمع
بداني أمن أسمعت گالوها خل تطلع
وكثر بيه ييمه أمن اوگفت عالتل
يامگيوده صوب اقصور يا ارجع

حگي امن اشيّب__فارّه الدواوين
____
خادم الحسين محمد منير المياحي

لمولاي مسلم بن عقيل ص
___
الكوفه رجفت من دخلها الضرغام
مسلم اعله الجيش كلش محتام
حيد لو يخزر يشل كل الجيش
غضب نازل بيهه ما يـرحم گام

ردم راس براس_من دخل ليهه
كسر ظهر الخيل_وكسر رجليهه
برجله داس الگوم_يشبخ اعليهه

دفان وبسطوح الكوفه
___
هاشمي وبالحومه نازل فرّاس
ادخيل مسلم غيرته من عباس
ياهو يشرد لو اجه اگباله العين
واللي يفتر ما لگه بجسمه الراس

تاه دربه وضاع_كلمن يشوفه
هوه ملك الموت_صار بالكوفه
كلت كل الگاع_شسوت جفوفه

ظل سيفه يبلع بالوادم
___
هذا ابو طاهر ابو راس الحار
يصيح ياحيدر إذا هـد و غار
هيه جلمت ياعلي تيبس گلوب
عله گلوب العسكر تصب جن نار

يبس گلب الگوم_من صرخ حيدر
الزلمه يزحف گام_يمشي مايگدر
و الركض فرار _وبقى يتعثر

صاحوله حيدرها الثاني
___
وين ابو فاضل يشوف الجيدوم
مسلم الـمـا خله عالناس هدوم
هما هاشم كلهم احيود اسباع
ماكو عركه ما يكسرون خشوم

فرك خشم الجيش_بنزلت اجدامه
سحگ فوك ارگاب_وعوج جم هامه
العركه زلمه تريد_و شاد احزامه

واتحزم بحزام الكافل
___
خادم الحسين محمد منير المياحي

#محرم_الحرام
الليلة_الخامسة
#شجاعة_مولاي_مسلم_بن_عقيل
____
مسلم شهامة وهالنزل مايرحم الكوفه
ماخذ اطباع المرجلة أمن الكمر عباس
والزلمه اليطگ ينعرف من طگته جفوفه
الرگبه اليطگها تنعوج وإيكسر الراس

شهامة وجف من غضب__تنازل ماتمل
الزلم مثل الفرس__غدت تصهل صهل
ولا حـيـد الـسـلم__وبـقـت عنده رجل
كسر عـظـم الزلم__يـهـد ويـرتـجـل

هذا ابن عم الحسين
واخو الگمر

تارسهه دمهم الكاع__ مسلم طرها نصين
غيرة ومرجله وزود__ماخذ من اخو حسين
_
ابو حميدة لـو وگف اطـول أمن الـرايـة
جتفه يطخ سابع سمه لو صعد عالمهره
راجـل يـدور عـالـزلـم صـطـراته دواية
اليطيح بجفوفه يطلّع ضلعه من ظهره

نزل هيبة علي__ وزلمهه اترادمت
البقى يسحكه الفحل__الشرد اي بي بخت
و لابيهم سـبـع__فوارسـهـه انثنت
نكث جفه ورِگب__يصدهـه اتشمرت

هذا ابن عم الحسين
واخو الگمر

ماكل جفه الازلام__واحد يشبه النار
مسلم جنّه عباس__راسه شماتجي حار
_
واحد لجن نازل غضب الخشوم داساها
ضهضب ومن خزراته فوك الگاع جم شارب
الاسباع جـدام الـبـخـت حـفـاي خـلاهـا
انـا الـفحل مسلم يصيح وعاوج الحاجب

الزلم مـن خزرته__تطيح امجفنه
الحرب تهوى الفطن__الجفوفه امدخنه
انجفو مثل البزر __واجاهم مطحنه
خبط يابس خَضّر__ وصلبها الميمنه

هذا ابن عم الحسين
واخو الگمر

الخزرة وسيفه حلگين__بلعن وادم وخيل
تــل لزينب اهـنـاك__باني أمن المجاتيل
_
زلـمـه يـعـادلـه سـلـف هـنـيـال مـن جـابـه
هـذا ابــن عـمـه اليفتخر ظل بي ابو الاكبر
مسلم عجيد وهزبر ومـن طـب عله الغابه
داس الفوارس واليدوسه ،يـشـلـه،،يـتكسر

جدم ثگله جبل__على العسكر نحس
السحگ وجهه انعوج__ولاظل بي ضرس
اخذ طبع الگمر __ اليلوحه ينخلس
ابو طاهر كلف__شجاع شگد شرس

هذا ابن عم الحسين
واخو الگمر

امفرعه الكوفه واركاض__غرگت بيهه طوفان
الـوادم تـدفـن بـگـاع__ومسلم بالسطح جـان
_
خادم الحسين محمد منير المياحي

#محرم_الحرام_1445هـ

مولاتي حميدة (ص) تشكو آلآمها
الى والدها مولاي مسلم (ص)
___

خَيمت ملامحي يتمي عليه
عذاب...انتظار...مشتاگة اريدك
شـوگـي ذبحني مـو بـديـه
الجروح...تنوح...طيبتهه بيدك

ياهي مثلي
اتاني ابوها__ومثلي خانكها السفر
يـاغـريـبـة
مـن دمعها__خدها نصين انحفر
امن اشتياگي
من حنيني__عاشرت بس القهر

مسلم اريدك طالت حسرتي
اگضي نهاري وليلي بشوغتي
شنهو اليعطلك گـلـي بالسفر
مَـتحن عليه وتحـن لشوفتي

___

ليلي يمرني بس للمناحة
المنام...حرام...للعدهه غايب
ضليت الوج وماعندي راحة
انحنيت...بقيت...بس للمصايب

جاي اتاني
وكلي ارجف__خلصت حيل الگلب
عيني ذبلت
بالمخيم __وأنه اصد أعله الدرب
الفرگة تكتل
وانه طفله__ومرني من زغري غرب

الغربة عشتهه اناطر جَيّتك
ماتت عذاب ولوعة ابنيّتك
مو تدري اتعب دونك وانهضم
همي وعذابي يروح بشبگتك

___

الوياها ابوها تعيش بفيايه
عزيز...بعيد...من وين اجيبه
افراگك ضمه وبس انت مايه
يطيب...الحبيب...اليشبگ حبيبه

لو تجيني
لو اموتن__ذبلت اوراق الغصن
رد يمايي
وخل افرفح__راحتي بشم المتن
غير ابوها
الطفله گلي__يلمهه بلا ياحضن

ياهو اليلمني وكلي اتطشرت
مـانـي حميده هسه اتغيرت
صرت شكبرني وجرحي اشمكبره
بالفرگة كلش جبيرة بَيّنت

___

ظل اشتياگي يكتل دليلي
حَنين...ونين...جفني شيطبگه
امتيهه نهاري وامتيهه ليلي
غرام...هيام...اليفضه ملگه

من اشوفك
كلشي ينفض__وانسه لحظات الالم
اتخيلت لحظه
انت يمي__وكلشي بالروح ابتسم
بس نصيبي
ابقى اتاني__وجَيّتك صارت وهـم

بيمن اقـنّـع دلـيـلـي ويقتنع
شنهي اگله اليرافس بالضلع
سَـيّـر عـلـيـه مـابـيـه انتظـر
ذبلانه بنتك مثل ذبلت شمع

___
خادم الحسين محمد منير المياحي

#محرم_الحرام_1445هـ

((شعور الغربة))
~~~~

يا جرحي ظل اعله المصيبة نار
عيش بشعور الغربة والانكسار
ابجي الغريبة وغـربـة الغريب
ضعن الفواطم ويلي ماله دار

هم وانكسر..
للما رجع اخوهن
وبفگده عذبوهن
ولوحده ظل ابوهن
بذاك الظهر..
تندب عليه عياله
ولا واحد البقاله
يبجي الصخر يحاله

مكسور بأخوته__ومحد رد نخوته
يصرخ ماله ناصر ويلي حاير وانكسر حيل
ياجرحي الهضيمة__ماظلتله خيمة
و اتسلبت حياته وكـل بناته بهدت الخيل

~~~~

ياگلبي دمعي قربة اله يطيح
عيش بحسرتك سيدك جـريح
دم و تـراب انترست الـجـروح
مثله فـلا صح ضامي لا ذبيح

لا ما يصح..
تتصارخ اليتامه
هجمو على خيامه
وجسمه انمله بسهامه
بكهف الجرح..
دمعة حزن طويلة
عالحشمته العقيلة
وماعانه ليهه حيلة

اجرحني بعويلي__لا ترحم دليلي
للصاحتله اجـونـي ايسلبوني خويه يحسين
بخيمّهه جريحه__محتارة وتصيحه
منو يلحگ عليه يشوف اديـه ترجف امنين

~~~~

ارد ابقى أسير الحسرة والعذاب
بدموعي يكمل عشگي والمصاب
عالطايح بـذاك الـظـهـر اسـيـر
ابـن الـزجـيـة بـعـازت الـشـراب

حيف وعتب..
عالشح عليه فراته
وماواصل لبناته
وخشبة صفت لهاته
مـن الادب..
تكسرني دمعة وانه
ابجي اليبس لسانه
ومحد وگفله عانه

ياجرحي المصيبه__مـابـطّـل نحيبه
وطايح عالترابة بدم خضابة وگطرة عطشان
واسموم الصحاري__تلوحه وهوه عاري
وحيله مـا يعينه يـصـد ضعينه ابـلايـه عوان

~~~~

غير الخيم ماريد احس بالضمير
بيهه انتخي مـن ابـرد واستجير
اليعشك يگلبي تظل سلوته الدموع
راضي بقسمتي وهذا أجمل مصير

ابجي واحن..
وتكسرني كل خرابة
طفلة تنادي بابا
نامت على الترابة
اسهر و أون..
ابجي ضعينة ضاعت
وبدون اهلهه سارت
للغربة تالي راحت

راحت ويه اجانب__دخلوها الخرايب
ومجروحة بحبلهه ابلايه اهلهه تطب دواوين
والمجلس هضيمة__علما عدهه خيمة
مايرحم قصرهم لا نظرهم ضعن الحسين

~~~~
خادم الحسين محمد منير المياحي

#محرم_الحرام_1445هـ

الى كل عاشق هام في الطف
____
العاشگ حلاته يون وينوح
تگضي حياته كلهه جروح
الدمعه قدرها تصب لحسين
مثله منو ضامي ومذبوح

والغربه الما ترحم__بيهه احتار
من مهره للهيمه__و رمل الحار
متفرهد صيوانه__وطاح بناس
ما رحمت بعياله__بنص النار

ماينلام اليعشك من يبجي...اهواي
لا خير أمن الدنيه الما تنطي...ماي
محتار ابن الزهره إبلا ستر...اخيام
وياهو الگبله بغربة وماصحله...فياي

مولاي ياحسين مولاي ياحسين
____
اليعشگ مصيبة يتعبه الليل
يكضيهه آه وحسـره و ويل
هيه المصيبه اتريد اگلوب
تهم بالغريبه و ذيج الخيل

واليتعب يستاهل__جرح حسين
والمجوي أمن الخيمه__يشوف اثنين
المحدبه عالتله__و صدر انداس
ومالومه لو يهمل__دمـع العـيـن

الگلبه يون للطايح مسحوك...اجتاف
للوكفت عـالتله و مـن ظلهه...تخاف
شكد عايش باللوعه من گلب...وروح
الشال الطف بگلبه و بالدنيه...عاف

مولاي ياحسين مولاي ياحسين
____
التاكل بـگـلبه تطيح اخيام
جاشنهي حاله بطاري الشام
اليسمع ضعن ويطب عالسوك
يهجر ادياره و عيب اينـام

واحجيله عالمسبي__شگد سهران
أمن الخيمه للناگه__يون تعبان
هسه شگد متغير__كد ما طاح
البين أهله وبفيهم__امدلل جان

الجرحه يهزه و دمعه ينزل...مخنوگ
ما ظن لحظه يشرد من باله...السوگ
البي دخلن يا حيف بنيات...حسين
وگوه الحادي إيعثّر بأجدام...النوگ

مولاي ياحسين مولاي ياحسين
____
المرتاح يـفرق عــن مـتعوب
العاشك الطف تحسه منهوب
ما عنده راحة و يدوم يلوج
المسلوب عشگه بدمعه يذوب

و اليبجي للضامي__ايمل شلون
للضحه ابما يملك__يظل مديون
مايسكت من نوحه__وحجة يريد
عالسلبوله اثيابه__ولأخته ام عون


كلمن حصته وضيمه والطف...احساس
بس محد يعرف بي بس...الينجاس
ليش الـنار الـبردت يــم ...ابراهيم
مابردت يـم رجـلين اخت... العباس

مولاي ياحسين مولاي ياحسين
____
خادم الحسين محمد منير المياحي