هوسات لمصرع الأمام الحسين عليه السلام


يزينب بيش روحچ صبريتيهه
ياشوغه ومصيبه اتحمليتيهه
من شفتي العمامه هوسوا بيهه
فرحان الشمر ... هوس بالعمامه
وضل حسين  لامنحر ولاهامه
چا ياهو اليشيله امذبحه ازلامه
اضلوعه امكسره واموزعه اعظامه
( والخيل اتوزع بضلوعه )


اضلوعه اموزعات اوزعنهه الخيل
الله يعين گلبچ يامصيبه ايشيل
دم حسين من راسه اوريده ايسيل
محد غمصه ... ومحد گعد يمه
مذبوح وسليب وغارگ بدمه
فصلوا راس ابو السجاد عن جسمه
سكنه اتصيح وين انروح ياعمه
( خل نمشي اندور والينه )


خل نروح للميدان وندوره
واضلوع الحنين انردهن الصدره
نفدي ارواحنه واعمارنه العمره
نگله اشيوجعك ... واليوجعك وينه
تلطم عالوجه ماتسكت سكينه
بلكت لو سمعنه ايگوم والينه
من الخيل والعسكر يحامينه
( من هدمي النار يطفيهه )


يطفي النار من هدمچ ومن هدمي
ياعمه الهضم ماينحمل يعمي
ضل اعله التراب امكشف ومرمي
اشلون اعله التراب ... امكشف انعوفه
لاخاتم ولاخنصر البچفوفه
امشينه انوادع المظلوم ونشوفه
باچر مانضل انشيل للكوفه
( انرافگ راسه وذباحه )


انرافگ راس ابو السجاد والذباح
لانلطم يعمه ولانشيل الطاح
صدگ وحشه الجنازه الماعليهه اصياح
بالتابوت ... كل ميت يشيلونه
يغسلونه ويشيعونه ويدفنونه
والمظلوم عدوانه يدسونه
جده المصطفى كلهم يعرفونه
( ماهابوا جده الخياله )



✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر

زينب ع  بعد يوم العاشر....


كلهم مشو     عني ارحلو      ولوحدي ضليت
لا ظل اخو     لا ظل ابن         والله تاذيت
.......................................................................

انه زينب  والمصيبه  رافكتني  من  الزغر
ودعت  امي  وابوي  بدونهم  عشت العمر
محد يسميني بسمي صار اسمي ام الصبر
مخدره وتالي بحياتي امشي بدروب اليسر


عشت اليتم      صار الاسم      بصبري تسميت
لا ظل اخو       لا ظل ابن        والله تاذيت
........................................................................

الحسن كدامي  شفته  ذب  جبتده  بالطشت
هذا اخوي الغالي بعده كون ميته وما عشت
اثنين من اخواني  ظلو  بيهم  الهيبه  شفت
لو  تصير  اعليه  عيله  بيهم  انخه وحشمت

يا دنيتي     عوفي اخوتي      بهل جلمه ناديت
لا ظل اخو       لا ظل ابن        والله تاذيت
........................................................................

دارت  الايام   بينه  ومشت  بيه  القافله
امشي  والعباس  كافل   واتجهنه  لكربله
راية الكافل  ترفرف  والضعن  بيهه  حله
وابو فاظل دكلي صدره يا شمر يا حرمله

دك عل صدر      وصاح الخدر    بيهم توصيت
لا ظل اخو       لا ظل ابن           والله تاذيت
........................................................................

المعرگه  دارت   يعالم   ظلت    اطير   الرگاب
وبعد دوامه  طويله  استشهدوا  كل  الصحاب
استشهدوا من بني هاشم ثله من احسن شباب
ليلى كعدت يم طفلهه  ويم علي  كعدت  رباب

اعله التراب      كلهم شباب     جم شمعه طفيت
لا ظل اخو       لا ظل ابن        والله تاذيت
........................................................................

حسين طب للخيمه اجاني والدمع منه يصب
وكلي  يا  زينب  تحضري   للمسبه   وللضرب
عل شريعه طاح اخونه وما بقه شي  للحرب
وانه راح انذبح هسه  وتحرگ  خيامج  غرب

يابو علي          راح انولي       ودموعي صبت
لا ظل اخو       لا ظل ابن        والله تاذيت
........................................................................

لوحدي ضليت وعليه  حركو خيامي الكفر
وبيه يشمت يوسفه من بعد  خوتي  الشمر
بخيله صدر حسين داسه وما سلم منه كتر
بوسط ناس وظل ينادي هاي هيه ام الخدر

وانه مره            ومحيره       وللكوفه طبيت
لا ظل اخو       لا ظل ابن        والله تاذيت


خادمكم حسين ابو عباس الكعبي

قناة دمعة فاطمة لمحرم وصفر

(گعده)

خليها بخيمها ** يا ليل بألمها
هاي العايلـــــــه ويــــن ** تصبح عُگب الحسين
خليها بخيمها ** يا ليل بألمها
ــــــــــــــــــــــــــــــــــــــــــــــــــــــــــــ
تدري يا عايله بهاي الخيم هاي بنات حيدر
ربت بخدور الوطان وأصبحة بخيام بالبر
رضت بس الأهل يمها وبوجود الأهل خدر
شلون يا ليل الزمان ألعبة لعبه بعكس تفتر

لنها بعطش هل عايله *** وفتية علي عقد الوله
بس هل مسيه بكربلـــــه *** وعل ضيوف عيون تسهر

يا ليل نوايـــب ** باجر بالحرايب
تغيب وجوه الكرام ** تبگه عـيـال وأيتام
وطفال بيتمها ** يا ليــل بألمها
ــــــــــــــــــــــــــــــــــــــــــــــــــــــــــــ
أنطي سمعك للخيام ودويه مـن كـل خيمه تسمع
أُم أجـت ودعـة شــاب وهــل أخـو لـلأخـت ودع
طفله صاحت مـاي أريد مـن الضمه گلبي تـصـدع
وأُم رضيع أتصيح جف الثدي وطفلي يريد يرضع

وحده تنادي يل أهـــل *** چنكم تخيبون الأمل
هل عايله تضل بوجل *** تطلع وللخيمه ترجع

والعايلــــه بريبـــه ** وتحس بالمصيبه
وحده تگوم وطيح ** تريد الوالد تصيح
وحده تريد عمها ** يــا ليـل بــألمها
ــــــــــــــــــــــــــــــــــــــــــــــــــــــــــــ
هاي توصل يـم أبـوها حـسين لن توگف گباله
أتريد تحجي تخاف تحجي هلطفله على حاله
يذوب چبده من تريد تخبره عـن حالة أطـفاله
فكره عدها تريـد أبـوها تباصره بـحـالة عـياله

تگله أرجع بهاذه الضعن *** خلي الودايع بالوطن
أتشوف الدروب أتلزمن *** أبد ما يحصل مجاله

وتـغـيـر النـضـره ** من ترجع ابحسره
تـشعر بالأبـو يـروح ** وباجر تصبح جروح
وبعد شينيمها ** يــا ليـل بــألمها
ــــــــــــــــــــــــــــــــــــــــــــــــــــــــــــ
قسم هاذه وقسم ثاني من الطفال وأشد جمره
طفل ما يـعرف الـخوف ولا أله بالـخـوف خـبره
يـصيح ودوني العمي وهاذه حـالي خـل ينضره
گلبي مـن الـعـطش ذاب ومـا يـريـد ولا يـعـذره

وعباس ينضر هل وضع *** چـم طـفـل يـمـه مجتمع
وبـاجـر لونــه يـسـتـمـع *** عگُب عينه الحاله خطره

هـساعـه بوجـوده ** وملتمه على جوده
منـه تطلـب الـمــاي ** هاي شعدها من راي
بس الضيمه يهمها ** يـا لــيــل بــألـمـهـا
ــــــــــــــــــــــــــــــــــــــــــــــــــــــــــــ
هاي متحيره شلون نصير باجر وضع يصعب
ذيچ مـتخوفه بريبه وهـاي مـاي تريد تـشرب
بت علي شنهو الشغلها بيـا أمـر فـكرت زينب
يصير نامت عين زينب تدري باجر هيه تتعب

لا عين زينب ما غفة *** أكثـر العيـلـه تـخـوفـة
مـن ليلـه هيـه تـكـلـفـة *** عليها كل مصاب ينصاب

وتصبح غريبه ** وتمسـي سليـبـه
ومن باجر هل عيال ** ومن باجر هل الطفال
زينب تستلمها ** يــا ليـل بــألمها
ــــــــــــــــــــــــــــــــــــــــــــــــــــــــــــ
حـيـره يا لـيل شگلك طـول يا ليـل النوايب
راحت تموت الودايع خوف بوداع الأطايب
راح أگـلـك أبـدي صـبـحـك بـدم والمصايب
صبحك يخلي الودايع عگُب أهاليها غرايب

من صبحك يصير السلب *** من صبحك يصير النهب
باجر نار بخيم باجر تشب *** وليحامـي الخيـم غـايـب

لا يا ليل طاويل ** أيـتـام وأرامـل
عيال حسيـن يا ليـل ** عليهم تهجم الخيل
محد يحتـرمـهـا **يــا ليـل بــألمها
ــــــــــــــــــــــــــــــــــــــــــــــــــــــــــــ
طـول يا لـيـل بـوداع الـعـايـلـه ويه أهـلـها
لا تـغـيـب هالـوجـوه التـودعها ولا مـثـلـهـا
بأمل زينب خل تعيش ليله ولا تخيب أملها
أليله يمها الأخوه مجموعين باجر منهو ألها

أليله بجمع أهل الأبه *** وباجر بدمها أمخظبه
المتخـدره المتسلبـه *** أتغيب كل الأهل كلها

يا صبـح المـنايـه ** يا صبح الضحايه
لا تبدي للعـيـون ** يا ليل شيگولون
من صبُحك هضُمها ** يــا لــيـل بــألـمـهــا
ــــــــــــــــــــــــــــــــــــــــــــــــــــــــــــ
(مصيبه)

ودعي يا زيـنـب أهـلج يا بـت حـماي الحميه
بهل المسيه ضيوف عدج ودعي بهاي المسيه
ليوم وليانج أكـبالج وجـثـث باجـر عل وطيه
باجر ضحايه على ثره تلگين الأخوه مطشره

ولا يا وديعة حيدره ما يضل من هاي لأخوه
بس عليل يودعونه
ــــــــــــــــــــــــــــــــــــــــــــــــــــــــــــ
الشاعر الخالد عبد الحسين ابو شبع

آنه وحميده ورقيه      نسولف كعدنه سويه
اركض رحت فرحانه    كلولي موش ويانه
*
الليله ما مرتاح گلبي        ايگلي سفرتهم طويله
بساعج ولحسين اركضي        لا يعوفج يالعليله
جنه ما حاسب احسابج        اخذي زينب وعتنيله
وخلي عبدالله عله متنج      من يشوفه ايحن دليله

گليله حن عله حالي     بلكت يگلج تعالي
بدونك اموتن آنه     كلولي موش ويانه
*
الليله حيرني زماني       والله مدري شضام اليه
مدري اروحن مدري اظلن     ومن اظل اشلون بيه
ومن اروحن خاف اتعبه          وينكسر گلبه عليه
رحت بالمدري ودمعتي           يم حميده ويم رقيه

شافني مكسوره خاطر      وكللي كلنه نسافر
منعوفج احنه اهنانه      كلولي موش ويانه
*
احنه التلاثه كعدنه      انسولف عله السفر گمنه
نحلم احلام عله گدنه         ازغار بس كلش تهمنه
ذيج گالت آنه ارتب            من نسافر كل خيمنه
وهاي كالت انه باجر             افرش العبدالله يمنه

عبد الله كلش نحبه         اناغيله دوم ونلعبه
يمنه يصير امجانه     كلولي موش ويانه
*
نتفق من هسه اكلجن     انه ابوي اهناك اخدمه
خيمته اخليها تزهي     وبيها اصيرن احله نجمه
ماي اجيبله الوضوئه     وحته مهره اهناك اقدمه
ومن يريد الماي يشرب           يلتفت يلكاني يمه

خليني اكلله يمك     وبعيوني يابويه اخدمك
ماكول ابد تعبانه      كلولي موش ويانه
*
والله لو وياهم امشي         إله اصير الهم فراشه
وعالضعن بالماي افتر          وما اخليهم عطاشه
والعزيز حسين بيدي     من العصر افرش افراشه
وحته عبدالله اكمطه             وما اقصر وياه حاشه

خدامه اصير بضعنهم      بس لا يبعدونه عنهم
ما ريد اظل حزنانه           كلولي موش ويانه
**
حضرت روحي ورحتله      وشكبر جانت فرحتي
شافني ونزلت دمعته      وكلي موش ويانه انتي
باوعتله وليش گتله       كلي اخاف عليج  بنتي
هالسفر مابيج حيله     گتله اخذني شلي بظلتي

ماريد اظل بويه اريدك     متعوده انام عله ايدك
والشوفتك عطشانه      كلولي موش ويانه
****
تمت
ميثم العمري

ترويج( تيك توك)  حقيقي عراقي

1- مشاهدات
2- لايكات للمقطع
3- تسجيل اعجاب بالصفحة
4- رسائل
5- متابعين
للتواصل واتساب 07732320742
تلجرام
@ahmed_alziwar0

🖇📍نعي لخروج الامام الحسين عليه السلام من دار المدينه الى كربلاء

         

وگفت ضعينتهم عله الباب
يتشاورون اليوم الاحباب
وخلو الدار امگبعه اتراب
وزينب گلبهه اتصوب اصواب
طبت لخوها اتعاتبه اعتاب

¢¢¢¢¢¢¢¢¢¢¢¢¢¢¢¢


بده اعتابهه زينب امن اليوم
وأتگله يبن امي يمضلوم
ماريد اروح لديرت الشوم
اخافن عله راسك امن الگوم
مانايمه ولا شايفه النوم

¢¢¢¢¢¢¢¢¢¢¢¢¢¢¢¢


مانمت خويه امن امس يحسين
يرجف دليلي  وتهمـل العـين
اخذتوا  ضعنكم وين ماشين
وعفتوا نزلكم  والــــدواويـن
چنه عليكم يفـــــــتر البين

¢¢¢¢¢¢¢¢¢¢¢¢¢¢¢¢


البين ضل يفتر عليكم
يهل الشيم وين اوديكم
والغاضريه اتخون بيكم
حاچوني خـل اسمع حچيكم
شنـ هالسلح هاي البديـكم

¢¢¢¢¢¢¢¢¢¢¢¢¢¢¢¢


اخذتو سلحكم  وين تردون
والطف يخويه موش  مامون
فدوه اروحلكم  لا  تروحون
اريــدكم هيبـــه تضــلون
خاف العده بيه يعيلون

¢¢¢¢¢¢¢¢¢¢¢¢¢¢¢¢


خاف العده ايعيلون بيه
وترحون كلكم من اديه
ضاعت عساهه الغاضريه
وگلبي انشلع يهل الحميه
ادري الهضم مكتوب اليه

¢¢¢¢¢¢¢¢¢¢¢¢¢¢¢¢


لشاعرة اهل البيت عليهم السلام
المله ام هچران  العمارچيه

دعم مؤسسة منبريون الحسينية
#افضل قناة للنعي
https://www.tg-me.com/+P0VV4bLqtzuKdcQS
#للاشتراك بالدعم @ahmed_alziwar0