وحشتني
والاشتياق اسمي معاني الحب في الغربة
مبقيتش بعرف أنام بدون صوتك
ولا عارفة افرق بين ليالي العمر من غيرك
في شهر مر عليا عمر طويل من غير ايديك الطيبة وحبك
لو هحكي هكتب ايه وانا بدونك
دانا عمري كله في نظرة لعيونك
عندي يقين إنك راجعلي
ومش هنتفارق
وان المفارق لما توهت اهي عرفتني
ان انت اكتر حد فارق
ضيقة وهتتزاح قريب والميعاد هيحين واشوفك
كلها أيام وترجع ليا واتدفي ف كفوفك
كلها ايام يا ضهري وارجع اقوي لما ترجع
ربنا اداني اليقين لجل غُلبي وحزن ليلي
والإشارة ان انت راجع..
مر شهر من الألام ومن المواجع
بس هانت
كل شئ ف حياتي باهت لما غيبت ف يومها عني
والحنين زود أنيني ولما كنت هموت منعني
وقالي راجع
قالي ابنك بكرة هيبات بين ضلوعك
بكرة هتشوفي الفرح لحظه رجوعه
وقتها هيحين رجوعك للحياة الحلوة اللي بينكم
قلبي قالي أنك راجعلي وان حزني مش هيطول
وأن دة بس اختبار..
بكرة يرحل كل حزنك بكرة راح يطلع نهار
بكرة جي وبكرة قرب
دة يقيني ومش بجرب
ربنا قادر وعالم بيا وبحزني اللي زاد
ربنا قادر ينجي روحي من كل العذاب
ربنا قادر يرجع كل حلو ف لحظة غاب
بكرة كل الحزن يمشي..
مهما قفلوا الف باب
طول ما باب الحق واسع..
بكرة خير

بكرة كل الحزن يمشي واعلن اني بقيت بخير.

طب كل ده كان ليه ؟!
مزهقش لسه القلم
ولا قَل صبر الوحدة
من كُتر أحزانك
لكن لإمتى هتفضل
بتعزِّي أحلامك وتموِّت حاجات جواك ؟
كل أللي قَرَّبت له كان حُضنه هو أذاك
اهرب!
مانا هربان.. بس الهروب طوِّل
محتاج أعيش وابدأ من الأول

#قلبي_العجوز

السرير رفض الحكاية وقالي بليتني ببكاك
قُلت ماشي أنا كنت ماشي ومش هعود غير بالدليل
كل ما أمشي خطوة بلقى أني بنزف مش بميل
و إن كتفي سندني لكن خاني فـ الليل الطويل
و أما بصيت للمراية لقيتني مبقيتش الجميل
الهالات السودة زادت والشغف عمال يقل
كل حاجة فـ عيني ماتت إلا سعيي لناس تدل
والجميع قفل بيبانه والبشر فضلت تذل
كله قالي خلاص كفاية بس صعب أيأس و أمِل

#نوفمبر_٢٠٢٠

كانت جاية في ميعادها قبل ما نتفارق
و إيديا ساقعة كأنها كوم تلج
و شفايفي لونها أبيض
من خوفي لتقولي أنا همشي وهسيبك
قالت قرارها ومشيت
و أنا قلبي واقف عندها ممشيش
طب حتى سبب البُعد ؟
أقسم بربي مفيش
كان أيه لزوم الجفا والبُعد والقسوة
كتر أوي خيرِك
أنا هنسى وجعي بواحدة مش غيرِك
مش عارف أنساكي
لاء!
بكرة هتعود وهعيش كمان دونِك
دونك فـ أحسن حال
الست قطعت كدبي وقالتها
وبكرة يفوت وبعده يفوت ولا كلمة ولا مرسال

#إمبارح

الحمدلله والشكر لله علي نعمة الشبع والرضا، من اعظم نعم ربنا علينا اننا عمرنا ما بصينا في رزق غيرنا ولا اتمنينا زوال النعمة من ايد حد ، بحمد ربنا كل يوم انى بفرح بالخير لغيري واني بدعيله بالبركة ، الحمدلله ان لساننا مبيقولش غير ماشاء الله تبارك الله لو لقينا نعمة علي غيرنا حتي وان كان نفسنا فيها يكفي ان القلب بينطق لصاحبها بالبركة الاول وبعدين يقول يارب باركله وارزقنا الاحسن ، الحمدلله كل يوم وكل ثانية يارب علي كل نعمك وعلي عيني ولساني اللي بيباركوا وعلي قلبي اللي بيفرح لغيره وعلى كل نعمك عليا ، الحمدلله اني عمري ما غيرت من حد الحمدلله اني عمري ما كرهت حد الحمدلله اني عمري ما أذيت حد ، الف وحمد وشكر ليك ياربي ، الحمدلله ❤️

- رُب خيراً لم تنله كان شراً لو اتاك

صباح الخير ♥️

الكل فترة هتنتهي بالوقت
الوقت بيعلم الصح مـ المعاناة
كل اللي قالك إنه مش ماشي
هتلاقي بكره فـِ حد تاني معاه

- ما دايم إلا وجه الله

فراقك فعل مش فاضح فراقك خير ، فراقك ليا قواني
يا حب تعبني يا اناني!
هحن يجوز وهشتاقلك لكن والله ما هعاني ..
بفعل الوقت هتناسي وهتعلم !
بفعل الصدمة هستقوي وهتكلم ، وهلعن ف الوجع جهرا
هكون اقوي وانا لوحدي .. بكون اضعف وانا وياك

- رُب خيراً لم تنله كان شراً لو اتاك

رَد الوجع حرفة وصدقني بتريح
رُد الوجع وجعين لكُل حد آذاك ،،
أوقات بيبقي البُعد ضعف شديد في عيون بشر جرحاك ..

عاجبك حالك ؟
مبسوط والناس بتبص عليك وتقول مالك ؟
باين ضعفك ، وشروخ قلبك ، تجاعيد وشك
باين غشك في كلام زايف انك مبسوط
مبسوط واللي سابوك انتصروا
وانت لوحدك لسة مكانك
- خايف اطلع من كسر لكسر
الحرب اللي انت بقيت اضعف
من انك حتي تخوض فيها
هتدمر فيك ..

النص دة عنكم :

في المرة ديه بسرد حالتكم علي الملأ
من غير تزييف في حقايق خايفين تقولوها
كل اللي اطمن للدنيا وآمن للناس
اصبح متعود علي الخذلان
بقي أمله الأول انه ينام
من غير تفكير او حزن وخوف
من غير ما يشوف كل اللي حصله
بيتكرر .. يومياً ف يفتَح جرحه
من غير ما الشوق يغلب روحه
من غير ما يحن لناس بايعاه
كل اللي اطمن لدنيا وآمن للناس
ملقاش في حياته غير المُعاناه
صاحب من فترة ..
اوصاحب فترة ومات جواه
بدايات حلوة وصبحت مأساه
علي فين مرساه!
وحده في توهه ..
وحده في مُعاناه
-
نيكوتين الوحدة احسن بكتير
من سرطانهم
قهوتك المُرة هتفضل صاحب مش بيمل
قلمك مجدع وهيفضل خِل
وحيطان الأوضة هتفضل بتداري أنينك
وتداري عليك
ورقك من كتر ما غز السن في بطنه
مبقاش يصرخ ولا حاسس بألام من قلمك
بقي اكتر واحد حاسس بيك
وبحزنك وقساوة ألمك
الوحدة حقيقي احسن بكتير
من ناس فترات حلوة وزايفة
عينك من كتر ضلام روحك
طلعت للنور واهي مش شايفة
عاجبك حالك!؟
مبسوط والناس بتبص عليك وتقول مالك!؟
باين ضعفك ، وشروخ قلبك ، تجاعيد وشك
باين غشك في كلام زايف انك مبسوط
مبسوط واللي سابوك انتصروا
وانت لوحدك لسة مكانك!
- خايف اطلع من كسر لكسر!
الحرب اللي انت بقيت اضعف
من انك حتي تخوض فيها
هتدمر فيك
في معارك ممكن تكسبها متضيعهاش
اهلك .. حلمك .. والبنت اللي استنت قلبك
علشان يفتح ليها ومفتاحش
صاحب شدة موجود ومامتش
بس انت اللي بتعمي عيونك
عن ناس حباك!
عمال تبكي علي ناس بايعاك
وانت اللي مُصر!
خليك واقف ومحلك سر
خليك لسة بتخاف م الشمس
ومستني الليل علشان يداويك
الحرب اللي انت بقيت اضعف
من انك حتي تخوض فيها
هتدمر فيك !

لأول مرة معرفش أميِّز صوته في التليفون
و أقول أيوه بتطلب مين؟!
يقول آسف.. أقول أهلًا
وحشتيني؟
ورايا شغل مش فاضية
إذا حابب مساعدة في شئ
أنا كالعادة بنت أصول
يقول: نرجع
أقول معلش مش سامعة
و بكرة نبقى نتكلم
يفوت بكرة.. يفوق بعده
تعدي شهور
و أنا بنجح
و هو لوحده بيعيط عشان مكسور
أهيه الدنيا!
و أهيه الأيام
و داين بس راح تُدان
بحق دموع عينينا زمان
أديك عَمَّال تسد الدّين
و مش عارف تروح على فين
و مش لاقي في حياتك خير
و لا لاقي لجروحك بيت
و أنا بنجح
و واقفة و ثابتة و بقولك
أنا خفيت!

شاعرة مصر 🇪🇬 👑

يا صباح الخير ياللي معانا 🤍

كان عندي صاحب من سنين فاتوا
ضحك فـ وشي وقاللي هتعدي
الحزن لسة معايا من يومها
وصديقي قاللي السكة هتودي
واديني واقف وحدي جوا الحرب
مخاليق كتيرة وكلهم ضدي
حطولي قلبي جوا حبل طويل
وقالولي غصب لابد هتشدي ..
كل اما اشد القي الوجع بيزيد
وبقول لـ نفسي لسة هتصدي؟ 
نَفَسي اتقطع ولازلت غاوية عِناد
رافضة الهزيمة وصعب استسلم
انا واقفة لسة  .. بطولي مع ذلك
هيكون في يوم الإنتصار ردي ..