المرة دي من الصعب نتعاتب
علشان لساني من كتر حفظه للعتاب وياك
زهدك ومل
قلبي اللي ضل طريقه في الرحلة
قرر يعود للشط
علشان كدة قررت اني انسحب بشويش
بدون ازعاج ولا تكسير
بدون ما أغير
بدون تلكيك
بدون رد الاساءة عليك
كإني طيف غريب طيب ترك لك خير
كأني طير نقل لك وردة وهيرحل
هعود للشط عشان مغرقش
قالولي كتير مصدقتش ومبصدقش
بإن الغلطة كات ف الحب!
في فرق بين الحب وما بين الاختيار

علشان كدة :- قررت ارحل لجل يرجعلي النهار ..

وحشتني وسابتني من غير ما أكون جاني
كان قلبها أناني وقلبي طفل يتيم محتاج إيدين أمه
مين بعدها يضُمه ؟
قالت بقسوة يومها نتفارق
قولتلها و أنا ببكي كان أيه الغلط مني ؟
أو أيه الغلط فيا ؟
أنا آسف استني! آسف على كل شيء والله ما عملته
لكن بلاش تمشي
قالتلي يومها:
" حُكم الظروف أقوى "
ومشيت! ..

#إمبارح

دانا لو عيشت بكتب لك
شِعري هيرفع الراية
وهيقولي انا استسلمت
بحبك واللي جوايا كتير جداً
يا واخد عقلي وحياتي
مليش بَعدك
وبُعدك نار بتكويني
وإذا قربت تحييني
ف نجيني من الوحدة
ومن الحزن اللي جوايا
قتلني البُعد عذبني
وقلة حيلتي تغلبني
َف قرب ليا دوبني
وأرحم ضعفي وهوايا
دانا والله ما هلومك
ولا عارف اعيش دونك
ورغم الضعف أنا بصونك
ومستنيك تنجيني
ف قرب مني دة لأني
بعادك نار بتكويني.

الصديق لو مرة يغدر
يبقى واجب اجتنباه
واللي عينه في رزق غيره
جعان وراح يسرق منابه
واللي لو خاصمك بيفجر
بكرة هتبان لك نيابه
كل واحد قال هغير من اللي حابه
اللي حابه لفت الأيام وسابه
في بشر في حياتنا ياما
كل ما زيدنا في قيمتهم
جم علينا وفينا عابوا
واللي بيسوف في حلمه
واحتماله تملي جايز
بكرة هعمل بكرة عايز
اللي عايزه غيره جابه
واللي آمن للخلايق
ساب ايديه ومكنش فايق
حط راسه وقام مآمن
الوجع هو اللي نابه .

من هان عليه الود
ميجوزش ليه التبرير
علشان تعبت أسد
في الشق والتقصير
ولا عنده نية يفوق
ولا نية في التغيير
كل اما اعاتب فيه
بيشوفني باجي عليه
وارجع انا اللي اراضيه
وهو كما هو
من هان عليه الود
يستاهل النسيان
والبُعد مش خطوات
البُعد من جوا
ميجوزش نرجع ليه
ولا حتى نبكى عليه
والقسوة تعمل ايه؟
بتولد القوة ..

" هيشاوروا يوما ما ويقولوا أه هي "

الحلم للشجعان وأنا ثابتة وقوية
وسلاحي قلمي وصوتي جوا الحرب
وإن كان نشانهم صابني ميت مرة
ف انا واقفة بردوا ومش هاممني الضرب
إزاي هخاف وانا ربنا معايا وإزاي همل وشِعري ويايا !!
ده رصاص قلقهم مني مقتلنيش، بالعكس قواني
وإن كان نجاحي هو الأذي ليكم
ف الحلم للأقوى، وانا هأذي من تاني ..

تصدقوا بالله
انا كنت بقول انكوا اهلي
عزوتي وان انا محظوظ بيكم!
السم بيطلع وسط هزار
ونسيت ان الغِل عاميكم
دة كنت ببرر طول الوقت واقول ناسي
وبشوف الأذي منكم ديماً واعمل ناسي
ازاي في ناس قلبها اسود
تتعمد تجرح حد بغِل!
ازاي قادر ترتاح وتنام
وانت بتأذي وتجرح وتذل!
انا كنت زمان اسمع انه
صاحبك دة مرايتك وكتافك
وكبرت عرفت ان الصُحبة
هتحبك وقت ما هتخافك
وانك لو مؤذي بتشبههم
يدوك تعظيم ويبوسوا ايديك
انما لو غلبان تتاكل
ويدوسوا عليك
الناس اطباعها بقت ترعب
والأذي بقا فن وتسلية
كله بيتداري في تليفونه
علشان يجتهد انه يهينك
ويعيب ويسيبلك ف أذية
معايير الناس حتي اختلفت
بقت التريقة " ضحك وافيه"
اتريق علي حد واهينه
علشان أضحك واتسلي عليه!!
كله بيدعي انه مثالي!
كله ضحية !
الناس كلها اصبحوا مساكين
كله بيتكلم بإسم الدين
كله بيعمل فاهم وحكيم
ورأيه عظيم ومفيش منه
واللي بيختلف الرأي معاه
بيسب الدين و يسب امه
علامات الساعة اهي بتقرب
وشرار القوم احنا معاهم
احنا ف اسوء فترات الخلق
الناس بتقلد بعماهم
الناس بتدور ع الشهرة!
واحد بيصور في محارمه
عشان الريتش وكام مليم
يرجع يدعي انه مثالي
ويتكلم بردوا بإسم الدين!
وان حد انتقده
يسب الدين!
رجالة اتقلبت علي التيك توك
اجدعها حريم !
وبنات قلعت علشان تتشاف
والشهرة تزيد ويجيبوا ملايين
الناس والله بقت ترعب
انا كل يومين اسمع عن حد
قرر ينهي حياته بإيده
وندور ع الاسباب نلقي
ضغط وتجريح وكلام بيسم
وتنمر مؤذي وحزن وهم
ونم ومَن عشان الخلق بقت وحشة
دلوقتي بنأذي عشان يتقال
قصفت جبهتها عشان روشة!
واللي بيرفض الأذي يتهان
ويقولوا فلان عامل دوشة
ونرجع نتكلم بإسم الدين
وندي نصايح ونجود
وننزل قراءن ونزود
ونقول ان احنا بجد ملاك
والخلق خبيثة ومؤذيه!
كلكوا مظاليم!
سبحان الله

دي أفاعي بتدعي مثالية

صباح الخير 🌞

بقولك وسط كل الناس
مليش غيرك.. معاك قلبي
معاك كل أللي بتمناه
هشيل إسمك.. وهستنى
تعود من غيبتك الصعبة ونبني حياة
وهكتب لك قصايد تاني عنوانها
( يا عوض الله )
وهستنى عشان أنت أللي تستاهل
أعيش العمر وإيديا فـ حضن إيديك
حبيبي إن عيشت بكتب لك
كلامي كله ما يكفيك
قدرت أحب نفسي معاك
قدرت تشوفني من جوه
لقيتني فجأة بتطمن
و أقول للناس خلاص " هو "

#بحبك

بلقاك!
بنسي الي فات والي جي
وبشوف عيونك ضي!
بتنور الضلمة الي جوايا ..
نساية! ومهملة جداً
وياك بقيت بهتم بالتفاصيل
من وقت ما هويتك! وانا فاكرة كل جميل
وبصارع الأحزان
أصبحت اقوي من الزعل والخوف!
أصبحت ثابتة وضد أي ظروف
تمنع عينيا تلمحك لو يوم
أصبحت قادرة اقوم
واسند علي كتافك!
لو خفت من كل البشر
والله ما هخافك

#أزيك

جامل جميع الناس قدم كمان السبت
اياك تسيب الناس تقول عليك " اتسابت "
لو كان ف يوم الحب هيعطلك لحظة
سيبه عشان الحب عمره ما كان " بالكبت " 🖤

الشِعر حر و بحره مبيخلصش
والفن حر و حقنا نبدع
و الناس تحب الصدق في الإحساس
و الصدق بس بيجعلك مُبدع.

إهمال الناس للناس مؤلم
لكن تتعز لو أنت بعيد
أول ما تقرب هتجرب
للمرة الأولى تشوف تجاعيد
هتشيب م الحزن وتتعود
إنك وسطيهم بس وحيد.

قابلتك
قلبي حن إليك
عرفتك
قلبي داب فـ إيديك
صارحتك
قولتها لعنيك 
قاوحتك
وانشغلت عليك
عنادي
داب قصاد معاليك
بحَبك 
والحنين غلاب
ي سيدنا
قلبي حن وداب
فـ قرب
حتي لو في عتاب
بحَبك
ثم ردك ايه !؟

" هيشاوروا يوما ما ويقولوا أه هي "


وإن كان نجاحي هو الأذي ليكم
ف الحلم للأقوى، وانا هأذي من تاني ..

وحشتني
والاشتياق اسمي معاني الحب في الغربة
مبقيتش بعرف أنام بدون صوتك
ولا عارفة افرق بين ليالي العمر من غيرك
في شهر مر عليا عمر طويل من غير ايديك الطيبة وحبك
لو هحكي هكتب ايه وانا بدونك
دانا عمري كله في نظرة لعيونك
عندي يقين إنك راجعلي
ومش هنتفارق
وان المفارق لما توهت اهي عرفتني
ان انت اكتر حد فارق
ضيقة وهتتزاح قريب والميعاد هيحين واشوفك
كلها أيام وترجع ليا واتدفي ف كفوفك
كلها ايام يا ضهري وارجع اقوي لما ترجع
ربنا اداني اليقين لجل غُلبي وحزن ليلي
والإشارة ان انت راجع..
مر شهر من الألام ومن المواجع
بس هانت
كل شئ ف حياتي باهت لما غيبت ف يومها عني
والحنين زود أنيني ولما كنت هموت منعني
وقالي راجع
قالي ابنك بكرة هيبات بين ضلوعك
بكرة هتشوفي الفرح لحظه رجوعه
وقتها هيحين رجوعك للحياة الحلوة اللي بينكم
قلبي قالي أنك راجعلي وان حزني مش هيطول
وأن دة بس اختبار..
بكرة يرحل كل حزنك بكرة راح يطلع نهار
بكرة جي وبكرة قرب
دة يقيني ومش بجرب
ربنا قادر وعالم بيا وبحزني اللي زاد
ربنا قادر ينجي روحي من كل العذاب
ربنا قادر يرجع كل حلو ف لحظة غاب
بكرة كل الحزن يمشي..
مهما قفلوا الف باب
طول ما باب الحق واسع..
بكرة خير

بكرة كل الحزن يمشي واعلن اني بقيت بخير.

طب كل ده كان ليه ؟!
مزهقش لسه القلم
ولا قَل صبر الوحدة
من كُتر أحزانك
لكن لإمتى هتفضل
بتعزِّي أحلامك وتموِّت حاجات جواك ؟
كل أللي قَرَّبت له كان حُضنه هو أذاك
اهرب!
مانا هربان.. بس الهروب طوِّل
محتاج أعيش وابدأ من الأول

#قلبي_العجوز

السرير رفض الحكاية وقالي بليتني ببكاك
قُلت ماشي أنا كنت ماشي ومش هعود غير بالدليل
كل ما أمشي خطوة بلقى أني بنزف مش بميل
و إن كتفي سندني لكن خاني فـ الليل الطويل
و أما بصيت للمراية لقيتني مبقيتش الجميل
الهالات السودة زادت والشغف عمال يقل
كل حاجة فـ عيني ماتت إلا سعيي لناس تدل
والجميع قفل بيبانه والبشر فضلت تذل
كله قالي خلاص كفاية بس صعب أيأس و أمِل

#نوفمبر_٢٠٢٠