Статистик маълумотларга кўра, Ўзбекистонда 1 млн.дан ортиқроқ ногиронлиги бўлган фуқаролар бўлиб, уларнинг 45%(400 минг ортиғи)ини аёллар, 55%(500 мингдан ортиғи)ни эркаклар, 100 мингдан зиёдини 18 ёшдан паст, яъни болалар ташкил этади.
Президентимиз Шавкат Мирзиёевнинг ижтимоий адолат ва инсон қадрини улуғлашдек оқилона сиёсати туфайли юртимизда ногиронлиги бўлган шахсларнинг ҳуқуқ ва манфаатларини қонуний ҳимоя қилиш, улар учун таълимда, ишга жойлашишда, спортда тенг имкониятлар яратиш бўйича самарали тизим яратилди.
 
Хабарингиз бор, ўтган йили “Париж-2024” жаҳон Паралимпиадасида Ўзбекистон терма жамоаси сафида 65 нафар спортчимиз 26 та медаль (10 та олтин, 9 та кумуш, 7 та бронза) билан 13‑ўринни эгаллашди.
Албатта, бу ютуқ ва зафарлар мамлакатимизда давлатимиз раҳбари томонидан имконияти чекланган юртдошларимиз, ёшларимизни ҳар томонлама қўллаб-қувватлаш, уларнинг орзу-умидларини рўёбга чиқариш йўлидаги иродали сафарбарлик натижасидир.
 
“Париж-2024” жаҳон Паралимпиадасида камон ва оёқлар орқали ҳайратланарли натижаларга эришган, икки қўлсиз туғилган Ҳиндистонлик Шитал Деви ҳаммани лол қолдирган эди.
Шитал Деви ушбу Паралимпиадада расман рўйхатга олинган ягона камончи аёл бўлиб, ҳинд қизидаги жасорат ва ирода бутун дунё олқишига сазовор бўлганди.
 
**
Қисмати айнан Шитал Деви каби синовли, водийлик Мовлудахон Абдуназарова имконияти чеклангани сабабли, узоқ йиллар уйдан кўчага чиқмаган. Руҳий тушкунлик ва умидсизлик қизнинг ҳаётга бўлган қизиқишини деярли сўндиргандек эди.
Давлатимиз раҳбарининг юртимизда аҳолининг муаммоларини хонадонма-хонадон ўрганиш орқали аниқлаш ва ёрдам беришни йўлга қўйиш борасидаги ташаббуслари туфайли Мовлудахон ва унинг оиласига мадад, умид  эшиклари очилди...