#_قصيدة_السيدة_لبابة

دعوتها مجابه
سيدتي لبابــه
مــد ايـدك لأم الفضل
مايبقى مطروح الحمل
دعوتها مجابه
_________
عظيمه شكد عظيمه وبالقمم تنقاس
اصطفاها الله حليله تـصير للعباس
هـي ام الفضل مـن بـيــن كـل الناس
الرمل جانت تدوسه يصير اخضر ياس

بـعمرها صغيره
بـقدرهـــا كبيره
اعـلى الله وعليها تتكل
مايبقى مطروح الحمل
دعوتها مجابه
_________
ركضت ويه زينب يوم طف الموت
واطشرت مثلهن طـشت الياقوت
صاحت يابوفاضل لو سمعت الصوت
تعال الحك واخذنا وياك خل نموت

ياقمرَ الشريعه
محنتنا فضيعه
بـس تفزع تلم الشمل
مايبقى مطروح الحمل
دعوتها مجابه
_________
مشت ويه العقيلة للسبي وضيمه
بركعها وسترها اعلى الوجه خيمه
انطكت وانسبت واتعثرت بهيمه
عطشت والسراب تشوفه جن غيمه

بناقة هزيلة
سبية نحيله
حلفها بـــجروح الحبل
مايبقى مطروح الحمل
دعوتها مجابه
_________
مثل ما وفه بعلچ انتي وفيتي
جمره بوگفتچ للحره طفيتي
خوش سوايه بالطف خوش سويتي
من صحتي ويزينب يحترك بيتي

صــابــرةٌ وفيه
شهيدةٌ قدسيه
والمهدي ياخذلج فصل
مايبقى مطروح الحمل
دعوتها مجابه
_________
لباب الشئ كلبه وانتي هم كلبه
كلب عباس اعني وعينه والجربه
الربت وي الكمر وي الفخر تربه
عدنه اليوم يمج مساله وطلبه

يكفلنا ذي الجودِ
في ظُلمة اللحودِ
مبخوت بيج الينكفل
مايبقى مطروح الحمل
دعوتها مجابه
_________
🖊️#_الشيخ_حيدر_الحميداوي

لمن طحت اعلى وجهي والسهم بالعين
عبر سهم المنيه وانفتك راسي
صحت والحيل وشله احاه يحسين
تعال الحك عليه باخر انفاسي
وجع بيه من اصيح يفزز الميتين
تعال ارتاح اشوفك ياهلي وناسي
••
لمن طحت اعلى وجهي والسهم بالعين
انكسر نصين سهم الموت بعيوني
صفكت زنودي وسفه شلون اشوف حسين
جمد دم وترب وانطمن جفوني
الله يعين زينب ماكو عدها امعين
طحت واسمعها تندب طاح؟. عينوني
••
انــا العباس سيفي بيوم - ماكل
وكف مكيال كطع الروس - ما كال
طحت والسهم فص العين - ماكل
بعد بيمن اشوفج يارقية
______
🖊️#_الشيخ_حيدر_الحميداوي

ثم جائت اليه الزهراء-ع- وبيدها ماء من الجنة
وهي تقول اشرب (ولدي)عباس. فقال لها اماه والله لا اشرب قبل اخي الحسين-ع- فقالت له بلسان الحال..

وفيه الجابتك يبني وفيه
اصيله معدله لبوه ابدويه
المربيه شهم مثلك ابيه
ولدها بيوم طف الغاضريه
طـشتهـم لخيهم واهليه
وزينب من نخت يحل الحميه
مثل عرسان ركضوا للمنيه
باجر بالوفه حكها عليه

____
🖊️#_الشيخ_حيدر_الحميداوي

وكأني بمولاتي السيدة سكينه طلبت من ابيها الامام الحسين ان يأخذها لعمها العباس-ع- فأخذها. وجلست عنده وحنت لحاله وقالت
—
كوم وشوف اخوك هلال ظهره
خطوه يكوم خطوه تصير هطره
يدير عيونه والعدوان كثره
ويصيح العيشه بالعباس كشره
••
كوم وشوف حال اختك يعمي
اجيتك همها اسولف فوك همي
جفنها وجفني من اللطم مدمي
تصيح بعازتك ( ياصوغة ) امي
••
كوم وشوف ياحالة رقيه
لهسه متانيه ترجع خطيه
عمي تكول شو طول عليه
وعدني وكال اجيبلج اميه
••
كوم وشوف عبدالله ايتلوه
كطرة ماي ماعدنه ايتروه
توه العوز بان اعلينه توه
كوه نشم هوى بلياك كوه
••
الحزن سيطر على اعظامي - عماني
البجي لفركاك اخذ شوفي - وعماني
البنات اعمامهن يمهن - وعمي اني
اعلى شط الموت من سوده عليه
_______________
🖊#_الشيخ_حيدر_الحميداوي

زينب من نخت عباس اخوها
صاح ادللي ترباة ابوها
نده لخوانه كلهم حاوطوها
( والراية ترف فوك الخيمه )
••
ذب اعمامته ودنك حماها
وصار كبالها ويمها اوراها
زنيب دنكت من مستحاها
( وتكله الخافت طمنوها )
••
هنانه دخنن ريشات راسه
كاللها وجمر تسعر انفاسه
انتي بشاربي يم القداسه
( كالتله مشكر يعيوني )
••
حلف عباس بالعباس لخته
وكض اشواربه وادخيل بخته
اليوصل خيمتج نملخ ركبته
( ما جايبته امه الحط عينه )
••
🖊️#_الشيخ_حيدر_الحميداوي

وكأني..
بمولاي علي الاكبر-ع- حين ودع اباه وبرز الى القتال خرجت خلفه اخته الصغيرة الحبيبة
رقية-ع-باكية حزينة خائفة على شبابه وتخاف من بعده الضياع ، فجلس على الارض واجلسها في حجره واخذ يقبلها ويطيل النظر الى وجهها ويستمع الى كلامها ويتألم لإلمها ، (فقالت له)
_______________
يــبـو طـــول الحلو لاوين رايح
خيام حسين صــاير بيها صايح
بجي ولطمه ونحيب وصوت نايح
هاي وعود بعدك مــوش طايح
بعد ياهو الصبح عكبك نصابح
ويـــاهــو يشيلني والمن امـازح
عكب جفك الجف الموت اصافح
الحجي خلافك بعد ماصار مـالح
نشوفك غيم رغـم الدنيه بـارح
••
🖊️#_الشيخ_حيدر_الحميداوي

ثم أخذت تقبلهُ بين عينيهِ وهو يقبلها بيَديها. ويطيلُ النظر الى وجهها. وتطيلُ النظر الى وجههِ وهي تقول ..
_______________
اروحن فدوه لرسوم الحواجب
يكشخة بني هاشم وال غالب
هـــي التلزم هـاي الــشـوارب
ابــوك حسين جـا للنور طالب؟
••
اروحـن فـدوه للعين الكحيله
التشمهن ما تمل عمتي العقيلة
يـكعبه تصلي لعيونـــه القبيله
دخيله بـشاربك انــه دخـيـلـه
••
اروحن فـدوه لربات المضايف
ورى عيونك بعد مامش سوالف
إجيتك يبن ابوي بگلب لاهف
يـــل عيونك امان بليل خايف
••
اروحن فـدوه لدموعك يهيبه
غــريـبـه خلاف حنيتك غريبه
المصيبة من تسد عينك مصيبه
عجيبه الماي من يعطش عجيبه
••

اخافن من بعد عينك يغاتي
تموت وتنفطر بالدم لهاتي
وتـلـوح النار يالاكبر عـباتي
نخاف من السبي ياعز خواتي
••
🖊️#_الشيخ_حيدر_الحميداوي

لماذا الامام زين العابدين يدعو على حرملة بالموت؟
______________
ذبح عبدالله اخوي البعده تو يرضع
فتح نحره فتح ودموم ظل ينبع
كامت روحه وي دم النزف تطلع
خله حسين هدمه ودمه ما يكطع
_____
ذبح عبدالله اخوي البعده جن ورده
شخب دم النحر واحمر صبح خده
طاسة مـــاي طوله وبالفله اتبده
فصل راسه النذل بس كضته الجلده
_____
ذبح عبدالله اخوي التوني ناغيته
هاجم بيت اهلنه الله يهد بيته
لون خيرني جا نحري اله انطيته
رد حسين تنكط دمــــه خاجيته
_____
ذبح عبدالله اخوي وصوت ضحكاته
بسهم مسموم كاسر گلب اخياته
مثل جاسم والاكبر والهوى فــاتـه
ضلع الـــزهــره جنه بهاي طكاته
_____
🖊️#_الشيخ_حيدر_الحميداوي

صوب كمرنه كبل نحر الطفل صوب كمرنه
كسره كسرنه كله العين السهم كسره كسرنه
•••
للعين من جاس احس عيني طفت للعيون من جاس
من صاب عباس لطم عين ام حسن من صاب عباس
•••
زينب كعبه 🕋 والكافل - طفاها
ظـــلام اوجـهه المنـور - طـفها
يـسـهـم الـبـيـن لعيونـه - طفاها
وفيّت روحته مامنها فيه
•••
مامش حراسه بعد بابت علي مامش حراسه
مكطوع راسه اليهب كبل الهوى مكطوع راسه
_____
وبعد عنده مثلث بيه ثلاث اسـهام
حاقد على حسين وفتح صدره ونـام
طلع من الكفه وطلعن وياه اعـظام
اعظام ضلوع صدره الما بعدهن كام
__________
🖊️#_الشيخ_حيدر_الحميداوي

حَرَ قلبي لمولاي زين العابدين وقد جاء لدفن الاجساد المرملة بالدماء
___
رغم مأساة كلبه علي السجاد
رجع يدفن ابوه وباقي الاجساد
خضيبه عله الترب اجساد الامجاد
وعليها صلت اوحوش البراري
___
دفن انصار ابوه بدمع سجاب
ودفن عريس هاشم ويا الاصحاب
بظهر محني عليهم هال اللتراب
ودمع عينه على الخدين جاري
___
الله يعين گلبه وشاف بالبر
عالكاع بشمس تموز بالحر
شبيه المصطفى وكله توذر
يكله ياعلي شوف انكساري
____
ولن صوت النحر والدمه يجري
رضيعي ياعلي خله اعله صدري
وسد عــالتراب بهيده نحري
واحجي لشيعتي ضيمي ومراري
____
وكف شايل رضيع العطش جاسه
لازم ركبته الما بيــها راســــه
مـــا ظنه سلم مــا فرس داسه
على امصاب الرضيع تهيج ناري
____
مامش راس يحجي حسين نحره
يبويه خنصري المكطوع دوره
وخلي تصير اصابع عندي عشره
يبويه خنصري ويا الجسد واري
_____
ابو الباقر نهض بس كله حيره
وكصد للعلكمي بدر العشيره
مثل حسين هم لمه بحصيره
ويكله ياكمر اظلم نهاري
_
رجع والحره زينب نشدته وين
كاللها يعمه ادفنت الحسين
هاج الضيم بيها ورادت البين
تموت ولا ضعن ليزيد ساري
____
🖊️#_الشيخ_حيدر_الحميداوي

ثم نظرت الى تلك الجثث فتحسرت وقالت
••
حسافة تنام خيالة شكرها
ملح الكاع البدمها عطرها
اوحيده بت علي بحيره شكبرها
وبلايه كافل الهيمه تطرها
مصيبة تهدها والاخره تجرها
عسن لا طال يخواني عمرها

___
🖊️#_الشيخ_حيدر_الحميداوي

اجهزت نوگ السبي يحسين - للسوگ
واحنه احبالنه مـــن الروس - للسوگ
نشدنه الشمر ويــن وگـــال - للسوگ
وكلتله السوگ مو للهاشمية
__________
🖊️#_الشيخ_حيدر_الحميداوي

تعيبه ونــاحلة وتضلع - هزلنه
واحنه من الوجع كلش - هزلنه
نخله. ومـريـم افـركك - هز النه
وتساقطنا تعب بالغاضرية

_______
🖊️#_الشيخ_حيدر_الحميداوي

ادور عــاليـركبني الهزيـله
واصيحن وين الحيود الثكيله
حيهم ياهلي شيوخ القبيله
يحماي الخدر انه العقيله
تعال الحك ترى السفره طويله
وتضلع ناگتي وكلش نحيله
دخيله بشاربه اليحفظ دخيله
••
مريضات - عليكم ياهلي نون ومريضات
نـحيلات - ركضنه كربله وكلش نحيلات
هزيلات - وبعد نوك السبي عرجه وهزيلات
حرامات - وياكم ما متت وسفه وحرامات
___________
🖊️#_الشيخ_حيدر_الحميداوي

#_مع_الحسين_بداية_بلا_نهاية
اللهم لك الحمد حمد الشاكرين لك على مصائبهم