فزاعي يوم العاشر

وآويلي على المظلوم
_______________
يـــوم العاشـر بعاشـور
ناديت بـگـلب مـجمور
من شفت الأخو منحور

ومن نحره يفيض دموم
وآويــلي عــلى المظلوم
______
حـــرت ألمن أدير العين
من ذبحوا أخويه حسين
والكـــافل بـــلا چــــفين

ناديت بگلب مهموم
وآويلي على المظلوم
______
زينب آنـــه ياهــل ناس
طحت أبوليت الأرجاس
چــا وينه البطل عـباس

نـاديته يـخويه گــوم
وآويلي على المظلوم
______
گوم ألحگ يوالينه
مـارحمونه أعادينه
لا ترحل يبو سكينه

گلبي من الحزن مجسوم
وآويـــلي عــلى المظلوم
______
بدمعه نادته أرقيه
بويه ألــحگ إعليه
باگـوا مــني ترچيه

ومن أذني جرت الأدموم
وآويــلي عـــلى المظلوم
______
راســك عـالرمح رفــعوا
وجسمك بالحقد داسوا
يــحسين الـخدر ســلبوا

مارحمتنه هاي الگوم
واويلي على المظلوم
______
من ماي العذب حرموا
وبــطف كــربله نــحروا
هــذا أحسينكم ذبـحوا

من ماي العذب محروم
وآويــلي عــلى المظلوم
______
ياويلي أنـذبح عـطشان
ونـايم عــاري عـالتربان
ويمّه الصحبه والخوان

وخيول الإعادي تحوم
وآويلي عـلى المظلوم
______
مــثلوا بالأخـــو تمثيل
رضـــوا جــثته بالخيل
ماظل عند أخونه حيل

صدر ياخلگ مهشوم
وآويلي على المظلوم
______
كون أتشاهده الزهره
من حز الشــمر نحره
ومتربع عــلى صــدره

هذا الطاهر المعصوم
وآويلي عــلى المظلوم
___________________
الشاعر (اسعد قاسم الگريعاوي)

الليله العاشره...( نعي )أو لمة عزه
بمزج التراث لمة عزه

ليلة أوداع ومصاب/والصبح يبدي العذاب
والفرح ضاع/بلحظة وداع
__________________
 ليلة العاشر  فلا تحصل  مثلها
زينب  بهذا المسه تودع  أهلها
باچر أمن الزلم محد يبقى ألها
لا أبو  اليمه  ولا  حتى  الكفلها
 
ياليل طول ساعاتك / ياليل أحمل آهاتك
لو ودعت الوليان / تتولاني العداون

وين أروحن خويه وين/گلي بعدك ياحُسين
والفرح ضاع/بلحظة وداع
_____
ودعيهم      يالعقيله    ودعيهم
ومن    مناحرهم    يحره قبليهم
أخوتچ   عالگاع   باچر   تنظريهم
خيل أميه بلارحم تسحگ عليهم

يامحلى الوداع أبهل مسيه
وعلوم المنيه
بين الفاطمي والفاطميه

كلشي بحسين أنتهه/مابقت راحه وهنه
والفرح ضاع/بلحظة وداع
_____
خلي أبو اليمه  المسه  يودع بناته
آخر   الساعات   هذي  في  حياته
خل يبوسن  چفه  ويطلبن رضاته
من العطش باچر تره تنشف لهاته
~
گومن بنات النبي خيطن خيمچ عبي
هاي الزلم ماتظل /باچر وراچن سبي
~
باچر أخيول العده/للحُسين أتفرهده
والفرح ضاع/بلحظة أوداع
_____
وخلي أم عبد الله  هالليله  تودعه
من صدرها الطاهر وخلي  ترضعه
هالطفل باچر تره  يختلف  وضعه
حرمله بسهمه تره  نحره  يگطعه
~
أهز مهدك يعبد الله
وأعاين عالمهد خالي/يبني وثمر دلالي
أهز مهدك يعبد الله
~
يالرباب أبنچ تره/بسهم ينطر منحره
والفرح ضاع/بلحظة أوداع
_____
ليلى   خليها   تودع    علي    الأكبر
هايه  أم  وحقها   لو  مدمعها يكثر
تشوفه  باچر  الأكبر   وراسه  مطبر
وصله وصله عالثره جسمه تطّشر
~
يالعايش  بعيوني   وروحي
من بعدك شيداوي جروحي
شلون أتصبر / آه يالأكبر
~
ليلى لازم تستطبُر/من تشوفه منطبُر
والفرح ضاع/بلحظة أوداع
_____
ورمله خلي الجاسم تودعه بلهفه
وخلي  تعجن حنته  وتحني چفه
وعمه  الحسين  وأبو فاضل يزفه
عالأرض باچر تره  تشوفين  نزفه
~
جسام ياضنوتي رايح رايح أمن عيوني
مارحمني الدهر/ أنته نور البصر
رايح رايح أمن عيوني
~
رمله باچر تنظره/محنه من دم منحره
والفرح ضاع/بلحظة أوداع
____________________
الشاعر (أسعد قاسم الكريعاوي)

نعي أو لمة عزة ليلة العاشر

ليلة وداع وآحُسينا وآحُسينا
____________________
ليلة  العاشر   أبو  اليمه   فلا  نام
گاعد   ويتفگد   ويفتر   عالأخيام
هوه   والعباس   والأكبر أوجسام
يبعدون الشوك عن رجلين الأيتام

ليلة وداع وآحُسينا وآحُسينا
_____
يگله   للعباس  أبو  اليمه   أخيه
تدري هذا الشوك شيسوي برقيه
زغيره رجليها  يبو فاضل خطيه
بنتي  ماتحمل  ولا شافت  أذيه

ليلة وداع وآحُسينا وآحُسينا
_____
گبال عيني باچر أنظركم ضحايه
توگع  أنته  وتوگع  بكترك  الرايه
والحرم كلهن تره  يروحن سبايه
وتصبح  أمصيبتنه  ماألها  نهايه

ليلة وداع وآحُسينا وآحُسينا
_____
باچر  أنظر  جاسم  وأنظر  للأكبر
عالأرض   وبدمه   واحدهم  تعفر
حتى عبد الله بسهم ياخويه ينطر
هالطفل من الضمه لسانه إيتفطر

ليلة وداع وآحُسينا وآحُسينا
______
تنچتل   كل    الزلم    باچر   يعباس
جسمي بخيول آل أميه خويه ينداس
وعالخيم تهجم  يبو فاضل  الأرجاس
وبجسمنه   مايظل   ياخويه هالراس

ليلة وداع وآحُسينا وآحُسينا
______
مايرحمون العده أطفال الحسين
لاشرف لاغيره عدهم عالنسواين
زينب وكل الحرم تدخل دواوين
لن يزيد إيگلها چاوين الگمر وين

ليلة وداع وآحُسينا وآحُسينا
___________________
الشاعر(أسعد قاسم الكريعاوي)

أساسية
بمزج التراث

مذبوح نايم عالترب/وأخته يسيره بالغرب
من  أنسبت/ ماحسبت
بسوط الأعادي تنضرب
_____________________________
حسين أنذبح عطشان/جثته موذره/وينزف نحره
ويلي أعله أبن الزهراء
بحر الشمس عريان/تچوي الغبره/ببن الزهره
ونايم فوگ الرمضاء

عاري ثلث تيام ظل عالوطيه
محد تگرب ليه بخ گلبه  ميه

وأوصاله كلها أمطشره/وأعضامه كلها أمكسره
تشوفه الأخت/ماحسبت
بسوط الأعادي تنضرب
________
زينب تشوف حسين/فايض دمه/ونظرت جسمه
مملي سهام وطعنات
وبالخاصره رمحين/گربت يمّه/وصاحت يمُه
لحگيلي حسينچ مات

عينيني يم  أحسين  ليه وتعالي
للغاضريه اليوم شوفي شجرالي

وين أنطي وجهي أبهل بله/أشسوت بحالي كربله
كلشي شفت/ماحسبت
بسوط الأعادي تنضرب
________
والله وكت زينب/شافوا ظلها/وصاحوا إلها
ها چا وينه العباس
والأغرب وأصعب /شمر إيگلها /أله أقتلها
والزينب گدام الناس

أذبحها فوگ أحسين وأگطع نحرها
وخلي اليصير أيصير وأمحي خبرها

لو بيده يذبحها لإن / فضحتهم بسر وعلن
لمن حچت/ماحسبت
بسوط الأعادي تنضرب
________
صح زينب إتيسرت/بس ماذلت/بله أتقوت
لمن طبت للشام
بهيبة علي دخلت/من أتكلمت/كلها أخرست
خيرهم دنگ هام

والله وثلث تنعام بنت الصميده
ذلت جيوش الشام هوه ويزيده

لبوة علي والله ونعم/لمن حچت سكتت زلم
والله أو وفت/ماحسبت
بسوط الأعادي  تنضرب
________
غصبن على الكل صار/مرقد زينب/هيبه ويرهب
بالشام أو ربنه يريد
تگصد إله زوار/صبح ومغرب/والكل يندب
الله   يلعنك  ييزيد

گالتها أمس والله  ماتمحي أثرنه
خالد   يظل  للدوم  باقي  ذكرنه

وينه يزيد وزمرته/وصد للحسين وهيبته
صرخه علت/ماحسبت
بسوط الأعادي تنضرب
________________________
الشاعر (أسعد قاسم الكريعاوي)

يوم العاشر
فزاعيه

هلله هلله حسين وينه/بالسيوف مگطعينه
__________________________
نادت الحره الحزينه
وليه ياخويه أنولينه
هلله هلله حسين وينه/بالسيوف مگطعينه
________
من بعد حامي الضعينه
بلوه    من بعده  أبتلينه
هلله هلله حسين وينه/بالسيوف مگطعينه
________
بلهفه عالشاطي أعتنينه
وصحنه  عباس أنسبينه
هلله هلله حسين وينه/بالسيوف مگطعينه
________
شفنه راسه مهشمينه
ويسرته يــمه ويـمينه
هلله هلله حسين وينه/بالسيوف مگطعينه
________
هذا أبو الروح الحنينه
يدري  لو مايدري بينه
هلله هلله حسين وينه/بالسيوف مگطعينه
________
وجت أعلينه  عبينه
بنار الخيام أنچوينه
هلله هلله حسين وينه/بالسيوف مگطعينه
________
نادت رقيه وسكينه
گطعوا الوالي وتينه
هلله هلله حسين وينه/بالسيوف مگطعينه
________
وبالحجر صابوا جبينه
والدمه سال أعله عينه
هلله هلله حسين وينه/بالسيوف مگطعينه
________
هاي مامرت علينه
خلوا أحبال  أبدينه
هلله هلله حسين وينه/بالسيوف مگطعينه
________
بناگه هزله أمركبينه
بهاي والله مارضينه
هلله هلله حسين وينه/بالسيوف مگطعينه
________
راس أخويه مكشفينه
عالرمح  نسمع  ونينه
هلله هلله حسين وينه/بالسيوف مگطعينه
________
يضربونه   لو  حچينه
ولو على الوالي بچينه
هلله هلله حسين وينه/بالسيوف مگطعينه
________
عالجره والصار  بينه
نشتكي الهادي نبينه
هلله هلله حسين وينه/بالسيوف مگطعينه
__________________________
الشاعر (أسعد قاسم الكريعاوي)
 

ليلة الحادي عشر

أساسية أو لمة عزه

ياخوية/  لتفكر   بيه
ياخوية/من تنظر ليه
ياخوية/لاتبچي عليه
وتبچيني/ياضي عيني
______________________
على راس  الرمح  راسك  يبو  الأكبر
ونظر   عينك   عليه   لحظه   ماوخر
تبچي  أعليه  خويه  ومدمعك  أحمر
وأحس عندك حچي يطلع من المنحر

أحچيلي/من فدوه الأسمك
أحچيلي/عن  همي  وهمك
أحچيلي /  يل  ينزف  دمك
وتواسيني/ياضي عيني
_____
يل  من  الگفه  بطف  كربله  مذبوح
صح مات الجسد بس ماتموت الروح
على  خدك  أشوفنه  الدمع  مسفوح
تالي الليل أسمعك لجلي خويه  تنوح

يبن أمي/لتعذب  روحي
يبن أمي/  لتزيد   نوحي
يبن أمي/وتهيج جروحي
وي أونيني/ياضي عيني
_____
أنمله أچتافه خولّه خويه من أدماك
من  أيميل  رمحه  آنه  أميل   أوياك
أذا لاسامح الله أوطاح  راسك  ذاك
من عالناگه  أطيحن  خويه وأتلگاك

وعيوني/ تنظر   بعيونك
وعيوني/ماتغفه  بدونك
وعيوني/تسئلني شلونك
وتحاچيني/ياضي عيني
_____
ماعدهم رحم وأعله الرمح رفعوك
گدام  اليتامه  راسك  أو كشفوك
ليظل    بالك   أعليه   إذا    نزلوك
وبالصندوگ راسك خويه لو خلوك

مانگدر/بهل حاله نشوفك
مانگدر/ يبن امي نطوفك
مانگدر/ ولا  بينه  نعوفك
ولا تلفيني/ياضي عيني
_____
مصيبه البيها آنه بكلشي ماتنقاس
أول مره  هايه أتصد  عليه  الناس
أدري هوايه مني مستحي العباس
ينبع غيره  من الجدم  حد الراس

عالشاطي/   يسرا    ويمينه
عالشاطي/  والسهم  أبعينه
عالشاطي/طگ ظهر حسينه
ويناديني/ياضي عيني
_____
بناتك خويه والله بعيني أخليهن
أفگس عينه كلمن ينظر أعليهن
لو  تعبن  على  متوني  أتچيهن
مو  بعبايتي   بعيوني   أغطيهن

لا تسئل/عن حال البيه
لا تسئل/ شصاير برقيه
لا تسئل/ ماتت   بيديه
وتأذيني/ياضي عيني
_____
لا  تبچي  عليه   ولا  عليّ   تهتم
وإلي يمسني خويه بچلمه يتندم
بلسان   الوصّي المرتضى  أتكلم
وقصر إيزيد والله أبطبتي يتهدم

آنه أختك/  مادنگ  راسي
آنه أختك/حيدر بحساسي
آنه أختك/وأختك  عباسي
من يوليني/ياضي عيني
___________________
الشاعر (أسعد قاسم الكريعاوي)

أساسيه

هلله هلله شلون دنيه بيها دارت
زينب وتمشي سبيه وين صارت
روس أهلها عالرماح
والدرب  ون   ونياح /والله دنيه
____________________________
هل صباح أهدعش لاچن أظلم أعله العيله هل
صبّحت   زينب  أديها  وسفه مشدوده بحبل
من عگب  عباس  اخوها  تنسبي  فوگ   الهزل
وروس أهلها  مكشفيها وحتى عبد الله الطفل

والحرم وأطفال  زينب  جمعتهم
لحظه وحده بت علي مافارِكتهم
أظلم إعليها الصباح
والدرب  ون  ونياح /والله دنيه
________
من على ظهر الهزيله تحچي زينب والكفيل
والحوار   الدار  بيهم   ماشفت   منه  مثيل
عالرمح عباس راسه  والعقليه أعله الهزيل
الشام  رحلتها  بعيده  والدرب كلش طويل

يختي  يازينب يگلها  أعذريني
هذا حالي يالعزيزه سامحيني
منچ أترجه السماح
والدرب ون  ونياح/والله دنيه
________
دگله زينب يابو فاضل أشكرك ياكافلي
قصرت  حاشه  اگولن  يالگلتلي أدللي
خويه لا تهتم عليه  زينب آنه بت علي
بس ولا چانت أبالي  هيچ  وليه أنولي

وسفه كل ساعه الشمر ينظر عليه
يضحك  وبيده   يهز   وآنه  سبيه
وين أخوچ إيگلي راح
والدرب   ون   ونياح/والله دنيه
________
تحچي زينب وي أخوها حسين  وبطول الدرب
والحوار   الدار بيهم   الله  يدري  شگد  صعب
تبچي  زينب  من نظرها وحيل  تلطم  عالگلب
وهوه هم  يبچي ولاكن من دِمه نحره  اليصب

وعينه ماسدها بقى  يتبع  ضعنها
ومن يضربوها يون راسه أعله ونها
نوح عالنوگ وصياح
والدرب  ون   ونياح/والله دنيه
________
والحوار  الثاني حاصل  للحسين  وأبن أبوه
خويه  ياعباس   گله  راس أبو  اليمه الأخوه
عالطفل عبد الله عينك راسه خاف إيطيحوه
خويه كل ساعه أصدله  هالأعادي  إيحركوه

شلون لو عبد الله يوگع من رمحهم
وعيلتي محتاره ياخويه بجرحهم
يميل راسه أويه الرياح
والدرب    ون  ونياح/والله دنيه
________
گله عباس آني حاضر خويه يحسين أطمئن
حتى لوبس راس أبقى كافل وحامي الضعن
خويه طول الليل گاعد ماغمض مني الجفن
ناگت أختي خويه عرجه گاعده إعليها وتون

وهاي أختنه زينب الماكو مثلها
شايله مصايب جبال الله بثقلها
الگلب من عدها طاح
والدرب    ون   ونياح/والله دنيه
__________________________
الشاعر (أسعد قاسم الكريعاوي)

نزله

آه يادرب اليسُر/عذبت گلبي شكثر
وآنه زينب/وآنه زينب
___________________________
أشتكي  لله   ورسوله   والعلي   هذا  الأمُر
أحنه  أهل البيت أحنه شلون  نطلع  لليسُر
والله صعبه آني أمشي مچتفه  وي  الشمُر
عگب عباس الغضنفر بالضعن يحدي الزجُر

أمشي أنه والحرم/ويه ناس المو شيم
وآنه زينب/وآنه زينب
_____
وين آنه أو وين چانت  ليه هاي المسأله
يامصاب   ويا  رزيه   ويا هظم   أتحمله
ثنين وثمانين طفله وطفل صرت أمكفله
أبقى  للموت  آنه   أصرخ  كربله  ياكربله

أبقى كل عمري أعيد/ياألالهي ألعن يزيد
وآنه زينب/وآنه زينب
_____
أي   وحگ  أمي  الزچيه  وحيدر  وطه  النبي
ماتلوگلنه    المصايب     لا  يلوگلنه     السبي
من كثر شمس الله صارت حمره ياناس العبي
وأشعر    براسه   يگلي    الخاطري  لا  تتعبي

صح گصه بيه الزمن/بس يخويه أطمئن
وآنه زينب/وآنه زينب
_____
أصبحت  يگوب   چني  شايله  حزن  وقهر
فراگ أهلي هل جعلني أمشي محنيت ظهر
ذبحوا أخواني ضمايه  گبال  عيني  عالنهر
مرت   إعليه   الليالي  ذبّلت  عيني  السهر

صوتي أصبح بس همس/أحچي بس مابيه حس
وآنه زينب/وآنه زينب
_____
ريت ميته ولا أشاهد  هالمصايب والمحن
ولا شمر والزجر بيه  يحدي ويگود الظعن
أصبحت   آنه غريبة  عگب  أهلي  والوطن
آنه أخت حسين آنه والگمر وأخت الحسن

من بلد أمشي البلد/صح يسيره بس أسد
وآنه زينب/وآنه زينب
_____
إله  أذل  إيزيد   والله  وإله  قصره   أزلزله
وإله أخلي يعض  أصبعه ويندم أبما أفعله
حگه  مايعرفها  زينب  بت علي عقد الوله
هيبته وعرشه ومقامه تحت رجلي أجعله

أدخل بهيبت علي/والفخر كله ألي
وآنه زينب/وآنه زينب
_________________________
الشاعر (أسعد قاسم الكريعاوي)

في ليلة الحادي عشر وصلت رقيه إلى جسد والدها الحسين عليه السلام

أگعد ثواني / بنتك تراني
جيت وجبتلك ماي / أگعدلي يرجواي
بنتك تراني / بنتك تراني
_____________________
من مشه الخيل / وأعتنه الليل
جته چل طيف
تمشي وأطيح / بويه وتصيح
بس على كيف
خايفه مــن الــعده لايــسمعوها
لــو يـسمعوها أبــد مــايرحموها
مــو مبعيده لـو لگـوها يـم أبوها
فوگ ذبح حسين لاشك يذبحوها

يبن الزچيه / تلگه رقيه
دگلك يبعد أچلاي / أگعدلي يرجواي
بنتك تراني / بنتك تراني
_____
بويه وينك / فكلي عينك
لــــيش نايم
أمشي وأعثر / بجسم الأكبر
مدري جاسم
بـويه بس أشـر بـديك وآنـه أتبعك
آنــه أعـرف چـفك ولتظن أضيعك
بعيني شفته للنذل يگطع بأصبعك
من صـحت آه بترس أذني سمعك

هذا أبويه / مدري أخويه
أختلف عندي الراي / أگعدلي يرجواي
بنتك تراني / بنتك تراني
_____
أدري لهفان / أنته عطشان
وجبت إلك ماي
جيت أشربك / وأروي گلبك
وتــمشي ويــاي
حــافيه جــيتك يبويه بـهل مــسيه
مچوي چف رجليه هاك أنظر وأديه
ومحترگ ثوبي وحـگ ظــلع الزچيه
وسطر خدي الشمر ودموعي جريه

آنه زغيره / وعلتي چبيره
هاك أنظر الجدماي / أگعدلي يرجواي
بنتك تراني / بنتك تراني
_____
تدري بينه / يبو سكينه
شصار ماصار
جونه ظلام / حرگوا أخيام
وشـــبوا النار
آنـه وي عـماتي نــرگض لــن أجانه
مسرع بسوطه الشمر يرگض ورانه
أو واحـد مـگابل أجــه وبالخيزرانه
أو  ورّم أمـتون الفواطـــم يـاحمانه

بسوط أنولينه / ونشكف بدينه
أشكيلك أمن أعداي / أگعدلي يرجواي
بنتك تراني / بنتك تراني
_____
شلون أعوفك / وآنه أشوفك
وصله وصله
هذا صدرك / مـدري ظـهرك
مــن أصدله
بس نـحر  بويه أشــوفك ويــنه راسك
مــنهو  بـالحافــر ينور أعــيوني داسك
من عساها أنشلت چفوفه إلي جاسك
ليــش مـارحــموك لا رحــموني ناسك

جثتك رميه / سوده عليه
بعيوني شفتك هاي / أگعدلي يرجواي
بنتك تراني / بنتك تراني
_____
أرد أضمه / خاف أئلمه
مدري وشلون
شلون ألمّه / شفت جسمه
بهاي العيون
عــالتراب أنـظر لـجسمه وذره وذره
والسهام أتزاحمت كـلها أعله صدره
مدري چم رمح أعله خاصرته أنظره
هــاي كــلها والأشــد مـگطوع نحره

صحته بحناني / وينه مكاني
أرد أحضنك بهداي / أگعدلي يرجواي
بنتك تراني / بنتك تراني
______________________
الشاعر(أسعد قاسم الكريعاوي)

أميرةُ النِساء        حّل بِها البلاء
        في أرضِ كَربلاء
_____________________
صوت أعتله / من كربله / زينب أظنها
تنوح وتون / أم الحزن / فـگدت أهلها
لا مـن أخو /لا مـن أبو / لا والي عـدها
وينه اليجي / واليعتني / ظلت وحدها

حلّ بِها الظَلام  /  وأحرقوا الخيام
         في أرضِ كَربلاء
________
بنتك علي / أبلا  ولي /  بحيره  چبيره
أحتار الوجه /وين  يتجه / المن  تديره
سبي أنسبت / ماحسِبت / تطلع أسيره
بچفها الحبل/وأعله الهزل/هاي الأميره

مَحنْيةَ الظَلوع    /   وتَذرفُ الدموع
           في أرضِ كَربلاء
________
تدري شحصل/ ياأبالفضل /زينب سبوهه
بـدرب السـبي / بـنت النبي / وليّه ولـوهه
لا مـاأظن / يــشفه المـتن / مــن لوعوهه
تندب إلــك / وتتوســلك / ويــنك يخوهه

أينَ هوّه الكَفيل  /   وليلُها طَويل
          في أرضِ كَربلاء
________
طول الدرب / مدمع يصب /والله هضيمه
فوگ الهزل/ أشجم طفل / وأشجم  يتيمه
بيهن  يمُر / شـمر  وزجُر / بسب  وشتيمه
قصـة  سـبي / وحـرگ العبي / قـصه أليمه

وأحَرقوا الخِمار  /  وشتّموا الصِغار
           في أرضِ كَربلاء
________
منهو  إلي / حسين  الولـي / ومـگطعينه
راسه أنگطع / برمح أنـرفع / ومـكشفينه
شمر وضحك / بيده صفگ / ينظر علينه 
ميته عـسه / ولا مـحبسه/ شفته  بيمينه

قَدّ قطّعوا النحُور  /  وهشمُوا الصدُور
          في أرضِ كَربلاء
________
بذاك العناه / فرض الصلاه /حانت وكتهه
وآنـه بيسُر / ظيم  وعـسُر / بـس ماعفتهه
يــوگـــف عــلي / ســتراً إلــي / وأتقدمتهه
خــاف النذل / عــينه تــظل / لـي يلتفتهه

قَسَتْ بِها الظروف  /  صَلّت بلا وقوف
            في أرضِ كَربلاء
_______________________
الشاعر ( أسعد قاسم الكريعاوي )

عايله وإيتام / تتجه للشام
زينب يسيره تروح/والعيله كلها تنوح
_____________________
مشت زينب يسيره  مگبعه بهمها
دمعها   سايل  وماينوصف  همها
آنچتلوا كل أهلها وحرگوا أخيمها
يريتك ياعلي  تحضر  تجي  يمها

ياعلي تناديك / تحضر وأدريك
شيصبر المجروح/والعيله كلها تنوح
________
على   الناگه   أهل  بيت   النبوه  تروح
سبايا   وروس   أهلها  عالرماح   تلوح
ودمه نحر الرضيع أعله الرمح مسفوح
ورباب   امه  تصدله  والگلب  مجروح

تنظره أگباله / تحمله الچتاله
تصرخ يبعد الروح / والعيله كلها تنوح
________
بعد منظر يعذب الروح هل منظر
يصد لأمه على الناگه  علي  الأكبر
فتح عينه ويباوع ظل على الخدر
وعلى خده علي ينزل  دمع  أحمر

والگلب حساس / ويشيّب الراس
فوگ الرمح ويلوح / والعيله كلها تنوح
________
ورمح شايل  على  راسه  ولد  يلمع
شبه وجه الگمر  بالليل  إذا   يسطع
بعمر سن أهدعش وأمه تهل  مدمع
هذا إبن الحسن وجهه بدمه أمبرگع

نادته جسّام / ماتت الأحلام
وي دمك المسفوح/والعيله كلها تنوح
________
وأبو اليمه يصد لاخته ويواسيها
أصبري يختي يازينب  يحاچيها
أريدچ يختي  هل  عيله  تباريها
وأريد   بعينچ    وگلبچ   تخليها

يختي كفليهم / وبالله صبريهم
عنچ رحت مذبوح/والعيله كلها تنوح
________
وأبو فاضل يگلها  يختي  عذريني
إذا   مانابت  السهم بوسط عيني
وإذا ما عالنهر مـگطوعه  چفيني
أگص راسه إليسمچ وأنتي تدريني

كافلچ غدروا / وعالنهر صابوا
جسمه بقه مطروح/والعيله كلها تنوح
______________________
الشاعر(أسعد قاسم الكريعاوي)

ليله الحادي عشر...
لمة عزه

ليلة أوداع  ومصيبه
بين محبوب وحبيبه
ياحبيبي ياحسين/نور عيني ياحسين
_____________________
آنه جيتك خويه  والنار  بعباتي
خويه والدخان غير كل صفاتي
من گلتلي  سلمّت بيدچ  بناتي
وبوكتها  آنه حــسيت أبمماتي

آنــه زيـنب تــعرفوني
العيله أخليها بعيوني
تدري گلبي شگد حنين/نور عيني ياحسين
_______
من بناتك خويه  عندي ودعتهن
ساعة الحرگوا  خيمنه جمعتهن
خويه وأعله النوگ بيدي ركبتهن
والله وبـطول الـدرب مافارگتهن

حاضنه سكنه ورقيه
أيدي بيديهن سـويه
من مشينه ميگيدين/نور عيني ياحسين
_______
خويه أمشي عليك ضلع أمي الزچيه
ليــش أصــيح ومــاترد أنــته عـــليه
آنـــه راح أمــشي يــبو إلــيمه ســبيه
بس ردت  چـلمت وداع وهـاي هـيه

ردت أودعه ولو مره
قبل ليگطعون نحره
ردت أبوسه من الجبين/نور عيني ياحسين
_______
آنه شــحمل يا رزيـه ويا مـصيبه
بعيني أشاهد جثتك خويه سليبه
والگمر  يم  النهر  جثته  خضيبه
وآنه بين أعداي محتاره  وغريبه

هــل دهر باليني بلوه
عالمصايب ذبني گوه
بالحزن عشت السنين/نور عيني ياحسين
_______
رحتوا عني وأصــفگ يساري باليمين
زيــنب آنــه أويني  أو  وين الدواوين
شــاهدت مـوقف فلا تنساه هالعين
گبال عيني يزيد يضرب ثغر الحسين

بالعصه كسّر سنونه
والـيتامــه يــنظرونه
وأرتفع صوت الونين/نور عيني ياحسين
________________________
الشاعر(أسعد قاسم الكريعاوي)

أساسيه

غريب / تريب / سليب حُسيناه
خضيب/عجيب/رهيب حُسيناه
خيل أسحگنه عشره
گطعوا ياويلي نحره/حُسيناه
______________________
بعالم الرؤية  شفت  هاي  العجايب
چن أشوف  حسين وأهله  والگرايب
بلايه روس أجساد متوسده الترايب
چنت شاب ومن شفتها صرت شايب

أشوف/سيوف/ألوف~~ونادي
رهين/حزين/ حُسين~~ونادي
ظلوعه كلها أمكسره
گطعوا  ياويلي نحره/حُسينا
___
شفت عريس وشفت يمّه محمد
تقربت  يمه  وشفت الأكبر  أمدد
مگطعه   أجسادهم   الله  يشهد
وزينب تصيح بحزن الله والاحد

شباب/خضاب/تراب~~عليهم
جسوم/دموم/هموم~~عليهم
كل   واحد   الأنظره
گطعوا ياويلي نحره/حُسينا
___
شاهدت   تلهب  خيم   ياويلي بالنار
ومنها  هجت   عايله   ونسوان وزغار
بيهم   إيحيطون   ويضربوهم  أشرار
وحرمه تشگف بالسياط إيمين وإيسار

نداء / بكاء/ نساء ~~ حياره
تنوح/جروح/تروح ~~حياره
ويمه  تنوح   الزهره
گطعوا ياويلي نحره/حُسينا
___
شفت حاله وظلت أعيوني عليها
روس فوگ  أرماح  ويلي حامليها
عن جسدها الروس كلها فاصليها
وعالهزيله    زينب   وتنظر   وليها

صياح / نياح / رماح  ~~ أشاهد
رؤوس/شموس/نفوس~~أشاهد
والعيله  كلها أميّسره
گطعوا  ياويلي نحره/حُسينا
___
شفت راس أزغّير   بسهم   أويحملوا
چبير  رمحه أعـليه بس بالگوه   خلوا
بين   رمح    وسـهم عـبد   الله ينقلوا
ومن مشوا بي ويلي كل ساعه يوگعوا

مصاب/عذاب/رباب~~تشوفه
رضيع/فضيع/صريع~~تشوفه
عبد  الله أشهر عمره
گطعوا ياويلي نحره/حُسينا
___
موقف إلي شفته مايحصل مثيله
بالضرب  صّعدوا  زينب عالهزيله
والحرم   وأطفال  لاذت  بالعقيله
والعليل   برگبته   گيوده   ثجيله

عليل / نحيل/ يميل~~أمامي
يصيح/جريح/ذبيح~~أمامي
عاف   الأبو   عالغبره
وگطعوا ياويلي نحره/حُسينا
___
يقضه هذا  لو حلم  عيني  التشوفه
عالنهر    عباس    وبكتره     چفوفه
كذبت   عيني  ورحت   يمه  أطوفه
شفت سهم البين نابت وسط شوفه

صحيت/مشيت/لگيت~~دمائه
كفيل / قتيل / تسيل ~~ دمائه
رايه  وچفوف أبكتره
وگطعوا ياويلي نحره/حُسينا
__________________
الشاعر (أسعد قاسم الكريعاوي)

ميمر

جسمه وگع/نحره أنگطع
وأعله الرمح راسه أنرفع
وتودي وتجيب الخيل/بجثته وسبوها إعياله
__________________________
ياسامعي أنقل  إلك  هالمنظر
وبدورك أنته أتخايله وأتصور
سبط النبي بالغاضريه  أتوذر

هنا خنصُره/هنا منحره
هنا  أخوته  أهنا  أكبره
أهنا جاسم أعله التربان/وتولته الچتاله
_____
لمن وگع سبط النبي  من  مهُره
تعنه الشمر وأثنعش طبره طُبره
وبخنجره  أتعنه  ويحز   أبنحره

بصدره صِعد / وفوگا گِعد
وگض لحيت حسين وبعد
حزه وفصل عنه الراس/وبرمح عالي شاله
_____
بطف كربله شمر اللعين  إينادي
آنه الذبحت أبن  الرسول الهادي
ومن ابن هنده راح أنول أمرادي

حتى السمه/مطرت دمه
ذبحوا   عزيزچ   فـاطمه
راسه أنشمُر بالميدان/وصوت الضحك يتعاله
_____
بعد   الذبح  لن  أعتنت   سلابه
ذاكه الرُفس ذاكه اليسلب أثيابه
ذاكه أعتنه وبرمحه  گلبه  صابه

بعد الذبح / بسيف ورمح
وألف وتسمع ميت جرح
والأصعب وأكلف چان/تنظر عليه أطفاله
_____
حين الأجت هاي الخيول العشره
تروح وتجي لحد  ماتهشم صدره
الحد ما تساوه  صدره ويه ظهره

خيل الأجن / مايرحمن
إله  يـطــحـننه طـحـن
وأنصبغت بفيض أدماه/من داسته الخياله
_____
يالحيرت حتى الذي يدفنونك
متطشر   وماعرفوا   إيلمونك
حگهم لإن ماگدروا إيعرفونك

جسمك وذر/ وبلا نحر
وماينعرف صدر وظهر
بكترك رضيعك مذبوح/ضامي أنفطر دلاله
___
لتلومه للعاشگ  إذا  شـگ  ثوبه
مايصبر   ومات  بذبح   محبوبه
هاي المجالس كل سنه منصوبه

عفنه الأهل/عفنه العمل
ومجلس أبو اليمه يضل
وإلي تمسك بحسين/هنياله ألف هنياله
________________________
الشاعر (أسعد قاسم الكريعاوي)

في أسراٍ مشينا
لم ننسى حُسينا
ذبحُ الحُسينِ بِكربلا
أبكى السماءِ
______________________
آنه العقيله/دمعي أسيله
بعيني شفت بالغاضريه أفجع مصايب
تمنيته موتي/مابين أخوتي
ولا إنسبي بيوم أهدش ويه الأجانب
بنات الرساله/حالتنه حاله
عگب الأهل محد حضر مــن الگرايب
أحنه وحدنه/والدنيه ضدنه
المن أبث حزني وعذابي والمتاعب

في أرضِ الرزايا
أمسينا سَبايا
دمعٌ على السبطِ جرى
شبهُ الدماءِ
ذبحُ الحُسينِ بِكربلا
أبكى السماءِ
______
ذبحوا زلمنه/وحرگوا خيمنه
ومن الأهل من الزلم محد بگالي
مشينه سبايا/بدرب الرزايا
وأعله الرماح العاليه روس الغوالي
جاسم والأكبر/وعون أويه جعفر
وعن الگمر عباس أبو الغيره سؤالي
وحسين أننظره/گدامي نحره
ويفي من حر الشمس راسه العيالي

لبناتُ الكِرامِ
لم يأتي مُحامي
وحُسينُنا فوقَ الثرى
عاري الرداءِ
ذبحُ الحُسينِ بِكربلا
أبكى السماءِ
______
بشام النوايب/شفنه العجايب
طبول ورقص وأحمر لبسهم والهلاهل
ضنينه عدهم/عيد أبلدهم
ألمن فرحهم والغنه ضليت أسائل
بعيني شفتهم/عالي ضحكهم
وراس الحُسين أعله الرمح ويحمله جاهل
بمي حار رمونه / وبحجار ولونه
ومن كل سطح رمي وشتم ألنه بتواصل

في السوقِ مشينا
جهروا في سبينا
القاصي والداني يرى
سبيّ النِساءِ
ذبحُ الحُسينِ بِكربلا
أبكى السماءِ
______
قصه أليمه/الطفله يتيمه
أتعذِبت وأتمرمُرت من يسروها
حبال أبديها/ومشبگيها
صارت غريبه وما رحم بيها عدوها
بذيچي الخرابه/صاحتله بابه
يحسين أريدك والعده لن يسمعوها
يابويه صاحت/وبلهفه طاحت
من شاهِدت وسط الطشت بس راس أبوها

قد ماتت رُقَيه
في ديوان أُميه
في قصرِهم لِبني العُلى
قِمنا العزاءِ
ذبحُ الحُسينِ بِكربلا
أبكى السماءِ
_____________________
الشاعر (أسعد قاسم الگريعاوي)

آنــه الچنت ماواحد / يراها
وهسه الشمر بحباله /يراها
وصار القاصي والداني/يراها
عگب عينك يليث الغاضريه …

اذا ادور قصائد سهلة الحفظ وجميلة المعنى ادخل هنا ما راح تندم


🔗 اضغط هنا للانضمام
📡 https://www.tg-me.com/alhagamy78sattar

هوسات آول محرم

قميص حسين نشرت فاطمه بهاليوم
وأمــلاك الســمه تــبچي عليه أدموم
وكـل وحّـي ونـبي صـاح بگـلب مالوم
ويـه الزهـره يـصرخ ويـلي عـالمظلوم
ونعزي الزهره بهل ليله
____________
ما مـثلك شــهر مـر بـالحزن عـاشور
بان أهـلال حـزنك والگــلب مـجمور
نظل طول الشهر نبچي وندگ صدور
على حسين الذي مـن الكـفه مـنحور
وبالأحزان أنعلي الرايه
____________
ويــّـه رايــتــك نــرفـعها للــرايات
بكل بـيت ومضيف وكل حسينيات
ونحييها الليالي العشره بالدمعات
ومنعوفك أبـد يـحسين لا هـيهات
خدامك أحنه الوفايه
____________________
الشاعر (أسعد قاسم الگريعاوي)

هوسات ثاني محرم
رفعنه بكل گلب مو عالسطح الأعلام
مـن عـام المـضى وألي أجه وكل عام
عـشگنه خـدمتك مـن چـنه بالأرحـام
خــدام ونــظل للمــوت ألــك خـدام
يحسين بحبك جنينه
___________
مجالســنه مــدارس وأحــنه نهويها
خـطــيب وشـاعــر ورادود يـحــييها
عند الزهره أجــره إلــي حضــر بيها
دخيلچ يم حسن هالدمعه سجليها
بداعت مذبوحچ مولاتي
___________
إلف هـنياله كلمن يخدمك يحسين
رواد الخـدامـه وناســها الطـيـبـيــن
مثل حمزه ومثل عبد الرضا وياسين
وعبد الزهره والحلي أو وطن ماضين
وحسين اليرفع خدامه
____________________
الشاعر (اسعد قاسم الگريعاوي)

ليسـتة #مؤسسة منبريون الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 300 عضو
━━━━━━━━━━━━━━━━━━
للإشـــتِـراك 👇🏻.

وإرسل قناتك هُنا : @ahmed_alziwar0

--------------------------------------------------

قناة تعليم الرواديد الالحان
https://www.tg-me.com/ahmed_alziwar1