الدنيا دارت

هله ومية هله   حله الشارع حله
يبعد عيوني الاثنين  هله بزوار الحسين
..........
هله يانور العيون  الخادم صاح ممنون
اجيتو وماتهابون  ذهب كلكم ذهب
مشيكم بيه مواسات للراحن غريبات
للذل صحتو هيهات  تسوون العجب

هله يل بيكم ترف  الرايه
الدنيه ظلمه ونورها المشايه
وعد هذا كل سنه بهمه تجون
يم ضريحه ناصبين قرايه
يل بحبكم مجانين
هله بزوار الحسين
.........
تاج انتم عله الراس  هله يا أغلى هالناس.
يغيره وكلكم حساس     وفايت وعد
العالم بيكم يحير   لغز يلماله تفسير
السنه شما رادت ادير   يزداد العدد

الشوارع خل تشع بأنواركم
شيعت المختار الله اختاركم
اخوان صرنا بهل درب ماكو غريب
دار هالخدام صارت داركم
كحل يل صرتو للعين
هله بزوار الحسين
.............
ميت يحيي الگلوب ينطي وهو مسلوب
ابابه تطيح الذنوب  يستاهل تعب
مثله ماكو انسان  يروي وهوه عطشان
غركنه بالأحسان   معلمنه الادب

حسين يمفضل علينه بخيره
بحبه صرنه اخوان من كل ديره
ياهله كل بيت للزاير يصيح
موقف محير النظر تصويره
بالحر عفيه ماشين
هله بزوار الحسين
...........
التمت كل الأوطان  تمشي چنها خوان
بيهم ماكو تعبان.  صلب يسند صلب
صداهم للسماوات گطعوا هالمسافات
  الخطوه اعدال حجات  الهم تنحسب

شحلات الموكب علينه يمر
على الناس الواگفه يوزع اجر
تدوم هاي النعمه بجاه الغريب
بلايه حب حسين مايسوه العمر

عبرو ها  القوانين
هله بزوار الحسين
..........
خادم اهل البيت ع
فلاح طالب الماجدي

هله ومية هله

السيده رقيه ع

راسك مايشبه احلامي
بويه حسين مبين ضامي
شمسوين وخاطف لونك شمسوين
شنهو الذبل هاي عيونك بويه حسين
* *
متجمعه الوان الرعب خربه وحبال ونايحه
والطفله تتفزفز تضل لو عاشت بنص فاتحه
ماتامن الطفله اللتي مخليه ابوها ورايحه
وماترتوي اشواگ الگلب من العيون الطافحه
وضلت رقيه بهالحزن بس بالاحلام الجارحه
يتحفر الخد بالدمع لو يبقه محد ماسحه
ضلت تشكي بگلب الحاني
تگول انشدمن عن احزاني
كون حسين يصدلي واگله اغيابك وين
شنهو الذبل هاي عيونك بويه حسين
* *
جابولها الراس بطشت ضلت تحاجي حسينها
ضلت تون من الاسى وفاضت مدامع عينها
وعد اللقاء المنتضر شيبه بدم مخضبينها
وين القوام الحيدري وذيج الملامح وينها
ومفطره شفاك الشمس لو بالضمه مفطرينها
لو خيزران ابن الدعي بضرباتها مجرحينها
بويه حسين احجيلي احوالك
ياهو الگطع ذيج اوصالك
شمخلين بذيج ارسومك شمخلين
شنهو الذبل هاي عيونك بويه حسين
* *
تشبح على عينه النضر طفلتك بويه احجيلها
لورايح انت بهالدرب متگلي شتخليلها
بعدك غريبه ميسره وفيض الدموع تسيلها
من غيبتك عن طفلتك تحيي بنوايح ليلها
شال الطشت راسك لچن جثتك ياهو يشيلها
جلوها لو فوگ الصدر جالت حوافر خيلها
ياهو الحز بالسيف وريدك
ياهو تضل عطشان يريدك
وفوگ العين الدم النازل هذا منين
شنهو الذبل هاي عيونك بويه حسين
* *
تنشد على صواب الحجر فاتح جبهته صوابه
نازل على عيونه الدمه وبشيبه ضل خضابه
گالت عزيز المصطفى يصعب عليه مصابه
ونصبت عزا بنص النسا بدموعها السجابه
ضلت بونها تناشده عن راسه ياهو الجابه
لجمو النحر بشيلته لو حسبوله حسابه
لو بالرمح تعلگ راسك
وانلچمت وي جرحك ناسك
فوگ جروح الغربه عيالك مجروحين
شنهو الذبل هاي عيونك بويه حسين
* *
جامد على وجهه الدمه مسحته بطرف اردانها
وتنشد على اصحابه وهله فتية علي وشبانها
جاوين عنك ساعِدك ليث الوغه و ميدانها
عباس ضل بيا كتر يدري نسبت نسوانها
وين اكبر سيوفك علي ذخر الولي وعدنانها
وين الهواشم هم درو من احرگو صيوانها
وتگله تموت الروح بدونك
ماعيش انه بدون عيونك
وشهگت فوگ الراس وغمضت ذيج العين
شنهو الذبل هاي عيونك بويه حسين
* *

خادم الحسين ع
علي العزامي

مايشبه أحلامي

غريبه هالحكايه    سبيه امن السبايه
كتلها راس ابوها    بخرابه شيعوها
          +++++++++
ماتت ومشبوگه اديها ابلهـفه چانن شابكات
طابعه اشفافه اعله خدها امن العطش متفطرات
موت ملگه مدري فرگه اثنينهن متجمعات
اجفونها الماترضـه تنسد مـن شهـر ماطابگـات

روت قصه عجيبه    محب كاتل حبيبه
على طشته لگوها   بخرابه شيعوها
     +++++++++++
ساعة ازمان وگضنّه اجهاز ميتهن سريع
ادموعهن كافي الغسلها التمن اعليها الجميع
ماكو تابوت اعله گدها فصلوا مهد الرضيع
گعده من صلّن عليها امصاب طفلتهن فضيع

صلاة اعله الاميره    ابتكبيرة اسيره
بصعوبه ايكبروها      بخرابه شيعوها
     ++++++++++++
دارن بصحن الخرابه شييعنها اويه العليل
يامتن مافوگه لچمه والنعش رايدله شيل
وحده تتچّه بالاخره بالمشي مابيها حيل
يا ونين اهل الخرابه ينسمع والدنيه ليل

واصعب من فگدها   يدفنوها وحدها
غريبه الودعوها      بخرابه شيعوها
    ++++++++++
اتكرر الصوت ابدفنها هم مثل دفن الذبيح
للگبر من نزل اخته يسمع ارقيه تصيح
لا توسدني اعله خدي ينلچم خدي جريح
بهيده بتراب التهيله فوگ اذني لايطيح

صعبه وانت تدري     گبري بهذا عمري
اهلها الفارگوها       بخرابه شيعوها
     +++++++++++++
فاتحه ازغيره اعله گدهن فرشن الماتم تراب
بالدموع استقبلتهن سكنه هيه ام المصاب
تجرح انواعي حميده ناحت بطور العتاب
آه يرقيه ومصابچ  عيدي صاحتها الرباب

الاكبر من ابنها     تذكرها بحضنها
الخالي وعذبوها   بخرابه شيعوها
     ++++++++++

ثائر الربيعي

غريبة هالحكايه

السيدة رقيه ع

جبت الماي وجيتك اركض
كلما اعثر ليش اتغمض
الگطعو رگبته .. ما يگدر .. يباوع
بس انت ميٍّت .. وعيونك .. تنازع
~
جيتك اركض والركض للمچوي بلوه
ابيا رمح كلها عرف والروس حلوه
جبت طاسة ماي وصلت بيدي گوه
وتدري نگلّ الماي رايد خطوه خطوه

شفت الرمح ..صوغة جرح
رافع راسك شارب دمك
نفسي انحبس .. جسمك يبس
تنزف ساعه ومحد يمك

من الخوف ورهبة دربي
جيتك ناشف دمي وگلبي
ملچوم اصبعي .. من اعثر .. اشده
ماي وجبتلك .. بس نصه .. تبده
~~~
اول الرحلة وصل جدمي اعله رمحك
نگّط اعله ايدي دمه امن اعيون جرحك
تلمع النجمة اعله عيني من المحك
فطر اشافك يضحك وموش انت تضحك

رمحك صعد .. كلش بِعَد
صوتك ناصي وهوسه بأذني
مدري شحچة .. وجفنك بچة
عالگاع ايرن دمعك هزني

مرفوعه اتظل ايدي اليسرة
واتلم دمعك ايدي الاخرة
كل هذا تعبي.. و ازغيره .. ادية
اترجعلي حيلي .. امن اتباوع .. علية
~~~~
لو الوحك ع الرمح لو دم اشمك
لو اشربنك ردت بس شفّة ارسمك
گلبي صاير ساعه ما گادر يفهمك
شلعوا الترچية مدري شلعوا اسمك

عطرك شلب .. دمك رطب
راسك ليّن توه امعلّگ
ابوجهك ضمه .. برمشك دمه
لونك شيبك بالدم يعتگ

حتى الكاع امخضرة ابدمعك
وحتى الخنجر ناحر صبعك
خنصر يمينك .. هم ضايع .. مثلنه
جاباني عطرك .. ياريحة .. اهلنه
~~
بس ملامح راسك وضايع عليه
بلف يا وينك علي وطاح بأديه
وين اعرفن جسمك وگالوا اليه
قطع جسم الاكبر وجسمك سويه

صاير وذر .. رگبه ونحر
گالوا عالماي اشگد دوّر
ما اريدن اَي .. شي امن ادي
اشرب ماي و رد اتطشّر

شفت اشفافك دم مصبوغة
شوف امن اذني انباگت صوغة
الصوغه عزيزه .. الجايبها .. حبيبك
تهت وعليه .. ياشوغه .. التجيبك
~~~~
امن الزغر تتشيّل الميت وليها
چلمة البابا سهم تنحر حچيها
الما لزمهن چف ابو تبرد اديها
الشام والطف واليتم كلهن عليها

اچفوفك سمر .. اهدومك حمر
الچنت افتح عيني بشمتهن
راحن دفن .. ايد وحظن
ياهو اليتمني وموتهن

چي اسم امك اسمي اتظمه
صايحلي اشگد ها يا يمه
اسمي رقيه .. وفاطمتي .. تگلي
اتسميني روحي .. وسميتك .. يكلّي
~~~~
ها يبو طول الرزن طولك تخرّب
تعب راسك كثر ما عالرمح منظب
امن الشمس شيبك سمار اشگد تنگّب
الرمح لو نخلة وعلي چا هسه رطّب

جابوا طشت .. منه خفت
حسبالي الزاد ووخرته
محد حچت .. زينب بچت
راوتني اعيونك بالسكته

اول لحظة واخر لحظة
شفت الراس اعيونه امغمظة
وحده اعله رمحك .. من گتلك .. اجيتك
ووحده ابقصرهم .. بس منحر .. لگيتك
~~
علي هادي الخزعلي

قصة طفلة...... 💔💔

💔💔...

#زوار_الحسین

زوّار نگصـد اصفـوف
زوّار نعتنـي ازحـوف
زوّار والمَلـه اتشـوف
لإبــن الزچـیـّـه

ـــــــــــــــــــــــــــــــــــــــــــــــــــــــــــــــــــــــــــــــــ
مشّای اجیتڪ سیدی وحافي الضریحڪ قـادم
اتعنه مو بس عالجدَم ازحف و اجیلڪ هایـم
حگه الیجن بمحبّتڪ یالجننّیت الـوادم
لا ما الومه الیعشگڪ و اشما یلوم اللایـم

مشّای ڪل سنه و عـام
مشّای حافـي الأجـدام
مشّای لإبــن الأڪـرام
تحلـه المـنیـّـه

ـــــــــــــــــــــــــــــــــــــــــــــــــــــــــــــــــــــــــــــــــــ
نتعنّـه زوّار و خدَم مشّایـه ڪلنه احبابڪ
غایتنه نوصل گبْتَڪ و نسجد نقَبـْل اعتابڪ
شیبه و شباب و ڪل طفل یهمل دمعتـه ابّابڪ
للموت نبقیٰ ابهالحزن نبچي اعله یـوم امصابڪ

للموت نمــشي زوّار
للموت نفـدي الأعمـار
للموت رغــم الأشــرار
و النـاصـبیـّـه

ــــــــــــــــــــــــــــــــــــــــــــــــــــــــــــــــــــــــــــــ
خدامڪ احنه ونفتخر یاسیدی ابهالخدمـه
سِر النجات ابخدمتڪ والخادم اتعلّي اسمـه
نعمه خدمتڪ سیدي تاج الشرف والرحمـه
احسبنه عبیدڪ للأبد و ارزقنه های النعمـه

خـدّام لآخر الأنفـاس
خـدّام ضـد الأرجـاس
خـدّام نـرفـع الـراس
ابهـای الهـویـّــه

ـــــــــــــــــــــــــــــــــــــــــــــــــــــــــــــــــــــــــــــــــــــ
ڪل عام نگصد حضرتڪ و ابأربعینڪ نحضـر
لو تنگطع رجلینه و انحور و جثث تتـوذّر
متهمنه ارهاب وقتل نفدیڪ گطع المنحـر
واجب علینه ازیارتڪ و المایزورڪ یخسـر

خسران من یضـدّڪ
خسران مـایگصـدڪ
خسران وانتـه جدڪ
سـیـد البـریـــه

ـــــــــــــــــــــــــــــــــــــــــــــــــــــــــــــــــــــــــــــــــــ
طول الدرب یبن النبي نذڪر مشي المظلومـه
من ردّت ابعیله وحـرم تنعیٰ اربعینڪ یومـه
من ونهـه زینب سیدي المیت یفز من نومـه
یم گبرڪ و گبر الڪِفل مدمعهه سال ادمومـه

بـالآم ردت اتـنــوح
بـالآم دمهه مسفـوح
بـالآم صِد یمذبــوح
حال السبیـّـه

ــــــــــــــــــــــــــــــــــــــــــــــــــــــــــــــــــــــــــــــــــــ
بقلم الرادود یعقوب البوغبیـش
۹ / ذي القعده / ۱۴۳۹

زوار

رايح للحبيب       رايح للطبيب
حسين      انته نـور البصر
حسين      كاتب أعله النحر
ــــــــــــــــــــــــــــــــــــــ
اوياي اخذت اوليدي .. واتوكلت بسم الرضه
وشايب اتلگانه .. وادموعه عالخد فايضه
إمحزّم بشيباته .. وبخدمتك عمره انگضه
دنگت لجدامه .. واستغفر الله ومارضه

مشايه اتعنيتك وبچفي العلم
من اتذكر زينب ابچيلك خيم
عطشني وعثرني وعورني بسهم

تحرگ بيه نار       هايم گلبي صار
حسين      عمري كسرة ظهر
حسين      كاتب أعله النحر
ــــــــــــــــــــــــــــــــــــــ
بس احط اجدامي .. وحّدهه تندل الدرب
الله خالق خيمه .. ماخالق ابصدري گلب
بالطريق ادموعي .. وي السبايه خل تصب
والهوه المو منك .. ماريده بانفاسي يطب

من اعطش خل اعطش خليني انچوي
يالـماشارب گطره واشلون ارتوي
يالسوّيت الشايب بأيّامك قوي

ناسي كل الم      امحزم بالعلم
حسين      يامتاع السفر
حسين      كاتب أعله النحر
ــــــــــــــــــــــــــــــــــــــ
قربة لعيونك .. خطواتي صاحن كربله
كون اصيـرن رگبه .. والدنيه نبلة حرمله
حباً بسجّادك .. لف أعله اديه السلسله
امشي وي زوارك .. والمهدي رب القافله

ياقابل ذنب الحر اجعلني عبد
يالأمك ماجابت غيرك لم تلد
والماشم اتـرابك ما زارع ورد

عطرك بي جمال     دربك بي دلال
حسين      والمواكب فخر
حسين      كاتب أعله النحر
ــــــــــــــــــــــــــــــــــــــ
الما اجالك زاير .. يتندم ابيوم العرض
وشيگول السانه .. عالباري لمّن ينعرض
اربعينك واجب .. وازيارتك صارت فرض
لو نشيل الحضره .. ماتبقه رحمه أعله الارض

لو طفك يلغونه وينسد الصحن
بالاسلام اشيبقه غيـر اهل الفتن
يالرافع دين الله تاج أعله الزمن

عگبك ماكو دين      گلبك بي حنين
حسين     العاري بيك انستر
حسين      كاتب أعله النحر
ــــــــــــــــــــــــــــــــــــــ
عيّرونه وگالو .. هذا الحچي ماينقبل
كل سنه تمشوله .. وامسودنين بلا عقل
صــحنه بيك آمنه .. والكل فعل ردة فعل
اعوج العادانه .. وبس مبدأك هوه العدل

لو يرجع طف ثاني وتل الزيني
النيران انهـــــددهه وماتحرگ عبي
ومانرضه ابنياتك يمشن للسبي

زينب تبقه تاج     ثوره واحتجاج
حسين      وغصبن أعله الدهر
حسين      كاتب أعله النحر
ــــــــــــــــــــــــــــــــــــــ
يالحدود انفتحي .. وخلي المنافذ تنترس
كافي من الظلمه .. خل تشرق اعلينه الشمس
لازم احنه انفكر .. ناخذ عبر من هالدرس
احسين اجو زواره .. واحنه اهـل عزة نفس

نخدمهم نكرمهم وانادي هله
والسفره امن البصره اتطخ ابكربله
وام عباس التطبخ والله امعدله

تطبخ بالطفوف     اتوكل بالضيوف
حسين      والمدامع نهر
حسين      كاتب أعله النحر

محمدالجماسي

رايح للحبيب

يدرب الشام حس ابهاي الضعون
وارحم حال زينب والغريبات
عفيفات وخدرهن دوم مصيون
وگطعن بيك كل ذيج المسافات

مسافات والنياگ هزيلة
مسافات عل العيال طويلة
مسافات والحبال ثگيلة

وين يادرب السبي ماخذهه وين
هاي زينب بت علي واخت الحسين
من خدرهه للسبي يادرب ليش
هيه هاي الگبل ما شافتهه عين
***ا
يادرب السبي رد بالمشن بيك
تره العباس ما يرضه ابسبيهن
مايرهم وياهن دوم طاريك
ولاطلعن بلا راية وليهن

وليهن لمن ودعنه
وليهن جسد بس لگنه
وليهن ابد ماكو منه

يادرب ماتدري بالضامي الغريب
والثلثتيام عل الذاري سليب
كل جرح لابد أله يرهم ضماد
بس ابو السجاد جرحه ما يطيب
*****ا
من زينب بعد يا شام شتريد
كافي اعليهه حسرة كربلائهه
تدري ابساعة وحده اثمنطعش حيد
فگدتهم وخلتهم وراهه

وراهه ضحاية العشيرة
وراهه زلم كلهه غيرة
وراهه خذتهه انت اسيرة

هاي ماصارت ابد ياشام ليش
تمشي مسبيه مره واخوتهه جيش
الناس تطلب ثار من بدر وحنين
وانت يادرب السبي تطلبهه بيش
*****ا
لم دربك ضعن هاشم تعب حيل
وگصر بالمسافات الطويلة
والتمشي ابنهار وتبچي بالليل
صارت هاي بس وي العقيلة

عقيلة وخدرهه مهابة
عقيلة وتطب للخرابة
عقيلة جرحهه ومصابة

طلعت ابذاك الظهر تركض يشام
فگدت اخوتهه و اولدهه والعمام
شبچت العشرة وعله التلة تصيح
حسين لحگ حرگو اعلينه الخيام
*******ا
نسوان وعليهن كثرة الهموم
والمچتوف حيلة امن المشي ايبيد
ضعنهن صار ينقص يوم عن يوم
ودربك والايام اعليهن اتزيد

اويلاه عله الطلعوهن
اويلاه سباية خذوهن
اويلاه منوة اخوهن

اليحدي بضعون الشرف بس الكفيل
هيبة الله ذني والجدم الثگيل
ابد ما صارت گبل زينب تروح
ابضعن يحدي اجنبي وممشة طويل
****ا
الشاعر
مصطفى البديري

درب الشام

تعبانه ياستر العبي _ امن الفركه لو سوط السبي
مشغولة البال _ وجروحج أثكال
ياغريبه _ ياغريبه
...........................
هجران _ وحزان _ والليل أعله حاله يكسر الخاطر
أتحنين _ تبجين _ شيجيبه التهشم صدره بالحافر

ونيتي يزينب والجرح يكبر
تمشين أعله نيتج والجدم يعثر
بالمصايب"
تونين أعله كيفج روحج أمخلصه
الدمع تارك عله اخدود الخدر نصه
أشكد نوايب"

ذبلانه كد طاري العطش _ محتاجه عباس ونعش
بس ماكو أمال _ وجروحج أثكال
ياغريبه _ ياغريبه
.................................
جم عين _ تربين _ للميت خبرهم والدرب عثره
جم أه _ أو ويلاه _ ودمعة فاكده أتطيح أويه كل نضره

ميت واهسج مابين الف حسبه
ساعات الهجر ما تنحمل صعبه
ياغريبه"
كل اليوجعن بكليبج ألتمن
أعيونج راح من كثر الهجر يعمن
يالحبيبه"

يالفاكده أخوان وأهل _ برض الغرب موتي أبعجل
ثكل الحمل مال _ وجروحج أثكال
ياغريبه ياغريبه
.............................
أهات _ حسبات _ مات النبض بيج أولا خبر منهم
بدموع _ وضلوع _ حانيهه المعاتب والنشد عنهم

وين الكال آنه ودك الج صدره
معقوله نسه يا زينب العشره
والله صعبه"
هذا الموت أجاج وأنتي بالغربه
حسين أبعيد دربه مو سهل دربه
أيكلبه"

شيجيبه محزوز النحر _ عشتي أبقهر موتي أبقهر
يا هضمة الحال _ وجروحج أثكال
ياغريبه ياغريبه
............................
لحسين _ أتحنين _ أنحنيتي وبينت الحدبه أبعباتج
نضرات _ حسبات _ وعثرت جلمة الخويه أبلهاتج

تحجين أويه روحج إي يجي هسه
وتدنكين أبحسرتج جنج أمأيسه
ما يجونج"
الداسته الخيول ابعشر خياله
الدفنوه بحصيره أشيجمع أوصاله
يا ضنونج"

الشابع سحك شابع ذبح _ وماشاج راس أعله الرمح
وتكطع أوصال _ وجروحج أثكال
ياغريبه ياغريبه
...........................
أثار _ للنار _ أجدامج والجفوف اهواي محتركه
وهموم _ ودموم _ وركبتج من أثر حبل السبي زركه

أجروحج لسه خضره زينب ورطبه
بس كدم السياط أمخزنه وصلبه
يا هضيمه"
أمشيب رمش عينج شيبه يم شيبه
موتج حان ماكو العلتج طيبه
يا حريمه"

أرتاحي يعمه أمن الإلم _ أوصيتج أجفنج بالعلم
وذكره أمن الحبال _ وجروحج أثكال
ياغريبه ياغريبه
..........................
من كال _ ينشال _ نعشج زينب أعله أمتون شماتج
أتموتين _ تبجين _ قهر وتبلل التابوت دمعاتج

يشيلون الجنازه أجرت وادم
أعتذر عباس أخوج أعله النهر نايم
ما يجيلج"
أشما أهيل الترايب ونتج تعله
أفراك حسين أبوي ابكلبج أشخله
هده حيلج"

يالفاكده أخوان أشكثر _ والمثلج إيقبله العذر
مو جلمه تنكال _ وجروحج أثكال
ياغريبه ياغريبه
.......................

حسين باهض الحلفي

جرَوحج اثكال

لخواني حنيت