ДИРГО ПИКРУ…🤍

Тlадегlанав Аллагьас хирияб Къуръаналда жаниб абулеб буго:

{يُرِيدُونَ لِيُطْفِـُٔوا۟ نُورَ ٱللَّهِ بِأَفْوَٰهِهِمْ وَٱللَّهُ مُتِمُّ نُورِهِۦ وَلَوْ كَرِهَ ٱلْكَٰفِرُونَ}

Гьел капурзабазе бокьун буго жидер кlалаздалъун Аллагьасул диналъул нур свине гьабизе. ТIадегIанав Аллагь жинца жиндир Исламияб дин ракьалда тIад тIибитIизе гьабулев вуго кигIанго гьеб дин капурзабазе рихун бугониги.
[сурату ас-Саф аят - 8]

Аллагьасе цо къавмалда гьоркьоб жиндир диналъул ахlкамал камиллъизе баянлъизе бокьараб мехалъ, Аллагьас цо гьеб хlукмуялде данде вахъине чи сабабалъеги тlамун гьеб камил гьабула цогидал диналъул ургъел бугел, диналъухъ ракl бухlарал чагlаздалъун.

Гьаб нилъеда бихьула бугеб ахирисел къоязул никъабалда тlасан ина ругел бахlсазул хlикмат буго, Аллагьас гьеб баян гьабизе, гьелъул кlварги, гьелда жаниб бугеб лъикlлъиги баян гьабун камил гьабиялъе гlиллалъун ккараб.
Гьединлъидал нилъеца Аллагьасе рец гьабизе ккола, гьел лъугьа бахъиназухъ.

Щайин абуни? Дагъистаналда гlемерисел чагlазда лъалеб букlинчlо гьеб никъаб бай Шафигlил мазгьабалда тlадаб букlинги ва цогидазда жаниб суннатаб букlинги, гьединго гьеб никъаб гьединаб кlвар бугеб жо букlинги. Амма Аллагьасе бокьана гьеб нилъеда баян гьабизе ва гьелда сверухъ кlудияб кlалъай ккезабун гьелъул баянал кьолел ва бахlсал гьарулел гlалимзабигун диналъул церехъаби цlцlикlкlинаризе.

Гьебго мисал буго гlаммаб къагlидаялъ Исламалда сверухъги Аллагьас зама-заманаялда дуниялалдаго рагlарал лъугьа бахъинал ккезарула, цинги гьел сабаблъун Исламалъун жодое мурад бугелщиназ гьелъул цех-рех гьабун аза-азар чи Исламалде вачlуна.

Гьединлъидал дагlба къец рикlкlад гьабе, рец Аллагьасе гьабе, Аллагьас дин камил гьабун кинабго ракьалде нур щвезе гьабун бергьенлъи Исламалъе ахирги щвезе бугин.

Аварагас ‎ﷺ абуна : «ТIадегIанав Аллагьас дие кинабго ракь сукIана (дида гьеб кинабго бихьизе гьабуна), дида гьеб ракьалъул киналго рахъалги рихьана. Дир умматалъул ханлъи щвезе буго гьеб Аллагьас дида бихьизе гьабураб ракьалъул рагIалллъабазде» - абун.

Ва ахирги лъугlизабила Къуръаналъул аяталдалъун Аллагьасул хитlабалдалъун :

{وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} [البقرة: 216]}.
Ва амма цо жо нужее риханиги, гьелъул ахир нужеего лъикIаб букIине бегьула. Ва нужее цо жо бокьула, гьелъул ахир нужее квешаб букIинеги бегьула. ХIакълъунго Аллагьасда лъала кинабго жоялъул загьир ва батIин, гьелъул ахир ва хIасил кинаб букIунеб. Нужеда лъаларо загьир гурони ва гьеб загьирги якъинго лъаларо.

Гьединлъидал Аллагьасде таваккалалда рукlа, дугlаялда рукlа, диналъул ахlкамал лъазаре ва лъаралда гlамалги гьабе!!!

🔖Гlашура къоялъул кlалалъе нигат : Дица ният гьабуна метер кlал кквезе суннатаб гlашура къяолъул, Аллагьасе гlоло.