كربله صاحت.. هلا بيكم
الله يتقبل.. كل سعيكم

_ ١ _
كل ملك.. والفلك.. قبّل الله ينادي
وبالسمه. فاطمه.. وحيدره والهادي
رددوا.. للمشوا.. يا هلا بولادي
ما تعبتوا

يا فخر.. والدهر.. بيكم يضل حاير
يا سند.. للأبد.. انتو للطف ناصر
كل سنه.. لكربله.. مثل مشية جابر
ما تعبتوا

كل ملك يمشي.. وي مشيكم
كربله صاحت.. هلا بيكم

_ ٢ _
والگصد.. للسبط.. أنبياء يدعوله
والحُجج.. كل وكت.. يا هلا يگلوله
لو تعب.. بالدرب.. همه اليتچوله
يبقى يمشي

والمشه.. لكربله .. متنعد أفضاله
ينكتب .. ينحسب.. أعلى شي بعماله
برايته.. وعبرته.. ودمعته هماله
يبقى يمشي

والدرب يبچي.. من بچيكم
كربله صاحت.. هلا بيكم

_ ٣ _
بالدرب.. يا تعب.. بي يحس الزاير
والخَدم.. لو أُمر.. يگلوله حاظر
الموكبه.. بالمشي ..بخدمته متفاخر
الخدمه حلوه

يدعو يا خالقي.. عليه زيد النعمه
كون أضل.. مستمر.. هيه هاي الرحمه
بيها حظ.. والبخت.. زاير الله نخدمه
الخدمه حلوه

ربنا بالخدمه.. مَن عليكم
كربله صاحت.. هلا بيكم

_ ٤ _
والوصل.. للصحن .. يحس طعم الراحه
كل گلب.. بي قفل.. كربله مفتاحه
بالمشي.. تختلط.. دمعته وأفراحه
مو عجيبه

والدخل.. للحرم .. مايضل متواني
والسبب.. ما تعب.. ولا جدامه تعاني
منين اجه.. بالمشي.. يريد يرجع ثاني
مو عجيبه

الحيل والقوة.. من وليكم
كربله صاحت.. هلا بيكم

_ ٥ _
يا خطر.. يعترض .. تسحگه المشايه
للازل.. كل زمن.. ثابتين بهايه
بالگبر.. بالحشر.. يرفعون الرايه
بالقيامه

والمشي.. يستمر.. والحسين نشوفه
يا هلا..بزايري.. ينادي للي يطوفه
والمشوا..ليه اجوا.. يقبلون چفوفه
بالقيامه

برفعة الرايه.. حلوه اديكم
كربله صاحت.. هلا بيكم

مصطفى الشافعي

استشهاد الرسول الكريم ص
بالحزن نجريها الدمعه _ هالليله نواسيها البضعه
◇◇◇◇
ليلت حزن ليلت نوح
كلب ام الحسن مجروح
وياها يبجي حتى الوح
كلشي بجه اله ونعه_هالليله نواسي البضعه
◇◇◇◇
يافاطمه يم الحسن
شو كلبج اليله انطعن
مهضومه ودموعج حجن
والكون تغير وضعه _هالليله نواسي البضعه
◇◇◇◇
كالت بهاليله النبي
مسموم ياشيعه اكتبي
وبفكده كمت احبي حبي
وبيه ضاكت الوسعه_هالليله نواسيها البضعه
◇◇◇◇
عكب النبي آه شجره
حيدر الطاغي مرمره
وبداري النار موجره
وبعد خبرهم اسمعه_هالليله نواسيها البضعه
◇◇◇◇
يابويه ضلعي انكسر
وبيتي فوكاها انصطر
مايسوه بعدك هالعمر
وياك الامان انودعه _هالليله نواسيها البضعه
◇◇◇◇
بعده النبي بالمغتسل
يابويه والحق انقتل
وعلينه يتجاسر نذل
وحنا المخلوقه النا السبعه_هالليله نواسيها البضعه
#تم_بعون_الله_محرم_2021
كلمات الملا احمد السالمي
◇◇◇◇

نزله... في رثاء النبي وفاطمه عليهم السلام


فاطمة انواسيها. بالنبي انعزّيــها


بساعة الحضرت وفاته ومتثل هادينـه
كل عـلامـات المصـايـب بيّنت بجبينــه
ودع الزهره الزچيه ويلي غمضت عينه
والزچيــه تصيـح يمّـه بـويـه لتخلّينـــه
شيعه ونوافيها. بالنبي انعزّيـها



ناحـت الأكـوان كلــها للنبـي ولمصابه
مات والزهره الزچيه تبچي دم لغيابه
هيه نـور عيـونه هيه هيه اعـزّ حبـابه
ميّت وتبچي عله جسمه غرّگتها ثيابه
والدمع يچويها. بالنبي انعزّيـها



حيدر بتابـوت شاله بالحـزن واللـوعه
والزچيه تسير خلفه تنحب ومفجوعه
نـزّل المختــار بيــده للـگبـر بـدمــوعه
يشـعـر بدلّاله نـار وتستـعــر بضلـوعـه
ودعت واليها. بالنبي انعزّيـها



عالگبر طاحت تنادي والدي يالغالي
يالرحت عني وعفتني عذّبت دلّالي
يارسول الله حبيبي مادريت بحالي
لا تظن العيش بعـدك والدي يحلالي
تنحب مخلّيها. بالنبي انعزّيـها



من رحـل عنـها ابـوها فاطـمـه ظلمـوها
هجموا عليها العصابه والله ما رحمـوها
دارها دار الرســـالـة بالحطـب حـرگـوها
هيه خلف الباب لاذت فاطمه وعصروها
تنعصر تاليها. بالنبي انعزّيـها



واحنه شيعتها وخدمها للحشر ويّاها
نبقه نذكرها بدمعنـه والله ما ننساها
كل صبـاح وكل مسيــه نلعـن الاذّاها
رابـح الواله الزچيــه خـاسـر العاداها
نفعل اليرضيها. بالنبي انعزّيـها

خادم رسول الله محمد صلى الله عليه واله
الشاعر سيد زيد الفحام

بسرعه خلصن * شهر عاشور وصفر
خوفي ترحـل * ياحبيبي المنتظـر
باقي بس يوم الرســول
خايـف غيابــك يطــول
وين اشوفك * وين اشوفك
ــــــــــــــــــــ
مو لساني يخاطبك گلبي الشجي
خاف مــا عيشن بعد عـام اليجـي
لهالسبب جيت اعله بابك ارتجي
اعليك ضـلع الرضّه حافر اعوجي

العشره الاولى * ندري تگضيها لطم
ولذلــــك * كـل محـرم بــي طـعـم
خاف هالنعــمه تـزول
خايف غيابك يطــول
وين اشوفك * وين اشوفك
ـــــــــــــــــــــ
ويوم عاشر ادري بي تشبع الم
انته گايلها دموعك تجـــري دم
گوه بالركضه تشيل انته الجدم
بعده يخنگ بيك دخان الخيــم

وي ركضتك * خطوه خطوه تضل تعد
ومن ضريحه * يصيحلك عبد الله رد
تأخرت يمته الوصول
خايف غيابك يطــول
وين اشوفك * وين اشوفك
ـــــــــــــــــــــ
ثاني عشره اگضيتها تنوح وتــون
نحت من يوم اهدعش لــم الحزن
وندري يوم اثلطعش بي ممتـحن
احضرت وي زين العباد انته الدفن

وبدفنتـــــه * اضــن ايدك حـاضـره
بصلب جدك * وانته تبچي لخنصره
شگد عليه مرّن خيول
خايف غيابك يطــول
وين اشوفك * وين اشوفك
ــــــــــــــــــــــ
ادري ثالث عشــره وين توجهت
بوسط هاي العشره للغرقد رحت
يم گبر زين العبــاد انتـه گصــدت
بس صحن ماكو لعد وين گعــدت

أرد اسألك * لچــن كاتلـنــي القهـــر
گبره طفته * شلون طفت اعله الصخر؟
انته زرته احنه شــنگول
خايف غيــابك يطــــول
وين اشوفك * وين اشوفك
ــــــــــــــــــــــ
اول العشــره بصفـر لمن يهـــل
موعــدك للشــــام لازم تنـــتقل
يم رقيه تفك اديها من الحــبل
زغيره عمتك عالهجر ما تحتمل

و ابو محمد * يوم سابع ليه ترد
وبالمديــنه * للمآتـــم تســتـعد
وهم تمر اعله عالبتول؟
خايف غيابك يطـــول
يمته اشوفك * يمته اشوفك
ـــــــــــــــــــــــ
وترجع وتلگه المواكب تنّصـب
وتبقى عينك بس تباوع عالدرب
باربعــين حسين عمتك من تطب
تضمها بعيونك عن عيون الغــرب

وانته بيدك * تترس الشارع عبــي
حتـــى زيـنب * تنســى ايام السبي
لأن عمتك بت أصول
خايف غيابك يطــول
وين اشوفك * وين اشوفك
ــــــــــــــــــــــــ
بهذن كلهن جفني صاحي وماغــفه
وشمعي ضل يتاني تحضــر ما طفى
دخيل عندك بس وفاة المصطفى
رايـــدك بـــس هالعــــزاء تشــــرّفه

راح اخلي * عيون گلبي مركـّـزه
بلكي اشوفك * لان هذا آخر عزه
الورد ما يحمل ذبـول
خايف غيابك يطـول
وين اشوفك * وين اشوفك
ـــــــــــــــــــــــــــ


الشاعر مهدي التقي

انت المطيح هبل واصنامهم
يا محمد والله دينك ذالهم
_____
مو نبي ابراهيم انت وفاسه عندك للكسر
انت ربك دز ملاكه وكال يصبر عالخطر
يعني اصبر راد الله عالرساله والعمر
حته متروح البرائه يا محمد والقهر

عيشتك ويه الرساله بحالهم
انت المطيح هبل واصنامهم
___________
خفت انت على اصحابك من هند الطاغيه
رادت الحمزه مماته الكبد عدهه غاليه
من بعثت اصحابك الهم للحبشه وعاليه
مقدره العيشه امن اهلهه المسيح الايه

عذبت هند وقريش اتباعهم
انت المطيح هبل واصنامهم
___________
صطره من حمزه الحنين بچفه طكه يصطره
اباب مكه ورفع صوته ردهه انت الصطره
ماگدر يرفعله عينه بوجه حمزه شگدره
هذا ابن السبع هذا چنه سبع الگنطره

مجزره بيوم الطفوف وذالهم
انت المطيح هبل واصنامهم
__________
اشكثر عندك من صحابه وما اعدد زحمه
لان اني الي عرفهم يراد من القمه
ابدي منهم ردت ابدي والقلم بي لچمه
كلي اسكت لا تعدد قمه كلهم همه

القلم خجلان وعلي اسمائهم
انت المطيح هبل واصنامهم
___________
المصيبه همه رادو تبايع وتصبح ذليل
حاشه انت تروح ايدك من نهار لدنيا ليل
انت عندك كلشي تحكم وربك يحبك دليل
يعني من كل الجوانب ربك الينطيك حيل

حبتك كل البشر اديانهم
انت المطيح هبل واصنامهم
___________
اقرا كال اب اسم ربك من نزل قرانك
من العلقي من الكوثر هيج زاد ايمانك
اول ايه بحرب نزلت عالنبي وقربانك
ايه بلقران هيه الحج اسمهه اعتابك

بدر وأحد واحنين شاركهم
انت المطيح هبل واصنامهم
_______________

مصطفى كامل البدري

لسان حال مالك الاشتر يتكلم عن الامام علي بعد دفن فاطمة الزهراء عليهم السلام
''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''
ليل ووداع وبچي
الليلة ماتت فاطمة
يشيّع بروحه علي
والعيـون مـغيّـمـة

وداع..
هاي اللـيلة الاخيـرة
وداع
ذابل شيخ العـشيـرة

والعيون مغيّــمــة
-------------- ------------- ------------------------
الليلة هاي..
ينتهي حامي الحمة
الليلة هاي..
علي ومـاكو فاطـمة
الليلة هاي..
تـنـطبگ سـابع سمة

الليلة حيدر بالمصايب يبـتلـي
علي چان وهسة ما باقي علي
والمصايب حِبها بس ينگط الم
لچمة لچمة عمره حيدر ينـولي

جان ابو تراب الشهم
حيله راح وي الـلحد
تــيّـه أولاده عـلــي
هـو چـا هـيـچ الفـگد

تراب..
بــايگ ذيچ الأميــرة
وداع..
ذابل شيخ العـشيـرة

والعيون مغـيّـمة
-------------- ------------- ------------------------
شفته طاح..
اتمـدد بصـف الگـبر
شفته طاح..
يدعي ياربي الصـبر
شفته طاح..
وانـكسر كسر الكسر

الكاسر اخشوم الزلم شو منكسر
العابر احـدود الصـبر مـاله صـبـر
هـو هـاذ البـيـده يـدفـن زهـرتــه
بـالگــبـر تـاخـذ حـنـانـه والـــعـمر

الـــهـوة بـلا فـاطـمـــة
مـن يــشـمّـه يـختـنـگ
كل هـوة يـمـرّه جـذب
بس هوة فاطم صـدگ

يحير..
حيرة الما منها حيرة
وداع..
ذابل شيـخ العشـيرة

والعــيون مغــيّـمة
-------------- ------------- ------------------------
كُلشي راح..
والگبر باگ الـعـشگ
كُلشي راح..
والحدر ضلعـي يدگ
كُلشي راح..
الهوة وضـل يختـنگ

اليدفن ب إيده بساتين الورد
18 ورده ويـحطـهن بالـلـحـد
عـلي اول مـرة ما يـشـبه علي
الگبل رد الشمس بدموعه يرد

يـنـتچي حيدر عليّ
يا خَلگ هذا العَـجبْ
التَعّب ارسوم السمة
يگود بي صار التعب


نحيل..
هاي الكسرة الچبيرة
وادع..
ذابل شـيخ العشـيرة

والعيون مغيّــمــة
-------------- ------------- ------------------------
كُلشي مات..
گلب وعيون وجـدم
كُلشي مات..
وانهـطـر بـيـن الـزلـم
كُلشي مات..
وعايش بروحه الألم

رجـع مـايـل چـنـه مـو ذاك الكـلف
حـتـى وي اهله علي مضيّع العرف
وانجرح بس جرحه ينزف مو دمة
نـزلـت اسـنـيـنه وحياته امن النزف

ويلي من شافه الحسن
والـعــيــون مـخـضّـرة
بــويـة امــي بـيـا كـتـر
گَـلـه ضـيـف المـگــبـرة

دموع..
غرگت من عدها ديرة
وداع..
ذابل شـيـخ العـشيرة

والعيـون مـغيّـمـة
-------------- ------------- ------------------------
آه ي موت..
گّله أنه شيخ العرب
آه ي موت..
چادر بروحي انصب
آه ي موت..
روحي دافنها بتـرب

ابـو تـراب وروحـي مـدفــونـة بـتـرب
عــمــري مـا نـزلـت راسـي بــالــحــرب
هـسـة كـلـشـي اتـغـيّـر وبـاهــت عـلـي
الاسهل امن الكلشي صار اشگد صعب


أسرعْ أسرعْ يا ملك
ضلّـتي بـلايـة نـفـع
الرزن ومخوف الزلم
امن الهوة المَرّ اندفع

يَ موت…
حيدر حدد مصـيـره
وداع..
ذابل شيخ العشيرة

والعيون مغـــيّمـة
''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''
كرار رحمن

قصائد استشهاد الزهراء  (ع)


(( ابوذيات  ))
♕♕♕♕♕♕♕♕♕♕♕♕♕♕♕♕♕♕♕♕

اصيح بغيبتچ يمه         يروحاي 

شوكت گليلي نتلاكه      يروحاي 

أريد وياج امشي انه       يروحاي 

شوكت تتلاكه روحي وروحج سويه 
♕♕♕♕♕♕♕♕♕♕♕♕♕♕♕♕♕♕♕♕

تره اليفگد حبيب شلون         ينساه 

يفكر دوم بيه وابد         ينساه

الفارگله ولف هيهات             ينساه 

يفكر بيه كل صبح ومسيه 
♕♕♕♕♕♕♕♕♕♕♕♕♕♕♕♕♕♕♕♕

احلفچ بالله لاترحين                      يمه 

وتعوفيني وحيدة شلون                 يمه 

چنت اگعد واصيح بصوت            يمه

وهسه اصيح ومحد يرد عليه
♕♕♕♕♕♕♕♕♕♕♕♕♕♕♕♕♕♕♕♕

على الدنيا العفه بعدچ           تراني

شلون أصبر  بعد عينچ         تراني

يتيمه واكسر الخاطر               تراني 

بقيت محيره واصفگ بديه
♕♕♕♕♕♕♕♕♕♕♕♕♕♕♕♕♕♕♕♕

چنت مدلله بچالج                 يزهره

يشمعه بيتنا العالي               يزهره

انطفت شمعه وبعد ماكو         يزهره

وتاليها اضلم صفه بيتي عليه
♕♕♕♕♕♕♕♕♕♕♕♕♕♕♕♕♕♕♕♕

البيت بلايه أم اضلم            مكانه 

خالي وموحش عليه            مكانه

الچ رب العرش انطه            مكانه

وهسه البيت ضل خالي عليه
♕♕♕♕♕♕♕♕♕♕♕♕♕♕♕♕♕♕♕♕
الزهرة بصوت نادت        ياهو انته 

يالتدگ بالباب كلي          ياهو انته 

 گلي شمحتاج مني         ياهوانته 

جاوبها اللعين وشتم حامي الحميه 
♕♕♕♕♕♕♕♕♕♕♕♕♕♕♕♕♕♕♕♕

الشاعر     عماد محمد الدراجي 

الاثنين             2017/1/2

شوور...لمولاتي الزهراء ع
يعين گلبك ياعلي..بهاي المصيبه

صلى اللهُ عليكِ فاطمـــــــــه
ــــــــــــــــــــــــــــــــــــــــــ

ابقـى لوحدي..أنه وهمي ورتحل كلشي
ألمـــــن أدير اعيوني لمنــــــو
وحدي بقيت استشهد الدفـــو

الله اليدري...لمـــــن ارحلتي
الله اليدري...ياكبـُـــر علـــتي
الله اليدري...ياظــكل ونتـي

جافتي اعز الناس خلتني ابضمـــه
صلى اللهُ عليــكِ فاطمـــــــــــــــه
ــــــــــــــــــــــــــــــــــــــــــــــــ
دنيه شتسوه.. المابيه انتي يابعد نبضي
ساعت رحيلچ زاعلت صبـــري
تمنيت گبلچ ينحفـــر گـــــبري

صعبه لوحدي....الفرگه ذبحتني
صعبه لوحدي....العبره خنگتني
صعبه لوحدي.....بدنيه غدرتني

اشتكي لله من هل المضلمــــه
صلى اللهُ عليكِ فاطـــــــــــمه
ـــــــــــــــــــــــــــــــــــــــــــــــــــــــ
اخضر نوحي..بعده بروحي من رحل طه
توه اب محمد صوبوا گلــبي
الثاني والاول فرهـدو حلمي

رافع صـــوته...ما خجل منـــــــــچ
بحيله وقوته...من دره بحملـــــــچ
نيـــته يموته...ومــــوته الأبنــــــچ

رحتي حــزينه والضلوع امهشمه
صلى اللهُ عليــــــكِ فاطــــــــمه
ـــــــــــــــــــــــــــــــــــــــــــــــــــــــــــ
خنگه بصدري.. ريت ابگبري ولاشفت كسرچ
حين مرت أيــــــدي يم ضلعــــچ
وشاهدت اثار سطرات اعله خــدچ

كسرت ضهري...وحيل شوغـتني
زيـــدت قهري...وهضم عيشتني
ابچي لفجري...دمــــوم خلــتني

حگه گلبي عليچ ينزف من دمـــه
صـلى اللهُ عليكِ فاطــــــــــــــمه
ـــــــــــــــــــــــــــــــــــــــــــــــــــــــ
عالي قدري.. وانتي ابكبري يالتشبيهيني
ياأعز من روحي وامي والابـــو
عالي قدرج والله منطيج العلو

شهگة ريتــي..... نسمه واشتمچ
شجرت بيتي..... وياضخن فيچ
بختي وصيتي... هــواي اودنچ

فاطم اوروحي بسمچ هايــــــــــــــمه
صــــــــــــــلى اللهُ عليكِ فاطمــــــــه
ــــــــــــــــــــــــــــــــــــــــــــــــــــــــــ
تمت والحمد لله
خادم الزهراء ع
المـــــــلا ياسر الزيادي١٤٤٢هـ

ياصاحب الزمان.. متى الفرج

هواي تعرض بالخيال اگبالنه
صـّور بيــــــها معلقه آمالنه

تضهر ابهيئة ملك...
بيدك ايدور الفلك...
وتمسح ابچفك جميع ألامنه
ـــــــــــــــــــــــــــــــــــــــــــــ
يمته يا أخر أملنه. تعبانه الأنتضار
گلب ماضل ابصدرنه.والفكر صابه انهيار
من هظم بعُدك علينه. بان بينه الانكسار
نحلفك بداعة رقيه. متى تعلن هالقرار

بطلعتك يالمهدي تسكن روحنه
تجبــر الخاطر تطيب اجروحنه

بيدك الرايه ترف
ياحبيب ويا ترف
وتمسح ابچفك جميع ألامنه
ــــــــــــــــــــــــــــــــــــــــــــــــــــــ
انته يا محي الشريعه.العمر خلص نايبات
يمته تضهر يا أملها. هــــايه كل الأمنيات
أمل كل هايه البرايا.. بيــك ياسر الحـيات
مـر جرعنه وماجزعنه. خوفنه يلفي الممات

خاف مانلحگ نصد بعــيونك
ولا نحضنك لا نگول اشلونك

يمته انوارك تشع
وتاخذ ابثار الضلع
وتمسح ابچفك جميع ألامنه
ــــــــــــــــــــــــــــــــــــــــــــــــــ
شاخت الدنيه علينه.گلوبنه انترست شجن
أل عدل بيها توفـــه. ومتلت جــور وفتن
من البواچي عليك تدري.. هالنواضر خلصن
يمته ونشوفك يغالي. تمشي گــدام الضعن

طالب ابدم الطفل ذاك الرضيع
وتنبني بيدك مراقده البـــــقيع

هيچي ونخلص العمر
جنودك وتـــحت الأمر
وتمسح ابچفك جمـــيع ألامنه
ــــــــــــــــــــــــــــــــــــــــ
كلشي بالدنيه خساره. وشوفتك هيه الربح
تروح جمعه وتلفي جمعه. والعمر بلش يشح
انتضارك حيل مؤلم. مثل راس ابنص رمح
عيون ما شافت نهار.. وانته بس انته الصبح

سنينه ليل بغيابك يالفجــــر
مو ورد ارواح ننـثر بس تمر

صوت بسمك ينسمــع
وخلفك انصـلي الجمع
وتمسح ابچفك جمـــيع ألامنه
ـــــــــــــــــــــــــــــــــــــــــــــــــــ
ذنوبنه حجبتنه عنك. والحيـــــه عدنه انعدم
بحقك امقصرين احنــه. وجاي نشـعر بالندم
من يمر طاريك صدگ. نبچي ابحــــرگه وألم
حلم عدنه انقبل ايدك. عدنه هذا اجمل حلم

ما تردنه وندري ابشخصك عطوف
التوبه يــــم بابك يمهدينه الرؤوف

نضره يالگلبك رحيم
شيعتك شافت جحيم
وتمسح ابچفك جمـــيع ألامنه
ــــــــــــــــــــــــــــــــــــــــــ
تمت بفضل ولي زماني عج
✍️خادم الزهراء ع
🎼ياسر الزيادي

قصيده للامام علي عليه السلام
🖊🖊

زيــدي النوح زينب مـن تونين
على حيدر علي سيد الميامين
*ــــــــــــــــــــــــــــــــــــــــــــــــــــ*
١
نزيد النوح يابت حيدر اوياج
بمصاب الولي انعزيج اجيناچ
بهموم والم. نبجي اعلى مبجاج
ونواسيج اجينه يخت الحسين
*ــــــــــــــــــــــــــــــــــــــــــــــــــــ*
٢
ونواسيج اجينه بحسره وبنوح
نلطم عالصدر والدمع مسفوح
بمصاب الابوا هاجت الجروح
فجـعنه ياوسافه ابفــگده البين
*ـــــــــــــــــــــــــــــــــــــــــــــــــــــ*
٣
فجعنه البين ويلي بشهر رمضان
مهظومين منه الگلب خلصان
حزينه وموحشه ضلت الديران
على فراگه حزن وظلم الكونين
*ــــــــــــــــــــــــــــــــــــــــــــــــــــ*
٤
على فراگه نون نچلب الحسره
تسعر بالگلب لمصابه چمره
الروح اعليه جذبت الف عبره
ونبچي والدمع عاميهه العين
*ــــــــــــــــــــــــــــــــــــــــــــــــــــ*
٥
محرابك خلي والعين صبت
ولفراكك يبويه النار شبت
الدنيا اظلمت ورياح هبت

ويتامك تون اليوم صوبين
(يا باب الدين واركانه))
____________________
تمت القصيده برابطه النحر الخضيب
بقلم كل من الفاطميه +سهام المالكي

قصيده العباس(ع)عنوان القصيده (يمحير خيوط الشمس)


ما شفت طولك من امس
يمحير خيوط الشمس
عباس خويه الهيبه....٢
❥❥┈┈‏┈.✹..✹┈┈┈‏❥❥
رمشت عيونك للهوى محير زمانك دومك
طولك يباري اوي النجم يامحله كل ارسومك
اجفوفك الخطن وفه علخوه منهو يلومك

عباس بنفاسك همس
يمحير خيوط الشمس
عباس خويه الهيبه....٢
✍الفاطميه
❥❥┈┈‏┈.✹..✹┈┈┈‏❥❥
يابو الفضل انته الوفه ابشريان دمك يجري
والعالم ابأسره دره بجفوفك انظم خدري
وسفه يخويه سلهمت ماريد عگبك عمري

ادعيلك من الله التمس
يمحير اخيوط الشمس
عباس خويه الهيبه...٢
✍️ام عدنان سياحي
❥❥┈┈‏┈.✹..✹┈┈┈‏❥❥
عباس محلاخوتك بيك الوصف سموني
للخوه منطي ركبتك فوك الرمح يعيوني
ريتك تشاهد حالتي متهدله حيل امتوني

راح الضعن يحدي رجس
يمحير اخيوط الشمس
عباس خويه الهيبه...٢
ام أسعد
❥❥┈┈‏┈.✹..✹┈┈┈‏❥❥
انت العزيز من الزغر وخوانك يحبونك
ينادونك انت يالكمر يامحله لون عيونك
انت الوفيت بفزعتك لزينب ذخر يردونك

ابفكدك گليبي انحمس
يمحير خيوط الشمس
عباس خويه الهيبه...٢
✍ام احمد
❥❥┈┈‏┈.✹..✹┈┈┈‏❥❥
يلبيك مضروب المثل يابو الفضل يا عباس
يلكلك امروه اووفه متروس غيره ونوماس
وارث شجاعه حيدره سيفك غضب ما ينجاس

عباس يلطولك حرس
يمحير خيوط الشمس
عباس خويه الهيبة....٢
✍🏻 سلمى ام جعفر
❥❥┈┈‏┈.✹..✹┈┈┈‏❥❥
وارث شجاعه حيدره عباس اخوي المغوار
بدر الهواشم ياشهم وصاه بيه الكرار

كافل اضعوني وسلوتي فدوة اله عمري يندار

للخدر يفديه النفس
يمحير خيوط الشمس
عباس خويه الهيبه...٢
✍ام محمد وال درويش
❥❥┈┈‏┈.✹..✹┈┈┈‏❥❥
تمت القصيده باقلام شاعرات
رابطه النحر الخضيب

#نزلة


زينب البحماكم ... آيـاكـم ... تـنـسـوها
● ● ●
هــا يولدي الأربعه . أمـكم اتوصـيكم

أمّـنِـتكم بت علي . وانتو گدها ادريكم 

تره هاي امّ الخدر . كـون ماتـشكيكم

والله لو مسها خطر . الذمه ما ابريكم

موتوا لو تنخاكم ... إيّــاكم ... تـنـسـوها

● ● ●

مـن تنادي يخوتي . فزّوا زينب هايه
طلب لـَـتردُّون ابد . إلـهـا يا وفــايه

جيبوا لو ماي اطلبَت . الفرات ومايه
تـره أمّ الأربـعه . ابزينب امـوصايه

وعلي هم وصاكم ... إياكم ... تـنـسـوها

● ● ●

مـن تروح الكربله . التفـّو انـتو اعليها
يُـمّه عـبّاس الگمر . ابرايـتك غـطـيها
لا تشاهدها الشمس . حارّه وتاذيـهـا
امدلـّـله أمّ الخـدر . ياگـمر تــدريها

رايحه وياكم ... إياكم ... تـنـسـوها

● ● ●

سمعوا وِلدي الأربعه . لـزينب اتسِِـمعونها
هيهَّ تـآمــركم امر . وانـتـم اتـطـيعـونهـا
من تـظل ابكــربله . امحـيّـره اتـشوفونها

اعليكم اقسم بالضـلع . ابحـيره لـتخلونها

رفـُّـوا يُـمّه الواكم ... اياكم ... تـنـسـوها

● ● ●

أرْدَ اخــبّـركـم أمـر . ولازم اتعـيـنوني
اشگدّ احبّ امّ الحسن . كـلك اتعرفـوني
عفْـيه وِلـْـدي الأربعه . اوياها لتفشلوني

بيكم آنــه بالحــشـر . ارْد اگــرّ اعيوني

الموت لو يلفاكم ... إيّـــاكم ... تـنـسـوها

● ● ●

انتو تِـربات الفحَـل . وبيكم ارفــع راسي
ما تخيبوني اعـرفـت . هيچ گال احـساسي

ما أوصّـيـكـم بـعــد . السفر يمكن قاسي
داري اخـتك بالـدّرب . يُــمّه يا عــبّـاسي 

تتعب ابلياكم ... إيّــــاكم ... تـنـسـوها 
ا

● ● ●
الظعن باچر من يرد . راح انه اسئلها

القَصر الحق زينبه . اعذاوه ما اقبلها

وارد اشوف ابكربله . وشعمل كافلها

المهم زينب من ترد . راكبه ابمحملها

مومهم ملكاكم ... اياكم .... تنسوها
................................
حيدر تركي الكربلائي

دمْعِتي عنك يمسلم بويــه ناشدتها
طاحت ومدّيت اديّه كَوه والزمتها
منها صوت اسمــــــــعه
اتكَلّي ماكو رجــــــــــعه
****
طفله وافراكك اخذ كل طعم عمــــــري ويبّس ارياكَي وكســـــر يابويه ظهــري
شنهو ذنبي كتلك اتيتّم بزغــــــــــــري
من رحت يابو المحنــــه اشصار تدري

ساعة الودّعتك الهَم خيّـــــم اعله كلبـــي بدمْعِتي اتوسّل ودم وفدوه اكلها صبـــي
وجاوبي يدمــــــــــــــــــعه
اتكلي ماكو رجــــــــــــــــعه
****
كلها كَطعت بيّه يابويه برحيـــــــــــلك
النوم والفرحه شكَلّك واشتكيـــــــــلك
كَلي وين انت يبويه وآنـــــــــه اجيلك
كلبي ينبض شوگ وي نبضة دليـــــلك

ماتفاركني اعله حضنك بويـــــــه عوّدتني كَطّعت كلبي برحيلك والله من عفتنـــــي
افراكَك اشيجرعـــــــــــــه
اتكلي ماكو رجــــــــــــــــعه
****
رحمت ابحالي دمعتي وجرت كَــــــوّه
هيّه دمعه لجن منها الخد تجـــــــــوّه
عن ابوي احجيلي اكلها شلونـه فدوه
بينج انتي وبين جفّه سنين خـــــــوّه

عندي امل يرجع لجــــــن يادمعتي تأخّــر فدوه ايام اشكثر احسبله حتى يحضـــــر
خمسه سبعه تســــــــــــــعه
اتكلي ماكو رجــــــــــــــــعه
*
صبّت وكالت حميده انتي خطيّـــــــــه
احجي مااكدر لجن غصباً عليّـــــــــــه
والدج أيسي وبعد مامنّه جيّــــــــــــه
لاتعتبين العتب ياذي اشبديــــــــــــــه

يتّماج اتكلّي مسلم وآنــــه يتّمانـــــــــي
من مشه بعينج أمانه جفّه امّنانـــــــــي
هاي اكَلها فجـــــــــــــــــــعه
اتكلي ماكو رجــــــــــــــــعه
*
رغم مامنها انجوت حرحارت ايدي
صابره احجيلي اكلها وعنّــــه زيدي
خلّه بس الحزن يوم الراح عيــــدي
بده ابهالأيام احس ينشـف وريـدي

هذا ابوي وياابو مثله ومثــــــل حنــانه صح ابو اسكينه عدل هوّه الأخذ مكانه
بس تركله صدعــــــــــــــــه
اتكلي ماكو رجـــــــــــــــعه
*
آنه عندي الدمعه وانتــه شنهو عندك
الموت اخذني ولاسمعت بخبر فكَدك
بآخر اللحظات تشبكنـــــي ادري ودّك
صار حتى الهوه ماينراد بعــــــــــــدك

كبرك المازرته بويـــــه بالكلب حفرتـــه وعمري ليلة وحشه كلّه بس الك نذرته
وروحي اوجها شمــــــــعه
اتكلي ماكو رجــــــــــــــــعه
*

علي محسن الزيادي

ابن عم حســــــين طگ زلزاله
وخيل ظلت تردم بخيّــــــــاله
ـ&&&&&&&&&&&&&&&&&&
من نزل طاعونها ومـــــــوت الزلم
نشدت الكوفه علي رد الشــــــــهم
ابن اخوه صاح انا صاحت والنعم
يالله راويني علي وافعاله
ـ&&&&&&&&&&&&&&&&&&
علي عمّه وشاد حيــــــــله بياعلي
مسلم انا يصيــــــح والكلفات الي
طوعه لاتبجين گومـــــي وهلهلي
الفارس المثلي الحرب تحلاله
ـ&&&&&&&&&&&&&&&&&&&
شماتقدم خطوه منهم يثنــي صف
سيفه طم وجه الشمس لمن لصف
اخضر ويابس حصدهم من عصف
الجيش ضيّع يمنته امن اشماله
ـ&&&&&&&&&&&&&&&&&&
مثل عيد الاضحى حل بيها الذبح
ماتميز ليل صارت من صبــــــــــح
يجر فارسها ويشمره اعله السطح
الجيش جن بيده الله خله اجاله
ــ& &&&&&&&&&&&&&&&&&
يصيح اذا جاها المدد حيــــدر مدد
ويظل يگطع روس سيفه ابلا عدد
البعده حي ايصيح حل يوم الوعد
وتخسف الگاع اليمرها اخياله
ـ&&&&&&&&&&&&&&&&&&&
هوه واحد والكتايب جنها موج
لجن خله الخيل بدماهم تفـوج
قره اعليهم والسما ذات البروج
من قراها الجيش خلخل حاله
ــ& &&&&&&&&&&&&&&&&&
عين بيها ايذبّـــــــح وعين التصب
عالغريب حسين تربي اعله الدرب
مثل نار الخيـــــــــــم نيران الگلب
بالدمع لحسين خط مرساله
ـ&&&&&&&&&&&&&&&&&&
گالو اعليمن بجـــــه الليث الميهب
سألو وشافــــــوه ساكت مايجيب
مادرو يبجي الغريب اعله الغريب
ماكو غير حسين شاغل باله
ـ&&&&&&&&&&&&&&&&&&&

علي محسن الزيادي

لا تامن الدنيه وانتبه زين
ولتماشي اليبعدك عن الحسين
ـــــــــــــــــــــــــــــــــــــــــــــــــــــــ
نصيحه لكل شخص بالندم احساسه
من خادم زغير الذنب غط راسه
الدنيه خلته يتبع وسواسه
ونجا بحسين من كمش وعباسه

اسمع قصتي وتعرف الامرين
ولتماشي اليبعدك عن الحسين
ـــــــــــــــــــــــــــــــــــــــــــــــــــــــ
الدنيه وداعتك كل خير مابيها
تبديها ابدمع وبدمعه تاليها
احذر تدنى ليها ولا تدنيها
منها شتنتظر وابليس راعيها

دنيا وعدها الف موفقط وجهين
ولتماشي اليبعدك عن الحسين
ـــــــــــــــــــــــــــــــــــــــــــــــــــــــ
يحلي الدنيا الك ابليس باسلوبه
وتشوف الواحد يمجدهن اذنوبه
الماعنده صديج ايعدل عيوبه
يفتح گلبه للشيطان كل بوبه

يفوت الفوت مايلحگله بعدين
ولتماشي اليبعدك عن الحسين
ـــــــــــــــــــــــــــــــــــــــــــــــــــــــ
دنيا ومن طبعها وفه ماعدها
كلساعه تدير ليا كتر خدها
ابعد دنيتك عن گلبك ابعدها
الطلگها علي شتترجه من عدها

امطلگها بثلاثه ابو الحسنين
ولتماشي اليبعدك عن الحسين
ـــــــــــــــــــــــــــــــــــــــــــــــــــــــ
الصاحب ساحب يگولون اهالينه
ماشي الي يگلك للعزه امشينه
الدومه  اليگلك ازرع الزينه
واحسن زينه من تخدم ابو سكينه

اشمحلاها يخادم بين صوبين
ولتماشي اليبعدك عن الحسين
ـــــــــــــــــــــــــــــــــــــــــــــــــــــــ
دنيا وغاويه وشيطانها يهمس
تعوذ باللطم لو مرك اتوسوس
بالك على زينب دمعتك تحبس
وچلب باليگلك امشي للمجلس

چلب بي وگله افداك عينين
ولتماشي اليبعدك عن الحسين
ـــــــــــــــــــــــــــــــــــــــــــــــــــــــ
البحسين رادك صدك يحبك
ومو بحذاك خل مگعاده نص گلبك
ركز زين واسمع واعدل بدربك
ودوم اختار يلي للعلي يگربك

وادعي بالصله تحفظه ام البنين
ولتماشي اليبعدك عن الحسين
ـــــــــــــــــــــــــــــــــــــــــــــــــــــــ
اخر مابقه حتى اختم العندي
عگب مابلمجالس چلبت يدي
يأيدي نرفعي يلا وبالدعا ردي
عجل يا الهي بطلعت المهدي

بذو الفقار ياخذ منها ثارين
ولتماشي اليبعدك عن الحسين

مصطفى الحمداوي

بالحــــزن يــــروي الـﮔلــــــب ... هالشهــــر لمـــن يطــــــب
محـــــرم ،، محــــــرم
⬄⬄⬄⬄⬄⬄⬄⬄
مـن يطـــب شهــــــر الحــزن نعلــــــــــن حــــــــداد
وكـــل مــــوالــــي أيـﮔـــــــــول حـــيَّ اعله الســـواد
هالشعــــائر عـــــدنــــــــه أصبحــــــــت جهــــــــــاد
وتظـــهــــــــــر آلام الحــــــــــزن فـــي كُلِ بــــــــلاد
للطــــــــــــم خل نستعـــــــــد ... لحظـــه عن لحظـــه نعــــــد
محـــــرم ،، محــــــرم
⬄⬄⬄⬄⬄⬄⬄⬄
هالشهــــــر شــــو يختــلـــــف عـــن السنـــــــــــه
أبخدمــــة احسيـــن البشــــــر كلَّــــه اعتنــــــــــــه
وكربلــــــــه للرافضــــي أضـــــــــــل موطنــــــــــه
بيهــــــــه أحــــــــــــلام العُمــــــر هو بَنـــــــــــــــه
ماكــــو أحلى من البـﭼــي ... أبهل الشهـــر لمن يـجــــي
محـــــرم ،، محــــــرم
⬄⬄⬄⬄⬄⬄⬄⬄
نشكـــــر الله الخلَّــــــه بينـــــــــه هالعمــــــــــر
هالشهــــــر من رحمتــــه اعلينـــــــه يمـــــــــر
ما نضيعـــه أنتعبــــــــــــه بالخــدمـــه وسهــــر
حتــــى باجـــــــر ربَّـــك أيعظـــــــــــم الأجــــــر
واجـــــب الدمعـــه نعــم ... من يطـب شهــر الألـــم
محـــــرم ،، محــــــرم
⬄⬄⬄⬄⬄⬄⬄⬄
كل دقيقـــــه وثانيــــه أبهــــــــــذا الشهــــــــــــر
لا تضيعــــــــهه عليـــــــــــــــك المُنتظــــــــــــــر
صعبـــــــه ما نبـــــــــــدي ابوجهنـــه كل قهـــــر
والزجيــــــــــه بينــــــــــه باجـــــــــر تفتخـــــــر
لازم أنتعـــــب اليديــــــــــن ... واحسيناً واحُسيــــــــــن
محـــــرم ،،

ميمر على طريقة زينب الليلة تحرس العيله

قصة العاشر ...تجبر الخاطر
من زغري وانه صورت هل المنظر
حزني يتكرر

باقرنا يروي قصته وآلآمه
عن ذبح جده وذبح كل احلامه
وشلون زينب صوبتها الهامه

يرويلك حاله ...للطف واحواله
كل يوم اليمر منه الكلب يسعر
حزني يتكرر

من عكب الازهر كل خدرنا اطشر
واطفال تاهت بالخيم والعسكر
والخيل تسحك والجثث تتبعثر

سهم صاب العين ... وعبدالله وحسين
والامر منهن صوبوله الأكبر
حزني يتكرر

بالمشرعه العباس غاب اعلينه
ظل معتكف يم النهر لسكينه
من عكب عينه الخيل غارت بينه

هجمت العدوان ...فرت النسوان
والخيمه بيها بس عليل مكسر
حزني يتكرر

اذكر رقيه من تون وتنادي
تبجي اعله ابوها وتشتكي للهادي
صوت العليه من البجي متفادي

تريد ابوها حسين. مترب الخدين
ردو عليه بدم ابوها الاحمر
حزني يتكرر

منهج قتلنا لو ذبح لو بالسم
أربع ائمه من القدر بي نلتم
بأرض البقيع التنبني وتتهدم

كوكبة اقمار ..من بيت المختار
كلهم ضحايه بالامر المقدر
حزني يتكرر

بقلم خادم الثقلين صادق الخفاجي

يامسلم ادبها وبسيفك حاسبها
بيمينك ذوالفقار لا ترحم هالاشرار
...........
صرخه من وحي البطولة الها تهتز الضمائر
حسب توقيت العبائه اصبح البث المباشر
طوعه صاحت گوم ليهم يابوطاهر يابو طاهر
عمك علي حامي الحمه خليها تغرك بالدمه
بسيفك يراعي الغانمه اكطع اصلاب اومناحر
ذكرها ابماضيها لجهنم وديها
بيمينك جنه اونار لاترحم هالاشرار
................
خير لاتسترجي منها هاي ناس التضد حيدر
وبضمايرها متلگه مثل هاني ومثل قنبر
ذوله ضدو علي عمك بالرحم بالصلب بالذر
يانوح منهم لاتذر. طوفانك الموت الحمر
يالله يبن عم الگمر اهجم ابالله اوكبر
ضرباتك معروفه. تشهد بيها الكوفه
منك دخول انذار. لاترحم هالاشرار
........
ذوله أبناء السقيفه عارهم غسله ابدماهم
ذوله ابن العاص ابوهم انته مو من مستواهم
الغدر مزروع بيهم. درهم الذله عماهم
سيفك قلم والدم حبر خط بيدك احروف النصر
وصل رساله للشمر. ربعك العباس أجلهم
بالطف ايخليكم سافلكم عاليكم
وتناديه الانصار لاترحم هالاشرار
............
نهض مسلم من سمعها اوتنبض الغيرة ابدمائه
گلها ياطوعه ابشري. اورتل ابسورة برائه
چنه قالع باب خيبر چنه حمزه ابكبريائه
عگرها لصلاب الزلم. ابسيفه يطشرها اويلم
من ابو طاهر والنعم الكوفه صارت كربلائه
كرار ابحملاته تذبحهم خزراته
صاح ابچفه البتار لاترحم هالاشرار
..........
مسلم ابكل تضحياته. بالدمه خط انتصاره
والدليل انشوف گبره للوفه اصبح سفاره
كل حضارة التجي يمه منه تتعلم حضاره
رايتنه رفت بالشرف جبناهه من گلب النجف
ابهالرايه موكبنه هتف سحقا القصر الاماره
يامسلم زوارك سجلهم انصارك
احميها من الأخطار عمك حماي الجار
يامسلم زوارك سجلهم انصارك
......
تمت بعون الله تعالى
قصيدة كعدة بحق مولانا مسلم بن عقيل ع
كلمات
قصي الشمري





‌

.

ظلت حميده بلا راي
تنشد عله والدها
.......
تنشد حميده بكل مسه عله الوالد
كلمن يجيها اتساءلهَ وتناشد
شحاله گلبها اللي مثلها فاگد

فگدت ابوها وبالويل
تندب صبر ماعدها
.........
ونت عله فراگه الحنينه من الشوگ
حنت لمسلم مثل متحن النوگ
بنار المصيبه ظل گلبها المحروگ

تنطر تواليه الليل
ربنه العلي ايساعدها
........
طفلهَ وتمنت بن عقيل تشوفه
ولجيته ظلت ناطرهَ وملهوفه
ماتدري صارت چتلتهَ بالكوفه

من عالي قصره ابن زياد
طاح الذي يساندها
...................
متعوبه مارد اليجيبلها أخبار
ذايب گلبها بهل رزيه ومحتار
كل غايب ولازم ندورلهَ أعذار

غاب وبَعَد عنها شلون
ونار الحزن توگدها
.....................
أيس گلبها إتعَذّبت بغيابهَ
تتمنه توصله وتبوس إترابهَ
دمعتها فوگ الخد تصب سچابه

مهضومة ظلت بالدار
عنّهَ القَدَر باعَدها
........................
الشاعر الحسيني
مؤيد غازي الأسدي
ميمر.... مسلم ع....

قصيده بحق العليله ع من وزن النصاري
من مدرسه رابطه الدموع العقيله
{{المجلس بأشراف العلويه ام نور الميسانيه }}

●☆☆☆☆☆☆☆☆☆☆☆☆●

يمن رديت يوسف من مغيبه
اريدن. والدي سالم. تجيبه

يربي انه. العليله
بحسين اوخليله

اريدن والدي سالم تجيبه

☆☆☆☆~{{{{🌳}}}}~☆☆☆☆

يشدون. بضعنهم شالو بليل

اصيح ياهلي اودموعي اتسيل

جسمي نحيل بويه بايد الحيل

وحدي بالنزل دون المداليل

الفرگه تشلع الروح
اصيح وگلبي مجروح

اريدن والدي سالم تجيبه

✍زهره الكناني

☆☆☆☆~{{{{🌳}}}}~☆☆☆☆

اصيحن ياهلي وگلبي شتعل نار

وين تروح بويه وعايف الدار

حملت الضعينه اكبار وصغار

ولاجبتو لمسيري ياهلي اخبار

اضلنّ وحدي شلون
مرض والفركه تدرون

اريدن والدي سالم تجيبه

✍العلويه تم نور الميسانيه

☆☆☆☆~{{{{🌳}}}}~☆☆☆☆

سفرهم طال ماردولي جواب

وانه مناطرتهم عيني عالباب

كتلني افراگهم والگلب عطاب

انذر عمري لو عادو الغياب

اذا ليه يعودون
ابطل دمع العيون

اريدن والدي سالم تجيبه

*ام منــــ✍ـــذر الحجار*

☆☆☆☆~{{{{🌳}}}}~☆☆☆☆

انذر لو اجو اهلي المغيبين

اطش الكاع قداح ورياحين

احني الباب وانحني الحياطين

واكف الحزن وامسح دمعت العين

واملي عيوني منهم
وشبع من صورهم.

اريدن والدي سالم تحيبه

الـ✍️ـعلويه ام مرتضى الموسوي

☆☆☆☆~{{{{🌳}}}}~☆☆☆☆

راحو کل هلی وبلدار ضليت

وحدی بلنزل والدمع هليت.

مریضة شلون اضلن وحدي بالبيت

اروح وياك يا بويه تمنيت

اتنــطرهم ما اجــونی

اهلــی الــفارگــونی

اريدن والدي ساام تجيبه

✍🏻... ام جمال الساری

☆☆☆☆~{{{{🌳}}}}~☆☆☆☆

بعد شيجيبهم راحو سويه

سفرتهم نوت للغاضريه

بهاي الارض موعوده المنيه

ماضن بعد من احبابي جيه

بسفرتهم يطولون
خاف اعليه يبطون

اريدن والدي سالم تجيبه

✍🏻 الحجيه ام علي

☆☆☆☆~{{{{🌳}}}}~☆☆☆☆

~~

تـــمـ بعون الله تعالى ـــت

بقلم شاعرات اهل البیت ع في رابطة دموع العقیله ع
{{بأشراف العلويه ام نور الميسانيه }}

لانُجيز حذف الاسماء✋ مشكول الذمه امام الزهراء ع
🙏🏻نسالكم الدعاء🙏🏻