ليته خطا واعذرك لو ما أنت معذور
‏من قبل تفرح بالجفا هرّاجته

‏كان أبشع أنواع التطرّف فالشعور
‏شعورك إني شي .. ما أنت بحاجته

مرحبا يا أغلى على النفس النقيّه
من ملذات الهوى - زينه وشينه

اذكرك من يوم ماكنتي بنيّه
قبل تنهين الخفوق وتامرينه

يومها كان المطر مدري سميّه
حمّل الغيمه سلام الياسمينه

جعل يومٍ معك .. ينساني قفيّه
مايجي والشمس في راحة يدينه

لين اشيلك باللحون السامريّه
في دجا ليلٍ غدوا به سامرينه

ماعصم قلبي .. وأنا قلبي متيّه
غير من يوضي سنا البرق بجبينه

حبيبي زاحمت ذكراك صدري لين صدري ضاق
‏وانا اعرف الشتاء لامن رجع .. شرّه على السالين

‏ياصِبرك والسحاب يذكرّك فيني ، ولا تشتاق
‏ياقوّك ينشدك عني المطر .. وتقول له بعدين

‏كثر ما اجهل مصيري في عيونك والزمن سرّاق
‏يطمّني على الحب .. إنك أكثر من عرفني زين

‏مرورًا في شعور أول لقا ، لشعور أخير عناق
‏وش الأيام هذي كلها .. اللي كنّها يومين !!

ماجرح قلبي ولا هزّ الفراق احساسي
‏ذكرياتي معك أنا نادم على مجمَلها

‏لا تعاتبني ليامن صرت مثلك قاسي
‏غيّرتني مجريات الوقت ، وأنت أوّلها

عزوّا به الشعر ، وزن وقاف وعروض
‏ماسال وبل السحاب - وما تنشّى

‏مسفر خطا كان مسفر ، كان مفروض
‏نجمة سهر في السما الدنيا تمّشى ..

‏⁧ #مسفر_الدوسري_في_ذمة_الله ⁩

صادق من تصادق ، وحب اللي تحب
‏أنت أعلم ف نفسك وفي تكوينها

‏مصيرك تشوف الحقايق عن كثب
‏الأيام شدّتها .. تغالب لينها

‏لا أقدامك إن زلّت وصوتك لا انتحب
‏مرآة احاسيس الأوادم .. عينها

‏لو تعرف شعور الدموع بلا سبب
‏عفت الدموع اللي تطيح بحينها

سلسبيلٍ يشوق خطاك عذبٍ قراح
‏من مصبه يرّف البرق لمِسامره

‏أزهر القلب .. والخاطر تثنّى وفاح
‏واطرب الحيّ من عقب الجفا زامره

‏مرحبا والليال اللي تجيبك ، صباح
‏جعل خضر السنين بطلّتك عامره

‏لا تشيلين هم اللي تعب واستراح
‏انتي الناهيه فالقلب .. والآمره

خذ من الذكريات أعزّ مافيها
‏زمانك هان ، وجروحك شهر وتطيب

‏مايرثع فالنفوس إلا مشاهيها
‏وأنا مانيب لا مخطي ولا أنت مصيب

‏شف اللي قلت عنّه .. مايسويها
‏عرف ياخذ على نفسه عهد ويغيب

‏- ياكبر الهقوه اللي كنت هاقيها
‏"غريب أمر الظنون اللي معاك تخيب"

رح راضيٍ عَنك .. ومبايحك بجروحي
وانت أحفظ محبتي عن ما يدنسها

مْعاهدك لا تعلّق فالرجا روحي
أنا ادري ان نِشدتك عنها .. توّنسها

لا عاد تسهب فالمعاذير وتطيل
‏ماني مقدّر موقفك لا شرحته

‏مشكاي لله .. والليال المقابيل
‏يسلى بها قلبٍ جرحك وجرحته

‏العام احط من العتب معك واشيل
‏واليوم لامني كتبته .. مسحته

‏اليوم زاح النور ستر اخر الليل
‏ومدري وش اللي في عيونك لمحته

والله لاحفظ لك غلاك
وذكرياتك عالأقل بتصير ماضي
مافرحت
بس احسّ اني على فرقاك راضي

تعلّمي من سنين العمر وأعتبري
‏ماتابت قلوبنا إلا عقب ماعانت

‏حتى لو اني بعين الوقت ياكبري
‏عينك على ساعة الفرقا ليا حانت

‏استكثرت راحتي .. واستنفذت صبري
‏دنياً على كثر ما أحلوّت معك ، شانت

‏صدي بدمعة وفاك اللي على خبري
‏ما أظن الأيام ترجع مثل ماكانت