ባህሩ ተካ - Bahiru Teka

🎤 ሙስሊምና ወቅት

ጊዜ አላህ ለሰው ልጆች በእኩል ከሰጠው ፀጋዎች አንዱ ነው ። የሰው ልጅ ህይወቱ በጊዜ የተገደበ ነው ። ጊዜ መቆሚያው እስከሚደርስ በረቀቀ ስርአት ከመጓዝ አይታቀብም ። ወደ ፊትም ሆነ ወደ ኃላ ማድረግ አይቻልም ። በተወሰነለት መስመር ወደ ተወሰነለት ፌርማታ ይጓዛል ። በጊዜ መርከብ ተሳፋሪዎች ብዙ ናቸው ። ነቅተው ጉዞዉን የሚከታተሉት ጥቂቶች ሲሆኑ የጉዞዉን እንቅስቃሴ አላይም ብለው የተኙት ግን ብዙዎች ናቸው ። እነዚህ ከእንቅልፋቸው የሚነቁት መውረጃችሁ ደርሳችኃል የሚል ተጣሪ መጥቶ ድንገት ሲቀሰቅሳቸው ነው ።
      ኢስላም ጊዜ ማለት ምን ማለት እንደሆነና ሙስሊሞች ጊዜያቸውን በምን መልኩ መጠቀም እንዳለባቸው ትኩረት ሰጥቶ አስተምሯል ። ጊዜ የህይወት መርከብ መሆኑን በግልፅ መርህ አስቀምጧል ። ጊዜውን የተጠቀመ የህይወት ሚስጢር የገባው ሲሆን ጊዜውን ያልተጠቀመ የህይወት ትርጉም ያልገባው መሆኑን አስረድቷል ። ህይወት ማለት የሰከንዶች፣ የደቂቃዎች ፣ የሳአታት ፣ የቀናት ፣ የሳምንታት ፣ የወራትና የአመታት ውጤት መሆኑን በተጨባጭ ማስረጃ አረጋግጧል ።
    ቀደምት የኢስላም ሊቃውንት ሰለፎች ይህን ተገንዝበው ጊዜያቸውን በአግባቡ ተጠቅመዋል ። የአላህ መልእክተኛን " ሁለት ፀጋዎች ብዙ ሰዎች ይሞኙባቸዋል , ጤንነትና ክፍት ጊዜ "
ብለው በአግባቡ አስገንዝበዋል ። ከዚህ በመነሳት ነው ታላቁ ሊቅ አል ሐሰኑል አል በስሪ እንዲህ የሚለው : –

" ሰዎችን አግኝቻለሁ አንዳቸው በእድሜው ከወርቁና ከብሩ የበለጠ ስስታም ሆኖ " ።

       ኢማሙ አሽሻፍዕይም – ረሒመሁላሁ እነዲህ ይላሉ :–
" ከሱፍዮች ጋር በቆየሁበት ጊዜ የተጠቀምኩት " ጊዜ ሰይፍ ነው ። ካልቆረጥከው ይቆርጠሃል" ። የሚለውን ነው "።
ታዲያ እኛ ለጊዜ ያለን ቦታ ምን ይመስላል ? ጊዜ ህይወታችን ነው ወይስ ጠላታችን ? ምክንያቱም ብዙ ሙስሊሞች ጊዜ እናጥፋ ብለው አልባሌ ተግባር ሲከውኑ ይታያል !!! ። ከላይ እንዳልኳችሁ ጊዜ አለህ ለሰዎች እኩል ከሰጣቸው ፀጋዎች አንዱ ነው ። አንዳንዱ ጊዜውን ተጠቅሞ የሁለት ሀገር የስኬት ማማ ላይ ሲወጣ ሌላው ጊዜውን አጥፍቶ የጀሀነም አዘቅት ይወርዳል ።
      ጊዜ ሶስት ነው ይላሉ ጠበብቶች ።
🔹 ትላንት   አልፏል ።
🔹 ነገ መድረሳችን አይታወቅም ።
🔹 ዛሬ እንጠቀምበት ።

http://www.tg-me.com/bahruteka