يوم

جاي منك يا مُناي

منسلِّـي ؛

من موج الضفير ،،

متمدِّي ؛

في بِرش الصراط ،،

لافح

نسايم الـ(همبريب) ،،

لافظني

- بوخ - هذا البحر ؛

نحو السما ،

وراحة الطبيب ،،

مد الأراضي

-الشاسعة -

والهم ، والدُعى ؛

اتعترت ، فيني الخُطى ،،

ولقيتني ؛

منتصف الـقلوب ؛

كلمة محنَّة معنونة :

" الدرب أهون يا الحبيب "

الشوق ؛

مدى حد الغلاف ،،

ما بعدو ؛

لا حد ، لا سقوف ،،

الا الوقف

شامخ كما دي الأدمغة ،،

الا ...

الركايز ، لي الجمر

قسوة "شموس" المقصَلة ،،

الحب ؛

جمالوا مع الخلوق ،،

"وجمال خليقتوا المشنقة"

الحب ؛

مُدفَّـق من هنا ♡

ابيض !!!

كما غُصن الضمير ،،

يانع

مع البَسم الكتُر

حي المداين لي الوضوء !

الحين ؛

صلاة الحب "فرض" ✌

القبلة ؛

واحدة على الـ(بلد) ،،

النية ؛

ايمان لي الوصول

اخر صراط الهم "فرح" ،،

شتلات ؛

مقرقرة في الضفاف ،،

كتر انبساط ،

وجنس مطاقشة

في تهانيك "الزفاف" ،،

النيل ؛

سُقاة كل العطش !

الضفة ؛

دارة العاشقين ،،

الشاطئ ؛

مسرح ، ولـلأبد !

الغنوة ؛

باكر يا "حليوة" !

الصبح

في ابهى الصور ،،

الرقصة ؛

بالمبوا الطرب ،،

الدارة ؛

فايحة مسالمة ،،

الارض ؛

ماسحة شفاهة فُل ،،

" أبيض "

كما سن البرق ،،

اصدق ،

من أهوال الزمن ،،

انضر ،

من النجم اللبن ،،

والشاهد

التحتاني "حي" ،،

والشهداء ؛

في البرزخ جُمَل ،،

متحملين

سوءة الخلاف ،،

البؤس ،

والحال ، النكد ،،

السب ،

فراق الروح ؛

سوا ،،

فلق "الطيابة"

بدون سبب ،،

نهك الشوارع ،

والشوارعية ، الشراع ،،

حرق القطاع - التوعوي -

وبث الغياب الـ(مستوي) ،،

بتر الروايش لي الطيور

الـ(راكة) في الجو ؛

بي الطلق ،،

نزع الـ(حناجر)

بالغصب ،،

نهب الفقارة من الـ(نَفَس)

لاخر السلالة مع القصِد ،،

لِعب الـ(تواريخ)

في العزاء ،،

وتدريسوا

في -الفاضي- الهواء ،،

او . . . . .

ما نصيحو على الـ(هوى) ،،

سر الوجود الانطوى ،،

فيض السلامة

طشت طشت ،،

عافية

مجينا على البلد ،،

قدرة

رواحنا على البقاء ،،

الشِدَّة وكت المهزلة ،،

والرخوة

ساعة البال يطش ،،

السيرة

مبعوثة النبض ،،

الصدق

تحت القلب جم ،،

كم المراسي

على السماح والإصطفى ،،

انسان

وحفيان الحقد ،،

الممشى ؛

أوسع من عريض ،،

العوجة

ما خط انتكاس ،،

الحق

مبيض لي اللسان ،،

" الموت محاسن المؤمنين "

حي ،

يا إله الحب ،

هِنا ♡ ،،

في كل

دقة ، وخوف ، حنين ✌

،
،

(عثمان جبره)

نحــن الفــي ســماء العــز محـــلـق طــيــرنا
نـحن اللي البضاري الحوجة دافق خيــرنا
ايــدنا قويــــــة واضح للبشـر خـط سيــرنا
صبارين وخبارين دروبا مااتمشت لي غيرنا

المحـن الدروبا مجمــعــــات واشـــتاتا
وحوشا ان جن علينا قسمت مابيقتاتا
نحــن نخـــلي عاتيــات الجـــبال فتاتا
مابتتــــمدا يـدنا لي وليــة بتـــــــــاتا

نحن الخيرنا لي باقي البشــر ساكبيــن
نحــن قدام ولــكن بــرضـنا مــواكبيـن
علي ضـهر القواسي بننعــرف راكبيـن
كم في العركة للعدو والخصيم ناكبين

بي. المال نحن لا بنحكـم ولا بنعااايـــر
بننحـر ونضبح الروس السمان لي الزايـر
جنــة بنبقـا في المي دايمـة عنـد الدايـر
لكـن نار جهنـم في البعتــب غايـــر
..

لي الضيف فرحة ساكت نفتحن كم دار
مابنبنيلنـا فـوق جرفــا مشقق وهــار
الشاف نفســـو فيـنا ولينــا قصدا جــار
حينـا بيــعرف الطـــين البــــيآكـل الــنار

..
لسانا علينا في المابخصـو ماحاشرنـــو
الخيـر نحــن بي الصفة والفعـل ناشرنــو
الموت يــومـو نتلقاو كدي مباشـرنــو
تــــوب العــز مقاسنا بننولــد قاشــرنــو

✍
2018

في تفاصيـل زي دي اعرف
مين صديقَـك...
"انت ابسَط
مِن تقـوم الفَرحة تمشي عليك
ويستثناك ضيقَك.🖤."

ما بوريك..
" ياتو سِـر دسِّيتو مِنّـك..
ولا ياتو طريـق بودي نهايتي عابر بي فريقَك.."

- حصل الجَّفَـلن اخيـر لك..
قد يكونـن في المشاوير
حسُّـو بي تُقـل الخطاوي
وشافو عشمَـك في الوصول
"وخافو خطواتن تعيقَك..."

- يا سماحتَك وانتَ بتعاين علي البَـاب..
قبل تَلمَح لوحة الموت المعلَّق..
شال سحابـك خوف و فَـرّا
لمّا مِـن كُل الحَواليـك ..
وانت ارضك خَصبـة جِداً
غُصنّـك اوّل حقل ورَّق..

طار حمام مُرسـالو راجِيك..
" ذاع خَبـر
مطـرَك علي النّـاس..،
كضَّبوهـو..
قالوا: ارضُـو عَجُـوز عقِيمة..
" إلا محبُوبَـك تبسَّـم..
لاقّا خبرك قَالوا...صدّق
هددوهو ..
ودمّـو بين عينيك مفرَّق ..💘"

وهسّـع انتَ بتشبه البـاب...
صُـورة المـوت الحَنـينـَة...
ريشتَك ابيض من تكفِّـن
لوحة الطفلة وغناها
وذكرياتَـك في المدينة..

لونَـك أسـود من مـواضِيك
وروحك اقرب من مناجاتَـك
وحرفَـك في السّكِـينة..

رسمو اسمك صُورة في لـوح
قالو يكسُـو اللّـوحة طينة
جيـت مرقت من التفاصيل
باب معلق صورتو تذكاار
وروح علي لوح مُستكِينـة..

كفاك تفاصيـل..
قصَّتَـك مُحتاجـة ازمــان...
شان يعرفو وجَع وقوفك
او رُجَاك لي كـلّ عابِـر
كان يبيت اللَّيل جِـوارك
تحكي لي القِصص الحزينـة..!

داير اقول ليك:..
"رجِّـع المـوج ..
لِمُّـو شاطِـيك
ابحرت آخِـر سَفينـة..."💘
🖤🖤🖤🖤🖤
#أحمد_عوض

إعادة نشر
.....................
انت أجمل..
من ترانيم الصباح!
انت احسن
زول يشيل البسمة راحة
ويهدي للدنيا ارتياح..!

انت افضل من أصابع مُترفة
شايلالا سبحة وتحكي قصة من الكفاح
انت افضل بالخُلق
لو كنت ما بتَشتِل جِراح...

انت فرحان بالنصوص
يلا واصل بهجتَك💕
واسمح لي في طيبتك أغوص..

هل بترضيك
الأماني الواقعة في طرف الشوارع
ليها تطوطا وتدوس؟!

مرة احتَمِل
انو الشوارع مفرغة
من الغنيوات والبسيمات والطقوس
الماري بيها على العمل
لو مرة ما لاقاك طفل
شايل محطات الحزن
شاف الحلم
طقطق على الوجعات تقيف
نزلت دموعو من الحِمِل...
اتذكر انو كما الرصيف
مَرمي وهِمِل..
والفرحة مارة ولا بتقيف..
حتى البقيف
ياطا القليب
بي نظرة أو كلمة جَهلل...

ياااأخويا لييه؟!
ما انت وَد وهو زاتو وَد
مش كل وَد محتاج ل" وِد"
لو حتى ما للوَد أهل..؟!

زول في ملامحو صور بلد
اتوهط الوطن الحنين
حام الشوارع واجتهد
اهداهو سودانا القُبَل
ود الجمال..
لِبس الخِصال السمحة فيك
وأدا الدريبات افتعال
مسح الغبار..
صحح مسار الرؤية ليك
واهداك جنات من خصال...💙

كفكف دموعك يا جميل
شيل المناديل خُتها
ممكن عليهو كم هَم تشيل...
زي ما هو في دنياهو شال..!

لاقيتو
زي كان بِحتَضِر
أو بِختَصر كل الحصل..

عبر لي بإحساسو قال :

انا أمي سلة على الرصيف
ورضعت من كيس التِفل
وأبويا كان..
شارع بجن بالحافلات
ضماني كل ما ليهو حن...

وانا كنت دايماً بحتفل
لمن تتوه الريحة
من مطعم تَضِل
لفحا الشهيق
قعدت محل الجوع
وكانت زي أكل...

أنا زول جميل..
لكني ما لاقي اهتمام
غير من شوية ساقطين
ختوني في عربة نظام
دقوني ما كنت السبب
نعتوني دائماً بالجهل
لكنو في حكم الحياة
قد صار جندي من فشل..

لو كنت مولود بين حيط
ما كان براودني السَقط
ما كان سرقتَ ولا نشل
ما كنت ح أقعد في نفاية افتشا
لو القا بس حتة اكل..

قصرتا فيك..؟!
ورنشتَ ليك بي كل حب..
وانا هسي حافي
" وبنتَعِل طين الأرض
او انتَعِل هذي الظروف هذي السُبل..."

انا كنت موجوع برتجل
الهم طوِل
معليش خلااص
النص كِمِل....
..................
#محمد_الشيخ_بروي

نوم العوافي..
حبيبتي البريدك عوافي

سهر شِن عيونك تشوفو..
السهر للبِحن
والبحن ماهو جافي...

"يميل عن دروبك
يعود ليها ملهوف
يجيك قلبو حافي.."

بداية قصيدة ارتعاشة قلم
حروف الاسم ..
بين حروف القوافي

هدية وعبارات
بواقي الضحك والحوارات
اجوط وابقۍ صااااافي

عليل النسيم البمر..
بين ضفيرة وضفيرة
عرف في خدودا المرافي💚

بحسك..
برغم المسافات
في شوق لسة دااافي💕

دي أول قصيدة
ابوح فيها سرا
وسر الوضوح فيها خافي...

انا اليوم كتبتك
وعيت
وان كنت قبلك
سهيت
كنت غافي

لا
انا اليوم لقيتك
لقيت روحي فيك
وانت مافي

لا
انا الكنت عنك بفتش
ملامحي
ولقيتك ملامحي
الوطن والمنافي..🖤

هدية وعبارات
وباقي الضحك والحوارات
"بتشبه جواك اختلافي.."

معاك أو بلاك
بشوفك هنا
واناديك هناك
وتجي الذكريات
شان تعطش جفافي💘

حنيييينة
بتوزع
ملامحك زوادة💓

وتنفض رموش العيون
من سُهادا
وتقول ليها كافي...

متين كنا رغم الخلافات
نخت المسافات عذر
من نوافي

دقيقة
فراق شن يشيلك جبر
أو يعيدك
جَبُر لضفافي؟!💕
💕💕💕💕
#امين_كاغو

نضمي رفعتـو ليكن صاح ولي ولـهن
عشان فكينا درب الدين. نقصنا وهنـا
الغلـط انو نحسـب نحـن كنــا وكـــنا
والصاح نمشـي بي الدرب المشتبو السنة




نخـت في بالنـا اننا من امس نتعلـم
من البعرف وشينا ان دارنا مانتبلم
الـــغلط انو مانـرد الـسلام لي السـلم
والصاح لي السفيـة لانرد ولا نتكلــم


مابنقول علي ودِ من ودِ اتصاعـدنا
حـكمتنا الظروف والعيشة واتباعدنا
الغلط انـو مانشكــر بشــر ســاعــدنـا
والصاح نوفي وعدنا كان بقت واعدنا



في الاعمار دي كلها البي تحتنا وبي فوق
الغلط ابقــا عـدم الاحتـرام والــذوق
نعيش ونسايس الناس النصاح والعوق
والصاح برضـو مانخت للتعامل طوق


الصاح انـو عينـا من العيوب تتغمد
وتبقى قلوبنا من سيرة الحرام تتجمد
الغلط انو للشيـن والقبيــح نتعمــد
والصاح نتبع سنـة نبينـا محمـــــــد

الما ضاق مخاواة الرتوت ماضاق
والما راق مع ام خداً بِبُقْ ماا راق
الشر هيِّن الخير فِعلو دايما شاق
وتاج العز تواضع والكريم اخلاق

#روووووو

مُوحِشُُ هذا الطريق..
غيرَ أنّي مُغرمُُ بالنورِ
والنورُ حَريق..!🖤

لا تقولُ اللافِتات
غير ما اتجهوا يميناً أو يسار
ولنا—كآلهةٍ صِغار—أن نُعيدَ المَشي في النارِ القديمةِ
أو نُطيلَ الانتظار..

قال لي الموت المُكوِع والمُقلِب دفتري :
كيف تبقى حينما يُحتاجُ أن تسعى معي ؟!

جاء صوتي :
"بالذي في أضلُعي
والذي بين يَديكْ.."

لم يُحول بعد هذا وَجهَهُ العَبَاسَ عَنه..
وتلا —خافِض الأصوات— منه :

كيف أنسى.؟!
أذكرُ الأن التفاصيل الدقيقة..

كيف كُنا..
كيف كان الوقت يمضي..
كان شِعراً كان يَختال الهُوينى..!

كان في الجَوِ المَلائكُ
يَعزِفون الحُبَ
فَرحانين كانوا
لــكِــلَــيْـنـا..!💕

أذكر الآن ارتباكي..
كان في عينيّ شوقُُ سرمدي
وارتعاش في يديّا
كلما ابتسمت يداكِ♥

إنما الحُب الذي كان علينا..💕

أذكرُ الآن كلاماً لم أَقلهُ
كنتُ أخشى أن أقولَه
كنتُ تَنقُصُني البطولة..

"غير أنّا
—يا مُرَتِبَتي—
التقينا
فالتقيتُ
الهَارِبَ الخوّافَ مِنّي..!🖤"

ثم إنّي
—بعد ما نحن الّتقيْنا—
"لم أجِد في الكونِ قُبحاً
فــاطــمــئــنـي..💖"

كنتُ أخشى نظرةَ الموتِ الأخيرة
لكن الآن..
"انتصرتُ
بعدَ ما قلتُ
انكسرتُ..!"

ثم واصل
بعد ما أبدى اهتماما:

كيف أنسى.؟!
ربما ما غَنّى "وردي"
كان قصدي..
ليس حظاً مثلما كُنا ادّعيْنا..
كانتِ الساقُ تُغني وهي تَهتَزُ لساقِ

"كُنتُ مخلوقاً عجيباً
من أغانٍ واشتياقِ..💘"

يا انطلاقي..!
ليتني الآن هُنالِك
ليتني في المقعد الخَشبي جالِس
عن شِمالِك
"كُلما خَبأتِ وجهاً عن عيوني
ها هُنا ازداد جنوني..!🖤"

" فافْسحي لي
— يا نجاة الروحِ—
ذكرى في خيالك
ربما يزدادُ عُمرُُ في جمالِك..!♥"

إن عُودي
ياوَريف الظلِ
يابِس
"خَــضِّــريــه"💚
إن وَجهي
يانبيّ النورِ
عَابِس
"نَـــوِّريـــهِ"💛
و انقذي
ما شئتِ مني
لستُ إلا مَحضُ هالِك
خائفٍ ما يَعتريه
" بَــشِّــريــهِ"💚

أكمل الموتُ القراءةَ
ما تَبَسَّمَ ما تَجَهَّمَ ما احتَفى..

قال شيئاً عن بقائي؟!
لستُ أدري..
قال شيئاً...؟!
لستُ أدري..

كانتِ الإسعاف تَعوِي بين وجهيّنا
قليلاً
فاختفى
واختفى سِرُّ الخلود
رُبما في ليلةٍ أُخرى يَعود...
"ما عــلــيــنــا...!"

🖤❤🖤❤🖤❤🖤❤🖤❤🖤❤🖤❤
#بشير_أبوسن

يا فراشةُ

كل هذا الزهرِ
جفّ
وذا وريدي
لا يكفُ عن النزيفِ
ليمنحَ
الباقاتِ رونقَها...
ولا يبكي
لقلةِ حيلةِ المبعوثِ للخيباتِ
لا يُروى من التعذيبْ..

وذا قلبي
يرددُ:
قُم ومُت
عِش ثوانٍ ثم مُت

ضع حياتك باللهيبِ
وزِد صياحَكَ
ثم مُت..

لا تخالف ما
يعرقِلُه الزمانُ
فليس يكفيكَ الرحيلُ...

ولن تجوبَ الامنياتُ
دماغكَ المثقوبِ
لن تبقى
طويلاً
بالهوامشِ...

"كل كارثةٍ
تشقُ دروبَها
للحبِ في عينيكَ..."

فابصِر..

جثةُ الإيمانِ
غالبَها المصيرْ..

فيا فراشةُ

ما الذي ينهالُ من عينيكِ؟
كيف أرى لديكِ
النارَ؟

كيف سترشفين
رحيق هذا العِبءِ
من قلبي
لينثر بالورودِ؟!

متى سيحلُمُني الضريرُ؟

ويكتفي من
راحتيّ الذعرُ؟

"أين سألتقي نفسي؟
وكيف أكون أبصرني؟"

فراشةُ..
"خَبئِيني
ليتَ أُفقدُ
عانقيني
ليت أُغمَرُ بالدماءِ.."

وأخبري قلبَ الحبيبِ
"بأن
ذائبةً على طرقاتِه ماتَت.."

"وأنّ مصيرَ
بائعةُ الحظوظِ
الموتَ بؤساً.."

بعدها نروي قديماً

" أنّ
قارئةَ الكفوفِ
بلا كفوفٍ.."

"أنّ
مسقط رأسِ
خـيـبـتِـنـا
المـحـبـة..🖤"

"في حديث للفراشة"

#Rahma_Elmahady
#رحمة_أحمد_المهدي

فيك روحي المَعَلَّقَة يا أم ضمير طمّاعة
أكنِك دهبة ترقشي من بعيييييد لمّاعة
كتااااااار المن صدودك منبهل. دمّاعة
وكتار الوقعو فوق دربك جماعه جماعة

#روووووو
الزرقاوي

ضمنت سعادتي بالحزن الفَصمتي
حاشاك إنتي بالسوء ما إتوَصَمتي
أضفتيلي السمح والشين خصمتي
معاك وَقَّعْت بالأبدي وبَصَمتِي

ملانبك نضمي مزرود بيكي صمتي
كأنك روح ومن روحي إنفصمتي
عليك عفة لسانك يا العصمتي
خيال الفرقة كان زارك تَصُمتِي 🖐

#رمّاح_إبنعوف

رابط القناة على اليوتيوب
https://youtube.com/channel/UCvzditNY4Vt_NcjGrMr5TqQ

ما تفوتكم حلقاتنا في قناة.اليوتيوب 😍

غلطانة أنا الفكرت فيك
رغم إنو ريدك كان غصب ...
ماعايزة أقول ندمان
قليبي علي هواك..

بس قلبي
من ريدك تِعب ...
ملعون أبوك إت يا الغرام
سويت مشاعر الناس لعب ...

أصبحت في جواي "سكوت "
"كلمة وحروفها بقت عدم..🖤"
فارقني بالشوق العلي
منك شكيت وجع الألم ...

أنا صُنت حبك في جواي
لكني منك إتظلم ...

دوزنت ريدي أنا ليك حروف
سمعتو للناس بالنغم...
سويتو نوبة وحس دليب
طمبور بلدنا وبرضو نم..
غنيتو بي حسآ رهيف
"لمن سمع بيهو الأصم.."

وكتبت آلاف الفقصيد ترجمتها
"وحكاها من صابو البكم.."

وكتبت ليك كتيير خلاص
"لمن شكت سن القلم.."

كل الخلوق حست هواي
سويتو إنت عدم فهم..🖤

دايراك كت تبقى الحبيب
بلسم يداوي من الألم ...
لكن بقيت خنجر سنين
طعن قليبي نزف لو دم ...

أنا كت بشوفك في صحاي
وأنا في الخيال بيك إتهجم ...

ومنايا كان يجمعنا بيت
أتلاقى بيك في فد ملم ...

لكنو وآ ضيعة رجاي
تاريهو حظي معاك سجم ...

وأنا
كم سقيت
زرع الغرام
وجنيتو
في الآخر
نَــدم..🖤

لكني
ما بعتب عليك...
وأنا راضية
ب اللي اتقسم...
🖤🖤🖤
#مكارم_أحمد

انت مني وياني منك
نطفة في رحم الكآبة
نزعة للملكوت بتسعى
ونزعة لي حب الكتابة
ولا نقطة ضو في عتمة
رعشة في قلب السحابة
واي قطرة دم في جسمك
فيها من نفس الاصابة
الياما شبّت في الخلايا
اعلنت فيها الحرابة
...

شوفها بعيني ملامحك
لسة ما زالت مُهابة؟؟
وكل اطرافك سليمة؟
كل يوم تزداد صلابة؟
هل وريدك لسة نابض
ولسه بيحيي السحابة؟
والسمار الفي الملامح
بدي روحك انتسابها؟
ياني في حبك متيم
والمشاعر بيك مصابة
رغم اني ورا غرامك
عادي جداً اموت صبابة
ولا تايه في الصحارى
او قتيل مجهول ف غابة
ولسة بي حبك بنادي
وراجي منك بس اجابة
...

العُبوس الفي ملامحك
كان نتاج عن الاصابة؟
ولا حرقة علينا نحن
المستقَلين الغلابة
ولا وجعة علي ولادك
الصبحو لحربك حرابا
ولا حسرة علي عيونك
الما بتشوف الا السرابا
...

النقولك بس سلامتك
الا كيف النظرة تسلم
دام بصيرتك هي المصابة
العيون حد شوفها زاوية
والعقول واسع مداها
بلّغ ادراكك نصابها
التميز في التمايز
واكتمال اللحن بكمن
في اختلاف اوتار ربابة
او كمنجة حنينة جدا
عد تواسي الناي في حزنو
و بتزيل عني الرتابة
يلا نفخر باختلافنا
والتمايُز في صفاتنا
زي حروف في جوف كتابا
قيمتو من قيمة حروفو
والتباعد بين صفوفو
والتداخل في الكتابة
...

ويلا نرجع للبداية...
انت مني وياني منك
نطفة في رحم الكآبة
نزعة للملكوت بتسعى
ونزعة لي حب الكتابة
ولا نقطة ضو في عتمة
رعشة في قلب السحابة
واي قطرة دم في جسمك
فيها من نفس الاصابة
الياما شبت في الخلايا
اعلنت فيها الحرابة

✍ مبارك

مصعب الزرقاوي قال
..
درب العزه امشيو اوعى من دادابو
الحر خشمو بمسكو ما بيتعدابو
القاصدلو شر اصبرلو ان هو بدابو
افطر بيهو اول وتاني اتغدابو

الايام دول والغاب عليك اعذرو
الحر بوفي بي وعدو وبسدد نذرو
بحر الدنيا هِنْ عِشْ بينَ مدو وجزرو
بفرزلك جمال الشيله والبنفذرو

السوّاي سكوت بالساهو ما بتفخّر
والحداث رهاب ساك من تجيو بتبخّر
الحر حر ولي شيل التقيلة مسخّر
والني ني ويوم فزع الرجال بتأخّر

الراجل مواقف مو تفشخر وجخّه
احذر من مباراة السفيه واتوخّى
رفيق البارده ماتسعاهو لين فخّه
رفيق الحاره لومو علي اكان يوم نخّه

الما ضاق مخاواة الرتوت ماضاقْ
والما راق مع ام خداً بِبُقْ ماراقْ
الشر هيِّن الخير فعلو دايماً شاقْ
وتاج العز تواضع والكريم اخلاق

#روووووو
الزرقاوي

ود المعتصم قال..
..
الملكت فؤادي و شارعه في التدمير
جمالا بحاكي تشكيلات زهور كشمير
انا ريدتي ليها عذاب و شوق بضمير
و ما بتملك هي من الحن قدر قطمير...

بين رملتنا نخلاتنا و بيوت حجريه
زهره جمالا فاق ورد القرى المجريه
عبيرا يفوح و تجذب قامتا الغجريه
و اوروع نظره في الكون نظرتا الكجريه...

أسرق نظره ، تكشف سر هواي الكاتمو
تخجل ، يخفي بسمتا كف تلالي خواتمو
توادع ضاحكه ، قلبي يقيف و عقلي يشاتمو
الله يخربو بفضحنا و بيبدا مآتمو...

منشفة ريقي باصناف الدلال الغجري
عطشان شوقي لي لقياك محرق شجري
أنا رضيان و صابر فوق همومي و ضجري
و انتي الفالحة بي عيونك مغتسة حجري...

جمال الكون تعرفيو يوم تمسكي مرايتك
اخلاقك منقيه ما بتنزلي رايتك
رغم اشواقي و الحال الحوتهو درايتك
انا راجيكي و إنتي إجتهدي تمي قرايتك...

: راوية والي الدين قالت
..

يا قمرا
شيلي السوسنه الحمرا
وسكتي طفله جواتي
بتبكي في ليلها يوماتي
قدر ما حكيتلها حكواتي
قدر غنيتلها غنواتي
قدر ناديتها يازاتي
بتبكي ع معاناتي
صحيت باكر
صباح زولا" بشوش نادي
لقيت الجرح فيك غاير
وصاير فيك متمادي
هيا ذاتي كفاك حرقه
وخلاص عادي
اعاديو كيف..! ؟
وانا البرجاهو يوماتي
يطل فيني
ويسكن جوا اهاتي
قدر الم الجراح فيني
بريدو اضعاف معاناتي
قدر دمعي انزرف حرقه
يجرح في خديداتي
قدر قلبي الزرف نبضو
عشان ساكن مساماتي
وقدر مايسل سيوف هجرو
روحتي بتلحقو تنادي
دا اعاديو كيف... ؟!
وقلبي ف ريدو متمادي
هيا ذاتي
غرامك ليه شي عادي
وياما الريد عمل في الناس
وقالو الريد بدون قاضي
خلاص عادي...
و قلتي الريد بدون قاضي
خلاص بظلمو بس راضي
دا روح روحي
وبدني بلاو بكون فاضي

دا ذات ذاتي
وكيف الذات تصير ماضي
.#

هدى وائل قالت
..
ما بفارقك ..
ولما تقسى عليك شمسك
في سماك تلقاني شارقك ..
يا حبيب ما قسيت علي
بس قدر ما يزيد حنيني
بلقى درب الريدة مارقك ..
مالو هو الحب
زي بغير من ريدي ليك
وداسي لي نية افارقك؟
ما بفارقك ..

اعرف انك
ما براك جواي قاعد ..
يا حبيبي معايا طيفك
مالي لي كل المقاعد ..
يا حبيبي بريد عيونك
واصلي ما بقدر اسيبك
وقلبي يا حب ما مساعد ..
خلي قاعد ..

انت طيفك
حاضر اكتر من حضورك ..
حاضر اني افوت عيونك ؟
راضي ما في يدي حاجة
انت بس اطفيهو نورك ..
وانت ما تملا الاماكن
او تزيد جواي مرورك ..

ما مشيت يوم في طريقك
لا تبعتك في مسارك ..
لا نويت في يوم احبك
الا قلبي هواك ودارك ..
قلبي لو كان فيك مخير
برضو حيكون ليك دارك ..
مالي كل ما اشق طريقي
بلقى نفسي على مدارك ..
وقلبي دارك..

وقعدنا نتونس عصر
وجاب الكلام سيرة السماح

وبدينا نتغالط سوا

فوق فاطنا بت عدل الدرب
والسرة بت الشيخ صلاح

وانا كنت كايس لي سبب
في النورا زي شمس الصباح

قتليها خليك من هديل
وكبيلي في الكسرة الملاح

انا عندي واحدة ولا القمر
بتجنن الناس النصاح

ونضمها زييين وهدية تب
بتلجم الناس الفصاح
...
قالتلي قولي يا أخوي
دي مني المفضلا في البشر

اوصافا عاد ما عرفتهن
طاعمة كلام وجها قمر؟
..
قتليها يوم داك العصير
لاقيتا واردا علي البحر

شلت الصفايح منها
ورفعتهن فوق الضهر

قتليها لا تباري التعب
شغالة من صيحة الفجر

أغشيني بورد ليك انا
تلقيني في حوش البقر
...
م عرفتي مين ست البشر?

خجلت ودنقرت الوطا
سرحت بعيد جيهة الشجر

قالتي أي عرفتها
ودماعا كان كبن مطر

قالتلي في دهشة ورجوف
وهي زاتا بدورك عُمُر

رايداك وما قدرت تقول
فضحني عينيك يا البدُر
...
ضحكت و فاتت من حداي
وانا قلبي بالحب انفجر

باريت قليبي تبعتها
ومني العقل ودع ختر

رايدها من زمن الجهل
ووراها كم ضقت السهر

يا ربي توعدني الحلال
من عازة بت الحاج عمر
....
السماني 17مارس 2018

وبينَ الهمِّ والشيتات
أتاني طيفُه يسري ..
فهمّ الهمُّ يتركني
وفارقَ مقلتي دغري ..
ف همي مدركٌ جداً
بأن الحبّ من بدري ..
يغارُ عليّ أدريهِ
ويدري أنني أدري ..

حروفي لستُ أذكرها
أضلَّت أم ضللتُ أنا ..
وحبري صدَّ عن شيتي
ومن تلك الطيوفِ دنا ..
وأقلامٌ تجاورني
تغنّت .. فالحبيبُ هُنا ..
كأنَّ الحرفَ عاداني
فصاحَ أحبهُ علناً ..

تبدّل كلُّ عُنوانٍ
بذاكَ الشيتِ يا خِلي ..
فصار الفعلُ أهواهُ ..
ووزنُ البيتِ يخشاهُ ..
وجبرُ القلبِ رؤيتُه ..
وميلُ الخطِّ عيناهُ ..
وفعلُ الأمرِ أرضيهِ ..
حذاركِ أن تجافيهِ ..
وخُطِّي الحرفَ يا أنتِ ..
أحبيهِ أحبيهِ ..

وفي " نص ازدحاماتي "
بِحُبٍّ "شلتَ جوالي " ..
وكنتُ أظنهُ حقاً
كما قبلاً " يكون خالي " ..
فهذا دفترٌ يدوي
وهذا الدرسُ يرعبني
وهذا الشيتُ ينظرُ لي
وذا التفكيرِ يتعبني ..
ويومُ الامتحانِ غداً
وحالي ليس يسعدني ..

وما هذا ؟
أهذا حُلم ؟
أحقاً ما ترى عيني ؟ ..
ظننتُ بأنهُ وهمٌ
من الجوالِ يأتيني ..
تصدَّر اسمه الشاشة
كأنّ فؤاده يشعر ..
بأني كنتُ مُنتظرة
رسائلهُ " علَيْ تمطر " ..
وكانت في رسالتهِ
كلاماً " أشتراً أشتر " ..
كأن الحبَّ" ملبوشٌ "
عليه توترٌّ سيطر ..

وكان النّصُّ كالآتي :

" حبيبتي الباقية ليّ الروح
عليك اسم الله ياخ أهدي ..
فقدتِك يا ملاكي شديد
ظروف وان شاء الله بتعدي ..
إذا جيتك ملان بالشوق
قلبي ال ليكِ ما تصُدِّي ..
واكتبي فيني شِعرك داك
اكتبي فيهو دا لَيْ سَنَدي ..
وفاضل ليّ بس اسبوع
على جَيْتي وخلاص عِدِّي .."

وأرفقها بذي الفقرة :

" تفكيرك فيني الليلة كتير
وأنا منك اتلخبط فكري ..
أنا جاي والله
ما تهِمِّي كتير
تلقيني ف دربك من بدري ..
وما تشخبطي ورقك بي اسمي
وممتحنة كمان؟ أحسن تقري "

فسهِرتُ الليلَ أكررها
تلك المسجاتِ وأتبسَّم ..
أقرؤها وأعيدُ وأحفظ
عقلي يا هذا لم يسأم ..
فسمعتُ الآذانَ يؤذن
أمي توقظني في عجلٍ ..
" يا بت ما تقومي على الجامعة "
وأنا " أتزهّجُ " في مللٍ ..
فأتاني نهرٌ في وجهي
شلالٌ أيقظني فزِعة ..
فصحوتُ مبشتنةً جداً ..
ووجدتُ الفوضى عارمةً ..
كل الشيتاتِ مبعثرة
والقلمُ السائلُ لونني ..
والهاتفُ في الأرضِ ينادي
مخلوقٌ فظٌّ أهملني ..
فحملتُ الهاتفَ في قلقٍ
وكأنّ الوهْمَ يطاردني ..

قد كانت مسجات الريدة
حُلماً بالليلِ يراودني ..

ما أحلى مسجات الريدة ♥

#هدى