Новы здабытак па тэме міжваеннай архітэктуры з аўкцыёна, здзейснены сумесна з каналам "Красивое из Минска" - два выпускі ілюстраванага дадатку да "Архитектурной газеты" №22 і №55 за 1937 год (у №55 быў размешчаны праект медінстытута ў Мінску на вул.Броўкі 5, пра які я нядаўна пісаў на канале).
Забіраць тут: спасылка на сканы на Яндэкс-дыксу.

#кнігібсср
Загадка ад канала "Батискаф историка" - які будынак выяўлены на вокладцы кнігі "Як савецкая ўлада будуе новае жыцьцё" 1930 года - разгадалася даволі хутка. Дапамагла, так званая, "нагледжанасць".
Некалі праглядаў падшыўку часопіса "Жилищная кооперация" за другую палову 1920-х і тады вока зачапілася за выразны канструктывісцкі будынак з кантрастнай афарбоўкай фасадаў - жылы дом кааператыва "Дукстрой", пабудаваны на Ленінградскім праспекце ў Маскве ў 1928 годзе. Яго здымак яшчэ трапляў на вокладку гэта ж часопіса №21 за 1928 год (фота 2). Дык вось, для вокладкі беларускай кнігі было выкарыстана фота крыла гэтага дома з іншага ракурсу (фота 3 узята з Pastvu).
На жаль зараз арыгінальны канструктывісцкі фасад гэтага дома схаваны за пасляваеннымі неакласічнымі прыбудовамі (фота 4).

#звязда #беларускаявёска
10 жніўня 1930 года, роўна 95 гадоў таму, у Менску пачала работу 1-я Усебеларуская выстаўка сельскай-гаспадаркі і прамысловасці. Праходзіла яна на тэрыторыі дзе цяпер знаходзіцца бульвар Талбухіна, для яе правядзення быў пабудаваны цэлы гарадок з дзясяткаў павільёнаў (большасць былі драўлянымі, але адзін каменны павільён электрыфікацыі захаваўся да нашых дзён па адрасе Кнорына 1А), а для зручнасці наведвальнікаў да тэрыторыі выстаўкі правялі новую галіну трамвая.
Над афармленнем павільёнаў працавалі знакамітыя архітэктары (І.Валадзько, А.Дзянісаў, С.Гайдукевіч) і мастакі таго часу (А.Грубэ, А.Ахола-Вало, А.Лабас).
На ілюстрацыях: перадавіцы газет "Зьвязда" і "Беларуская вёска", прысвечаныя адкрыццю выстаўкі.

16 жніўня 2025 года ў 15.00 запрашаем у Мастацкую галерэю Міхаіла Савіцкага на лекцыю «Страчаны канструктывізм Мінска» краязнаўца і даследычка міжваеннай архітэктуры Уладзіміра Садоўскага @belaruskipioner.

Канструктывізм у 1920-я гады актыўна мяняў архітэктурнае аблічча Мінска, але не ўсё з пабудаванага тады дайшло да нашага часу.

На лекцыі вы ўбачыце характэрныя для стылю канструктывізма будынкі сталіцы, якія не перажылі ліхалецце Вялікай Айчыннай вайны, а таксама аб'екты, якія моцна змяніліся падчас пасляваеннага аднаўлення Мінска і страцілі свае канструктывісцкія рысы.

#беларускаявёска
Усе ў Аўтадор! Дарогу машыне!
Вялікі рэпартаж з 1-га Усебеларускага аўтапрабега, які публікаваўся у трох нумарах газеты "Беларуская вёска" (№97,99,100) за 1930 год.
Аўтапрабег, які адбываўся роўна 95 гадоў таму ў жніўні 1930 года, прайшоў 2000 кіламетраў па маршруце Менск-Мазыр-Гомель-Магілёў-Віцебск-Полацк-Барысаў-Менск. У дарогу выехалі 23 чалавекі на легкавых (узгадваецца "Бьюік") і грузавых (узгадваецца "Штэйр") аўтамабілях, а таксама на матацыклах. Сярод шафёраў было 2 жанчыны - Ладыгіна і Несцяровіч. Рэпартаж вёў уласны карэспандэнт "Беларускай вёскі" Матусевіч.