Davlat rahbari ta’kidlaganidek, sun’iy intellektni rivojlantirish nafaqat texnologik infratuzilma, balki bilimli, zamonaviy tafakkurga ega yoshlar bilan chambarchas bog‘liqdir. Shu bois, kadrlar tayyorlash jarayoni maktabdan boshlanishi zarurligi qayd etildi. Massachusets texnologiyalar instituti bilan hamkorlikda yangi darsliklar ishlab chiqiladi, “Bir million sun’iy intellekt yetakchisi” loyihasi esa yanada kengaytiriladi.

Mazkur islohotlar ta’lim tizimining barcha bo‘g‘inlarini qamrab olmoqda. Buxoro davlat universiteti ham ushbu jarayonning faol ishtirokchisi sifatida joriy o‘quv yilidan “Sun’iy intellekt”   ta’lim yo‘nalishi va  magistratura mutaxassisligini ochdi. Bu yo‘nalishlarda talabalarga algoritmlar, ma’lumotlarni qayta ishlash, mashinaviy o‘qitish va tahlil texnologiyalarini amaliy o‘rganish imkoniyati yaratilgan.

Buxoro davlat universiteti axborot texnologiyalari laboratoriyalarida talabalar va tadqiqotchilar tomonidan amaliy loyihalar ishlab chiqilmoqda. Shuningdek, ta’lim boshqaruvi, raqamli kutubxona va talabalar reyting tizimida sun’iy intellekt texnologiyalarini joriy etish ishlari boshlangan. Buxoro davlat universiteti viloyatdagi ta’lim muassasalari bilan hamkorlikda “Bir million sun’iy intellekt yetakchisi” loyihasi doirasida yoshlar uchun sun’iy intellekt bo‘yicha Bootcamp, mahorat darslari va tanlovlar tashkil etishni ham rejalashtirmoqda.

Davlat miqyosida esa sun’iy intellektni 2030-yilgacha rivojlantirish strategiyasi asosida data-markazlar, superkompyuterlar va o‘zbek tilini to‘liq tushunuvchi sun’iy intellekt tizimlarini yaratish bo‘yicha keng ko‘lamli ishlar amalga oshirilmoqda. 21-oktyabr kuni o‘tkazilgan ushbu yig‘ilish O‘zbekistonda sun’iy intellektni rivojlantirishda yangi bosqichni boshlab berdi. Buxoro davlat universiteti esa bu yo‘nalishda ilmiy, ta’limiy va amaliy tashabbuslari bilan yangi O‘zbekiston intellektual kelajagini shakllantirishda faol ishtirok etmoqda.

Bizni kuzatishda davom eting:

Bizni kuzatishda davom eting: