#فریام_کەوە

شۆخێ سووتاوم بە تینی عەشقی تۆ فریام کەوە
نەک لەگەڵ خۆم، بێ لەگەڵ خۆشت چەلێ یەکلام کەوە

من دەڵێم بێ و تۆ بڕۆت داوە وەڵامم، چۆن دەبێ؟
شۆخە یا بمهێڵەوە یا گەر بڕۆم تۆ دوام کەوە

تازە بۆ من ئەستەمە باسی فەرامۆشیت بکەم
گەر دەتوانی تۆ لە سەر سەفحەی دڵی خۆت پام کەوە

شێتە کوا ئەمن و ئەتۆ دوور بین لە یەکتر هەڵدەکەین؟
کەم خەیاڵ و ئارەزووی لاوێکی کرچ و خام کەوە

یادی چی؟ خۆ هەر ئەتۆی لەو مێشکە ماڵوێرانەدا
کابە کەج نابێ ئەتۆش لەو نێو دڵەت جێگام کەوە

شل بووە زارم ئەوەند عەرزت بکەم بێ‌دین مەڕۆ
هەر نەبێ ڕەحمێ بە ئەو کاتەی کە بۆت گریام کەوە

دەردەدارێکم لە کۆڵانی ئەوینت کەوتووم
بگرە دەستانم بە ماچێکی لە کوڵمەت چام کەوە

بەسیە تاکەی "کاوە" بۆت شێعری بە شیوەن دەربڕێ
گیانی شیرینم وەرە و ماتەم لە کۆڵ سەروام کەوە

#کاوە_داشبەندی


@ChamoChya

#تروسکەی_ئاوڕێک

ڕوو بە بانیژەی دڵم، "ئاوڕێک" منی گرتۆتەوە
دیدە توێخێکی لە ڕێگە و، بەرجەوەن کردۆتەوە

نەبوە هەڵسەکنێ قونیچکێکی دڵ و کاولاشی لەش
سێبەری سامی مچوڕکت، هێندی پێدا چۆتەوە

قیامەتێک ڕابۆتە دڵ، بەو حەشری باڵایەت، گوڵم
جەمسەری وەهمی نەبوون و بوونی وێک خستۆتەوە

فێری کام کونجی خەیاڵی، کامە سووچی دڵ نەبوو
چلچرای هیوام، بە ڕێگاوبانی هامووشۆتەوە

تاکوو ئاسۆ بووم ئەتۆ خۆرم نەبووی، پێمدا هەڵێی
هەڵنەیەم، چبکەم، "لە ناچاری" لەسەر ئاسۆتەوە

دەستی فرمێسکی من و، داوێنی تۆ و، ئاوڕێکی دی
سووچی بێخێریم، دەنا هەر وا بەمل ئەستۆتەوە

وەرزی وەرزێریتە، بمخەمڵێنە، چاخی چاندنم
پێنەزانیتم بە فرمێسکی بەڵێن، شردۆتەوە

یەک "سەلامی" دی دەوێ، نێوان بڵێسە و بەستەڵەک
لێرە ئیبڕاهیمی دڵ، ئاوریی لەخۆی بەربۆتەوە

باوەشم دارماڵی ئەژنۆی، ئافەتی بێتاقەتین
جارێ نەتپرسیوە، سینگت، بۆ بەدەم ئەژنۆتەوە

کوا بە تاڵێکی پساوی سەبری من داگیر دەبی
ژانی بێتۆییم، لە ناڵەی زامی دڵ بەستۆتەوە

بەو بەڵێنانەی لە بێژینگی یەقینم هەڵوەرین
نێوی بنژیلم، لەبیر، بێژینگی دڵ، بردۆتەوە

هەر ئەمن نا، هەرهەموو عالەم، بەدووی خاڵێکەوەن
بۆیە خولیاییم لە خاڵی ڕوومەتت مردۆتەوە

خۆرەتاویش بم لەسەر کوێستانی ڕوخسارت، کەسم
هەر ئەوەندەم بۆ لە سۆڵبەندانی ڕووت ڕەش بۆتەوە

چەندی تاریکتر بی، من ئاورتر و ڕووناکترم
ڕوو بە خەرمانەی دڵم، "ئاورێک" منی کردۆتەوە


#ساماڵ_گەنمانی
@samal1946

@chamochya

دڵتەنگەکان باشتر دەزانن
کە هێندەش ئاتاجی خەو نین
تەنیا بیانوویەکە!
تا مرۆڤ لەبەر بێدەرەتانی پەنا بباتە بەر شەو....

و شەوتان هێور


@chamochya

بناغە و چینی دیواری،
تەلاری بەرزی دڵداری
بە سەر لانەی دڵا ڕووخا،
تەپ و تۆزی خەمی هێنا
بە دووی باڵداری ئاواتی،
فڕیوی بێ سەر و شوێنا
دەسا ئەی پاییزی ماتەم،
ئەوەندەم تاسە پێ ماوە
هەموو ئەو یادگارەی،
لەو ژیانی عەشقە جێ ماوە
بە جارێ وەک گەڵا،
سروەی خەزانت گشتی ڕاماڵێ
بە وردی هەر گەڵایێکی،
ببا بۆ قوژبن و چاڵێ
دەبا "با" ڕەش لە دواییدا
لە بیابانی لماویدا
تەپوتۆزێکی وا بێنێ،
هەوا یەکجاری بخرۆشێ
سەری ئەو قوژبن و چاڵە،
وەکوو گۆڕیچکە داپۆشێ
لە پاشانا بە بای وەشتا،
لە سەردا هەوری ڕەش بێنێ
بە گۆڕی یادگارا با،
بە خوڕ تاوێ ببارێنێ
دەبا بمرێ بە یەکجاری،
لە گۆڕی تەنگ و تەنیادا
نیشانە و ناوی هەڵگیرێ،
لەناو بازاڕی دنیادا

بەڵێ با گەردەلوولێ بێ
ئەوی بۆنێکی تۆی لێبێ
وەکوو ئەو پووشە ڕاپێچی،
بکا بۆ گۆڕی تەنیایی
بە گوێیا با بچڕپێنێ،
مقامی عومری کۆتایی
پەپوو هاوڕازی وێرانە و،
نیشانەی مەرگی ڕووناکیی
بە دەنگی شوومی با شیوەن بکا،
بۆ گیانی ناپاکی
لەسەر ئەو دەنگ و ئاوازە،
دە با شەیتانی ڕاڕایی،
سەمای پڕتەوسی بێشەرمی،
بکا بۆ عەشقی کۆتایی
دەبا دەستی ستەمکاریی،
ژیانی پڕ لە زۆرداریی،
لەیادا بیسڕێ شێوەت،
لە یادی ژین و گەردوونا
بەبێ ڕەحمانە غەرقی کا،
لە بەحری قوڵی ونبوونا
ونی کا با لەبەرچاوم،
نیگاری چاوی فێڵاویت
گوڵی بێ بۆنی جوانیت و،
بزەی سەر لێوی ژەهراویت
بەتاپۆی یادگاری تێکشکاوی بێ سەروپێوە
بە دڵداری عومری کورت و
شەوانی جوانەمەرگێوە ...

#ئەحمەد_هەردی

@chamochya

چراغ جەمينت، چراغ جەمينت
سەوگەند به سيمای سافی جەمينت

تا به ڕووت نەقشەن خاڵی موشكينت
پای دڵ ها نه دام زوڵفی چين‏چينت

تا ديدەی مەستت، پوڕ سورمەی توورەن
ديدەی پوڕ ئەسرم خاو جه لاش دوورەن

تا شەمعی ڕووی تۆ نوور مەوارۆ لێش
من كۆگای عومرم ئاير مەشۆ لێش

تا موژەت شاباڵ نيم نگای نازەن
ڕۆحی من چوون تەير، هەر نه پەروازەن

نمەبۆ بازاڕ شەوقی تۆ، بەتاڵ
تا من مەيلی تۆم مەشۆ نه خەياڵ

تۆ هەرسات حوسنت بێ ئەندازەتەر
من هەردەم عەشقم جه نەو تازەتەر ئەر

فام پێش بيا، دڵەی مەجنوون خۆ
بڕياش تەمای لاڵ شيرين ڕازی تۆ

بەڵام بێ سوودەن پەی دڵ ئی هەوەس
مەحاڵەن جه «قەند» دوور گنۆ «مەگەس»

عەشقی تۆ بەی‏تەور، من گرتەن گەردەن
هەر ئينام نه دڵ، تاكه ڕۆی مەردەن

سەد ساڵ دمای مەرگ، جه داخت نەوگوڵ
مزيۆ نه گڵكۆم، «لاله»ی داخ نه دڵ

ئەر بەی بويەری تۆ نه مەزارم
ماچوو: ئەی يارم هێمای داغدارم

هێمای جه داخت مەسۆچۆ دەروون
هێمای مەڕێزنۆ، ديدەم سەيلی هوون

«صەيدی» زامی عەشق، تۆش هێمای وەسۆن
تاسەش به زەروور، پەی ديداری تۆن

#سه‌یدی_هه‌ورامی

@chamochya

ئەگەر غەم بێت بەجارێ ھۆش و فامم یەک کەڕەت لابا
بە چاوی تۆ قەسەم مەیلت لە دڵما زەڕڕە لانابا


بەجارێ ڕۆژی ڕووناکم لەبەر چاو بوو بە شەو ئەمڕۆ
کە دەستی ئەو نیگارەم دی لە دەس بەدکاری سەگبابا

#کەمالی

@chamochya

تا نەڕێژی ئەشکی حەسرەت دیدەیی گریانی غەم
کەی لە حاڵی زاری من حاڵی ئەبن یارانی غەم

مەزرەعەی غەم دەردی بێئاوی ئەکێشێ بۆ خوا
دەست و بردێ دابڕێژە هەوری غەم بارانی غەم

🔘عارف عورفی

@chamochya

بوتێک بووی دەستکردی خۆم،
کڕنۆشم بۆ دەبردی،
له ساتی تەنیاییمدا،
سکاڵام بۆ دەکردی.
بەڵام ئەوڕۆ له دەورت،
کۆمەڵی کڕنۆشبەران،
تفری نەخشی پیرۆزی
پەنجەی منیان هەڵوەران.
شێلایان ئەو شۆخییەی،
جێی سەرنج بوو بۆ هەڵبەست.
ژەنگیان خسته ئەو دڵەی،
پرد بوو بۆ ژێر پێی مەبەست.
کەوابێ تۆ داڕشتەی
دەستم بی و بۆ من نەبیت،
ئیتر بۆچی لەژێر پێم،
ئەنجن به ئەنجن نەبیت؟

پەشێو

@chamochya

نازانی چەن بیرت ئەکەم
نازانی چەن بەتاسەم بۆت
نازانی وەختە وشک بێ
لە سینەما هەناسەم بۆت

https://www.tg-me.com/chamochya

من بە مەرجی هیچ بردنەوەیەک نەهاتمە ناو قومارخانەی ژیان
تا ئەو هەموو دۆڕانە بچنمەوە
من نەهاتم تا ئاوەدانی سەرمەستم بکا
کەچی هەر هەموو وێرانەکانم بردەوە

#شێرزاد_حەسەن
@chamochya

چاو ئەنووقێنم نزیکی
کە کردمەوە ئێجگار دووری
تۆ بۆ من هەرگیز جەستە نیت
تۆ بۆ من ڕۆحی بێ شوێن و
زەمانێکی بەردەوامی
خەون و شیعری!

#شێرکۆ_بێکەس

@chamochya

من دڵدارم، درەختەکانی ناو گیانت ئەنووسمەوە.
کەژەکانی ناو بیناییت ئەخوێنمەوە، دەتۆش گیانە!
بمنووسەوە و بمخوێنەوە، لە سەر هەر گەڵایەک،
کە نەوەرێ‌ و کە ناوەرێ، بمخوێنەوەو بمنووسەوە.

#شێرکۆ_بێکەس
@chamochya

گیانی گیانان:
ئیتر ناتنووسمەوە
ناتهۆنمەوە
چمداوە لە شێعر و شاعیری
داتدەچێنم
لە نێو دڵدا
لە نێو چاودا
لە سەر لێوم،
خۆشەویستیت چۆن
بدرکێنم تا لێم تێبگەی،
جارێکیتر ببەی نێوم

#کازیوە_موکری

@chamochya

#گڕوو

گراویی من!
دوو چاوە دڵڕفێنەکەت دە چاوی من بڕە!
بڵا لە یەک بهاڵێ مۆنجی نادیاری دوو نیگا...
نیگام نە بۆنی سوێسن و هەڵاڵەیە،
کلیلی دەرکی گاڵەیە...

مەلی ئەوین!
دەزانی دووری چەندە سەخڵەتە؟
فریزووە کە هەر ڕەگەی خەمێکە بێئەمان،
بەبێ وچان،
دەکا ڕەگاژۆ بۆ لەشم...
کە ڕەمزی مردن و نەمانمە،
کەڵەی ڕواوی سەر ڕەگەی ژیانمە...

گرینگیی ژین!
کوانێ چۆمی ویشکەڕۆ دەگاتە ویشکەگۆلی دڵ؟
لە ویشکەساڵی یادەکەم...
کوا دڵۆپە ئاوێ بۆ گەرووی هەناسە لێبڕاوی نایەکەم؟

گوڵووکی من!
دەڵێن بەهاری ساڵی نوێ بەڕێوەیە و پەساپەسا دەگاتە مە...
گریم بەهار،
بە گرمەگرمی هەورەوە لەڕێوە هات...
کوا گوڵێ لە شۆرەکاتی قاقڕی ژیانی من،
بە دەم ڕەهێڵەوە بزەی دەبزوێ، هەڵدەدا؟
کە ژینی من هەمووی خەمە،
بەهاری من، بەهاری شین و ماتەمە...

کلیلی دڵ!
لە کوێ کەسێک هەیە لە من بگا؟
کوانێ ئاشنا بە دەردەکەم؟
وزەی قسەم لە هێڵی شادە کورتترە...
لە کوێ بە گوێی کەسێکی ڕادەگا:
وزەی هەناسە سەردەکەی خەزان؟
دڵم دڵی «کەرەفتوو» وە،
پڕە لە ڕاز و ڕەمزی «کەسنەزان»

شنەی بەیان!
ئەمن کە ئاشقی شەماڵ و لێڕەوار و کانی و چیام
بڵێی بەڕۆچکە تین بدا بە خەڵفی هەستی نەسرەوم؟
بڵێی لە ڕژدی ئەستەمی زەمانە سەرکەوم؟
بڵێی زرینگەیەک لە جامی دڵ بگاتە ئاسمان؟
بڵێی نەڕووخێ پردی مان...؟

#عەلی_حەسەنیانی
#هاوار
@chamochya

چاوم لە لکی هومێدە بۆم دانایە
ئەی خۆزگە کە داش دەهات بەری هەبوایە
زیندانە ژیانم دەرەتان نابینم
ئاڵۆز و گرێ پوچکەیە ئەو هەودایە

#خەییام #هەژار

@chamochya

#ئیرەیی

گوڵم...
ئیرەیی دەبەم بەبا گەر لێت کەوێ
خوا نەکردە بتلەرزێنێ.
خۆر بۆ ناڵێت ..؟
دەبێت لە من رۆخسەت گرێ
لە کازیوەی بەیانیدا کە روومەتی ئاڵت گەزێ

ئاو بۆ ناڵێت،..؟
کە ئەی خۆیتۆ
نابێت لە لێوانت کەوێ
بۆ تۆ هەمۆ شتێک و هەر کەسێ
حەرامە...
بە خەیاڵیش گەر لە لاتۆوە تێپەرێ

#عوسمان_شێرزاد
@Osman1355

@chamochya

سا بە زاری بۆ نەناڵێنم لە داخی فیرقەتت
بەندبەندم نەیسیفەت سووتا بە ناری میحنەتت

کەی لە قەبرا تا بە مەحشەر دەردەچێ یادت لە دڵ
زەحمەته بۆ عاشقی دڵدادە تەرکی سوحبەتت

دێیە خاتر تا لە خوانی حوسنی تۆ حەققی نمەک
قەت بە من پایانی نایە زیکری شوکری نیعمەتت

ڕاستە دڵ بەندە لە توڕڕەی زوڵمەتی زوڵفت وەلێ
ڕۆشنە کولبەم لەبەر شەوقی خەیاڵی ڕوومەتت

سوجدەچۆن وەک بیدی مەجنوون سەروەها ئەفکەندەسەر
بۆ تەفەڕڕوج گەر خەرامان بێ لە باغا قامەتت

بێ ڕەمەق وا ئووفتادەم تاقەتی ناڵەم نییە
ئەی تەوانا! بۆ زەعیفان کوانێ ئاخر مروەتت

تەرکی دامەن گرتنی دڵبەر نەکەی سالم بە مەرگ
نامەوێ بڕۆی گیان بێ خار لە خاکی توربەتت!

#سالم

https://www.tg-me.com/chamochya

بمزانیایه،
جارێکی تر،
سێبەرم سێبەرت شانه ناکاتەوه،
بمزانیایه،
جارێکی تر،
خەییامی دەروونی هەڵچووت،
پێکی وشەی شێعرەکانم ناخواتەوه،
پشکۆی هەزار ئاگردانم،
دەهێنایه سەر لێوی خۆم،
تا کتێبی ماچی دوایی بکەینەوه.
بەفری هەموو نسارانم،
دەهێنایه سەر لێوی خۆم،
تا پێت بڵێم چی تر به یەک ناگەینەوه.

#مامۆستا_پەشێو

@chamochya

گەر ئەمزانی لێوەکانت تینووی نەبێ نامخواتەوە
نەدەهاتم ببمە هاوڕێی وەرزەکانی کاڵ بوونەوە


https://www.tg-me.com/chamochya